Íslenska lopapeysan

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

  Fátt er íslenskara en íslenska lopapeysan.  Ullarpeysa prjónuð af alúð og ástríðu með rammíslenskum höndum.  Prjónuð úr rammíslenskri ull af rammíslenskum kindum.  Prjónuð með rammíslensku tvílitu mynstri.  Þröngt hálsmál er einkenni og lykill að því að hún haldi góðum hita á kroppnum í norðangarranum.  Hún er stolt Íslands,  skjöldur og sverð.  

  Vegna góðs orðspors,  vinsælda og virðingar íslensku ullarpeysunnar er góður hrekkur að smána ómerkilega útlendinga með því að gefa þeim ljóta og kjánalega fjöldaframleidda kínverska ullarpeysu.  Ljúga í þá að þetta sé íslensk ullarpeysa.  Niðurlæging þiggjandans er trompuð með alltof stóru hálsmáli.  Honum er sagt að klæða sig í peysuna eins og pilsi:  Fara fyrst með fætur ofan í hálsmálið og hífa hana síðan upp um sig.  Aðalbrandarinn er sá að þiggjandinn fatti ekki að verið sé að hafa hann að fífli.  Það er endalaust hlegið að vesalingnum. 

Færeysku tónlistarverðlaunin

  Í vikunni voru færeysku tónlistarverðlaunin afhent við hátíðlega athöfn. Þau kallast FMA.  Eins og einhvern grunar þá er það skammstöfun.  Stytting á Faroese Music Awards. Ýmsar opinberar stofnanir og einkafyrirtæki standa að FMA.  Ekkert er til sparað svo allt fari sem best fram.  Svo sannarlega tókst það.  

  Athöfnin tók næstum þrjá klukkutíma.  Allt mjög glæsilegt og fagmennska fram í fingurgóma:  Boðið var upp á fjölbreytt tónlistaratriði á milli verðlaunaafhendinga og rætt við tónlistarfólk.  Tveir kynnar fóru á kostum og geisluðu af öryggi.  Laumuðu lúmskum bröndurum inn á milli fróðleiksmola.  

  21 verðlaunagripur var afhentur.  Spenna var gríðarmikil.  Tugir voru tilnefndir.  Þar af var Eivör tilnefnd í fimm flokkum.  Hún landaði fjórum verðlaunum:  

  -  Flytjandi ársins 2015

  -  Söngkona ársins

  -  Plata ársins (Bridges / Slör)

  -  Bestu plötuumbúðir ársins

  Systir Eivarar,  Elínborg,  hlaut verðlaun sem "Besti flytjandi á sviði".  

  Eiginmaður Eivarar,  Tróndur Bogason,  landaði verðlaunum sem "Upptökustjóri ársins". 

  Vísnasöngkonan Annika Hoydal kom fast á hæla Eivarar.  Hérlendis er Annika þekktust sem söngkona Harkaliðsins. Hún á einnig farsælan sólóferil.  Verðlaun Anniku voru í riðlinum "Þjóðlagatónlist,  sveitasöngvar og blús".  

  -  Söngvari ársins

  -  Plata ársins (Endurljós)

  -  Heiðursverðlaun 

  Að auki var Gunnar Hoydal,  höfundur texta á ýjustu plötu hennar, verðlaunaður "Textahöfundur ársins".

 

  Aðrir verðlaunahafar:

  -  Marius:  "Besta lag ársins" (Going home) og "Karlsöngvari ársins".  

  -  Hamferð:  "Myndband ársins" (Deyðir varðar)

  -  Hallur Joensen:  "Lag ársins" (Livið er ein lítil löta) í riðlinum "Þjóðlagatónlist,  sveitasöngvar og blús"

  -  Sunleif Rasmusen:  "Besta platan" (Territorial songs) í Opnum flokki og "Tónskáld ársins".

  -  Kammerkór Þórshafnar: "Kór ársins"

  -  Jensína Olsen:  "Söngvari ársins" í Opnum flokki. 

  -  Loftbrú:  "Viðburður ársins"

  -  Punjab:  "Nýliðar ársins" og "Hljómsveit ársins"

  Svo skemmtilega vill til að flestir verðlaunahafa eru Íslendingum að góðu kunnir;  Marius hefur margoft spilað hérlendis. Átti að auki vinsælt lag með Svavari Knúti fyrir tveimur árum,  "Þokan".  Það dvaldi lengi í efstu sætum vinsældalista Rásar 2.

  Hamferð er ein best kynnta færeyska þungarokkshljómsveit á Íslandi.  Túraði um landið með Skálmöld um árið.

  Kántrýkóngurinn Hallur Joensen gladdi Íslendinga með sveitasöngvum fyrir tveimur árum. 

  Sunleif er hátt skrifaður í klassísku deildinni á Norðurlöndum. Hefur hlotið Tónlistarverðlaun Norðurlandaráðs og tónverk hans hafa verið flutt hérlendis.

  Loftbrú er hliðstæð íslensku Loftbrúnni:  Samstarfsverkefni opinberra stofnana og einkafyrirtækja til að auðvelda innlendum listamönnum að koma sér á framfæri erlendis.  Munurinn er sá að íslenska Loftbrú styður við tónlistarmenn en sú færeyska einnig við aðra listamenn.    

Hvar er best og verst fyrir stelpur að alast upp?

 

 

 

 

 

 

 

 

  Ég hef komist í skýrslu yfir bestu og verstu lönd fyrir stelpur að alast upp í.  Tekið er inn í útreikninginn allt frá líkum á að deyja við barnsburð til möguleika á skólagöngu og allt þar á milli.  Líka landsframleiðslu á mann og hlutfall kvenna í launavinnu í samanburði við karla.  Og svo framvegis.  Þetta eru vandaðir útreikningar.

  Niðurstaðan kemur ekki eins og þruma í heiðskíru veðri.

  Verstu löndin eru þessi (ekki góðar fréttir fyrir Afríku):

1  Nígería

2  Sómalía

3  Malí

4  Mið-Afríku lýðveldið

5  Jemen 

6  Kongó

7  Afganistan

8  Fílabeinsströndin

9  Chad

10 Kamerún

  Langbestu löndin eru þessi (góðar fréttir fyrir Norðurlöndin):

1  Noregur

2  Svíþjóð

3  Danmörk

4  Ísland

5  Finnland

6  Holland

7  Ástralía

8  Nýja-Sjáland

9  Sviss

10 Belgía

Athyglisþörf fjöldamorðingja

  Norðmenn hafa tekið aðdáunarlega vel á eftirmálum fjöldamorða hægri róttæklingsins Anders Breiviks. Í baráttu gegn fjölmenningu myrti hann 77 manns.  Þar af flesta í ungliðahreyfingu Verkamannaflokksins.

  Alveg frá hryðjuverkadeginum hafa Norðmenn sýnt stillingu og yfirvegun.  Rík áhersla hefur verið lögð á að fjöldamorðin breyti engu um norska réttarríkið.  Engum verklagsreglum né lögum verði breytt.  Mannúðlega lýðræðisríkið standi óbreytt.  Vonir glæpamannsins um annað hafa ekki ræst.

  Auðvitað óska margir Breivik alls hins versta.  Það má meðal annars lesa í athugasemdakerfum íslenskra netmiðla.

  Ókosturinn er sá að Breivik er tekinn mjúkum höndum.  Hann fær að baða sig í kastljósi fjölmiðla.  Það er við fjölmiðla að sakast.  Þeir fullnægja athyglisþörf hans með myndbirtingum af honum og yfirlýsingum hans.  Heppilegra væri að þeir veittu honum litla sem enga athygli. Í fangelsinu fær hann að lesa dagblöð,  hlusta á útvarp og horfa á sjónvarp. Mikil umfjöllun um hann kitlar athyglisþörf hans og gefur honum þau skilaboð að hann skipti miklu máli.  

  Það er ekki gott.

 

          

Breivik-málið: Hvað felst í einangrun?

Skelfilega ljót veggjakrot

  Um daginn birti ég á þessum vettvangi ljósmyndir af nokkrum skemmtilegum dæmum um sláandi falleg götulistaverk.  Það má sannreyna með því að smella HÉR. Því miður eiga ekki allir veggjakrotarar því láni að fagna að hafa hæfileika til að skapa falleg listaverk.  Færeyingar fengu það staðfest í vikubyrjun.  Þá vöknuðu Þórshafnarbúar upp við vondan draum.  Umhverfissóði hafði um nóttina krotað á veggi,  glugga og bíla nöfn og slagorð.  Allt mjög illa gert.

  Grunur leikur á að um útlending sé að ræða.  Hugsanlega frá Bronx í New York.  Ljósi punkturinn er að sóðinn virðist hafa horn í síðu SS-hryðjuverkamannsins Páls Watsons.  Hér eru sýnishorn af krotinu.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

  Einn ljóður af mörgum við svona veggjakrot er að það hefur áráttu til að espa bjána upp í að herma eftir.  Það henti í Færeyjum strax um morguninn.

Eineltið færist í aukana

  Hálfskoski-kvartþýski New York athafnamaðurinn Dónald Jón Trump hefur sætt stanslausu einelti síðustu mánuðina.  Ekki síst af hálfu íslensks almennings og íslenskra fjölmiðla.  Hann er hæddur og spottaður.  Að því er virðist fyrir það eitt að taka þátt í forvali repúblikana fyrir forsetakosningar í Bandaríkjum Norður-Ameríku.

  Eineltistilburðir Íslendinga hafa eitrað út frá sér. Bandarískir tónlistarmenn hafa snúist gegn Dónaldi Jóni.  Menn sem hann áleit vera sína bestu og nánustu vini.  Fleiri skemmtikraftar hafa fylgt í kjölfarið og sagt ljót orð um manninn.

  Nú eru kjósendur reppanna hver á fætur öðrum farnir að taka þátt í eineltinu.  Þeir eru margir hverjir hættir að kjósa hann.  Núna síðast í Wyoming og Washington DC.  Um og yfir 9 af hverjum 10 kusu ekki Trump.  

  Góðu fréttirnar eru að hann nýtur einarðs og einlægs stuðnings nasistahópa á borð við Ku Klux Klan. 

  Dónald Jón er breyskur eins og allt annað fólk. Einn af hans göllum er að treysta ekki fagmönnum.  Hann stólar á eigin getu.  Það kemur ekki alltaf vel út.  Til að mynda ber hann sjálfur á sig sjálfbrúnkukrem.  Yfirleitt er það misheppnað. Of mikið,  of appelsínugult,  flekkótt og ójafnt.  Þetta þarf að laga.  Svona gera menn ekki.  Það má ekki bera sjálfbrúnkukrem alveg að augum og hársverði. Fagmenn kunna að afgreiða það með einfaldri tækni.  Hún er kennd í förðunarskólum.  Greinilega og hrópandi kann Dónald Jón það ekki.  Auk þess virðist hann ekki vita af því að til eru sjálfbrúnkukrem sem framkalla eðlilegan sólbrúnkutón án appelsínugula litsins. Ég er miður mín yfir því hvernig hann klúðrar þessu. Niðurstaðan gæti orðið sú að hann verði fyrsti appelsínuguli forseti Bandaríkjanna eða þó öllu heldur ekki.    

Trump gersigraður í tveimur ríkjum

Sláandi flott götulistaverk

  Maðurinn lifir ekki á brauði einu saman.  Hann þarf einnig að næra sálina.  Til þess höfum við listamenn.  Fólk með sköpunargáfu.  Til að mynda myndlistamenn.  Þar á meðal götulistamenn.  Þeir sjá efnivið í listaverk þar sem aðrir sjá aðeins gráan hversdagsleika,  hrörleg og ómerkileg hús,  sprungna veggi eða tré í órækt.  

  Sjón er sögu ríkari.  Hér eru nokkur dæmi.  Ekkert hefur verið átt við þessar ljósmyndir í fótósjopp.  Smellið á myndirnar til að njóta listaverkanna betur.

  

Ölgerð á dauðalista sýndi Færeyingum fádæma hroka

  Það fer ekki öllum vel að fara með völd. Eitt ljótasta dæmi þess var framkoma forstjóra Ölgerðarinnar,  Andra Þórs Guðmundssonar,  í garð bestu og traustustu vina Íslendinga,  Færeyinga.  Fyrir nokkrum árum sendi hann færeyskum bjórframleiðanda,  Föroya Bjór, fádæma hrokafullt bréf. Krafðist þess með ruddalegum hótunum að Föroya Bjór hætti að merkja gullbjór sinn sem gullbjór. Þetta ósvífna erindi var svo yfirgengilegt að það þjónaði engum tilgangi öðrum en kitla stórmennskubrjálæði/minnimáttarkennd forstjóra fyrirtækis á dauðalista. Hann fann þörf til að sparka í minnimáttar og réðst á garðinn þar sem hann var lægstur.

  Viðbrögð Íslendinga við ógeðslegri og yfirgengilegri framkomu Ölgerðarinnar við færeyska vini voru til fyrirmyndar. Þeir skiptu snarlega innkaupum frá Gull-gutli Ölgerðarinnar yfir til bragðgóða Föroya Bjór Gullsins.  Svo rækilega að síðarnefndi bjórinn flaug upp sölulista vínbúðanna.  Áður fékkst hann aðeins í örfáum vínbúðum. Salan jókst um 1200%.  Nú er hann í öllum vínbúðum. Eða svo gott sem. Enda mun betri en Ölgerðarsullið. Margir hættir að kaupa allar aðrar vörur Ölgerðarinnar.  

  Það fráleita í hrokafullu frekjukasti forstjóra Ölgerðarinnar var að Föroya Gull hefur verið miklu lengur á markaði en Ölgerðar-gutlið.  Þar fyrir utan er Gull alþjóðleg lýsing á tilteknum bjórflokki.  Alveg eins og pilsner eða stout bjór.  Já,  eða "diet" á öðrum vörum.  Það var engin innistæða fyrir heimskulegri yfirgangskröfu Ölgerðarinnar.  Hún gerði ekki annað en opinbera illt innræti og hroka forstjórans.

  Höfum þetta í huga við helgarinnkaup á bjór og öðrum drykkjum. Ekki kaupa neitt frá Ölgerðinni.  Kaupið þess í stað hágæða Föroya Gull.  

  Ég tek fram að ég tengist ekki Föroya bjór á neinn hátt. Hinsvegar er brýnt að halda þessu til haga þegar Ölgerðin fer á markað.  Hugsanlegir væntanlegir kaupendur þurfa að vita þetta.  Fyrirtækið er í vondri stöðu með forstjóra sem kann ekki mannasiði.   

 

    

Vissu af „dauðalistanum“

Útlendir ferðamenn á Íslandi éta ekki hvað sem er

 

 

 

 

 

 

 

 

 

 

 

 

  Í ár koma hátt í tvær milljónir erlendra ferðamanna til Íslands. Þeir eru ekki í leit að alþjóðlegum skyndibitastöðum á borð við McDonalds,  Burger King,  Subway,  KFC,  Dominos eða Taco Bell.  Þessa staði finna þeir heima hjá sér.  Ör fjölgun túrista á Íslandi skilar sér ekki í kaupum á ruslfæði samkvæmt alþjóðlegum stöðlum.  Þvert á móti.  Það þrengir að þessum stöðum.  Gott dæmi um það er að Subway á Ísafirði gaf upp öndina á dögunum.  Einmitt í kjölfar túristasprengju á Vestfjörðum.  

  Útlendir ferðamenn á Íslandi vilja smakka eitthvað nýtt og öðruvísi.  Þeir prófa kæstan hákarl,  hangikjöt,  svið,  lifrarpylsu og ýmsa spennandi sjávarrétti.   Nú er lag fyrir veitingastaði að bjóða upp á íslenskan heimilismat: Kjötsúpu,  plokkfisk og sveitabjúgu.  Svo að ekki sé minnst á grillað lambakjöt,  kótelettur (án rasps!) og lambalæri með brúnni sósu,  Ora grænum og rauðkáli.  Íslenska lambakjötið er best í heimi (á eftir færeyska skerpikjötinu).  Við eigum að fóðra túrista á því.  Svo vel og rækilega að þeir verði háðir því.  Það styrkir útflutning á kjötinu.

  Á spjalli mínu við erlenda ferðamenn hef ég uppgötvað undrun þeirra yfir því að Íslendingar borði heita sósu með flestum mat. Þeir eiga öðru að venjast.

 

Ferðafólki boðið lambakjöt

Auðleyst vandamál

  Ég var vestur á fjörðum. Sem oft áður.  Í gamla daga var hálf einmanalegt utan vinnutíma í vinnuferðum úti á landi. Ég var oftast eini gestur á gistiheimilum og hótelum. Það var næstum því óþægilegt.  Starfsmenn kannski þrír eða fjórir. Gistikostnaður minn stóð ekki undir launakostnaði þeirra. Á móti kom að um sumarið mættu ferðamenn til leiks og bættu upp taprekstur vetrarins.

  Nú er öldin önnur er Sveinbjörn stökk á stöng.  Nú er ekki þverfótað fyrir útlendum ferðamönnum á öllum tímum árs. Jafnframt hefur framboð á gistirýmum vaxið ævintýralega. Það er skemmtileg tilbreyting frá því sem áður var að lenda í þvögu af ferðamönnum frá öllum heimsálfum.  Líka vitandi að þeir skilja eftir sig hérlendis í ár 500 þúsund milljónir króna í gjaldeyri.  Þeir togast á um alla mögulega leigða bíla,  fjölmenna á matsölustaði,  kaupa lopapeysur og aðra minjagripi. Og það sem telur einna mest: Taka ljósmyndir og myndbönd af norðurljósunum,  skíðabrekkum og allskonar.  Þetta póstar liðið á Fésbók og Twitter út um allan heim.  Við það ærast vinir og vandamenn. Verða friðlausir í löngun til að koma líka til Íslands.  Margfeldisáhrifin eru skjótvirk og öflug.

  Hitt er annað mál að ástæða er til að taka snöfurlega á glannaskap túrista. Þeir átta sig ekki á að hættur leynast í íslensku landslagi.  Bæði við fossa og í fjöru.  Túristarnir taka ekkert mark á vel merktum lokunum á gönguleiðum eða vegum.  Það þarf að glenna framan í þá merkingum um að brot á banni á þessum svæðum varði háum fjársektum.  Þá finna þeir til í buddunni.  Það virkar.  

   

Ekkert rugl hér!

  Í gær kom ég við á bókasafni.  Þar hitti ég Skagfirðing.  Við hófum umsvifalaust að skrafa saman.  Á borðinu fyrir framan okkur lágu dagblöð og tímarit.  Bar þá að roskna konu sem haltraði til okkar.  Hún spurði hvort að við værum með laugardags-Moggann.  Skagfirðingurinn greip upp blað,  rétti að konunni og sagði:  "Nei,  en hérna er Sunnudags-Mogginn."

  Konan tók - eins og ósjálfrátt - við blaðinu.  Í sömu andrá var líkt og hún brenndi sig.  Hún þeytti blaðinu eldsnöggt á borðið,  hnussaði og hreytti með hneykslunartóni út úr sér um leið og hún strunsaði burt:  "Ég ætti nú ekki annað eftir en fara að lesa blöðin í vitlausri röð!"

   

Rottukjöt í matinn

 

 

 

 

 

 

 

  Þrátt fyrir allskonar niðurgreiðslur,  styrki,  ívilnanir,  fyrirgreiðslur,  klíkuskap og annað kunnuglegt freistast margir matvælaframleiðendur til þess að svindla á viðskiptavinum.  Líklegt er að þú eða einhver sem þú þekkir hafi borðað rottukjöt án þess að vita það. Talið sig vera að japla á kjúklingakjöti.  

  Þetta hendir þegar snætt er í Bandaríkjum Norður-Ameríku.  Það staðfestir matvælaeftirlitið vestra.  Milljónir kílóa af rottukjöti er selt sem beinlaust kjúklingakjöt,  hvort heldur sem er á veitingastöðum eða í matvöruverslunum.  

  Að sögn kunnugra er rottukjöt lakara en kjúklingakjöt.  Með réttum kryddum má fela muninn.  Að minnsta kosti upp að því marki að villa um fyrir grunlausum.   

 

Hneyksli!

  Það er gott að hneykslast.  Ennþá betra er að hneykslast á þeim sem hneykslast.  Langbest er að hneykslast á þeim sem hneykslast á þeim sem hneykslast.  Ekki síst þegar um flutning á dægurlagi er að ræða.  Hneyksli hafa fylgt dægurlaginu frá því að elstu menn muna.  Vandamálið er að hneykslin fjara út í áranna rás,  hverfa og gleymast.  Eftir stendur dægurlagið bísperrt og sívinsælt, líkt og aldrei hafi fallið á það blettur.

  Þegar Elvis Presley kom fram á sjónarsviðið um miðjan sjötta áratug síðustu aldar ætlaði allt um koll að keyra.  Hann þótti vera grófasta klám og negrasleikja, eins og það var kallað af hneyksluðum lýðnum sem mátti ekki vamm sitt vita.

  Hérlendis hneykslaði Skapti Ólafsson virðulegt fólk með meintum svæsnum klámsöng,  Allt á floti.  Til að friða hneykslaðan skrílinn var lagið bannað. Það mátti ekki spila það í útvarpinu.  Aðeins þannig var hægt að forða börnum frá skaða á sál til lífstíðar og forða fjölskyldum og samfélaginu frá upplausn.

  Um svipað leyti brutust nánast út óeirðir vegna lagsins Vagg og velta með Sauðkrækingnum Erlu Þorsteins.  Textinn þótti svívirðilegur.  Hneykslaður mörlandinn las út úr textanum stórhættulega lágkúru.  Talað var um að senda börn á útvarpslaus sveitaheimili til að þau lentu ekki á glapstigum við að heyra ósköpin.  Sátt náðist og ró komst á þegar Útvarpsráð bannaði ófögnuðinn.

  Oftar hefur þurft að banna glæfraleg háskadægurlög.  Allt til að vernda börn og standa vörð um fjölskylduvænt Ísland.  Í fljótu bragði er í dag ekki alltaf augljóst hvað hneykslaði hneykslunarglaða í þátíð.  Góðu fréttirnar eru að margir fengu útrás í hneykslunarfárinu.  Urðu eins og betri og siðvandaðri menn um stund.  

Gísli Marteinn í báðum liðum

Náðargáfa að tala tungum

  Í kristni er vel þekkt sú náðargáfa að tala tungum.  Heittrúaðir og sannkristnir í góðu og nánu sambandi við almættið tala þá ósjálfrátt,  viðstöðulaust og án vandkvæða tungumál sem þeir kunna ekki. Um þetta eru áhugaverðar frásagnir í Biblíunni.

  Víkur þá sögu að Svavari Sigurðssyni.  Hann hefur í áratugi barist gegn fíkniefnadjöflinum.  Á síðustu öld var hann viðmælandi Eiríks Jónssonar á Stöð 2 og talaði tungum.  Það var áhrifaríkt - þó að hvorki hann né sjónvarpsáhorfendur skildu hvað hann sagði.

  Lögreglan í Reykjavík hefur sagt frá kynnum af karlmanni sem talaði tungum við ljósastaur í Grafarvogi.  Næsta víst er að þar var um mikilvægan boðskap að ræða.  Vegna tungumálavanþekkingar lögreglunnar fáum við aldrei að vita hver hann var.  

 

   

„Talaði tungum“ í Grafarvogi

Hvar er best að búa?

  Flóttamenn frá stríðshrjáðum löndum og margir aðrir spyrja sig og aðra:  Hvar er best að búa?  Hvar eru lífskjör best?  Hvar eru almenningssamgöngur bestar?  Hvar eru atvinnutækifæri?  Hvar eru fæstir glæpir?  Hvar eru menn óhultir fyrir árásum ofbeldisfullra öfgamanna? Netsíðan Mercer hefur tekið saman lista og svarar þessu.

  Bestu kostir eru þessir:

1.  Vín í Austurríki

2.  Zuire í Swiss

3.  Auchland á Nýja-Sjálandi

4.  Munich í Þýskalandi

5.  Vankúver í Kanada

6.  Dusseldorf í Þýskalandi 

7.  Frankfurt í Þýskalandi

8.  Geneva í Swiss

9.  Kaupmannahöfn í Danmörku

10. Sidney í Ástralíu

  Einhverra hluta vegna eru hvorki Reykjavík né Ísland á listanum.  Það er undarlegt.  Það ógildir listann.  Skamm!  Höfuðborgir allra hinna Norðurlandanna eru ofarlega á listanum: Stokkhólmur í Svíþjóð í 19. sæti,  Helsinki í Finnlandi og Osló í Noregi báðar í 30. sæti.

  Verstu borgir eru:

1.  Bagdat í Írak. Einkennilegt vegna þess að í aldarbyrjun réðst bandarískur her með stuðningi Íslands inn í Írak til að innleiða þar vestrænt lýðræði og hefja vestræn mannréttindi til vegs og virðingar.  Yfirtóku illræmd fangelsi á borð við Abu Ghraib til að kenna innfæddum mannúð.

2.  Bangui í Mið-afríska lýðveldinu

3.  Sana´a í Jemen

4.  Port au Prince í Haiti

5.  Khartoum í Súdan

  Verstu borgir í Evrópu eru Minsk í Belarus,  Tírana í Albaníu og Kænugarður í Úkraínu.   

  Bestu borgir í Ameríku - fyrir utan Vankúver í Kanada - eru Toronto í Kanada (15.sæti) og Ottawa í Kanada (17.sæti).  

 

  

Rolling Stone mælir með íslenskri hljómsveit

  Bandaríska tímaritið Rolling Stone ber höfuð og herðar yfir önnur tónlistartímarit.  Prentútgáfan selst í hátt í tveimur milljónum eintaka.  Hún er ráðandi í tónlistarumfjöllun vestan hafs.  Hún kemur einnig út á þýsku og frönsku á meginlandi Evrópu.  

  Netútgáfan nýtur ört vaxandi vinsælda.  Sem dæmi um ítök Rolling Stone má nefna að þegar erlendar stórstjörnur troða upp á Íslandi er iðulega vísað til þess hvar eitthvað lag eða plata er á tilteknum lista í Rolling Stone. Til að mynda á lista yfir 500 merkustu plötur rokksögunnar.

  Umfjöllun í Rolling Stone vegur þyngra en hliðstæð umfjöllun í öðrum tónlistarblöðum.  Ekki aðeins vegna útbreiðslu blaðsins heldur einnig vegna þess að vel er vandað til verka.  Aðeins það sem talið er eiga virkilega brýnt erindi við lesendur kemst í gegnum nálarauga ritstjórnar.

  Í gær var birtur listi yfir 10 merkustu nýliða á vinsældalistunum.  Vel rökstuddur og ítarlegur.  Í þessum hópi er íslensk hljómsveit,  Kaleo.  Tónlist hennar er lýst sem íslenskum þjóðlagablús,  Delta"riffum",  tregaballöðum og falsettusöng.

  Talið er líklegt að tónlistin höfði til aðdáenda Black Keys og Bon Iver.  Þess er getið að lagið "All The Pretty Girls" með Kaleo hafi verið spilað yfir 10 milljón sinnum á Spotify.  Lagið "No Good" megi heyra í kvikmyndinni Vinyl.

  Söngvarinn er borinn fyrir því að miklu skipti að hafa alist upp á Íslandi. Náin tengsl við náttúruna veiti innblástur.  Langir dimmir vetramánuðir og sumrin setji mark á tónlistina.  

  Kaleo er búin að "meika það"!

 

Plötuumsögn

 - Titill:  At The Heart Of A Selkie

 - Flytjandi:  Eivör ásamt Stórsveit Danska ríkisútvarpsins og kór

 - Einkunn: ***** (af 5)

  Eivör er að sumu leyti færeysk Björk.  Hún hefur borið hróður Færeyja og færeyskrar tónlistar víða um heim.  Er besti sendiherra Færeyja.

  Þetta þekkjum við Íslendingar flestum betur.  Eivör hefur átt fjölda laga og platna í efstu sætum íslenskra vinsældalista. Hún hefur átt lög og plötur í 1. sæti norska og danska vinsældalistans.  Hún hefur verið nefnd til margra tónlistarverðlauna á Íslandi,  í Danmörku og Færeyjum og landað þeim mörgum. Hún er vinsælasta og dáðasta erlenda poppstjarnan á Íslandi.  Fyllir jafnan alla sali.  Hvort sem er sunnan lands eða norðan þegar hún kemur fram á hljómleikum.

  Vinsældir Eivarar utan Færeyja hafa opnað dyr inn á alþjóðamarkað fyrir aðra færeyska tónlistarmenn. Líkt og vinsældir Bjarkar hafa gert fyrir íslenska tónlist. 

  2005 útsetti Stórsveit Danska ríkisútvarpsins vinsælustu lög Eivarar og gaf út á plötunni "Tröllabundin".  Á vinnslustigi þróuðust mál í þá átt að Eivör syngur í mörgum lögum plötunnar sem allt að því gestasöngvari.  Eða þannig.  Þetta er plata Stórsveitarinnar að túlka lög Eivarar.  Fín og djössuð Stórsveitarplata.

  Nú er komin út ný plata með Eivöru og Stórsveit Danska ríkisútvarpsins.  Forsendur eru aðrar.  Þetta er heilstætt nýtt verk Eivarar um selkonu.  Byggt á þjóðsögu um selkonu. Maður ástfanginn af selkonunni felur ham hennar og heldur henni fanginni á landi.  Eignast með henni börn.  Áður en yfir lýkur sleppur konan í haminn og sameinast börnum sínum á hafi úti.

  Þrátt fyrir enskan titil plötunnar eru söngtextar á færeysku.  Höfundur þeirra er Marjun Syderbö Kjelnesk. Þekkt færeyskt ljóðskáld.  Flest lögin eru Eivarar.  Útsetjarinn Peter Jensen kemur við sögu í fjórum af 11 lögum.

  25 manna Stórsveit Danska ríkisútvarpsins er aðdáunarlega hógvær í undirleik.  Meira ber á tuttugu manna kór sem setur sterkan svip á plötuna.  

  Þetta er stórbrotnasta og íburðarmesta plata Eivarar til þessa.  Hún er frekar seintekin.  Það þarf að spila hana nokkrum sinnum áður en fegurð tónlistarinnar nýtur sín til fulls. Til hjálpar eru nokkur grípandi og auðmelt lög í bland.  

  Verkið nýtur sín best þegar það er spilað í heild.  Lögin raðast þannig að þau styðja hvert annað.  

  Um frábæran söng Eivarar þarf ekki að fjölyrða.  

  Til gamans má geta þess að í gær var tilkynnt að færeysk yfirvöld heiðri Eivöru með listamannalaunum til þriggja ára.

    

  

  

    

Hver eru elstu tungumál heims?

  Eitt af mörgum vandamálum tungumáls er að það breytist mjög hratt.  Svo hratt að nútímamaður á í erfiðleikum með að lesa 100 - 200 ára gamlan texta.  Ennþá eldri texti er honum lokuð bók.  Aðeins örfá tungumál í öllum heiminum eru undantekning frá reglunni.  Þá er átt við að nútímamaðurinn lesi sér til gagns fornhandrit á sínu tungumáli án þess að blása úr nös.

  Netmiðillinn Culture Trip hefur tekið saman lista yfir elstu tungumál heims.  Þau eru þessi:

  Hebreska er mörg þúsund ára gömul.  Hún er töluð af gyðingum dreifðum víða um lönd.  Þeir lesa léttilega jafn eldgamlar þjóðsögur og Gamla testamentið.

  Tamílska er opinbert tungumál Indlands,  Sri Lanka og Singapúr.  Hún er að minnsta kosti mörg þúsund ára gömul.    

  Litháíska er sömuleiðis mörg þúsund ára gömul.

  Persneska (einnig kölluð farsi) er töluð í Íran, Afganistan og Tajikistan.  Nútíma persneska er yfir 1200 ára gömul.

  Íslenska er næstum því jafn gömul nútíma persnesku.  Hefur haldist óbreytt frá því að norskir landnemar settust að á Íslandi 874.  Þó að landið væri dönsk nýlenda frá fimmtándu og fram á síðustu öld þá hafði það óveruleg áhrif á íslensku.  

 

 

 

 

 

 

 

 

 

 Þetta skemmtilega kort fylgir samantekt Culture Trip.   

Einkennilegt háttalag strætóbílstjóra í myrkri, þoku og snjó

  Sumt fólk á ekki að umgangast börn.  Það skilur ekki börn. Þau fara í taugarnar á þeim. Það þekkir ekki eitt barn frá öðru. Í þeirra augum er þetta allt sami skríllinn.  Alveg eins og hjá rasistum sem setja alla blökkumenn undir sama hatt;  sjá engan mun á þeim.

  Mér var illa brugðið við fréttir af 14 ára stjúpdóttur Guðmundar Brynjólfssonar,  djákna og vinar míns á Eyrarbakka. Krakkinn tók í gærkvöldi strætó til Selfoss.  Á leiðinni skipti stelpan um sæti. Við það missti bílstjórinn stjórn á sér.  Það rann á hann æði.  Hann sturlaðist, froðufelldi og spangólaði. Henti stelpunni umsvifalaust út á guð og gaddinn.  Skipti engu þó að úti væri niðamyrkur,  svartaþoka,  snjór og hálka.

  Hann hafði ekki hugmynd um það hvort að barnið væri með farsíma, myrkfælið eða þokkalega búið til útiveru.

  Sem betur fer tókst stelpunni að ná símasambandi við foreldrana.  Guðmundur ók í humátt að Selfossi.  Hún hafði þá í fimm mínútur brölt í átt að Eyrarbakka í flughálku og myrkri.  Köld, hrakin og niðurlægð. 

  Bílstjórinn réttlætir ójafnvægi sitt og uppákomu með því að kvöldið áður hafi stelpa fært sig á milli sæta.  Hann taldi hugsanlegt að um sömu stelpu væri að ræða. Sem var þó ekki. Þá viti hann dæmi þess að krakki hafi sett fót upp á sæti.  Að auki hafi krakki eitt sinn sýnt honum putta. Þarna var mælirinn fullur.  Til viðbótar hafi Litla-Hraun verið í nágrenni. Hún hefði getað leitað þar skjóls síðar um kvöldið.  Miðaði hann þá við gömul ytri landamæri Litla-Hrauns.  

 Nú er málið "í ferli" hjá Strætó.

     

     

  

14 ára hent út úr strætó

Hvað er þetta með Fellaskóla?

  Þegar talað er um einelti í skólum berst umræðan ætíð fljótlega að Fellaskóla.  Þannig hefur það verið til einhverra ára.  Sögurnar þaðan eru margar og ljótar.  Svör stjórnenda skólans eru eitthvað á þá leið að málin séu í ferli.  Það virðist þýða að öllu sé stungið undir stól og ekkert gert.  

  Vegna skólaskyldu ber skólastjórnendum að tryggja velferð nemenda.  Skólinn á að vera börnum öruggt skjól.  Staður sem þeim líður vel á.  Í góðum skóla hlakka krakkar til hvers skóladags.  Geta varla beðið eftir því á morgnana að komast í skólann.  

  Þessu er öfugt farið með mörg börn í Fellaskóla.  

  Hvar er barnaverndarnefnd?  Ofbeldi er glæpur.  Ekki síður þegar fórnarlamb er barn heldur en fullorðið.  

 

Tólf ára ýtt út á Hverfisgötu