Samanburður á prófkjörsúrslitum frá 2006

  Það er alltaf gaman að skoða úrslit í prófkjöri hvaða flokks sem er.  Einhver skilaboð hljóta að felast í því hverjir færast upp og hverjir færast niður listann.  Ég hef sett hér innan sviga í hvaða sæti frambjóðendurnir voru í síðustu kosningum:

1.   ( 2 )  Hanna Birna Kristjánsdóttir       
2.   ( 5 )  Júlíus Vífill Ingvarsson
3.   ( 4 )  Kjartan Magnússon
4.   ( 6 )  Þorbjörg Helga Vigfúsdóttir
5.   ( 3 )  Gísli Marteinn Baldursson
6.   ( - )  Geir Sveinsson
7.   (14) Áslaug María Friðriksdóttir
8.   ( 7 ) Jórunn Frímannsdóttir
9.   ( - )  Hildur Sverrisdóttir
10. (10) Marta Guðjónsdóttir

  Til að auðvelda samanburðinn hef ég rauðlitað nöfn þeirra frambjóðenda sem eru heitir (á uppleið) en blálitað þá sem færast niður eftir listanum. 

  Hanna Birna og Júlíus Vífill hljóta að teljast sigurvegarar prófkjörsins í ár.  Sigur Hönnu Birnu var kannski fyrirsjáanlegur.  Sá sem var í 1.  sæti 2006,  gamli góði Villi,  gaf ekki kost á sér í ár.  Hanna Birna ein bauð sig fram í 1.  sætið.  Það væri skrýtið ef hún hefði ekki verið svo gott sem sjálfkjörin í það sæti;  sitjandi borgarstjóri að auki.

  Hástökkvarar prófkjörsins eru tengdasonur gamla góða Villa,  Geir Sveinsson;  Áslaug María og Hildur Sverrisdóttir.  Áslaug hefur verið áberandi á kjörtímabilinu.  Hefur látið til sín taka í nefndum borgarinnar og verið dugleg að tjá sig í blaðagreinum og bloggheimi.  Á þeim fundum sem ég hef setið með henni er hún vel inni í málum,  áhugasöm og samviskusöm.  Ég spái henni frekar frama á sviði stjórnmála.

  Framan af kjörtímabilinu litu margir á Gísla Martein sem keppinaut Hönnu Birnu sem framtíðarleiðtoga borgarstjórnarflokks Sjálfstæðisflokksins.  Heldur hefur dregið í sundur með þeim.  Einhvernveginn skynjaði maður á síðustu misserum að svona gæti farið.  Þó var ég nokkuð viss um að Gísli Marteinn myndi ekki falla neðar en í 4.  sæti.  Það kemur mér á óvart að Þorbjörg Helga færist upp fyrir hann.     

  Sjálfstæðisflokkurinn hefur 7 borgarfulltrúa eins og undanfarin kjörtímabil.  Samkvæmt því er Jórunn dottin út úr borgarstjórn.  Nema flokkurinn bæti við sig borgarfulltrúa.  Jórunn óskaði eftir stuðningi í 3ja sæti.  

Hvað er í gangi?  Af hverju er Hanna Birna á djamminu með Ömma?

Hanna Birna fékk 84% atkvæða í 1. sæti

Samtal fyrir brúðkaup og löngu síðar

 Hver kannast ekki við svona samtal fyrir brúðkaup?  Það má reyndar líka heimfæra þetta samtal upp á Ólaf F.  Magnússon og Hönnu Birnu Kristjánsdóttur þegar verið var að ganga frá ráðningu hans sem borgarstjóra.

.

Ólafur:  Ég get varla beðið.

Hanna: Viltu að ég fari?

Ólafur:  Nei,  láttu það ekki hvarfla að þér.

Hanna:  Elskarðu mig?

Ólafur:  Auðvitað.  Alltaf.

Hanna:  Hefur hvarflað að þér að halda framhjá?

Ólafur:  Nei,  aldrei.

Hanna:  Kysstu mig.

Ólafur:  Hvenær sem er.

Hanna:  Myndir þú einhvertímann beita mig ofbeldi?

Ólafur:  Auðvita ekki.

Hanna:  Má ég alltaf treysta þér?

Ólafur:  Að sjálfsögðu er það þannig.

.

  Tveimur árum síðar er samtalið alveg eins.  Nema að þá er það lesið neðan frá og upp.  .

 

Farið heim og fjölgið ykkur

Þorraþræll

  Nú á bóndadag,  fyrsta degi þorramánaðar,  er ástæða til að syngja kvæðið góða eftir Kristján Jónsson fjallaskáld,  Þorraþræl.  Það má finna skrýtinn flutning á þessu kvæði í tónspilaranum mínum hérna efst til vinstri á bloggsíðunni.  Þannig var fyrir 12 árum að yngri sonur minn átti að læra þetta kvæði í grunnskóla.  Honum þótti það tyrfið og leiðinlegt.  Á þeim tíma var hann að hlusta á rapp.  Ég prófaði að auðvelda námið með því að setja hipp-hopp takt undir þuluna.  Svo datt ég niður á skemmtilega bassalínu með.  Þá þótti mér allt í einu gaman að gera þetta dálítið kjánalegt með því að bæta við viðlagi í anda "Gangsta´ Paradise" sem þá var vinsælt og flétta saman við  "Í sól og sumaryl" eftir Gylfa Ægisson.   

  Ég prófaði að hljóðrita þessa útfærslu og senda á rás 2.  Ekki undir mínu nafni heldur Gleðisveitarinnar Alsælu (til að enginn myndi fatta hvað var í gangi).  Lagið fékk góða spilun á rás 2 og ég fékk góð STEF gjöld fyrir.  Færeyskur tónlistarmaður,  Kristian Blak,  heyrði þetta hjá mér og taldi það eiga erindi á plötu.  Við settum saman vest-norræna safnplötu sem heitir "Rock from the Cold Seas" og höfðum þetta lag með. 

  Það fékk góða spilun í færeyska útvarpinu og fór í 6.  sæti grænlenska vinsældalistans.  Í kjölfarið var mér boðið í sögulegar hljómleikaferðir til Grænlands tvö ár í röð.  Þar spilaði dauðapönksveitin Gyllinæð með mér (smellið á lög Gyllinæðar í tónspilaranum.  Sonur minn,  þá 14 ára er á gítar.  Með honum voru í hljómsveitinni trommusnillingurinn Magnús Magnússon (Eiríkssonar) og Gústi söngvari).  Einnig fékk lagið spilun í Skotlandi og mér var boðið að spila á popphátíð í Edinborg.  Þar spilaði einnig sonur söngvarans í Nazareth og náungi sem varð síðar frægur poppari.  Okkur varð öllum vel til vina.  Ég man bara í augnablikinu ekki undir hvaða nafni popparinn spilaði.  Á þeim tíma var sá flottur en leiðinlegur í poppinu síðar.     

  Núna í upphafi þorra auglýsir Kjarnafæði í útvarpinu súrmat með flutningi á Þorraþrælnum sem byggir á hrynjanda lags míns.  Til gamans má geta að á degi íslenskrar tungu sóttist Kastljós sjónvarpsins eftir því að Gleðisveitin Alsæla myndi flytja Þorraþrælinn.  En illa gekk að finna leynifyrirbærið Alsælu.  Leitað var til Erps "Blaz Rocka" og Sesar A. um að finna Alsælu.  Þeir eru vinir mínir og vissu að ég var ekki tilbúinn að afhjúpa fyrirbærið.  Þeir fluttu því Þorraþrælinn í minni útfærslu í Kastljósi.  Daginn eftir flutti Spaugstofan sína útfærslu á Þorraþrælnum mínum.  Síðan hef ég aldrei verið neikvæður í garð Spaugstofunnar.   

Nú er frost á Fróni,
frýs í æðum blóð,
kveður kuldaljóð
Kári í jötunmóð.
Yfir laxalóni
liggur klakaþil,
hlær við hríðarbyl
hamragil.
Mararbára blá
brotnar þung og há
unnarsteinum á,
yggld og grett á brá.
Yfir aflatjóni
æðrast skipstjórinn,
harmar hlutinn sinn
hásetinn.

Horfir á heyjaforðann
hryggur búandinn:
,,Minnkar stabbinn minn,
magnast harðindin. -
Nú er hann enn á norðan,
næðir kuldaél,
yfir móa og mel
myrkt sem hel.
Bóndans býli á
björtum þeytir snjá,
hjúin döpur hjá
honum sitja þá.
Hvítleit hringaskorðan
huggar manninn trautt;
Brátt er búrið autt,
búið snautt.

Þögull Þorri heyrir
þetta harmakvein
gefur grið ei nein,
glíkur hörðum stein,
engri skepnu eirir,
alla fjær og nær
kuldaklónum slær
og kalt við hlær:
,,Bóndi minn, þitt bú
betur stunda þú.
Hugarhrelling sú,
er hart þér þjakar nú,
þá mun hverfa, en fleiri
höpp þér falla í skaut.
Senn er sigruð þraut,
ég svíf á braut.

Kristján Jónsson
1842 - 1869

Ólafur F. á fljúgandi siglingu

  Magnað frumsamið kvæði Ólafs F.  Magnússonar,  fyrrverandi borgarstjóra,  um Hönnu Birnu Kristjánsdóttur,  núverandi borgarstjóra,  hefur heldur betur slegið í gegn.  Kvæðið flutti Ólafur F.  á borgarstjórnarfundi Reykjavíkur í fyrradag og lesa má það hér á bloggi mínu fyrir neðan:  http://www.jensgud.blog.is/blog/jensgud/entry/1007820/

  Nú hefur verið verið stofnuð á Fésbók síða Ólafi F.  til heiðurs.  Kíkið á hana og skráið ykkur.  Slóðin er:   http://www.facebook.com/group.php?gid=259477901537&v=info#/group.php?v=wall&gid=259477901537

Frábært lag

  Ég veit ekkert um boltaleiki.  Þykir þeir allir hundleiðir áhorfs og er alltaf slétt sama um hverjir böðlast í þessum krakkaleikjum óháð því hverjir eru að sprikla hverju sinni.  Hinsvegar dúkka stundum upp flott lög þegar boltaleikir í sjónvarpinu eru auglýstir.  Sérstaklega er gaman þegar þar eru spiluð lög með The Sex Pistols eða The Clash.  Núna keyrir Sjónvarpið boltaauglýsingu með "intrói" lagsins  I Fought the Law  með The Clash.  Eitthvað EM sem ég veit ekki hvað er.  Kannski Evrópumót boltaleikja óþroskaðra drengja sem hafa ekkert betra við tímann að gera en elta uppblásna tuðru?  Skiptir ekki máli af minni hálfu. Hún gefur upp boltann fyrir að rifja upp þetta ágæta lag sem tvívegis hefur farið hátt á vinsældalista víðsvegar um heim.  Takið eftir skemmtilegum áherslum trommuleiks Toppers Headons sem keyrir glæsilega upp hrynjanda lagsins.

  Er þetta norski fáninn sem trónir í bakgrunni?

"Fingur" Nevilles til rannsóknar

Jólasaga

  Klukkan slær 6 á aðfangadag.  Klukkurnar í Hallgrímskirkju,  við hliðina á litla kotinu,  hringja inn jólin.  Jón og Gunna fálma snöggt í vasa sína,  draga upp tappa og setja í eyrun á sér.  Þegar hávaðinn er liðinn hjá taka þau tappana úr eyrunum og setjast við matarborðið.  Jólamaturinn er girnilegur á að líta:  Kalt hangikjöt,  kartöflur og uppstúf.  Betri gerist hann ekki maturinn í litla kotinu.  Reyndar er hangikjötið ekki raunverulegt hangikjöt.  Jón og Gunna eiga ekki til pening fyrir hangikjöti.  Þess í stað klippti Gunna út úr dagblöðunum ljósmyndir af hangikjöti.  Það kemur eiginlega í sama stað niður.  Myndirnar eru skýrar og snyrtilega útklipptar.  Þar fyrir utan er nóg til af kartöflum og uppstúf.

  Eftir matinn hitar Gunna te og ber fram blandaðar smákökur í skál.  Jón grípur eina og bítur fast í.  Við það brotna í honum nokkrar framtennur.  Gunna gleymdi að segja honum frá því að hún setti steinvölur með í kökuskálina.  Kökurnar eru svo fáar.  Með steinvölunum tekst að láta kökuskálina líta út eins og hálffulla af smákökum.

  Jón sprettur á fætur og gengur að eldhúsvaskinum.  Hann skrúfar frá krananum og fær sér gúlsopa af vatni.  Svo spýtir hann sopanum og brotnu tönnunum í vaskinn.  Það færist bros yfir andlit Jóns.  Hann glottir svo skín í skörðóttan tanngarðinn.  Honum verður hugsað með gleði til þess að hann fái ekki tannpínu í tennurnar í vaskinum.

.

   Jón og Gunna vinda sér í að skiptast á jólagjöfum.  Þau gátu ekki pakkað gjöfunum inn vegna þess að þau eiga hvorki pappír né límband.  Gjöfin frá Gunnu er gjafabréf fyrir legsteini að eigin vali,  ásamt stórri pappírsörk.  Á spássíur arkarinnar hefur Gunna teiknað (frekar illa) allskonar mynstur.  Efst á örkina hefur hún skrifað:  "Þessum vill Jón bjóða í jarðarför sína" og nokkru fyrir neðan miðju:  "Lög sem Jón vill að verði spiluð í útförinni".  Undir þessa texta hefur Gunna dregið láréttar línur.  Þar á Jón að fylla samviskulega út.  

  Jón er þrítugur og þykir gjafirnar frá Gunnu ótímabærar.  En hann veit að það er hlýr hugurinn að baki sem skiptir mestu máli.  Sjálfur gefur Jón henni Gunnu vettlingana sína í jólagjöf.  Hann ætlaði varla að tíma því.  Þetta voru einu vettlingarnir hans.  Hann fann þá á bensínstöð fyrir 8 árum.  Eða réttara sagt stal þeim.  Vegna hlýnandi veðurs á höfuðborgarsvæðinu þarf Jón aldrei að setja á sig vettlingana lengur.  Ef kuldakast bankar á dyr getur hann fengið vettlingana lánaða hjá Gunnu. 

.

  "Hvað eigum við að gera skemmtilegt í kvöld?"  spyr Gunna og leggur frá sér vettlingana.  Hún minnir Jón á að sjónvarpið er bilað,  batteríið útrunnið í útvarpinu,  þau fengu engin jólakort og engar gjafir frá öðrum.  Jón svarar glaðlega:

  "Ég ætla út að ganga.  Þú ættir að gera eitthvað skemmtilegt hérna inni á meðan.  Til dæmis vaska upp og ganga frá eftir matinn.  Svo getur þú klippt út myndir fyrir matinn á morgun.  Það væri frábært ef þú finnur góðar myndir af pörusteik.  Þá getum við haft brúnaðar kartöflur með þeim."

  Jón ætlar að klæða sig í frakka utan yfir jakkafötin.  Í ógáti grípur hann rauðan náttslopp af Gunnu í staðinn, treður sér í hann án þess að taka eftir mistökunum og gengur út í jólanóttina. 

.

  Jón hefur ekki gengið framhjá mörgum húsum er hann mætir ókunnugri konu á gangi. 

. 

 - Gleðileg jól,  segir Jón.

.

 - Sömuleiðis, svarar ókunnuga konan.

.

 - Hvaða ferðalag er á þér?

.

 - Ég veit ekki hvers vegna ég ætti að segja ókunnugum manni frá því.

.

 - Ég trúi þér.  Ég er mannþekkjari.  Ég er viss um að þú ert að segja satt:  Þú veist ekki af hverju þú ættir að segja ókunnugum manni frá því.

.

 - Skiptir svo sem engu.  Ég er að fara í kaffi til mömmu.  Hún býr hér rétt hjá.

.

 - Ertu til í að hafa kynmök við mig fyrst?

.

 - Ja,  já,  ef við verðum ekki lengi.  Ég hringi bara í mömmu og segi að ég tefjist smávegis.

.

 - Hvar býrðu?

.

 - Í gula húsinu,  segir ókunnuga konan,  snýr sér við og bendir á glæsilegt ljósgult þriggja hæða einbýlishús.  Þau halda þegar af stað þegjandi og niðurlút í átt að húsinu.

  Ókunnuga konan tekur upp lykil og stingur í skrána á útidyrahurðinni.  Lykillinn passar ekki.  Konan reynir aftur og aftur.  En lykillinn passar ekki.  Konan horfir ringluð upp eftir húsinu og aftur á dyrnar.  Svo rennur upp fyrir henni ljós:

  - Æ,  mig misminnti.  Ég á ekki heima hérna.  Ég bý í bílnum þarna.

  Hún bendir á fólksbíl hinumegin við götuna.  Dekkin undir honum eru vindlaus og hann er að hruni kominn vegna ryðs.  

  Þau ganga að bílnum og troða sér inn í hann.  Fyrir innan eru aðallega gamlir pizzakassar,  tómar gosflöskur og fjölbreyttar matarleifar. 

  Þau fækka fötum með hraði og vinda sér í bólleikinn.  Á eftir sitja þau sveitt og stara út í loftið.

.

  - Ertu á pillunni?  spyr Jón.  Hann er alltaf svo forvitinn.

.

  - Nei,  notaðirðu ekki smokk?

.

  - Nei,  ég á engan smokk.  

.

  - Djöfullinn sjálfur.  Af hverju spurðir þú mig ekki?  Ég á smokk.

.

  Ókunnuga konan gramsar í töskunni sinni.  Svo dregur hún sigri hrósandi upp smokk.  Hún réttir Jóni smokkinn og segir:

  - Þessi er næstum ónotaður.  Hann hefur í hæsta lagi verið notaður fimm eða sex sinnum og aldrei klikkað.  Nú þurfum við að gera þetta aftur og þú verður að nota smokkinn. Ég ætla sko ekki að verða ólétt eftir ókunnugan mann.  Það á alltaf að nota smokk þegar maður þekkir ekki bólfélagann.  Líka út af kynsjúkdómum.  Ég fárveiktist í síðustu viku af því að ég hef verið kærulaus.  Fékk háan hita og varð alveg máttlaus.  Læknirinn sagði að ég hafi smitast af eyðni.  Ég ætla ekki að fá þann óþverra aftur.     

.    

  Jón sér í hendi sér að þetta er rétt hjá ókunnugu konunni.  Það er ekki um annað að ræða en setja á sig smokkinn og endurtaka leikinn vel varinn.  Síst af öllu vill Jón smitast af eyðni.  Næst síst af öllu vill hann barna ókunnuga konu.

.

.

---------------------------------------------------------------------

Fleiri smásögur og leikrit:

.

- Á rjúpnaveiðum:

http://www.jensgud.blog.is/blog/jensgud/entry/988782/

.

- Ólétta nunnan:

http://www.jensgud.blog.is/blog/jensgud/entry/978349/

.

- Gullfiskur:

http://jensgud.blog.is/blog/jensgud/entry/965433

.

- Flugvélamódel:

http://jensgud.blog.is/blog/jensgud/entry/955702

.

- Miðaldra maður:

http://jensgud.blog.is/blog/jensgud/entry/944608

.

- Leyndarmál stráks:

http://jensgud.blog.is/blog/jensgud/entry/928198

.

- Ættleiðing:

http://jensgud.blog.is/blog/jensgud/entry/916687/

.

- Strákur með sög:

http://jensgud.blog.is/blog/jensgud/entry/903540

.

- Hundur:

http://jensgud.blog.is/blog/jensgud/entry/863130

.

- Boltabulla:

http://jensgud.blog.is/blog/jensgud/entry/718347

.

- Skokkari:

http://jensgud.blog.is/blog/jensgud/entry/606929

.

- Strákur skiptir um gír:

http://jensgud.blog.is/blog/jensgud/entry/538649

.

- Morðsaga:

http://jensgud.blog.is/blog/jensgud/entry/320299

.

- 27 ára:

http://jensgud.blog.is/blog/jensgud/entry/299380

.

- Um borð:

 http://jensgud.blog.is/blog/jensgud/entry/278812

.

- Matarboð í sveitinni:

http://jensgud.blog.is/blog/jensgud/entry/266411

.

- Í plötubúð:

http://jensgud.blog.is/blog/jensgud/entry/260037

Frumsamið kvæði Ólafs F. um Hönnu Birnu

  Hér er kvæðið góða sem Ólafur F.  Magnússon,  fyrrverandi borgarstjóri Reykjavíkur,  orti í morgun um Hönnu Birnu,  núverandi borgarstjóra.  Kvæðið flutti Ólafur F.  núna klukkan rúmlega 17.  Við flutning kvæðisins spilaði Vilhjálmur Þ.  Vilhjálmsson undir á bjöllu og fléttaði inn í stuttan rapp-kafla.  Ólafur F.  þótti lítið til klukkuspils Vilhjálms og rapp-innslags koma.  Þess vegna tvílas hann kvæðið.  Í seinna skiptið án undirleiks Vilhjálms.

Gírug í ferðir, gráðug í fé
Grandvör hvorki er hún né
Gætir hófs í gerðum sínum
Gjafir fær frá banka fínum
Auðmjúk er við auðvalds fætur
Ávallt að þess vilja lætur
Velferð viljug niður sker
Víða hnífinn fína ber
Sjaldnast nálægt sjálfri sér
Sárt í annars bakið fer
Laugaveg, flugvöll láttu kjurrt
lata Hanna farðu burt
í Valhöll heim að vefja þráð
með vinum þínum í síð og bráð.

.

Ólafur víttur á borgarstjórnarfundi

Hanna Birna tekur "Árna Johnsen" á þetta

 

  Fyrir nokkrum árum spurði fréttamaður RÚV háttvirtan alþingismann,  Árna Johnsen,  um kantsteina sem Þjóðleikhúsið hafði greitt fyrir en ekki skilað sér þangað.  Árni sagði steinana vera á brettum úti í bæ.  Þegar fastar var gengið á Árna viðurkenndi hann hægt og bítandi að steinarnir væru niðurkomnir í kartöflugörðunum heima hjá honum sjálfum.  Fréttamaðurinn sakaði Árna um að hafa skrökvað að sér í upphafi viðtalsins.  Þá hrökk þetta gullkorn upp úr Árna:

  "Ég sagði ekki beinlínis ósatt heldur sagði ég ekki allan sannleikann."

  Hanna Birna,  nýjasti borgarstjóri Reykjavíkur,  viðhefur sömu vinnubrögð.  Fyrrverandi borgarstjóri Reykjavíkur,  Ólafur F.  Magnússon,  óskaði eftir upplýsingum um utanlandsflandur Hönnu Birnu á kostnað borgarbúa.  Hanna Birna lagði fram upplýsingar um 6 ferðir upp á 800 þúsund króna heildarkostnað.

  Ólafur taldi sig þekkja vinnubrögð Hönnu Birnu og hafði grun um að hún væri ekki að segja allan sannleikann.  Hún hefði farið í fleiri utanlandsferðir.  Nú hefur Ólafi tekist að grafa upp eina af þeim ferðum.  Það var ferð sem Hanna Birna fór til Feneyja.  Sú ferð kostaði borgarbúa 340 þúsund.

  Til gamans má geta að í borgarstjóratíð sinni fór Ólafur F.  aðeins í eina utanlandsferð.  Það var ódýr boðsferð til Færeyja.

  Á borgarstjórnarfundi kl. 14 í dag flytur Ólafur F.  vantraust á Hönnu Birnu.  Fundinum verður útvarpað á fm 98,3 og á www.reykjavik.is.  Sjá ennfremur heilsíðuauglýsingu á bls. 7 í Fréttablaðinu í dag.

  Á ljósmyndinni efst er Hanna Birna þessi til hægri.  Hin manneskjan heitir Óskar Bergsson.  Sá fékk háðuglega útreið í prófkjöri framsóknarmanna á dögunum.  Var hafnað svo glæsilega að lengi verður í minnum haft.

  Næsta víst er að fundurinn verði fjörlegur og í anda myndbandsins sem þessi færsla er tengd við. 

Slagsmálaþing

Jenka - og allt verður vitlaust! Þvílíkt stuð!

  Í þriðja þætti  Færibands  Bubba á rás 2 í kvöld með Ragga Bjarna sem viðmælanda fóru þeir félagar enn og aftur á kostum.  Aldeilis frábært útvarpsefni.  Raggi er snilldar sögumaður og þeir Bubbi ná einstaklega vel saman á þann hátt að spjall þeirra fer á gott flug.  Fyrir þá sem misstu af þættinum eða vilja heyra hann aftur er hægt að slá honum - og fyrri þáttunum - upp á www.ruv.is.

  Þeir félagar komu inn á fyrirbærið jenka.  En játuðu vanþekkingu á þessu fyrirbæri.  Jenka er finnskur dans.  Hvar sem tveir Finnar eða fleiri koma saman brestur á með jenka.  Finnar verða jafn friðlausir að dansa jenka og Færeyingar að stökkva í hringdans þegar þeir hittast.  Mestu töffarar Finna bregða á jenka hvenær sem færi gefst.  Jenka er málið í Finnlandi.   

 

Nokkrir laufléttir

  Þessa brandara fékk ég senda.  Og ég skemmti mér konuglega við að skoða þá.  Mér er ljúft að leyfa þeim að létta ykkur lundina líka.  Fyrir þá sem ekki þekkja til skal upplýst að flugvélin sem er nær á ljósmyndinni fyrir ofan er í eigu Ríkharðs Branssonar og fyrirtækis hans,  Virgin.  Enska orðið  virgin  þýðir  jómfrú.  Hin flugvélin er belgísk.  Enska orðið  slut  þýðir  drusla.

"Ekki éta harða hlutinn á bakinu á honum.  Hann veldur viðrekstri!"

"Skolið kúlurnar hér"

Bókin hans:  "101 stelling".  Bókin hennar:  "102 afsakanir".

"Ég er ekki að selja kynlífsþjónustu!  Ég sel smokka með prufukeyrslu."

Kvikmyndarumsögn

 - Titill:  Vertu þín eigin hetja  (Whip It)

 - Leikstjóri:  Drew Barrymore

.

 - Einkunn: *** (af 5)

.

  Þessa umsögn þarf að lesa með þeim fyrirvara að karl kominn hátt á sextugsaldur er ekki í markhópi myndarinnar.  Ástæðan fyrir því að ég kíkti á myndina var sú að ungur sonur grænlenskrar vinkonu minnar millilenti á Íslandi á leið frá Grænlandi til Danmerkur.  Hann bað mig um að fara með sér á myndina.  Það er ekkert kvikmyndahús á Austur-Grænlandi.

  Ég var afar neikvæður í garð myndarinnar til að byrja með.  Hugsaði með mér:  "Hverjir voru að gefa myndinni 4 stjörnurnar sem vitnað er til í auglýsingum?  Ég gef henni eina stjörnu og það bara fyrir fín lög með The Ramones og Radiohead."

.

  Í upphafi myndar eru kynntar til sögunnar mæðgur í smáþorpinu Bodeen í Texas.  Mamman er óþolandi smáborgari.  Hana dreymdi á sínum tíma um að ná árangri í fegurðarsamkeppni.  Komin á miðjan aldur reynir hún að láta drauminn rætast í gegnum 17 ára dóttir sína,  Bliss (Ellen Page), og aðra á barnsaldri. 

  Lítill villingur bærist í Bliss.  En hún vill þóknast mömmunni.  Bliss fær áhuga á rúlluskautakeppni.  Þar er engin elsku mamma.  Stelpurnar beita kjaftshöggum og fleiri óþokkabrögðum sem virðast vera leyfileg í keppninni. 

  Inn í líf Bliss blandast rómatík. Hún byrjar að vera með söngvara í rokkhljómsveit.  Það gengur á ýmsu í þeirra sambandi.  Það er töluvert drama. 

  Er líður á myndina dúkka upp ágætir brandarar í bland við gamalkunnar klisjur.  Bliss verður hjólaskautahetja án vitneskju foreldranna.  Bliss verður meiri töffari er fram í sækir.  Gerir loks uppreisn gegn mömmu sinni og hennar smáborgaralegu viðhorfum.  Það er gælt við vangaveltur um hvort hjólaskautakeppni snúist um það eitt að sigra eða hvort þetta sé léttur leikur sem fyrst og fremst eigi að hafa gaman af.  Ég vona að það eyðileggi ekki neitt fyrir þeim sem eiga eftir að horfa á þessa mynd þó uppljóstrað sé að í úrslitakeppninni tapar lið Bliss.  Þau úrslit eru ásættanleg í ljósi boðskapar myndarinnar:  Að mestu skiptir að vera sín eigin hetja,  standa með sjálfum sér fremur en vera í því hlutverki að þóknast öðrum eða níðast á öðrum.  Í fljótu bragði man ég ekki eftir annarri kvikmynd í þessum dúr þar sem lið söguhetjunnar tapar í úrslitaleik í lok myndar.  Og það eftir að spenna hefur verið byggð upp fyrir að sigurinn skipti öllu máli.

.

  Þrátt fyrir klisjurnar í myndinni er hún einnig - eins og Bliss - í uppreisn gegn klisjunum.  Þetta ristir ekki mjög djúpt en nóg til að vekja áhorfandann til umhugsunar um hvað gefi lífinu fyllingu. Hvað skiptir máli þegar upp er staðið.

  Það er hellingur af þekktum leikurum í myndinni.  Ég er klaufi í að muna nöfn leikara.  Aðalleikonan,  Ellen Page,  er skemmtilega lík Unni Birnu fegurðardrottningu og stundum Kolfinnu Baldvinsdóttur.  Hún býður af sér góðan þokka.  Það er auðvelt að hafa samúð með henni. 

  Ég get mælt með þessari mynd sem góðri skemmtun fyrir unglinga.  Grænlenski strákurinn var mjög hrifinn af henni.  Ekki síður vakti honum mikla og gleðilega undrun að gert var hlé á myndinni til að hann gæti farið út að reykja.  Þar sem hann stóð innan um tugi unglinga að reykja úti fyrir Kringlubíói blasti við skilti sem boðar bann við reykingum.  Það þótti stráksa undarlegt.  Hann gaf myndinni 4 stjórnur.  Ég gef henni 3 stjörnur.  Það er rausnarlegt af minni hálfu.  Stráksi er í markhóp myndarinnar.  Ekki ég. 

.

  Það er gaman að sjá íslenskan titil á myndinni.  Vertu þín eigin hetja  er góð þýðing á  Whip it.  Til fyrirmyndar.

Stórfurðuleg hráefnasamsetning

  Íslenskt sómafyrirtæki nokkurt heitir Sómi.  Það er til sóma.  Sómafyrirtækið framleiðir meðal annars Sóma samlokur og flatbökur sem kallast Sómapizzur.  Ýmislegt fleira framleiðir sómafyrirtækið Sómi.  Ég þekki ekkert til sómafyrirtækisins og veit því ekki hvort Sómasalöt séu ný í vörulínu Sóma.  Hitt veit ég að mér varð á að skoða dollu með Sóma eggjasalati.  Mér varð verulega brugðið er ég las innihaldslýsinguna.  Þar stendur að 65% innhaldsins sé majónes og 62% innihaldsins sé egg.

  Mér varð svo um við þennan lestur að ég man ekki hvernig hráefnasamsetningin er að öðru leyti.  Þó er áreiðanlega krydd og eitthvað fleira í salatinu.  Þegar ég er búinn að ná andlegu jafnvægi eftir þessi ósköp ætla ég að skoða stórfurðulegu hráefnasamsetninguna betur.    

Frétt vikunnar

  Nýverið tók hver stórmarkaðurinn á fætur öðrum upp á því að hækka verð á innkaupapokum úr 15 krónum í 20.  Í Morgunblaðinu var þetta afgreitt sem stórfrétt.  Enda um verulega mikla verðhækkun að ræða í % talið.  Það er góð fréttamennska að "fókusera" frá hinu almenna yfir á tiltekið dæmi.  Vond fréttamennska er þegar sagt er frá því að 13 íssalar í Reykjavík hafi orðið uppvísir af því að selja óhreinan (gerlamengaðan) ís án þess að fram komi neitt um það hvaða íssalar eru sekir og hverjir saklausir..

  Í Morgunblaðinu var fréttin af verðhækkun á innkaupapokum "fókuseruð" á þá staðreynd að í Bónus var verðið hækkað úr 15 kr.  í 20 á meðan innkaupapokinn kostaði ennþá 15 kr. í Krónunni.  Þessu var slegið upp í fyrirsögn og endurtekið í sjálfri fréttinni.  Eigandi Krónunnar,  Kaupás,  er aðal auglýsandinn í Morgunblaðinu.  Það er skemmtileg tilviljun. 

  Af þessu spannst mikil og fróðleg umræða.  Í umræðunni upplýstist að eigandi Bónus, 10-11 og Hagkaups er með innkaupapoka framleidda í útlöndum.  Kaupás er hinsvegar með rammíslenska og þjóðlega innkaupapoka í Krónunni,  11-11,  Nóatúni og Kjarvali.

.

  Það var dagaspursmál hvenær Kaupás myndi hækka verð á sínum innkaupapokum úr 15 kr. í 20.  Nú hefur það gerst.  Þetta er stórfrétt vikunnar.  Alveg eins og þegar verðið á innkaupapokum Bónus hækkaði í verði. 

  Frétt um verðhækkun hjá Kaupási á meira erindi til lesenda Morgunblaðsins en sama verðhækkun hjá matvöruverslun sem auglýsir lítið sem ekkert í Morgunblaðinu.  Samt hef ég ekki fundið fréttina um þetta í Morgunblaðinu.  Það er allt í lagi.  Ég tek bara að mér að slá upp fréttinni í staðinn.  Og tel það ekki eftir mér.

.

.

.

Fjármálakreppa yfirvofandi

Færeyskt dagblað í eigu Íslendinga

 

   Það er pínulítið gaman að færeyska dagblaðið Dimmalætting sé komið í eigu Íslendinga.  Og þó.  Lengi vel var Dimmalætting aðal dagblaðið í Færeyjum.  Alvarlegt,  íhaldsamt og virðulegt dagblað sem studdi og styður að Færeyjar séu hluti af danska sambandsveldinu.  Svokallað sambandsblað.  Að mörgu leyti færeyski Mogginn.  Haus blaðsins er meira að segja skrifaður með líkri gotneskri skrautskriftarleturgerð og haus Morgunblaðsins.  Dimmalætting hefur komið út síðan 1800-og-eitthvað.

  Lengst af var Dimmalætting í broti sem er tvöfalt stærra en íslensku dagblöðin.  Svipaði þannig til margra evrópskra stórblaða.  Nafnið Dimmalætting þýðir = dimmu léttir = árblik/morgunskíma.  

  Annað dagblað í Færeyjum,  Sósíalurin,  hefur sótt í sig veðrið og er nú vinsælasta blaðið í Færeyjum.  Nafn þess má túlka sem Alþýðublaðið eða Almenningur.  Það er "óháð".  Það er að segja í eigu starfsmanna og ótengt pólitískri hreyfingu.  Blaðamenn eru samt flestir sjálfstæðissinnar.  Hallast að aðskilnaði frá danska sambandsríkinu.  En gera blaðið ekki út á harða pólitík í þá átt.  Er meira upptekið af léttum fréttaflutningi og sinnir vel dægurmálum.  Umfjöllun um músík,  leiklist,  íþróttum og þess háttar.  

  Sósíalurin sér meðal annars um netmiðilana www.portal.fo og www.planet.fo og rekur poppmúsíkurstöðina Rás 2.  Aðrar útvarpsstöðvar í Færeyjum eru ríkisútvarpið og kristilega stöðin Lindin.  Rás 2 er nokkurs konar Effemm957.  Mig minnir að www.portal.fo sé í eigu færeyska símafélagsins fremur en færeyska útvarpsins þó fréttirnar séu skrifaðar af blaðamönnum Sísíalsins.  Er samt ekki alveg viss.

 Ég les alltaf Dimmalætting og hef sérlega gaman að teiknimyndaskrýtlum Ferdinands.  Þær eru svo ófyndnar að undrun vekur. 

  

  

Dimmalætting í íslenska eigu

X-factor og Idol stórskaðlegir samfélaginu

  Flestir halda að sjónvarpsþættir á borð við X-factor og Idol séu meinlausir.  Þeir séu saklausir samkvæmisleikir.  Þeir hafi jafnframt þann kost að óþekktum söngvurum er gefið tækifæri á skjótfenginni frægð og frama.  Sálfræðingurinn Anna D. Hentze er heldur betur á annarri skoðun.  Hún fullyrðir að þessir sjónvarpsþættir upphefji einkenni eineltis og hafi þannig skaðleg áhrif samfélagið. 

  Það gerist þannig:  Áhorfendur skilgreina ósjálfrátt dómarana sem fyrirmyndir.  Gallinn sé sá að dómararnir hiki ekki við að gera lítið úr keppendum.  Hæða þá með niðrandi athugasemdum og slá sér upp á meinfýsnum bröndurum á kostnað keppendanna.  Verstu útreið fá þeir keppendur sem standa sig ekki vel.  Vinsældir þáttanna snúast að verulegu leyti um að niðurlægja þá.  Fórnarlambið er í erfiðri stöðu.  Þó það reyni að bera hönd fyrir höfuð sér eru hlutföllin 3 dómarar á móti einum keppanda.  Til viðbótar leika framleiðendur sér að því að klippa þættina þannig að fórnarlambið líti sem kjánalegast út í sjónvarpinu.  Það selur. 

  Áhorfendur fá þau skilaboð að það sé í góðu lagi að niðurlægja aðra.  Og ekki bara það heldur að þannig framkoma sé beinlínis vænleg til vinsælda.

  Ég hef ekki sett mig nægilega vel inn í þessa þætti til að átta mig á hvort eitthvað er til í kenningu sálfræðingsins knáa.  Veist þú eitthvað um þessa þætti?

.

Bráðnauðsynlegt að leiðrétta

  Ég er að hlusta á  Færibandið  með Bubba á rás 2.  Hann er að spjalla við Ragnar Bjarnason.  Þetta er framhald af síðasta þætti.  Þeir félagar fara á kostum sem fyrr.  Enda Raggi Bjarna bæði skemmtilegur og einstaklega skemmtilegur sögumaður.  Það fær allt ævintýraljóma í frásögn hans.  Þar fyrir utan hefur hann átt langan og farsælan feril sem tónlistarmaður.  Það er gleðiefni að Bubbi boðar þriðja þátt  Færibandsins  með Ragga.

  Eitt af því skemmtilega við frásagnir Ragga af sjálfum sér er að fer frjálslega með staðreyndir.  Misminnir margt og ruglar saman ártölum og persónum.  Þegar Eðvarð Ingólfsson skráði ævisögu Ragga fyrir margt löngu fór mikil vinna í að leiðrétta þessar sögur með því að bera þær undir sögupersónur. 

  Rétt í þessu var Raggi að nefna lagið  Hvert er farið blómið blátt?  Hann sagði það vera eftir Bob Dylan.  Ég veit ekki til að Bob Dylan hafi sungið þetta lag.  Það er eftir Pete Seeger og er þekktast í flutningi Kingston tríó.  Einnig með Mosa frænda.  Líka með Savanna tríói undir nafninu  Veistu um blóm sem voru hér?  Hér er það Marlene Dietrich sem syngur lagið,  Sag mir wo die blumen sind?

Glæsileg listaverk sem birst hafa í kaffibolla

  Hver kannast ekki við að fá sér kaffi í bolla,  hella út á það flóaðri mjólk og tala í símann um leið?  Ósjálfrátt og án þess að taka eiginlega eftir því er hrært með teskeið ofurhægt í kaffinu.  Þegar símtalinu lýkur er skyndilega fyrir framan mann í bollanum nett og fallegt myndlistaverk. 

  Það hefur ekkert verið átt við þessar myndir í tölvu (fótósjopp). 

Mikilvægt að leiðrétta

  Ég sat límdur yfir undanúrslitakvöldi Söngvakeppni evrópskra sjónvarpstöðva í kvöld.  Eins og allir landsmenn.  Nei,  þetta er reyndar ekki rétt.  Mér varð á að snæða á veitingahúsi þar sem þessi viðbjóður djöfulsins var í gangi.  Ókey,  þetta er kannski yfirdrifin lýsing.  Júrivisjón er bara ekki mín bjórdós.  Mér heyrðist samt vera þolanlegt að hlusta á Dalvíkinginn Matta Matt kráka (cover song)  Paradise City  Guns N´Roses.  Svona einu sinni að minnsta kosti.  Ég er jákvæður gagnvart Dalvíkingum og Guns N´Roses.  Einkum eftir að ég var staddur í Stokkhólmi í Svíþjóð er söngvari GNR,  Axl Rose,  beit þar hótelþjón í fótinn.  Við það missti Axl út úr sér gervigóminn sem hélt áfram að hanga samanbitinn í buxum þjónsins eftir að lögreglan stakk Axl í steininn.  Það er að segja gómurinn hékk í buxunum en ekki þjónninn.

  Í því broti af Söngvakeppninni sem ég sá mér til leiðinda á matsölustað fluttu Ingó "veðurguð" og Jóhanna (nei,  ekki Sigurðardóttir) Guðrún lagið  It Ain´t Me,  Babe.  það var kynnt sem Johnny Cash  lag.  Hið rétta er að þetta er Bob Dylan lag.  Vissulega hefur Jón Reiðufé raulað lagið af sinni alkunnu snilld inn á plötu.  Eins og margir aðrir.  En þetta er eitt þekktasta lag Dylans.  Sívinsælt í hans flutningi og Joan Baez,  Bryans Ferrys,  Duane Eddy,  Jan & Dean,  Peter Paul & Mary,  Earls Scruggs,  Nancy Sinatra,  The Turtles og fjölda annarra.  Flott lag.  1000 sinnum flottara en allt Júróvisjón prump til samans.

  Takið eftir hvernig söngurinn hjá Dylan flýgur óvænt háflug á 48. sek.

Lögin tvö sem komust áfram

Undarleg uppákoma í matvöruverslun

  Ég átti erindi í matvöruverslun.  Þar er á boðstólum brauðmeti í sjálfsafgreiðslu.  Kleinur,  snúðar og fleira er í aðgreindum plasthólfum.  Viðskiptavinurinn tekur sér töng í hönd og setur í poka brauðið sem hugurinn girnist.  Er ég geng framhjá brauðrekkanum sé ég út undan mér hvar háaldraður maður fer með krumluna í eina skúffuna,  brýtur þar vænan bút af kleinu og stingur upp í sig.

  Þetta þótti mér furðulegt og segi hvasst við karlinn:  "Hvurn djöfulinn ertu að gera,  maður?"

  Karlinn hrökk við og sagði afsakandi:  "Ég átti að vera í kökuveislu hjá frænku minni á Selfossi núna.  En komst ekki því bíllinn fór ekki í gang."

Kvikmyndarumsögn

 - Titill:  Mamma Gógó

 - Handrit og leikstjórn:  Friðrik Þór Friðriksson

 - Helstu leikendur:  Kristbjörg Kjeld,  Hilmir Snær Guðnason,  Margrét Vilhjálmsdóttir,  Gunnar Eyjólfsson...

 - Tónlist:  Hilmar Örn Hilmarsson

 - Einkunn: **** (af 5)

  Kynningarmyndbandið (treiler) fyrir  Mamma Gógó  lofar ekki góðu (sjá hér fyrir neðan).  Ekki söguþráðurinn heldur.  Hann fjallar í stuttu máli um ungan kvikmyndaframleiðanda sem á í fjárkröggum.  Á sama tíma er móðir hans greind með Alzheimer,  heilahrörnunarsjúkdóm sem rænir sjúklinginn minninu.  Myndin snýst um þessi vandamál:  Blankheit sonarins og minnistap móðurinnar. 

  Ég hefði ekki nennt á þessa kvikmynd nema vegna fyrri verka Friðriks Þórs og Hilmars Arnar Hilmarssonar.  Hæst hefur samstarf þeirra risið í meistaraverkinu marg verðlaunaða  Börn náttúrunnar.  

  Mamma Gógó  hefst einmitt á því að verið er að frumsýna  Börn náttúrunnar.  Þar með er tónninn sleginn.  Áhorfandinn er hrifinn inn í hið heillandi hugljúfa andrúmsloft þeirrar kvikmyndar.  Jafnframt er augljóst að  Mamma Gógó  er ævisöguleg mynd höfundar.  Eins og margar fyrri myndir hans.   

  Hilmir Snær leikur Friðrik Þór.  Blessunarlega reynir hann ekki að herma eftir Friðriki.  Hvorki í útliti né töktum.  Engu að síður er hann afar sannfærandi sem Friðrik Þór - eða hvaða kvikmyndaframleiðandi sem væri í þessari sömu stöðu:  Blankheitum og tilheyrandi vandamálum.  Ásamt því dapurlega ferli þegar móðir hans tapar minninu jafnt og þétt. 

  Kristbjörg leikur mömmuna af stakri snilld.  Þetta er hjartnæm dramamynd.  En jafnframt blönduð hárfínni gamansemi sem heldur myndinni út í gegn á þeim dampi að áhorfandinn er að fá kökk í hálsinn en missir sig á næsta andartaki í hláturköstum.  Hver bráðfyndna senan rekur aðra.  

  Faðir Friðriks Þórs er fallinn frá en er samt í stóru hlutverki (Gunnar Eyjólfsson).  Þar á meðal er fléttað inn í myndina svart-hvítum klippum úr gamalli kvikmynd,  79 af stöðinni,  með Kristbjörgu og Gunnari.  Fyrst var ég á því að gömlu svart-hvítu klippunum væri ofaukið.  Þegar á leið fóru þær hinsvegar að gefa myndinni dýpt og skerpa á fegurð sögunnar. 

  Mamma Gógó  er mögnuð mynd.  Það var djarft uppátæki hjá Friðriki Þór að gera mynd sem einskonar óbeint framhald eða hliðarmynd við  Börn náttúrunnar.  Það er varla hægt að fylgja þeirri mynd eftir.  Þetta er svolítið eins og ef Paul McCartney tæki upp á því að gera plötu sem gerði út á  Sgt.  Peppers... plötu Bítlanna.   Það er óhugsandi að svoleiðis dæmi yrði vel heppnað.  En Friðriki Þór tekst hið illmögulega með glæsibrag.    

  Tónlist Hilmars Arnar er rjómi rjómans.   

  Mamma Gógó  eykur skilning á Alzheimer.  Sjálfur þekki ég þennan sjúkdóm því faðir minn varð fórnarlamb hans.  Áður en pabbi veiktist vissi ég ekkert um Alzheimer.  Það er óvíst að þeir sem ekki þekkja til sjúkdómsins átti sig á því hvers vegna Gógó á til að verða ofur ókurteis.  Sjúkdómurinn eyðir hömlum á því hvað er við hæfi að segja "í hreinskilni",  samanber þegar Gógó lýsir tengdadóttur sinni sem ljótri fyrir framan hana. 

  Ég hvet fólk til að skreppa í kvikmyndahús og eiga góða kvöldstund.