Hillary Clinton með geðröskun

  Samkvæmt frétt á mbl.is er fullyrt að Hillary Clinton,  forsetaframbjóðandi demókrata í Bandaríkjum Norður-Ameríku, sé með geðröskun.  Henni er lýst innhverfri.  Í málgagni bandarískra geðlækna 2010 er innhverfa skilgreind.  Meðal einkenna eru eftirfarandi:  

- Er stöðugt að tala við sjálfan sig

- Með lágan blóðþrýsting

- Sækir stíft í að sitja við borðenda.  Forðast eins og heitan eld að sitja fyrir miðju borði.

- Snillingur á einu sviði en vanmáttug á öllum öðrum sviðum 

- Gerir ekki neitt tímunum saman.  Situr bara og horfir út í loftið.

- Þolir ekki að spjalla um eitthvað sem skiptir engu máli

- Hefur ekki áhuga á að kynnast nýju fólki

- Er í sínum heimi þrátt fyrir að vera í mannfagnaði með vinum og ættingjum

- Þolir illa áreiti en tekur eftir allskonar smáatriðum sem fara framhjá öðrum

- Umhverfið skiptir engu máli.  Það bara er þarna.

 

Innhverf og með löngun til að þjóna

Heitt íste

  Ég kom við í kaffihúsi í miðbæ Reykjavíkur.  Þangað kom líka par sem talaði - að ég held - frönsku áður en það fór að skoða matseðilinn.  Svo pantaði það sér drykki í hálfgerðum tungumálaörðugleikum.  Strákurinn spurði á bjagaðri ensku hvort að hægt væri að fá heitt íste (Ice Tea).  Þetta hljómar eins og mótsögn.  Ég er ekki nógu mikill heimsborgari né vel að mér í tedrykkju til að átta mig á því hvort að tedrykkjufólk tekur almennt svona til orða.

 

Smásagan Veiðiferð. Bönnuð börnum!

  Hvað er betra í heiminum en að vera aleinn uppi í óbyggðum í heila viku;  með veiðistöng og nóg af köldum bjór?  Þetta hugsar Brandur um leið og hann sporðrennur ljúffengri nýgrillaðri bleikju.  Klukkutíma áður synti hún hamingjusöm í nálægum lækjarhyl ásamt nánustu ættingjum og æskuvinum.

  Brandur stendur upp, ropar og skolar mataráhöld í hylnum.  Hann gengur frá grillinu og kemur því fyrir í farangursgeymslu húsbílsins.  Það fer að rökkva innan skamms.  Þrátt fyrir bjór í maga þá sest hann undir stýri og ekur af stað.  Hann verður hvort sem er ekki kominn til byggða fyrr en upp úr miðnætti.

  Ferðin gengur eins og í sögu.  Hann leggur í bílastæðið fjarri húsinu.  Konan er greinilega sofnuð.  Myrkur grúfir yfir.  Hann vill ekki vekja hana.  Læðist hljóðlega inn,  afklæðist og leggst upp í rúm þétt við frúna.  Svefninn sækir strax á.  Hjónarúmið er miklu mýkra og betra en beddinn í húsbílnum.  Í þann mund sem hann er að svífa inn í draumaland þá vaknar lostakústur.  Eftir vikufríið vill hann sitt.  Í svefnrofanum hlýðir Brandur kallinu og bregður sér á bak.  Það er hvorki tölt né brokkað heldur þeysireið á harðastökki með kröftugum rykkjum og hnykkjum í allar áttir.  Hamagangurinn er slíkur að stæðilegt rúmið leikur á reiðiskjálfi.

  Að leik loknum leggst Brandur á bakið og blæs eins og hvalur.  Hann er alveg búinn á því.  Munnurinn er þurr og þorsti sækir á.  Hann læðist fram í eldhús og fær sér vatnssopa.  Út undan sér tekur hann eftir veikum bláum bjarma í hálflokuðum stofudyrunum.  Hann læðist að og stingur höfði varlega inn um dyragættina.  Við stofuborðið situr eiginkonan.  Hún er með fartölvu fyrir framan sig.  Hún kemur strax auga á Brand, rífur af sér heyrnartól og kallar hálf hvíslandi:  "Hæ, elskan!  Ég heyrði þig ekki koma.  Amma í Kanada kom áðan í heimsókn.  Hún ætlar að vera hjá okkur í nokkra daga áður en hún fer norður.  Hún er orðin svo hrum,  97 ára,  skökk og stirð og bakveik að ég leyfði henni að sofa í hjónarúminu. Við sofum bara í gestaherberginu á meðan." 

 

 

 

 

 

 

 

 

 

_______________________

  Fleiri smásögur HÉR.

   

              

Heimska fólkið fer á kostum

  Það er ekki öllum gefið að hafa verksvit.  Sumir synda í gegnum lífið eins og hálf sofandi.  Lengst af er líkt og þeir gangi ekki á öllum "cylindrum". Eða eins og máltækið segir:  "Margur er sljór þó hann sé mjór."  Þetta á ekki síst við í flatbökubransanum þar sem almúganum er selt ítalskt fátækrafæði á uppsprengdu verði.  Kátínu vakti um verslunarmannahelgi auglýsing um opnunartíma einnar flatbökusjoppunnar.

 

 

 

 

 

 

 

 

 

 

 

 

 

 

 

 

  Önnur flatbökugerð komst í kastljósinu.  Skjáskot af netsamtali gengur manna á meðal.  Flatbökusalinn ruglar saman nöfnunum Sighvatur og Frank.  Það er eðlilegt.  Bæði nöfnin innihalda sjaldgæfu stafina a og r. Til að sjá textann betur þarf að smella á skjáskotið.

 

 

 

 

 

 

 

 

 

 

  Margir hafa ofnæmi fyrir jarðhnetum.  Þess vegna er á umbúðum sumra matvæla merkt að þau innihaldi jarðhnetur.  Til að ekkert fari á milli mála hefur þótt ástæða til að merkja við jarðhneturekka í matvöruverslun að jarðhnetur innihaldi jarðhnetur.  Í Bandaríkjum Norður-Ameríku er ástæða til að passa upp á svona lagað.  Kæruglaðar lögfræðistofur gera út á að hanka verslanir sem gulltryggja sig ekki með bæði belti og heilgalla. 

  Vínberalaus vínber.  Heimskinginn hefur líkast til ætlað að koma því á framfæri að vínberin séu steinlaus. 

 

Allt samfélagið hagnast á rokkhátíðinni G!Festivali

   Þriggja daga útirokkshátíðin G!Festival er gríðarleg innspýting í hagkerfi Götu í Færeyjum.  Eða eiginlega fjögurra daga.  Hún hefst á fimmtudegi og stendur yfir fram til klukkan fjögur að morgni sunnudags.  Þessa daga breytist litla 1000 manna Götuþorpið í glaðværan 4500-7500 manna kaupstað.  Iðandi mannlíf hvert sem litið er.  Hópurinn þarf að nærast.  Allan tímann er stappað af viðskiptavinum í litlu bensínsjoppunni, matvörubúðinni og í fjölda sölutjalda sem setja sterkan svip á hátíðarsvæðið.  Í þeim eru seldar hljómplötur,  bækur,  fatnaður,  minjagripir og ýmislegt matarkyns.  

  Ætla má að hver gestur versli mat og drykk fyrir að minnsta kosti 30-40 þúsund kall.  Við það bætist miðaverð, gisting og sitthvað fleira.  Til að mynda bensín,  hljómplötur og leiga á sundfötum og handklæðum.  Þegar allt er saman talið eru heildarútgjöld gests farin að slaga í 100 þúsund kallinn.  

  Hátt hlutfall þorpsbúa fær launaða vinnu festivalsdagana og margir dögum og vikum saman fyrir og eftir.  Það þarf að smíða og taka niður svið,  sölutjöld,  heitapotta og allrahanda aðstöðu.      

  Hluti af heildarveltunni fer til sveitarfélagsins í formi útsvars og til ríkissjóðs í formi skatta.  

  Stærsti ávinningurinn eru ruðningsáhrifin.  Reynslan hefur sýnt að erlendu skemmtikraftarnir eru öflug auglýsing fyrir Götu og Færeyjar.  Milljónir aðdáenda út um allan heim fylgjast með póstum þeirra á samfélagsmiðlum á borð heimasíður,  blogg,  Fésbók, Twitter, Instigram og hvað þetta allt heitir.  Í næstu fjölmiðlaviðtölum segja poppstjörnurnar frá ánægjulegri upplifun á G!Festivali.  

  Fjölþjóða festival á borð við þetta laðar að tugi ef ekki hundruð fjölmiðlafólks og útsendara annarra tónlistarhátíða.  Athyglin beinist að færeysku flytjendunum.  Þetta er stóra tækifæri þess.  Tónlist þeirra er lýst í erlendum tónlistarblöðum og stórum dagblöðum.  Útvarps- og sjónvarpstöðvar taka viðtöl og spila músíkina.  Í kjölfar tekur sala á tónlist þess kipp svo og spilun á henni á þútúpunni.  Þetta skilar sér í fjölgun ferðamanna til Færeyja og bókunum á færeyskum tónlistarmönnum á tónlistarhátíðir ðí útlöndum.

  Bara svo eitt dæmi sé nefnt:  Útsendari Airwaves uppgötvaði þarna færeysku tónlistarkonuna Konni Kass og réði hana þegar í stað til að spila á Airwaves í haust.  Í dag þekkja Íslendingar ekki Konni Kass.  Í haust munu margir Íslendingar kynna sér músík hennar - og kunna vel að meta.  

  Ég þurfti ekki að hafa neitt fyrir því að finna umfjöllun um G!Festival 2016 utan Færeyja.  Sjá:  H É R  og  H É R  og  H É R  og  H É R  og  H É R 

G!Festival í Götu

  Eins og stundum áður brá ég mér á G!Festival.  Það er haldið í neðri hluta þorpsins Suður-Götu á Austurey í Færeyjum.  Um ferðina og hátíðina má lesa á visir.is með því að smella H É R.  Ástæða er til að smella á myndirnar þar - og á þessari síðu - til að stækka þær.

  Suður-Gata er eitt þriggja samliggjandi þorpa sem mynda í sameiningu þúsund manna þorpið Götu.  Hin eru Norður-Gata og Götukleif (Götugjógv).  Á þessari mynd er Suður-Gata (410 íbúar) næst okkur og Norður-Gata (565 íbúar) fjærst.  Götukleif (52 íbúar) er á milli.  Þar er grunnskólinn,  kirkjan og félagsheimilið.  Það er hagkvæmt.

 

 

 

 

 

 

 

 

  Hérlendis er Gata þekkt vegna orðatiltækis um Þránd í Götu.  Þegar hindrun er í vegi er sagt að þar sé Þrándur í Götu.  Þrándur var uppi 945-1035.  Hann var frumherji í menntun í Færeyjum og barðist gegn skattgreiðslum Færeyinga til Noregs og kristnitöku.  Hann var mikill trúmaður og aðhylltist ásatrú. Í Götu er myndarleg stytta af honum.  Þar stendur hann bísperrtur láréttur;  snilldar túlkun á því hve þver og fastur fyrir hann var.

 

 

 

 

 

 

 

 

 

  Meðal skemmtikrafta á G!Festival var færeyska tónlistarkonan Konni Kass.  Hún kemur fram á Airwaves í haust.

  Á föstudeginum var ljúft að sjá og hlýða á kvæðarokksveitina Hamradun.  Hljómsveitin Týr kom upp í hugann.  Kannski ekki skrýtið.  Söngvarinn,  Pól Arni,  söng á sínum tíma lögin með Tý sem Íslendingar kynntust fyrst.  Þar á meðal gömul kvæðalög á borð við "Ormurin langi" og "Ólavur Riddararós".  Við nánari hlustun á Harmadun kemur í ljós að hljómsveitin hefur fundið sinn eigin heillandi stíl.  

   Annika Hoydal hefur átt hug og hjörtu Færeyinga í hálfa öld.  Að vísu bar skugga á þegar hún kom fram nakin í danskri bíómynd á hippaárunum.  Þá bannaði færeyska ríkisútvarpið lag með henni.  Það var sagt vera ósiðlegt.  En þetta gekk hratt yfir.  Í dag tekur fjöldinn hraustlega undir söng Anniku.  Það er gaman að sjá hvað vinsældir hennar ganga þvert á alla aldurshópa. 

  Eivör hefur tekið þátt í G!Festivali frá upphafi, 2002.  Aðeins örfáu sinnum hefur hún ekki komið því við að mæta.  Hún er á heimavelli í Götu í bókstaflegri merkingu.  Þar fæddist hún og ólst upp.  Þar búa systkini hennar,  móðir,  amma og æskuvinirnir.  Hún er drottning í Færeyjum og DrottningIN í Götu með stórum  staf og ákveðnu8m greini.  

  Færeyskir rokkunnendur unnu heimavinnuna fyrir G!Festival.  Þeir höfðu greinilega kynnt sér tónlist íslenska bandsins á hátíðinni,  Agent Fresco;  sungu með í þeim lögum sem oftast eru spiluð á þútúpunni. 

  Gæsla var fjölmenn og áberandi í sjálflýsandi vestum.  Einnig hjúkrunarfræðingar og læknir.  Hópurinn var á stöðugu rölti um allt hátíðarsvæðið.  Þegar á vegi urðu unglingar sem greinilega höfðu sloppið í bjór var staldrað við;  vatni hellt í glas og viðkomandi hvattir til að sturta því í sig.  Hlaut það hvarvetna góðar undirtektir.  

  Á VIP svæðinu (fyrir fjölmiðlamenn,  útsendara plötufyrirtækja og tónlistarhátíða,  tónlistarfólkið og annað starfsfólk) var útibú frá skemmtistaðnum Sirkusi í Þórshöfn.  Sá staður er nákvæm eftirmynd af skemmtistaðnum Sirkusi sem stóð við Klapparstíg í Reykjavík.,  Eigandi Sirkus er Sunneva Háberg Eysturstein.  Hún er einnig þekkt sem vinsæll plötusnúður og stjórnmálamaður.

  Bróðir Sunnevu,  Knut Háberg Eysturstein,  er líka vinsæll plötusnúður.  Hann hefur sent frá sér nokkrar sólóplötur og spilað í ýmsum hljómsveitum,  til að mynda á G!Festivali með Sakaris.

.  

Hættuleg þróun

  Gríðarmikill vöxtur er í neyslu metamfetamíns á Íslandi.  Það kemur glöggt fram í dómum.  Á síðustu tíu árum hefur metamfetamín komið fyrir 76 sinnum.  Þar af þriðjungur á síðasta ári.  Dómarnir hlaðast bratt upp á þessu ári.

  Þetta bendir sterklega til þess að metamfetamínið sé framleitt hérlendis.  Nokkur dæmi hafa komið upp þar sem augljóst er að menn lögðu drög að því að hefja framleiðslu.  

  Flestir sem neyta metamfetamíns hérlendis sniffa jöfnum höndum amfetamín.  Þeir þekkja ekki muninn.  Vita ekki einu sinni af honum.  Efnin,  metamfetamín og amfetamín,  eru ekki nefnd á nafn í dópheimi heldur kölluð samheitinu "speed" (framborið "spítt").

  Megin ástæðuna fyrir þróuninni má rekja til tískufyrirbæris sem kallast "Speed dating".  Það gengur þannig fyrir sig að hópi karla og kvenna er stefnt saman.  Hópurinn er svo ör ("speed" er rosalega örvandi) að hver karl "deitar" dömu í fimm mínútur.  Þá snýr hann sér að þeirri næstu.  Þannig koll af kolli.  Af þessu er dregið orðið skyndikynni.

    

Útvarp Saga - skemmtilegt og gott útvarp

  Ef ég væri einræðisherra þá myndi ég banna næstum því allar íslenskar útvarpsstöðvar.  Lagaval þeirra er hræðilega vont. Ég "sörfa" á milli stöðva og staldra hvergi við. Músíkin er viðbjóður hvar sem borið er niður.  Næstum því.  Undantekningar eru fáar.  

  Jú,  ég heyri áheyrilega músík á X-inu.  En þegar þar er minnst á boltaleiki þá legg ég á flótta. Það hendir of oft.

  Þá er gott að stilla yfir á Útvarp Sögu.  Hún er talmálsstöð.  Dagskráin þar er fjölbreytt og skemmtileg.  Meðal sérlega áhugaverðra dagskrárliða má nefna "Slappaðu af" með Rúnari Þór Péturssyni.  Hann spjallar við helstu rokkstjörnur sjöunda áratugarins.  Það er virkilega gaman og fróðlegt að heyra liðsmenn Hljóma, Flowers, Dáta og Roof Tops rifja upp ferilinn.  

  Annar þáttur á Útvarpi Sögu kallast "Gömlu góðu lögin".  Þar ræðir Magnús Magnússon (kenndur við diskótekið Dísu) við rokkstjörnur sjötta áratugarins: Liðsmenn Lúdó, Ragga Bjarna, Geirmund Valtýs,  Garðar Guðmundsson...  Líka Helgu Möller.  Í leiðinni dekrar hann hlustendur með súkkulaðitertum,  bóni á bílinn og allskonar.   

  Guðmundur Óli Scheving fer á kostum í þætti um meindýr og varnir.  Virkilega fróðlegir og forvitnilegir þættir um silfurskottur og veggjalýs.  Í bland spilar hann áheyrileg frumsamin lög.  Ber þar hæst lagið "Ég sigli".  Flott lag.  Alveg furðulegt að það fæst hvergi spilað nema á Útvarpi Sögu.  Ekki einu sinni á Rúv.  Ekki einu sinni á Sjómannadaginn.

  Uppistandarinn Rökkvi Vésteinsson og Jói Kristjánsson eru með fjölbreyttan þátt um grín og fleira.  Jói er einnig með morgunþátt ásamt Markúsi frá Djúpalæk á milli klukkan 7 - 9. Það er svo fjölskrúðugur og áheyrilegur þáttur að morgunþættir annarra útvarpsstöðva sitja á hakanum. 

  Í síðdegisþáttum Útvarps Sögu er rætt við fólk úr öllum áttum: Múslima,  ríkiskirkjupresta,   stjórnmálamenn allra sjónarmiða og allskonar. Sérlega gaman er að heyra spjall við Hauk Hauksson sérfróðan um Rússland.  Einnig hagfræðingana Ólaf Ísleifs og Ólaf Arnalds.  Svo og Ómar Ragnarsson,  Erík Jónsson og ótal fleiri virkilega áhugaverða og fræðandi.

  Fyrir hádegi - á milli klukkan 9-12 - er opinn símatími á Útvarpi Sögu. Þjóðin talar og þjóðin hlustar.  Þetta er lýðræðislegasti útvarpsþáttur í íslensku ljósvakaflórunni.  Allir fá að viðra sína skoðun án ritskoðunar.  

    

Gagnrýnir aðförina að Útvarpi Sögu

Túrhestarnir bjarga sér

  Ljósmyndir sem Garðar Valur Hallfreðsson tók á bílaþvottaplani á Egilsstöðum hafa vakið athygli.  Þær hafa farið eins og hvítur stormsveipur um netheima.  Á þeim sjást kviknaktir erlendir ferðamenn skola af sér ferðarykið,  gestum og gangandi til skemmtunar og nokkurrar undrunar.  

  Fyrir nokkrum dögum átti ég erindi að bensínstöð Neins í Fossvogi.  Ég þurfti að yfirfara loftþrýsting í dekkjum.  Á bílaþvottaplaninu birtist bíll eins og þruma úr heiðskýru lofti.  Út snöruðust tveir ungir menn.  Þeir töluðu útlensku.  Þeir báru út á planið handfylli af óhreinum borðbúnaði:  Djúpum og grunnum glerdiskum, skálum í ýmsum stærðum,  glös,  bolla,  hnífapör,  ausur, sleifar,  sax og sitthvað fleira.  Jafnframt stóran tóman bala.  Svo hófust þeir handa:  Tóku bílaþvottaburstana og skrúbbuðu leirtauið hátt og lágt.  Balann fylltu þeir af vatni og sprautuðu uppþvottasápu í.  Þangað stungu þeir uppvaskinu að þvotti loknum.  Að endingu skoluðu þeir allt og þurrkuðu samviskusamlega.  

  Túrhestarnir bjarga sér.  Þeir þurfa ekki uppþvottavél.

  Einn kom inn í kaffihús á dögunum og pantaði heitt íste (Can I have a hot ice tea?). 

   

Áríðandi að hafa í huga

  Margir kunna ekki fótum sínum forráð.  Þeir kaupa skó á kolvitlausum tíma.  Til að mynda þegar haldið er í sumarfrí til útlanda eða hringinn í kringum Ísland.  Eða hitt:  Að fólk fer til útlanda í ónýtum skóm til að láta sitt fyrsta verk í útlandinu vera að endurnýja skóbúnað.

  Vandamálið er að oft og tíðum þarf að ganga skó til.  Þó að þeir séu í réttri stærð þá eru fletir á þeim sem þrengja að hér og þar fyrstu dagana;  nuddast á húð og valda særindum.  Við það bólgnar fóturinn.  Þá nuddast hann ennþá meira.  Á faraldsfæti er fátt til ráða annað en láta þetta yfir sig ganga.  Og sumarfríið ónýtt.  Er undirlagt aumum og sárum fótum.

  Kunningi minn átti erindi til Asíu.  10 daga ferðalag.  Hann fjárfesti í nýjum skóm degi áður.  Um nóttina hófst ferðalagið á því að hann ók niður á Umferðamiðstöðina til að taka flugrútuna til Keflavíkur.  

  Skórnir voru strax til vandræða.  Það kostaði illindi að troðast í þá með aðstoð skóhorns.  Kominn í flugrútuna varð hann að taka af sér skóna vegna sársauka. Í flugstöðinni komst hann ekki í skóna.  Hann lét sig hafa það að ganga á sokkunum um hana og út í vél.  Í flugvélinni sofnaði hann skólaus og vær.  Síðla rumskaði hann við það að bornar voru fram veitingar.  Þá stal hann hnífnum;  vitandi að hans þyrfti við til að komast í skóna á áfangastað.  Veitti ekki af.

  Næstu daga tóku við fundarhöld.  Skórnir sem áttu að gangast til gerðu það ekki. Þeir þrengdust með hverjum degi.  Maðurinn sparaði þá.  Gekk á sokkunum meira en góðu hófi gegndi.  Þegar hann neyddist til að troðast í skóna (vegna rigningar) þá varð hann að beita undarlegu göngulagi til að lágmarka sársaukann.  Hann staulaðist á þeim upp á rönd þannig að iljar snéru inn.

  Hann var félaus að mestu.  Þetta var í árdaga greiðslukorta.  Kortið hans virkaði ekki í Asíu þegar á reyndi. Hann var aðeins með lágmarks gjaldeyri meðferðis.  Ekkert svigrúm til að kaupa nýja skó.

  Ferðin sem átti að vera ævintýri í framandi heimsálfu varð kvöl og pína.  Maðurinn var aldrei glaðari en þegar hann loks skjögraði hálf skríðandi inn um útidyrnar heima hjá sér.  Eiginkonan tók honum fagnandi opnum örmum og spurði:  "Af hverju fórstu í mínum skóm?"

   

Hvatt til sniðgöngu

 

 

 

 

 

 

 

 

  Þegar fólki mislíkar við skoðanir,  framkomu eða aðgerðir annarra er sniðganga algeng viðbrögð.  Viðskiptabann af einhverju tagi.  Útfærslan fer eftir því hvort að óánægjan beinist gegn einstaklingum,  fyrirtækjum,  félagasamtökum,  þjóðum eða öðrum.  

  Reynslan hefur sýnt að í flestum tilfellum skilar viðskiptabann engum árangri.  Oft þvert á móti.  Til að mynda kemur viðskiptabann Íslands á Rússa ekki niður á Rússum.  Þess í stað kemur það aðeins niður á Íslendingum sjálfum.  Við töpum tugmilljörðum króna á þessu kjánalega viðskiptabanni.  Þökk sé Gunnari Braga Sveinssyni.

  Íslendingar eru sérlega klaufskir í þessum efnum.  Fyrir nokkrum árum var skipulagt sniðugt viðskiptabann á íslensk olíufélög vegna verðsamráðs þeirra.  Sniðganga átti eitt tiltekið olíufélag í viku,  annað vikuna þar á eftir og þannig koll af kolli.  Sömuleiðis átti að sniðganga algjörlega kaup á öðrum vörum en bensíni á bensínstöðvum.  Þetta misheppnaðist gjörsamlega.  Engin breyting varð á verslun við olíufélögin - þrátt fyrir hávært stríðsöskur og stórkallalegar yfirlýsingar á Fésbók og í bloggheimum.

  Rétt er að halda til haga að viðskiptabann á S-Afríku virkaði og braut á bak aftur aðskilnaðarstefnu þáverandi stjórnvalda.  Sömuleiðis eru viðskiptaþvinganir á Ísrael að bíta.

  Víkur þá sögu að hvalveiðum Færeyinga. Þeir náðu 48 marsvínum í Hvannasundi í dag.  Það er fyrsta uppskera sumarsins í ár.  Í fyrrasumar voru 500 liðsmenn hryðjuverkasamtakanna Sea Shepherd staðsettir í Færeyjum.  Þeir reyndu með ráðum og dáðum að hindra hvalveiðar Færeyinga.  Framganga þeirra varð háðungarför.  Allt klúðraðist sem gat klúðrast. Færeyska lögreglan tók SS-liðana föstum tökum.  Járnaði,  fjarlægði af vettvangi og gerði dýran búnað þeirra upptækan.  Allt frá bátum til rándýrra kvikmyndatökuvéla.  Að auki voru SS-liðarnir dregnir fyrir dómara og sektaðir persónulega hver og einn um hundruð þúsunda króna + greiðslu á málskostnaði sem nam ennþá hærri upphæð.  Síðan var þeim sparkað úr landi með skít og skömm og fá ekki að koma til Færeyja aftur næstu ár.

  Í stuttu máli þá rassskelltu Færeyingar SS-liða svo rækilega að þeir hafa ekki látið sjá sig í Færeyjum í ár.  Hinsvegar hafa þeir farið hamförum á Fésbók og Tísti í dag.  Þar fer fremstur í flokki forsprakkinn,  Páll Watson. Nú hvetur hann heimsbyggðina til sniðgöngu á færeyskum laxi.  Hann segir laxinn vera alinn við vond skilyrði í kvíum í færeyskum fjörðum.  Hann fái hvergi um frjálst höfuð strokið.  Um sé að ræða gróft dýraníð af verstu tegund. Páll skorar á heimsbyggðina við kaup á sushi að spyrja hátt og snjallt í matvöruverslunum og á veitingastöðum hvort að laxinn sé Færeyskur. Ef svarið sé "já" þá skuli samstundis lýsa yfir vanþóknun,  góla um dýraníð og yfirgefa staðinn með formælingar á vör.

          

Veiddu 50 grindhvali í Færeyjum

Móðursýki

  Ég skil ekki ákafan áhuga fólks á boltaleikjum.  Nenni ekki að horfa á þá.  Mér er svo slétt sama um það hvort að einhver skori mark.  Ennþá meira sama um það hverjir skora mark.  Undarlegast þykir mér þegar boltalið er hyllt sem hetjur fyrir að tapa leik 5 - 2.  

  Hvað með öll þessi öskrandi andlit inni á vellinum?  Hverskonar hegðun er það?

  Hitt er skemmtilegt:  Að fylgjast með boltaáhugamanni fylgjast með boltaleik.  Gott dæmi um það má sjá með því að smella HÉR og smella síðan á örina á myndbandinu.  Takið eftir því að æsingurinn er slíkur að gaurinn kófsvitnar á bakinu.  

Hundruð hylltu strákana á Reykjanesbraut

Hörmulegustu rokk húðflúrin

  Suðurríkjarokkunnendur í Bandaríkjum Norður-Ameríku eru sjálfbjarga. Þeir redda hlutunum þó að sitthvað skorti upp á fagmennsku.  Rauðhálsinn (red neck) er ekkert að stressa sig á smáatriðum.  Hann kýlir bara á hlutina.  Húðflúr í suðrinu bera þess mjög svo merki.

  Rokksveitin Foo Fighters er vinsæl. Forsprakkinn,  Dave Grohl,  er í hávegum.  Rauðhálsinn er ekki í vandræðum með að teikna mynd af honum og heiðra með húðflúri.  Hann veit að Dave líkist mörgum öðrum svo að húðflúrið er rækilega merkt Dave Foo Grohl.

 

 

 

 

 

 

 

 

 

 

 

 

 

 

 

  Teiknarinn er nokkuð góður í að rissa upp sannfærandi sólgleraugu og höfuðklút.  Það skiptir öllu máli þegar Axl Rose er heiðraður með húðflúri.  Andlitið skiptir minna máli.  Verulega afmyndað.  Skiptir ekki máli.  Það eru klúturinn og sólgleraugun sem skipta máli.

 

 

 

 

 

 

 

 

 

 

 

 

 Einkennismerki hljómsveitarinnar Slayer er ljótt og amatörlegt.  Á húðflúrstofu í suðri fá aðdáendur innblástur við að hrista lógóið fram úr erminni.  Fyrst að orginalinn er ljótur þá er í fínu lagi að húðflúrið sé líka ljótt.  Miklu ljótara.  Sjáið hvað Y er ömurlega útfært. Svo ekki sé talað um R.  S snýr öfugt.

 

 

 

 

 

 

 

 

 

 

 

 

  Rokkunnandinn á alveg eins hatt og Slash.  Töff.  Black Sabbath krossinn er næstum því þokkalega teiknaður.  Hitt er verra að stafabrengl blasa við.  Rétt stafsetning er SabbaTH en ekki Sabbaht.

 

 

 

 

 

 

 

 

 

 

 

 

 

 

 

 

 

 

 Danski trommarinn í Metallica,  Lars Ulrich,  þykir þess verður að vera heiðraður í húðflúri.  Jú,  augnsvipurinn rímar að hluta (samt aulalega tileygður).  Og ennið passar alveg.  Meiri undrun vekur að einhver vilji vera svona áberandi merktur ljótu húðflúri af dönskum trommuleikara.

 

 

 

 

 

 

 

 

 

 

 

 

 

 

 

 

  Húðflúr af Bono í U2 eru tiltölulega auðveld.  Maðurinn er með skyggð gleraugu,  jafnan stuttklipptur og með skeggbrodda.  Samt er öruggara að merkja húðflúrið með nafni hans.  Annars myndu fáir fatta hver þetta er, eins og höfuðið sé samanvöðlað líkt og fótbolti,  skarpt nefið er einhversskonar klessa.  Framstæð hakan er innfallin.  Augun út úr kú.

 

 

 

 

 

 

 

 

 

 

 

.

Hvar er dýrast að búa?

  Hvar er dýrast að dvelja þegar allur helsti kostnaður við það er tekinn saman?  Við erum að tala um húsaleigukostnað,  verðlag á veitingastöðum,  verð í stórmörkuðum,  kaupmátt innfæddra og eitthvað svoleiðis.  Netmiðillinn Numbeo þykir vera sá marktækasti í heiminum þegar kemur að samanburði á þessu.  Á hálfs árs fresti tekur hann saman lista yfir þetta.  Nú hefur birt lista yfir dvalarkostnað í borgum heimsins.  

  Hann spannar 372 borgir í hinum ýmsu löndum.  Eðlilega hrúga sig saman á listann borgir í sama landinu.  Hér hef ég aðeins dýrustu borg hvers lands:

1.  Hamilton,  Bermuda

2.  Zurich,  Sviss

3.  Luanda,  Angóla

4.  Tromsö,  Noregi

5.  Tokyo,  Japan

6.  Reykjavík,  Íslandi

7.  New York,  Bandaríkjunum

8.  Kaupmannahöfn,  Danmörku

9.  Singapore,  Singapore

10. Perth,  Ástralíu

11. Kuweit,  Kuweit

12. Hamilton,  Nýja-Sjálandi

13. Stokkhólm,  Svíþjóð

14. London,  Englandi

15. París,  Frakklandi 

16. Dublin, Írlandi

17. Turku,  Finnlandi

18. Busan,  Suður-Kóreu

19. Linz,  Austurríki

20. Tel Aviv,  Ísrael

  Kostnaður á Bermúda er um það bil 36% hærri en á Íslandi.  Þó að kostnaður í Reykjavík og New York sé nánast sá sami þá er kaupmáttur launa Reykvíkinga aðeins 86% af kaupmætti New York búa.  

  Lægstur er kostnaður á Indlandi.  Þar er kaupmáttur launa lítill.  Sama á við um Úkraínu þar sem kostnaður er næst lægstur og Moldova sem vermir 3ja neðsta sætið. 

  Með því að smella á kortið má betur sjá hvar ódýrast er að hreiðra um sig í sumarfríinu.

Stórefla kafbátaleit

  Utanríkisráðherra Íslands,  Lilja Alfreðsdóttir,  og varavaravarnarmálaráðherra Bandaríkja Norður-Ameríku,  Róbert Óh Work a lot, undirrituðu í gær sameiginlega á mikilvægt plagg um áframhaldandi samstarf Íslands og Bandaríkja Norður-Ameríku.  Einkum á sviði varnarmála.  Ekki seinna vænna nú þegar sótt er að Íslandi úr öllum áttum.

  Bandaríkjaher var búinn að greina ítarlega frá inntaki samningsins í málgagni sínu löngu áður en íslenski utanríkisráðherrann var settur inn í málið.

  Plaggið er áþekkt eldri plöggum frá 1951 og 2006.  Pappírinn er þó vandaðri og áferðarfallegri og blásvart pennablekið skarpara.  

  Í plagginu heita ríkin tvö því að eiga samstarf.  Ísland skuldbindur sig til að leyna Bandaríkin engu um sín varnarmál.  Síst af öllu því sem snýr að loftrýmisgæslu.  Hvorugt landið mun upp á sitt einsdæmi og í leyni í skjóli nætur stunda viðhald á mannvirkjum.

  Víkur þá sögu að megin inntaki skjalsins.  Það kveður á um stóraukna kafbátaleit um allt Ísland.  Til að byrja með verður meginþunga leitarinnar beint að Hveragerði og nágrenni.

 

Áður en fræga fólkið varð frægt

  Áður en fræga fólkið varð frægt þá var það bara alveg eins og venjulegt fólk. Það var ekkert hægt að átta sig á því að síðar meir yrði það frægt.  Yrði fræga og fína fólkið.  Svo gerðist það og allt breyttist.  Fjöldinn fór að herma eftir hárgreiðslu þess,  klæðnaði og hverju sem er.  

  Einu sinni var Bill Clinton unglingur. Hann dreymdi um að verða saxófónleikari í Fleetwood Mac.  Svo fór hann í framhaldsskóla.  Þar hitti hann Hillary.  Þá vissu þau ekki að hann yrði forseti Bandaríkja Norður-Ameríku.  Hvað með hana?

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

  Þegar Bob Marley var unglingur á Jamaíka þá vann hann sér inn pening sem spámaður.  Hann las í laufblöð fyrir trúgjarna.  Og trúði sjálfur á spágáfu sína.  Nokkru síðar var hann frægasta reggí-stjarna heims.

 

 

 

 

 

 

 

 

 

 

 

 

 

 

  Guðni Th.  Jóhannesson var ungur handboltakappi sem lærði sagnfræði.  Allt í einu er hann orðinn forseti Íslands.

 

 

 

 

 

 

 

 

 

 

 

 

 

 

 

 

.

Hvað réði því hver fékk atkvæðið?

  Á laugardaginn (kosningadag) kom ég við á bókasafni. Þar sat öldruð kona og talaði í farsíma.  Sennilega var heyrn ekki í góðu lagi. Henni lág hátt rómur og kváði í annarri hverri setningu.  Ég veit ekkert hvað viðmælandinn sagði.  Að því slepptu sagði gamla konan þetta (ég sleppi öllu:  "Ha?,  "Hvað varstu að segja?"):

  - Nei,  ég hef ekkert kynnt mér það.  Það væri vinna að reyna að kynna sér þessa frambjóðendur. Ég hef innsæi.  Ég finn á mér hvort að mér líkar við fólk.

  - Nei,  ég kýs hann ekki.  Hann er svo sjálfhverfur að ég er viss um að hann kýs sjálfan sig.  Jafnvel þó að það kosti að hann ógildi atkvæði sitt.  Hann er svo mikið ég-um-mig,  frá-mér-til-mín.   

  -  Það getur ekki verið.  Að menn fái að kjósa sjálfan sig?  Það er hálfgert svindl.  

  -  Já,  ég ætla að kjósa hann.  Ég hef góða tilfinningu fyrir honum.  Embættið snýst um að vera góður gestgjafi.  Hann er ekta í það.    

 ------------------------------

Allt annað:  Færeyingar að fylgjast með - á torgum og túnum - Íslendingum í boltaleik:  

Hvað næst?

 

 

 

 

 

 

  Níu voru í framboði til forseta Íslands á dögunum.  Svo hlálega tókst til að átta þeirra náðu ekki þeim árangri sem þurfti til.  Einungis einn,  Guðni Th. Jóhannesson,  sagnfræðingur úr Garðabæ,  náði þeim fjölda greiddra atkvæða sem dugði.  Margir telja líklegt að hann sætti sig við úrslitin.  Það er ekki vont hlutskipti fyrir sex manna fjölskyldu að setjast að í rúmgóðu einbýlishúsi í Garðabæ,  sér að kostnaðarlausu.  

  Hvað með hina frambjóðendur?  Hvað verður um þá?  

  Næsta víst er að stjórnmálaflokkar munu togast á um Höllu Tómasdóttur og Andra Snæ Magnason.  Þau heilluðu landsmenn með glaðlegri framkomu,  kurteisi og ljúfmennsku. Buðu af sér mjög góðan þokka.  Nálægt þriðjungur kjósenda greiddi Höllu atkvæði sitt og Andri fékk 14,3%. Þar af 23,8% í Reykjavíkurkjördæmi norður.  Annað þeirra tveggja hefði orðið forseti ef Guðni hefði ekki þvælst fyrir þeim.

  Í Suðurkjördæmi fékk Sturla Jónsson 5,1%.  Það fylgi fleytir honum léttilega inn á Alþingi í komandi kosningum.  Þar á hann heima.  Jafnvel betur en á Bessastöðum.

  Þessi þrjú,  Halla, Andri Snær og Sturla,  verða alþingismenn í haust.  

  1280 manns greiddu Elísabetu Kristínu Jökulsdóttur atkvæði.  Hún heillaði mun fleiri.  Eiginlega alla.  Lífgaði verulega mikið upp á kosningabaráttuna.  Frábær manneskja - en er ekki beinlínis klæðskerasniðin í embætti forseta Íslands.  Það er að segja í ímynd fólks af forseta.

  Frambjóðendur drottins allsherjar,  Hildur og Guðrún,  slógu Íslandsmet.  Aldrei áður hafa frambjóðendur fengið jafn fá atkvæði í forsetakosningum.  Hvergi í heiminum.  Í tilfelli Hildar kemur það ekki að sök.  Hún býður sig aftur fram í næsta lífi.  Ef það gengur ekki þá í þar næsta lífi.  200 ár,  400 ár. Skiptir ekki máli.  Hennar tími mun koma í Jesú nafni.  Eða ekki.  Spurning hvort að drottinn sendir Guðrúnu í fleiri fýluferðir af þessu tagi upp á grín.  

  

   

   

Guðni stefnir á sigur í Nice

Hvað fór úrskeiðis?

  Í maí-byrjun hélt ég því fram á Fésbók að DOddsson væri á leið í forsetaframboð.  Skrif hans í Morgunblaðinu bentu sterklega til þess.

  8. maí tilkynnti hann um framboð sitt.  Þann dag skrifaði ég bloggfærslu og nefndi að hann ætti öruggt rauðvínsfylgi (12 - 18%).  Með aðstoð kvótakónga gæti talan hækkað. 

  11. maí skrifaði ég bloggfærslu undir fyrirsögninni "Hvenær hefst skítkastið?".  Þá voru fjórtán í framboði en framboðsfrestur ekki runninn út.  Ég spáði því að þriðjungur þeirra myndi helltast úr lestinni.  Sem varð raunin.

  Um þetta leyti mældist fylgi við Guðna Th. um 70% í skoðanakönnunum.  Ég sagði að það væri útilokað að sú yrði niðurstaðan á kjördegi.  30 - 40% yrði lokatalan.  Nú liggur fyrir að hann fékk 39,1%.

  Andri Snær var með um 10% fylgi.  Ég spáði því að eitthvað af fylgi Guðna myndi færast yfir til Andra Snæ en ekki DOddsson.  

  Á þessum tíma vissi ég ekkert um Höllu. Hún mældist með 2%.   

  Skekkjumörk í spám 11. maí lágu í því að kosningabarátta var ekki hafin.  Ekkert var vitað um það hvernig auglýsingaherferðum frambjóðenda yrði háttað.  Samt rættust mínar spár.

  29. maí mældist fylgi við DOddsson 22,2% í skoðanakönnunum.  Þá voru frambjóðendur kynntir í þættinum Eyjunni á Stöð 2.  Hann slátraði framboði sínu þar.  Ótrúlegt klúður.  Hann hafði alla möguleika á að koma fyrir sem landsföðurlegt sameiningartákn;  allt um vefjandi og faðmandi þjóðarleiðtogi allrar þjóðarinnar.  Þess í stað mætti hann með hrútshorn,  illgjarn í árásarham,  geðvondur,  úfinn, óskammfeilinn og án sómakenndrar.

  Sem þaulvanur og farsæll almannatengill skil ég hvorki upp né niður hvers vegna kallinn framdi þetta "hara kirí".  Það er útilokað að fagmaður í PR hafi ráðlagt honum.  Líklegast þykir mér að hann hafi sjálfur verið fastur í síðustu öld umkringdur já-bræðrum amatöra sem kunna ekkert á PR.   

  Ég spáði þegar í stað í bloggfærslu að fylgi við DOddsson myndi hrapa.  Það gekk eftir.  Fylgið hrundi niður í 19% næsta dag.  Það ennþá einkennilegra var að kauði lærði ekkert af klúðrinu.  Því fór sem fór.  Sannaðist þar máltækið að erfitt sé að kenna gömlum hundi að sitja.

  Halla kom afskaplega vel fyrir í sjónvarpsþættinum. Ég spáði henni í bloggfærslunni vaxandi fylgi.  Það gekk heldur betur eftir.    

  Það er grobb að hreykja sér af því að hafa lesið rétt í forsetakosningarnar alveg frá upphafi.  Allar spár gengið eftir.  Ég kann þetta.

  Hitt skilur eftir spurningar:  Tvær konur buðu sig fram að fyrirmælum Jahve, Drottins allsherjar.  Þær slógu Íslandsmet.  Aldrei áður í sögu Íslands hafa forsetaframbjóðendur fengið jafn fá atkvæði. Engir utan stórfjölskyldunnar kusu þær.  Var hann að grínast og hrekkja?  

  Ný spá: Á næstu dögum munum við sjá lúserana og fylgismenn þeirra kenna fjölmiðlum um hrakfarirnar.  Sannaðu til.    

  

Hildur með fæst atkvæði sögunnar

Garðsláttur lata fólksins

  Tími garðsláttar er að renna upp.  Hver hefur sitt lag á því.  Sumir nenna ekki að ganga á eftir handsláttuvélinni.  Það er sama fólkið og nennir ekki að ganga frá bílastæðinu fyrir utan líkamsræktarstöðina og inn á göngubrettið.  Það leggur bílnum ólöglega eins nálægt inngöngudyrum og mögulegt er.

  Til að sleppa undan því að labba á eftir handsláttuvél er ráð að banka upp hjá nágranna og biðja hann um aðstoð.  Það eina sem nágranninn þarf að gera er að keyra á eftir sláttuvél þess lata með hann sitjandi á húddinu.

 

 

 

 

 

 

 

 

 

 

 Ef enginn er nágranninn - eða nágranninn nennir ekki - er ráð að keyra sjálfur á golfbíl á eftir sláttuvélinni.  Það er meiri kúnst.  En hver er svo sem að flýta sér?

 

 

 

 

 

 

 

 

 

 

  Eitt ráðið fyrir þá lötu er að eyða óhóflegum fjármunum í að kaupa stóra sláttuvél með sæti.  Mikið er í húfi.  Kannski þarf að slá tvisvar í sumar.  Vandamálið er að það þarf að kynnast vélinni áður en til alvörunnar kemur.  Læra inn á jafnvægispunkta hennar og þess háttar.  Enginn verður óbarinn biskup frá þeim kynnum.  Fjöldi marbletta staðfestir að menn hafa farið í gegnum það ferli. 

 

 

 

 

 

 

 

 

 

  Undir venjulegum kringumstæðum átta flestir sig á því hvaða klæðnaður er við hæfi utandyra.  Menn rölta ekki á nærbuxunum einum fata út í búð.  Þegar kemur að garðslætti hverfur sómakennd eins og dögg fyrir sólu.  Nágrönnum,  gestum og gangandi til æpandi skelfingar.  Þá kemur sér vel að vera með eyrnahlífar.

 

 

 

 

 

 

 

 

 

 

 

 

 

 

 

  Margir andvarpa þegar kemur að því að klippa limgerðið.  Það er rosalega seinlegt og drepleiðinlegt vandaverk.  Þá er gott að finna stæðilegt járnrör,  stinga því í sláttuvélina,  festa rækilega með sterku límbandi og rölta með hana eftir limgerðinu.  Þetta sparar heilmikinn tíma.  Þetta sparar einnig heimsókn á líkamsræktarstöð.

 

 

 

 

 

 

 

 

 

  Kaup á rándýrri sláttuvél með sæti gengur svo nærri fjárhag heimilisins að iðulega er enginn afgangur til að kaupa og reka bíl.  Vandamálið er samt ekki stærra en svo að auðveldlega má skottast á henni með frúna út í matvörubúð.  Vélin fer hægt yfir og tefur bílaumferð.  Þolinmæði er kostur.