Allt í rugli hjá Kanye West

  Það er margt einkennilegt við bandarískan rappara,  Kanye West frá Chicago.  Hann er einnig fatahönnuður og plötuútgefandi.  Lög hans og plötur seljast eins og heitar lummur. Samt er hann alltaf blankur.  Alltaf vælandi yfir peningaleysi.  Samt er hann giftur vellauðugri konu,  Kim Kardashian West.  Hún er módel og sjónvarpsstjarna.  Hún vill að hann standi á eigin fótum fjárhagslega.  Þess vegna hleypir hún honum ekki í budduna sína. Hún er þó alveg til í að fóðra.

  Kanya er nánast eina óvænta frægðarmennið sem styður Donald Trump í baráttu hans við að verða frambjóðandi republikana til embættis forseta Bandaríkja Norður-Ameríku.  Aðspurður segist Trump vera þakklátur stuðningnum. Einhverra hluta vegna gerir hann ekkert með stuðninginn.  Slær honum ekki upp í auglýsingum né á kosningasíðu sinni.

 Stuðningurinn er einungis munnlegur.  Ekki fjárhagslegur.  Þvert á móti segja illar tungur að stuðningurinn sé lymskubragð til að plata Trump til að fjárfesta í fyrirtækjum Wests (les = gauka peningum að síblönkum Kanye).

  Sjálfur ætlar Kanye að verða forseti BNA 2021.

  Við fráfall ensku poppstjörnunnar Davids Bowies hótaði Kanye að gera plötu honum til heiðurs (tribute).  Kráka öll hans vinsælustu lög.  Aðdéendur Bowies brugðust hinir verstu við.  Mótmæltu út og suður, þvers og kruss.  Sökuðu Kanye um allt það versta varðandi plötuna. Vísuðu þeir m.a. í það hvernig honum hefur tekist upp við að kráka Freddy Mercury í heiðursskini.   

  Hörðustu aðdáendur Freddys lýsa flutningi Kanyes sem misþyrmingu á Queen-slagara og grófa vanvirðingu við góðan söngvara.  Ekki skipti ég mér af því.  Hvað sem segja má um Queen þá var Freddy nokkuð góður söngvari.  Hlustið og dæmið sjálf.  

    

Kanye þrábiður Zuckerberg um peninga

Tölvan segir nei

  Samfélagið okkar er að mjakast í mannlegri átt.  Hægt og hljótt.  Mannúð og samkennd sækja á.  Lög og reglur eru leiðbeinandi.  Þau eru mannanna verk.  Þau eru ekki sett til að níðast á börnum.  Af og til koma hinsvegar upp þær aðstæður að lög og reglur stangast á við þarfir barna.  Þá reynir á mannlega þáttinn.  Þá vegur neyðarréttur þyngra.

  Það er aum framkoma gagnvart börnum í vanda að yppa öxlum og skýla sér á bak við reglur.  "Tölvan segir nei,"  er vinsæl klisja í sjónvarpsþáttunum Litla Bretland.  Það er gott grín og lýsandi fyrir starfsfólk Wow á dönskum flugvelli sem skildi þrjú börn eftir í reiðuleysi.  Líka fyrir starfsfólk Fellaskóla sem neitaði stelpu um að snæða pizza-sneið með skólasystkinum sínum.

  Barnaheimlin í Breiðavík og Kumbaravogi tilheyra fortíðinni. Blessunarlega. Látum hin dæmin einnig tilheyra fortíðinni. Verum í nútímanum 2016.  

Þrjú börn urðu eftir á Kastrup

Í fangelsi fyrir að spila rokk

  

  Rokktónlist hefur verið til vandræða alla tíð.  Hún varð til í Bandaríkjum Norður-Ameríku á sjötta áratug síðustu alda.  Hörundsbleikir forsprakkar - á borð við Elvis Presley og Jerry Lee Lewis - voru umsvifalaust sakaðir um að vera negrasleikjur,  siðlausir klámhundar og leikbrúður Djöfulsins.  Stórhættulegir og andfélagslegir.

 

  Á sjöunda áratugnum stóðu kristnir í suðurríkjum Bandaríkjanna - með Ku Klux Klan í fararbroddi - fyrir vinsælum og stórfenglegum brennum á plötum enskrar strákahljómsveitar, Bítlunum. Til áhersluauka var þeim hótað lífláti fyrir að spila Satans músík.  

 

  Um síðustu aldamót (eða rúmlega það) stóðu guðhræddir Vestmannaeyingar fyrir vel heppnaðri brennu á rokkplötum með Rolling Stóns,  Black Sabbath og fleirum.  Það var sitthvað djöfullegt á þeim.

 

  Baráttunni gegn djöfulgangi rokktónlistar er hvergi lokið. Tveir liðsmenn írönsku rokksveitarinnar Confess voru handteknir af byltingarvörðum landsins og varpað í fangelsi.  Þeir eru sakaðir um að spila í ólöglegri neðanjarðarhljómsveit og guðlast.  5. febrúar voru þeir leystir úr haldi gegn 4 milljón króna tryggingu.  Þeirra bíður tukthúsvist í hálft ár að lágmarki og sex ár að hámarki.  Verra er að einnig vofir yfir þeim aftaka,  þessum 21. og 23ja ára lífsglöðu guttum.  

 

  Hvað getum við gert?  Eða eigum við að gera eitthvað?  Eitt ráð er að dreifa tíðindunum sem víðast. Ég finn aðeins eitt lag með Confess á youtube. Það getur að heyra hér efst á síðunni.  Eftir því sem lagið fær meiri athygli styrkist staða drengjanna.  Ef margar útvarpsstöðvar taka það inn á "play-lista" gæti myndast öflugur þrýstingur á írönsk yfirvöld.  Það bjargaði stelpunum í Pussy Riot frá því að veslast upp í rússneskum þrælabúðum.

 

                    

Í fangelsi fyrir að spila kántrý-músík

  "Allt nema kántrý og þungarokk."  Þetta er algengt svar við spurningunni: "Á hvernig tónlist hlustar þú?"  Þegar harðar er gengið á viðmælandann kemur jafnan í ljós að hann hlustar ekki heldur á djass,  indverska raga-músík né óperur.  

  Þeir eru til sem hlusta á kántrý.  Reyndar hlusta flestir á einhver kántrý-afbrigði.  Það er frekar þannig að sumir hafa óþol gagnvart sykursætasta Nashville kántrý-poppi.  Annars er allur háttur á.

  Það er ekki alltaf tekið út með sældinni að hlusta á kántrý.  Kántrý-unnandi í Skotandi var dæmdur í fjögurra mánaða fangelsi.  Sökin var ekki meiri en sú að hann olli nágrönnum langvarandi ónæði með því að blasta kántrýi á hæsta styrk í tíma og ótíma.  Einkum fengu diskar með Dolly Parton að rúlla undir geisla.  Það fyllti mælinn.

  Kántrý-boltanum til refsiþyngingar var metið að hann barðist um á hæl og hnakka gegn handtöku.  Í atinu veittist hann með ofbeldi að einum lögreglumanni.

 Dómari féllst ekki á að meta honum til refsilækkunar skerta heyrn.  Þegar þannig stendur á brúka menn heyrnartól.  Kántrý-gaurinn gerði það ekki.  Hann taldi brýnna að breiða út kántrý-fagnaðarerindið.  

Af hverju geta listamenn ekki fengið sér venjulega vinnu eins og annað fólk?

  Einstaka þingmenn Sjálfstæðisflokksins hafa spurt að þessu í ræðustól Alþingis.  Von er að þeir spyrji.  Spurningin verður alltaf áleitin í kjölfar úthlutunar Listamannalauna.  Það er gott að henni sé velt upp sem oftast.  Það veitir aðhald.

  Fyrir mörgum árum leiddi skoðun í ljós að yfir 70% af ferðamannaiðnaði í Jamaíka má rekja til reggea-söngvarans Bobs Marleys.  Forvitnilegt væri að kanna hvað hátt hlutfall af brattri aukningu á ferðamönnum til Íslands megi rekja til heimsfrægðar Bjarkar,  Sigur Rósar,  Of Monsters And Men,  Emilíönu Torríni,  Jóhanns Jóhannssonar,  Hilmars Arnar Hilmarssonar,  Mezzoforte,  Ólafs Arnalds og fleiri.

  Nú hefur dæmið verið skoðað og reiknað út í litlu hafnarborginni Liverpool í Englandi. Niðurstaðan er sú að fjögurra manna rokkhljómsveit,  Bítlarnir,  standi á bak við 2335 stöðugildi í Liverpool. Bein störf.  Ekki afleidd.  Íbúafjöldi Liverpool er um 450 þúsund.  Þetta jafngildir því að 1728 störf á Íslandi séu vegna heimsfrægra íslenskra tónlistarmanna.

  Árlegar beinar tekjur Liverpool af Bítlunum eru 82 milljónir punda x 141 = hálfur 12. milljarður ísl.kr.  

  Það merkilega er að Bítlarnir störfuðu aðeins til ársins 1969. Í sex ár. Frá 1963. Þar af voru þeir í Liverpool aðeins í blábyrjun.  En hljómsveitin er ennþá að dæla háum upphæðum inn í hagkerfi litlu hafnarborgarinnar í Englandi. Hvers vegna gátu Bítlarnir ekki fengið sér venjulega vinnu eins og annað fólk? 

   Þeir hefðu getað keypt 26 milljarða króna hlut í Borgun á 2,2 milljarða. Þeir hefðu getað keypt af Landsbankanum á einn milljarð land sem Landsbankinn keypti nokkrum dögum áður á 2 milljarða.  

   

Smásaga um vinnustaðaglens

 

 

 

 

 

 

 

 

 

  Þetta er fyrsti dagur Tóta í pylsuvagninum.  Hann er búinn að hlakka til í marga daga.  Þar áður átti hann sér langþráðan draum um að afgreiða pylsur - eins og algengt er með ungt fólk.  Vinnufélagi hans er Ása,  boldangshnáta á sjötugsaldri með sólgleraugu og fjölda húðflúra.  Tóti hefur oft fylgst með henni úr fjarlægð afgreiða pylsur.  Hann hefur stundum undrast hvað vinnufélagar hennar stoppa stutt við í vagninum.    

  Tóti heilsar og kynnir sig með handabandi.  Ása kynnir sig ekki heldur svarar glettnislega:  "Tóti, já.  Ég ætla að kalla þig Tóta ljóta til aðgreiningar frá öðrum Tótum."

  "Þekkir þú aðra Tóta?" spyr Tóti undrandi.

  "Ekki ennþá," svarar Ása.  "Kannski síðar."

  Lengra er samtalið ekki í bili.  Ása bendir Tóta þegjandi á að taka af sér jakkann.  Um leið bendir hún á kaffikönnu með nýlöguðu kaffi.  Hún bendir honum líka á að fá sér sæti.  Hann lætur ekki benda sér á það tvisvar.  Sjálf hellir hún sér kaffi í plastmál.  Með vönum handbrögðum gusar hún eldsnöggt úr því ofan í hálsmálið á Tóta.  Hann öskrar af sársauka undan brennandi heitu kaffinu,  sprettur á fætur og rífur sig úr bolnum.  Hann horfir undrandi og ásakandi á Ásu.  Hún heldur um magann í hláturskrampa.

  "Vinnustaðagrín,"  útskýrir hún skellihlæjandi og sækir handklæði.  Hún vætir það í köldu vatni og leggur samanbrotið yfir brunasárið á öxlinni.  

  "Farðu í bolinn yfir,"  skipar hún og hjálpar honum að troðast í kaffiblautan bolinn.

  Tóti reynir að taka gríninu vel.  Hann brosir vandræðalega.  Brosið verður einlægt þegar Ása bætir við:  "Ég ætla að skjótast í ísbúðina við hliðina og kaupa handa okkur ís í brauðformi.  Þá fyrirgefur þú mér grínið.  Er það ekki?"

  Hún býður ekki eftir svari heldur snarast út.  Að vörmu spori kemur hún til baka með tvo barnaísa.  Annar er súkkulaðiís.  Hinn jarðarberja.  Hún réttir súkkulaðiísinn að munni Tóta og segir:  "Vittu hvorn þér þykir betri."

  Tóti er við það að narta í ístoppinn þegar Ása þrykkir ísnum þéttingsfast framan í hann.  Ísinn klessist upp á nef og út á kinnar.  Hún fylgir því eftir nógu fast til að brauðformið maskast.

  Tóti tekur andköf.  Hann skefur með höndunum ísinn framan úr sér.  Hann sullast niður bringuna og litar bolinn.  

  "Vinnustaðagrín!"  hrópar Ása sigri hrósandi.  Um leið og orðinu sleppir þrykkir hún jarðarberjaísnum á sama hátt í andlitið á Tóta.  

  "Æ,  þetta fór úr böndunum,"  játar hún og horfir á Tóta þrífa á sér andlitið.  "Fyrirgefðu. Ég sá þetta fyrir mér miklu fyndnara.  Ég hélt að þú myndir líta út eins og Gosi spýtukall:  Að brauðformið myndi standa út í loftið á nefinu á þér.  Það hefði verið fyndið." 

  Tóta fyrirgefur Ásu í huganum.  Hann vorkennir henni fyrir aulalegan húmor.  Það geta ekki allir verið gordjöss.  Hún vill vera skemmtileg.  

  "Ég skal vera almennileg,"  lofar Ása.  "Ég er búin að biðjast fyrirgefningar.  Ég skal hringja í konuna sem á pylsuvagninn og óska eftir því að þú verðir fastráðinn."

  Orðum sínum til áréttingar hringir hún og segir í tólið: "Þú ættir að fastráða Tóta.  Hann þarf bara að taka með sér hreinan aukafatnað.  Núna er hann útataður í kaffisulli og ís.  Bæði súkkulaðiís og jarðarberja.  Þetta er ógeðslegt fyrir kúnna að horfa upp á.  Ég er viss um að hann er ömurlegur faðir.  Það kemur vinnunni ekkert við.  Ég þarf bara að tala við Barnaverndarnefnd.  Láta dæma af honum börnin.  Viltu að ég komi eftir vinnu og nuddi á þér bakið?  Ég get einnig gefið þér fótanudd.  Ég hlakka til,  yðar hátign."

  Ása leggur símann frá sér og segir:  "Þú heyrðir það sjálfur,  Tóti ljóti,  að ég mæli með þér.  Ég ræð töluverðu um fastráðningar.  Ég sef nefnilega stundum hjá hennar hátign."  

 

 

 

 

 

 

 

  Fleiri smásögur og leikrit HÉR.

Alþjóðlegi The Clash dagurinn

  Undanfarin ár hafa útvarpsstöðvar víða um heim haldið árlegan The Clash dag.  Dagsetningar hafa verið ósamræmdar og tengdar ýmsu í sögu The Clash.  Bandaríska útvarpsstöðin KEXP hélt sig framan af við daginn 5. febrúar.  Sú dagsetning hefur einnig verið kölluð pönk-dagurinn.  

  Nú hefur náðst sátt um það að alþjóðlegi The Clash dagurinn sé 7. febrúar.  Borgarstjóri bandarísku borgarinnar Seattle hefur undirritað formlega yfirlýsingu þess efnis.  Þegar ráðamenn í Seattle tjá sig um rokktónlist þá hlusta rokkunnendur heimsins.  Seattle var og er vagga gruggsins (grunge).  Hægt er að telja upp marga tugi heimsfrægra Seattle-rokkara.  Hæst bera gruggsveitirnar Nirvana,  Pearl Jam,  Soundgarden,  Alice in Chains og Mudhoney. Líka má nefna gítargoðið Jimi Hendrix og þungarokksveitina Queenryche. Bara svo örfá af mörgum nöfnum séu tiltekin.

 

  Hvar kemur The Clash inn í dæmið?

  The Clash var önnur tveggja enskra hljómsveita sem mótuðu pönkbyltinguna 76/77.  Hin var The Sex Pistols.  Sú startaði dæminu og fékk The Clash strax þétt upp að hlið sér.  Sex Pistols sendi aðeins frá sér eina plötu,  frábæra og áhrifamikla plötu.  Síðan ekki söguna meir.  Það kom í hlut The Clash að þróa pönkbyltinguna yfir í litríka og fjölbreytta nýbylgju.  Þar á meðal kynnti The Clash pönk-reggí til sögunnar.  Það varð umsvifalaust fylgifiskur pönks.  

  The Clash varð ofurgrúppa á heimsvísu.  Seldi plötur í Bandaríkjunum í milljónaupplögum og út um allan heim. The Clash varð fyrirmynd Seattle gruggaranna.  Án The Clash hefði ekki orðið neitt grugg.  Það eru rökin fyrir því að borgarstjóri Seattle lýsi 7. febrúar alþjóðlega The Clash daginn.  

 

Spaugileg réttarhöld

  Í réttarsal eru samtöl dómara og lögmanna við sakborning og vitni samviskusamlega skráð og færð til bókar.  Eðlilega eru allir misjafnlega upplagðir.  Þar getur verið dagamunur á.  Að auki er fólk mis rökfast að upplagi og mis klárt í að skilja og skilgreina spurningar og svör viðmælenda.

  Eftirfarandi samtöl eru öll tekin upp úr dómsskjölum í Bandaríkjum Norður-Ameríku:

-----------------

Lögmaður:  Hvað er sonur þinn gamall,  sá sem býr heima hjá þér?

Vitni:  38 eða 35.  Ég man ekki hvort.

Lögmaður:  Hvað hefur hann búið lengi hjá þér? 

Vitni:  Í 45 ár.

-----------------

Lögmaður:  Hver er fæðingardagur þinn?

Vitni:  18. júlí.

Lögmaður:  Hvaða ár?

Vitni:  Á hverju ári.

-----------------

Lögmaður:  Hvað var það fyrsta sem eiginmaður þinn sagði við þig þennan morgun?

Vitni:  Hann sagði:  Hvar er ég, Kata?

Lögmaður:  Hvers vegna kom það þér í uppnám?

Vitni:  Ég heiti Súsanna.

-----------------

Lögmaður:  Hefur þessi sjúkdómur nokkuð haft áhrif á minni þitt?

Vitni:  Jú.

Lögmaður:  Á hvern hátt?

Vitni:  Ég gleymi.

Lögmaður:  Gleymir?  Getur þú nefnt mér eitthvað sem þú hefur gleymt?

-----------------

Lögmaður:  Ertu kynferðislega virk?

Vitni:  Nei,  ég ligg bara þarna.

-----------------

.

Lögmenn með 185 þúsund á tímann

Aðgát skal höfð í nærveru sálar

  Frétt mbl.is af meintu óhreinlæti múslímskra kvenna á íslenskum sundstöðum er einkennileg.  Meðal annars einkennileg vegna þess að í sjálfri fréttinni kemur fátt fram sem styður fyrirsögn um óhreinlæti þeirra á sundstöðum.  Frekar þvert á móti.   Fyrirsögninni "Sakaðar um að gæta ekki hreinlætis" er augljóslega slegið upp í þeim tilgangi að ala á fordómum.  Það er ekki til fyrirmyndar.  Lúmskur rasískur áróður af þessu tagi er ekki til eftirbreytni.

  Múslimakonur eru mjög lágt hlutfall af sundlaugargestum á Íslandi.  Hinsvegar eru bandarískir ferðamenn hátt hlutfall af sundlaugargestum á Íslandi.  Meðal annars vegna þess að þeir eru einna fjölmennustir túrista hérlendis.

  Töluverð vandamál hafa fylgt því að Kaninn er spéhræddur þegar kemur að nekt í búningsklefum sundlauga.  Hann veigrar sér við nekt og því að þrífa sig áður en haldið er út í sundlaugina.  Margur sundlaugarvörðurinn þarf að beita lagni og kurteisi til að fá Kanann til að fylgja reglum um þrifnað í aðdraganda heimsóknar í heita pottinn.

  Ekkert samt stórt vandamál.  Þetta hefur með menningarmun að gera.  Engin ástæða til að slá upp frétt af því. Svona er þetta bara. Allir gera sitt besta til að gera gott úr þessu.  Þannig á það að vera.

  Til gamans má rifja upp að í bandaríska Fésbókin bannaði nektarskotið (mín 1:13) í myndbandinu hér fyrir neðan.  Flokkaði það undir gróft klám sem særði blygðunarsemi.  Aðgát skal höfð í nærveru sálar.  

 

Sakaðar um að gæta ekki hreinlætis

Hollusta SS pylsunnar

  Sífellt fleiri eru að uppgötva hollustu SS pylsunnar.  Hún er þéttþjappaður heilsubiti.  Lengi vel snæddu Íslendingar í dögun hafragraut með súrsaðri blóðmör.  Með fylgdi gúlsopi af þorskalýsi,  fjölvítamíntafla og Rautt Eðalvöru ginseng hylki.  Þetta er liðin tíð.  

  Í dag borða Íslendingar SS pylsu. Ekki síst á morgnana.  Hún skerpir athygli og eykur þol.  Gefur fólki gott start inn í daginn.  Hún gefur heilbrigt og hraustlegt útlit.  Hún eyðir flestum húðsjúkdómum,  krabbameini og lömun.  Með auknu og almennu SS pylsuáti getur Ísland orðið hjólastólalaust árið 2020.  

  Sú var tíð að fólk hafði hrásalat, kartöflur, grænar baunir, rauðkál,  maís,  tómata og agúrkur með fiski eða kjöti í hádegi og í kvöldmat.  Í dag hefur þetta meðlæti vikið fyrir SS pylsu.  Hún er heilsusamlegasti kostur sem völ er á með steiktum fiski,  soðningu,   svo og purusteik,  lambahrygg og kjúklingi.

  SS pylsa er besti heilsubiti á milli mála og kvöldsnakk.  Öfugt við epli þá hefur hún ekki verið úðuð með skordýraeitri.

  Einn af mörgum eiginleikum SS pylsu er sá að hana má borða beint úr pakkanum.  Einnig má hita hana í 20 sek í örbylgjuofni.  Færri vita að upplagt er að geyma hana í frysti.  Gaddfreðin er hún bragðgott og meinhollt sælgæti sem hlær að rjómaís og frostpinnum.

  SS pylsa hefur reynst vel þeim sem vilja hætta að reykja.  Þá handleika menn hana á milli fingra líkt og sígarettu og sjúga hana af og til eins og snuð.

  SS pylsa er besta val fyrir grænmetisætur.  Í henni er einugis kjöt af dýrum sem lifa alfarið á grænmeti.    

  Fremstu sitjandi íþróttamenn landsins borða SS pylsu.  Það á jafnt við um bridge spilara og skákmenn.  Þetta á einnig við um þá sem eru fljótastir að hlaupa á eftir tuðru,  hvort sem er til að sparka af og til í hana eða hrinda frá sér með höndum.  

  Það er næstum því sannað að fólk sem neytir SS pylsu reglulega er gáfaðra og fljótara að leysa einföld reikningsdæmi á blaði en þeir sem vita ekki af henni.   

  Ein SS pylsa jafngildir fjögurra klukkutíma puði á líkamsræktarstöð.  

      

Hættulegustu borgir heims

 

 

 

 

 

 

 

 

 

 

 

 

 

  Þegar land er lagt undir fót er ástæða til að huga að öryggi.  Í sumum útlendum borgum er mannslíf til fárra fiska metið.  Aðrir grófir ofbeldisglæpir og glæpir af öllu tagi eru fylgifiskar.  Margir eru svo fátækir að þeir hafa engu að tapa.  

  Hér er listi yfir varasömustu borgir heims.  Hann spannar einungis borgir sem hafa að lágmarki íbúafjölda Íslands,  300.000.  

1   Caracas,  Venezuela

2   San Pedro Sula,  Hondúras

3   San Salvador,  El Salvador 

4   Acapulco,  Mexíkó

5   Maturin,  Venezuela

6   Distrito Central,  Hondúras

7   Valencia,  Venezuela

8   Palmira,  Colombíu

9   Höfðaborg,  Suður-Afríku

10  Cali,  Colombíu

11  Ciudad Guayana,  Venezuela

12  Fortaleza,  Brazilíu

13  Natal,  Brazilíu

14  Salvador,  Brazilíu

15  St. Louis,  Bandaríkjum Norður-Ameríku

16  Joao Pessoa,  Brazilíu

17  Culiacan, ekki í Skeifunni heldur Mexíkó 

18  Maceio,  Brazilíu

19  Baltimore,  Bandaríkjum Norður-Ameríku (beint flug frá Íslandi)

20  Barquisimeto,  Venezuela

21  Sao Luis,  Brazilíu

22  Cuiaba,  Brazilíu

23  Manaus,  Brazilíu

24  Cumana,  Venezuela

25  Guatemala,  Guatemala

26  Belem,  Brazilíu

27  Feira de Santana,  Brazilíu

28  Detroit,  Bandaríkjum Norður-Ameríku

29  Colania y Aparecida de Colania, Brazilíu 

30  Teresina,  Brazilíu

31  Vitoria,  Brazilíu

32  New Orleans,  Bandaríkjum Norður-Ameríku

33  Kingston,  Jamaíka 

34  Gran Barcelona,  Venezuela

35  Tijuna,  Mexíkó

 

Fjöldamorð í 15 ára afmæli

Færeyskt veitingahús á Íslandi

  Eftir röskan mánuð,  í mars,  munu Færeyingar opna nýjan veitingastað hérlendis.  Hann verður í fimm kílómetra fjarlægð frá miðbæ Reykjavíkur.  Nánar tiltekið á Grensásvegi 10.  Súper staðsetning.  

  Þetta er ekki í fyrsta skipti sem Færeyingar koma nálægt matseld á Íslandi. Marentza Poulsen (systir Elisar Poulsen) hefur í áratugi fóðrað svanga Íslendinga.  Frá því á síðustu öld hefur hún rekið af rausnarskap Flóruna,  veitingastað í Grasagarðinum í Laugardal.   

  Á Laugavegi 170 er rekin færeyska Smurbrauðsstofa Sylvíu.  Árlega er þar boðið upp á færeyska viku.  Þá er á borðum bragðsterk og matarmikil færeysk ræstkjötsúpa ásamt brauði með ýmiskonar færeysku áleggi.  Þar á meðal skerpukjötinu góða.  

  Af og til eru spennandi færeyskir dagar í Fjörukránni.  Þá kokkar einn af heimsins bestu kokkum,  Birgir Enni,  færeyskar kræsingar af einskærri snilld.  Birgir er föðurbróðir tónlistarmannanna vinsælu Brands Enni og Tróndar Enni.  

  Færeyingarnir sem blanda sér í veitingahúsaflóruna á Íslandi í mars opnuðu í fyrra veitingastaðinn Angus Steakhouse í Þórshöfn í Færeyjum. Frá fyrsta degi hefur verið troðið út úr dyrum.  Þar á meðal hafa íslenskir túristar fjölmennt, tekið hraustlega til matar síns og komið dag eftir dag.  Fá aldrei nóg af því góða. 

  Eðlilegt næsta skref til að koma til móts við íslenska aðdáendur er að opna útibú í Reykjavík.

  Angus Steakhouse tilheyrir samnefndri enskri matsölukeðju.  Enskir kokkar hafa almennt ekki hrifið Íslendinga.  Öfugt við færeyska kokka.  Í því liggur stóri munurinn.  Færeyingar kunna þetta.  

   

Þorir þú að kaupa bíl af þessum manni?

  Þannig er oft spurt þegar heiðarleiki og trúverðugheit einhvers eru til umræðu.  Nú er spurt svona að gefnu tilefni.  Fíat páfans er til sölu þessa dagana.  Um er að ræða smábílinn Fiat 500L.  Hann er skráður á götu 2015 og nánast ekkert keyrður;  bara í rólegheita vikurúnt um New York,  Fíladelfíu og Washington DC.  Hvorki hefur verið reykspólað á bílnum né brunað á ofsaakstri yfir hraðahindranir.

  Fullyrt er að páfi hafi gengið vel um bílinn.  Hvorki reykt inni í honum né djammað að ráði.   

  Númerið er SCV 1.

Heimskir glæpamenn

 Margir glæpamenn eru heimskir.  Þess vegna eru þeir glæpamenn.  Af sömu ástæðu tekst oft að koma upp um þá og koma þeim á bak við lás og slá.  Þar eiga þeir heima.  Þeim er refsað fyrir heimsku umfram annað.  

  Þútúpan er full af myndböndum af heimskum glæpamönnum.  Þó er ekkert myndband til af áströlskum glæpamanni sem hugðist stela bensíni úr stórri rútu.  Hann setti slöngu ofan í tank rútunnar og saug upp úr honum "munn við munn" til að dæla bensíni þaðan ofan í sinn bensínbrúsa.

  Svo illa tókst til að þjófurinn ruglaðist á bensíntanki og klósetttanki rútunnar.  Hann saug upp úr klósetttanknum.  Sennilega varð hann fljótlega var við að bragðið sem hann fékk upp í sig var ekki af bensíni.  Ælur úr honum á vettvangi benda til þess.

 

  

Óljóst hver skaut fyrst

Fólk trúir

  Fólk er trúgjarnt.  Það er eðlislægt.  Alveg frá því að börn fæðast þá verða þau að trúa foreldrum sínum og öðrum uppalendum.  Þannig læra þau.  Ungur nemur,  gamall temur.  Í gegnum alla skólagöngu verða börn að trúa kennurum sínum.  Það hjálpar þeim þegar kemur að prófum.  

  Trú fólks er ólík eftir því hvar það er statt á jörðinni.  Það fer eftir uppeldi og  umhverfi.  Meirihluti Íslendinga trúir á tilvist álfa og huldufólks.  Líka á framhaldslíf og miðla.

  Á Indlandi,  næst fjölmennasta ríki heims (á eftir Kína),  trúa íbúar því að beljur séu heilagar. Því ekki það?  Er eitthvað sem bendir til annars?  

  Yfir 80% Indverja eru hindúar.  Þeir trúa á endurholdgun þvers og kruss um dýraflóruna.  Í næsta lífi getur maður endurfæðst sem ánamaðkur.  Er eitthvað sem mælir gegn því? 

  Víða í Afríku og karabíska hafinu trúir fólk á galdra.  Svokallaða vúdú-töfra.  Vúdú-læknar þykja bera af öðrum læknum.  Þeir fara með töfraþulur,  slátra hænum og eitthvað svoleiðis til að lækna allskonar kvilla.  Með því að útbúa litla brúðu og stinga í hana með nálum má hrekkja óvini.  Jafnvel drepa hann ef vel tekst til.  Kannski ekki samdægurs en ekki seinna en eftir 10 - 20 ár.  

  Guðir og staðgenglar þeirra sem fólk trúir á eru á bilinu 5000 til 7000.  Fer dálítið eftir því hver telur og hvernig.  Veðurguðirnir standa okkur Íslendingum einna næst.  Þeir eru svo uppátækjasamir.

  Í áranna rás hefur fjöldi fólks trúað því að jörðin sé flöt eins og flatlús.  Enda ekki fráleitt og margt er líkt með skyldum.  Í Bretlandi má finna formleg samtök flatjarðunga.  Þau láta ekki mikið fyrir sér fara.  Félagar þeirra eru feimnir.

  Á allra síðustu misserum er farið að bera á því í Bandaríkjum Norður-Ameríku að nýstirni opinberi trú sína á flatri jörð. Rökin eru alveg góð - eins og fyrir svo margri annarri trú.  

    

Segir milljónum að jörðin sé flöt

Ofbeldi má ekki líða

  Margir skólar - jafnvel flestir - eru blessunarlega lausir við einelti.  Svo eru það hinir,  þessir örfáu skólar,  þar sem einelti er viðvarandi vandamál.  Í sumum þeirra til margra áratuga.  Þar liggur ábyrgðin hjá skólastjórnendum.  Þeir eru vanhæfir.  Það segir sig sjálft.

  Börn búa við skólaskyldu.  Skólastjórnendum ber að tryggja að öllum líði vel í skólanum.  Auðvitað er og verður alltaf til í barnahópum eitthvað sem við getum kallað saklausa stríðni.  Glettni er af hinu góða.  Glaðvær krakkahópur skemmtir sér saman í leikjum og sprelli.

  Ofbeldi er allt annað.  Það er glæpur.  Það á að taka á ofbeldi barna á svipaðan hátt og ofbeldi fullorðinna.  Engum á að líðast að skemma fatnað skólasystkina,  skólatöskur eða annað.  Svoleiðis verður að taka snöfurlega á.  Láta skemmdarvarginn bera ábyrgð á gerðum sínum og bæta að fullu fyrir allar skemmdir.  Láti kvikindið sér ekki segjast er ekki um annað að ræða en fjarlægja skemmda eplið.  Til að mynda með brottvikningu úr skóla.  Eða setja á það nálgunarbann.  Eða hvað sem er annað sem bindur snöfurlega endi á ofbeldið.

   

Eitt sinn stríðni, nú ofbeldi

Gátan leyst

Fréttir hafa borist af eldri borgurum í Reykjavík,  höfuðborg landsins.  Þeir eru svangir.  Einkum og sér í lagi um helgar.  Fréttirnar af þessu eru um margt óljósar.  Jafnvel villandi.  Sumir fullyrða að matur eldri borgara sé eldaður af alúð.  Hann sé skammtaður samviskusamlega ofan í þar til gerð hitabox.  Vandamálið er að maturinn hefur ekki skilað sér til eldri borgara.  Einhver annar borðaði hann.  Nú er komin skýring á.  Sá sem borðaði mat eldri borgara hefur játað:  "Dagur borðaði mat eldri borgara".

  

Dagur borðaði mat eldri borgara

Innflytjendur líkna og hjúkra

  Fólk hefur allskonar viðhorf til innflytjenda.  Það er eðlilegt.  Innflytjendur eru allskonar.  Eins og Íslendingar.  Eins og fólk út um allan heim.  Sem betur fer.  Mannlífið væri litlaust og leiðigjarnt ef allt fólk í heiminum væri alveg nákvæmlega eins að öllu leyti.

  Í nágrannalöndum okkar taka innflytjendur til hendinni á heilsugæslustöðvum og sjúkrahúsum.  Ekki síst við skúringar og önnur þrif.  Líka sem hjúkrunarfræðingar.  Ennfremur sem læknar.  Í Lúxemborg eru fjórir af hverjum tíu starfandi læknum innflytjendur.   

 Í Bretlandi eru þeir rösklega þriðjungur (35,4%) allra lækna.  Í Svíþjóð 30%.  25,4% í Belgíu og 19,5% í Frakklandi.

Vita lítið um hatursglæpi á Íslandi

Listamaður gegn listamönnum

  Í fyrra sótti sjónhverfingamaður,  Einar Mikael,  stíft í og náði að suða út rösklega hálfrar milljón króna styrk frá Nýsköpunarsjóði.  Hann er svo heimsfrægur í Grænlandi að hann neyðist til að versla með sólgleraugu á nefi í matinn dulbúinn sem Spiderman um miðja nótt í Hagkaup í Skeifunni.

  Þá gerist það að helstu rithöfundar landsins fá listamannalaun upp á rösklega 300 þúsund kall á mánuði.  Heimsfrægasti íslenski töframaður í Grænlandi brást hinn versti við.  Í Spædermanbúningi úti á bílastæði við Hagkaup í Skeifunni um miðja nótt sendi hann frá sér yfirlýsingu.  Í henni fordæmdi hann þá frekju í fólki að sníkja pening úr opinberum sjóðum.  Hann hvatti almenning til þess að sniðganga sníkjudýrin.  Búinn að steingleyma því að hann fór þar fremstur í flokki.

  Spyrja má hvort að spilagaldrar Einars auðgi andann,  næri þjóðarsálina,  umfram Draumaland Andra Snæs eða bækur Hallgríms Helgasonar og Gerðar Kristnýjar. 

  Kannski er það góð uppástunga hjá Einari að sniðganga hann og aðra sem sótt hafa um og fengið aura úr opinberum sjóðum. Til að mynda bændur, leikhús og kvikmyndir.

 

Óskalögin

  Einn kunningi minn er afskaplega bannglaður.  Hann er stöðugt að nefna eitt og annað sem hann telur þörf á að banna.  Engu að síður byrjar hann allar tillögur um það með formálanum:  "Eins og ég er mikið á móti boðum og bönnum þá tel ég vera nauðsynlegt að banna..."

  Bretar eru töluvert bannglaðir.  Samt eru þeir ekki löghlýðnir.  Til að mynda vanrækir annar hver hundeigandi að merkja kvikindið með míkróflögu.  Sekt við vanrækslunni er 100 þúsund ísl. kr.  

  Samkvæmt skoðanakönnun vilja Bretar fá fjölda lagabreytinga nú þegar.  Þessar njóta mest fylgis:

1.  Bannað verði að spila músík í almenningssamgöngutækjum (41%)

2.  Flugeldar verði bannaðir alla daga ársins nema 5. nóvember (37%)

3.  Bannað verði að setja fætur upp á sæti í almenningssamgöngutækjum (36%) 

4.  Skilaréttur á vörum til verslana verði lengdur upp í 60 daga (35%)

5.  Útskráning af hótelherbergjum verði síðdegis í stað morguns (35%)

6.  Bannað verði að spila jólalög í almenningsrými fyrir 1. des (35%)

7.  Jólaauglýsingar verði bannaðar fyrir 1. des (34%)

8.  Veitingahús verði skylduð til að bjóða upp á barnlaus svæði (32%)

9.  Fjögurra daga vinnuvika verði lögfest (31%)

10. Kennsla í dýravernd verði skyldufag í almennu skólanámi (31%)