Dýragrín

  Þessar skrýtlur fékk ég sendar í tilefni páskanna.  Og skemmti mér bærilega yfir þeim.  Vonandi gerir þú það líka.

  Hryllingsmynd

  Þú ert hér

  Elskan mín,  láttu ekki svona.  Slakaðu á.  Leyfðu mér að útskýra...

  Kannski ættir þú að bera á þig Banana Boat sólvörn næst...

Hver er besta íslenska smáskífan? Skoðanakönnun - takið þátt!

  Aðdragandi þess að ég hef sett hér í gang leit að bestu íslensku smáskífunni er að tónlist.is,  rás 2 og Félag hljómplötuútgefenda eru að leita að 100 bestu íslensku plötunum.  Eins og í fyrri opinberu könnunum um bestu íslensku plöturnar eru smáskífur útundan.  Margar af merkilegustu íslensku hljómsveitunum sendu aldrei frá sér stóra plötu.  Fyrir bragðið eru þær hljómsveitir afskiptar á listum yfir bestu íslensku plöturnar sem miðast við stórar plötur.

  Í umræðu um þetta hvatti Doddý mig til að setja upp þessa könnun sem nú er í gangi.  Ég óskaði eftir tillögum frá ykkur.  Útkoman er listinn hér fyrir neðan.  Skilyrði fyrir því að smáskífa sé gjaldgeng í þessari skoðanakönnun eru eftirfarandi:

  1.  Að smáskífan standi sem sjálfstæð útgáfa.  Hafi ekki verið kynningarefni fyrir stóra plötu sem inniheldur lögin á smáskífunni.

  2.  Að titillag/aðallag smáskífunnar sé ekki útlend kráka (cover). 

  3.  Lag sem einungis hefur komið út á safnplötu með ýmsum flytjendum - og þess vegna einnig á smáskífu - er gjaldgengt.

  Í einhverjum tilfellum er smáskífa eða lag á gráu svæði.  Til að mynda  Ammæli / Köttur  með Sykurmolunum.  Ammæli  var vissulega á fyrstu stóru plötu Sykurmolanna.  Rökin fyrir því að þessi smáskífa sé með eru þau að  Köttur  sé ekki síðra lag og eigi ekki að gjalda þess að  Ammæli  var upphitun fyrir stóru plötuna.  Hvað heldur þú?  Ósanngjarnt?  Ég er á báðum áttum með að leyfa þátttöku  Ammæli / Köttur.

  Önnur smáskífa á gráu svæði er  Söknuður  með Roof Tops.  Það er erlend kráka.  Ef ég man rétt var þetta 4ra laga plata og hin 3 lögin frumsamin. 

  Hvert og eitt ykkar má hámark kjósa 5 smáskífur.  Ef ykkur þykir bara ein smáskífa skara fram úr er í fínu lagi að kjósa aðeins eina.  En hámarkið er 5.

  Þær 10 - 15 smáskífur sem hljóta flest atkvæði verða sett upp í formlega könnun í skoðanakönnunarkerfi bloggsíðunnar.  Fjöldi titlanna fer eftir því hvort atkvæði hrúgast á fáar smáskífur eða dreifast á margar.  Í þeirri uppstillingu verður ekki látið staðar numið fyrr en 1000 atkvæði eru í húsi. 

  Listinn hér fyrir neðan er niðurstaða úr tilnefningum sem ég óskaði eftir frá ykkur.  Það er í góðu lagi að bæta við þennan list.  Sú viðbót er alveg jafn rétthá þeim útnefningum sem þegar eru komnar. 

  

Einar Ólafsson:  Ég vil ganga minn veg

Megas:  Spáðu í mig

Jóhann G. Jóhannsson:  Don´t try to fool me

Óðmenn:  Spilltur heimur

Flowers:  Glugginn

Tatarar:  Dimmar rósir

Sigurður Karlsson:  Beirut

Tívolí:  Fallinn

Eik:  Mr. Sadness

Flosi Ólafsson:  Það er svo geggjað

Roof Tops:  Söknuður

Ljósin í bænum:  Tunglið, tunglið taktu mig

Óðmenn:  Tonight

Roof Tops:  Lífið

Guðmundur Haukur:  Mynd

Þeyr:  A life transmission

Kristín Ólafsdóttir:  Koma engin skip í dag?

Hljómar:  Fyrsti kossinn

Fræbbblarnir:  False Death

Gyllinæð:  Kristjana

Póló og Bjarki:  Glókollur

Jón Rafn:  Ég syng fyrir vin

Pétur Kristjánsson:  Vitskert veröld

Mánar:  Fresli

Spilafífl:  Playing fool

Logar:  Minning um mann

Dátar:  Leyndarmál

Hljómsveit Magnúsar Ingimarssonar:  S.O.S. ást í neyð

Ævintýri:  Illska

Ríó tríó:  Við viljum lifa

Hljómsveit Þorsteins Guðmundssonar:  Hanna litla

Ellý Vilhjálms:  Hugsaðu heim

Hljómar:  Let it Flow

Svanfríður:  Kalli kvennagull

Sextett Ólafs Gauks:  Bjössi á Hól

Rúnar Júlíusson:  Come into my Life

Ómar Ragnarsson:  Úr þorskastríðinu

Lola:  Fornaldarhugmyndir

Utangarðsmenn:  Rækjureggí

Fræbbblarnir:  Bjór

Purrkur Pillnikk:  Tilf

Mosi frændi:  Katla kalda

Dátar:  Gvendur á Eyrinni

Roof Tops:  Tequila samba

Trúbrot:  Starlight

Daníel Ágúst:  Það sem enginn sér

Haukur Morthens:  Gústi í Hruna

Þeyr:  The Walk

Pelican:  Time

Svanhildur og Sextett Ólafs Gauks:  Húrra nú ætti að vera ball

Þuríður Sigurðardóttir:  Ég á mig sjálf

Hljómsveit Magnúsar Ingimarssonar:  Það ert bara þú

Óðmenn:  Bróðir

Pónik og Einar:  Herra minn trúr

Change:  Yakketty yak,  smacketty smack

Tatarar:  Gljúfrabarn

Viðar Jónsson:  Sjóarinn síkáti

Icy:  Gleðibankinn

Póló og Erla:  Lóan er komin

Ari Jónsson:  Fyrirheit

Pelican:  Jenny darling

Geislar:  Skuldir

Johnny Triump:  Luftgítar

Sykurmolarnir:  Ammæli / Köttur

Kukl:  Söngull

Örkuml:  Edrú / Elskaðir

Purrkur Pillnikk:  No time to Think

Sigur Rós:  Dánarfregnir og jarðarfarir

Reykjavík!:  Dirty Weekend  

Bubbi:  Skapar fegurðin hamingjuna?

Bubbi:  Skytturnar

Bubbi:  Maður hefur nú

Bubbi:  Bíódagar

Bubbi:  Foxtrott    

Bubbi:  Mér líkar það (með upphafslaginu  Það þarf að mynda hana) 

Bubbi:  Sumarið í Reykjavík

Alfreð Clausen:  Ömmubæn

Klink:  Death by Auto

Úr Járnhausnum eftir Jónas og Jón Múla Árnason í flutningi Hljómsveitar Svavars Gests og söngvaranna Ellýar Vilhjálms,  Ragnars Bjarnasonar og Ómars Ragnarssonar:

- Undir stórasteini

- Án þín

- Hvað er að?

- Við heimtum aukavinnu

- Stúlkan mín

- Sjómenn íslenskir erum vér

Stjörnukisi:  Flottur sófi

Magnús og Jóhann:  Mary Jane

Celsíus:  Poker 

Pal Brothers:  Candy girl

Poker:  Driving in the city

Spilafífl:  Talandi höfuð

Tatarar:  Sandkastalar

Mánar:  Útlegð

Sólstafir:  Ásareiðin

Tilvera:  Lífið

Helena Eyjólfsdóttir:  Hvítu mávar

Óðinn Valdimarsson:  Einsi kaldi

Vonbrigði:  Ó Reykjavík

Bodies:  Where are the bodies

Þeir:  Killer boogie

Þorvaldur Haldórsson:  Á sjó

Sykurmolarnir:  Einn mol´á mann

Rúnar Gunnarsson:  Við söng og gleði

Utangarðsmenn:  45 rpm (upphafslagið er  Fuglinn er floginn  sem Óli Palli hefur sagt vera sitt uppáhaldslag með Utangarðsmönnum.  Ég man þegar Utangarðsmenn kynntu þessa Ep-plötu á blaðamannafundi og Bubbi sagði  Fuglinn er floginn  vera útúrsnúning úr  Help  lagi Bítlanna)

Thor´s Hammer:  Umbarumbamba

Ham:  Hold

Þeyr:  Yður til fóta

Þeyr:  Útfrymi

Sjálfsfróun:  Lollipopp

Megas:  Dufl

Furðulegur bíltúr

 

  Ég kom utan af landi með flugi.  Hlaðinn pinklum.  Fyrir utan flugstöðina fann ég leigubíl.  Mér fannst ég kannast við andlitið.  Gott ef hann var ekki til umfjöllunar í blöðum fyrir nokkrum árum ákærður og dæmdur fyrir að plata konur til að skrifa upp á víxla og skuldabréf sem hann lét síðan falla á þær.

  Jæja,  ég bið bílstjórann um að skutla mér á tiltekið gistiheimili.  Leiðin þangað frá flugvellinum er stutt og afskaplega einföld.  Ég var ekkert að fylgjast með akstrinum til að byrja með heldur hélt áfram að lesa músíkblað sem ég tók með mér í flugið.  Skyndilega tók ég eftir því að leigubíllinn var kominn langt af leið og þræddi einstefnuakstursgötur í miðbænum.  Ég kallaði til bílstjórans:

  - Hvað er í gangi?  Veistu ekki hvar gistiheimilið er?

  - Jú,  jú.  Ég er á leiðinni þangað,  svaraði bílstjórinn ofurhægt.

  - Ég pantaði ekki útsýnisferð um miðbæinn.  Ég borga ekki fyrir þennan aukakrók.

  - Nei, nei.  Ég slekk á mælinum.  Þú borgar ekkert meira en það sem stendur núna á mælinum,  útskýrði bílstjórinn skilningsríkur.  Hann hætti þegar að aka krókaleiðir og keyrði stystu leið að gistiheimilinu.  Um leið og ég yfirgaf leigubílinn sagði leigubílstjórinn:

  - Ég ætla að biðja þig um að hringja ekki á stöðina og segja frá þessum aukakrók.  Það kostar alltaf leiðindi og vesen.  Málið er að ég er með athyglisbrest.  Þess vegna bar mig örlítið af leið.

Ljósmyndir

  Þessar undarlegu ljósmyndir fékk ég sendar og trylltist úr hlátri.  Hvað í ósköpunum gengur þessu fólki til?  Hvað er það að pæla?  Áttið þið ykkur á hvað er í gangi?  Eða er þetta bara fyndið?  Fólkinu á efstu myndinni virðist ekki vera hlátur í huga.  Þvert á móti.  Þeim virðist vera fúlasta alvara með að það allra fínasta sé að vera með gúmmíhjólbarða um hálsinn.

Kvikmyndaumsögn

- Titill:  Draumalandið

.

 - Höfundar:  Þorfinnur Guðnason og Andri Snær Magnason

.

 - Framleiðandi:  Sigurður Gísli Pálmason

.

 - Einkunn: ****1/2 (af 5)

.

  Draumalandið er byggt á samnefndri metsölubók Andra Snæs Magnasonar.  Ansi merkilegri bók.  Ég sá líka vel heppnaða sviðsfærslu Hafnarfjarðarleikhússins á Draumalandinu fyrir 2 árum.

.

  Kvikmyndin flaggar öllum bestu kostum heimildarmyndar:  Hún er virkilega skemmtileg,  fræðandi og vekur áhorfandann til umhugsunar.   Hún býður upp á helling af flottum senum af fallegu landslagi í bland við skondin innskot. 

.

  Þetta er áróðursmynd umhverfisverndarsinna.  Sjónarmið virkjunar- og álverssinna fá að koma fram.  Með framsetningunni verður málflutningur þeirra dáldið kjánalegur.  Ég vorkenni sumum sem uppskáru hláturrokur frá áhorfendum í kvikmyndasalnum.  Ég stóð mig að því að hugsa stundum:  "Ó,  þvílíkt fífl!"

.

  Ég hef samúð með fögnuði Austfirðinga og Húsvíkinga yfir að fá álver í túngarðinn.  Sjálfur vann ég sem unglingur í álverinu í Straumsvík í næstum 3 ár á fyrri hluta áttunda áratugarins.  Á þaðan margar ljúfar minningar og hef verið kvefaður og hás síðan.  Það var lærdómsrík reynsla að kynnast þar skarpari stéttaskiptingu en ég hef kynnst á öðrum vettvangi.  Flestir allra hæst settu hjá fyrirtækinu voru þýskir,  ausurískir eða svissneskir.

.

  Það var gaman að sjá glæsilegar loftmyndir af mínum gamla vinnustað.

.

  Ég mæli eindregið með kvikmyndinni Draumalandinu.  Hún á erindi til allra Íslendinga,  hver sem afstaða er til virkjana og álvera.  Þetta er áhrifarík mynd,  falleg,  fræðandi og skemmtileg.  Hún nýtur sín vel á breiðtjaldi.  En ég er ákveðinn í að kaupa hana á DVD.  Þetta er mynd sem ástæða er til að horfa á oftar en einu sinni.

      

Ný og spennandi plata frá Tý

  Vinsælasta lagið á Íslandi 2002 var  Ormurinn langi  með færeysku víkingarokkurunum í hljómsveitinni Tý.  Það rann Týs-æði á landann.  Hljómsveitin kom í hljómleikaferð til Íslands.  Spilaði á Akureyri,  Reykjavík,  Kópavogi,  Keflavík og Selfossi.  Færri komust að en vildu.  Þegar hljómsveitin áritaði plötu sína,  How far to Aasgsard,  í Smáralind myndaðist lengsta röð sem menn hafa séð þar. 

  Týs-æðið opnaði flóðgáttir himins og færeyska bylgjan skall yfir Ísland.  Skyndilega röðuðu færeyskir tónlistarmenn sér á íslenska vinsældalista og út um allt:  Eivör,  200,  Högni Lisberg,  Teitur,  Brandur Enni,  Boys in a Band,  Makrel,  Kristian Blak,  Lena Andersen,  Gestir,  Go Go Blues,  Taxi,  Krit,  Deja Vu,  Yggdrasil,  Sölva Ford,  Kári Sverrisson,  Ragnar í Vík,  Vestmenn og margir fleiri.   

  Það sér hvergi fyrir enda á færeysku bylgjunni.  Né frægðarför Týs.  Hljómsveitin fór á samning hjá stóru alþjóðlegu plötufyrirtæki og hefur byggt upp markað víðsvegar um heim.  Týr er nýkomin úr vel heppnaðri hljómleikaferð um Bandaríkin og er nú að hefja hljómleikaferð um meginland Evrópu.

  Fimmta plata Týs kemur út í lok mai.  Hún heitir  By the Light of the Northern Star.  Fyrri plötur Týs eru:

How far to Aasgard (inniheldur  Ormurinn langi)

Eric the Red (inniheldur  Ólavur Riddararós)

Ragnarök

Land

Lögin á nýju plötunni,  By the Light of the Northern Star,  eru:

1. Hold the Heathen Hammer High
2. Tróndur í Gøtu
3. Into the Storm
4. Northern Gate
5. Turið Torkilsdóttir
6. By the Sword in My Hand
7. Ride
8. Hear the Heathen Call
9. By the Light of the Northern Star 

  Fyrsta upplag af plötunni inniheldur tvö spiluð aukalög án söngs (instrumental): 
 

10. The Northern Lights
11. Anthem

  Platan fjallar um það þegar kristinni trú var neytt upp á Færeyinga.  Hér er upphafslag By the Light of the Northern Star,  Hold the Heathen Hammer High:

  Plötur Týs fást í verslunum Pier í Korputorgi og glerturninum við Smáratorg.  Áreiðanlega fást þær í fleiri verslunum. 

Samískt þjóðlagarokk um páskana - ókeypis aðgangur

 

  Alþýðu- og þjóðlagarokkarinn og lagahöfundurinn Johan Piribauer frá Samalandi í Svíþjóð er væntanlegur til Íslands nú um páskana.  Hann heldur þrenna tónleika hérlendis:  10. apríl í Reykjavík, 11. apríl á  Aldrei fór ég suður  á Ísafirði og á Akureyri 13. apríl.  Í för með Johani verða fiðluleikarinn Gabriel Liljenström og bakraddasöngkonan Maude Rombe.

  Johan syngur á sænsku en tónlist hans og textar sækja innblástur í menningu og náttúru Samalands.  Hann hefur gefið út 5 breiðskífur og hefur spilað út um allan heim, m.a. á Nýja Sjálandi, Ástralíu og Singapore.

  Johani hefur verið hampað fyrir að koma með nýja og ferska vinda inn í sænska prog-tónlist og útnefndi sænskt tímarit hann sem mesta frumkvöðulinn í þeim efnum, þar sem hann var tekinn framyfir marga fræga sænska tónlistarmenn.

  Aðaltilefni heimsóknar Piribauer er að koma fram á  Aldrei fór ég suður. Hann nýtir heimsóknina til að keyra hringinn og spila í  Kaffi hljómalind  í Reykjavík föstudaginn 10. apríl, kl 20:00 og svo mánudaginn 13. apríl í  Populus Tremula  á Akureyri kl 20:30.

Frítt er inn á alla tónleikana!

Frekari upplýsingar:

www.johanpiribauer.com

www.myspace.com/johanpiribauer

Saga breska pönksins - X

  Í vitund margra,  jafnvel flestra,  var tríóið The Police poppuð reggíhljómsveit.  Við sem fylgdumst með bresku pönkbyltingunni munum þó eftir The Police sem pönksveit.  Þannig komu Sting og félagar í The Police til leiks í lok maí 1977.  Þá sendi hljómsveitin frá sér fyrstu smáskífuna,  Fall Out.   Lagið skoraði ekki á vinsældalistum.  En The Police tríóið var komið til leiks og sérhæfði sig fljótlega í reggí-rokkinu sem The Clash hafði blandað inn í pönkið á þessum upphafsskrefum pönbyltingarinnar.

  Fjöldi pönksveita kom fram á sjónarsvið og voru til alls líklegar:  Sham 69,  Models,  Generation X,  XTC.  Svo og pönkaðir nýbylgjurokkarar á borð við Elvis Costello.   Í júlí byrjun 1977 sendi Sex Pistols frá sér smáskífuna  Pretty Vacant.  Hún fór í 6.  sæti breska vinsældalistans.

  The Jam sendi frá sér fleiri lög og The Stranglers bauð í júlí 1977 upp á lagið  Something Better Change.  Það fór í 9.  sæti breska vinsældalistans.  Pönklög voru orðin fastur hluti af breska vinsældalistanum.  Hljóðið á þessu myndbandi er ekki gott.  En kemur samt til skila nýbylgjulegri hlið pönksins.  Nýbylgjan var nákomin fylgihnöttur pönksins.

 

Fyrri færslur um bresku pönkbyltinguna: 

Fyrsta breska pönklagið:  http://jensgud.blog.is/blog/jensgud/entry/743999

Næst - II:  http://jensgud.blog.is/blog/jensgud/entry/744949

III: http://www.jensgud.blog.is/blog/jensgud/entry/746033/

IV: http://jensgud.blog.is/blog/jensgud/entry/747161

V:  http://www.jensgud.blog.is/blog/jensgud/entry/750862/

VI:  http://jensgud.blog.is/blog/jensgud/entry/753972/

VII:  http://jensgud.blog.is/blog/jensgud/entry/791397

VIII:  http://jensgud.blog.is/blog/jensgud/entry/820922

IX:  http://www.jensgud.blog.is/blog/jensgud/entry/844717/

Bestu plötur Íslands

  Leit Félags hljómplötuútgefenda,  tónlist.is og rásar 2 að bestu plötum Íslands gengur vel.  Af tæplega 500 tilnefndum plötum liggur fyrir niðurstaða um þær 100 bestu.  Næsta skref er að raða þeim upp í sætaröð frá 1 upp í 50.  Af 100 bestu plötunum verða 10 kynntar í stafrófsröð alla virka daga á milli klukkan 10 og 11 á rás 2 og á www.tonlist.is/100bestu. 

  Þetta eru 30 fyrstu plöturnar:

( ) - Sigur Rós
12. ágúst '99 - Sálin hans Jóns míns
200.000 naglbítar og LV - 200.000 naglbítar og Lúðrasveit verkalýðsins
Abbababb!- Dr. Gunni og vinir hans
Allt fyrir ástina - Páll Óskar
Apparat Organ Quartet- Apparat Organ Quartet
Á bleikum náttkjólum - Megas & Spilverk þjóðanna
Ágætis byrjun - Sigur Rós
Álfar - Magnús Þór Sigmundsson
Bein leið- KK Band

Breyttir tímar - Egó
Debut - Björk
Deluxe - Nýdönsk
Drullumall -  Botnleðja
Drög að sjálfsmorði - Megas
Dögun- Bubbi Morthens
Einu sinni var - Björgvin Halldórsson og Gunnar Þórðarson
Ekki enn- Purrkur Pillnikk
Eniga meniga - Olga Guðrún Árnadóttir
Farewell Good Night's Sleep- Lay Low

Ferðasót - Hjálmar
Fingraför - Bubbi Morthens
Fisherman's Woman - Emilíana Torrini
Forever - GusGus
Fólk er fífl - Botnleðja
Fram og aftur blindgötuna - Megas
Frelsi til sölu  - Bubbi Morthens
GCD - Bubbi og Rúnar
Geislavirkir - Utangarðsmenn
Gilligill - Bragi Valdimar og Memfismafían

Blóð

  Ég er ennþá í pönkstellingum eftir pönkveislu ársins á Grand Rokk um helgina.  Um hana má lesa í nýlegum færslum hér örlítið fyrir neðan.  Til að teygja á stemmningunni held ég áfram að velta mér upp úr pönkinu.  Pönkið lifir og blómstrar sem aldrei fyrr.  Ein af nýlegri pönksveitum heitir Blóð og var að senda frá sér Ep plötu.

  Liðsmenn Blóðs eru Björn Gunnlaugsson gítarleikari,  Björn Kristjánsson trommuleikari og Þráinn Árni Baldvinsson bassaleikari.

  Á myndbandinu kastar tríóið kveðju á Geir Haaarde í laginu  Vélinda. 

  Fleiri upplýsingar um Blóð má finna á www.myspace.com/blodblodblod. 

Frábær pönkhátíð

  Ég var að koma af dásamlegri pönkhátíð á Grand Rokk og er að hlusta á Fræbbblana til að endurlifa skemmtunina.  Það er að verða árlegur viðburður að íslenska pönklandsliðið sameinist í að rifja upp það sem hæst bar í bresku og bandarísku pönkbyltingu áranna ´76 - ´79 með glæsilegri pönkveislu.  Fyrir ári gerði ég grein fyrir skemmtilegheitunum í bloggfærslu: http://jensgud.blog.is/blog/jensgud/entry/468980

  Lagavalið í ár var ekki alveg það sama.  Allar helstu perlur pönksins fengu að halda sér en lög sem tilheyrðu pönkstemmningunni án þess að vera dæmigerð pönklög fengu aukið vægi.  Sem er bara gott.  Það fyllti í heildarmyndina og skerpti á fjölbreytileika:  Nýbylgja úr smiðju Elvisar Costellos,  smá soul-fönk frá Ian Dury,   Marauee Moon  frá Television og svo framvegis.  Samtals 46 lög afgreidd á röskum tveimur tímum.

  Borðfélaga mínum þótti reggí-lögin vera spiluð aðeins of hratt.  Það er sjónarmið út af fyrir sig.  En það var sömuleiðis kostur þegar upp er staðið að flutningur var ekki rígbundinn við nákvæma eftirhermuafgreiðslu.  Upprunaleg sérkenni laganna fengu að njóta sín en einnig sjálfstæð túlkun flytjenda.  Þetta var ekki neitt karíókí heldur íslenskir pönkarar að spila uppáhalds pönklögin með sínu nefi.

  Mér taldist til að um 13 manns hafi tekið þátt í matreiðslunni.  Stundum var ekki alveg á hreinu hver átti að spila á bassa eða trommur eða syngja hvaða lag.  Lagalistinn var ekki afgreiddur í nákvæmlega sömu röð og upphaflegt prógramm sagði til um.  Þetta var dálítið spilað eftir hendinni eða stemmningunni.

  Flest laganna voru spiluð af gamalreyndri þekkingu á lögunum.  Þá rann þetta áreynslulaust í gegn.  Spilagleðin var mikil.  Flytjendur skemmtu sér auðheyranlega ekki síður en áhorfendur.  Nokkur lög voru auðheyranlega minna æfð og báru merki smá fums og óöryggis.  Það gerði dæmið bara meira lifandi.

  Flytjendur voru allir í miklu stuði sem smitaði út í sal.  Þéttastur og kraftmestur var flutningurinn á laginu  Get a Grip on Yourself  frá The Stranglers.  Þar voru 3 gítarleikarar og hljómborð til leiks.

  Niðurlag hljómleikanna náði hámarki þegar Árni Daníel öskraði úr sér lungum og lifur í   White Riot  frá The Clash og Óskar úr Taugadeildinni fylgdi því eftir með  God Save the Queen  frá Sex Pistols.  Valli úr Fræbbblunum - íklæddur bol merktum Stiff Little Fingers - bætti um betur með lögum frá The Ramones og  Janie Jones  frá The Clash.

  Troðfullur salurinn fór á ið í dansi og tók hraustlega undir í söng,  áslætti á borð og klappi.  Hljómleikunum lauk á suðupunkti þegar uppistaðan af flytjendum kvöldsins sameinaðist salnum í flutningi á hinu magnaða lagi  If the Kids are United  frá Sham 69. 

  Hljóðblöndun var góð og mun betri en í fyrra.  Gott var að flest lög voru kynnt.  Þó ég þekki flest þau lög sem flutt voru frá A-Ö þá er ég einn af þeim sem þarf tíma til að koma heilastarfseminni í gang til að kveikja á perunni þegar lag er flutt á annan hátt en upprunaleg útgáfa.  Til að mynda þegar Ingunn Magnúsdóttir söng lög sem voru í upprunalegri útgáfu sungin af karlsöngvara.  Þar fyrir utan er hún flott söngkona eins og aðrir söngvarar kvöldsins.  Stuðbolti á sviði og úti á dansgólfi.      

  Valli söngvari Fræbbblanna var greinilega einskonar hljómsveitarstjóri.  Hann hélt utan um dæmið af röggsemi.  Rak menn upp á svið harðri hendi þegar innáskiptingar voru ekki á hreinu og afgreiddi sitt dæmi sem söngvari og gítarleikari með glæsibrag.    

  Ég færi aðstandendum pönkhátíðarinnar mínar bestu þakkir fyrir frábæra skemmtun.  Allir flytjendur fóru á kostum allt kvöldið.  Þeir toppuðu hvern annan ítrekað.  Ég er strax farinn að hlakka til næstu pönkhátíðar að ári.

 

Saga breska pönksins - IX

  Í næstu færslu hér fyrir neðan er sagt frá pönkveislu ársins sem fer fram á Grand Rokk annað kvöld.  Það er við hæfi að skerpa á stemmningunni með því að hita upp og halda hér áfram að rifja upp sögu bresku pönkbylgjunnar.

  Í maí 1977 sendi bandaríska hljómsveitin The Ramones frá sér fyrstu smáskífuna í Bretlandi um leið og hún hóf hljómleikaferð í Bretlandi.  A-hliðar lag smáskífunnar var  Sheena is a Punk Rocker.   Það er á myndbandinu hér fyrir ofan.  12.000 eintök voru pressuð á 12" og fyrstu 1000 eintökunum fylgdi T-bolur í kaupauka.  Sheena is a Punk Rocker náði 22.  sæti breska vinsældalistans.

  Nokkrum dögum síðar komu samdægurs út smáskífan  God Save the Queen  með The Sex Pistols og  Remote Control  með The Clash.  Pönkið var þess vegna verulega plássfrekt og áberandi síðustu vikuna í maí.

  Sá hængur var á að plöturisinn CBS gaf  Remote Control  út í óþökk The Clash.  Liðsmenn The Clash töldu lagið gefa kolranga mynd af hljómsveitinni.  Þetta væri popplag sem hafði það hlutverk að létta og brjóta upp stemmninguna á stóru plötunni.  Strákarnir urðu svo æfir yfir uppátæki CBS að þeir hvöttu aðdáendur sína til að kaupa ekki plötuna,  útvarpsmenn til að spila ekki lagið og blaðamenn til að fjalla ekki um smáskífuna.  Sjálfir fóru liðsmenn The Clash í verkfall sem stóð í marga mánuði.  Meira um það síðar.  Flestir sem The Clash ákölluðu hlýddu kallinu.  Remote Control  seldist ekki neitt.  God Save the Queen  fór aftur á móti í 2.  sæti breska vinsældalistans.  Þar með var pönkið komið á toppinn. 

    

  Lagið á B-hlið  Remote Control  var  London´s Burning.

Fyrri færslur um bresku pönkbylgjuna 

Fyrsta breska pönklagið:  http://jensgud.blog.is/blog/jensgud/entry/743999

Næst - II:  http://jensgud.blog.is/blog/jensgud/entry/744949

III: http://www.jensgud.blog.is/blog/jensgud/entry/746033/

IV: http://jensgud.blog.is/blog/jensgud/entry/747161

V:  http://www.jensgud.blog.is/blog/jensgud/entry/750862/

VI:  http://jensgud.blog.is/blog/jensgud/entry/753972/

VII:  http://jensgud.blog.is/blog/jensgud/entry/791397

VIII:  http://jensgud.blog.is/blog/jensgud/entry/820922

Pönkveisla ársins

 

   Það verður ekkert smá gaman á laugardagskvöldið,  4ða apríl.  Klukkan 22:00 hefst pönkveisla ársins á Grandrokk.  Vænn kjarni úr mörgum helstu pönksveitum áranna um og upp úr 1980 sameinast um að flytja mögnuðustu pönkperlur áranna 1976 - 1979.   Meðal þeirra sem leggja hönd á plóg eru liðsmenn Fræbbblanna,  Q4U,  Taugadeildarinnar,  Tappa tíkarrass,  Snillinganna og fleiri hljómsveita.

  Breidd á lagavali spannar allt frá Crass til Blondie og sitthvað sem var áberandi hluti af pönkstemmningunni án þess að vera beinlínis pönk.  En hryggjalengjan verður sígildu pönkslagararnir.

  Svona pönkhátíð var haldin á Grand Rokk fyrir ári.  Hún tókst rosalega vel og var gífurlega mikil skemmtun.  Lagalistinn nú er ekki alveg sá sami og í fyrra.  En lofar magnaðri dagskrá.  Sjá:


Anarchy In The UK - Sex Pistols
Police And Thieves - Clash
So What? - Crass
Gotta Getaway - Stiff Little Fingers
Sheena Is A Punk Rocker - Ramones
Barbed Wire Love - Stiff Little Fingers
EMI - Sex Pistols
Into The Valley - Skids
New Rose - Damned
Sex & Drugs & Rock & Roll - Ian Dury
Sound Of The Suburb - Members
Alternative Ulster - Stiff Little Fingers
What Do I Get? - Buzzcocks
I'm So Bored With The USA - Clash
Suspect Device - Stiff Little Fingers
Public Image - PiL
Johnny Was - Stiff Little Fingers
Ever Fallen In Love - Buzzcocks
Holidays In The Sun - Sex Pistols
Denis - Blondie
Pretty Vacant - Sex Pistols
A Bomb In Wardour Street - Jam
My Perfect Cousin - Undertones
Safe European Home - Clash
Get Over You - Undertones
Swallow My Pride - Ramones
White Man In Hammersmith Palais - Clash
Watching The Detectives - Elvis Costello
Spanish Bombs - Clash
The KKK Took My Baby Away - Ramones
Radio Radio - Elvis Costello
No More Heroes - Stranglers
Teenage Kicks - Undertones
Down In The Tube Station At Midnight - Jam
Real World - Buzzcocks
Marquee Moon - Television
Five Minutes - Stranglers
Roots, Radicals, Rockers And Reggae - Stiff Little Fingers
Get A Grip On Yourself - Stranglers
In The City - Jam
White Riot - Clash
God Save The Queen - Sex Pistols
Rockaway Beach - Ramones
Janie Jones - Clash
Blitzkrieg Bop - Ramones
If The Kids Are United - Sham 69

  Svo sérkennilega vill til að þetta sama kvöld rifjar diskópakkið upp diskótímabilið eins og það var í Hollywood í Ármúla.  Tilviljun? 

3 kjötfarsbollur á 2699 krónur

  Ég fór í Nóatún til að kaupa Malt.  Þegar ég skokkaði léttilega framhjá kjötborðinu glenntu nýsteiktar kjötfarsbollur sig framan í mig.  Þegar maður hefur ekki borðað nýsteiktar kjötfarsbollur í nokkur ár sprettur upp óviðráðanleg löngun í kjötfarsbollur undir þessum kringumstæðum.  Þið kannist við þetta. 

  Þar fyrir utan heyrði ég því nýlega haldið fram að íslenska kjötfarsið (eða kjötfaxið eins og afi minn heitinn hélt að það héti) sé alveg sér íslenskt og allt öðru vísi en kjötfars í útlöndum.  Þetta íslenska sé mun bragðbetra,  hollara,  mýkra,  meðfærilegra og miklu fallegra.  Íslenskt kjötfars á heima í upptalningunni á að Ísland eigi sterkustu menn í heimi,  fallegustu konur í heimi,  besta vatn í heimi og þar til fyrir nokkrum vikum versta seðlabankastjóra í heimi.

  Með þetta í huga gusaðist yfir mig þjóðernisrembingur.  Áður en ég náði andlegu jafnvægi hafði ég keypt 3 nýsteiktar kjötfarsbollur.  Glaður í bragði skokkaði ég léttilega með þær að kexrekkanum til að kaupa íslenskar súkkulaðibitakökur úr íslensku súkkulaði svo ég hefði eitthvað fleira en íslenskan lakkrís að maula með kjötfarsbollunum.

  Skyndilega sá ég út undan mér að kjötfarsbollurnar voru verðmerktar á 2699 krónur.  Það er reisn yfir svona verði.  En ég reiknaði í huganum að kíló af kjötfarsi er á 300 - 400 krónur.  3 steiktar kjötfarsbollur vega um fjórðung úr kílói.  Það blasti við að þetta væru alveg sérstakar kjötfarsbollur.  Til að klúðra engu skokkaði ég léttilega aftur að kjötborðinu og spurði:  "Er málsháttur í þessum kjötfarsbollum?"

  Afgreiðslumaðurinn svaraði alvarlegur, ábúðafullur og með allt á hreinu:  "Nei,  það er nautahakk,  svínahakk,  hveiti,  kartöflumjöl,  laukur,  egg,  pipar og salt í þessum bollum."

  "Hvað gerir bollurnar svona dýrar?"  spurði ég og benti á verðið. 

  "Mistök,"  útskýrði afgreiðslumaðurinn,  vigtaði þær upp á nýtt,  skellti á umbúðirnar nýjum verðmiða upp á 507 krónur og bauðst til að setja nokkrar grænar baunir með.  Sem ég afþakkaði að sjálfsögðu.  Grænar baunir eru ekki íslenskar.   

----------------------------

  Myndin efst er af starfsmanni Hafró.  Hann var í miðri setningu um haffræðilegar aðstæður til stofnmælinga botnfiska að haustlagi þegar þetta lykilorð skaust upp úr honum - án samhengis.  

Skúbb! Framboðslisti í Reykjavík norður

 

   Ég var að koma af fjörlegum félagsfundi kjördæmafélags Frjálslynda flokksins í Reykjavík norður.  Mæting var góð.  Eða næstum hálft hundrað manna.  Eftir snarpar umræður og mótframboð var framboðslistinn sem stjórn kjördæmafélagsins lagði fram samþykktur.  Ég ætlaði ekki að fara nánar út í það en sé að þetta er komið fram á www.xf.is:  Að Viðar Helgi Guðjónssen,  formaður LUF,  bauð sig fram í 1. sæti gegn Karli V.  Matthíassyni.  Framboðslistinn sem var samþykktur er eins og að neðan greinir.  Karl V.  Matthíasson þarf ekki að kynna.  Helga er vinsæll kennari og systir Sigurjóns Þórðarsonar sem í prófkjöri var kosinn í 2.  sæti í NV kjördæmi og var farsæll þingmaður FF á þarsíðasta kjörtímabili.  Karl Sigurðsson og Margrét Kristín Þorgrímsdóttir eru fulltrúar ungu kynslóðarinnar.  Karl Sigurðsson sá um margra ára skeið um vinsæla útvarpsþætti á Útvarpi Suðurlands og á rás 2,  Ungmennafélagið  og fleiri slíka þætti.  Tók einnig þátt í dagskrárgerð sjónvarpsþátta á borð við 0. Samdi leikrit sem var fært upp af MS og naut vinsælda.  Þannig mætti áfram telja upp afrek þessa 20 ára drengs. 

1   Karl V.  Matthíasson,  þingmaður (www.kallimatt.blog.is)

2   Helga Þórðardóttir,  kennari (www.helgatho.blog.is)

3   Karl Sigurðsson,  forseti nemendafélags MS

4   Margrét Kristín Þorgrímsdóttir,  barnshafandi

5   Hallgrímur Magnússon,  læknir

6   Diana P Rostan Viurrarena frá Úrúgvæ

7   Árni Grétar Jóhannsson,  tónlistarmaður frá Tálknafirði.  Var í hinni mögnuðu teknópönkhljómsveit Equal

8   Matthías Leifsson

9   Reynir Gunnarsson

10 Inga Valdís Heimisdóttir

11 Daníel Ívar Jensson,  gítarleikari Gyllinæðar (sjá tónlistann hér til vinstri)

12 Ásdís Sigurðardóttir

13 Erlingur Þorsteinsson

14 Jóhann Sigfússon,  formaður félags leigubílstjóra

15 Guðlaug Þorkelsdóttir

16 Reynir Árnason

17 Róbert Bjargarson

18 Jens Guð

19 Laufey E. S. Þorsteinsdóttir

20 Gunnar Hólm Hjálmarsson

21 Laufey Kristjánsdóttir

22 Kjartan Halldórsson,  sægreifi

Hundaníðingar á krossara

  Ég var beðinn um að vekja athygli á framferði þessa 19 ára hafnfirska pilts sem myndirnar eru af og vinar hans.  Eftirfarandi texti um atburðarrás fylgdi myndunum.  Þar segir frá konu sem fór að venju með hundana sína tvo (rottweiler og íslenska fjárhundsblöndu) og var svo yndæl að taka Heru (blanda) hundinn með sér. 

  Konan lagði bílnum á vanalegum stað, um 400m frá fjörunni, tók hundana út úr bílnum í taum og gekk að fjörunni. Þar voru drengir að leika sér á krossara og fjórhjóli, en fjórhjólsmaðurinn hvarf fljótlega af vettvangi.
 
  Konan gekk framhjá drengjunum og lengst eftir fjörunni áður en hún ákvað að sleppa hundunum.
Hundarnir skiptu sér ekkert af drengjunum á krossurunum og leika sér, þefa og pissa hér og þar, eins og hundum er lagið.

  Gamanið fékk snöggan endi þegar drengirnir á krossurunum óku greitt í áttina að þeim, augljóslega til að ögra hundunum sem æstust allir upp og hófu að elta hjólin. Þeir stoppuðu hjólin, biðu þangað til að hundarnir voru komnir nálægt (þöndu vélina til að vekja athygli og æsa hundana) og gáfu að lokum allt í botn og spændu af stað. 

  Konan reyndi og reyndi að vekja athygli strákanna og biðja þá um að stoppa svo hún gæti náð hundunum en allt kom fyrir ekki!

  Það þarf varla að nefna hversu hættulegt er að keyra á ofsa hraða á krossara með ÞRJÁ hunda allt í kring. Hundar eru ekki fyrirsjánlegir, og það er ALDREI hægt að fara of varlega þegar þeir eru annars vegar. Tek það líka fram að konan þurfti sjálf að snúa sér undan þegar ökumenn krossaranna spýttu sandi og sjó yfir hana sjálfa.

  Ég vil ekki hugsa dæmið til enda hefði annar hvor drengjanna keyrt á einhvern hundinn og skotist af krossaranum.....

  Loks urðu hundarnir þreyttir og gáfust upp á þessum hættulega leik og eltu konuna í bílinn.
Hún átti svo langt samtal við drengina tvo (19 ára frá Hafnarfirði - megið lesa yfir þeim ef þið þekkið þá) sem virtust engan veginn gera sér grein fyrir því hversu hættulegt athæfið var.  Konan var mjög reið.

  ÞAR AÐ AUKI hafa þessir drengir eyðilagt mikla og erfiða þjálfun sem það er að fá hunda OFAN AF þeirri hugsun að elta ökutæki á fullri ferð. Flestum hundum er eðlislægt að elta það sem hratt fer, hægja á því, leika við það eða róa niður. Núna þurfum við  að byrja upp á nýtt að kenna hundinum sjálfstjórn í svona kringumstæðum.
  Þvílíkt ÖMURLEGT þegar sú mikla vinna sem maður hefur lagt í þjálfunina er eyðilögð af einhverjum bjánum á krossara.

  Drengirnir sögðust hafa verið ÍTREKAÐ KÆRÐIR fyrir vítaverðan akstur en ALDREI neitt verið gert í málunum!

Lést eftir rifrildi í umferðinni

Æsipennandi námskeið sem margir hafa beðið eftir!

 

  Að undanförnu hefur stöðugt vaxandi þrýstingur verið á mig um að hrinda úr vör þessu námskeiði.  Fólk hefur suðað og sárbænt.  Ég hef hugsað málið,  velt fyrir mér og skoðað hvernig best verður að því staðið.  Nú kýli ég á það og býð upp á þriggja vikna námskeið í notkun öryggisbelta í bifreiðum.  Námskeiðið heitir Öryggisbelti öryggisins vegna!

  Námskeiðið fer fram á milli klukkan 23:30 og 23:45 á hverjum fimmtudegi allar þrjár vikurnar.  Þátttakendur þurfa ekki að hafa með sér neitt annað en framsæti úr bíl, öryggisbelti og beittan vasahníf.  Allt annað (veitingar,  þ.e.a.s. brjóstsykur) er innifalið í vægu námskeiðsgjaldi,  kr. 49.999,  sem er innan við 17.000 kall á viku,  vel að merkja.  Hámarks fjöldi á hvert námskeið er 150 manns.

  Fyrstu vikuna verður farið yfir algengustu mistök sem fólk gerir þegar það festir á sig öryggisbelti.  Einnig verður kennt hvernig best er að bera sig að ef maður er að skella með andlitið á gangstétt eða malbik þegar farið er út úr bíl og fætur hafa flækst í öryggisbeltinu.  Til viðbótar er kennd einföld aðferð til að losa sig úr öryggisbelti sem maður er flæktur í inni í bílnum.  Þar kemur vasahnífurinn til góða.   

  Aðra vikuna verður sagt frá uppruna öryggisbeltisins og þróun,  samkvæmt áreiðanlegustu heimildum Wikipedia.  Þriðju vikuna verður kynnt sumartískan í öryggisbeltum og kennd stutt vögguvísa um öryggisbelti.  Í lok námskeiðs fá allir þátttakendur (nema þeir sem verða með leiðindi) staðfestingaskjal um þátttöku sína (diplóma).

  Mjög líklegt er að heilbrigðisráðuneytið niðurgreiði námskeiðið að hluta eða fullu ef þátttakendur verða duglegir að þrýsta á um það.  Gott er þá að benda á að haldgóð þekking á öryggisbeltum geti sparað heilbrigðiskerfinu gífurlega háar upphæðir til lengri tíma litið.  Hver kannast ekki við að hafa þurft að leita á slysavarðstofu eftir illskeytta viðureign við öryggisbelti?

  Þátttakendur á þessu námskeiði sitja fyrir í skráningu á spennandi framhaldsnámskeið.  Á framhaldsnámskeiðinu verður kennt á öryggisbelti í flugvélum.

  Ökumaður þessa bíls flæktist í öryggisbeltinu um leið og hann stökk út úr bílnum.  Við það fældist hann.  Áður en honum tókst að róa sig niður hafði hann gengið í skrokk á skemmtibát,  sumarbústað og fleiru.  Hann er að drepast í öðrum fætinum síðan og haltrar lítillega.

Spurningahöfundur Gettu betur bað þjóðina afsökunar

  Helgin hefur verið dramatísk.  Geir Haaarde herti upp hugann og bað 2000 fundarmenn á landsfundi Sjálfstæðisflokksins afsökunar á mistökum sínum.  Ég man ekki hvernig hann orðaði það.  Hinsvegar tók ég eftir því hvernig spurningahöfundur Gettu betur,  Davíð Þór Jónsson,  bað í gærkvöldi þjóðina afsökunar á mistökum sem ég vakti athygli á fyrir viku:   http://www.jensgud.blog.is/blog/jensgud/entry/834652/.  Þar var gefið upp vitlaust útgáfuár á plötu.

  Davíð Þór er skemmtilegur húmoristi og brá á leik er hann bar fram afsökunarbeiðnina.  Fyrst baðst hann afsökunar á tæknilegum mistökum sem höfðu átt sér stað í þættinum og bætti við:  "Sama er að segja um annað sem miður fór og var í mínu valdi og hefði mátt gera betur."

  Annað:  Í þættinum í gær var spurt í hvaða hljómsveit Heiðar Örn Kristjánsson sé.  Gefið var rétt fyrir svarið Botnleðju. 

  Ég ætla ekki að gagnrýna þetta.  Aftur á móti fór ég að velta því fyrir mér hvort hljómsveitin Botnleðja sé ennþá starfandi.  Það hefur ekki komið út plata með henni síðan 2003 og ekkert lífsmark verið með henni í nokkur ár.  Heiðar Örn hefur verið á fullu með annarri hljómsveit,  The Viking Giant Show, síðan 2007.  Þar hefur hann haft í nógu að snúast við að semja grípandi lög sem hann gaf út á plötu í fyrra.

Ný skoðanakönnun - takið þátt

  Nú óska ég eftir tillögum um bestu smáskífur íslensku rokksögunnar.  Þær einar koma til greina sem innihalda lög er hafa ekki verið kynningarefni fyrir stórar plötur,  Lp.  Smáskífurnar sem flestar tilnefningar fá set ég síðar upp í formlega skoðanakönnun. 

  Í fljótu bragði dettur mér í hug  Fyrsti kossinn  með Hljómum,  Gvendur á eyrinni  með Dátum,  Glugginn  með Flowers,  False Death  með Fræbblunum,  Rækjureggí  með Utangarðsmönnum,  Kristjana  með Gyllinæð (sjá tónlistann hjá mér),  Ég er frjáls með Falcon...

  Komið með fleiri tillögur.

Úrslit í skoðanakönnun um bestu íslensku jólalögin

 

  Um jólin efndi ég til skoðanakönnunar um bestu íslensku jólalögin.  Ég óskaði eftir tillögum um bestu og verslu íslensku jólalögin. Það var nánast einróma niðurstaða að  Jólahjól  með Sniglabandinu væri versta íslenska jólalagið.  Það þurfti þess vegna ekki að setja upp formlega skoðanakönnun um versta jólalagið.

  Af tilnefningum um besta íslenska jólalagið setti ég upp formlega skoðanakönnun.  Stillti þar upp þeim lögum sem flestar tilnefningar fengu.  Áhugi á þessari kosningu hefur verið mjög dræm.  Í fyrri skoðanakönnunum mínum hafa fljótlega skilað sér 1000 - 2000 atkvæði.  Á löngum tíma hafa hinsvegar aðeins skilað sér rúmlega 300 atkvæði könnunni um bestu íslensku jólalögin. 

  Röðin og innbyrðis hlutföll hafa ekkert breyst frá fyrstu 50 atkvæðum.  Þó aðeins rúmlega 300 atkvæði hafi skilað sér í hús sé ég ekki ástæðu til að halda könnunni áfram.  Niðurstaðan er þessi:

1,  Gleði og friðarjól (Pálmi Gunnarsson) 33,6%

2.  Jólakötturinn (Ragnheiður Gröndal, Björk) 26,4%

3.  Nóttin var sú ágæt ein (Dikta og fleiri) 23,5%

4.  Jólahjól (Sniglabandið) 16,6%

  Sigurlagið er samið af Magnúsi Eiríkssyni.  Lag númer 2 er samið af Ingibjörgu Þorbergs við kvæði Jóhannesar úr Körlum.  Ég man ekki nafn prestsins sem samdi lag númer 3 né hver í Sniglabandinu samdi  Jólahjól.  Þið hjálpið mér með þær upplýsingar þannig að ég geti fært þær hér inn.