Íslendingar gera vel við sig

  Margir Íslendingar hafa það gott.  Þeir eru á pari við frægustu erlendar poppstjörnur og tekjuhæstu Hollywood-leikara.  Tímakaup upp á 57 þúsund kall þykir vera temmilegt.  Það er hlegið að aulunum sem ná ekki 1000 kr. á mínútu.  Ennþá hærra er hlegið að vesalingunum sem ná ekki að greiða sér árlegan arð upp á milljarð.  Tveir milljarðar eru nær lagi - til að teljast maður með mönnum.

  Ennþá er einhver feimni í gangi gagnvart einkaþotunum sem héldu vöku fyrir Reykvíkingum allan sólarhringinn fyrir bankahrunið 2008.  Já, og þyrlum sem menn skutluðust á til að fá sér pylsu í Baulunni eða skutust á frá Vestmannaeyjum til að tapa milljörðum króna í misheppnuðum fjárfestingum í Reykjavík.  Ekkert mál.  

  12 milljón króna jeppar seljast um þessar mundir eins og heitar lummur. Í dag er togast á um hvern Saga Class flugmiða.  Embættismenn ríkis og borgar togast á við almenning um þessa miða.

  Þetta sama fólk hefur áhyggjur af því að kostnaður við móttöku á flóttamönnum frá Sýrlandi komi niður á íslenskum öryrkjum og ellilífeyrisþegum.  Áhyggjurnar eru skiljanlegar.  Það er útilokað að taka á móti flóttafólki öðru vísi en níðast vel og rækilega á öryrkjum og ellilífeyrisþegum.  

  Góðu fréttirnar eru þær að það er til nóg af peningum. Ríkiskirkjan fær 4 milljarða eða meir.  Veitir ekki af.  Kostnaður vegna Nató-aðildar er aðeins nokkur hundruð milljónir. Aðallega vegna loftferðaeftirlits yfir Keflavík.  Án þess myndu íslenskir öryrkjar og ellilífeyrisþegar ekkert vita hverjir fljúga um íslensku loftin blá.

  Utanríkisráðuneytið kostar marga marga milljarða.  Víða um heim eru rekin íslensk sendiráð.  Þeirra eina hlutverk er að halda kokteilboð fyrir íslenska embættismenn.  Ekkert til sparað. Sífellt er verið að stofna ný embætti hjá hinu opinbera,  nýjar nefndir (sumar kallaðar ráð.  Það réttlætir betur kostnaðinn).  Aðstoðarmönnum ráðherra fjölgar með ógnarhraða.  Það besta er að allir sem að jötunni komast fá risaflott eftirlaun það sem eftir er.   

  

  

Slegist um flugsæti á Saga Class

Enn ein ástæðan fyrir því að aflétta einokun ÁTVR

  Sala á áfengum drykkjum er lögleg á Íslandi.  Neysla á áfengum drykkjum er lögleg á Íslandi.  Hið einkennilega er að einu verslanir sem mega selja þessa löglegu vöru eru örfáar ríkisbúðir. Aðeins starfsmönnum á launaskrá ríkisins er treyst til að afgreiða bjórdósir og vínflöskur.  

  Þetta er eins geggjað og hugsast getur. Þetta á eftir að verða sama aðhlátursefni og bjórbannið,  sjónvarpslausir fimmtudagar, sjónvarpslaus júní, einokunarsala mjólkurverslana,  skömmtunarseðlar, einokunarsala ríkisins á útvarpstækjum, galdrabrennur og effemm-hnakkar.    

 

Vínbúðum lokað

Færeyingar finna olíu

  Í fyrra dró færeyska olíuleitarfélagið Föroya Petroleum sig út úr samfloti í olíuleit í íslenskri landhelgi,  á Drekasvæðinu.  Ástæðan var sú að forráðamenn félagsins höfðu öðlast yfirgripsmikla þekkingu á olíuleit.  Þeir voru og eru sannfærðir um að fullreynt sé að enga olía verði að finna á Drekasvæðinu.  Uppskriftin er eitthvað á þá leið að borað sé á 9 líklegustu stöðum.  Ef engin olía finnst þá sýnir sagan að frekari leit sé árangurslaus.

  Gott ef Kínverjar eru samt ekki ennþá að bora og leita á Drekasvæðinu.

  Föroya Petroleum hefur að undanförnu borað níundu holuna við Færeyjar.  Í dag fannst olía.  31 milljón tunna í mesta lagi.  Það þykir ekki mikið,  að mér skilst.  En staðfestir að olíu sé að finna við Færeyjar.  

Maður skotinn til bana til að forða honum frá sjálfsvígi

  Í Denver í Bandaríkjum Norður-Ameríku hringdi örvæntingafull móðir í lögregluna.  Fullorðinn sonur hennar,  andlega vanheill,  bar hníf að hálsi sér og hótaði að svipta sig lífi.  Hún bað lögregluna um að afvopna hann áður en hann færi sér að voða.

  Tveir lögreglumenn mættu í snarhasti á svæðið.  Þeir gáfu manninum ströng fyrirmæli um að hætta tafarlaust við áform um sjálfsvíg.  Hann sýndi engin merki um hlýðni.  Þvert á móti þá herti hann hníf að hálsi og hljóp aftur út á götu.  Til að forða manninum frá því að láta verða af ætlun sinni sá lögreglan ekki aðra leið en skjóta hann til dauða.

  Í kjölfar sendi lögreglan frá sér fréttatilkynningu um atburðinn.  Lögreglumennirnir voru hlaðnir lofi fyrir hugrakki og hetjuskap.  Með snarræði náðu þeir að hindra manninn í að fremja sjálfsvíg.  Að auki tekist snöfurlega að bjarga eigin lífi í sjálfsvörn áður en ofbeldisfullur og hættulegur maðurinn myrti þá.  Ennfremur áður en hann myrti alla íbúa götunnar.  Hvatt var til þess að lögreglumennirnir yrðu sæmdir æðstu orðum Bandaríkjanna fyrir hetjudáðir.

  Mörgum dögum síðar birtist á þútúpunni meðfylgjandi myndband af atburðarásinni.  Sumum virðist sem hún stangist á við lýsingu lögreglunnar.  Talsmaður lögreglunnar hefur bent á að þeir sem voru ekki á vettvangi hafi enga möguleika á að átta sig á aðstæðum;  hvernig lögregluþjónar upplifðu atvikið.   

 

Tónlistarmenn sem misstu af heimsfrægð á ögurstundu

  Það geta ekki allir orðið ofurríkar poppstjörnur.  Af 1000 sem reyna er kannski einn sem nær árangri.  Sumir streða alla ævi án árangurs.  Heimildarmynd um kanadísku hljómsveitina Anvil kemur því vel til skila að eitt er að vera á þröskuldi heimsfrægðar.  Annað að komast á þröskuldinn en ná ekki yfir hann.  

  Heimsfrægð og auðævi skila ekki alltaf hamingju og langlífi.  27 ára klúbburinn er svartur skuggi yfir rokksögunni.  Allt þetta hæfileikamikla fólk sem framtíðin blasti við en yfirgaf jarðvist 27 ára:  Jimi Hendrix,  Janis Joplin,  Jim Morrison,  Brian Jones,  Robert Johnson,  Amy Winehouse,  Kurt Cobain og svo margir aðrir.  Gram Parson var aðeins 26 ára.  

  Svo eru það hinir sem voru á barmi þess að verða súperstjörnur en misstu af á lokaspretti.

 

  Einn heitir Tony Chapman.  Hann var trommari The Rolling Stones.  Hann kom með bassaleikarann Bill Wyman inn í hljómsveitina.  Honum þótti hljómsveitin ekki halda nægilegri tryggð við blúsinn.  Rollingarnir voru of mikið rokk og ról fyrir hans smekk.  Charlie Watts tók við trommukjuðunum og hefur síðan verið einn af frægustu og tekjuhæstu trommurum rokksögunnar.

  Fyrsti trommari Bítlanna var Pete Best.  Hann var í Bítlunum 1960 til 1962.  Hann þótti snoppufríður og naut mestrar kvenhylli Bítla.  Illar tungur segja að það hafi átt einhvern þátt í því að aðrir Bítlar vildu sparka honum úr hljómsveitinni.  Minna illar tungur segja að hann hafi ekki þótt nógu góður trommari.  Einnig að hann hafi ekki blandað geði við hina Bítlana  Þeir hinir dópuðu og voru hálf geggjaðir.  Hann var þögull og hélt sig til hliðar.  Svo eignuðust Bítlarnir bráðskemmtilegan drykkjufélaga,  Ringó Starr. Hann var að auki dúndur góður trommari.  Hann var í töluvert frægari hljómsveit,  Rory & The Hurricanes.  En lét sig hafa það að ganga til liðs við drykkjufélaga sína í Bítlunum.

  Pete Best sat eftir með sárt enni.  Lagðist í langvarandi þunglyndi.  Reyndi sjálfsvíg ítrekað og allskonar vesen.  En tók gleði sína þegar breska útvarpsfélagið BBC gaf út plötur með upptökum með Bítlunum í árdaga hljómsveitarinnar.  þá fékk Pete 600 milljónir ísl kr. í eingreiðslu.  Hefur verið nokkuð sprækur síðan. Hann hefur alla tíð gert út hljómsveit.  En  töluvert vantar upp á að hún sé samkeppnisfær við Bítlana.

Forsetaframbjóðandi hrekktur

  Einn af þeim fjölmörgu sem sækjast eftir því að verða frambjóðandi repúblikana til embættis forseta Bandaríkja Norður-Ameríku sætir grófu einelti.  Ekki einungis af hálfu Íslendinga heldur einnig Breta.  Já, og jafnvel landa sinna.  Þetta er ljótt.

  Fórnarlambið,  Donald Trump,  ber sig engu að síður vel.  Enda nýtur hann vaxandi vinsælda innan flokksins.  Einkum meðal kvenna.  

  Eitt af því sem grínast er með er að sjóndeildarhringur Trumps nái ekki út fyrir túnfótinn.  Hann viti ekkert hvað gerist í öðrum löndum.  Nema í Kína.

  Það sér hvergi fyrir enda á eineltinu.

  Trump er duglegastur allra að hlaða á sig hrósi af öllu tagi.  Til að mynda hefur hann hrósað sér af því að ekki sé hægt að plata sig.  Hann sé svo næmur að hann greini á örskotsstund ef hrekkur eða gabb eru í uppsiglingu.  

  Breskur hrekkjalómur sannreyndi þetta á dögunum.  Eða þannig.  Hann sendi Trump stuðningsyfirlýsingu fyrir hönd föður síns.  Sagði kallinn ætla í fyrsta skipti á ævinni að kjósa og það Trump.  Með lét hann fylgja ljósmynd af formanni breska Verkamannaflokksins.  Sá verður mögulega breski forsætisráðherrann sem forseti Bandaríkjanna mun hafa samskipti við á næsta kjörtímabili.

  Trump féll í gildruna.  Hann hoppaði hæð sína í loft upp af ánægju með að fá atkvæði frá Bretlandi.  Heimsþekkt andlitið á formanni Verkamannaflokksins þekkti hann ekki.  Þess í stað hampaði hann á twitter stuðningsyfirlýsingunni.

 

   

Trump selur Ungfrú Bandaríkin strax aftur

Jón Þorleifs ofsótti bróður sinn

  Jóni Þorleifssyni,  rithöfundi og verkamanni,  samdi ekki við ættingja sína.  Eins og gengur.  Að því er ég best veit var flestum ættingjum hans hlýtt til hans.  Það var ekki gagnkvæmt í öllum tilfellum.

  Á gamals aldri fékk bróðir Jóns heilablóðfall.  Við það hægðist mjög á hugsun hans.  Þetta nýtti Jón sér.  Hann vissi hvaða kaffihús bróðirinn sótti.  Jón vaktaði þau.  Þegar hann sá bróður sinn þar inni þá vatt Jón sér að honum og hellti yfir hann svívirðingum.  Svo hljóp Jón út áður en bróðirinn náði að svara.  

  Jón hrósaði sigri í þessari viðureign.  Hann viðurkenndi að bróðirinn hafi lengst af haft betur í orðaskaki þeirra bræðra.  En þarna var hann mátaður.  "Ég þekki helvítið hann Kristján bróður það vel að ég veit að það sýður á honum að geta ekki svarað fyrir sig," sagði Jón sigurhrósandi.  

  Systir þeirra bræðra skrifaði Jóni bréf út af þessu.  Í því sagðist hún verða að skrifa honum bréf vegna þess að hann skelli á hana þegar hún hringi í hann.  Hún bað hann kurteislega um að sýna þann manndóm að láta veika ættingja í friði.  Þetta túlkaði Jón þannig að honum væri meinað að heimsækja móðir sína sem lá á banasæng.  Hann hlýddi fyrirmælunum en var afar ósáttur. Hann setti fyrirmælin lítið í samhengi við samskiptin við bróðurinn heldur einblíndi á að honum væri meinað að heimsækja veika móðir sína.  Það þótti honum vera svívirða en það væri fjarri sér að hunsa fyrirmæli systurinnar.  Hann talaði ekki við mömmu sína þaðan í frá né aðra ættingja.  Sagðist ekki geta krafið þá um heilbrigðisvottorð til að eiga orðastað við þá.     

  Fleiri sögur af Jóni HÉR

  

 

 

 

 

 

 

 

 

  

Veitingaumsögn

 

 

 

 

 

 

 

 

 

 

 

 

 

 

 

 

 

 

  - Réttur:  Hrefnusteik

  - Veitingastaður:  Bike Cave,  Skerjafirði

  - Verð:  2495,-

  - Einkunn: *****

  Þeir eru ekki margir veitingastaðirnir sem bjóða upp á hvalkjöt.  Þeim mun meira fagnaðarefni er að boðið sé upp á hrefnukjöt í Bike Cave í Skerjafirði.  Ennþá meira fagnaðarefni er hvað steikin og meðlæti eru mikið lostæti.

  Kjötið er marinerað til margra daga.  Það er síðan kryddað kryddblöndunni frábæru "Best á nautið" og snöggsteikt. Ytra lag dökknar og fær ljúfengt steikarbragð.  Í miðju er kjötið fallega rautt án þess að vera blóðugt.  Allt lungnamjúkt.

  Meðlæti er ferskt salat, krossarar og bearnaise-sósa.  Jarðaber gefa salatinu skarpt frískandi bragð.  Krossarar eru náskildir frönskum kartöflum.  Þetta eru skarpkryddaðar (ég greindi papriku, salt og pipar) djúpsteiktar kartöflur.  Þær eru mun bragðbetri en hefðbundnar franskar.  Stökkar (crispy) í gegn. Toppurinn yfir i-ið er bearnaise-sósan.  Hún er ekki venjuleg.  Þetta er verðlaunuð sósa,  uppskrift Hjördísar Andrésdóttur verts og listakokks á Bike Cave.  Besta bearnaise-sósa sem ég hef smakkað. Blessunarlega að mestu laus við smjörbragðið (sem háir iðulega bearnaise-sósum).       

  Ég mæli eindregið með hrefnusteikinni í Bike Cave í Skerjafirði. Hún er sælkeramáltíð.

--------------------------------------------------------

  Fleiri veitingaumsagnir má finna með því að smella HÉR

 

Taugaveiklun í Skotlandi vegna afskipta af átökum hryðjuverkasamtaka og Færeyinga

 

 

 

 

 

 

 

 

  Fyrir nokkrum dögum skýrði ég samviskusamlega frá nýjustu tíðindum í baráttu hryðjuverkasamtakanna Sea Shepherd gegn hvalveiðum Færeyinga. Þar kom fram að SS-sveit hraktist frá Færeyjum til Hjaltlandseyja.  Hún var á stóru skipi sem heitir Bob Barker.  Eins og önnur stór skip SS var það búið glæsilegum spíttbát.  Færeyska lögreglan skilgreinir spíttbátana sem hluta af vopnabúnaði SS.  Þeir eru notaðir í árangurslausum aðgerðum SS-liða gegn hvalveiðunum.  

  Færeyska lögreglan hafði samband við skosku lögregluna í Hjaltlandseyjum.  Hún fer með löggæslu þar.  Erindið var að biðja hana um að skjótast um borð í Bob Barker,  taka þaðan spíttbátinn og skutla honum í danskt herskip sem var þarna við bryggju.  Færeyska lögreglan myndi síðan hafa ráð til að nálgast spíttbátinn hjá danska herskipinu.

  Þetta var auðsótt mál.  Um það má lesa með því að smella á þennan hlekk:  HÉR

  Forsprakki SS,  Paul Watson,  reitir hár sitt og skegg í reiði yfir framgöngunni.  Hann segir að það hafi aldrei hvarflað að sér og sínum að armur færeysku lögreglunnar væri þetta langur;  að hann nái til Hjaltlandseyja og spili með skosku lögregluna eins og strengjabrúður.  

  Paul viðurkennir að Færeyingar hafi unnið lotuna um hvalveiðar í sumar.  Enda getur hann ekki annað. SS-liðar hafa ekki komið í veg fyrir veiðar á svo mikið sem einu marsvíni (grind) í sumar.  Þvert á móti hafa veiðar gengið vel,  fjöldi SS-liða kærður,  sakfelldur, dæmdur til hárra fésekta og rekinn úr landi.  

  Paul hótar því að sigur Færeyinga sé aðeins tímabundinn.  SS sé hvergi hætt baráttunni gegn hvalveiðum Færeyinga.  Það verði óðar bætt við nýjum setuliðum í Færeyjum í stað þeirra sem eru gerðir brottrækir.  Sömuleiðis verði nýjum spíttbátum komið til Færeyja í stað þeirra sem lögreglan leggur hald á.

  Paul hótar að gera einnig út af við laxeldi Færeyinga.  Meira um það seinna.  

  SS-liðar ætla að standa vaktina í Færeyjum fram í október.  Hvers vegna svona lengi veit ég ekki.  Það koma engar hvalvöður þegar þetta langt er liðið á haust.

  Nú hefur það gerst að umræðan hefur borist inn í skoska þingið.  Spurning hvort að Paul Watson eða aðrir SS-liðar eigi þátt í því á bak við tjöldin.  Þingmaður Græningja lagði fram formlega fyrirspurn til formanns Skoska þjóðarflokksins um þátt skosku lögreglunnar í að láta færeysku lögregluna siga skosku lögreglunni á SS.  Þingmaðurinn kveðst óttast mjög að þetta eigi eftir að hafa alvarlegar afleiðingar.  Þingmaðurinn hefur jafnframt sent skoska ríkissaksóknaranum fyrirspurn um málið.  

  Fulltrúi Skoska þjóðarflokksins segist ekki vilja tjá sig um málið að svo stöddu.  Hugsanlega sé um lögbrot og refsimál að ræða.  

 

Forsetaframbjóðandi misstígur sig

  Ég hef aldrei nennt að fylgjast með vali republikana á frambjóðanda til embættis forseta Bandaríkja Norður-Ameríku.  Enda kemur mér það ekkert við.  Nú er öldin önnur er Sveinbjörn stökk á stöng.  Einn af frambjóðendunum er litríkur.  Það er góð skemmtun að fylgjast með Trump.  Það gustar af honum.  Sjálfur lýsir hann keppinautum sínum sem dusilmennum.  Gufum og görmum.  Sennilega er eitthvað til í því.  Án þess að ég hafi kynnt mér neitt um þá virðist mér sem þetta sé hópur snyrtilega klipptra og greiddra eldri hvítra karlmanna í grálitum jakkafötum.

  Trump er hálfskoskur.  Fyrir nokkrum árum var ég staddur í Skotlandi.  Þá vildi Trump kaupa Skotland og breyta því í golfvöll.  En nú vill hann verða forseti.

  Í upphafi kosningabaráttu sinnar gerði Trump út á baráttulag eftir Njál Unga,  "Rockin in The Free World".  Njáll brást hinn versti við.  Harðbannaði Trump að nota lagið.  Umboðsmaður Njáls var þó búinn að leyfa notkun lagsins og fá pening frá Trump fyrir.  Þetta varð Trump til töluverðrar háðungar.  Það styrkti mjög stöðu hans meðal reppanna. 

  Eftir miklar vangaveltur og vandræðagang kynnti Trump til leiks nýtt kosningalag. Það er "It´s The End Of The World As We Know It (And I Feel Fine)" með hljómsveitinni REM.  Nú hafa liðsmenn REM sameinast um að banna Trump að nota lagið.  Ekki nóg með það.  Þeir tala líka illa um hann og hans viðhorf.  Í yfirlýsingu hvetja þeir Trump til að hafa mök við sjálfan sig (fuck yourselves).  Þeir lýsa honum sem aumkunarverðu, athyglissjúku og valdagráðugu lítilmenni.

  Þetta mun tryggja Trump yfirburðasigur meðal reppa.  

  Trump lætur framleiða fyrir sig hálsbindi,  skyrtur og allskonar fyrir lítinn pening úti í Kína.  Eitt af baráttumálum hans er að ná allri framleiðslu á bandarískum vörum úr höndum Kínverja og láta Bandaríkjamenn sjálfa framleiða bandarískar vörur.  Þetta er honum svo mikið hjartans mál að hann á það til að hrópa orðið "China,  China,  China" upp úr svefni heilu og hálfu næturnar.

  Einnig hefur orðið vart við að þegar hann heldur sig vera í einrúmi þá tautar hann stöðugt "China,  China, China" fyrir munni sér.

  

  

Túpupressan - Þannig nýtir þú allt innihald kavíartúpunnar, tannkremstúpunnar, næturkremstúpunnar....

 

 

 

 

 

 

 

 

 

 

 

 

 

 

 

 

 

 

  Bandarísk skoðanakönnun hefur leitt í ljós að helsta ágreiningsefni hjóna er peningar.  Næst algengasta ágreiningsefnið er umgengni við tannkremstúpuna.  Karlar kreista tannkremstúpuna iðulega frá miðju.  Konur kreista túpuna frá enda hennar.  

  Hvor leiðin sem er valin leiðir nær ekki að fullnýtta innihaldið.  Þegar túpunni er loks hent er töluvert eftir af innihaldi hennar.  Þetta á líka við um kavíartúpur,  hárlitunartúpur,  rakakremstúpur,  næturkremstúpur og allskonar túpur.

  Sumir nota einhvern harðan hlut,  eins og hnífsskaft, til að leggjast á túpuna og pressa sem mest úr henni.  Það eru líka til þvingur fyrir plasttúpur sem virka líkt og póstlúga sem pósti er troðið í gegnum.  Og sitthvað fleira.  Allt gott og blessað.

  Svo er það túpupressan,  EZ sqeezer.  Hún er þannig að túpuendanum er stungið í lítið plasttæki.  Síðan er sveif snúið.  Túpan pressast svo fast að allt innihald hennar er fullnýtt. Ef túpan er að lokinni pressu skorin upp þá finnst ekki tangur né tetur af innihaldi í henni. Einfalt og þægilegt.  Þegar búið er að pressa allt úr túpunni þá er túpan örlítil samanþjöppuð klessa án innihalds.  Túpupressan kostar um 600 - 700 kall og er fljót að borga sig.

  Túpupressan fæst í Bike Cave í Skerjafirði,  Nettó í Keflavík,  Vöruvali í Vestmannaeyjum og í apótekinu í JL-húsinu,  Dómus Medica,  Kringlunni,  Mjódd, Mosfellsbæ,  Hellu, Glerártorgi á Akureyri og Akureyrar Apóteki í Kaupangi.

Ofbeldishrottum klappað á kollinn

  Ofbeldishrottar dæla í smáskilaboðum (sms) grófum hótunum yfir konur sem þeir ofsækja.  Konur sem hafa sagt skilið við þá eftir að þeir hafa beitt þær hrottafengnu ofbeldi.  Þeir eyðileggja eigur kvennanna.  Skemma bíla þeirra.  Kveikja jafnvel í þeim.  En lögregla,  sýslumenn og dómstólar aðhafast fátt sem ekkert.  Ofsóknirnar standa yfir dögum saman, vikum saman, mánuðum saman og árum saman.  Gögn týnast á skrifstofum.  Renna út á tíma.  Og hver vísar á annan.

  Í fullkomnum heimi væru ofsóknir af þessu tagi kæfðar strax í fæðingu.  Ofbeldismaðurinn stöðvaður þegar í stað.  Hann snöfurlega settur í nálgunarbann.  Brot á nálgunarbanni myndi umsvifalaust kosta hrottann vist á bak við lás og slá.  Þolandinn þyrfti ekki að óttast neitt.  Lögregla,  sýslumenn og dómsstólar myndu slá skaldborg um þolandann.  Hann væri í skjóli.  Hrottinn væri skilyrðislaust úrskurðaður hættuleg ógn við samfélagið.  Hann er fárveikur og samfélagsleg ógn.  Úrhrak.  Illmenni.  Sadisti.  Það eru mannréttindi að engin kona þurfi að búa við ótta og því síður hótanir og ofbeldi.  

  Í fullkomnum heimi eru konur ekki beittar ofbeldi.  Það er auðvelt að láta það rætast.  Eina sem til þarf er hugarfarsbreyting hjá lögreglu, sýslumönnum og dómurum.  Kannski stjórnmálamönnum líka.  

  Af hverju er það ekki þannig?    

Staðfesti nálgunarbannið

Hvers vegna þurfa skemmtistaðir að sæta lögum um lokun?

  Af hverju fá skemmtistaðir - eða réttara sagt umráðamenn þeirra - ekki að ráða því hvenær staðurinn er opinn eða lokaður?  Af hverju er lögreglan að skipta sér af því?  Hvað kemur það löggunni við?  Jú, jú, svona eru lögin.  Þau eru til óþurftar hvað þetta varðar.  Og leiðinda umfram allt annað.  En,  jú, sumir lögregluþjónar elska að finna fyrir valdi sínu,  þreifa á því eins og dómarar í hrútakeppni.  Það er þeim góð skemmtun að taka snöfurlega á opnunartíma skemmtistaða.  Það er líka tilbreyting frá því að hnusa í vasa ungmenna sem fikta við vímuefni.  Það er að segjast önnur en ritalin, flogaveikislyf, bjór og vodka.  

  Mojo-Ísland óskalandið,  hvenær kemur þú?

  

Lögreglan lokaði börum

Plötuumsögn

  - Titill:  Í hnotskurn

  - Flytjandi: Fræbbblarnir

  - Einkunn:  *****

    Hljómsveitin Fræbbblarnir er næstum því jafnaldri pönkisins.  Pönkið varð til í Bandaríkjunum um miðjan áttunda áratuginn  (The Ramones,  Blondie,  Patti Smith,  Television...).  Í kjölfarið varð pönkbylting í Bretlandi á síðari hluta áttunda áratugarins (Sex Pistols,  Clash, Damned,  Buzzcocks...).  Þá mættu Fræbbblarnir sprækir til leiks.  Urðu fljótlega áberandi og áttu stórleik í íslensku pönksenunni, sem um og upp úr 1980 var kennd við "Rokk í Reykjavík".  

  Fræbbblarnir eru lífseigasta íslenska pönksveitin.  Jafnframt sú sem hefur elst hvað best.  Ferskur gustur og skemmtilegt pönk hefur alltaf einkennt Fræbbblana.  Snotrar lagasmíðar og kjaftforir textar.  Þeir hafa staðist tímans tönn með glæsibrag ekki síður en tónlistin.  Lög eins og "Bjór", "Í nótt",  "Hippar" og "CBGBs" eru fyrir löngu síðan orðin klassískar rokkperlur.  Og mörg fleiri úr Fræbbbla-söngbókinni til viðbótar.

  Í dag eru liðsmenn Fræbbblanna:  Valgarður Guðjónsson (söngur, gítar),  Guðmundur Þór Gunnarsson (trommur),  Helgi Briem (bassi),  Arnór Snorrason (gítar, bakraddir),  Ríkharður H. Friðriksson (gítar),  Iðunn Magnúsdóttir (bakraddir) og Þorsteinn Hallgrímsson (bakraddir).

  Nýjasta plata Fræbbblanna,  "Í hnotskurn",  er konfektkassi.  Hvert og eitt einasta lag er gómsætur moli.

  Platan hefst á teygðu rafgítarýlfri lagsins "Stagl".  Svo er undið sér í vinalega grípandi pönklaglínu. Notalegar og nettar laglínur eru eitt af höfuðeinkennum Fræbbblanna.  Lagið er haganlega brotið upp með hraðmæltri söngþulu. Uppskriftin er ekki langt frá "Anthrax" með Gang of Four.  Samt engin stæling og gjörólík melódía.  Hljóðfæraleikur er drífandi en söngur Valgarðs afslappaður og settlegur utan þulutextans.  Í textanum er tekið þéttingsfast í hnakkadrambið á röppurum og þeir hristir til eins og óþekkir hvolpar.

  Næsta lag,  "My Perfect Seven",  er lauflétt með björtum gítarhljómi. Bassagítar er að vanda framarlega í hljóðblöndun;  söngrænn,  sterkur og leikandi. Góð laglína.  Viðlag er keyrt upp með hörðum rafgítar.  Hann er snyrtilegur og fagmannlegur út alla plötuna. Á þessari plötu er hljóðfæraleikur fágaðri en á fyrri plötum Fræbbblana.  Þó það nú væri. Þetta er næstum fertug hljómsveit.  Hún er heiðarleg.  Hvergi að þykjast neitt. Hvergi að rembast við að hljóma öðru vísi en sú næstum fertuga pönkhljómsveit sem hún er. Hokin af reynslu í jákvæðustu merkingu. 

  Í hærri tónum svipar söngstíl Valgarðs til Davids Thomas í Pere Ubu.  Auðþekkjanlegur söngur Valgarðs er sterkasta vörumerki hljómsveitarinnar.  Hann smellpassar við allt sem pönkhljómsveitin stendur fyrir og varðveitir sérkenni hennar glæsilega.  Söngurinn er einn veigamesti "karakter" Fræbbblanna.        

  Þriðja lagið,  "Brains",  hefst á kitlandi sparlegum gítarleik og sterkri sönglínu.  Skerpt er á henni er á líður með sólógítarlínu og samsöng í viðlagi.  Það vantar ekki mikið upp á að örli á kántrýstemmningu.  En munar því sem munar.

 

  Fjórða lagið,  "Nines",  er pönkað ska.  Fræbbblarnir hafa löngum gælt við ska.  Viðlagið er hlýlegur samsöngskafli með góðu risi.  Ég hef ítrekað staðið mig að því að vera farinn að raula ósjálfrátt með í viðlaginu.  Slíkt er hrífandi aðdráttarafl þess.

  Næstu lög,  "A Folk In The Future" og "Judge A Pope Just By The Cover",  eru fastheldið og snöfurlegt pönk.  Það síðarnefnda er grimmara.  Munar þar um að söngur Valla er reiðilegur og þróttmikill.  Trommuleikur Guðmundar Gunnarssonar (Tappinn,  Das Kapital) er kröftugur,  ákafur,  þéttur og lipur. Þannig er hann plötuna út í gegn að segja má.  Snilldar trommari.  Titillinn talar sínu máli um yrkisefnið.  Í texta fyrrnefnda lagsins er skotið þéttingsfast á spákonur og þessháttar. 

    

  Titillagið,  "Í hnotskurn",  er að hluta undir ljúfum ska-áhrifum í bland við hart pönk. Ég túlka textann sem hugleiðingu eða gagnrýni á þá sem taka hátíðlega safn aldagamalla ævintýraþjóðsagna frá Arabíuskaga.  

  Inngangskafli áttunda lagsins,  "Bugging Leo",  hljómar eins og keltneskur kráarslagari sé að detta í hús.  En beygir síðan í kántrý.  Eða öllu heldur kántrý-polka. Lauflettan og dansvænan.  Sólógítarleikur er eins og klipptur út úr ítölskum spahettívestra.     

  Níunda lagið,  "Young In New York",  er dansandi létt nýbylgjurokk.

  Pönkið tekur við í tíunda laginu,  "Bergmáli".  Með lagni má greina örlítið bergmál frá ska-pönki.  Í textanum hreykir Valli sér verðskuldað af því að hafa haft rétt fyrir sér er hann orti texta lagsins "Bjór" á dögum bjórbannsins fáránlega á Íslandi.  Í dag er bjórbannið aðhlátursefni og öllum til skammar sem vörðu það í áratugi og börðust fyrir því fram á síðasta dag.  

  Næst síðast lagið,  "Dante",  jaðrar við að vera kántrýballaða (alt-country) með pönkkafla.

  Lokalagið,  "Immortal",  er mitt uppáhalds.  Hart og hratt pönk.  Góð keyrsla,  fjör og geislandi spilagleði.  Frábært lokalag.  

  Ég er sennilega búinn að hlusta um 50 sinnum á þessa plötu.  Fæ ekki nóg af henni.  Hún er einstaklega vel heppnuð og umfram allt skemmtileg.  Rosalega skemmtileg út í eitt. Fjölbreytt og kraftmikil.  Spilagleðin er smitandi.  Þó að árið sé ekki liðið í aldanna skaut þá segi ég og skrifa:  "Í hnotskurn" er besta plata ársins 2015.  Plata ársins!

 

Hryðjuverkamenn í tómu klúðri í Færeyjum

 

 

 

 

 

 

  Framganga hryðjuverkasamtakanna Sea Shepherd tekur stöðugt á sig skoplegri og vandræðalegri mynd í Færeyjum.  Samtökin hafa farið mikinn í klaufalegum aðgerðum gegn hvalveiðum Færeyinga í sumar.  Þau hafa ekki komið neinum vörnum við snöfurlegum viðbrögðum lögreglunnar í Færeyjum.  Né heldur skörulegum málflutningi saksóknara.  SS-liðar hafa aðgang að snjöllum lögfræðingum út um allan heim.  Færeyski saksóknarinn (kona sem ég man ekki hvað heitir) rúllar þeim upp eins og tannkremstúpu.     

  Fjöldi SS-liða hefur verið handtekinn í Færeyjum,  sektaður hver og einn um hálfa milljón ísl. kr. eða þar um bil og vísað úr landi með skít og skömm.  Án möguleika á að snúa til baka.  Jafnframt hafa spíttbátar SS verið gerðir upptækir ásamt allt frá tölvum til kvikmyndatökuvéla.  

  Færeyskir unglingar hafa framkvæmt borgaralegar handtökur á SS-liðum sem reyna að trufla hvalveiðar.  Það er sport.  Svokölluð SS-tækling er vinsæl.  Um er að ræða afbrigði af hælkrók.  Þetta er tækni sem Færeyingar hafa góð tök á.  Síðast tæklaði móðir - með ungabarn í fangi og önnur tvö börn í pilsfaldi - SS-liða láréttan í fjöru. Það vakti kátínu áhorfenda.  

  Á dögunum var réttað yfir SS-liðum sem voru sakaðir um að trufla hvalveiðar.  Málið snérist í hálfhring.  Þegar allir fletir voru skoðaðir varð túlkunin sú að SS-liðar hefðu í raun rekið hvalvöðuna upp í fjöru.  Þar var henni slátrað af heimamönnum hratt og fumlaust.  

  Þannig var að áhöfn á SS-skipi varð vör við marsvínavöðu (grind) langt úti á firði.  Skipinu var siglt að henni til að ná góðum ljósmyndum og myndbandsupptökum.  Við það fældist vaðan, synti rakleiðis á fullri ferð inn fjörðinn og upp í fjöru.  

  Niðurstaðan varð sú að áhöfn SS ætti að fá vænan skerf af marsvínakjöti í þakklætisskyni fyrir að hafa smalað hvalnum upp í fjöru.  SS-sveitin afþakkaði þann góða bita.  Ákæra fyrir að hafa reynt að trufla hvalveiðar var dregin til baka.  Smölun á hvölunum upp í fjöru vó þyngra en pat og hopp í fjörunni á meðan hvölunum var slátrað. Það var skilgreint sem ósjálfráð taugaveiklunarviðbrögð ungs fólks í andlegu ójafnvægi.  SS-sveitin varð niðurlút undir þessari túlkun - og aðhlátursefni.    

  Ein kæran sem SS-sveit situr uppi með er að meint truflun hennar á hvalveiðum beindist að vísindaveiðum.  Í því tilfelli var ekki verið að veiða marsvín (grind) til manneldis heldur einungis í vísindalegum tilgangi.  Það er löglegt samkvæmt öllum alþjóðasáttmálum um hvalveiðar.  Það verður erfitt fyrir SS að snúa sig út úr því.

  Þegar búið var að rannsaka hvalina í þágu vísinda var kjötið af þeim snætt með soðnum kartöflum.  Færeyingar henda ekki matvælum.   

  Þrjú SS-skip hafa komið til Færeyja í sumar.  Einu þeirra,  Bob Barker,  var meinað að koma í höfn.  Við skoðun í skipinu kom í ljós að búið var að "strippa" það;  öll dýr tæki verið fjarlægð úr því.  Skipið er hálfvélarvana ryðdallur á síðasta snúningi.  Klárlega átti að leiða Færeyinga í gildru.  Fá þá til að leggja hald á ryðdallinn.  Það hefði orðið SS öflugt áróðursbragð.  Það hefði aflað SS samúð og fjárfúlgu - til kaupa á nýju skipi - frá U2,  Pa-mellu Anderson,  Brian Adams og allskonar öðrum vellauðugum súperstjörnum.  Þar á meðal heimsfrægum þýskum kvikmyndaleikurum sem ég kann ekki nöfn á en hafa heimsótt SS til Færeyja í sumar.  Færeyingar áttuðu sig í tæka tíð á gildrunni.  Bob Barker er ennþá ryðdallur á síðasta snúningi í eigu SS. 

  SS-sveitir kaupa ekki olíu eða vistir í Færeyjum.  Þær sigla til Hjaltlandseyja eftir því.  Nú gerðist það að færeyska lögreglan bað lögregluna í Hjaltlandseyjum um að skottast um borð í SS-skipið Sam Simon og taka þaðan spíttbát sem færeyska lögreglan vill fá í sína vörslu.  SS til undrunar brá skoska lögreglan (sem sinnir löggæslu á Hjaltlandseyjum) við skjótt,  fór um borð, tók spíttbátinn og mun afhenda hann færeysku löggunni við fyrsta tækifæri.

  Forsprakki SS,  Paul Watson,  froðufellir af bræði.  Hann hefur snúið sér til Evrópusambandsins og krefst þess að það grípi inn í.  Evrópusambandið getur ekkert gert.  Færeyjar eru ekki í Evrópusambandinu. 

  Paul Watson hreykti sér á Fésbók af því að SS berjist ekki gegn hvalveiðum Færeyinga með skotfærum eða öðrum gamaldags vopnum heldur nútímavopnum á borð við myndavélum og myndbandsupptökutækjum.  Þar með færði hann Færeyingum upp í hendur haldgóð rök fyrir því að gera myndabúnað SS upptækan.  Samkvæmt orðum Pauls sjálfs er þetta vopnabúnaður SS. 

  Til gamans:  Frá því að SS-sveitir hófu af þunga að herja gegn hvalveiðum Færeyinga í fyrra hefur orðið sprenging í túrisma í Færeyjum.  Fyrir vissi heimsbyggðin ekki af tilvist Færeyja.  SS-sveitir hafa beint kastljósi heims að Færeyjum.  Með þessum árangri.  Færeyjar eru ekki búnar undir vöxt túrisma upp á 10 - 20% í hverjum mánuði á fætur öðrum.  Það vantar gistirými.      

 

 

Einsleitur hópur á framhjáhaldssíðu

  Sem kunnugt er brutust vondir kallar inn í framhjáhaldssíðuna Ashley Madison.  Ekki nóg með það.  Þeir hafa opinberað skráða notendur síðunnar.  Fjölmiðlar hafa komist yfir gögnin.  Í þeim má finna nöfn nafntogaðra manna í mörgum löndum.  Þetta eru stjórnmálamenn,  prestar og aðrar fyrirmyndir almúgans.

  Við athugun kom í ljós að framhjáhaldssíðan er stórt svindl.  Það var ekki upphaflega uppskriftin.  Vandamálið er að konur halda ekki framhjá í gegnum framhjáhaldssíðu.  Aðstandendur síðunnar brugðu á það ráð að dæla inn á hana fölskum prófílum af konum.  Tilbúningi.  

  Karltuskurnar sem skráðu sig inn á síðuna höfðu ekki hugmynd um að þeir voru að borga fyrir aðgang að síðu sem samanstóð nánast alfarið af öðrum körlum.  Menn með mönnum.  Það er dáldið vandræðalegt fyrir viðkomandi;  að hafa borgað fyrir aðgang að kvenmannslausri framhjáhaldssíðu.  

  Í dag geta þeir hrósað happi.  Kvenmannslaus framhjáhaldssíða gat ekki leitt til trúnaðarbrots.  Hversu mjög sem ásetningur var einbeittur.  Eða öllu heldur hvernig forvitni rak grandalausa einfeldninga á villigötur.  

 

Guðfræðingur og átta barna faðir

Stundum er betra að láta fagmann um verkið

  Það er ekki öllum gefið að baka kökur,  laga tertur og matreiða kvöldmáltíð.  Stundum er betra að fá fagmann í verkið.  Eða kynna sér verkefnið til hlítar.  Að vísu er til í dæminu að áhugasamir geti lært af mistökum.  Sá sem reynir einu sinni að sjóða egg í örbylgjuofni er ólíklegur til að endurtaka þann hildarleik.

 

 

 

 

 

 

 

 

 

 Líka sá sem hitar súkkulaðihnetusmjör í örbylgjuofni.  Jafnvel þó ætlunin sé sú ein að mýkja gumsið í krukkunni.

 

 

 

 

 

 

 

 

 

  Með lagni er hægt að sjóða spaghettí í örbylgjuofni.  En aðeins með lagni.

 

 

 

 

 

 

 

 

 

  Kúnstin við að sjóða spaghettí vill þvælast fyrir fleirum en notendum örbylgjuofna.  Ófáir hafa gripið til þess ráðs að sjóða spaghettí í kaffivélinni.  Útkoman er sjaldan góð.  Og sjaldnast í efrihluta spaghettísins.

 

 

 

 

 

 

 

 

 

 

 

 

 

 

 

  Þegar efrihluti spaghettís soðnar ekki með neðrihlutanum bregða ýmsir fyrir sig því gamalgróna ráði að bera eld að hráa hlutanum.  Það hefur aldrei skilað viðundandi útkomu.

 

 

 

 

 

 

 

 

 

 

 

 

 

 

 

 

  Þó að takist að sjóða allt spaghettíið þá er að mörgu að hyggja.  Lykilatriði er að hafa nægilegt vatn í pottinum.  Annars festist gumsið við botninn.

.  

Nýtt kökuhús með vísan í Laxness

Snöfurleg redding í Skagafirði

  Fjölskylda í Reykjavík átti leið til Akureyrar.   Það var áð í Varmahlíð.  Þar var snæddur ágætur heimilismatur.  Þegar halda átti ferð áfram uppgötvaðist að í ógáti höfðu bíllyklar verið læstir inni í bílnum.  Neyðarráð var að kalla út íbúa í Varmahlíð,  Rúnar frá Sölvanesi.  Hann er þekktur fyrir að geta opnað allar læsingar.  Honum brást ekki bogalistin fremur en áður og síðar.  Hægt og bítandi þvingaði hann dyrarúður niður og tróð vírsnöru að hurðalæsingatakka. Þar herti hann á snörunni og dró takkann upp.  Þetta er snúnara en það hljómar þar sem takkar eru uppmjóir.    

  Ég fylgdist ekki náið með.  Sá út undan mér að hann hljóp á milli hurða og kannaði hvar rúður voru eftirgefanlegastar.  Ég spanderaði ís á fjölskylduna á meðan Rúnar kannaði möguleika.  Þetta er þolinmæðisvinna.  Skagfirðingar eru aldrei að flýta sér.  Eftir drykklanga stund gekk ég út að bílnum.  Rúnar hafði þá hamast töluvert á hurðunum farþegamegin.  Nú var hann byrjaður að hamast á hurðunum bílstjóramegin.

  Ég gekk að framhurð farþegamegin og tók fyrir rælni í hurðarhúninn.  Dyrnar opnuðust þegar í stað.  Ég kallaði á Rúnar:  "Hey,  dyrnar eru opnar!"  Hann kallaði til baka þar sem hann baksaði við bílstjórahurðina:  "Ég veit það.  Ég er búinn að ná báðum hurðunum þarna megin opnum.  Ég er alveg við það að ná hurðunum hérna megin líka opnum!" 

Manna- og hundanafnanefnd ríkisins kaghýdd einu sinni einu sinni enn

  Engin íslensk ríkisnefnd hefur verið rassskellt jafn oft og Manna- og hundanafnanefnd ríkisins.  Enda eru fáar nefndir hins opinbera til jafn mikillar óþurftar.  Samt eru margar um hituna.  Sennilega fjögur til fimm þúsund.  Ýmsar faldar á bak við nöfn eins og "aðgerðahópur",  "greiningardeild",  "starfshópur" og eitthvað svoleiðis.

  Rökin fyrir tilvist ríkisrekinnar manna- og hundanafnanefnd eru þau helst að foreldrum sé ekki treyst til að velja boðlegt nafn á barn sitt og hund.  Ríkisreknir starfsmenn séu nauðsynlegir til að standa vakt gegn vondum nöfnum.  Ríkisrekna nefndin vill ekki að stúlka heiti því fallega nafni Blær.  Þess í stað skal hún heita Himinbjört Snót.  Eða Hugljúf Þrá. 

  Nú hefur innanríkisráðuneytið flengt Manna- og hundanafnanefnd ríkisins vegna harðvítugrar andstöðu við nafnið Harriet.  Fram til þessa tókst manna- og hundanafnanefnd ríkisins til margra ára að hindra að Harriet-systkinin væru skráð hjá Þjóðskrá undir öðrum nöfnum en Stúlka og Drengur.  Samkvæmt úrskurði innanríkisráðuneytisins í dag er bull Manna- og hundanafnanefnd ógilt.  Harriet-systkinin mega héðan í frá vera skráð Harriet í stað Blíða Þúfa og Kaktus Þyrnir.

  Í vörn fyrir Manna- og hundanafnanefnd ríkisins hefur verið bent á að nefndin starfi eftir lögum.  Hún sé ekki sek um neitt.  Hún sé bara að vinna sína þægilegu og vel launuðu innivinnu.  

  Þetta er rétt.  Hinsvegar hefur enginn neytt neinn til að taka sæti í þessari óþurftarnefnd fáránleikans.  Þar fyrir utan berst nefndin á hæl og hnakka gegn því að vera lögð niður.  Vitaskuld.  Það segir sitt.  

  Ég skora á innanríkisráðherra,  frú Nordal,  að leggja Manna- og hundanafnanefnd ríkisins niður snarlega í haust er þing kemur saman.  - Þrátt fyrir harða andstöðu Bernhards Lambrechts,  Michaels Holtsmans,  Frances Welding,  Ethans Prezynas og fleiri við að slakað verði á ströngustu kröfum um rammíslensk mannanöfn. 

       

Kók er óhollt

 

  Fram að bankahruninu 2008 var kók tískufyrirbæri.  Hvar sem tveir eða fleiri banksterar komu saman var dreginn fram spegill og kóki raðað upp í línur.  Þær voru sniffaðar eins og enginn væri morgundagurinn.  Hvort sem var innan í eða utan einkaþotunnar.

  Kók er óhollt dóp.  Það brenglar sjálfsálit dópistans. Hann heldur að hann kunni allt,  viti allt og sé snjallastur allra.  Hann er fífl með ranghugmyndir.  Kókið getur valdið öndunarerfiðleikum,  heilablóðfalli og hjartabilun.  Verst er þó þetta uppblásna egó.  Vondu fréttirnar eru að byggingakranarnir og kókið eru að snúa aftur.  Ég mæli gegn kóki.  Banani er betri.  

   

Hlakkaði mikið til að fá sér kók