Veitingahús - umsögn

 - Staður:  Sjávarbarinn,  Grandagarði 9,  Reykjavík

 - Réttur:  Kvöldverðarhlaðborð

 - Verð:  1300 kr.

 - Einkunn: **** (af 5)

  Undanfarna mánuði hefur hádegisverðarhlaðborð á Sjávarbarnum kostað 1400 krónur og kvöldverðarhlaðborðið 2600 krónur.  Vegna kreppunnar hafa aðstandendur Sjávarbarsins tekið sig til og gefa nú 50% afslátt á kvöldverðarhlaðborðinu.  Önnur veitingahús mættu taka sér þetta uppátæki til fyrirmyndar.  Reyndar var tailenski veitingastaðurinn Siam í Hafnarfirði að lækka verð á sínum réttum um 300 kall,  úr 1790 í 1490 kr.

  Eins og nafn staðarins bendir til er Sjávarbarinn fyrst og fremst sjávarréttastaður.  Engu að síður er hægt að panta sér lambahrygg eða grænmetisrétt þar.

  Réttum á hlaðborði Sjávarbarsins hefur fjölgað frá því ég borðaði þar síðast,  fyrir nokkrum mánuðum.  Það sem sést á ljósmyndinni hér fyrir ofan er varla nema helmingur af því sem nú er á boðstólum á hlaðborðinu.

  Hægt er að fá sér eitt og annað í forrétt.  Meðal annars grafinn silung (held ég fremur en lax) og ýmis salöt,  sem einnig er upplagt að snæða með aðalrétti.  Í aðalrétt stendur val á milli djúpsteiktra fiska í raspi (ýsa) eða orlý (hlýri),  gratíneraðra fiskrétta,  steiktra fiskibolla með smjörsteiktum lauk og ýmislegs annars.  Hægt er að velja á milli nokkurra afbrigða af kartöflum,  m.a. soðnum, djúpsteiktum bátum og ofnsteiktum niðursneiddum.  Einnig er hægt að velja á milli nokkurra kaldra sósa.

  Plokkfiskurinn er sérstaklega góður.  Það eina sem ég sakna á hlaðborðinu er pönnusteiktur fiskur. 

  Á sumum hlaðborðum er hver og einn réttur merktur.  Slíkt mætti taka upp á Sjávarbarnum.  Það getur verið gott að vita fyrir víst hvað er hvað. 

  Þegar ég fór á Sjávarbarinn í sumar var mér boðin súpa með hlaðborðinu.  Ég held að súpa fylgi ennþá hlaðborðinu.  Hinsvegar var mér ekki boðið upp á hana núna.  Sem gerði ekkert til.  Nóg var af öðru að maula.    

  Staðurinn er frekar lítill,  en opinn og dálítið kuldalegur.  Sprittkerti loga á borðum og fremstu borð eru dúkuð.  Á veggjum eru litrík málverk eftir Tolla og ljósmyndir af fiskum. 

  Hálfur lítri af bjór kostar 700 kall.  Það er í hærri kantinum. 

Umsagnir um önnur veitingahús:

- Langbest

http://jensgud.blog.is/blog/jensgud/entry/648245

- IKEA 

http://jensgud.blog.is/blog/jensgud/entry/680274

- Icelandic Fish & Chips 

http://jensgud.blog.is/blog/jensgud/entry/643187

- American Style

http://jensgud.blog.is/blog/jensgud/entry/630463

- Pítan

http://jensgud.blog.is/blog/jensgud/entry/590495

- Hrói höttur

 http://jensgud.blog.is/blog/jensgud/entry/641856

Athugasemdir

[Rannveig H, 29.10.2008 kl. 00:17]

Maggi klikkar ekki, sjálfri finnst mér þetta besti staðurinn að fara á.

[Skattborgari, 29.10.2008 kl. 00:22]

Ég hef ekki prufað þennan stað en geri það kannski við tækifæri.

Kveðja Skattborgari.

[Jóna Kolbrún Garðarsdóttir, 29.10.2008 kl. 00:47]

hmm, spennandi kannski maður skreppi um helgina og fái sér að borða þar. 

[Guðni Karl Harðarson, 29.10.2008 kl. 02:00]

Þakka fyrir þetta kallinn Verð að prufa þennan stað. Ertu að fá eitthvað í gogginn fyrir að skrifa um þetta? Kveðja Hr. einn23

[ADOLF (IP-tala skráð) 29.10.2008 kl. 14:31]

Hef farið þarna mæli ekki með honum ef maður er í átaki,matur er svo góður ,en nú lifir maður bara fyrir daginn í dag ,og ég slæ þessu upp í kæruleysi og fer í kvöld og lappa svo heim, á heima langt í burtu, vona að ég gangi þetta af mér

[Eva Benjamínsdóttir, 29.10.2008 kl. 15:24]

Sæll Jens, þakka þér fyrir að koma með smá yfirlit á matstaði borgarinnar. Mér líst vel á þennan stað en ekki má mér verða kalt. Úrvalið er ærið og verðinu stillt í hóf, verð að skoða þetta.

[Gylfi Björgvinsson, 29.10.2008 kl. 19:51]

Fór að skoða þetta nú í kvöld algjörlega vegna þinna skrifa og ég varð ekki svikinn af þessum stað  tek undir einkunnargjöfina þína

[Helga Magnúsdóttir, 29.10.2008 kl. 21:11]

Þetta hljómar mjög girnilega, ætla að prófa.

[Þórður Helgi Þórðarson, 29.10.2008 kl. 22:37]

M'er finnst sniðugt hjá þér að skrifa þessar umsagnir, ekki það að ég sé duglegur að notfæra mér upplýsingarnar (fer aldrei út að borða) en þetta er oft in the back off my mind, ef ég skildi.....

Takk fyrir þetta

[Jens Guð, 30.10.2008 kl. 00:04]

  Rannveig,  ég ætla að fjölga heimsóknum á Sjávarbarinn.  Hann er góður kokkur þessi náungi.

  Skattborgari og Jóna,  ég mæli með honum.

  Guðni,  ég fæ ekkert fyrir að skrifa um veitingastaði.  Mér hefur verið boðið í mat á veitingastað gegn því að ég bloggi um hann.  Ég hafnaði því.  Mér hefur verið boðið á leiksýningu,  bíósýningar og hljómleika gegn því að blogga um það og mér hafa verið gefnar nokkrar plötur til að blogga um.  Ég hef þegið það því ég treysti mér til að fjalla hlutlægt um þau fyrirbæri.  Hinsvegar óttast ég að ef ég myndi þyggja veitingar á veitingastað þá fengi ég sérmeðferð sem gæfi ranga mynd af því sem þar er í boði.  Ég vil frekar kynnast veitingum á veitingastað eins og hver annar utan af götu.

  Gylfi,  ég er feginn að lýsing mín gaf rétta mynd af dæminu.

  Helga,  þú ættir að gera það.

  Doddi litli,  ég bý einn og elda ekki sjálfur.  Þess vegna les ég af áfergju allar umsagnir í fjölmiðlum um veitingastaði til að vita hvort ástæða sé til að bæta viðkomandi veitingahúsi inn í rúnt minn um veitingahús.  Það eru margir í mínum sporum og það er mér ljúft og skylt að miðla af reynslu minni.  Þar fyrir utan er áhugi á matreiðslu mikill í fjölskyldu minni.  Fjögur systkini mín hafa unnið við matreiðslu og sum lært fagið.  Ein systir mín er það sem kallast hámenntuð í matreiðslu og rekur morgunverðarstað í Svíþjóð.  Bróðir minn er markaðsstjóri matvælafyrirtækis.  Mágur minn er lærður matreiðslumaður.  Annar mágur minn er með matsölu.  Fyrrverandi mágur minn er skipskokkur.  Móðir mín var alinn upp í matsölu sem afi og amma ráku.  Þannig mætti áfram telja.

[Jens Guð, 30.10.2008 kl. 00:56]

  Adolf,  ég ætla að sjávarréttir séu heilsufæði og ekki varasamir upp á vigtina að gera.

  Eva,  það er þokkalega hlýtt veður inni á Sjávarbarnum.

[Eva Benjamínsdóttir, 30.10.2008 kl. 01:08]

Flott Jensinn minn, ætla svo sannarlega þangað, sem fyrst, því kjötsúpuvikan er senn á enda.

[Sigurður Þórðarson, 30.10.2008 kl. 20:59]

Líttu á þetta skemmtilega myndband með Dabba sjá hér

[Guðni Karl Harðarson, 30.10.2008 kl. 23:12]

Æi Jens minn ekki taka mig alvarlega. Þetta var nú bara grín! Mér datt ekki í hug að þú fengir eitthvað fyrir þetta. En mig vantar alltaf peninga. eða