Brýnt að vita um stórhættulegan hversdagsmat

  Í Biblíunni má finna ýmsan hagnýtan fróðleiksmolann.  Til að mynda varðandi mataræði.  Í þriðju Mósebók er haft orðrétt eftir Drottni eftirfarandi um það hvaða ferfætt dýr megi borða:

  "Öll ferfætt dýr sem hafa klaufir og þær alklofnar og jórtra megið þér eta."  Í upptalningu á ferfættum dýrum sem forboðið er að eta segir hann um svínið:  "Það hefur að sönnu klaufir og þær alklofnar en jórtrar ekki.  Það sé yður óhreint."

  Seinni tíma þekking á svínakjöti hefur leitt í ljós að svínakjöt er varhugavert.  Það eru allskonar sníkjudýr og eiturefni í því.  Allir sem eta það farast.

  Nú hafa rannsóknir leitt í ljós að beikonát veldur öndunarfærasjúkdómum á borð við astma.  Sá sem snæðir beikon fjórum sinnum í viku eða oftar er í 76% meiri hættu á að fá astma en aðrir.

    

Svoooo einfalt og ódýrt að komast hjá áfengisböli

  Gríðarmikil hræðsla er við breytingar á smásölu áfengra drykkja - sem og að aflétt verði bláu banni við auglýsingum um þessa sömu vöru.  Hræddastir allra eru þeir sem neyta ekki áfengra drykkja.  Þeir eru á móti því að aðrir drekki þessa drykki.  Mjög svo.  Rök þeirra gegn frjálsræði í sölu áfengis eru þau helst að þá muni verð á bjór og léttvíni snarhækka.  Jafnframt muni úrval minnka.  Svo svakalega að drykkjuboltar geti einungis valið um bragðvonda Bónus-bjóra og Krónu-bjóra.  

  Til eru þeir sem óttast að vegna þessa - hærra verðs og minna úrvals - muni vesalingar missa stjórn á sér í matvöruverslunum.  Þeir flækist ringlaðir inn í búð til að kaupa sígarettur, neftóbak og sykur.  Skyndilega komi þeir auga á bjór og geggjast.  Gleyma stund og stað og eyða öllum sínum aurum í fulla innkaupakerru af bjór.  Hann þambi þeir af áfergju uns heimilið er í rúst.  Þá snúi þeir sér að heróíni og metamfetamíni.  Þaðan liggi leið rakleiðis í rándýra afvötnun á Vogi.  Eða á geðdeild.

  Raunveruleikinn er sá að allt afvötnunardæmið er aðeins pólitík og bisness.  Með einfaldri og ódýrri aðferð má eyða allri löngun í vímuefni á örfáum mínútum - hafi einhver - einhverra hluta vegna - áhuga á því.  Þetta er gert með dáleiðslu.  Minnsta mál í heimi.  Ég hef heyrt viðtöl við fólk sem kann dáleiðslu. 

„Í guðanna bænum gerið það ekki“

Útvarp Saga sniðgengin

  Skoðanakannanafyrirtækið Gallup kannar í dag hlustun á útvarpsstöðvar.  Spurt er:  "Hversu oft að jafnaði hlustar þú á eftirfarandi útvarpsstöðvar?"  Því næst eru taldar upp allflestar íslenskar útvarpsstöðvar.  Við hverja þeirra á að gefa upp hvort að hlustað er á hana:  a) daglega,  b) 4-6 sinnum á viku,  c) 1-3 sinnum á viku,  d) sjaldnar, e) næ útsendingum en hlusta ekki,  f) næ ekki útsendingum.

  Þessar útvarpsstöðvar eru taldar upp:  Bylgjan,  FM 957,  Létt Bylgjan 96,7,  Rás 1,  Rás 2,  Gull Bylgjan 90,9,  Kiss Fm 104,5,  FlashBack 91,9,  Fm Extra 101,5,  X-ið 97,7,  K-100,5,  FMX Klassík 103,9,  Útvarp Hringbraut,  Suðurland FM,  Aðrar.

  Athygli vekur að Útvarp Saga er sniðgengin í könnuninni.  Afar einkennilegt í ljósi þess að í öðrum hlustendakönnunum mælist hún vera ein þriggja stöðva með mesta hlustun.  Hinar eru Bylgjan og Rás 2.

  Hvað veldur því að ein vinsælasta útvarpsstöð landsins er útundan í yfirgripsmikilli hlustendakönnun?  Hvers vegna þessi þöggun?  Í þágu hverra er að niðurstaða hlustendakönnunarinnar sýni kolbrenglaða mynd af útvarpshlustun?  

 

  

Gáfaðasti forsetinn

  Heimsbyggðin hefur á undanförnum mánuðum kynnst mæta vel ljúfmenninu Dóna Trump.  Hann er eins og vinalegur og velkominn heimilisvinur.  Mætir daglega í heimsókn í öllum fréttatímum,  hvort heldur sem er í útvarpsfréttum eða á sjónvarpsskjá inni í stofu eða á forsíðum dagblaða sem og á samfélagsmiðlum,  til að mynda á Fésbók, Twitter og bloggi.  

  Það er gaman að fylgjast með þessum litríka náunga.  Litríka í bókstaflegri merkingu.  Nú er hann orðinn fyrsti appelsínuguli forseti Bandaríkja Norður-Ameríku.  Jafnframt sá gáfaðasti í því embætti.  Hann er bráðgáfaður.  Yfirburðargáfaður.  Hann hefur sjálfur sagt það.  Margoft.

Íslendingar gætu verið í vanda

Forræðishyggjan á góðu flugi

  Fjölmiðlar deila fréttum af átaki franskra yfirvalda gegn ört vaxandi yfirþyngd vesturlandabúa.  Þeir láta eins og það sé neikvætt.  Á sama tíma eru birtar í fagtímaritum lækna niðurstöður úr rannsóknum sem staðfesta grun margra:  Börn kvenna með stóran rass eru gáfaðri en önnur börn - sem stærðinni nemur.  Aukakíló karla tryggja langlífi.  Hvert aukakíló lengir ævina um ár.  

  Um meðaltal er að ræða.  Aðrir þættir spila inn í og brengla dæmið.   

  Í Frakklandi er veitingastöðum nú bannað að bjóða upp á ókeypis áfyllingu á lituðu sykurvatni með kolsýru.  Reyndar ótrúlegt en satt að bjálfar skuli drekka svoleiðis óþverra.  En hvað með það að þegar aularnir snúa heim frá veitingastaðnum og mega óheftir þamba viðbjóðinn?  

  Minna hefur farið fyrir fréttum af því að í fyrra skáru frönsk yfirvöld upp herör gegn "sælustund" (happy Hour) á veitingastöðum.  Hún gengur út á það að áfengir drykkir eru seldir á hálfvirði í tiltekinn klukkutíma eða tvo.

  Frönsku lögin eru þannig að veitingastöðum sem bjóða upp á "sælustund" er gert skylt að bjóða samtímis upp á óáfenga drykki á hálfvirði.  Það dregur væntalega úr áfengisdrykkju kunningjahópsins að ökumaður hans drekki appelsínusafa á hálfvirði.

  Þessu skylt:  Íslenskir forræðishyggjustrumpar láta sitt ekki eftir liggja.  Þeir leggja til fjölbreytta skatta á allar matvörur og allt sælgæti sem inniheldur sykur.  Með nýjum og helst mjög háum sköttum á að stýra neyslu skrílsins.  Reynslan hefur ekki verið þessari uppskrift jákvæð.  Ný hugsun:  Kannski má prófa að lækka tolla og álögur á hollustuvöru í stað þess að hækka álögur á meinta óhollustu.

        

Uppátæki aðgerðarsinna stokkar upp í kerfinu

  Um miðjan þennan mánuð skýrði ég undanbragðalaust frá athyglisverðu uppátæki ungrar færeyskrar grænmetisætu (vegaterían),  Sigriðar Guðjónsson.  Henni varð um og ó er á vegi hennar urðu lifandi humrar í fiskborði stórmarkaðarins Miklagarðs í færeysku Kringlunni,  SMS í Þórshöfn.  Hún gerði sér lítið fyrir:  Keypti alla humrana,  burðaðist með þá niður að höfn og sleppti þeim út í sjó.   

  Um þetta má lesa H É R 

  Sagan endar ekki þarna.  Nú hefur Heilbrigðisstofnun Færeyja gripið í taumana.  Héðan í frá er verslunum eins og Miklagarði stranglega bannað að selja lifandi humar.  Ástæðan er sú að humarinn er að stórum hluta innfluttur.  Heilbrigðisstofnunin óttast að Sigrið muni endurtaka leikinn ef hún á aftur leið um Miklagarð.  Sölubanninu er ætlað að hindra að kynblöndun færeyska humarstofnsins og allrahanda útlenskra humra með ófyrirsjáanlegum afleiðingum.  

  Veitingastöðum er áfram heimilt að kaupa lifandi humar en mega einungis selja hann steindauðan.

   

Það þarf að hafa kontról á óþörfu rápi

  Girðingar og múrveggir hafa oft gefist vel.  Fangelsi eru iðulega umlukin öflugum girðingum og múrveggjum.  Stundum er rafmagni hleypt í girðinguna.  Þetta dregur úr möguleikum óstöðugra á að brjótast inn í fangelsi, gera usla og fjölga föngum ótæpilega.  

  Um miðja síðustu öld gerðu Þjóðverjar tilraun með múrvegg.  Þeir skiptu borginni Berlín í tvennt með honum.  Hann kom í veg fyrir óþarft ráp á milli borgarhluta.  Hitt er annað mál að fyrir hlálegan misskilning var múrinn rofinn seint á síðustu öld og allt fór í rugl.

  Í Palestínu hefur verið reistur snotur aðskilnaðarmúr.  Með honum hefur reglu verið komið á ólívurækt Palestínumanna.  Þeim eru skammtaðir tilteknir dagar til að skottast í gegnum múrinn og tína ólívur.  Nema landtökugyðingar séu búnir að kveikja í trjánum enn einu sinni.

  Næst á dagskrá er múrveggur á milli Mexíkó og Bandaríkjanna.  Með honum verða Bandaríkin einangruð frá sunnanverðri Ameríku.  Girt af.  Ef einangrunarmúrinn gefst vel er næsta skref að reisa samskonar múr á milli Kanada og Bandaríkjunum.  Í báðum tilfellum "flýja" mun fleiri Bandaríkjamenn yfir landamærin til Mexíkó og Kanada en öfugt.  Það þarf að hafa kontról á þessu flakki.  

   

     

Við munum reisa múr segir Trump

Þannig kemst þú hjá því að kvefast

  Um þessar mundir herja allskonar kvefpestir og flensur á landsmenn.  Það er eðlilegt á þessum árstíma.  Langt er síðan sól hefur verið hátt á lofti.  Sólarljósið er hollt,  styrkir varnarkerfi líkamans og bætir andlega líðan.  

  Ásamt sólarleysi herja kuldakaflar á okkur.  Rok, snjór og kuldi eru vinir kvefveirunnar.

  Til eru einfaldar aðferðir sem draga mjög úr líkum á að kvefast.  Ein er sú að skottast í byggingavöruverslun og kaupa svokallaðar rykgrímur.  Þær eru ódýrar og þægilegar.  Bara smella þeim yfir vitin.  Kvefveiran kemst þá ekki að þeim.

  Önnur aðferð er að vera með gúmmíhanska á höndum utan heimilis.  Kvefveiran bíður á bak við hurð, sem og á hurðarhúnum og stigahandriðum.  Hún hefur hæfileika til að koma sér fyrir á húðinni og sæta lagi við að berast þaðan í munn eða nef.  

  Með þessum aðgerðum má draga úr líkum á að kvefast upp að 95%.

  Hitt er annað mál að flestir hafa gott af því að kvefast af og til.  Kvefið ertir varnarkerfi líkamans.  Það fær góða leikfimi og stendur sterkar á eftir.  Kvefið losar líkamann einnig við streitu. Í kjölfar góðrar kvefpestar er lundin létt í langan tíma á eftir.

 

  

Glæsilegt upphaf Trumps í embætti

  Eins og sumir vita þá urðu forsetaskipti í Bandaríkjum Norður-Ameríku á fyrsta degi í Þorra.  Hussein hrökklaðist úr embætti.  Hans verður helst minnst fyrir að hafa - með dyggum stuðningi Hildiríðar Clinton - náð að hleypa öllu í loft upp í Austurlöndum nær.  Þau eru blóðug upp að öxlum.  Nutu til þess eindregins stuðnings íslenskra stjórnvalda.

 Nýr og appelsínugulur forseti,  Dóni Trump,  hyggst draga úr sprengjuregni Kanans í útlöndum.  Um óþarfa bruðl á skotfærum sé að ræða.  Hernaður í útlöndum eigi fyrst og síðast að snúa að því að ræna olíulindum.

  Það gustar af Trump.  Það gustar allt í kringum hann.  Á fyrsta degi í embætti, á bóndadag,  náði hann að koma fleiri Bandaríkjamönnum út að ganga en Hussein á átta árum.  Hreyfing er lykill að heilbrigði.  Göngutúrar eru besta líkamsrækt sem völ er á.  

  

Segir að Trump eigi að skammast sín

Glæsileg ljóðabók

  Á dögunum áskotnaðist mér ljóðabókin Safnljóð.  Undirtitill er 2006-2016.  Höfundur er Skagfirðingurinn Gísli Þór Ólafsson.  Ég þekki betur til hans sem tónlistamannsins Gillons.  Ég á tvær flottar af fjórum sólóplötum hans.  Gísli Þór er sömuleiðis liðsmaður blússveitarinnar ágætu Contalgen Funeral frá Sauðárkróki.

 Eins og nafn bókarinnar upplýsir undanbragðalaust þá hefur hún að geyma úrval ljóða eftir Gísla Þór.  Þau eru úr fimm ljóðabókum hans og af plötunum.

  Ljóðin eru óbundin og óhefðbundin.  Engir stuðlar eða höfuðstafir né rím.  En góður möguleiki er á að greina hljómfall í sumum þeirra.

  Það er ferskur tónn í ljóðunum.  Frumleg hugsun og kímni.  Það er gaman að lesa ljóðin aftur og aftur.  Sum vaxa við endurlestur. Önnur eru alltaf jafn mögnuð.  Til að mynda eitt sem heitir "Haukur Ingvarsson":

 Hver er þarna að fikta í kaffivélinni?

er það ekki KK

sem er að fikta í kaffivélinni?  

  Annað og töluvert öðruvísi er "Ást á suðurpólnum":

  Hve oft

ætli mörgæsir

hafi séð þig

sveitta ofan á mér

er við nutum ásta

á suðurpólnum

í engu nema vettlingum

  Bókin inniheldur - auk ljóðanna - fróðleik um feril Gísla Þórs.  Ég hvet ljóðelska til að kynna sér hana.  Hún er virkilega ágæt, flott og skemmtileg.  Fátt nærir andann betur en lestur góðra ljóða.    

  

 

  

Vandræðaleg mistök

  Tilvera aldraðrar brasilískrar konu hefur alla tíð snúist að miklu leyti um bænahald.  Mörgum sinnum á dag leggst hún á bæn og brúkar talnaband.  Til að skerpa á mætti bænarinnar hefur hún notast við litla styttu af heilögum Anthony.  Hann er eitt af stærstu númerum kaþólskra dýrlinga og mjög kröftugur.  Að því er mér skilst.  

  Konunni áskotnaðist styttan fyrir nokkrum árum.  Eftir að styttan fékk lykilhlutverk í bænahaldinu þá var eins og ótal dyr opnuðust.  Konan varð bænheit.  Bænir hennar hrifu sem aldrei fyrr.  Hún fór reyndar aldrei fram á mikið.  Var hvorki hégómleg í ákallinu né ósanngjörn.

  Nýverið uppgötvaði ömmustelpa hennar að styttan væri ekki af heilögum Anthony heldur plastleikfang úr Hringadróttinssögu.  Hringadróttinssaga byggir á norrænu goðafræðinni.  Gandalf er Óðinn og fígúran sem gamla konan á kallast Elrond.   

  Þrátt fyrir þessa uppgötvun getur gamla konan ekki hugsað sér að biðja án þátttöku leikfangsins.  Reynslan af því er svo góð.  

Snautleg innsetningarhátíð

  Rík hefð er fyrir stórkostlegri rokkhátíð þegar nýr karlmaður er formlega settur í embætti forseta Bandaríkja Norður-Ameríku.  Stærstu nöfn rokksins sameinast í að afgreiða glæsilega dagskrá.  Ekki aðeins bandarísk nöfn.  Líka bresk.  Forseti Bandaríkjanna er jafnframt forseti heimsins.

  Á innsetningarhátíðinni sameinast þjóðin.  Hún fagnar lýðræði og frelsi.  Hún fagnar því að forsetakosningar eru haldnar á 4ra ára fresti.  Þjóðin hefur valið sinn merkasta og hæfasta karlmann.  Að þessu sinni ljúfmennið Dóna Trump.

  Strax og sigur hans lá fyrir bárust fréttir af því að hann og hans menn væru farnir að ræða við stærstu rokkstjörnurnar.  Þeim var sagt að á meðal þeirra sem kæmu fram yrðu the Beach Boys, Elton John, aularnir í Kiss, Garth Brooks og Céline Dion.  Þessir aðilar brugðu við skjótt og þvertóku fyrir sína þátttöku - þrátt fyrir að þeim hafi verið lofað hárri fjárupphæð.

  Engu að síður mátti ætla að rokkhátíðin gæti skartað stjörnum á borð við Nick Cave, Lady Gaga, Paul McCartney, Green Day, Tom Waits, Foo Fighters, U2, Patti Smith, Metallica, the Rolling Stones, Madonnu, Pearl Jam, Bob Dylan og Leoncie.  Ekki endilega nákvæmlega þessi nöfn.  Alveg eins einhver önnur af sömu stærðargráðu.

  Nú, degi fyrir hátíðarhöldin, liggur fyrir að ekki tókst að landa neinni þekktri rokkstjörnu.  Þetta verður snautlegasta rokkhátíð í manna minnum.  

  Jú, reyndar er eitt nafnið pínulítið þekkt innan sveitasöngvasenunnar.  Þar er um að ræða Toby Keith.  Hann hefur alla tíð verið yfirlýstur demókrati.  Segist hinsvegar vera svekktur yfir því að þrátt fyrir tryggðina hafi honum aldrei verið umbunað af flokknum.  Þar fyrir utan veiti honum ekkert af fjárfúlgunni sem er í boði.  Hann hefur aldrei náð jafn stjarnfræðilega háu tímakaupi við að syngja kántrý-slagara.

  Aðrir sem koma fram eru til dæmis að taka Dj Ravi Drums (spilar lög af plötum og trommar undir.  Sjá myndband hér fyrir neðan.), Jacki Evanco (keppti í raunveruleikaþættinum America´s Got Talent) og The Piano Guys.  Þeir kráka þekkt lög á píanó.  

  

   

Kærir Trump fyrir ærumeiðingar

Í þá gömlu góðu daga

  Bílarnir breytast og mennirnir með,  eins og segir í orðatiltækinu.  Fleira breytist.  Til að mynda afstaða til heilsu og næringar.  Framan af var litað sykurvatn á borð við Coca-cola selt sem heilsudrykkur.  Um svipað leyti voru sígarettur einnig skilgreindar sem hollustuvara.  Í dag er deilt um það hvort rafsígarettan sé hollari.

Humarfrelsarinn

 

  Ég veit ekki margt um grænmetisætur (vegan/vegaterian).  Þó veit ég að sumar þeirra borða dýraafurðir eins og egg og mjólkurvörur.  Aðrar borða fisk.  Vita fátt betra en harðfisk með smjöri.  Svo eru það þær sem sniðganga vandlega allt sem tengist dýrum.  Í þeirra tilveru er ekkert leður,  ekkert silki,  engin ull.

  Ástæðan fyrir þessu getur verið margvísleg.  Ein er takmarkalaus samúð með öllum lifandi verum.  Öll dýr eigi rétt á að vera frjáls og ótrufluð af manna völdum.  Það er falleg og göfug hugsjón.

  Ung færeysk kona,  Sigrið Guðjónsson,  er í þessum hópi.  Eins og nafnið gefur til kynna þá á hún ættir að rekja til Íslands.  Að vísu dálítið langt aftur í ættir.  Mig minnir að langamma hennar hafi verið íslensk.

  Á dögunum átti Sigrið erindi í færeysku Kringluna,  SMS,  í Þórshöfn.  Í versluninni Miklagarði sá hún lifandi humra í fiskborðinu.  Hún fékk sting í hjartað,  vitandi að humar er matreiddur þannig að honum er stungið lifandi ofan í pott.  Hún gat ekki hugsað sér þessi kvalarfullu örlög humranna.  Þeir mændu á hana í örvæntingu.  

  Það var ekki um annað að ræða en draga upp seðlaveskið.  Hún keypti alla humrana,  á þriðja tug.  Þar með fauk sparipeningurinn.  Það skipti minna máli en örlög humranna.  Hún fékk aðstoð við að drösla þeim niður að höfn.  Það er töluverður spotti þangað frá SMS.  Þar sleppti hún þeim í sjóinn.  Horfði hamingjusöm á eftir þeim fagna frelsinu.  

 

Flækjustigið kryddar tilveruna

  Embættismönnum er ekki alltaf lagið að hanna einfalt og skilvirkt kerfi.  Þvert á móti.  Algengara er að hlutirnir stangist á við hvern annan.  Allt lendi í pattstöðu.  

  Á síðustu öld seldu vinahjón mín bílinn sinn.  Þau voru að flytja til útlanda.  Allt gekk vel.  Flutningurinn gekk eins og í sögu.  Þá kom babb í bátinn.  Kaupandanum tókst ekki að umskrá bílinn.  Ástæðan var sú að bíllinn var upphaflega skráður í gegnum Tryggingastofnun.  Konan er öryrki og fékk einhverja tolla eða gjöld felld niður við kaupin.  Til að bíllinn yrði skráður á nýja kaupandann þurfti að ganga frá málum við Tryggingastofnun.

  Haft var samband við Tryggingastofnun.  Þá vandaðist málið.  Þar fengust þær upplýsingar að fyrst þyrfti að umskrá bílinn.

  Fyrir daga internets fóru samskipti fram í gegnum sendibréf á pósthúsi.  Bréfin gengu fram og til baka.  Lengi vel gaf hvorug stofnunin sig.  Eftir ótal bréfaskipti í marga mánuði náðist lending.  Í millitíðinni olli pattstaðan fjárhagslegum erfiðleikum.  Það var þó aukaatriði.

  Eftir innkomu internets er ekkert lát á flækjustigi.  Færeyska lögregluembættið (sem heyrir undir Danmörku) auglýsti að Færeyingum væri skylt að skrá skotvopn sín fyrir tiltekinn dag.  Samviskusamur hálf áttræður byssueigandi á Austurey brá við skjótt.  Hann brunaði á lögreglustöðina í Rúnavík. En, nei. Þar var honum tjáð að skráningin væri hjá Umhverfisstofu í Þórshöfn á Straumey.  Ekkert mál.  En, nei. Þegar á reyndi þá var Umhverfisstofan ekki komin með pappíra til að fylla út.  Hinsvegar var maðurinn upplýstur um það að hann þyrfti að fara aftur á lögreglustöðina í Rúnavík.  Í þetta skipti til að fá sakavottorð.  Það er alltaf gaman að eiga erindi til Rúnavíkur.  Þar er vínbúð Austureyjar.

  Þegar pappírar voru komnir í Umhverfisstofu brá kauði undir sig betri fætinum og brunaði til höfuðborgarinnar.  Töluverðan tíma tók að fylla út í alla reiti.  Að því loknu kvaddi hann starfsfólkið með handabandi.  Við það tækifæri fékk hann að heyra að skýrslugerðin kostaði 4000 kall (ísl).

  Svo heppilega vildi til að hann var með upphæðina í vasanum.  En, nei.  Umhverfisstofa tekur ekki við reiðufé.  Allt í góðu.  Hann dró upp kort.  En, nei.  Það má bara borga í Eik-banka.  Hann skottaðist niður í miðbæ.  Eftir töluverða leit fann hann Eik.  Bar upp erindið og veifaði 4000 kallinum.  En,  nei.  Hann mátti einungis millifæra af bók.  Þá kom upp ný staða.  Hann á ekki í viðskiptum við Eik og á enga bók þar.  Þá var minnsta mál að opna bók og leggja peninginn inn til að hægt væri að millifæra.  En, nei.  Það væri svindl.  Eik tekur ekki þátt í svoleiðis.  Eina rétta leiðin fyrir hann væri að millifæra úr sínum rótgróna viðskiptabanka yfir til Eikar.  

  Ekki var um annað að ræða en fara langa leið upp í nýja Nordik-bankann í Þórshöfn.  Þar var millifært yfir í Eik.  Að því loknu snéri hann aftur í Eik.  Þar sótti hann kvittun.  Með hana fór hann glaður og reifur í Umhverfisstofu.  Gegn henni fékk hann vottorð um að hann væri búinn að skrá byssuna sína.  Allir urðu glaðir því að allir fóru eftir settum reglum.  Þetta tók ekki nema tvo vinnudaga.      

    

Mergjaðar myndir. Hvernig gat þetta gerst?

 

 

 

 

 

 

 

 

  Rauði bíllinn vakti óhemju mikla athygli.  Ekki vegna skærrauða litarins heldur vegna slagbrands sem stendur út úr miðri framrúðu.  Bílstjórinn hafði ekkert tekið eftir því sjálfur.  Enda liturinn í smekklegum stíl við ökutækið.  Hann hefur ekki hugmynd um hvernig slagbrandurinn endaði þarna.

 

 

 

 

 

 

 

 

 

 

 

 

 

 

 

  Skógarvörðurinn var í sinni reglubundnu daglegu eftirlitsferð um skóginn.  Þá rakst hann á bíl uppi í einu trénu.  Engin ummerki fundust um það hvernig bíllinn komst þangað.  Né heldur hver á gripinn.  Helst dettur mönnum í hug að bíllinn hafi fallið úr vöruflutningaflugvél. 

 

 

 

 

 

 

 

 

 

 

 

 

 

 

  Mánudagur leggst illa í suma.

 

 

 

 

 

 

 

 

 

  Góðir feður sleppa ekki sunnudagsrúnti fjölskyldunnar þó að bíllinn sé með smá dæld aftast á þakinu.

 

 

 

 

 

 

 

 

  Þegar skortur er á bílastæðum leggja útsjónasamir bíl sínum á ótrúlegustu stöðum.

Hræðileg mistök

  Vegir guðanna eru órannsakanlegir.  Ætlun er ekki alltaf ljós í fljótu bragði.  Stundum eru farnar krókaleiðir til að koma skilaboðum á framfæri.  Það henti í kaþólskri kirkju í Kolombo á Sri Lanka í aðdraganda jóla í fyrra.  Til fjáröflunar - og til að mæta bænaþörf safnaðarins - var ákveðið að láta prenta innblásna Maríubæn,  móður Jesú til heiðurs.  Fundinn var fínasti pappír og frágangurinn hafður sem glæsilegastur.

  Salan hlaut fljúgandi start.  Mörg hundruð eintök seldust á einum degi.  Daginn eftir uppgötvaðist að textinn var ekki Maríubæn heldur kjaftfor dægurlagatexti eftir bandarískan rappara,  2bac Shakur.  Sá var myrtur fyrir tveimur áratugum.  Eins og gengur.  Textinn fjallar um ofbeldi, klám og eiturlyf.      

  Talsmaður kaþólikka á Sri Lanka segir að um mannleg mistök sé að ræða.  Klúður í prentsmiðjunni.  

  Ekki tókst að prenta réttan texta áður en jólin gengu í garð.  Kaupendum var hinsvegar boðin endurgreiðsla.  Fáir þáðu hana.  Flestir höfðu tekið ástfóstri við rapptextann.  Kröftugri bæn höfðu þeir ekki kynnst og þuldu hana daglega yfir alla jólahátíðina.  Stundum tvisvar á dag.  

  

Vandræðaleg staða

  Gallinn við marga fanga er að þeir hafa ekki sómakennd.  Fyrir bragðið eru þeir kallaðir harðsvíraðir.  Það er enginn sómi að því.  Víða erlendis klæðast fangar sérstökum fangaklæðnaði.  Því fylgja margir kostir.  Það dregur úr stéttaskiptingu innan fangahópsins.  Banksterinn er í samskonar búningi og samlokuþjófur.  Fangabúningurinn dregur úr möguleikum fangans að flýja úr fangelsinu.  Jafnframt dregur það úr möguleikum strokufanga að leynast á meðal almennings.  Almenningur ber þegar í stað kennsl á að strokufangi sé á ferð og framkvæmir snöfurlega borgaralega handtöku.

  Hérlendis fá fangar að sperra sig í sínum fínustu fötum.  Það er óheppilegt.  Sést best í Fangavaktinni þar sem Georg Bjarnfreðarson er snöggur að koma sér upp samskonar klæðnaði og fangaverðir.

  Í Bretlandi eru fangar í samræmdum fangaklæðum.  Vandamálið er að þau eru í stöðluðum stærðum. Þær hafa ekkert breyst í áratuganna rás.  Öfugt við holdafar Breta.  Breskir glæpamenn hafa stækkað á þverveginn jafnt og þétt það sem af er þessari öld.  Sér þar hvergi fyrir enda á.  

  Óánægður fangi í góðri yfirvigt lýsir því sem refsiauka að þurfa að vera í of litlum fangafötum.  Einkum er lítill sómi að þegar fötin koma úr þvotti.  Þá eru þau þrengri en eftir nokkurra vikna notkun.  Buxur komast rétt upp á miðjar rasskinnar.  Þær eru svo þröngar að göngulag verður eins og hjá stirðbusalegasta spýtukalli.  

  Ennþá verra er að skyrtan nær ekki yfir útstandandi ístruna.  Hún nær með herkjum að hylja efri hluta búksins niður að maga.  Hann stendur nakinn eins og risabolti út í loftið.

  Að sögn fangans er þetta svo niðurlægjandi að menn í hans stöðu bjóða sér ekki upp á að taka á móti gestum í heimsóknartíma á meðan fötin eru þrengst. Nóg er að þurfa að þola háðsglósur annarra fanga.  Jafnvel siðblindustu glæpamenn hafa sómakennd þegar snýr að fatnaði.  Þeir vilja meina að þarna séu mannréttindi þeirra fótum troðin.  Það er ekki til sóma.    

  

„Hvar var sómakennd ykkar?“

Hvað eyddir þú miklu í jólagjafir? Komstu út í plús?

  Samkvæmt skoðanakönnun í Bretlandi eru íbúar Sheffield eyðslusamastir allra þegar kemur að jólagjöfum.  Þeir eyða hver um sig að meðaltali 69 þúsund og 700 krónum í jólagjafakaup (498 pund).  Ef við miðum við gengið eins og það var áður en það hrundi í haust erum við að tala um 100 þúsund kall.

  Skotar eru ekki eins nískir og enskir brandarar herma.  Glasgow-búar koma fast á hæla Sheffield-búa.  Þeir kaupa jólagjafir fyrir 69 þúsund og 300 kr.

  Bítlabærinn Liverpool er í 3ja sæti.  Púllarar spandera 64 þúsund og 100 kr. í jólagjafir.  

  Bristol-búar halda að sér höndum.  Þeirra jólagjafainnkaup kosta 51 þúsund og 800 kr.  

  Að meðaltali fær húsbóndi gjafir að andvirði 5880 kr.  Húsfrúin fær gjafir að andvirði 7420 kr.  Börnin fá dýru gjafirnar.  80% Breta segja að sælla sé að gefa en þiggja.

    

Fræðandi skaup

 

  Áramótaskaupið í sjónvarpinu á gamlársdag var ekki aðeins skemmtilegt.  Það var ekki síður fræðandi.  Indriði fór á kostum.  Gott hjá honum að fræða forsetann um ýlið í baðherbergisglugganum.  Bílastæðaverðirnir gáfu honum lítið eftir.  "Nei, nú hringi ég í Jens!"  Einnig sá sem klúðraði víkingaklappinu.  Sem og margir fleiri.

  Bitastæðastur var fróðleiksmolinn um skyrið.  Svo skemmtilega vill til að breska dagblaðið Daily Mail komst að sömu niðurstöðu í árslok.  

  Í næstum því heilsíðugrein er fjallað um kosti og galla jógúrts.  Fyrirsögnin er "Jógúrt-tegundirnar sem gera þér gott".  Í inngangi er vísað til Heilbrigðisráðs Englands.  Það varar stranglega við óhóflegu sykurmagni í sumum jógúrt-tegundum.  Næringarfræðingur Daily Mail kafar í málið og bendir með góðum rökum á fimm ákjósanlegustu tegundirnar.  

  Fyrst er nefnt Íslenskt vanillu-skyr.  Það ber höfuð og herðar yfir aðrar jógúrt-tegundir.  170 gr dolla kostar 1,25 pund (175 ísl kr.).  Hitaeiningar í þessu magni eru 95,  fita 0,17 gr,  sykur 5,6 gr og prótein 16,6 gr.

  Það er framleitt úr undanrennu.  Samt er það þykkt og kremkennt.  Halda mætti að óreyndu að það sé framleitt úr rjóma.  

  Prótein-magnið er þrefalt í samanburði við aðrar jógúrt-tegundir. Það jafngildir próteini þriggja brúneggja.  Fyrir bragðið er neytandinn pakksaddur í langan tíma eftir að hafa gúffað því í sig.  Fullkominn morgunverður.  Líka heppilegur millibiti.  Leyndarmálið liggur í hárnákvæmri blöndu af náttúrulegum mjólkursykri og gervisætuefnum.  Sykurinn rúmast lipurlega í sléttfullri teskeið.

   

Landsmenn tísta um skaupið