Íslendingar gleðja

 

  Útlendingar um allan heim hafa til nokkurra ára hlegið sig máttlausa yfir fíflagangi kolgeggjaðra Íslendinga,  sem héldu að þeir væru mestir og bestir í heimi,  snjallastir allra í fjármálabraski.  Þeir hældu sér og hver öðrum við hvert tækifæri fyrir einstaka snilli.  Þeir hömpuðu "íslensku leiðinni";  að láta kylfu ráða kasti í stað þess að hanga yfir smáatriðum.  Forsetinn,  seðlabankastjóri og aðrar toppfígúrur sáu um uppklapp og húrrahróp fyrir "íslensku útrásarvíkingana".  Það þarf svo sem ekkert að halda áfram með upptalninguna á "tærri snilldinni".  Mestu skiptir að sögur af brjáluðum kóksniffandi gullétandi íslensku vitleysingunum er útlendingum óendanleg uppspretta hláturs. 

  Það er öllum hollt að hlæja.  Gamansögurnar af Íslendingum gleðja.  Einu útlendingarnir sem hlæja ekki þegar tal berst að íslensku kóngunum eru þeir sem töpuðu peningum á kókflippi þeirra.

  Sjálf/ir getum við Íslendingar brosað yfir lýsingum útlendinga á Íslendingum.  Kíkið á fréttina hér fyrir neðan.  Þaðan er hægt að smella á sjónvarpsviðtalið sem um ræðir.  Spjallið um Ísland hefst á mínútu 31.30.

Hlegið að Íslendingum

Forvitnilegasti norræni matur

  Danska fréttablaðið Politiken hefur tekið saman og birt lista yfir forvitnilegustu norræna rétti sem brýn ástæða er til að prófa.  Réttunum er ekki raðað upp í númer.  Mikilvægi réttanna ræðst sennilega frekar af því hvar sælkerinn er staddur og hvenær hann hefur tækifæri til að smakka góðgætið.  Þetta eru helstu réttir sem taldir eru upp (algengum skandinavískum réttum,  svo sem biximat,  gröfnum laxi og þess háttar er sleppt):

.

Danskt:  Smurt franskbrauð með örþunnum súkkulaðiplötum.

Íslenskt:  Hrossakjöt.  Það er meira að segja hægt að kaupa hrossakjöt í íslenskum matvöruverslunum.  Ótrúlegt en satt. 

Danskt:  Rauðgrautur með rjóma.  Grauturinn er búinn til úr jarðarberjum,  rifsberum og eða hindberjum.

Sænskt:  Kjötbollur með kartöflumús og títuberjasultu.  Fæst m.a. í Ikea.

Íslenskt:  Söl.  Íslendingar borða þurrkuð söl eins og hvert annað snakk.  Að sögn ótrúlega hollt.

Sænskt:  Kavíar í túpu (reykt þorskahrogn bragðbætt með salti,  sykri,  tómatmauki o.fl.).

Færeyskt:  Marsvín (grindhvalakjöt)

Norskt:  Vöfflur með smjöri og mysuosti

Grænlenskt:  Hvalspik og -húð.  Snætt hrátt.  Tuggið vel og lengi eins og tyggjó.

Danskt:  Þurrkaðir svínapörustrimlar sem snakk.

Sænskt:  Pylsa með sinnepi,  majónesi og kartöflumús borið fram með kakómjólk.

Íslenskt:  Svið.  Nei,  þetta er ekki eitthvað sem einungis örfáir sérvitringar snæða.  Sviðnir og sundursagaðir kindahausar eru seldir í íslenskum matvöruverslunum.  Fólk borðar kinnar,  húð,  tungu og augun.

Finnskt:  Marinerað hreindýrakjöt.

Íslenskt:  Skyr.  Gerilsneyddar mjólkurvörur njóta vinsælda um öll Norðurlönd.  En aðeins Íslendingar bjóða upp á skyr.

Norskt:  Bakkaló.  Saltfisksréttur með lauki,  papriku o.fl.

Sænskt:  Úldin smásíld borðuð með flatkökum,  kartöflum og fleiru.  Þykir bragðmild og algjört sælgæti.

Sænskt:  Soðnir vatnakrabbar.  Snæddir kaldir.

Danskt:  Brauðsúpa með rjóma.

Grænlenskt:  Riklingur.  Þurrkuð lúða eða loðna.

Grænlenskt:  Selkjötssúpa.

Íslenskt:  Kæstur hákarl

Færeyskt:  Siginn fiskur

Danskt:  Rúgbrauðssamloka með lifrarkæfu,  4 þunnum saltkjötssneiðum,  hráum laukhringjum  og fleiru. 

Danskt:  Reyktur ostur.

Færeyskt:  Skerpukjöt.  Þurrkað lambalæri. 

Danskt:  Kálfabrjóst með piparrótarsósu.

Norskt:  Saltað,  reykt og þurrkað geitakjöt.

Sænskt:  "Dýft í grautinn".  Brauði er dýft ofan í soðið af soðinni jólaskinku. 

Íslenskt:  Djúpsteiktar kleinur.  Þekkjast líka sem fátækrabrauð í Noregi og Svíþjóð.

Finnskt:  Djúpsteikt deig með fyllingu úr kjöthakki,  lauki og hrísgrjónum.  Er selt bæði á matsölustöðum og í kaffihúsum.

Færeyskt:  Fylltur lundi.  Fyllingin er sætt kökudeig með rúsínum.

.

  Hákarlinn er girnilegur.

Örstutt leikrit um skóbúð

 

 Á sviðinu eru skórekkar með fjölda skópara í ýmsum stærðum.  Einnig er þar stæða af tugum skókassa.  Berfættur snævi þakinn kappklæddur gamall maður gengur inn um útidyrnar og ávarpar eldri konu sem stendur við skórekkana.

.

Maður (ákveðinn):  Góðan dag.  Þetta er ljóta brjálaða veðrið.  Þvílíkt rok, haglél og hörku frost.  Ég var næstum orðinn úti. Mig vantar skó.  Ég varð fyrir aðkasti í vinnunni í dag af því að ég mætti í sömu skónum tvo daga í röð.  Það er gróft einelti í gangi.

Kona (vingjarnleg):  Hvernig skó vantar þig?

Maður:  Ekki spariskó og ekki strigaskó.  Eitthvað þar á milli.

Kona:  Hvaða stærð?

Maður:  46.

Kona:  Þá ættir þú að fara í skóbúð.

Maður:  Er þetta ekki skóbúð?

Kona:  Nei,  þetta er bara venjulegt heimili. 

Maður:  En allir þessir skór?

Kona:  Ég er einstæð móðir með stórt heimili.  Ég á 12 börn með 16 mönnum.

Maður:  Með 16 mönnum?

Kona (mæðulega):  Já,  það léttir á meðlagi og dreifir hættu á afföllum.

Maður:  En hvað með alla þessa skókassa?

Kona (feimnislega):  Ég geymi ýmislegt í þeim. 

Kona (opnar einn kassa og sýnir manninum í hann):  Í þessum geymi ég til dæmis laufabrauð.

Maður (kætist og hrópar):  Vá!  Húsavíkurlaufabrauð.  Nammi namm!

Kona:  Nei,  Húsavík er ekki í þeim.  Bara mjólk,  smjör, sykur,  salt,  hveiti og kúmen. 

Maður (spyrjandi):  Það er enginn útskurður á þeim.  Munstrið er teiknað á brauðið.

Kona:  Já,  með tússpenna.  Ég á ekki útskurðarhníf.

Maður:  Þú kannt aldeilis að bjarga þér,  stelpuskott.  En hvar finn ég skóbúð?

Kona (slær manninn utan undir svo smellur í):  Enga ósvífni,  pjakkur!  Þú gengur hér niður götuna til hægri.  Tveimur húsum hér frá,  á horninu,  er gult hús með stóru skilti.  Á því stendur "Skóbúð".  Þar beygir þú til hægri.  Gengur niður þá götu og beygir síðan aftur til hægri.  Þú gengur framhjá þremur húsum og beygir til hægri.  Efst í götunni finnur þú ómerkt rautt hús.  Þar færð þú skó.

Maður:  Er ég þá ekki kominn aftur í þetta hús?

Kona (glaðleg):  Jú.

Maður:  En þú selur ekki skó.

Kona:  Ekki í augnablikinu.  En kannski þá.  Aldrei að gefast upp.  Það er málið.  Svona,  drífðu þig nú.  Stattu þig,  strákur!

Kona (opnar útidyrnar,  ýtir á eftir manninum út,  sparkar í rassinn á honum og lokar dyrunum)..

.

Tjaldið fellur.  

l

----------------------------------------------------------------------------

Fleiri smásögur og leikrit:

 - Álfar

http://jensgud.blog.is/blog/jensgud/entry/1167432/

.

- Bóndi og hestur

 http://www.jensgud.blog.is/blog/jensgud/entry/1122498/

.

- Í plötubúð:

http://jensgud.blog.is/blog/jensgud/entry/260037

.

 - Gömul hjón

http://jensgud.blog.is/blog/jensgud/entry/1098829/

.

 - Hnefaleikakeppni aldarinnar:

http://www.jensgud.blog.is/blog/jensgud/entry/1077689/

.

 - Peysuklúbburinn

http://www.jensgud.blog.is/blog/jensgud/entry/1059543/

.

 - Vinalegur náungi:

http://jensgud.blog.is/blog/jensgud/entry/1041105

.

 - Gamall einbúi

 http://jensgud.blog.is/blog/jensgud/entry/1036775

.

- Saga af systrum

http://www.jensgud.blog.is/blog/jensgud/entry/1017021/

.

 - Jólasaga

http://www.jensgud.blog.is/blog/jensgud/entry/1008279/

.

- Á rjúpnaveiðum:

http://www.jensgud.blog.is/blog/jensgud/entry/988782/

.

- Ólétta nunnan:

http://www.jensgud.blog.is/blog/jensgud/entry/978349/

.

- Gullfiskur:

http://jensgud.blog.is/blog/jensgud/entry/965433

.

- Flugvélamódel:

http://jensgud.blog.is/blog/jensgud/entry/955702

.

- Miðaldra maður:

http://jensgud.blog.is/blog/jensgud/entry/944608

.

- Leyndarmál stráks:

http://jensgud.blog.is/blog/jensgud/entry/928198

.

- Ættleiðing:

http://jensgud.blog.is/blog/jensgud/entry/916687/

.

- Strákur með sög:

http://jensgud.blog.is/blog/jensgud/entry/903540

.

- Hundur:

http://jensgud.blog.is/blog/jensgud/entry/863130

.

- Boltabulla:

http://jensgud.blog.is/blog/jensgud/entry/718347

.

- Skokkari:

http://jensgud.blog.is/blog/jensgud/entry/606929

.

- Strákur skiptir um gír:

http://jensgud.blog.is/blog/jensgud/entry/538649

.

- Morðsaga:

http://jensgud.blog.is/blog/jensgud/entry/320299

.

- 27 ára:

http://jensgud.blog.is/blog/jensgud/entry/299380

.

- Um borð:

 http://jensgud.blog.is/blog/jensgud/entry/278812

.

- Matarboð í sveitinni:

http://jensgud.blog.is/blog/jensgud/entry/266411

.

Af hverju er svona erfitt að telja fólk?

 

  Það er skrítið hvað sjónarvottar á sama stað telja sig vera stadda í mis fjölmennum hópi.  Þannig munar töluverðu á tölum sem gefnar hafa verið upp á fjölmenni á Austurvelli í morgun.  Það hafa sést og heyrst tölur frá 1700 manns og upp í 12 þúsund.  Þar á milli hafa verið nefndar tölurnar 2000, 3000 og 8000. 

  Af hverju er svona erfitt kasta tölu á hópinn?  Það er mikill munur á 2000 og 8000 manns.  Ein skýringin á misháum tölum getur verið sú að margir í hópnum hreyfa sig á meðan verið er að telja.  Það er auðveldara að telja fólk ef fólk væri til í að standa kyrrt á meðan verið er að telja.  Önnur skýring getur verið sú að sumir sjá huldufólk án þess að greina það frá mannfólki.  Þriðja skýringin getur verið sú að sumir eru litblindir; sjá ekki suma liti.  Það fólk sér kannski ekki fólk í gráum eða svörtum fötum.  Og hlustar ekki á Í svörtum fötum.

Eggjum kastað í þingmenn

Færeyingur smíðaði Hörpu

 

  Ráðstefnu- og tónlistarhöllin Harpa hefur verið á milli tannanna á fólki.  Samt ekki þannig að fólk sé að bíta í hana heldur er fólk endalaust að þrasa um hana.  Það er stöðugt vælt undan einu og öðru sem að Hörpu snýr.  Eiginlega öllu.  Nema þeim sem smíðaði Hörpu.  Um hann vita fáir. 

  Þegar Björgúlfur gamli hrinti í framkvæmd byggingu Hörpu varð strax ljóst að enginn Íslendingur myndi ráða við að smíða þetta flókna og nýstárlega hús.   Hófst þá leit út um allan heim að einhverjum sem gæti smíðað Hörpu.  Það var sama hvar borið var niður með fyrirspurn um slíkan mann.  Allir bentu á sama manninn:  Færeyinginn Ósbjörn Jacobsen.

  Færeyingar neita Íslendingum aldrei um neitt.  Þvert á móti.  Færeyingar vilja alltaf allt fyrir Íslendinga gera.  Lána Íslendingum hitt og þetta.  Jafnvel háar peningaupphæðir.  Reyndar eru Færeyingar ennþá áhugasamari um að gefa Íslendingum peninga.  Ekki vantar viljann til þess.  Það sem heldur aftur af Færeyingum með að fylla alla vasa Íslendinga af peningum er að Færeyingarnir óttast að Íslendingum þyki það niðurlægjandi og móðgandi.

  Það var því eins og við manninn mælt:  Um leið og Íslendingar komu skríðandi á hnjánum til Ósbjórns og spurðu hvort að nokkur smuga væri að hann gæti smíðað Hörpu svaraði Ósbjörn án umhugsunar:  "Ja,  tað skal ég."  Hann losaði sig með það sama úr öllum verkefnum og henti sér í að byggja Hörpu.

  Aðstandendur Hörpu skammast sín fyrir að hafa þurft að leita út fyrir landsteinana eftir smiði.  Fyrir bragðið hafa þeir eiginlega haldið leyndu hver smíðaði Hörpu.  Eða réttara sagt látið lítið á því bera.  Eflaust er hægt að finna nafn Ósbjörns einhversstaðar í gögnum um Hörpu.  Það er að segja í smáa letrinu.  

   

Furðulegt nafn á verslun

  Flestum fyrirtækjum er gefið nafn.  Mörgum er valið aðlaðandi nafn.  Nafn sem laðar fram góða tilfinningu fyrir því sem fyrirtækið hefur upp á að bjóða.  Þess vegna dauðbrá mér þegar ég var á rölti í dag.  Þá varð mér litið á skilti með nafni á gjafavöruverslun (að ég held).  Hún heitir því einkennilega nafni Subba.  Gott ef þarna eru ekki til sölu glervörur,  keramik og eitthvað svoleiðis.

  Þessi verslun er í Hamraborg 1.  Ég er afar hugsi yfir nafninu. Hver eru skilaboðin?

  Ljósmyndin er ekki af Subbu.  Held ég.

Útvarp Saga - lifandi þjóðarútvarp

 

  Útvarp Saga er umdeild útvarpsstöð.  Rétt eins og rás 2 og Bylgjan.  Þetta eru þrjár vinsælustu útvarpsrásir landsins.  Margir hlusta og hafa þess vegna margvíslegar skoðanir á þeim.  X-ið er frábær útvarpsstöð en ekki mjög umdeild.  Við sem kunnum vel við tónlistarvalið á X-inu erum sátt/ir.  Aðrir hlusta á aðrar útvarpsstöðvar.  Þátturinn  Harmageddon  á X-inu er snilld.  Þar fara "strigakjaftarnir" Máni,  Frosti og Erpur á kostum og spila fjölbreytt áheyrilegt nýrokk. 

  Effemm 957 er viðbjóður og Kaninn er útvarp heimska fólksins með vondan músíksmekk.

  Flestir sem hafa horn í síðu Útvarps Sögu leggja út af símatímunum.  Opinni línu þar sem þjóðin fær að tjá sig.  Símatímarnir,  Línan er laus,  er í loftinu frá klukkan 9 á morgnana til hádegis.   Gagnrýni á þennan dagskrárlið beinist að innhringendum og skoðunum þáttastjórnenda,  Arnþrúðar Karlsdóttur og Péturs Gunnlaugssonar.

  Ein gagnrýnin snýst um það að sama fólkið hringi endalaust inn í þáttinn og endurtaki sömu skoðanir daglega.  Þegar betur er að gáð eru fastir (daglegir) innhringendur hlutfallslega fáir. En vissulega verða hlustendur varir við menn eins og Guðjón fyrrum leigubílstjóra (anti-landsbyggðarmann,  anti-Breiðhylting og anti-hitt og þetta),  Karl "talnatrúð" (uppnefnið er ekki beinlínis neikvætt heldur er hann talsmaður verðtryggingar og þylur upp endalausar tölur upp á krónur og aura.  Það er dálítið þreytandi.  Það væri til bóta ef hann "rúnnaði" af tölur í þúsundum),  Alvar (iðulega skemmtilegur),  Árna Björn (ESB sinna) og fleiri. 

  Uppistaðan í símatímunum er samt innhringendur sem hringja sjaldan og er með hinar ýmsu skoðanir.  Að einhverju leyti þverskurður af því sem fólk er að spjalla um í heitum pottum sundlauganna.

  Það er ekkert neikvætt við að sjórnendur  Línan er laus  hafi skoðanir á því sem hæst ber í umræðunni.  Það er bara gott.  Stundum er maður sammála þeirra skoðunum.  Stundum ekki.  Hlustendur vita hvar þau Arnþrúður og Pétur standa.  Það er kostur.

  Símatímarnir eru ekki stór hluti af fjölbreyttri dagskrá Útvarps Sögu.  Á undan símatímunum er 2ja klukkutíma morgunþáttur Markúsar frá Djúpalæk og Erlings.  Þeir fá einatt í heimsókn til sín áhugavert fólk úr ýmsum áttum með alls konar skoðanir.  Sjálfur hef ég komið þarna í viðtal og haft frá mörgu að segja.

  Í hádeginu er dagskrárliður sem heitir  Skoðun dagsins.  Þar flytja pistla Guðmundur Óli Scheving,  Eiríkur Stefánsson,  Jón Valur Jensson og Baldur Ágústsson,  fyrrum forsetaframbjóðandi.  Kannski einhverjir fleiri sem ég man ekki eftir í fljótu bragði.  Þeir hafa ólíkar skoðanir um margt.  Það er kostur.  

  Síðdegis í dagskrá Útvarps Sögu eru meðal annars dagskrárliðir á borð við  Bixið  með Höskuldi Höskuldssyni;  heilsuþáttur Torfa Geirmundssonar og Guðnýjar í Heilsubúðinni í Hafnarfirði;  þáttur Jóns Magnússonar um verðtryggingu;  sjávarútvegsþáttur Grétars Mars;  þáttur sem kallast ESB já eða nei;  þáttur Tryggva Agnarssonar - og annars til sem ég man ekki ekki hvað heitir - um lagarök og stöðu skuldara;  og bara ýmsir þættir sem ég man í augnablikinu ekki eftir.  Jú,  Magnús Magnússon (Diskótekið Dísa) spilar gömul íslensk dægurlög og spjallar við Geirmund Valtýsson,  Garðar Guðmundsson,  Lúdó og fleiri slíka. 

  Þáttur Höskuldar er oft verulega áhugaverður.  Fyrir minn smekk náði hann hæsta flugi í þáttaseríu um The Rolling Stones.  Þar var saga The Rolling Stones rakin með aðstoð Ólafs Helga,  sýslumanns. Þeir Höskuldur og Ólafur Helgi voru á góðu flugi og spiluðu m.a. sjaldgæfar upptökur með The Rolling Stones.  

  Ég er ekki búinn að telja upp nema hluta af áhugaverðri dagskrá Útvarps Sögu.  Útvarp Saga er þjóðarútvarp.  Þjóðin fær að tjá sig og þjóðin hlustar.

  Tekið skal fram að ég tengist Útvarpi Sögu ekki á neinn hátt.  Þetta er útvarpsstöð sem ég hlusta mikið á mér til fróðleiks og gamans.  Hún er ekki yfir gagnrýni hafin.  Hún speglar það sem þjóðinni liggur á hjarta og ólíkar skoðanir.  Það er kostur.  Það er gott fyrir lýðræði í víðtækustu merkingu.  

  Án Útvarps Sögu væri umræðan fátæklegri.

  Í myndbandinu fyrir ofan getur að heyra "súpergrúppuna" Dirty Mac með John Lennon (Bítlarnir) og á bassa Keith Richards  (The Rolling Stones). Hljóðrásin er örlítið "út úr zinki".  En blúsinn er flottur.

  The Rolling Stones smávegis falskir í upphafi lagsins.  En ná sér á strik þegar á líður.

  

Listi yfir bestu lönd í heimi

  42 þúsund manns víðs vegar að í heiminum hafa kveðið upp dóm yfir jákvæð og neikvæð viðhorf sín til hinna ýmsu landa.  Niðurstaðan er assgoti áhugaverð.  Það er gaman að bera listann saman við sín eigin viðhorf.  42 þúsund manns geta ekki haft rangt fyrir sér.  Tekið var tillit til margra þátta,  allt frá mati á lífsgæðum í viðkomandi löndum og framkomu íbúann til hagkerfis landanna og stjórnmála.  Gefnar voru einkunnir frá 0 upp í 100.  Löndin í efstu 8 sætunum eru með yfir 70 í meðaleinkunn.  Þar af er Kanada með meðaleinkunnina 74,8.  Löndin í 9. til 18.  sæti eru með yfir 60 í meðaleinkunn.  

  Einhverra hluta vegna er Ísland hvergi að finna á listanum yfir löndin með besta orðspor.  Guðirnir blessi Ísland.  Svo er vitaskuld allt morandi af Íslendingum í Kanada.  Rétt eins og í Svíþjóð,  Noregi og Danmörku.  Það telur.

1   Kanada

.

2   Svíþjóð

.

3   Ástralía

.

4   Sviss

.

5   Nýja Sjáland

.

6   Noregur

.

7   Danmörk

.

8   Finnland

.

9   Austurríki

10  Holland

11  Þýskaland

12  Japan

13  Belgía

14  Ítalía

15  Bretland

16  Spánn

17  Írland

18  Frakkland

19  Portúgal

20  Singapúr

Pizza með matarleifum

  Við köllum hana á rammíslensku flatböku.  Í daglegu tali er hún þó oftast kölluð pizza (framborið pitsa).  Það er vegna þess að sjaldnast nær rammíslenskt orð að festa sig í sessi ef það er 3ja atkvæða en erlenda orðið 2ja atkvæða. Sú er ástæðan fyrir því að Íslendingar tala um bíl í stað sjálfrennireiðar.

  Uppruni pizzunnar er sennilega ítalskur.  Þar var hún og er ennþá fátækramatur.  Þetta er flöt hveitibrauðsskífa,  bökuð með tómatsósu, osti,  smávegis af kjöti og grænmeti.  Þetta er ómerkilegur matur.  Ef mat skyldi kalla. 

  Á nútíma íslensku heimili fyllist ísskápur iðulega af matarafgöngum:  Rest af sunnudagssteik,  brúnni kjötsósu,  kjúklingsrifrildi og allskonar.  Að tveimur eða þremur dögum liðnum er þessu hent í ruslið.  Það er sóun.  Matarleifar eru í góðu lagi í 3 daga í ísskáp.  Að öllu jöfnu ef þær hafa verið settar þangað strax eftir að borðhaldi lýkur. 

  Þá er ráð að útbúa pizzu með matarleifunum.  Fletja út pizzudeig sem fæst í öllum matvöruverslunum.  Skella á það vænni slummu af pizzasósu (tómatssósugumsi), öllum matarleifum og hvítlauksolíu.  Hella yfir það rifnum osti og baka í ofni.  Þetta er veislumatur.  Fátækir Ítalir myndu ískra af gleði ef þeir kæmust í svona góðgæti.  Þeir myndu góla í gleðilátum. 

Gömlu skónum breytt í nýja

  Allir kannast við það erfiða vandamál að fá leiða á gömlu skónum sínum.  Skórnir sem lengi vel voru uppáhalds skórnir eru skyndilega orðnir þreytulegir og glæsibragurinn sem geislaði af þeim er horfinn eins og dögg fyrir sólu.  Þá er til gott ráð.  Það er ódýrt og einfalt.  Það eina sem þarf að gera er að skipta um reimar á skónum.  Nýju reimarnar þurfa að vera rauðar eða appelsínugular eða í öðrum áberandi lit.  Nýju reimarnar stela allri athyglinni.  Það skiptir ekki máli hvort þetta eru svartir spariskór eða strigaskór.  Þetta eru orðnir nýir skór.  Allir dáðst að þeim. 

 

Veiddu risafisk með berum höndum

  Þeir ætluðu aðeins að skjóta sér til matar nokkrar endur og gæsir.  Þá sáu þeir einhverja stóra skepnu ofarlega í vatnsfletinum.  Fyrst héldu þeir að þetta væri selur.  Þeir voru í svo miklum veiðiham að fyrstu viðbrögð voru að ná kvikindinu.  Í ákafanum höfðu þeir ekki rænu að skjóta það.  Þeir notuðu aðeins berar hendur til að fanga skepnuna.  Þá kom í ljós að þetta var 23ja kílóa tunglfiskur.  Eða ég held að það sé íslenka heitið á honum.  Á dönsku heitir hann klumpfiskur.  Þetta var í Danmörku.   

  Fiskurinn var eins og hálf ringlaður og utan við sig.  Hugsanlega vangefinn.  Veiðimennirnir ætluðu að gefa fisknum frelsi á ný.  En þeir voru enn í gríðarlegum veiðiham og gleymdu sér við að skjóta gæsir og endur.  Þegar veiðihamurinn rann af þeim var fiskurinn hinsvegar dáinn.  Þá var ekki um annað að ræða en skella honum í frystikistu.  Hvað verður um líkið er óvíst á þessari stundu.  Kannski verður hann stoppaður upp til minningar um skemmtilega veiðiferð.      

Óvenjuleg nýbreytni

  Allir kannast við að þegar greiðslukort af einhverjun tagi er notað þá er gjaldfærð önnur upphæð en sú sem úttekt nemur.  Það er gaman.  Það er fjölbreytni.  Það er skemmtilegur samkvæmisleikur að fá endanlegt uppgjör frá greiðslukortafyrirtækjum og reyna að fá það til að stemma nokkurn veginn við úttektir.

  Sú óvenjulega nýbreytni hefur verið tekin upp hjá bensínfyrirtæki sem ég skipti við að við sjálfsala þess hafa verið settir upp límmiðar með textanum "Einungis er gjaldfærð sú upphæð sem dælt er fyrir."   

Spennandi plata

  Núna í lok septembermánaðar kemur út í Bandaríkjum Norður-Ameríku platan  Note of Hope.  Þar flytja margir af þekktustu popptónlistarmönnum Bandaríkjanna söngva Woodys Guthtries.  Þeirra á meðal eru Lou Reed,  Jackson Browne,  Tom Morello (Rage Against the Machine),  Michael Franti (Beatnigs,  Spearheads) og Ani Di Franco.   

  Það er bassasnillingurinn og Grammy-verðlaunahafinn Rob Wasserman sem heldur utan um dæmið.  Hann hefur m.a. spilað með Neil Young,  Brian Wilson,  Elvis Costello,  Stephane Grappelli,  Jerry Carcia (Grateful Dead) og Ricky Lee Jones. 

  Woody Guthrie er eitt af stærstu nöfnum bandarískarar vísnatónlistar (folk).  Hann er stundum kallaður faðir bandarískrar þjóðlagatónlistar.  Hann fæddist snemma á síðustu öld og dó 1967 eftir að hafa legið rúmfastur og lamaður í meira en áratug.  Hann var og er mikill áhrifavaldur og fyrirmynd Bobs Dylans,  U2,  Bruce Springsteens, Joes Strummers (The Clash),  Billys Braggs,  Bubba Morthens,  Megasar og margra fleiri.

  Söngvar hans hafa verið krákaðir af allt frá Johnny Cash til þungarokkara á borð við Nazareth.

  Þekktasta lag Woodys er sennilega  This Land Is Your Land  sem var flutt af Bruce Springsteen og fleirum við innsetningu Husseins Obama í embætti forseta Bandaríkjanna.  Frjálshyggjugrallarinn Mojo Nixon flytur það hér í myndbandinu efst. 

  Woody Guthrie var Jesú-kall,  verkalýðssinni,  anti-rasisti,  anti-fasisti og alvöru farandssöngvari.  Flakkaði stöðugt um Bandaríkin,  rótlaus og í stöðugri uppreisn.  Honum buðust ótal tækifæri:  Að stjórna útvarpsþáttum,  syngja inn á plötur hjá plöturisum og annað í þeim dúr.  En hann lét hvergi að stjórn.  Stakk óvænt af og fór á flakk.

  Hann stakk líka ítrekað af frá konum sínum 3 og eignaðist 8 börn.  Sonur hans,  Arlo Guthrie,  varð eitt af stóru nöfnum Woodstock kynslóðarinnar.

  Skemmtilegt að rifja upp:  Fyrir nokkrum árum bankaði Arlo óvænt upp hjá Rúnari Júlíussyni í Keflavík.  Þeir höfðu hist í hljóðveri í Bandaríkjunum mörgum árum áður og varð vel til vina.  Rætur þeirra lágu í tónlist Woodys, Bobs Dylans og fleiri.  Það varð þó ekki framhald á samskiptum þeirra.  Þangað til Arlo flaug hingað í einkaþotu til þess eins að heilsa upp á Rúnar.  Andlitið datt af Rúnari.  Honum þótti með ólíkindum að Arlo kynni nafn hans og myndi eftir að hann byggi í Kerflavík.  Þeir snæddu saman á veitingastað og Arlo stakk upp á því að þeir myndu gera saman plötu.  Svo féll Rúnar frá áður en lengra var haldið.

  Þó að fjöldi söngva Woodys séu vel þekktir þá var aðeins eitt sem náði toppsæti bandaríska vinsældalistans.  Það var  Oklahoma Hills  í flutningi frænda hans,  Jackie Guthrie.  Sá skráði sig fyrir laginu.  Woody þurfti að ná höfundarréttinum fyrir atbeina dómsstóla.  Annars var Woody ekki upptekinn af höfundarrétti.  En í þessu tilfelli var honum misboðið.  Woody vann málið og var ósáttur við frænda sinn.  Í dag er þetta lag sennilega þekktast í flutningi Jimi Reeves:

  Flottasta bandaíska hljómsveit Bandaríjanna,  Wilco,  sendi fyrir nokkrum árum frá sér 2 plötur með söngvum Woodys og var tilnefnd til Grammy-verðlauna fyrir þær báðar.  Með í dæminu var breski vísnapönkarinn Billy Bragg.  Þetta er dáldið Utangarðsmannalegur blús. 

  Aðrir sem kráka söngva Woodys Guthries á plötunni sem um ræðir og hafa ekki verið nefndir eru:  Van Dyke Parks (meðhöfundur margra Beach Boys laga,  vann með The Byrds,  U2 og ótal öðrum stórum nöfnum);   Madeleine Peyroux (þekkt fyrir flutning á söngvum eftir Leonard Cohen,  Bob Dylan og Hank Williams.  Hún hefur verið kölluð Billie Holyday 21. aldarinnar);  djassboltinn Kurt Elling (nífaldur Grammy-verðlaunahafi.  Kannski þekktastur fyrir að spila með blúsaranum Buddy Guy og Smashing Pumpkins forsprakkanum Billy Corgan);  Studs Terkel (hann er dáinn en er kannski þekktastur fyrir bókina Giants of Jazz);  Nellie McKay (sló í gegn í uppfærslu á  Túskildingsóperu  Kurts Weills og Bertholds Brechts í Bandaríkjunum 2006);  Chris Whitley (blúsgítarleikari sem féll frá 2005);  Pete Seeger (150 ára gamall vísnasöngvari);  og banjóleikarinn Tony Trischla (hefur m.a. spilað með Paul McCartney og Steve Martin). 

  Vegna þess að Studs og Chris eru fallnir frá má ætla að um gamlar hljóðritanir með þeim á söngvum Woodys Guthries sé að ræða.  Annað kæmi á óvart.

Hljómsveit sendir kirkju hommahatara tóninn

 

  Í frétt mbl.is af íslenskum tökustjóra bandarísku gruggsveitarinnar Nirvana er hann sagður heita Ágúst Bjarnason.  Ég hef sterkan grun um að þessi sonur Húnvetningsins Kobba sé Jakobsson.  Ég veit ekki hvaða Bjarna er þarna blandað inn í dæmið.   Ég þarf að spyrja Kobba vin minn út í það.  Ég er ekki viss um að hann viti af þessu með Bjarna.  Ágúst hefur unnið með mörgum fleiri súperstjörnum en Nirvana og Guns ´N´ Roses.  Hann gerði til að mynda myndbandið fræga og flotta við ballöðuna  Hollywood með Hebba Guðmunds.

  Seattle-hljómsveitin Nirvana var meðal annars þekkt fyrir hæðni í garð hommafælinna.  Framvörður hljómsveitarinnar,  Kurt Cobain,  var eitt sinn handtekinn fyrir að mála með úðabrúsa "God is gay" á vegg.  Í annað skipti fóru hann og bassaleikarinn í sleik í sjónvarpsútsendingu.  

  Trommari Nirvana,  Íslandsvinurinn Dave Grohl,  heldur uppteknum hætti.  Núna fer hann fyrir hljómsveitinni Foo Fighters.  Á dögunum brugðu liðsmenn Foo Fighters sér í gervi rauðhálsa Suðurríkjanna (rednecks) og sprelluðu í hommahöturum Westboro Baptist Church.  Sá söfnuður hatar einnig Barack Hussein Obama,  forseta Bandaríkjanna, og telur hann vera Anti-Krist (eins og 40 milljónir landa sinna).  Þá er aðeins fátt upp talið af því sem kirkja þessi hatar.  Mannréttindaráð  Reykjavíkur myndi ekki leggja blessun sína yfir fjáraustur úr borgarsjóði í þessa kirkju.

  Í meðfylgjandi myndbandi kastar Dave Grohl kveðju á haturssöfnuðinn.  Í millikafla leggur Dave út af bandaríska þjóðsöngnum og segist síðan ekki fara í manngreinaálit eftir húðlit fólks,  eða hvort það sé Pennsylvaníar (les:  Frá Pennsylvaniu) eða Transylvaníar (les:  Fengið kynleiðréttingu),  Lady Gaga eða Lady Antebellum;  konur elski konur eða kallar elski kalla.

  Vegna ofurvinsælda Foo Fighters hafa fjörleg samskipti hljómsveitarinnar við haturskirkjuna vakið mikla athygli.

     

 

Íslendingur tökustjóri hjá Nirvana

Alveg með ólíkindum!

  Hvað voru blessaðar skepnurnar að pæla?  Hvernig í ósköpunum enduðu þær í þessum undarlegu aðstæðum?  Þetta er meiriháttar dularfullt.

Vilja ekki vinna við slátrun

Kraftmiklar ólukkukökur

  Hver kannast ekki við ofursterka löngun til þess að láta allt ganga á afturfótum hjá einhverjum?  Það er svo auðvelt að láta þá ósk rætast.  Það eina sem til þarf er þetta: 

.

5 og hálft egg

912 gr smjörlíki

17,6 dl hveiti

2 og hálf teskeið matarsódi

2 og hálf teskeið vanilludropar

2 og hálf teskeið salt

31 matskeið púðursykur

29 matskeiðar strásykur

10 dl súkkulaðispænir

.

  Þetta er hrært rangsælis saman í einu og sömu skál.  Það má nota sömu teskeiðina til að mæla matarsódann,  vanilludropana og saltið.  Sömu teskeið má nota til að setja smá klessur af deiginu með góðu millibili á bökunarplötu.  Platan er sett efst í ofn í 9 mínútur og 33 sek.  Gott er að hafa kveikt á ofninum.  Svo gott.  Best er að hafa hann 180° heitan.

  Kökurnar þurfa að kólna á plötunni í 6 mín og 12 sek áður en þær eru fjarlægðar þaðan með silfurlitum kökuspaða.   

  Um leið og hvert og eitt hráefni er mælt skal nefna höstuglega og ákveðið nafn tilvonandi ólukkukráku og flétta saman formælingum ásamt áhrínisorðum.  Til að mynda:  "Svei þér,  Jói Jóns!  Megir þú gleyma að skola sjampó úr hárinu á þér!  Þú skalt detta í öllum tröppum og rúlla niður þær,  aumingi!  Farðu í krummafót og úthverfa úlpu og dottaðu á rauðum ljósum,  ræfill!"

  Halda verður áfram að þylja upp í þessum dúr alveg þangað til kökunum hefur verið komið fyrir í kökuboxi.  Þá skal heimsækja viðkomandi með boxið.  Rétt áður en rennt er í hlað hjá honum er upplagt að opna boxið rétt sem snöggvast og hnykkja á formælingunum yfir kökurnar.

  Þegar viðkomandi opnar útidyrnar hjá sér kemur best út að brosa sínu blíðasta og segja:  "Hérna,  elskan mín.  Ég var að baka kökur.  Mér varð svo sterkt hugsað til þín á meðan að ég bara varð að færa þér þessar.  Njóttu vel á meðan þær eru svona nýbakaðar."

  Svo er að forða sér á hlaupum áður en viðkomandi fær sér kökur,  missir kaffibollann sinn og dettur á sjónvarpið.

.

  Hugsanlega er hægt að afgreiða svona kökur með öfugum formerkjum.  Það er að segja fara ástúðlegum og hlýjum orðum um einhvern ásamt því að þylja upp uppbyggileg fyrirmæli.  En það gerir náttúrulega enginn.

Rauðhálsinn reddar þessu

  Í fyrravetur setti ég hér á bloggið nokkrar ljósmyndasyrpur undir fyrirsögninni "Kallinn reddar þessu" eða eitthvað álíka.  Myndirnar sýndu skemmtileg dæmi um það hvernig handlagnir menn höfðu lagfært bilaða hluti með reddingum án þess að leggja mikið upp úr útliti hlutanna eftir lagfæringuna.

  Þessu má fletta upp á:

http://jensgud.blog.is/blog/jensgud/entry/1147213/

http://jensgud.blog.is/blog/jensgud/entry/1099144/

  Þetta vakti mikla kátínu.  Ég er ítrekað beðinn um framhald á þessum færslum.  Það er mér ljúft og skylt.

  Mér var bent á þá skemmtilegu tilviljun að uppistaðan af myndunum væri sótt til svokallaðra rauðhálsa.  Það er því við hæfi að tileinka þeim eina svona seríu.  

  .

  Rauðhálsar (rednecks) eru fátækir hvítir bændur í syðstu ríkjum Bandaríkjanna.  Það eru ýmsar skýringar á nafngiftinni.  Sú algengasta vísar til sólbrunninna hálsa bograndi manna við landbúnaðarstörf.  

.

  Steríótýpan af rauðhálsi í dag er frekar neikvæð.  Utan Suðurríkjanna er haldið úti fjölda grín-netsíðna um rauðhálsa.  Þar er safn brandara af því tagi sem við köllum Hafnarfjarðarbrandara. 

  Sannir rauðhálsar eru hinsvegar stoltir af sér og sínum.  Þeir eru stoltir af því að lifa í núinu.  Taka einn dag í einu.  Tíminn er ekkert til að stressa sig á.  Rauðhálsinn tjakkar kannski upp bilaða pallbílinn sinn í dag án þess að huga frekar að viðgerð fyrr en 10 árum síðar.  Eða þá að rauðhálsinn lagfærir eitthvað til bráðabyrgða og endanleg viðgerð bíður betri tíma - sem getur verið eftir mörg ár.  Eða aldrei.

  Rauðhálsinn er ekki upptekinn af nýjustu tísku í fatnaði eða hárgreiðslu eða öðru.  Þegar hann vill vera virkilega fínn (til að mynda er hann gengur í hjónaband) þá dressar hann sig upp í fatnað sem var í tísku fyrir áratugum eða fær sér "sítt að aftan" hárklippingu.  Það er stællinn að túpera hárið í sem hæstar hæðir.  Rauðhálsinn er ekkert upptekinn við að fylgjast með heimsmálum eða öðru utan síns túngarðs.  Hann hefur ekki frétt af dauða Elvis Presleys og heldur að Ronald Reagan sé ennþá forseti.     

.

  Rauðhálsinn er stoltur af því að styðja klessubíl númer 3.

.

  Rauðhálsinn elskar Budweiser.  Tannhirða er honum framandi.  Enda er hann ekki með neinar tennur til að hirða eftir að unglingsárum sleppir.  

. 

  Rauðhálsarnir elska útibað.  Þá fjölmenna þeir með bjórdósirnar sínar,  fara 2 og 2 í einu í baðkarið og halda vatninu heitu yfir opnum eldi.

.

  Það er ástæðulaust að fjárfesta í kæli þegar rauðhálsinn á þvottavél.

.

  Það er ástæðulaust að fjárfesta í útigrilli þegar rauðhálsinn á klósett.

.

  Rauðhálsinn notar ekki málband.  Hann mælir veiði sína með bjórdósum.  Hér hefur hann landað 7 dósa geddu. 

.

  Rauðhálsarnir slaka á í heita pottinum.  Það eina sem til þarf er pallbíll,  stórt byggingarplast og heitt vatn. 

.

 

  Hér er gantast með kráku Texas-alt-kántrý boltans Steve Earle á frábæru lagi Nirvana,  Breed.  Það er vísað til innræktunar (skyldleikaæxlunar) sem loðir við rauðhálsa.  Hún er að mestu bundin við fjallalalla (hillbillies).  Þar er innræktun vandamál.

Færeyski Kínamúrinn

  Margir hafa heyrt talað um Kínamúrinn (gætið þess að rugla honum ekki saman við Kínakúrinn).  Hann er frægasti múr eða garður í heimi.  Miklu frægari en Berlínarmúrinn sálugi og aðskilnaðarmúrinn í Palestínu.  Á tímabili var því haldið fram í kennslubókum að Kínamúrinn væri eina mannvirkið sem sæist frá tunglinu.  Kínverjar könnuðu málið og fundu út að þetta var þýðingarvilla.  Kínamúrinn sést utan úr geimnum en ekki alla leið frá tunglinu.

  Á frummálinu heitir Kínamúrinn 長城 eða eitthvað álíka.  Á ensku heitir hann The Great Wall of China (gætið þess að rugla nafninu ekki saman við lagið  The Great Balls of Fire  með Jerry Lee Lewis).  Ég kalla hann Stóragarð.  Það er vegna þess að í Þórshöfn í Færeyjum er svipaður garður sem heitir Stórigarður.  Miðað við höfðatölu er færeyski Kínamúrinn miklu stærri og merkilegri en sá kínverski.  Og miklu flottari.  Fellur betur að landslaginu og setur sterkan og skemmtilegan svip á Þórshöfn.

  Ég er kominn út fyrir umræðuefnið.  En það er allt í lagi.  John Lennon sagði að lagið  Whole Lotta Shakin' Going on  með Jerry Lee Lewis væri fullkomnasta lag rokksögunnar:

Ókeypis plata! Gjörðu svo vel! Assgoti áhugaverð og merkileg!

 

 

 

 

 

 

 

 

 

  Annað tveggja söluhæsta bandaríska poppmúsíktímaritið er Spin.  Það söluhæsta er Rolling Stone,  sem jafnframt er söluhæsta poppmúsíktímarit heims.  Spin spriklar stöðugt.  Núna í tilfefni af 20 ára afmæli plötunnar  Nevermind  með Nirvana.  Plötunni sem kippti grugginu (grunge) upp á yfirborðið og negldi það í toppsæti vinsældalista út um allan heim. 

  Spin-liðar hafa smalað saman í einn pakka krákum af öllum lögunum á  Nevermind.  Meðal flytjenda eru hljómsveitirnar The Meat Puppets og The Vaselines.  Nirvana krákaði lög frá þeim á plötu sinni  MTV Unplugged in New York. Skemmtileg tilviljun.  Önnur skemmtileg tilviljun er að flutningur The Vaselines ber sterkan Bítlakeim.  Kurt Cobain var frá 2ja ára aldri forfallinn Bítlaaðdáandi.

  Þú getur eignast þessa Spin-plötu,  Newermind.  Hún er ókeypis.  Það eina sem þú þarft að gera er að smella á þennan hlekk:  http://www.spin.com/articles/free-album-spin-tribute-nirvanas-nevermind  og síðan á "Enter E-mail and Download.  Þá færðu í netfangið þitt sendan hlekk.  Þú smellir á hann og platan er þín.  Þú þarft ekkert að hafa keypt eintak af tölublaðinu sem platan fylgir eða vera áskrifandi að tímaritinu.  Þetta er ókeypis fyrir alla.  

  Þetta er dúndur áhugavert dæmi. 

Skúbb! Íslensk hljómsveit með spennandi útgáfusamning í Bandaríkjunum

  Það er skammt stórra högga á milli hjá hljómsveitinni Q4U.  Stigvaxandi vinsældir hljómsveitarinnar hérlendis og enn fremur erlendis eru heldur betur að hlaða utan á sig þessa dagana.  Ef svo heldur áfram sem horfir verður þess ekki langt að bíða að Q4U verði ein allra söluhæsta íslenska hljómsveit sögunnar. 

  Í síðasta mánuði gaf eitt stærsta brasilíska plötufyrirtækið,  Wave Records,  út safnplötu þar í landi með Q4U,  Q4U: Best Of  (sjá www.jensgud.blog.is/blog/jensgud/entry/1183818/ ).  Plötunni hefur verið gífurlega vel tekið og útgefandinn þrýstir mjög hart á hljómsveitina að koma í hljómleikaferð til Brasilíu. 

  Svo skemmtilega vill til að á sama tíma eru hljómleikahaldarar í Þýskalandi og Bandaríkjunum að suða í Q4U um hljómleikahald á þeirra slóðum.  Q4U á harðsnúinn aðdáendahóp í Þýskalandi og hefur selt margfalt fleiri eintök af íslensku safnplötunni sinni þar en hérlendis. 

  Spurn eftir hljómleikum með Q4U í New York má sennilega að einhverju leyti rekja til útgáfu plötunnar í Brasilíu.

  Nú var Q4U að berast girnilegt tilboð frá bandarísku plötufyrirtæki,  Dark Entries, um útgáfu í Bandaríkjunum.  Það er hugur í fyrirtækinu og margt spennandi í pokanum.  Meðal annars vill það byrja á því að gefa út vinylplötu með hljómsveitinni. 

  Bandaríski plötusamningurinn kom jafn óvænt og brasilíski plötusamningurinn.  Útgefandinn er á engan hátt tengdur þeim sem vilja fá Q4U til hljómleikahalds í Bandaríkjunum.  Útgefandinn rakst á eitthvað með Q4U á netinu og hefur um nokkurt skeið reynt að ná sambandi við liðsmenn hljómsveitarinnar.  Það gekk ekki fyrr en núna í vikunni.

  Skýringuna á vinsældum Q4U erlendis má að einhverju leyti rekja til fyrirbæris sem kallast naum-bylgjan (minimal wave).  Hún nær yfir nákvæmlega músíkstíl Q4U,  söngrænt (melódískt) synth-goth-pönk af gamla skólanum (að hætti nýbylgjuhljómsveita pönkbyltingarinnar á seinni hluta áttunda áratugarins og upphafi níunda áratugarins).  Þessi músíkstíll var aðeins skilgreindur sem nýbylgja þangað til 2005.  Þá hóf göngu plötufyrirtækið Minimal Wave sem sérhæfir sig í útgáfu platna í naum-bylgjustíl.

  Aðdáendur naum-bylgjunnar eru ekki mjög fjölmennir í samanburði við aðdáendahóp þungarokks eða blúss.  En halda þeim mun betur hópinn á netsíðum og víðar,  skiptast á upplýsingum og benda hver öðrum á spennandi hljómsveitir.

  Til gamans má geta þess að það er fyrir löngu síðan uppselt á hljómleika Q4U á Airwaves.  Þangað hafa fjölmargir erlendir blaðamenn boðað komu sína.  Þá er brasilíska platan komin í sölu í 12 tónum.