Íslenskir launþegar eru ofdekraðir

  "Tölur ljúga ekki," sagði vinnufélagi minn í álverinu í Straumsvík þegar talið barst að helför gyðinga á tímum nasista í Þýskalandi.  Hann var nasisti og veifaði pappírum sem sýndu að gyðingum fækkaði lítið sem ekkert á árum seinni heimsstyrjaldarinnar.  

  Þetta var á fyrri hluta áttunda áratugarins.  Löngu fyrir daga tölvu,  internets og wikipedíu.  

  Í dag er auðvelt að fletta upp á netsíðum og kanna áreiðanleika ýmissa fullyrðinga.  Gleypa þær hráar eða kafa dýpra í dæmið.  Allt eftir því hverju menn vilja trúa.

  Á netsíðu fjármálaráðuneytisins er upplýst að laun á Íslandi séu þau hæstu í heimi.  Sem dæmi er tekið að læknar á Íslandi séu með hálfa aðra milljón í mánaðarlaun.  Á sama tíma lepji læknar í nágrannalöndum dauða úr skel. Með herkjum nái þeir að nurla saman launum sem í besta falli eru þriðjungi lægri.  Annað eftir því. Íslenskt heilbrigðiskerfi ku vera það besta í heimi.  Til samanburðar er heilbrigðiskerfið í Albaníu það versta í samanlagðri Evrópu og Asíu.  Mörgum ljósárum á undan eða eftir því íslenska (eftir því hvort átt er við sjúklinga eða fjárfesta).

  Gott ef satt er.  Ég veit ekkert um þetta.  Hinsvegar þekki ég marga Íslendinga sem nýverið hafa flutt frá Íslandi til hinna Norðurlanda.  Þeir halda því fram að þeir eigi í fyrsta skipti á ævinni afgang í seðlaveskinu um mánaðarmót.  Þeir kaupi sér húsnæði og lán lækki við hverja afborgun.  Þeir kaupa sér bíla og hafa það óvænt gott fjárhagslega.  Tölur ljúga ekki.  En einhver lýgur.

 

Hæstu launin á Íslandi

Hvaða þjóðir ala af sér flesta spennandi tónlistarmenn?

  Bandarísk netsíða,  Echo Nest,  hefur tekið saman og birt áhugaverðan lista.  Einkum áhugaverðan fyrir Íslendinga.  Líka áhugaverðan fyrir flesta aðra.  Hann byggir á yfirgripsmiklum gagnagrunni.  Þar á meðal hvaða ný og nýleg lög eru oftast spiluð (10 þúsund vinsælustu lögin),  hvernig fjallað er um þau og flytjendur þeirra á netinu og svo framvegis.  Þjóðerni flytjenda er greint og íbúafjölda lands þeirra deilt í útkomuna.  Þannig fæst út listi yfir þær þjóðir sem - miðað við höfðatölu - ala af sér eftirsóttasta og mest spennandi tónlistarfólk heims.  Þessar þjóðir skipa efstu sætin:

1. Ísland

2. Svíþjóð

3. Finnland

4. Noregur

5. Bretland 

6.  Danmörk

7.  Írland

8.  Bandaríkin

9.  Ástralía

10. Holland

11. Nýja-Sjáland

12. Kanada

13. Jamaíka

14. Belgía

15. Austurríki

16.  Þýskaland

17.  Frakkland

18.  Sviss

19.  Puerto Ríco

20.  Spánn

21.  Pólland

22.  Slóvakía

23.  Ísrael

24.  Ítalía

25.  Grikkland

 

 

 

 

 

 

 

 

  Listanum er fylgt úr hlaði með vangaveltum um leyndarmálið á bak við það að Norðurlöndin fimm raði sér í 6 efstu sætin.  Tilgáta er sett fram um að þetta hafi eitthvað með veðurfar að gera.  Þjóðirnar haldi sig innandyra vegna kulda yfir vetrartímann.  Í þeim aðstæðum verði til spennandi tónlist sem heillar hlustendur.  

Agg-gagg-gagg, sagði tófan á grjóti

  Eðlilega vakti það mikla athygli á sínum tíma þegar helstu fálkar bankahrunsins voru í aðdraganda hrunsins merktir með fálkatákni af forseta Íslands. Það var táknrænt.  Eðlilega vekur það einnig umtal og umræðu þegar kóngurinn á Bessastöðum bannar nú einum þeirra að bera fálkatáknið.  Heppilegra væri að skikka hann til að vera merktur fálki.  

   

Sviptur rétti til að bera orðuna

Hættulegt grænmetisfæði

  Sumir halda að grænmetisfæði sé hollt.  Þeir sömu óttast að kjöt,  fiskur og allar aðrar dýraafurðir séu óhollar.  Þetta er rugl.  Það hefur verið hrakið rækilega og ítrekað með vísindalega rannsóknum.

 Reyndar þarf engar rannsóknir.  Það dugir að virða grænmetisætu fyrir sér.  Hún er hrukkótt,  litlaus, grá og guggin;  máttleysisleg og eins og við það að falla í yfirlið (og gerir það af og til svo lítið ber á).

  Verra er að grænmetisætan er iðulega fjarræn og döpur til sljórra augna.  Einnig eins og ringluð á svip og glaseyg.  Hún er niðurlút og forðast augnsamband.

  Áströlsk rannsókn leiddi í ljós að grænmetisætur eru svartsýnar og hafa litla tiltrú á bjartri framtíð.  Fimmtungi fleiri þeirra glíma við þunglyndi umfram kjötætur.  Þriðjungi fleiri upplifa áfallastreituröskun og þjást af hræðilegum kvíðaköstum.  Liggja skjálfandi í fósturstellingu undir sæng.  Óttasst allt hið versta án þess að vita hvað.    

  Kjöt inniheldur ýmis holl og nauðsynleg vítamín og steinefni sem eru fágæt og aðeins í litlu magni í einstaka grænmeti.  Það eru samt önnur hollefni í grænmeti.  Það er ástæða til að hafa það sem meðlæti.  Bökuð kartafla er heppileg með grilluðu kjöti.  

  Hér eru tvær þekktar konur,  matgæðingar,  á sextugsaldri.  Önnur er kjötsælkeri og dálítið eldri.  Hin slafrar einungis í sig tuggu og tuggu af grasi og jórtrar á rótarávöxtum.  Það leynir sér ekki hvor er hvað. 

  

Ný bók frá Helga Seljan

  Fyrir fimm árum kom út bókin 1001 gamansaga eftir Helga Seljan.  Hún naut mikilla vinsælda.  Enda sögurnar 1001 hver annarri hnyttnari.  Allar meira og minna sannar.  

  Eftir helgi kemur út ný og stórskemmtileg bók frá Helga,  Ljósbrot liðinna stunda.  Hún inniheldur gamansögur, glettna bragi,  smásögur,  kvæði,  æviþætti og fleira.  

  Helgi var kennari,  skólastjóri,  svo alþingismaður,  síðar fræðslustjóri Öryrkjabandalagsins og loks framkvæmdastjóri þess.  Jafnframt kom hann fram um áratugi með gamansöng og sögur.  

 

Orðaleikir Jóns Þorleifssonar - framhald frá í gær

 

  1988 hófust útsendingar Útvarps Rótar.  Þetta var merkileg útvarpsstöð.  Hún var starfrækt til 1991.  Uppskriftin var almannaútvarp.  Allskonar félög og einstaklingar stóðu að stöðinni.  Dagskrá var fjölbreytt.  Meðal aðstandenda og dagskrárgerðarfólks voru allt frá trúfélögum og stjórnmálahreyfingum til rokkmúsíkunnenda og allskonar.  Gott ef Öryrkjabandalagið og ég man ekki hverjir komu að borðinu.

  Rótin var fjármögnuð með hlutabréfum og auglýsingum.  Fólk og félagasamtök keyptu ódýr hlutabréf í stöðinni og áttu þá greiða leið að dagskránni.  Þetta voru skemmtilegir tímar.  Margir sem hófu feril sinn á Útvarpi Rót hafa síðar haslað sér völl í öðrum fjölmiðlum.  Dæmi um það eru Stjáni stuð,  Jóhannes K. Kristjánsson tæknitröll 365 miðla,  Andrés Jónsson almannatengill og vinsæll álitsgjafi,  Guðlaugur Falk þungarokksgítarleikari,  Sveinn H. Guðmarsson (RÚV),  Kristinn Pálsson (Rás 2),  Guðrún Ögmundsdóttir síðar alþingiskona,  Ragnar "Skjálfti" veðurstofustjóri og Soffia Sigurðardóttir sem síðar rak Útvarp Suðurlands.  Mig minnir að Kiddi Rokk í Smekkleysu og Kiddi kanína í Hljómalind hafi einnig komið við sögu.

  Nema hvað.  Þegar unnið var að undirbúningi Útvarps Rótar birtist Jón Þorleifsson,  rithöfundur og verkamaður,  heima hjá mér.  Hann veifaði hlutabréfi í Útvarpi Rót.  Það kom mér á óvart í aðra röndina.  Ég spurði:  "Hvað kemur til að þú kaupir hlutabréf í útvarpi Rót?"

  Jón svaraði:  "Þetta er samkvæmt læknisráði.  Ég hef verið heilsulítill að undanförnu." 

  Við frekari eftirgrennslan svaraði hann áfram í dularfullum útúrsnúningum.  Að lokum upplýsti Jón að hann hefði heimsótt heimilislækni sinn,  Svein Rúnar Hauksson.  Sá hefði bent honum á að kaupa sér aðgang að Útvarpi Rót.  Þar gæti hann komið á framfæri gagnrýni á verkalýðshreyfinguna.  Sem reyndi svo aldrei á.  Jóni varð fljótlega uppsigað við Útvarp Rót.  Fyrst út af því að Samtökin 78 (samtök samkynhneigðra) komu að dagsrká stöðvarinnar.  Fleira í dagskránni lagðist illa í Jón.  Eins og gengur.  Ég var með rokkmúsíkþátt á Útvarpi Rót.  Alveg burt séð frá hlutabréfi Jóns í stöðinni þá skreytti ég dagskrána stundum með því að lesa upp eitt og eitt ljóð eftir Jón í bland við pönkrokk.   

Útvarp Rót

Fleiri sögur af Jóni HÉR

Orðaleikir Jóns Þorleifs

  Jón Þorleifsson,  rithöfundur og verkamaður,  var orðhagur.  Þegar best lét var hann talandi skáld.  Stökur hrukku upp úr honum af minnsta tilefni.  Verra var að undir hæl var lagt hvort að hann hélt þeim til haga.  Margar gleymdust jafn óðum.

  Einn daginn birtist Jón með sjúkraumbúðir og plástra yfir ennið.  Mér brá við og spurði tíðinda.  Jón svaraði því til að maður með hárbeittan hníf að vopni hafi lagt til sín.  Góðu fréttirnar væru þær að atlagan hafi ekki beinst að öðrum líkamshlutum.  "Ég held fullri heilsu og það skiptir mestu máli," útskýrði hann.

  Við nánara spjall kom í ljós að Jón hafði leitað til lýtalæknis.  Hann hafði látið fjarlægja hnúð af enninu.  Honum var stríðni af þessum hnýfli.  Vegna hans var hann uppnefndur Jón kindarhaus.  Uppnefnið var ósmekklegt og Jón tók það nærri sér.  Margir áttuðu sig ekki á því.  Jón var algengasta karlmannsnafn á Íslandi.  Menn sem umgengust marga Jóna aðgreindu þá með uppnefnum.

  Það sem fyllti mælinn hjá Jóni var pistill í Lesbók Morgunblaðsins eftir Ólaf Ormsson,  rithöfund.  Í pistlinum rifjaði hann upp samskipti við samtíðamenn.  Jón var þar nefndur ásamt öðrum í upptalningu án þess að hans væri frekar getið.  Þarna var hann nefndur Jón kindarhaus.  Ég er þess fullviss að Ólafi gekk ekkert illt til.  En vissulega var þetta ónærgætið og ruddalegt.  Jón sýndi mér þessa blaðagrein og var mikið niðri fyrir.  Honum var það mikið brugðið við að hann lét þegar í stað fjarlægja hnúðinn.  Svo vildi til að á sama tíma spurði barnung systurdóttir mín Jón í sakleysi að því af hverju hann væri með "kúlu á enninu". 

 

  Framhald á morgun.

  Fleiri sögur af Jóni má lesa með því að smella HÉR 

Hver platar hvern?

 

 

 

 

 

 

 

 

 

 

 

 

 

 

  Síðasti Freyjudagur var af verslunarmönnum kallaður Black Friday.  Á þannig degi eru vörur verslunarinnar seldar með auglýstum 25 - 70% afslætti.  Þó að uppátækið sé kennt við Freyjudag þá gildir afslátturinn í flestum verslunum yfir alla helgina.  Í dag tekur við Cyber Monday.  Þá er hægt að gera góð kaup í netheimum.

  Þegar um risaútsölu er að ræða bregður verslunin iðulega á leik.  Það er ekki góður bisness að borga með vörunni.  Algengt bragð er að hækka vöruverð í tæka tíð.  Síðan er gefinn afsláttur.  Þegar upp er staðið borgar kúnninn hefðbundið verð fyrir vöruna.

  Þeir sem ganga lengst í leiknum hækka verðið svo ríflega að á útsölunni er varan seld á hærra verði en venjulega.  

  Sumir standa verslunina að verki.  Þá brýst fram óánægja.  Fólki finnst eins og það hafi verið haft að fífli.  Sem er tilfellið.  

  Þegar betur er að gáð er það kaupandinn - umfram aðra - sem hefur haft sjálfan sig að fífli.  Hann var ánægður með kaupin til að byrja með.  Honum þótti verðið það gott að hann keypti vöruna.  Þar með borgaði hann í raun sanngjarnt verð.  

 

Baráttan um líf og dauða

  Við kynmök karls og konu keppa sprelllifandi sæðisfrumur karlsins um að frjóvga egg konunnar.  Sumar hafa verið staðnar að því að beita óheiðarlegum aðferðum til að bregða fæti fyrir keppinautana.  

  Hvernig sem að því er staðið þá nær aðeins ein sæðisfruma í mark.  Hinar deyja drottnum sínum sorgmæddar á næstu dögum.  Full ástæða er til að samhryggjast þeim.  Eðlileg viðbrögð eru að kveðja þær á sama hátt og þegar aðrir ættingjar falla frá.

  Fruman sem nær að skora elur af sér fóstur.  Á næstu 9 mánuðum tekur það á sig mannsmynd og lítur loks dagsins ljós.

  Því miður eru ekki öll börn velkomin í heiminn.  Margar mæður láta eyða fóstri.  Afstaða til þess er á ýmsa vegu.  Sumum - einkum körlum fremur en konum - þykir það lítið meira mál en örlög sæðisfrumu sem nær aldrei í höfn.  Öðrum þykir það ekkert meira mál en þegar konur missa fóstur af náttúrulegum ástæðum.  Það er algengt.  

  Svo eru það þeir sem skilgreina kviknað líf öllu æðra.  Ýmist alveg frá sæðisfrumu til frjóvgaðs eggs.  Þeir sem lengst ganga hika ekki við að drepa lækna og hjúkrunarfólk sem framkvæma fóstureyðingu - í heilagri baráttu fyrir því að vernda líf.  Iðulega er það sama fólk fylgjandi dauðarefsingu á óheiðarlegum.  Svo ekki sé minnst á stuðning við hernað í útlöndum.  Þá er hverju drápi á meintum óvinum fagnað með góli og ástríðufullri þakkarbæn til guðanna.

„Það er komið nóg“

Bestu plötur tíunda áratugarins

  Breska tónlistarblaðið Q hefur tekið saman lista yfir bestu plötur tíunda áratugar síðustu aldar.  Listinn byggir á niðurstöðu margra helstu engilsaxneskra poppara.  Hann ber þess merki.  Sem er ekki nema ágætt í aðra röndina  Engilsaxneskir popparar eru ráðandi á heimsmarkaði. 

  Þessar plötur raða sér í efstu sætin.  Fátt kemur á óvart.  Og ekki ástæða til háværra mótmæla.

1.   OK Computer með Radiohead

2    Maxinquaye með Tricky 

3    In Utero með Nirvana (Nevermind er "aðeins" í 29 sæti) 

4    Grace með Jeff Buckley

5    Ill Communication með Beastie Boys

6    Deput með Björk (Homogenic er í 97. sæti)

7    Endtroducing með DJ Shadow

8    Definitely Maybe með Oasis

9    Diffrent Class með Pulp

10   Dig Your Owen Hole með The Chemical Brothers 

Forsetaframbjóðandi ofsóttur

  Einn af þeim sem sækist eftir því að verða frambjóðandi Republikanaflokksins til embættis forseta Bandaríkja Norður-Ameríku er Donald Trump.  Hann sætir einelti af hálfu tónlistarmanna,  fjölmiðla og ýmissa fleiri.  Það er ljótt.  Hann er hrakyrtur,  hæddur og smáður.  Samt er það þannig að eineltið er honum til framdráttar.  Vinsældir hans aukast og haldast í hendur við hverja ágjöf sem hann mætir.

  Á meðan Donald Trump baðar sig í sviðsljósinu eiga aðrir kandídatar ekki möguleika hjá reppum.  Ekki síst þegar hann hampar því að sækja í uppskrift Hitlers og félaga í þýska nasistaflokknum.  Til að mynda boðar hann áform um að merkja múslima með stjörnu á sama hátt og nasistar merktu gyðinga,  samkynhneigða og fleiri.   

  Þá leggst vel í marga hugmynd hans um að reisa "Berlínarmúr" á landamærum Mexikó og Bandaríkjanna.  Þannig verði Mexíkóum gert illmögulegt að flæða yfir Bandaríkin.  Trum veit það (sennilega) sjálfur en ekki almenningur að 14% fleiri flýja frá Bandaríkjunum til Mexíkó en öfugt.    

  Samskipti Trumps við vinsæla tónlistarmenn eru brösuleg.  Hann hóf kosningabaráttu sína með einkennislagi úr smiðju Njáls Unga,  "Rockin´ in the Free World".  Njáll brást hinn versti við og bannaði notkun hans á laginu.  Það kom Trump í opna skjöldu.  Hann taldi þá Njál vera góða vini.  Þar fyrir utan hafði hann borgað umboðsskrifstofu Njáls pening fyrir lagið.  En Njáli var ekki haggað.  

  Þá var ekki um annað að ræða en taka upp kosningalag úr smiðju REM,  "It´s the end of the World As We Know It".  Hljómsveitin starfar ekki lengur.  En liðsmenn hennar tóku höndum saman og bönnuðu Trump að nota lagið.  Þeir létu jafnframt ljót orð falla um Trump.  Þetta kom honum í opna skjöldu vegna þess að hann var búinn að borga umboðsskrifstofu REM fyrir notkun á lagiðnu.  Þar fyrir utan hvarflaði ekki að honum að hljómsveit sem er hætt fyrir löngu færi að skipta sér af.  

  Nú voru góð ráð dýr.  Söngvari hljómsveitarinnar Aerosmith,  Stebbi Tyler,  er góðvinur Trumps.  Þeir hafa stússað margt saman.  Leikið sér í golfi og fl.  Trump gerði lag Aerosmith "Dream On" að kosningalagi sínu eftir vandræðaganginn með lög Njáls Unga og REM.

  Stebbi hryggbraut vin sinn með því að banna honum að nota lagið.  Til að byrja með trúði Trump honum ekki.  Hélt áfram að nota lagið.  Leikar fóru þannig að Stebbi leitaði til dómstóla og fékk lögbann sett á notkun Trumps á laginu.  

  Stebbi hefur útskýrt þetta þannig að eitt sé að vera vinur frambjóðandans.  Annað að kvitta undir pólitík hans.  

  Pólitík hans er þó ekki verri en svo að hún speglar viðhorf meirihluta reppa í Bandaríkjum Norður-Ameríku.  Það er ekkert nema gott um það að segja.

 

Trump hæddist að fötluðum blaðamanni

Gríðarlega spennandi tækifæri

 

  Í Hafnarfirði ríkir mikil gleði og tilhlökkun vegna yfirvofandi endanlegrar lokunar Álversins í Straumsvík.  Þarna opnast ótal möguleikar fyrir spennandi verkefni.  Kiddi kanína - oft kenndur við Hljómalind - og félagar hans í Menningar- og listafjelagi Hafnarfjarðar eru komnir á flug.  

  Meðal hugmynda sem fleygt hefur verið fram er að breyta svæðinu í Ylverið í Straumsvík,  The Green Lagoon.  Þar yrði í Edengörðum ræktað grænmeti af öllu tagi.  Einnig fræ,  ávextir,  baunir,  hnetur og svo framvegis.  Þar á milli verður glæsihótel með heitum inni- og útisundlaugum, til viðbótar heimsins bestu aðstöðu til sjósunds. Nóg af ódýru niðurgreiddu rafmagni.

  Í Straumsvík er góð hafnaraðstaða.  Þarna verður heitasti áfangastaður skemmtiferðaskipa hvaðanæva úr heiminum.  Staðsetningin er frábær þarna í útjaðri höfuðborgarinnar;  Bláa lónið og flugstöðina í Sandgerði nánast í göngufæri.  Áhugaverð og sérstæð náttúra í hlaðvarpanum.  Álfar í hverjum hól og vel klætt huldufólk sem leikur við hvurn sinn fingur. 

„Ákaflega sérstakt“ ef álverið lokar

Óvænt útspil

  Til fjölda ára hefur þjóðin verið samhuga um nauðsyn þess að fjölga lögreglumönnum.  Embættismenn - sem hafa með málaflokkinn að gera - eru þar fremstir í flokki.  Víða um land er skortur á lögregluþjónum.  Verst er samt ástandið á höfuðborgarsvæðinu.

  Þrátt fyrir algjöra samstöðu almennings og stjórnmálamanna í málinu hefur ekkert gerst svo lengi sem elstu menn muna.  Ekkert.  Nema núna á dögunum:  Lögmaður að nafni Sveinn Andri Sveinsson steig fram og stingur upp á því að lögregluþjónum landsins verði fækkað um einn.  

  Lögreglustjóri höfuðborgarsvæðisins tekur vel í þennan nýja flöt á lögregluflota landsins.  Hann ætlar að skoða uppástungu lögmannsins.  Kannski er þetta farsælasta lausnin á manneklu lögreglunnar.  Nýstárlegar og frumlegar hugmyndir hafa oft reynst vel.

  

Mál Bigga löggu til skoðunar

Neyðarleg mistök

  Frægt fólk vekur athygli hvar sem til þess sést.  Einkum í útlöndum.  Það allra frægasta er umkringt "lífvörðum".  Þeirra hlutverk er að verja frægu manneskjuna fyrir ágangi og áreiti almennings.  Almenning þyrstir í eiginhandaráritun frægra.  Á síðustu árum hefur bæst við ljósmynd af sér með frægum.

  Vandamálið er að oft ber óskhyggja og ákafi almenning ofurliði.  Það þekkja allar manneskjur sem líkjast frægu fólki.  

  Fyrir nokkrum árum spilaði sænska hljómsveitin Europe á G!Festivali í Færeyjum.  Hún var ofurfræg 1986 og næstu ár þar á eftir.  Þökk sé lögum á borð við "Final Countdown" og "Cherrie".  Svo komu fram á sjónarsvið rokksins Guns N´ Roses og Nirvana.  Europe hvarf í skuggann og féll í gleymskunnar dá.

  Í Færeyjum bar enginn kennsl á liðsmenn Europe.  Þessir áður snoppufríðu drengir voru orðnir gráleitir miðaldra menn.  Enn voru þeir samt í leðurjakkanum og snjáðu gallabuxunum.  Þeir sem enn gátu skörtuðu síðu hári.  

  Á G!Festivali var einnig kvennarokksveit frá Vestmannaeyjum,  VaGínas.  Skömmu fyrir heimferð komu stelpurnar auga á liðsmann Europe.  Honum var óðar stillt upp í myndatökur með þeim og krafinn um eiginhandaráritun á alla tiltæka pappíra.

  Í flugvélinni veifuðu stúlkurnar sönnunargögnum af kynnum sínum af Europe.  Ég sá strax að áritunin var mun færeyskri en sænsk.  Jógvan á Heygum.  Maðurinn á myndunum var að sönnu síðhærður og klæddur leðurjakka og gallabuxum.  Að öðru leyti ekkert líkur neinum í Europe.  

 

 

 

 

 

 

 

 

  Neyðarleg mistök af þessu tagi eru algeng.  Mörg slík hafa orðið aðhlátursefni á Twitter og Fésbók. Eitt vandamálið er að tvífarinn leiðréttir sjaldnast misskilninginn.  Hann nýtur athyglinnar.  Þiggur jafnvel gjafir frá þeim uppveðraða.  Allt frá pylsu og áfengis til skartgripa.  Í besta falli þarf hann ekki að borga fyrir veitingar á matsölustöðum né tískufatnað í tískufatabúðum.  

  Þessi dama hélt að hún hefði hitt bandaríska leikarann Johnny Depp.  Hún varð svo upp með sér að hún keypti handa honum pylsu með öllu.  

 

 

 

 

 

 

 

 

 

 

 

  Hér er hinn raunverulegi Johnny Depp.  Jú, jú,  þeir eru líkir.   Aldursmunur ekki nema kannski 20 ár.  Kauði gengur augljóslega alla leið í tvífarahlutverkinu:  Alveg eins gleraugu,  alveg eins skegg...

 

 

 

 

 

 

  Gaurinn hélt að hann hefði komist í samneyti við bandaríska klámkónginn Hugh Hefner.

 

 

 

 

 

 

 

 

 

 

 

 

 

 

 

 Þrátt fyrir að vera sláandi líkir þá er Hugh þekktur fyrir myndarlegt hvítleitt nef með breiðum og rúmgóðum nösum.  Enda þarf hann á miklu súrefni að halda.  Rauðnefinn nasagranni bætir upp fyrir það sem greinir þá tvífara að með því að klæðast náttfatalegum sloppi.

 

 

 

 

 

  Bandaríska sjónvarpskonan Oprah Winfrey flýgur landshorna á milli í einkaþotu.  Tvífarar hennar ferðast í almennu rými í troðfullum farþegaflugvélum.

 

 

 

 

 

 

 

 

 

 

 

 

 

 

  Að öðru leyti hefði  þetta alveg getað verið Oprah - ef hún kynni að ferðast aftur í tímann um 20 - 30 ár.

 

 

 

 

 

 

 

 

 

  Bandarískur mótorhjólaknapi var sperrtur yfir því að hafa hitt leikarann Owen Wilson.

 

 

 

 

 

 

 

 

 

 

 

 

 

 

  Kannski var móða á sólgleraugunum. Samt svipar manninum til Owens.  Báðir ljóshærðir og með sömu hárgreiðslu. 

..

Hulunni svipt af hræðilegu leyndarmáli

  Fréttir af banksterum eru skemmtilegri en afleiðingar bankahrunsins/bankaránsins.  Er þá mikið sagt.  Skemmtilegastar eru fréttir af réttarhöldum yfir klíkunni.  Þær keppa við fréttir af vist hennar á Kvíabryggju:  Átök um rauðvín með matnum,  átök um reiðnámskeið - með og án vændis og svo framvegis.

  Verðbréfamiðlari hjá Glitni upplýsir vinnufélaga og nú alþjóð um að Jón Ásgeir hafi verið og/eða sé á djöflamerg.  Það ku vera betra en að vera á djöflasýru.  Nema það sé það sama.  Rifjast þá upp að korteri fyrir bankahrun kallaði Jón Steinar Gunnlaugsson nafna sinn viðarrenglu.  Um það má lesa hér 

  Í dag er pistill í dagblaði Jóns Ársgeirs (skráð á konu hans),  Fréttablaðinu.  Pistilinn skrifar eiginkona Ólafs Ólafssonar,  hótelgests/vistmanns á Kvíabryggju.  Henni er niðri fyrir.  Eina sinni, einu sinni enn.  Að þessu sinni sakar hún forstjóra Fangelsismálastofnunar um að brjóta á skjólstæðingi sínum,  kallgreyinu,  með því að opinbera persónugreinanlegt einkamál hans.  Það gerði hann með því að kjafta frá vel varðveittu leyndarmáli:  Að "mjög lítill hópur fanga hefði aðgang að mörgum milljónum".  

  

Jón Ásgeir á djöflamergnum

Verður að sjá

  Wayn.com er bresk netsíða.  Nafnið stendur fyrir Where Are You Now?  Hún er vettvangur og málgagn ferðamanna og ferðalaga.  Notendur eru um 20 milljónir og dreifast út um allan heim.  Birtur er á síðunni listi undir fyrirsögninni "Top Things to do in Scandinavia".  Í undirfyrirsögn segir að Svíþjóð,  Noregur og Danmörk séu æsispennandi áfangastaður að sækja heim.

  Fyrst er flaggað norðurljósum yfir Noregi.  Farið er mörgum fögrum orðum um þau.  Wayn-verjum yfirsést að norðurljósin yfir Íslandi eru miklu flottari.

 

 

 

 

 

 

 

 

  Næst er vísað á Legoland í Danmörku.  Ungum sem öldnum er lofað að þar muni þeir upplifa skemmtun ævi sinnar.  Ekkert nema gott um það að segja.

 

 

 

 

 

 

 

 

 Í 3ja sæti er Rósenborgar-kastali í Danmörku.  Nefnt er að fleiri áhugaverða kastala megi finna í Danmörku.

 

 

 

 

 

 

 

 

  Í 4ða sæti er Bláa lónið.  Það er sagt vera besta stað til slökunar sem völ er á.  Lónið hafi unnið til verðlauna og sé Íslands dýrasta djásn.

 

 

 

 

 

 

 

 

 Í 5. sæti er Tívolí-garðurinn í Danmörku.

 

 

 

 

 

 

 

 

  Í 6. sæti er Stokkhólmur,  höfuðborg Svíþjóðar.  Hún er snilld.

 

 

 

 

 

 

 

 

  Að lokum er tiltekið að ferðalangur um Skandinavíu verði að komast i hvalaskoðun við Noreg eða Ísland. 

 

 

 

 

 

 

 

 

  Í upptalninguna Wayn vantar sárlega Færeyjar.  Ég læt hér fylgja með tvær myndir þaðan því til sönnunar:

 

Sterkar stelpur - graðir strákar

  Mikið rosalega sem þær eru sterkar og flottar þessar stelpur er stigið hafa fram og sagt frá ofsóknum af hendi skólasystkina.  Þær hafa verið úthrópaðar sem druslur,  sjálfsalar og allskonar öðrum niðrandi orðum í þeim dúr.  Meðal annars í skólablaði menntaskólanema.  

  Auðvitað eru það þeir er skrifa óhróður um skólasystkini sín í þannig blöð sem eru illa innréttuð dusilmenni.  Þeirra er skömmin.  Það er ekkert nema í góðu lagi að stelpur kyssi stráka,  strákar kyssi stelpur og fólk af öllum kynjum kyssi hvert annað og stundi kynlíf þegar þannig stendur á.

  Sá sem kallar manneskju druslu eða eitthvað í þá veru er fífl.  

Lét bólfélagana skrifa undir þagnareið

Karlinn sem reddar hlutunum

  Þúsund þjala smiðurinn er ómissandi í hverju þorpi;  þessi sem reddar hlutunum snöfurlega.  Enginn hlutur er svo bilaður að reddarinn kippi honum ekki í lag á mínútunnni.  Hann þarf ekki annað en skima í kringum sig eitt augnablik til að koma auga á nothæfan varahlut.

  Heimafyrir bera flestir hlutir þess merki að reddarinn hafi farið um þá höndum.  Þegar pulla í sófasettinu ónýtist kemur eldhússtóll að góðum notum.

 

 

 

 

 

 

 

 

 

 

 

 

 

 

 

   Veggklukkan fellur í gólfið og brotnar.  Þá er minnsta málið að teygja sig í vélritunarblað og tússpenna.  Klukkan er sem ný. 

 

 

 

 

 

 

 

 

 

  Slökkvitækið í sameigninni tæmist.  Vatnsflaska gerir sama gagn.

 

 

 

 

 

 

 

 

 

 

 

 

 

 

 

  Hliðarspegillinn á fína jeppanum brotnar.  Þá er gott að eiga handspegil og límband.

 

Lífstíll skiptir öllu máli

  Svissneskir karlar lifa lengur en aðrir karlar.  Íslendingar eru í hópi langlífustu þjóða.  Mataræði skiptir máli í mögulega langri ævi.  Óhollur matur,  sykur og hvítt hveiti skerða lífsgæði og ævilengd.  Eiturlyfjaneysla og keðjureykingar líka.  Einnig lífstíll að öðru leyti,  svo sem hreyfingarleysi og flótti frá sólarljósi.  

  Þetta er mismunandi á milli þjóða.  Í Bandaríkjum Norður-Ameríku er lífshættulegt að verða á vegi lögreglu.  Samskipti við hana kosta hátt á annað þúsund manns lífið á ári.  Góður fjöldi til viðbótar á um sárt að binda eftir að hafa orðið á vegi lögreglunnar.  Menn auka lífsgæði sín og lífslíkur með því að forðast lögregluna,  hermenn og þess háttar.  

Þúsund látist af völdum lögreglu

Sparnaðarráð: Kauptu jólamatinn núna!

  Hagsýnir húsbændur vita að nú er rétti tíminn til að kaupa mat fyrir sólrisuhátíðina miklu,  jólin,  hátíð ljóss og friðar,  svo og gamlárskvöld, nýársdag og næstu daga þar á undan og eftir.  Ástæðan er sú að eftir nokkra daga fer verð á mat að hækka nokkuð bratt.  Hann hækkar og hækkar í verði í stórum stökkum alveg fram á næsta ár.  Jafnframt minnkar úrval á sumum matvörum.    

  Sá sem bíður með að kaupa matinn fram undir jól tapar háum fjárupphæðum.  Þeim upphæðum er betur varið í gott borðvín og nokkra jólabjóra.  

    

Matur og flug hækkar í verði