100 bestu plötur Íslandssögunnar

  Í dag var hringt í mig frá Senu og ég beðinn um að taka sæti í dómnefnd sem velur 100 bestu plötur Íslandssögunnar.  Félag íslenskra tónlistarmanna,  rás 2 og Tónlist.is standa að þessu ágæta framtaki.  Á www.tonlist.is/100bestu má sjá lista yfir þær plötur sem þegar hafa verið tilnefndar og þar er óskað eftir tillögum um plötur sem mönnum þykir vanta á listann.

  Til gamans má geta að 1983 stóð ég fyrir könnun um bestu íslensku plöturnar og birti í Poppbókinni.  Niðurstaðan varð þessi:

1.  Á bleikum náttkjólum - Megas & Spilverk þjóðanna

2.  Ísbjarnarblús - Bubbi

3.  Sumar á Sýrlandi - Stuðmenn

4.  Lifun - Trúbrot

5.  Fingraför - Bubbi

6.  Plágan - Bubbi

7.  Geilsavirkir - Utangarðsmenn

8.  As Above - Þeyr

9.  Sturla - Þeyr

10. Mjötviður mær - Þeyr

11. Gæti eins verið - Þursaflokkurinn

12. Breyttir tímar - Egó

13. Rokk í Reykjavík - Ýmsir

14. Drög að sjálfsmorði - Megas

15. Iður til fóta - Þeyr

  18 árum síðar endurtók Dr. Gunni leikinn og birti í bókinni frábæru  Eru ekki allir í stuði?.  Þar var ég að sjálfsögðu í dómnefnd svo öllu sé til haga haldið.  Dr.  Gunni kallaði listann "Plötur aldarinnar".  Niðurstaðan varð:

1.  Ágætis byrjun - Sigur Rós

2.  Debut - Björk

3.  Á bleikum náttkjólum - Megas & Spilverk þjóðanna

4.  Sumar á Sýrlandi - Stuðmenn

5.  Lifun - Trúbrot

6.  Ísbjarnarblús - Bubbi

7.  Geislavirkir - Utangarðsmenn

8.  Með allt á hreinu - Stuðmenn og Grýlurnar

9.  Kona - Bubbi

10. Life´s too too Good - Sykurmolarnir

11. Sturla - Spilverk þjóðanna

12. Hinn íslenski þursaflokkur - Þursaflokkurinn

13. Gling gló - Björk og Tríó Guðmundar Ingólfssonar

14. Lengi lifi - Ham

15. Homogenic - Björk

  Athygli vekur að 5 af þeim plötum (feitletraðar) sem voru í efstu sætum Poppbókarinnar héldu sætum frá #3 - #7 þessum 18 árum síðar.  Kíkið á ofangreinda netslóð og takið þátt með því að tilnefna plötur sem ykkur þykir vanta á listann.

Arðgreiðslur - brosleg saga

 

  Eftirfarandi frásögn fékk ég senda.  Hún á erindi í umræðuna um arðgreiðslur til eigenda HB Granda og fleiri fyrirtækja.  Það fylgdi ekki sögunni hvort hún er sönn.  En hún hljómar kunnugleg:

  Simmi, eigandi Söluturns Simma, reiknar ekki með að arðgreiðslur fyrir árið 2009 verði nema kannski helmingur af útgreiddum arði ársins 2008.

 Simma greiddi sjálfum sér arð af rekstri félagsins á síðasta ári, 10 milljarða króna, þrátt fyrir að söluturninn hafi verið og sé í vanskilum við helstu lánadrottna.

 „Þetta var tala sem ég fann út miðað við veltu án þess að reikna málið í drep. Ég hafði rosalega góða tilfinningu fyrir rekstrinum,  var með margar mjög sterkar spólur í leigu, Spædermann þrjú og svona  – þannig að ég ákvað að gefa mér smá klapp á bakið,“ segir Simmi, en  viðurkennir um leið að eftir á að hyggja hafi hann sennilega farið aðeins fram úr sér. Hann bendir samt á að hann hafi bara gert eins og allir aðrir. 

 „Ég treysti á að stjórnvöld sýni þessu skilning, afskrifi lán og komi með pening inn í reksturinn. Það hefur aldrei verið jafn mikilvægt og nú að halda þessum litlu vídeóleigum gangandi. Ef vídeóleigurnar fara á hausinn er einungis verið að fjölga atvinnulausum, draga úr þjónustu við fólkið í landinu og refsa duglegum mönnum fyrir heimskreppuna. Hrun húsnæðislánakerfisins í Bandaríkjunum er ekki okkur að kenna.“

Skúbb! Íslendingur semur músík fyrir James Bond auglýsingu

  Það er alltaf gaman þegar Íslendingar hasla sér völl úti í hinum stóra heimi.  Ekki síst þegar um tónlistarfólk er að ræða.  Það hefur farið hljótt að japanska fyrirtækið Sony fékk íslenskan tónlistarmann til að semja músík fyrir auglýsingu er byggir á leiknu James Bond atriði.  Nýjasti leikarinn sem túlkar hlutverk James Bond er þar í aðalhlutverki.  Í fljótu bragði man ég ekki hvað hann heitir og nenni ekki að "gúgla" það upp.  Það vita allir hver sá náungi er þó að ég muni ekki nafnið.  Enda auli í að muna nöfn kvikmyndaleikara.  En ég man nafn Íslendingsins sem var fenginn til að semja tónlistina.  Hann heitir Ólafur Arnalds.  Athugið að hann er ekki sama manneskja og Ólöf Arnalds.  Samt eru þau náskyld.

  Athugasemd bætt við klukkan 20.15: Smávægileg ónákvæmni er í færslunni.  Það hefur nefnilega verið hætt við að nota músík í auglýsingunni og hún hefur þegar verið tekin til sýningar.  Eftir stendur að Ólafur Arnalds var fenginn til verksins og skilaði því af sér.

 

Hatrömm og illvíg deila, skemmdarverk og eignaspjöll

  Í Vogum er stærsta og fallegasta vatn Færeyja (jú,  vatn getur víst verið mis fallegt.  Það fer eftir umgjörð þess).  Flestir kalla það í daglegu tali einfaldlega Vatnið.  Aðrir kalla það Leitisvatn.  Enn aðrir kalla það Sörvogsvatn.  Vegna sívaxandi straums erlendra ferðamanna til Færeyja var fyrir ári síðan gripið til þess ráðs að merkja vegvísi með nafninu Leitisvatn og setja upp skammt frá flugstöðinni í Vogum. 

  Íbúar í Sörvogi brugðust ókvæða við.  Þeir eru harðir á því að ef vatnið heiti eitthvað annað en Vatnið þá sé það Sörvogsvatn.  Þeir áköfustu ganga svo langt að þeir hafa ítrekað fjarlægt vegvísinn.  Hann er jafnharðan settur upp aftur og hafður þeim mun sterkbyggðari sem hann er oftar fjarlægt.  Ekkert dugir samt skiltinu til verndar.  Skemmdarvargarnir nota greinilega öflugri tækjabúnað eftir því sem skiltið er stöndugra. 

  Svo rammt kveður að þessu að skiltið fær aldrei að standa óáreitt lengur en í hæsta lagi viku.  Oftar er það þó horfið 3 - 4 dögum eftir að það er sett upp.  Lögreglan sinnir málinu illa sem ekkert og liggur undir grun um að vera hlutdræg.

  Íbúar Sörvogs vita hverjir standa að hvarfi skiltisins,  hverjir fjármagna vinnuna við að fjarlægja það og hverjir framkvæma.  En þeir standa saman og kjafta ekki frá.  Þeim verður heitt í hamsi þegar málið ber á góma.  Þykir merkingin vera ófyrirgefanleg svívirða. 

  Nafnið Sörvogsvatn kemur fyrir í eldri heimildum en Leitisvatn.  Leitisvatn kemur fyrst fyrir í skráðum gögnum 1898.  Síðan hefur það nafn notið stöðugt vaxandi vinsælda í skráðum gögnum og menn vilja meina að sé í dag ráðandi nafn á vatninu,  hvort sem er á landakortum,  ferðabæklingum eða öðru.

  Færeyski þjóðarsnapsinn heitir Lívsins vatn.  Þar er um orðrétta þýðingu á Ákavíti að ræða.  Það þarf enginn að deila um Lífsins vatn.     

Færeyjar 14 : Ísland 1

 

   Ég horfi aldrei á fótbolta.  Þess vegna missti ég af leiknum Færeyjar-Ísland í gær.  Mér var hinsvegar sagt frá leiknum ásamt þeim tíðindum að Færeyingar væru að bursta Íslendinga.  Þá fór ég á stúfana að kanna málið.  Þetta er mjög merkilegt mál og ekki allt sem sýnist.

  Færeyingar vorkenna Íslendingum svo gífurlega vegna efnahagshrunsins að þeir sendu hingað lið með amatörum að uppistöðu til.  Menn sem fundust á rölti uppi í færeyskum brekkum og höfðu aldrei spilað alvöru fótboltaleik áður.  Þetta átti að tryggja að Íslendingar fengju að vinna leikinn.

  Í einhverjum galsa og kæruleysi skoruðu Færeyingar fyrsta mark leiksins.  Næst skoruðu Íslendingar,  eins og ráð var fyrir gert.  Nema Íslendingar skoruðu sjálfsmark.  Þá var staðan 2:0 fyrir Færeyjar.  Færeyingar urðu miður sín.  Þeim þótti sem þeir væru orðnir ógeðslega ókurteisir við gestgjafa sína og bræður er eiga um sárt að binda vegna frjálshyggjukreppunnar.

  Færeyingar brugðu á það ráð í seinni hálfleik að standa allir mun aftar á leikvellinum til að leyfa Íslendingum að leika sér með boltann nálægt færeyska markinu.  Áður en yfir lauk tókst Íslendingum loks með erfiðismunum að pota einum bolta í færeyska markið.  Færeyingum var gífurlega létt og réðu sér varla fyrir kæti.  Þeir hefðu aldrei fyrirgefið sér að sigra Ísland 2:0.  Það hefði verið meiri ruddaskapur en Færeyingar geta afborið að sýna Íslendingum.

  Þar fyrir utan þýða þessi úrslit í raun 14:1 þegar tekið er mið af höfðatölu.  Færeyingar kunna ekki við að segja það upphátt.

„Möguleikarnir fyrir hendi“

Hneyksli! Hrikalegt klúður í Gettu betur!

 

  Ég er að horfa á spurningaþáttinn  Gettu betur  í sjónvarpinu.  Þetta er einn skemmtilegasti þáttur í sjónvarpi.  Og fróðlegur.  Hitt er verra þegar það gerist að farið er með bölvaða dellu og rugl í spurningu.  Það gerðist einmitt núna áðan og ég er alveg miður mín vegna þessa. 

  Spurt var um plötu sem sögð var hafa komið út 1982.  Um er að ræða  Geislavirkir  með Utangarðsmönnum. 

  Hið rétta er að platan kom út 1980.  Hljómsveitin var löngu hætt 1982. 

  Utangarðsmenn störfuðu aðeins í eitt ár.  Þeir birtust eins og frelsandi englar vorið 1980.  Skömmu síðar sendu þeir frá sér Ep-plötuna Rækjureggí (ha ha ha).  Því næst var það platan  Geislavirkir. 

  1981 komu tvær plötur frá Utangarðsmönnum:  45 RPM  og  Í upphafi skyldi endinn skoða.

  Þetta eiga allir að vita.  Það er líka ágætt að vita að löngu eftir að hljómsveitin hætti fannst í Svíþjóð upptaka af hljómleikum sem Utangarðsmenn héldu þar í landi.  Þeir hljómleikar voru umsvifalaust gefnir út á plötu.  Svo smalaði Óli Palli saman tvöfaldri safnplötu með Utangarðsmönnum fyrir nokkrum árum. 

Skúbb! Leiðtogi Reykjavíkurkjördæmis valinn

  Stjórn kjördæmafélags Frjálslynda flokksins í Reykjavík norður hélt langan og strangan fund fyrr í kvöld.  Fundarefnið var uppstilling á framboðslista flokksins í kjördæminu í vor.  Vandamálið sem stjórnarmenn stóðu frammi fyrir var að mannval er svo gott að einungis tókst að komast að niðurstöðu með hver skipar toppsætið og verður leiðtogi framboðsins. 

  Valið stóð á milli 6 aðila er komu fyllilega til greina sem góður kostur.  Eftir að hafa rætt málin fram og til baka og skoðað frá öllum hliðum var ákveðið að Karl V.  Matthíasson verði í 1.  sæti í Reykjavík norður.

  Karl hefur setið á þingi fyrir Samfylkinguna og verið einarður baráttumaður gegn kvótakerfinu.  Það baráttumál hefur ekki skipað þann sess innan Samfylkingarinnar sem Karl vonaðist til.  Eftir að hafa fylgt Frjálslynda flokknum að málum í þingfrumvörpum og allri umræðu um sjávarútvegsmál steig Karl það eðlilega skref að yfirgefa Samfylkinguna og ganga til liðs við Frjálslynda flokkinn. 

  Til gamans tengi ég þessa færslu við frétt af fyrirspurn Arnbjargar Sveinsdóttur þingkonu D-lista um kræklingarækt.  Þessi fyrirspurn er uppsláttarfrétt í málgögnum D-lista.  Karl V.  Matthíasson bar fram nákvæmlega sömu fyrirspurn á alþingi fyrir nokkrum árum.  Þá þótti þessum sömu málgögnum ekki ástæða til að flytja af því fréttir.  En það eru kosningar á bakvið næsta horn. 

 

Kræklingarækt verði efld

Landsþing Frjálslynda flokksins varið af lögreglu

 

   Það bar til tíðinda á Landsþingi Frjálslynda flokksins - sem var haldið á Hótel Stykkishólmi - að skyndilega birtist her lögreglumanna í fullum skrúða.  Yfir mig helltust minningar úr sjónvarpsfréttum og ég bjóst við að á næstu sekúndum yrði öskrað:  "Gas! Gas!";  með tilheyrandi piparúða,  kylfum á lofti og handjárnum.

  Ekkert slíkt gerðist.  Lögreglumenn upplýstu okkur á hinn bóginn um að boðuð hafi verið mótmælastaða við hótelið.  Dreifibréf hafði verið sent í hvert hús í Stykkishólmi og nágrenni.  Þar var tilkynnt að rasistaþing yrði haldið á Hótel Stykkishólmi um helgina.  Snæfellingar voru hvattir til að mæta í mótmælastöðu fyrir utan hótelið.  Dreifibréfið var skreytt mynd af hakakrossinum í skástrikuðu bannmerki. 

  Snæfellingar almennt eru það vel upplýstir - eins og aðrir landsmenn - að þeir vita að Frjálslyndi flokkurinn er ekki rasistaflokkur.  Það er auðvelt að fletta afstöðu FF til innflytjenda upp á www.xf.is.  Boðuð mótmælastaða varð þess vegna jafn fjölmenn og blysförin að heimili Jóhönnu Sigurðardóttur á dögunum. 

Gríðarlegt fjör á Landsþinginu

  Landsþing Frjálslynda flokksins var haldið um helgina í Stykkishólmi.  Á annað hundrað manns sótti þingið.  Nánar tiltekið 101.  Ég man ekki eftir jafn góðri stemmningu á stærri samkomum Frjálslynda flokksins.  Það voru allir eitthvað svo kátir og glaðværir.  Menn og konur reittu af sér brandara út og suður;  Guðjón Arnar brast á með einsöng og hreif fólkið með sér í fjöldasöng;  harmónikka gekk á milli manna;  það var dansað út um öll gólf og sungið og sprellað.  Ég hef sjaldan skemmt mér jafn vel.  Og hlegið jafn mikið undir gamansögum.

  Guðjón Arnar var endurkjörinn formaður.  Ásgerður Jóna var kosin varaformaður.  Hanna Birna ekki Kristjánsdóttir var sjálfkjörin ritari.  Helgi Helgason var kosinn formaður fjármálaráðs.  Eftirtalin voru kosin í miðstjórn (í þessari röð):

Grétar Pétur Geirsson

Kolbeinn Guðjónsson

Ásthildur Cesil

Ragnheiður Ólafsdóttir

Helga Þórðardóttir

Guðmundur Hagalín frá Flateyri

Pétur Bjarnason

Ólafía Herborg frá Egilsstöðum

Sturla Jónsson

  Maður gekk undir manns hönd um að etja mér fram í framboð til miðstjórnar.  Ég varðist fimlega með þeim rökum að ég væri búinn að láta undan gífurlegum þrýstingi í að gefa kost á mér til fjármálaráðs.  Vegna minna viðhorfa til lýðræðis og að vald sé dreift taldi ég nægja að vera í fjármálaráði til viðbótar að vera í stjórn kjördæmafélags RN og ritari þess.  Með okkur Helga í fjármálaráði voru kjörin Ragnheiður Ólafsdóttir,  Benedikt Heiðdal Þorbjörnsson og Grétar Pétur Geirsson.

  Magnús Þór Hafsteinsson,  fráfarandi varaformaður FF,  bauð sig fram gegn sitjandi formanni.  Þegar úrslit lágu fyrir lýsti Magnús Þór því yfir að hann væri sáttur og ekki hvarflaði að honum að yfirgefa flokkinn.  Þar vísaði hann sennilega til þess að áður höfðu þeir sem urðu undir í framboði til varaformanns í FF yfirgefið flokkinn í fýlukasti:  Gunnar Örlygsson og Margrét Sverrisdóttir.

  Yfirlýsingu Magnúsar Þórs var tekið með langvarandi lófaklappi.  Þingheimur stóð upp til að skerpa á lófaklappinu.

  Ljósmyndinni efst hnuplaði ég af bloggi Ásthildar Cesil.  Það elska allir og dýrka þá frábæru manneskju.  Ég líka.  Lengst til vinstri á myndinni eru Kristmann og Guðmundur Hagalínssynir.  Því næst eru Magnús Reynir framkvæmdastjóri flokksins;  Kolbrún Stefánsdóttir sem leiðir framboðslistann í Kraganum;  gamli maðurinn;  Grétar Pétur Geirsson og Benedikt Heiðdal.  Við Benni unnum saman í álverinu í Straumsvík á áttunda áratug síðustu aldar,  ásamt bræðrum hans og föður.  Benni var ljúfur og þægilegur vinnufélagi.  Frábær náungi.

  Myndin hér fyrir neðan er af Sigga "ginseng" sem nú er að hjálpa okkur við að sniðganga kvef og smápestir með Immiflex,  www.immiflex.is:

 

  Fleiri skemmtilegar myndir frá Landsþinginu má finna á  http://www.asthildurcesil.blog.is/blog/asthildurcesil/entry/829320/

 

 

   

 

Höfundaréttur

  Besti,  mesti og frábærasti teiknari Íslands,  Sigurður Valur Sigurðsson (www.siggivalur.blog.is) hefur höfðað mál gegn Eddu-útgáfu vegna brota á höfundarrétti.  Forsaga máls er sú að Sigurður Valur teiknaði yfir 500 myndir fyrir  Plöntuhandbókina  sem var gefin út af Erni & Örlygi bókaútgáfu 1986.   Sú útgáfa fór á hausinn.  Mál & Menning eignaðist útgáfurétt (Björgólfs-feðgar) og bókin var endurútgefin af Eddu-forlagi.

  Þetta er athyglisvert mál og vekur upp spurningar.  Fyrir 20 - 30 árum hannaði ég fjölda plötuumslaga.  Jafnframt sá ég um markaðssetningu á viðkomandi plötum.  Þetta var pakki.  Ég hannaði tiltekna heildarímynd fyrir viðkomandi plötur:  Forsíðu umslags,  bakhlið,  innvols og auglýsingaherferð.

  Að undanförnu hefur Morgunblaðið boðið upp á áhugaverða úttekt á ferli poppstjarna og hljómsveita.  Án undantekninga eru plöturnar sem ég markaðssetti lang söluhæstu plöturnar á ferli viðkomandi.

  Þessar plötur hafa margar hverjar verið endurútgefnar af öðrum forlögum en þeim sem ég átti aðild að.  Í endurútgáfu hefur mín hönnun jafnan haldið sér að mestu á forsíðu en öðrum þáttum útgáfunnar verið klúðrað vegna skilningsleysis á heildarpakkanum.  Sumar plötur sem hafa verið endurútgefnar á geisladisk (en voru hannaðar af mér fyrir 12" vinyl) hafa fengið yfirbragð sem er frábrugðið því sem ég stillti upp.  Nafn mitt er ekki lengur á uimbúðum þessara platna heldur þeirra sem böðlast hafa á verri veg við geisladisksútgáfu platanna.  Ég nefni til að mynda "Loftmynd" Megasar sem dæmi og margar plötur Bubba Morthens (Das Kapital, Blús fyrir Rikka,  Kona,  Frelsi til sölu,  Dögun,  Skapar fegurðin hamningjuna?...).

  Ég hef svo sem ekkert verið að stressa mig á þessu.  Læt mér þetta í léttu rúmi liggja.  Hinsvegar ætla ég að fylgjast með framvindu málaferla Sigurðar Vals gegn Eddu-útgáfu. 

Skúbb! Stórfrétt

 

  Norð-vestur kjördæmi hefur verið þungavigtarvígi Frjálslynda flokksins.  Flokkurinn hefur jafnan landað tveimur þingmönnum í því kjördæmi.  Það var þess vegna ekki að undra að ásókn var í annað sætið á framboðslista flokksins í vor.  Talningu var að ljúka í prófkjöri flokksins í NV-kjördæmi.  Niðurstaðan er þessi:

1.  Guðjón Arnar Kristjánsson,  formaður

2.  Sigurjón Þórðarson,  fyrrverandi þingmaður

3.  Ragnheiður Ólafsdóttir,  spámiðill og varaþingmaður

4.  Magnús Þór Hafsteinsson,  varaformaður,  aðstoðarmaður Guðjóns Arnars og fyrrverandi þingmaður. 

  Sigurjón Þórðarson virðist vera aftur á leið á þing.  Það kemur ekki á óvart.  Né heldur að kosning þeirra Guðjóns var yfirgnæfandi.  Sigurjón hefur alltaf notið mikilla vinsælda.  Þegar hann rýmdi annað sæti fyrir Kristni H.  Gunnarssyni í NV-kjördæmi fyrir síðustu kosningar tapaði flokkurinn hátt í 300 atkvæðum í því kjördæmi.  Á sama tíma bætti flokkurinn við sig í öðrum kjördæmum.  

  Undrun vekur að varaformaðurinn,  Magnús Þór,  hafnar í 4.  sæti og spámiðillinn ofar.  Ég spáði öðru.  Spáðu í það.

Plötuumsögn

 - Titill:  Haré! Haré!

 - Flytjandi:  Högni

 - Einkunn:  ****1/2

  Haré! Haré! er þriðja sólóplata færeyska tónlistarmannsins Högna Lisberg.  Fyrsta sólóplata hans,  Most Beautiful Thing,  var lágstemmd kassagítarplata.  Öll lögin róleg,  látlaus og falleg.  Næsta plata,  Morning Dew,  var mun fjölbreyttari.  Þar voru ýmsir músíkstílar í gangi og sum lögin hröð, kraftmikil og rokkuð. Nokkur lög af  Morning Dew  urðu vinsæl hérlendis og Högni heimsótti okkur í tvígang og hélt nokkra hljómleika.  

  Áður en Högni hóf sólóferil var hann trommuleikari fyrstu og einu alvöru súper-grúppu Færeyja,  trip-hopp hljómsveitarinnar Clickhaze.  Sú hljómsveitin spilaði á nokkrum hljómleikum á Íslandi 2002 við góðar undirtektir.  Söngkonan,  Eivör,  varð í kjölfarið súperstjarna á Íslandi.   

  Haré! Haré!  er ólík fyrri plötum Högna.  Raddbeiting Högna er önnur og Prince-legri.    Hljóðheimurinn er sömuleiðis sérstæður.  Það er Prince-keimur af honum í bland við Beck eins og hann hljómaði í Looser  laginu.  Í sumum lögum merlar á funk-hrynjanda og öðrum trip-hoppinu sem kennt er við Bristol (Massive Attack,  Portishead,  Tricky...). Einnig er eins og örli á arabískri stemmningu.  Nafn plötunnar og letur undirstrikar austurlensku áhrifin.  Heildaráferð plötunnar er sterk og samstæð.  Lögin eru samt mishröð og miságeng.  Það skiptast á rokk og rólegheit.  Greinilega hefur verið nostrað mjög við hljóðblöndun.  Sum lögin hljóma dálítið eins og "remix" fyrir plötusnúða diskóteka með hörðum og vélrænum trommutakti.  

  Það sveif færeysk stemmning yfir fyrri plötum Högna.  Haré! Haré! er hinsvegar mjög "erlendis".  Sem fyrr er Högni höfundur laga og texta,  syngur og sér að mestu um allan hljóðfæraleik.

  Platan hljómar vel strax við fyrstu spilun.  Samt er hún frekar seintekin að því leyti að laglínur eru ekki grípandi né auðlærðar.  Við fyrstu spilanir renna lögin dálítið saman í eitt.  Það besta er að platan venst afskaplega vel.  Það er hægt að endurspila hana ótal sinnum án þess að fá nóg af henni. 

  Enn sem komið er fæst  Haré! Haré!  ekki í íslenskum plötubúðum.  Fyrri plöturnar fást í Pier í Korputorgi og glerturninum við Smáratorg.  Hægt er að panta  Haré! Haré!  í pósti á www.tutl.com.  Stutt er í að Kimi Records dreyfi  Haré! Haré!  hérlendis.

  Vert er að geta sérstæðrar umslagshönnunar.  Það er allt úr pappa.  Þegar það er opnað sprettur upp pappírsvöndull sem réttir manni diskinn.  Magnað.

  Á þessu myndbandi flytur Högni lagið  Been Out of Town.  Þarna 2007 hljómar lagið afskaplega nakið í samanburði við flutninginn á  Haré! Haré!:

www.hogni.com

www.myspace.com.hogni       

          

Stórkostlega skemmtilegar ljósmyndir

   Þessar bráðskemmtilegu ljósmyndir eiga það sameiginlegt að ljósmyndarinn hefur náð að smella af á hárréttu sekúndubroti. 

Íslenskar hljómsveitir í alþjóðlegri hljómsveitakeppni

  Hljómsveitakeppnin Wacken Metal Battle verður haldin í Reykjavík laugardaginn 18. apríl í tónlistarþróunarmiðstöðinni, TÞM. Sérstök valnefnd hefur valið sveitir til þátttöku úr hópi umsækjenda og valdi 7 hljómsveitir áfram. Ein af þeim mun komast áfram og spila í lokakeppni
Metal Battle keppninnar á Wacken Open Air hátíðinni í Þýskalandi í lok júlí í sumar.

  Um 70.000 manns sækja Wacken heim á hverju ári en Wacken fagnar einmitt 20 ára starfsemi í ár og því verður mikið um dýrðir í þessu litla samnefnda þorpi í norðurhluta Þýskalands.

Sveitirnar sem hlutu náð fyrir valnefndinni eru í stafrófsröð:

Beneath

Celestine

Diabolus

Gone Postal

Perla

Severed Crotch

Wistaria

Þetta eru sannarlega þungavigtarsveitir í íslensku þungarokki og því verður fróðlegt að sjá hver þessara sveita verður fulltrúi Íslands á Wacken 2009.

Hægt er að finna myndir af hljómsveitunum á eftirfarandi slóð:

http://www.hivenet.is/restingmind/pics/MetalBattle/

Frekari upplýsinga má leita hjá Þorsteini Kolbeinssyni í síma 823 4830

Flott hjá Óla Palla

 

  Það er eins og dæmalaus heppni elti rás 2.  Þangað hefur safnast úrval góðra útvarpsmanna.  Fólks með yfirgripsmikla þekkingu á poppmúsík og umburðarlynt gagnvart öllum dægurmúsíkstílum.  Opið, jákvætt og hvetjandi gagnvart íslenskri músík.  Ástríðufullt og áhugasamt gagnvart vinnu sinni.

  Nægir að nefna Guðna Má,  Margréti Erlu,  Matta,  Andreu Jóns og Snorra Sturluson.  Bara til að nefna nokkra.  Að ógleymdum snillingnum Óla Palla.  Ég veit ekki hvort sá maður á nokkurn tíma eiginlegt frí.  Hvort sem hann er í eða utan vinnutíma er hann alltaf að gera eitthvað sem verður útvarpsefni.  Hann er meira að segja með upptökustúdíó heima hjá sér.

  Það er alltaf ástæða til að hæla Óla Palla.  Í dag er sérstök ástæða til að hæla honum.  Þá var hann að kynna lag af plötu með lögum eftir Ray Davis úr Kinks.  Óli Palli kynnti þetta sem krákuplötu.  Á henni eru ýmsir flytjendur að heiðra Ray. 

  Það er full ástæða til að vekja athygli á að Óli Palli og fleiri dagskrárgerðarmönnum rásar 2 tala góða íslensku.  Dagskrárgerðarmenn sumra annarra útvarpsstöðva gætu margt af þeim lært.  Vonandi er þess stutt að bíða að orðskrípin "cover-lög",   ábreiðulög  og  tökulög  víki fyrir  kráku.  Orðin  tökulög  og  ábreiður  hafa ekki einu sinni sagnorð yfir fyrirbærið.   Kráka  hefur hinsvegar þá fínu sögn að menn  kráka  lög.  Það þarf heldur ekki að nota viðskeytið -lög með  kráku.  Það sem á ensku kallast "cover song" heitir einfaldlega  kráka  á góðri íslensku.        

Umtalað myndband: Grunnskólakrakki veitist að rútubílstjóra

  Bloggheimur vestan hafs logar vegna þessa myndbands.  Á því sést grunnskólakrakki í Michigan í Bandaríkjunum ráðast á kvenbílstjóra skólarútunnar.  Aðdragandi árásarinnar heyrist og sést ekki nógu vel á myndbandinu.  Hann er sá að konan skipar dregnum að setjast.  Þegar hann hlýðir ekki ekur kerla út í kant og bremsar. 

  Strákurinn ber því við að konan hafi stofnað lífi hans í hættu með því að bremsa á meðan hann stóð.  Viðbrögð sín hafi verið þau sömu og annarra sem verða fyrir kaldrifjaðri morðtilraun:  Að snöggreiðast og berja frá sér. 

  Sumir hallast að því að strákurinn hafi gengið of langt í sínum ósjálfráðu varnaviðbrögðum.  Konan fingurbrotnaði og er blá og marin á höfði.  Auk þess var henni illa brugðið.  Hún hefur þekkt stráksa frá því hann var kornabarn.  Hann hefur aldrei áður ráðist á hana.  En er þekktur fyrir frekjulega framkomu og vera "wannabe gangsta" (langar að vera gangster).  Hann virðist þó hafa tapað allri ímynd sem harður nagli með því að ráðast á konuna.  Það er engin reisn yfir því.  Þvert á móti.  Uppátækið þykir sýna væskilslega og lágkúrulega framkomu. 

  Svo eru það sumir sem fullyrða að konan hafi ekki snögghemlað.  Alls ekki.  Hún hafi stöðvað bílinn á mýktinni.  Enn aðrir segja að það skipti engu máli.  Árás drengsins sé jafn óafsakanleg hvernig sem konan stöðvaði bílinn.

  Foreldrar drengsins hafa sagt í sjónvarpsviðtali að þeim þyki þetta leitt.  Þau óttast að litli strákurinn sinn fari í fangelsi ef konan heldur kæru til streitu.  Hann verður færður fyrir dómara 3. apríl.

Snilldar myndir! Einkum fyrir þá sem leiðist í vinnunni

  Þessar bráðskemmtilegu ljósmyndir fékk ég sendar.  Og hló.  Sendingunni fylgdi ábending um að ef fólki leiðist í vinnunni þá skuli það hugsa til þeirra sem eru í vinnunni sinni á myndunum.  Það er á við töfrabragð.  Skyndilega verður fólk rosalega hamingjusamt í vinnunni.

Saga breska pönksins VIII

 

  Hróður bresku pönkbylgjunnar fór að berast til annarra landa er leið á árið 1977.  The Damned fór í hljómleikaferð til Bandaríkjanna um miðjan apríl.  Var þar með fyrst breskra pönkhljómsveita til að spila utanlands.  Þrátt fyrir ítrekað frumkvöðlastarf á upphafsárum pönksins stóð The Damned alltaf í skugga The Sex Pistols og The Clash hvað varðaði vinsældir og áhrif.

  Í lok apríl var The Clash aðalnúmer á hljómleikahátíð í París,  Nuites de Punk.  Um svipað leyti sendi The Jam frá sér jómfrúarlag sitt,   In the City.  Það er á myndbandinu hér að ofan.  Viku síðar kom út samnefnd stór plata frá The Jam.  Lagið fór í 40.  sæti breska vinsældalistans og platan í 20.  sæti. 

  Nokkrum dögum síðar fór The Clash í vel sótta og stórbrotna hljómleikaferð um Bretland,  White Riot Tour.  Með í för voru The Jam,  Buzzcocks,  The Slits og Subway Sect.  Hljómleikaferðin bar nafn með rentu.  Strax á fyrstu hljómleikunum,  í The Rainbow Theatre í London,  varð allt brjálað.  Í hamagangnum voru 200 sæti eyðilögð. 

  The Jam skar sig frá öðrum pönksveitum.  Bæði tónlist og klæðaburður drógu dám af mod-rokki (frægasta mod-sveit sögunnar er The Who).  Eins og í tilfelli The Stranglers gaf það pönkbyltingunni aukið vægi og dýpt að þessar hljómsveitir voru ekki alveg eins og The Sex Pistols og The Clash.

 

  Í júlí sendi The Jam frá sér smáskífuna  All around the World / Carnaby Street.  Hvorugt lagið var á stóru plötunni  In The City.  Smáskífan fór í 13.  sæti breska vinsældalistans.  Þar með var The Jam komin í hóp þeirra stærstu í pönkinu ásamt The Sex Pistols,  The Clash og The Stranglers.  Mest áberandi fylgihnettir voru The Damned og Buzzcocks.  Pönkið var orðið stórveldi sem óx jafnt og þétt.  Hér flytur The Jam  Carnaby Street.

-------

Fyrri færslur um breska pönkið í réttri tímaröð:

Fyrsta breska pönklagið:  http://jensgud.blog.is/blog/jensgud/entry/743999

Næst - II:  http://jensgud.blog.is/blog/jensgud/entry/744949

III: http://www.jensgud.blog.is/blog/jensgud/entry/746033/

IV: http://jensgud.blog.is/blog/jensgud/entry/747161

V:  http://www.jensgud.blog.is/blog/jensgud/entry/750862/

VI:  http://jensgud.blog.is/blog/jensgud/entry/753972/

VII:  http://jensgud.blog.is/blog/jensgud/entry/791397 

Furðulegt samtal

  Ég var að borða á matsölustað.  Við næsta borð sat hópur vinnufélaga.  Í þann hóp bættist síðan maður sem greinilega hafði ekki hitt þau hin í einhvern tíma.  Manninum var fagnað eins og týnda syninum.  Hann fór fljótlega að spyrja frétta.  Þá átti sér stað eftirfarandi samtal (nöfnum breytt):

  - Er Jói ennþá að dinglast með konunni hans Gumma?

  - Já, já.  Hún er flutt inn til Jóa.

  - Nú?  Og skilin við Gumma?

  - Nei,  hún er ekki búin að afskrifa hjónabandið. 

  - Hvernig gengur það fyrir sig?

  - Ja,  hún fór til dæmis í helgarferð norður á skíði með Gumma um þar síðustu helgi.  Þau ætluðu að láta reyna á hjónabandið.  Hún heldur samt áfram að búa með Jóa.

  - Hvað segja þeir kallarnir um þetta?

  - Það er stirt á milli þeirra.  Jói er ósáttur við að konan skilji ekki við Gumma. 

Bráðskemmtilegt myndband

  Hann Siggi "ginseng" vinur minn - og í kvöld nýkjörinn formaður kjördæmafélags Frjálslynda flokksins í kjördæmi Reykjavíkur norður - setti saman þessa klippu.  Er þetta ekki bara flott hjá honum?  Tekið skal fram að Siggi er ekki þulur í klippunni heldur kona sem heitir Þuríður.