Kvikmyndaumsögn

-  Titill:  Svartur á leik

-  Handrit:  Byggt á bók Stefáns Mána

-  Leikstjóri:  Óskar Þór Axelsson

-  Leikarar:  Þorvaldur Davíð Kristjánsson,  Jóhannes Haukur Jóhannesson,  Damon Younger,  María Birta...

-  Einkunn: ***1/2 (af 5)

  Ungur maður,  Stebbi Sækó (Þorvaldur Davíð),  kemur frá Ólafsvík til höfuðborgarinnar.  Hann hittir gamlan æskufélaga,  Tóta (Jóhannes Haukur).  Sá er í dópbransanum.  Stebbi dregst inn í heim Tóta.  Sögusviðið er að uppistöðu til árið 1999.  Tóti og félagar eru í bisness.  Þeir smygla dópi til landsins,  selja dóp og stunda partý.  Út á það gengur myndin.  Þetta kemur flest kunnuglega fyrir sjónir.  Enda byggir sagan á raunverulegum atburðum.  Það ber ekki margt til tíðinda.  Þannig lagað.  Jú,  banki er rændur.  Án aðdraganda eða eftirmála.  Útafkeyrsla (tryggingasvik) er sviðsett.  Án aðdraganda og án eftirmála. Það er valdabarátta innan dópbransans.  Allt atriði sem eiga ótal fyrirmyndir úr raunveruleikanum.

  Sagan er ekki merkileg.  Flest í framvindu hennar er fyrirsjáanlegt.   Hinsvegar er úrvinnslan vel úr garði gerð.  Það er afar fagmannlega að öllu staðið.  Keyrslan er hröð og þétt.  Notkun tónlistar er smekkleg og áhrifarík.  Hún er oftast skemmtileg.  Það er gaman að rifja upp flott lög með Quarashi,  Stjörnukisa,  Enzími og svo framvegis.  Það er virðingarvert og gaman að músíkin er með íslenskum flytjendum.    

  Leikararnir eiga hver um sig stjörnuleik.  Leikaraval hefur tekist einstaklega vel.  Þeir eru eins og klæðskerasaumaðir í hvert hlutverk.  Jóhannes Haukur hefur aldrei verið jafn sannfærandi.  Hann er frábær.  Sama má segja um Þorvald Davíð.  Hann er einstaklega lunkinn við að túlka tilfinningar sínar með augnráðinu.  María Birta vinnur leiksigur sem dópsalagrúppía.  Hún afgreiðir það hlutverk áreynslulaust og heillandi.  Þannig mætti áfram telja.

  Örfá smávægileg atriði trufla.  Samt svo smávægileg atriði að þau telja varla.  Þetta eru atriði eins og viðurnefni dópistanna.  Það er ofgert með viðurnefnum.  Viðurnefnin eiga áreiðanlega að túlka karakterinn.  Í raunveruleika eru lykilmenn með viðurnefni en ekki svona ýkt.  Þá eru dópistarnir alltof vel máli farnir.  Ég þekki dópbransann þokkaleg vel.  Án þess að vera þátttakandi og dópisti sjálfur,  vel að merkja.  Fátæklegur orðaforði,  einkum nafnorðafátækt,  er áberandi hjá dópistum.  Tafsorð á borð við "þú veist",  "skilurðu?" og önnur slík eru áberandi hjá þeim sem dópa mikið og lengi.  Það ber ekki á neinu slíku í myndinni.  Kannski viljandi.  Það hefði hugsanlega orðið leiðigjarnt.  Jafnvel tilgerðarlegt ef ekki væri vel að gætt.  Í myndinni tala dópistarnir um fíkniefni.  Ég kannast ekki við að dópistar tali um dóp sem fíkniefni.  Þeir nota önnur og sértækari orð yfir hvert fíkniefni fyrir sig. Undirstrikað og endurtekið skal tekið fram að þetta eru algjör smáatriði sem hindra á engan hátt að heildarpakkinn er fínn. 

  Til að byrja með,  í upphafi myndar,  setti ég spurningamerki við eintal sögumanns,  Stebba Sækó.  Slíkt virkar oft sem "ódýr" aðferð til einföldunar og útskýringar á sögunni.  Einhverra hluta vegna gufaði spurningarmerkið upp.  Ég tók ekki eftir því hvort að eintal sögumanns fjaraði út er leið á myndina eða hvort að það varð eðlilegur þáttur í framvindunni. 

  Það er hvergi hægt að merkja að myndin sé frumraun Óskars Þórs.  Efnistök eru svo yfirveguð og hnitmiðuð í alla staði.  Myndin á góða möguleika á heimsmarkaði.  Hún stenst bærilega samanburð við útlendar myndir um svipað efni.   

  Ástæða er til að geta góðrar markaðssetningar á myndinni.  Leikarar og aðrir aðstandendur myndarinnar hafa verið áberandi í fjölmiðlum fyrir frumsýningu og enn í dag.  Sá sem heldur utan um "plöggið" hefur unnið heimavinnuna sína. 

Veitingahússumsögn

- Staður:  Roadhouse,  Snorrabraut 56

- Réttur:  Svínarif

- Verð:  1890 kr.

- Einkunn: ***1/2  (af 5)

.

  Það er pínulítið hallærislegt að íslenskur matsölustaður heiti útlensku nafni,  hvort sem það er á ensku,  kínversku eða finnsku.  Orðið "roadhouse" er í Bandaríkjum Norður-Ameríku notað yfir lítil ódýr þjóðvegamótel.  Þetta eru gistiheimili sem selja mat og bjór.  Eru í aðra röndina sveitakrár.  Venus í Borgarfirði er gott dæmi um svona vegamótel.

  Þjóðvegamótelið við Snorrabraut býður ekki upp á gistingu.  Það stendur ekki við þjóðveg.  Það er inni í miðri borg.  En þar er seldur matur og drykkur.

.

  Uppistaðan á matseðlinum er brauðsamlokur með áleggi,  þar á meðal ýmsir hamborgarar.  

  Góðu fréttirnar eru að það er líka boðið upp á reykt svínarif pensluð í grillsósu,  svokallaðri BBQ.  Minni stærðin (hálfur skammtur) kostar 1890 krónur.  Hann er alveg fullgild máltíð.  Stærri skammturinn kostar 3090 kr.  Hann hentar verulega svöngum mathákum.

.

  Reyktu svínarifin (spare ribs) eru virkilega bragðgóð.  Reykta bragðið skilar sér vel.  BBQ sósan er sömuleiðis bragðgóð.  Sú besta sem ég hef smakkað.  Iðulega er BBQ sósa óþægilega sæt.  En ekki þessi.  Hún er með góðu kryddbragði.  Og blessunarlega er hún í hófi.  Oftast þarf maður að skafa hluta af BBQ sósu burtu þegar svona réttur er á borðum.  Þarna er hún í temmilegum mæli.

.

  Meðlætið er franskar kartöflur og hrásalat. Kartöflurnar eru ekta kartöflur en ekki hveitistrimlar.  Þær eru að saltkryddaðar með einhverju kryddi sem gerir þær betri en aðrar franskar kartöflur.  Annars eru franskar kartöflur aldrei merkilegt meðlæti.  Ég hefði heldur kosið bakaða kartöflu.  Hún er ekki í boði.

.

  Hrásalataðið er borið fram í glerkrukku með loki.  Það er stæll á því.  Hrásalatið er ósköp venjulegt,  eins og það sem maður kaupir í matvörubúðum frá SS eða Kjarnafæði eða öðrum slíkum.

.

  Rif eru þannig matur að hnífur og gaffall ná ekki með góðu móti að hreinsa kjötið af beinunum.  Það þarf að taka á þeim með puttunum og naga kjötið af.  Ein bréfþurrka sem fylgir hnífapörum dugir ekki til að þurrka af puttunum.  Eflaust er auðsótt erindi að biðja um auka bréfaþurrku.  Auka bréfaþurrka mætti þó fylgja þessum rétti óumbeðið.

.

  Eitt af því sem angrar oft og tíðum á veitingastöðum er þegar í hátölurum hljómar dagskrá leiðinlegra útvarpsstöðva.  Á þjóðvegamótelinu við Snorrabraut hljómuðu hinsvegar ljúf jólalög með Jóni Reiðufé (Johnny Cash).  Að vísu er sérkennilegt að matast undir jólalögum um mánaðarmótin febrúar-mars.  En jólalög með Jóni eru notaleg á að hlýða. 

  Þjóðvegamótelið við Snorrabraut er millifínn veitingastaður.  Hluti af sætum er leðurbólstraður.  Önnur sæti eru lausir venjulegir eldhússtólar.  Það er fortíðarhyggjustíll í innréttingum.  Meðal annars gamaldags kóksjálfsali og fleira gamalt.  Það er þægileg stemmning þarna.

.

-----------------------------

.

Fleiri nýlegar umsagnir:

.

Sægreifinn

http://www.jensgud.blog.is/blog/jensgud/entry/1225233/

Shalimar

http://www.jensgud.blog.is/blog/jensgud/entry/1224003/

Tandoori

http://www.jensgud.blog.is/blog/jensgud/entry/1223171/

 

Hneyksli! Ósanngirni og ósvífni!

 

  Ég hef fylgst náið með málaferlum vegna þakviðgerðar á raðhúslengjunni Prestbakka 11 - 21.  Það er margbúið að dæma í því máli fyrir héraðsdómi og Hæstarétti.  Þar hafa skipst á sýknun og sekt.  Málið er á gráu svæði,  eins og mismunandi niðurstaða dómstóla hefur ítrekað leitt í ljós í þessu ferli.  Þar vega salt sanngirni annars vegar og kalt mat lagabókstafs hinsvegar.

  Förum yfir dæmið og setjum okkur í spor þeirra sem þarna eiga hlut að máli:

  -  Herbert Guðmundsson og Svala,  þáverandi eiginkona hans,  kaupa raðhús í Prestbakka.  

  -  Í þessu hverfi var löng hefð fyrir því að hver raðhúseigandi hugsaði um viðhald sinnar húseignar út af fyrir sig,  öfugt við það sem víða annars staðar tíðkast með raðhús.

  -  Hebbi og Svala urðu fljótlega vör við að þakviðgerða var þörf.  Þau létu gera við þak á sinni húseign.  Jafnframt undruðust þau að sumir aðrir í raðhúslengjunni létu sín húsþök drabbast niður,  vitandi að það yrði þeim mun dýrara þegar upp væri staðið.

  - Mörgum árum síðar er stofnað húsfélag í Prestbakka 11 - 21.  Húsfélagið ræðst í sameiginlega lagfæringu á niðurníddum húsþökum og tilheyrandi skemmdum vegna ónýtu þakanna.  Það var illa að þeirri framkvæmd staðið.  Kostnaðurinn varð himinn hár.

  - Hebbi og Svala töldu þessar framkvæmdir ekki koma sér við.  Þakið á þeirra íbúð var þegar komið í gott lag.  Með tímabæru viðhaldi var sá kostnaður ekki mikill.

  -  Húsfélagið fór að innheimta hjá öllum mánaðarlega 50 þúsund króna viðhaldskostnað á íbúð vegna þakviðgerða. Sú upphæð óx fljótlega upp í mánaðarlegan 500 þúsund krónu reikning.  Það var svo illa að öllu staðið að kostnaðurinn varð þetta hár.  Vissulega eru til fjölskyldur sem hafa efni á að borga hálfa milljón mánaðarlega í hússjóð.  Svona upphæð, mánaðarleg útgjöld í hússjóð,  er "venjulegu" fólki ofviða.  Eða hvað finnst þér?

  -  Hebbi og Svala höfnuðu því að vera þvinguð til að borga hálfa milljón mánaðarlega í hússjóð vegna þakvirðgerða á íbúðum annarra.  Þakið á þeirra íbúð var í góðu lagi og þau höfðu ekki efni á að bæta hálfri milljón mánaðarlega ofan á kostnað við sinn heimilisrekstur.  Þar fyrir utan ofbauð þeim hversu illa var staðið að viðgerðum hinna húseigenda.  Sá kostnaður var mörgum sinnum hærri en þurfti að vera ef vel hefði verið að verki staðið.

  -  Húsfélagið fór í mál við Hebba og Svölu.  Þau borguðu ekki þessa hálfu milljón mánaðarlega í hússjóð.  Húsfélagið var dyggilega stutt af Húseigendafélaginu,  þar sem í forsvari var sá sem samdi lög og reglur um fjöleignahús.  Lögin voru sniðin að blokkaríbúðum en ekki raðhúsum.  Rök Húseigendafélagsins voru þau að raðhús væru blokkaríbúðir ef raðhúsið væri reist upp lóðrétt.  Þess eru reyndar fá eða engin dæmi að raðhús sé reist upp lóðrétt.

  -  Málið fór fyrir dómstóla aftur og aftur og aftur og aftur.  Dómstólar skiptust á að sýkna og sekta.

  -  Síðasta dæmið:  Hæstiréttur dæmir Hebba til að borga um 8 milljónir vegna viðgerða nágrannanna (með dráttarvöxtum + málskostnaði).  Í millitíðinni ofreyndi dæmið á fjölskyldu Hebba og Svölu.  Þau skildu og fjölskyldan splundraðist. 

  - Niðurstaða Hæstaréttar þýðir að Hebbi er gjaldþrota.  

  - Setjum okkur í þessi spor:  Hver væru viðbrögð þín við því að borga mánaðarlega hálfa milljón króna í hússjóð vegna viðgerða nágranna sem létu þök á sínum húsum drabbast niður með tilheyrandi kostnaði?  Hver væru viðbrögð þín við því að vera dæmd/ur til að borga 8 milljónir vegna svona dæmis?  

  - Góðir og sanngjarnir nágrannar eru happdrættisvinningur.  Ósanngjarnir og ósvífnir nágrannar eru eitthvað allt annað.

  - Tekið skal fram að ekki var full samstaða meðal nágranna Hebba og Svölu í þessu máli.  Meirihlutinn réði hinsvegar úrslitum. 

  - Vegna umræðu á fésbók og víðar:  Já,  ég hef lesið dóminn.  Ég hef fylgst með þessu máli frá fyrsta degi á öllum stigum þess.  Ég hef kynnt mér rökin.  Niðurstaða Hæstaréttar er þannig að ósanngirni og ósvífni hafa orðið niðurstaðan.  Þegar fullreynt þótti að ekki náðist fram að fá Hebba og Svölu dæmd til að borga viðgerðir á húsum nágranna sinna var stefnunni snúið yfir í annan farveg:  Að þau Hebbi og Svala hefðu ekki greitt í hússjóð.  Tæknilega voru þau því felld á því að vera í vanskilum við hússjóðinn.  

  - Og,  já,  Hebbi og Svala eru vinir mínir.  Ég hef engu að síður reynt að setja mig í spor nágranna þeirra.  Mér ofbýður ósanngirnin og ósvífnin.  Þetta er vond og fráleit ósanngjörn niðurstaða.     

„Ég er orðinn öreigi“

Spennandi færeyskir hljómleikar í kvöld (Þórsdag) og næstu daga

 

   Fyrir nokkrum árum naut færeyski tónlistarmaðurinn Högni Restrup vinsælda hérlendis.  Lag hans,  Besame Mucho,  var oft og tíðum spilað í útvarpinu.  Fyrst og fremst rás 2.  Það var á jómfrúarplötu Högna.  Nýverið sendi kappinn frá sér þriðju plötuna,  Samröður við framtíðina.  Dúndur góða plötu,  eins og fyrri plötur hans tvær.  Danska poppblaðið Gaffa hefur staðfest það.  Janus í Bloodgroup vann plötuna með Högna.

  Í tilefni af nýju plötunni heldur Högni,  ásamt hljómsveit sinni,  þrenna hljómleika á Íslandi.  Fyrstu hljómleikarnir eru á Græna hattinum á Akureyri í kvöld (Þórsdag,  1. mars).  Þeir hefjast klukkan 9 (síðdegis).

  Næstu hljómleikar verða á Gauki á Stöng í Reykjavík annað kvöld (Freyjudag,  2. mars).  Þeir hefjast klukkan 11 (síðdegis).

  Lokahljómleikarnir verða á Kex Hostel í Reykjavík á laugardaginn (3ja mars).  Þeir hefjast klukkan 9 (síðdegis).

  Annar frábær færeyskur tónlistarmaður,  Guðríð Hansdóttir,  verður með í för.  Guðríð hefur sömuleiðis sent frá sér þrjár plötur.  Sú nýjasta,  Bayond The Grey,  var á lista Morgunblaðsins yfir bestu plötur ársins 2011.  Gott er að vita að nafnið Guðríð er framborið Gúrí. 

Og sigurvegarinn er...!

  Þessar ljósmyndir fékk ég sendar.  Og hló.  Vonandi ná myndirnar að kæta þig líka.

  Rottuhali ársins! 

  Til gamans má geta að Færeyingar kalla mjóar hárfléttur - og það sem Íslendingar kalla tíkaspena - rottuhala. 

  Vonbrigði ársins!

  Ef vel er að gáð má lesa neðst í hægra horni auglýsingaspjaldsins að pylsan sé ekki í raunstærð.  Í Bandaríkjunum er nauðsynlegt að tryggja sig gegn málshöfðun á þennan hátt.  Fólk sér pylsuna auglýsta á 62 kr.  Það pantar eina pylsu.  Þegar hún reynist vera minni en sú á myndinni þá fær fólkið gríðarlegt áfall.  Það fer í skaðabótamál við Ikea.  Og vinnur málið ef hvergi er tekið fram að pylsan á auglýsingaspjaldinu sé ekki í raunstærð. 

  Bílastæðaverðir ársins!

  Lengst til vinstri má sjá menn bera líkkistu út úr kirkju í þann mund sem samviskusamir og ákafir bílastæðaverðir eru að fjarlægja líkbílinn.  Honum var ekki lagt í merkt bílastæði.

  Mótmælandi ársins!

  Hver þarf á eldsneyti að halda?  Ég ferðast bara með strætisvögnum.

  Flugvélaviðgerð ársins!

  Stór sprunga á steli löguð með málningateipi.

  Ráð ársins!

  Lesandi leitar ráða:  "Ég hef tvívegis gengið inn á manninn minn þar sem hann er að fróa sér inni á baðherbergi.  Hvað á ég að gera?"

  Ráð:  "Banka."

  Jafnvægislist ársins!

  Takið eftir hvað bíllinn er staðsettur upp á háu fjalli.  Það sést með því að skoða hægra hornið neðst á myndinni.

  Mest traustvekjandi bisness-útlit ársins!

  Brjóstgjöf ársins!

Bestu rokkplöturnar

  Lesendur Music Radar hafa kveðið upp sinn dóm.  Þetta er niðurstaðan.  Þannig er listinn yfir 50 bestu plötur þungarokksins.  Að sjálfsögðu er enginn 100% sammála svona lista.  Það er allt í lagi.  Þetta er aðeins skemmtilegur samkvæmisleikur.  Vinsælar hljómsveitir eiga eðlilega meiri möguleika í lesendakosningum en minna þekktar hljómsveitir.

  Það er gaman að velta fyrir sér svona lista.  Kannski sakna einhverjir platna með Deep Purple og Led Zeppelin.  Eða Skálmaldar,  Sólstafa og Týs.  Þeirra í stað tröllríða Metallica,  Iron Maiden og Black Sabbath listanum.  Hver hljómsveit með 5 plötur af 50.  Eða réttara sagt 5 plötur af 37.  13% hlutdeild.  Það er góð staða.       

1  Metallica - Master Of Puppets (1986)

2  Iron Maiden - The Number Of The Beast (1982)

3  Guns N´ Roses - Appetite For Destruction (1987)

4  Metallica - Ride The Lighting (1984)

5  Slayer - Reign In Blood (1986)

6  Megadeath - Rust In Peace (1990)

7  Black Sabbath - Paranoid (1970)

8  AC/DC - Back In Black (1980)

9  Pantera - Vulgar Display Of Power (1992)

10 Iron Maiden - Powerslave (1984)

11 Metallica - ...And Justice For All (1988)

12 Lamb Of God - Ashes Of The Wake (2004)

13 Pantera - Cowboys From Hell (1990)

14 Opeth - Watershed (2008)

15 Black Sabbath - Sabbath Bloody Sabbath (1973)

16 Black Sabbath - Master Of Reality (1971)

17 AC/DC - Highway To Hell (1979)

18 Judas Priest - British Steel (1980)

19 Ozzy Osbourne - Blizzard Of Ozz (1980)

20 Slayer - Seasons In The Abyss (1990)

21 Machine Head - The Blacklening (2007)

22 Iron Maiden - Live After Death (1985)

23 Metallica - Kill ´Em All (1983)

24 Black Sabbath - Vol 4 (1972)

25 Slayer - South Of Heaven (1988)

26 Mastodon - Crack The Skye (2009)

27 Dio - Holy Diver (1983)

28 System Of A Down - Toxycity (2001)

29 Opeth - Blackwater Park (2001)

30 Metallica - Metallica (1991)

31 Slipknot - Slipknot (1999)

32 Iron Maiden - Piece Of Mind (1983)

33 Killswithch Engage - Alive Or Just Breathing (2002) 

34 Rainbow - Live In Munich (1977)

35 Tool - Undertow (1993)

36 Iron Maiden - Iron Maiden (1980)

37 Black Sabbath - Black Sabbath (1970)

38 Celtic Frost - To Mega Therion (1985)

39 Rage Against The Machine - Rage Against The Machine (1992)

40 Skid Row - Skid Rove (1989)

41 At The Gates - Slaughter Of The Soul (1995)

42 Megadeath - Peace Sells...But Who´s Buying? (1986)

43 Anthrax - Among The Living (1987)

44 Judas Priest - Painkiller (1990)

45 Soundgarden - Badmotorfinger (1991)

46 Death - Symbolic (1995)

47 Sepultura - Arise (1991)

48 Kyuss - Blues For The Red Sun (1992)

49 Aerosmith - Rocks (1976)

50 Deftones - Around The Fur (1997)

Jón Þorleifsson VII - Hrellir nýjan ráðherra

  Jón Þorleifsson,  verkamaður og rithöfundur,  tók upp á því á gamals aldri að setja saman vísur.  Iðulega voru það kveðjur til samferðamanna.   Oftar kaldar en hlýjar kveðjur.  Jón gætti þess vandlega að kveðjurnar kæmust til skila.  Það gerði hann með því að ganga heim til viðkomandi og afhenda honum nýútkomna bók eftir sig með vísunni.  Jón gekk flestra sinna ferða innan Reykjavíkur.  Jafnvel mjög langar leiðir.

  Verkalýðsforingjar voru lágt skrifaðir hjá Jóni - svo vægt sé til orða tekið.  Hann hafði í raun megnustu óbeit á þeim.  Taldi þá vera upp til hópa glæpamenn,  mútuþega,  lygara,  svikara og að auki hina verstu menn.

  Þannig orti Jón um Eðvarð Sigurðsson,  verkalýðsforingja og alþingismann:

  Eðvarð,  þú ert óþverri,

iðinn lygaslefberi,

  mannorðsspjallameistari,

magnað eiturkvikindi.

 

  Jón talaði ekki rósamál.  Hann sagði hlutina eins og þeir komu honum fyrir sjónir.  En hann átti til milda og sérkennilega takta í þeirri uppreisn sem hann var stöðugt í gegn mönnum og málefnum. 

  Meðal þeirra sem Jón fyrirleit var Magnús Kjartansson,  ritstjóri Þjóðviljans.   Þegar Magnús var settur í embætti iðnaðarmálaráðherra var Jón snöggur að panta viðtal hjá ráðherranum.  Honum var úthlutað viðtali fljótlega upp úr hádegi.  Jón mætti stundvíslega og var vísað til skrifstofu ráðherrans.  Magnús tók vel á móti Jóni,  bauð honum sæti og spurði hvað hægt væri að gera fyrir hann.

  Jón fékk sér sæti og sagði:  "Það er fullreynt að þú hvorki vilt né getur neitt fyrir mig gert."

  Er Jón sagði frá þessu síðar sagðist hann hafa lagt sig í líma við að vera afar kurteis í þetta skiptið.  Hann dauðlangaði að lesa Magnúsi pistilinn en hélt aftur af sér.

  Magnús spurði hvert erindið væri.  Jón sagði það ekki vera neitt.  Hann ætli bara að sitja þarna.  Hann hafi fullan rétt á því eins og hver annar Íslendingur.  Magnús spurði hvort hann eigi að kalla eftir kaffi handa honum.  Nei,  Jón sagðist ekki vera kominn til að sníkja kaffi eða annað.  Þvert á móti sagði hann Magnúsi að láta veru sína ekki trufla hann frá störfum.  "Sinntu þínum störfum.  Láttu mig ekki trufla þig.  Ég ætla bara að sitja hérna á meðan."

  Magnús fór að blaða í möppum og reyndi að leiða Jón hjá sér.  Jón sat beint fyrir framan hann og horfði stíft á hann.  Tvisvar eða þrisvar reyndi Magnús að hefja spjall við Jón.  Jón endurtók þá fyrri setningar.  "Sinntu þínum störfum.  Láttu mig ekki trufla þig."

  Jón sagði Magnús hafa orðið lítið úr verki.  Hann hafi gjóað til sín augum af og til og orðið taugaveiklaðri og aumari með hverjum klukkutíma sem leið.  Að lokum tilkynnti Magnús að vinnudegi sínum væri lokið.  Jón stóð þá upp,  opnaði dyrnar og kvaddi hátt og kurteislega til að aðrir heyrðu. 

  Rúsínan í pylsuendanum, að sögn Jóns,  var er hann gekk framhjá konunni í afgreisðlunni.  Hann kvaddi hana í leiðinni.  Hún leit á úr sitt og varð að orði:  "Þið hafið greinilega haft um margt að spjalla."

---------------------------------------

Fyrri frásagnir af Jóni Þorleifssyni: 

Afmælishóf Dagsbrúnar

http://jensgud.blog.is/blog/jensgud/entry/1196152

Kastaði kveðju á forsætisráðherra

http://jensgud.blog.is/blog/jensgud/entry/1197159

Illa leikinn af verkalýðsforingja

http://jensgud.blog.is/blog/jensgud/entry/1198212

Verkalýðsforingi hrekktur 1. maí

http://jensgud.blog.is/blog/jensgud/entry/1198926

Á kosningadag

http://www.jensgud.blog.is/blog/jensgud/entry/1219978

Kveðju kastað á Guðrúnu Helgadóttur

http://www.jensgud.blog.is/blog/jensgud/entry/1221792/

 

   

Veitingahússumsögn

-  Veitingastaður:  Sægreifinn,  Geirsgötu 8

-  Réttur:  Skata

-  Verð:  1950 kr.

-  Einkunn:  **** (af 5)

.

  Kjartan Halldórsson hefur rekið einn skemmtilegasta og sérstæðasta sjávarréttastað landsins til fjölda ára.

  Einkennisréttir Sægreifans eru fleiri en einn og fleiri en tveir.  Humarsúpan er ein sú besta í heimi.  Sæagra stinningarsúpan er einnig þekkt.  Í henni eru meðal annars sæbjúga og lúða.

  Grillaður fiskur á spjóti er fyrirferðamestur á matseðlinum.  Það er dagamunur á úrvalinu.  En líklegast er að hægt sé að fá sér þorsk,  blálöngu, lax,  bleikju,  steinbít,  lúðu,  skötusel,  karfa,  sólkola,  rauðsprettu,  hrefnu,  humar eða risarækjur.

  Viðskiptavinurinn velur sjálfur tilbúin uppáþrædd grillspjót úr kæliskáp.

.

  Yfir vetrartímann er boðið upp á siginn fisk á þriðjudögum og fimmtudögum og skötu á laugardögum.  Þeir réttir eru afgreiddir soðnir á hefðbundna mátann en ekki á grillspjóti.

  Í eftirrétt er grjónagrauturinn Steingrímur (Hermannsson) í sparifötum (með rjómarönd). 

.

  Kjartan stendur iðulega vaktina sjálfur,  eldar, ber á borð og spjallar við gesti.  Á orðafari hans og innréttingum staðarins má glöggt greina að Kjartan er gamall sjóari.  Það var gott uppátæki hjá honum að ráða sjálfan sig í vinnu á Sægreifanum.

.

  Skatan í dag var bragðmild.  Ég nefndi við Kjartan að ég hefði áður fengið hana kæstari á Sægreifanum.  Kjartan svaraði eins og ekkert væri eðlilegra:  "Ég er alltaf með tindabykkju líka.  Ég bara gleymdi henni í dag.  Þú færð hana næst."

  Þetta segir mikið um það hversu heimilisleg stemmningin er á Sægreifanum. 

.

  Þegar ekki þeim mun meira er að gera býður Kjartan gestum að beinhreinsa skötuna fyrst; áður en hann hleður kartöflum,  papriku,  hömsum og saltfiski með á diskinn.     

  Réttirnir á Sægreifanum eru vel úti látnir.  Skammtarnir eru eins og ætlaðir erfiðisvinnandi sjómönnum fremur en kyrrsetuvesalingum af skrifstofum höfuðborgarinnar. 

.

  Á mínum diski voru 4 væn stykki af skötunni og 3 ennþá vænni stykki af saltfisk á sér diski.  Ég varð að afþakka bæði saltfiskinn og grjónagrautinn.  Skatan,  kartöflurnar og rúgbrauð með smjöri voru ríflegri skammtur en kyrrsetuvesalingur getur torgað.  

  Paprikubitarnir gefa skötunni skemmtilega sætt aukabragð.  Kjartan kann þetta. 

.

  Matsalir Sægreifans skiptast í 4 svæði.  Á neðri hæð eru tveir matsalir.  Þar er setið við mjó langborð.  Ókunnugir sitja hlið við hlið.  Útlendir ferðamenn eru oft og tíðum hátt hlutfall gesta.  Það er þeim ævintýri að koma á þennan framandi veitingastað.  Útlendingarnir hefja iðulega spjall við ókunnuga Íslendinga sem sitja þeim næst.  Spyrja um eitt og annað.  Ókunnugir Íslendingar spjalla einnig hver við annan. 

.

  Fyrir utan er glerskáli.  Þar er gaman að sitja í góðu veðri.  Á efri hæðinni er veislusalur.  Hann er vistlegri og flottari en matsalirnir á jarðhæðinni.

  Á veggjum hanga ótal ljósmyndir og allskonar dót.  Sægreifinn er mitt á milli þess að vera millifínn staður og skyndibitastaður.  Hann er ekki skyndibitastaður vegna þess að maturinn er veglegur "heimilismatur".  En maturinn er afgreiddur á pappadiskum og drykkir í plastglösum.   

  Það er skemmtileg upplifun að heimsækja Sægreifann.

. 

Vandað og skilmerkilegt kort yfir rokkáhuga þjóða heimsins

  Harðvítugar deilur um það hvaða þjóðir eru virkastar í rokkdeildinni og óvirkastar hafa hleypt upp ófáum fjölskylduboðum,  ættarmótum,  fermingarveislum,  saumaklúbbum,  hestamannamótum og jarðarförum.  Deilurnar hafa klofið heilu og hálfu fjölskyldurnar í herðar niður,  eitrað þorp,  sveitafélög og einstök hverfi á höfuðborgarsvæðinu. 

  Til að afstýra því að óvildin,  heiftin og illindin vaxi upp í almenna upplausn í þjóðfélögum heims og endi í milliríkjadeilum og heimsstyrjöld hafa bandaríska leyniþjónustan,  CIA, og virkir þungarokksunnendur heimsins tekið höndum saman og unnið upp nákvæmt kort.  Á kortinu sést skýrt og skilmerkilega hvaða þjóðir eru að þungarokka og hverjar ekki.  Nú þarf enginn að deila lengur.  Bara yfirleitt ekki um neitt.

  Ég vissi þetta allt áður.  Nema ekki hvað samfélagið á Svalbarða er hart í þungarokkinu.  Þar gengur allt út á djöflarokkið. 

Hljómleikaumsögn

- Yfirskrift:  Af fingrum fram

- Gestgjafi:  Jón Ólafsson

- Gestur:  Eivör

- Staður:  Salurinn í Kópavogi

- Einkunn:  ***** (af 5)

.

  Margir muna eftir sjónvarpsþáttum Jóns Ólafssonar,  Af fingrum fram.  Þar fékk hann þekkta tónlistarmenn í spjall;  fór yfir tónlistarferil þeirra,  æsku,  uppruna og fleira.  Sýnishorn af ferlinum voru dregin fram og þættinum lauk á því að gesturinn tók lagið við píanóundirleik Jóns.

  Þættirnir voru skemmtilegir og nutu vinsælda.  Það var vel til fundið hjá Jóni að hafa framhald á og færa þá á svið í Salnum í Kópavogi.  Sjónvarpsformið var í knappasta lagi.  Rösklega hálfs þriðja klukkutíma dagskrá (með stuttu hlé) í Salnum gerir viðfangsefninu miklu betri skil.

  Eivör og Jón fluttu 19 lög,  studd dyggilega af bassaleikaranum Robba frá Húsavík (ég held að hann heiti Róbert Þórólfsson).  Þá eru meðtalin sýnishorn af fyrsta lagi sem Jón samdi og fyrsta lagi sem Eivör samdi.  Eivör var treg til að flytja sitt fyrsta frumsamda lag en Jón beitti þrýstingi með því að spila sitt fyrsta frumsamda lag.  Upprifjun á þessum bernskubrekum vakti kátínu.

  Á milli laga ræddi Jón við Eivöru um upphaf ferils hennar og tilurð söngva hennar.  Í fyrri hluta hljómleikanna var meira spjallað og músíkin djassaðri.  Í seinni hlutanum var músíkin þjóðlagakenndari. 

  Jón er orðheppinn og fyndinn.  Hann nær að skapa  heimilislegt,  létt og afslappað andrúmsloft.  Hann spilar stemmninguna af fingrum fram.

  Flestöll viðtöl sem Eivör hefur afgreitt í íslensku sjónvarpi,  útvarpi og fjölmiðlum hafa verið frekar formleg og alvörugefin.  Eivör er hinsvegar mikill fjörkálfur og grallari í eðli sínu.  Jón náði að laða þá hlið hennar fram.  Hún fór meira að segja út á þann hála ís að þýða dónaleg færeysk orð yfir á íslensku og öfugt.  Það var allt snyrtilega innan siðferðismarka.  Húmoristinn Jón náði að búa til góða brandara úr því.  Það var mikið hlegið og allir skemmtu sér konunglega.

  Til viðbótar við kunn lög frá ferli Eivarar flutti hún tvö lög af væntanlegri plötu.  Þar af annað gullfallegt og grípandi til minningar um föður sinn sem féll frá fyrir rösku ári síðan.

  Eivör er besta söngkona heims.  Frábær tónlistarmaður.  Lögin voru misvel æfð hjá tríóinu.  Jafnvel óæfð.  Það átti sinn þátt í því hvað stemmningin var heimilisleg. 

  Þessir hljómleikar voru frábær skemmtun.  Það var uppselt á þá nánast um leið og þeir voru settir á dagskrá.  Troðið út úr dyrum.  Sem gefur vonir um að Eivör verði aftur á dagskrá  Af fingrum fram  næsta vetur. 

  Lítill fugl hvíslaði að mér að tæknimenn frá rás 2 hafi verið á staðnum og hljóðritað hljómleikana.  Vonandi er það rétt.  Svona konfekt á að varðveita.      

 

 

 

   

Alvöru rokk á landsbyggðinni

  Rokksveitirnar Sólstafir og Dimma leggja af stað í stutta hljómleikaferð um Ísland í dag (Þórsdag 23. febrúar). Fyrstu hljómleikarnir verða á Hvanneyri, aðrir á Akureyri og þeir þriðju á Egilsstöðum.

“Við höfum útvegað langferðarbíl og erum klárir í slaginn”, segir Sæþór Maríus, gítarleikari Sólstafa. “Það er heilmikið rokk úti á landi og alltaf gaman að halda tónleika þar”, bætir hann við. Sólstafir eru í góðu tónleikaformi eftir stífar æfingar fyrir annasamt sumar.  Það sama er hægt að segja um Dimmu sem eru að undirbúa útgáfu sinnar þriðju plötu.  Hún verður þeirra fyrsta útgáfa eftir að Stefán Jakobsson söngvari og trymbill Birgir Jónsson gengu til liðs við þá bræður Ingó og Silla Geirdal.

  Fyrstu tónleikarnir verða Þórsdaginn 23. febrúar á Kollubar á Hvanneyri. Þeir næstu á Græna Hattinum á Akureyri þann 24. febrúar.  Síðustu hljómleikarnir að þessu sinni verða í Valaskjálf á Egilsstöðum  25. febrúar. Hljómsveitin Gruesome Glory spilar með þeim á Akureyri og hljómsveitin Oni spilar með þeim á Egilsstöðum.

  Sólstafir áttu eina bestu rokkplötu heims á síðasta ári,  Svartir sandar.  Hljómsveitin er vel kynnt erlendis og platan náði inn á finnska vinsældalistann.  Þegar ég var í Finnlandi um jólin og áramót blasti platan við í öllum plötubúðum.

Öðru vísi lögreglutaktar

  Þessi lögregluþjónn stjórnar umferð á gatnamótum í Manilla,  höfuðborg Filippseyja.  Það hefur hann gert í sex ár og staðið sig vel.  Hann vinnur við þetta í sjö klukkustundir á dag,  fimm daga vikunnar.  Hann er frægur á Filippseyjum og reyndar út um allan heim.  Á þútúpunni er að finna fjöldamörg önnur myndbönd af kappanum. 

  Frægð hans liggur í óstjórnlegri dansgleði.  Og gleði yfir höfuð.  Hann er alltaf kátur og fellur ítrekað í dansgírinn.  Hann reynir þó að halda danstöktunum í skefjum svo að þetta fari ekki út í fíflagang.  Hann vill varðveita virðuleika starfsins.  Stundum tekst það.  En oftar brjótast danssporin fram eins og hver annar kækur.

  Lögregluyfirvöld eru mjög ánægð með þetta.  Þau hvetja umferðarlögregluþjóna til að vera glaðlega og hafa boðið öðrum umferðarlögreglumönnum fjárstyrk ef þeir vilji sækja dansnámskeið.  Einhverjir hafa þegið boðið.

Hjálpum Róslín Ölmu að vinna utanlandsferð

  Hún Róslín Alma Valdemarsdóttir tekur ljómandi góðar ljósmyndir.  Hún sendi eina af sínum flottu ljósmyndum inn í ljósmyndakeppni á Fésbókinni.  Eigandi vinningsmyndarinnar fær í verðlaun utanlandsferð fyrir tvo.  Myndin er sigurstrangleg.  Hún ber af öðrum myndum í keppninni.  Vandamálið er að það er almenningur sem greiðir myndunum atkvæði.  Róslín Alma tilheyrir engum fjölmennum hópi sem hægt er að virkja til að smala atkvæðum á mynd hennar.  Nema ef við,  bloggvinir hennar og bloggsamfélagið,  tökum málið í okkar hendur.  Allir saman nú.  Hér er slóðin: 

http://apps.facebook.com/hunangskoss/?photo=141

 

 

Smá klúður

  Áfengir drykkir,  sjómennska og fiskveiðar eiga ekki alltaf sem best saman.  Veiðimaðurinn á myndinni drakk heilan kassa af bjór og tók ekkert eftir því að ísinn bráðnaði hratt í hlákunni.  Enda mátti hann ekkert vera að því að horfa í kringum sig.  Hann var upptekinn við að vakta vökina á ísnum.  Staðfastur maður með metnað til að standa sig.

 

Skipstjórinn var ódrukkinn

Veitingahússumsögn

 

.

- Veitingastaður:  Shalimar,  Austurstræti 4

- Réttur:  Saagwala Gosht

- Verð:  3190,-

- Einkunn: **** (af 5)

.

  Shalimar er pakistanskur veitingastaður.  Innréttingar,  músík í hátölurum,  starfsmenn og maturinn bera því glöggt vitni.  Það mætti einnig kalla þetta indverskan stað.  Munurinn er enginn.  Enda var Pakistan hluti af Indlandi þangað til um miðja síðustu öld.

  Aðlaðandi lykt af karrý og öðru austurlensku kryddi tekur á móti gestum um leið og gengið er inn um dyrnar.  Karrý og tandoori eru einmitt orðin sem koma upp í hugann þegar pakistanskur eða indverskur matur ber á góma.  Orðið tandoori var upphaflega notað yfir sérstakan leirofn sem er hitaður í 500°.  Á öldum áður var ofninn notaður til að baka brauð og hita upp húsakynni.  Síðar var farið að elda kjöt og fleira í honum.  Í dag nær orðið tandoori yfir sósur,  jógúrt-mareneringu,  krydd,  matreiðsluaðferðir,  indverska veitingastaði og allskonar.  Flestir setja tandoori sennilega í samhengi við rauða kjúklingarétti.     

  Þegar ég byrjaði að ferðast til útland fyrir nokkrum áratugum var hluti af skemmtuninni að heimsækja indverska og pakistanska matsölustaði.  Nú er hægt að upplifa það ævintýri í hlaðvarpanum í Reykjavík.

  Shalimar er millifínn staður.   Borð eru smá og það er þröngt um manninn.  Staðurinn er lítill en á tveimur hæðum.  Samt eru þrengsli ekki óþægileg á neinn hátt þó að salirnir á báðum séu þétt setnir.  

  Rétturinn Saagwala Gosht samanstendur af lambakjötsbitum elduðum í spínatsósu með lauk, hvítlauk og engifer og einhverju fleiru sem ég kann ekki að nefna..  Þetta er bragðgóður millisterkur réttur.  Meðlætið er ferskt hrásalat og hrísgrjón.  Ofan á salatið eru settar þrjár aðskildar sósur.  Ein sterk, önnur sæt, sú þriðja er mild jógúrtsósa.  Hrísgrjónin eru hvít,  gul og appelsínugul.  Þetta tekur sig vel út á disknum, er allt ljúffengt og hlutföll góð.  Fyrir minn smekk mætti hlutfall kjötbitanna þó vera örlítð hærra.  Örlítið.

  Margir fá sér naan-brauð með réttunum.  Það er upplagt fyrir þá sem eru fyrir brauð.  Betri gerast ofnbökuð hveitibrauð ekki.  Hinsvegar er máltíðin þá orðin heldur rífleg.  En það er svo sem enginn sektaður fyrir að klára ekki af disknum.

.

Kossaherbergi á flugvöllum

  Eftir að Íslendingar tóku upp á því að flytja í þúsundatali til Noregs - í kjölfar bankahrunsins - hefur kossaflens farið úr böndum á norskum flugvöllum.  Íslensku nýbúarnir í Noregi skjótast einn og einn í stuttar heimsóknir til Íslands.  Makinn fylgir viðkomandi út á flugvöll.  Þegar komið er að kveðjukossi skiptir engum togum að fólkið missir sig í áköfum sleik,  káfi og dónaskap. 

  Þetta endurtekur sig þegar viðkomandi kemur frá Íslandi á ný.  Svo rammt kveður að þessu að það er orðið vandamál.  Þegar fjöldi Íslendinga er í sleik út um alla flugstöð,  aðallega við innritunarborð og útgöngudyr,  truflar það vinnu starfsfólks og stíflar eðlilegt flæði gangandi gesta. 

  Nú er verið að setja upp í flugstöðinni í Stafangri í Noregi sérstakt afdrep fyrir kossasjúka Íslendinga.  Til að lokka Íslendingana inn í kossaherbergið er það haft rómantískt:  Bleikur litur í hólf og gólf, rauð ljós sem varpa mildri birtu og rómantísk músík spiluð. 

  Vondu fréttirnar:  Það er bannað að stunda kynlíf í kossaafdrepinu (nema kannski smá munnmök á hátíðisdögum.  Kannski). 

  Því er spáð að innan skamms verði svona kossaherbergi sett upp á öðrum norskum flugvöllum sem bjóða upp á beint flug til Íslands. 

  

Hæstaréttardómarar gefa grænt ljós á kynferðislega áreitni

  Hæstaréttardómararnir Greta Baldursdóttir, Benedikt Bogason og Helgi I. Jónsson sjá enga kynferðislega áreitni í þvi að starfskona sé kölluð í "vinnuferð" í sumarbústað með tveimur karlkyns yfirmönnum sínum.  Þar gengu þeir naktir og hálfnaktir um og vildu undir þeim kringumstæðum ræða við konuna.  Konan tók nektinni illa og ásókn typpalinganna í svefnherbergi hennar um nóttina.  Í kjölfar var hún lækkuð í tign.  Greta,  Benedikt og Helgi meta það svo sem konan hafi ekki verið áreitt kynferðislega.  Svona hafi bara verið vinnumórallinn. 

  Þetta vekur upp spurningar um vinnumóralinn hjá Hæstarétti.  Þar er sennilega daglegt brauð að þau Greta,  Benedikt og Helgi rölti um nakin.  Taki nakin kollhnýs á göngum og hangi daglangt saman nakin í baðkari.  Eru nakin undir dómarahempu í Hæstarétti.  Og hlaupa þess á milli nakin um rangala Hæstaréttar. Það getur verið undarlegt að fylgjast með þessum strípalingum að skokka um húsakynni Hæstaréttar.

  Það er ekkert kynferðislegt við stríplið í Hæstarétti.  Vinnumórallinn er bara svona.

Kynlífsfíkn er ekkert grín

Svarta hagkerfið

 

  Víða úti á landi eru þéttbýlisstaðir sem virðast vera einskonar draugaborgir.  Það er allt steindautt.  Engin verslun.  Enginn bjórkrá.  Engin hárgreiðslustofa.  Enginn matsölustaður.  Ekkert bakarí.  Engin snyrtistofa.  Engin nuddstofa.  Engin húðflúrstofa.  Engin vídeóleiga.  Ekki neitt.  Aðeins íbúðarhús. Fjöldi íbúðarhúsa.  Já,  og skóli og kirkja.

  Hvernig má þetta vera?  Þurfa íbúar þorpsins,  kannski 1000 manns,  ekki á neinni þjónustu að halda? Svo virðist sem um svefnbæ sé að ræða.  Þegar íbúarnir eru spurður út í þetta eru þeir þöglir sem gröfin.  Þykjast jafnvel ekki skilja aðkomumanninn eða segjast vera mállausir og heyrnarlausir.  

  Í raun er ekki til neitt þorp hérlendis án þess að helsta þjónusta sé í boði.  Hinsvegar er þessi þjónusta falin.  Hún er neðanjarðar.  Hvergi skráð,  hvorki í símaskrá né firmaskrá.  Aðeins íbúar þorpsins vita hvar þjónustuna er að finna.  Þetta er svart hagkerfi.  Þorpsbúar eru alsælir með það.  Þeir vilja ekki að rösk 20% af hverri krónu sem þeir borga fyrir þjónustuna fari umsvifalaust úr þorpinu í formi virðisaukaskatts og endi í ríkiskassanum fyrir sunnan.  Svo bara rúnta 1000 kallarnir óskiptir á milli hárskerans,  nuddarans,  húðflúrarans,  snyrtifræðingsins og hinna þorpsbúanna árum og áratugum saman. 

 

Húðflúrari handtekinn

Veitingahússumsögn

 

- Veitingahús:  Tandoori,  Skeifunni 11

- Réttur:  Lamba-nanito

- Verð:  1590 kr.

- Einkunn: *** (af 5)

.

  Tandoori er frekar fínn veitingastaður.  Kerti loga á ódúkuðum svörtum borðum.  Hnífapörin liggja á þykkum tau-munnþurrkum.  Matseðillinn og matreiðslan taka mið af indverskri matarhefð. 

  Lamba-nanito er er kryddlegið lambakjöt og salat vafið innan í Paratha brauð.  Brauðið er töluvert þykkara og bragðbetra en þunnu bragðdaufu hveitivefjurnar á veitingastöðum sem matreiða undir mexíkóskum áhrifum.  

.

  Paratha vefjurnar virðast vera tvær.  Í raun er þetta þó ein vefja, snyrtilega skorin í tvennt.

  Salatið samanstendur af Iceberg, rauðlauki,  papriku, ólívum,  fetaosti og gúrkum.  

.

  Kjötið og salatið eru hlutfallslega lítill hluti af réttinum; eru eiginlega af skornum skammti fyrir þann sem er meira fyrir kjöt og salat en brauð.  Aftur á móti er þetta áreiðanlega hið besta hlutfall fyrir þá sem sækja í brauð.  Með Nanito-inu er borin fram mild Raita jógúrtsósa.  Ég var varaður við að þetta væri sterkur réttur.  Sú var þó ekki raunin.

.

  Það er gaman að prófa svona framandi rétt.  En ég panta hann ekki aftur.  Aftur á móti er ástæða til að prófa  eitthvað fleira í Tondoori.  Þetta er svokallaður hollustu veitingastaður.  MSG (þriðja kryddið) og sykur eru ekki notuð.  Saltnotkun er í lágmarki.

.

  Sennilega getur verið gaman að tékka á hlaðborðinu sem boðið er upp á í hádeginu.  Það kostar 1690 kall sem að óreyndu er ágætt verð.  Verra er að það kostar að maður verði að rífa sig upp á fætur um hádegisbil.

Farsælasti lagahöfundur sögunnar - Bítlarnir eftir upplausn Bítlanna

 

. Paul McCartney hefur oftar en aðrir átt lög og plötur í 1. sæti vinsældalista.  Hann er söluhæsti tónlistarmaður sögunnar.  Hann er höfundur þess lags sem oftast hefur verið krákað (cover song) og sér ekki fyrir enda á því.  Þegar  Yesterday  hafði komið út á plötu með 1000 flytjendum var það langt fyrir ofan næstu lög.  Í dag er það til í flutningi yfir 2200 flytjenda.  Paul er farsælasti lagahöfundur heims.

  Þegar sólóferill hans er borinn saman við hina Bítlana er hann áberandi afkastamestur.  Enda ofvirkur.  Hann hefur jafnframt verið þeirra lang ötulastur við hljómleikahald.  Kallinn er hamhleypa.  Ekki síður við reykingar. 

  Áskrift Pauls að 1. sæti vinsældalista vegur drjúgt í að varðveita orðspor Bítlanna - ásamt stöðugu hljómleikahaldi hans.  Þar eru Bítlalög eðlilega áberandi á prógramminu.  Hann hefur einnig haft lög eftir Lennon á prógramminu.   Oftast Give Peace A Chance.  Lennon söng líka og spilaði á gítar  I Saw Her Standing There  eftir Paul inn á plötu með Elton John.  Tók nokkuð flott gítarsóló.  Þetta var í síðasta skipti sem Lennon kom fram opinberlega á sviði.  John kynnti lagið:  "Eftir minn gamla fyrrverandi kærasta."  Lennon var blindfullur,  eins og næstu ár á undan, og búinn að steingleyma illindum á milli þeirra fóstbræðra.  Paul heimsótti John nokkrum sinnum eftir þetta og þeir dópuðu og djömmuðu meðal annars saman með Stevie Wonder.  Samt slettist líka upp á milli þeirra inn á milli.  Þeir spjölluðu stundum saman í síma.  Símtölin enduðu nokkrum sinnum með því að annar skellti á hinn.  Oftar var það Lennon sem skellti á Paul.  Enda Lennon skapofsamaður fram á dauðadag.  En Paul þekkti sinn æskufélaga og vissi að það rauk jafn harðan úr honum.  Næst þegar Paul hringdi í fóstbróður sinn var Lennon búinn að steingleyma næsta símtali á undan.     

.

.

  Paul er óþreytandi að gefa sér tíma til að ræða við fjölmiðla,  óháð því hvort að fjölmiðilinn er smásnepill eða stóru blöðin.  Kallinn er alltaf í stuði fyrir spjall.

.

  Aðrir Bítlar hafa lagt nokkuð af mörkum við að halda orðspori Bítlanna á lofti.  Fyrstu tvær sólóplötur Lennons skora jafnan hátt á lista yfir bestu plötur.  Lennon var valinn "Tónlistarmaður síðustu aldar" í aldamótauppgjöri helstu fjölmiðla. 

  Eins og fram kemur í æviágripi Pauls á allmusic.com þá er Lennon hærra skrifaður hjá gagnrýnendum.  Það var ekki alltaf svo.  Fyrstu sólóplötu Lennons,  Plastic Ono Band,  var á sínum tíma slátrað af gagnrýnendum sem ókláraðu hráu demó dæmi.  Síðar hlaut sú plata uppreista æru.

  Lennon var í náð hjá pönkurum á pönk- og nýrokksárunum.  Pönkararnir krákuðu hans lög á sama tíma og þeir drulluðu yfir flestar "poppstjörnur".  Þar naut Lennon þess að hafa kúplað sig út úr músíkbransanum til margra ára eftir að hafa verið blindfullur í tvö ár og skandalaserað út og suður.  Sem og þess hvað platan  Plastic Ono Band  var hrá og einföld.

.

.

  Er gruggbylgjan (grunge) skall á upp úr 1990 var Lennon hampað af gruggurunum.  Þeir tóku upp á því að kráka hans lög.  Ótal safnplötur hafa komið út með Lennon krákum. 

.

.

  Þegar komið er til Bandaríkjanna verður maður strax var við að George Harrison er hærra skrifaður þar en í Evrópu.  Ekki aðeins sem liðsmanns Travelling Wilburys heldur löngu áður en það dæmi kom til. 

.

.

  Það er gaman að skoða og bera saman hvaða lög og plötur Bítlarnir komu í 1. sæti eftir upplausn Bítlanna (USA = Bandaríski vinsældalistinn.  UK = Breski vinsældalistinn): 

    

McCartney

1970

McCartney (plata) USA

1971

Ram (plata) UK

Uncle Albert (lag) USA

1973

My Love (lag) USA

Red Rose Speedway (plata) USA

1973

Band On The Run (plata) USA + UK

1974 

Band On The Run (lag) USA

1975

Listen To What The Man said (lag) USA

Venus And Mars (plata) USA + UK

1976

At The Speed Of Sound (plata) USA

Silly Love Song (lag) USA

1977

Wing Over America (plata)  USA

Mull Of Kintyre (lag) UK

1978

With A Little Luck (lag) USA

1980

Coming Up (lag) USA

McCartney II (plata) UK

1982

Ebony And Ivory (lag) USA + UK

Tug Of War (plata) USA + UK

1983

Say Say Say (lag) USA

Pipes Of Peace (lag) UK

1984

Give Me Regards To Broad Street (plata) UK

Lennon

1971

Imagine (plata) USA + UK

1974

Whatever Gets You Through The Night (lag) USA

Walls And Bridges (plata) USA

1980

Just Like Starting Over (lag) USA + UK

Double Fantasy (plata) USA + UK

1981

Woman (lag) UK

1982

Collection (plata) UK

Harrison

1970

All Things Must Pass (plata) USA

1970/71

My Sweet Lord  (lag) USA + UK

1972

The Concert For Bangla Desh (plata) UK

1973

Give Me Love (lag) USA

Living In The Material World (plata) USA

1987

Got My Mind Set On You (lag) USA

Ringo Starr

1973

Photograph (lag)

.

.

  Ég hef aldrei gert upp á milli Pauls McCartneys og Johns Lennons.  Né heldur vanmetið George Harrison sem allt að því þeirra jafningja.  Þannig lagað.  Harrison átti mörg af flottustu lögum Bítlanna og lagði sitt af mörkum við að gera Bítlana að þeirri stórkostlegu hljómsveit sem hún var.  Ringo átti sömuleiðis góða spretti með Bítlunum. 

.

.

  Margir hafa ranghugmyndir um Bítlana af þeim lögum Bítlanna sem oftast eru spiluð í útvarpi.  Vissulega afgreiddu Bítlarnir ofur létt popplög - allt að því barnagælur - á færibandi.  En Bítlaplöturnar geyma sömuleiðis gullkorn sem ekki heyrast í útvarpi dags daglega.