Forsetaframbjóðandi ofsóttur

  Einn af þeim sem sækist eftir því að verða frambjóðandi Republikanaflokksins til embættis forseta Bandaríkja Norður-Ameríku er Donald Trump.  Hann sætir einelti af hálfu tónlistarmanna,  fjölmiðla og ýmissa fleiri.  Það er ljótt.  Hann er hrakyrtur,  hæddur og smáður.  Samt er það þannig að eineltið er honum til framdráttar.  Vinsældir hans aukast og haldast í hendur við hverja ágjöf sem hann mætir.

  Á meðan Donald Trump baðar sig í sviðsljósinu eiga aðrir kandídatar ekki möguleika hjá reppum.  Ekki síst þegar hann hampar því að sækja í uppskrift Hitlers og félaga í þýska nasistaflokknum.  Til að mynda boðar hann áform um að merkja múslima með stjörnu á sama hátt og nasistar merktu gyðinga,  samkynhneigða og fleiri.   

  Þá leggst vel í marga hugmynd hans um að reisa "Berlínarmúr" á landamærum Mexikó og Bandaríkjanna.  Þannig verði Mexíkóum gert illmögulegt að flæða yfir Bandaríkin.  Trum veit það (sennilega) sjálfur en ekki almenningur að 14% fleiri flýja frá Bandaríkjunum til Mexíkó en öfugt.    

  Samskipti Trumps við vinsæla tónlistarmenn eru brösuleg.  Hann hóf kosningabaráttu sína með einkennislagi úr smiðju Njáls Unga,  "Rockin´ in the Free World".  Njáll brást hinn versti við og bannaði notkun hans á laginu.  Það kom Trump í opna skjöldu.  Hann taldi þá Njál vera góða vini.  Þar fyrir utan hafði hann borgað umboðsskrifstofu Njáls pening fyrir lagið.  En Njáli var ekki haggað.  

  Þá var ekki um annað að ræða en taka upp kosningalag úr smiðju REM,  "It´s the end of the World As We Know It".  Hljómsveitin starfar ekki lengur.  En liðsmenn hennar tóku höndum saman og bönnuðu Trump að nota lagið.  Þeir létu jafnframt ljót orð falla um Trump.  Þetta kom honum í opna skjöldu vegna þess að hann var búinn að borga umboðsskrifstofu REM fyrir notkun á lagiðnu.  Þar fyrir utan hvarflaði ekki að honum að hljómsveit sem er hætt fyrir löngu færi að skipta sér af.  

  Nú voru góð ráð dýr.  Söngvari hljómsveitarinnar Aerosmith,  Stebbi Tyler,  er góðvinur Trumps.  Þeir hafa stússað margt saman.  Leikið sér í golfi og fl.  Trump gerði lag Aerosmith "Dream On" að kosningalagi sínu eftir vandræðaganginn með lög Njáls Unga og REM.

  Stebbi hryggbraut vin sinn með því að banna honum að nota lagið.  Til að byrja með trúði Trump honum ekki.  Hélt áfram að nota lagið.  Leikar fóru þannig að Stebbi leitaði til dómstóla og fékk lögbann sett á notkun Trumps á laginu.  

  Stebbi hefur útskýrt þetta þannig að eitt sé að vera vinur frambjóðandans.  Annað að kvitta undir pólitík hans.  

  Pólitík hans er þó ekki verri en svo að hún speglar viðhorf meirihluta reppa í Bandaríkjum Norður-Ameríku.  Það er ekkert nema gott um það að segja.

 

Trump hæddist að fötluðum blaðamanni

Gríðarlega spennandi tækifæri

 

  Í Hafnarfirði ríkir mikil gleði og tilhlökkun vegna yfirvofandi endanlegrar lokunar Álversins í Straumsvík.  Þarna opnast ótal möguleikar fyrir spennandi verkefni.  Kiddi kanína - oft kenndur við Hljómalind - og félagar hans í Menningar- og listafjelagi Hafnarfjarðar eru komnir á flug.  

  Meðal hugmynda sem fleygt hefur verið fram er að breyta svæðinu í Ylverið í Straumsvík,  The Green Lagoon.  Þar yrði í Edengörðum ræktað grænmeti af öllu tagi.  Einnig fræ,  ávextir,  baunir,  hnetur og svo framvegis.  Þar á milli verður glæsihótel með heitum inni- og útisundlaugum, til viðbótar heimsins bestu aðstöðu til sjósunds. Nóg af ódýru niðurgreiddu rafmagni.

  Í Straumsvík er góð hafnaraðstaða.  Þarna verður heitasti áfangastaður skemmtiferðaskipa hvaðanæva úr heiminum.  Staðsetningin er frábær þarna í útjaðri höfuðborgarinnar;  Bláa lónið og flugstöðina í Sandgerði nánast í göngufæri.  Áhugaverð og sérstæð náttúra í hlaðvarpanum.  Álfar í hverjum hól og vel klætt huldufólk sem leikur við hvurn sinn fingur. 

„Ákaflega sérstakt“ ef álverið lokar

Óvænt útspil

  Til fjölda ára hefur þjóðin verið samhuga um nauðsyn þess að fjölga lögreglumönnum.  Embættismenn - sem hafa með málaflokkinn að gera - eru þar fremstir í flokki.  Víða um land er skortur á lögregluþjónum.  Verst er samt ástandið á höfuðborgarsvæðinu.

  Þrátt fyrir algjöra samstöðu almennings og stjórnmálamanna í málinu hefur ekkert gerst svo lengi sem elstu menn muna.  Ekkert.  Nema núna á dögunum:  Lögmaður að nafni Sveinn Andri Sveinsson steig fram og stingur upp á því að lögregluþjónum landsins verði fækkað um einn.  

  Lögreglustjóri höfuðborgarsvæðisins tekur vel í þennan nýja flöt á lögregluflota landsins.  Hann ætlar að skoða uppástungu lögmannsins.  Kannski er þetta farsælasta lausnin á manneklu lögreglunnar.  Nýstárlegar og frumlegar hugmyndir hafa oft reynst vel.

  

Mál Bigga löggu til skoðunar

Neyðarleg mistök

  Frægt fólk vekur athygli hvar sem til þess sést.  Einkum í útlöndum.  Það allra frægasta er umkringt "lífvörðum".  Þeirra hlutverk er að verja frægu manneskjuna fyrir ágangi og áreiti almennings.  Almenning þyrstir í eiginhandaráritun frægra.  Á síðustu árum hefur bæst við ljósmynd af sér með frægum.

  Vandamálið er að oft ber óskhyggja og ákafi almenning ofurliði.  Það þekkja allar manneskjur sem líkjast frægu fólki.  

  Fyrir nokkrum árum spilaði sænska hljómsveitin Europe á G!Festivali í Færeyjum.  Hún var ofurfræg 1986 og næstu ár þar á eftir.  Þökk sé lögum á borð við "Final Countdown" og "Cherrie".  Svo komu fram á sjónarsvið rokksins Guns N´ Roses og Nirvana.  Europe hvarf í skuggann og féll í gleymskunnar dá.

  Í Færeyjum bar enginn kennsl á liðsmenn Europe.  Þessir áður snoppufríðu drengir voru orðnir gráleitir miðaldra menn.  Enn voru þeir samt í leðurjakkanum og snjáðu gallabuxunum.  Þeir sem enn gátu skörtuðu síðu hári.  

  Á G!Festivali var einnig kvennarokksveit frá Vestmannaeyjum,  VaGínas.  Skömmu fyrir heimferð komu stelpurnar auga á liðsmann Europe.  Honum var óðar stillt upp í myndatökur með þeim og krafinn um eiginhandaráritun á alla tiltæka pappíra.

  Í flugvélinni veifuðu stúlkurnar sönnunargögnum af kynnum sínum af Europe.  Ég sá strax að áritunin var mun færeyskri en sænsk.  Jógvan á Heygum.  Maðurinn á myndunum var að sönnu síðhærður og klæddur leðurjakka og gallabuxum.  Að öðru leyti ekkert líkur neinum í Europe.  

 

 

 

 

 

 

 

 

  Neyðarleg mistök af þessu tagi eru algeng.  Mörg slík hafa orðið aðhlátursefni á Twitter og Fésbók. Eitt vandamálið er að tvífarinn leiðréttir sjaldnast misskilninginn.  Hann nýtur athyglinnar.  Þiggur jafnvel gjafir frá þeim uppveðraða.  Allt frá pylsu og áfengis til skartgripa.  Í besta falli þarf hann ekki að borga fyrir veitingar á matsölustöðum né tískufatnað í tískufatabúðum.  

  Þessi dama hélt að hún hefði hitt bandaríska leikarann Johnny Depp.  Hún varð svo upp með sér að hún keypti handa honum pylsu með öllu.  

 

 

 

 

 

 

 

 

 

 

 

  Hér er hinn raunverulegi Johnny Depp.  Jú, jú,  þeir eru líkir.   Aldursmunur ekki nema kannski 20 ár.  Kauði gengur augljóslega alla leið í tvífarahlutverkinu:  Alveg eins gleraugu,  alveg eins skegg...

 

 

 

 

 

 

  Gaurinn hélt að hann hefði komist í samneyti við bandaríska klámkónginn Hugh Hefner.

 

 

 

 

 

 

 

 

 

 

 

 

 

 

 

 Þrátt fyrir að vera sláandi líkir þá er Hugh þekktur fyrir myndarlegt hvítleitt nef með breiðum og rúmgóðum nösum.  Enda þarf hann á miklu súrefni að halda.  Rauðnefinn nasagranni bætir upp fyrir það sem greinir þá tvífara að með því að klæðast náttfatalegum sloppi.

 

 

 

 

 

  Bandaríska sjónvarpskonan Oprah Winfrey flýgur landshorna á milli í einkaþotu.  Tvífarar hennar ferðast í almennu rými í troðfullum farþegaflugvélum.

 

 

 

 

 

 

 

 

 

 

 

 

 

 

  Að öðru leyti hefði  þetta alveg getað verið Oprah - ef hún kynni að ferðast aftur í tímann um 20 - 30 ár.

 

 

 

 

 

 

 

 

 

  Bandarískur mótorhjólaknapi var sperrtur yfir því að hafa hitt leikarann Owen Wilson.

 

 

 

 

 

 

 

 

 

 

 

 

 

 

  Kannski var móða á sólgleraugunum. Samt svipar manninum til Owens.  Báðir ljóshærðir og með sömu hárgreiðslu. 

..

Hulunni svipt af hræðilegu leyndarmáli

  Fréttir af banksterum eru skemmtilegri en afleiðingar bankahrunsins/bankaránsins.  Er þá mikið sagt.  Skemmtilegastar eru fréttir af réttarhöldum yfir klíkunni.  Þær keppa við fréttir af vist hennar á Kvíabryggju:  Átök um rauðvín með matnum,  átök um reiðnámskeið - með og án vændis og svo framvegis.

  Verðbréfamiðlari hjá Glitni upplýsir vinnufélaga og nú alþjóð um að Jón Ásgeir hafi verið og/eða sé á djöflamerg.  Það ku vera betra en að vera á djöflasýru.  Nema það sé það sama.  Rifjast þá upp að korteri fyrir bankahrun kallaði Jón Steinar Gunnlaugsson nafna sinn viðarrenglu.  Um það má lesa hér 

  Í dag er pistill í dagblaði Jóns Ársgeirs (skráð á konu hans),  Fréttablaðinu.  Pistilinn skrifar eiginkona Ólafs Ólafssonar,  hótelgests/vistmanns á Kvíabryggju.  Henni er niðri fyrir.  Eina sinni, einu sinni enn.  Að þessu sinni sakar hún forstjóra Fangelsismálastofnunar um að brjóta á skjólstæðingi sínum,  kallgreyinu,  með því að opinbera persónugreinanlegt einkamál hans.  Það gerði hann með því að kjafta frá vel varðveittu leyndarmáli:  Að "mjög lítill hópur fanga hefði aðgang að mörgum milljónum".  

  

Jón Ásgeir á djöflamergnum

Verður að sjá

  Wayn.com er bresk netsíða.  Nafnið stendur fyrir Where Are You Now?  Hún er vettvangur og málgagn ferðamanna og ferðalaga.  Notendur eru um 20 milljónir og dreifast út um allan heim.  Birtur er á síðunni listi undir fyrirsögninni "Top Things to do in Scandinavia".  Í undirfyrirsögn segir að Svíþjóð,  Noregur og Danmörk séu æsispennandi áfangastaður að sækja heim.

  Fyrst er flaggað norðurljósum yfir Noregi.  Farið er mörgum fögrum orðum um þau.  Wayn-verjum yfirsést að norðurljósin yfir Íslandi eru miklu flottari.

 

 

 

 

 

 

 

 

  Næst er vísað á Legoland í Danmörku.  Ungum sem öldnum er lofað að þar muni þeir upplifa skemmtun ævi sinnar.  Ekkert nema gott um það að segja.

 

 

 

 

 

 

 

 

 Í 3ja sæti er Rósenborgar-kastali í Danmörku.  Nefnt er að fleiri áhugaverða kastala megi finna í Danmörku.

 

 

 

 

 

 

 

 

  Í 4ða sæti er Bláa lónið.  Það er sagt vera besta stað til slökunar sem völ er á.  Lónið hafi unnið til verðlauna og sé Íslands dýrasta djásn.

 

 

 

 

 

 

 

 

 Í 5. sæti er Tívolí-garðurinn í Danmörku.

 

 

 

 

 

 

 

 

  Í 6. sæti er Stokkhólmur,  höfuðborg Svíþjóðar.  Hún er snilld.

 

 

 

 

 

 

 

 

  Að lokum er tiltekið að ferðalangur um Skandinavíu verði að komast i hvalaskoðun við Noreg eða Ísland. 

 

 

 

 

 

 

 

 

  Í upptalninguna Wayn vantar sárlega Færeyjar.  Ég læt hér fylgja með tvær myndir þaðan því til sönnunar:

 

Sterkar stelpur - graðir strákar

  Mikið rosalega sem þær eru sterkar og flottar þessar stelpur er stigið hafa fram og sagt frá ofsóknum af hendi skólasystkina.  Þær hafa verið úthrópaðar sem druslur,  sjálfsalar og allskonar öðrum niðrandi orðum í þeim dúr.  Meðal annars í skólablaði menntaskólanema.  

  Auðvitað eru það þeir er skrifa óhróður um skólasystkini sín í þannig blöð sem eru illa innréttuð dusilmenni.  Þeirra er skömmin.  Það er ekkert nema í góðu lagi að stelpur kyssi stráka,  strákar kyssi stelpur og fólk af öllum kynjum kyssi hvert annað og stundi kynlíf þegar þannig stendur á.

  Sá sem kallar manneskju druslu eða eitthvað í þá veru er fífl.  

Lét bólfélagana skrifa undir þagnareið

Karlinn sem reddar hlutunum

  Þúsund þjala smiðurinn er ómissandi í hverju þorpi;  þessi sem reddar hlutunum snöfurlega.  Enginn hlutur er svo bilaður að reddarinn kippi honum ekki í lag á mínútunnni.  Hann þarf ekki annað en skima í kringum sig eitt augnablik til að koma auga á nothæfan varahlut.

  Heimafyrir bera flestir hlutir þess merki að reddarinn hafi farið um þá höndum.  Þegar pulla í sófasettinu ónýtist kemur eldhússtóll að góðum notum.

 

 

 

 

 

 

 

 

 

 

 

 

 

 

 

   Veggklukkan fellur í gólfið og brotnar.  Þá er minnsta málið að teygja sig í vélritunarblað og tússpenna.  Klukkan er sem ný. 

 

 

 

 

 

 

 

 

 

  Slökkvitækið í sameigninni tæmist.  Vatnsflaska gerir sama gagn.

 

 

 

 

 

 

 

 

 

 

 

 

 

 

 

  Hliðarspegillinn á fína jeppanum brotnar.  Þá er gott að eiga handspegil og límband.

 

Lífstíll skiptir öllu máli

  Svissneskir karlar lifa lengur en aðrir karlar.  Íslendingar eru í hópi langlífustu þjóða.  Mataræði skiptir máli í mögulega langri ævi.  Óhollur matur,  sykur og hvítt hveiti skerða lífsgæði og ævilengd.  Eiturlyfjaneysla og keðjureykingar líka.  Einnig lífstíll að öðru leyti,  svo sem hreyfingarleysi og flótti frá sólarljósi.  

  Þetta er mismunandi á milli þjóða.  Í Bandaríkjum Norður-Ameríku er lífshættulegt að verða á vegi lögreglu.  Samskipti við hana kosta hátt á annað þúsund manns lífið á ári.  Góður fjöldi til viðbótar á um sárt að binda eftir að hafa orðið á vegi lögreglunnar.  Menn auka lífsgæði sín og lífslíkur með því að forðast lögregluna,  hermenn og þess háttar.  

Þúsund látist af völdum lögreglu

Sparnaðarráð: Kauptu jólamatinn núna!

  Hagsýnir húsbændur vita að nú er rétti tíminn til að kaupa mat fyrir sólrisuhátíðina miklu,  jólin,  hátíð ljóss og friðar,  svo og gamlárskvöld, nýársdag og næstu daga þar á undan og eftir.  Ástæðan er sú að eftir nokkra daga fer verð á mat að hækka nokkuð bratt.  Hann hækkar og hækkar í verði í stórum stökkum alveg fram á næsta ár.  Jafnframt minnkar úrval á sumum matvörum.    

  Sá sem bíður með að kaupa matinn fram undir jól tapar háum fjárupphæðum.  Þeim upphæðum er betur varið í gott borðvín og nokkra jólabjóra.  

    

Matur og flug hækkar í verði

Íslensk hjarðhegðun

  Íslendingar eru hópsál.  Auðteymd í allar áttir.  Hjarðhegðun einkennir þjóðarsálina.  Þegar ný verslun er opnuð þarf ekki mikið til að smala hjörðinni í hús.  Ókeypis kleinuhringur eða 5% afsláttur á fimm stykkjum af skrúfjárni dugir.  Biðröð myndast degi fyrir opnun.  Hjörðin bíður ofan í svefnpoka eftir opnun búðarinnar.  Þeir fremstu í röðinni upplifa sig sem hetjur.  Ekki ætla ég að kalla þá eitthvað annað.  

 Þegar ekki er um opnun á nýrri verslun að ræða þá dugir til að mynda bílaumboði að auglýsa ókeypis kaffisopa.  Þá myndast örtröð.  Ef auglýstar eru ókeypis kleinur með þá bruna menn frá Keflavík,  Borgarnesi og Selfossi til Reykjavíkur.      

  Ég rakst á kunningja frá Hveragerði sem gerði sér ferð í bæinn.  Ástæðan var sú að IKEA auglýsti smakk á smákökum.  Smakkið átti að hefjast klukkan 13.00.  Vinurinn náði ekki að mæta fyrr en 13.30.  Þá var ekki byrjað að gefa smakk.  Einhver bið var í það.  Hvergerðingurinn var gráti nær yfir þessum "svikum".

  Ég benti honum á að aksturinn til og frá Hveragerði kostaði hann sennilega á annað þúsund kr.  Fyrir þann pening gæti hann keypt í næstu matvörubúð 100 eða 200 smákökur í stað þessarar einu smáköku sem hann ætlaði að smakka í IKEA.

  Hann horfði ringlaður á mig í nokkrar sek.  Svo muldraði hann um leið og hann settist upp í jeppann og ók á brott:  "Þær eru náttúrulega ekki nýbakaðar."

   

Fyrstu mættu í röðina í nótt

Kúaskítur til framleiðslu á rjómaís

 

 

 

 

 

 

 

  Einn besti og vinsælasti ís í heimi er skoski Mackie´s.  Til að framleiða þennan ís þarf mjólk og rjóma.  Einnig vanillu,  súkkulaði,  hunang,  mintu,  jarðaber,  rifsber,  karamellu og sitthvað fleira.  En uppistaðan er mjólk.  Hún er fengin úr 400 beljum í eigu Mackie´s.

  Beljur gefa af sér fleira en mjólk.  Af þeim gengur óhemju mikið magn af ágætis túnáburði.  En það má nýta kúadelluna sem orku.  Það vita stjórnendur Mackie´s.  Skíturinn býr til orkuríkt gas,  mugas.  Þetta gas virkjar Mackie´s til að knýja ísverksmiðjuna.  Fyrir bragðið er framleiðslukostnaður Mackie´s lægri en keppinautanna.  

  Englendingar hafa af gamalkunnri illgirni búið til hefðbundna Skotabrandara um þetta.  Þeir ganga út á meinta nísku Skota.  Skotar eru miklu útsjónasamari en Englendingar.  Gott dæmi um það er að Englendingar skjóta úr fallbyssum kastalabygginga 12 skotum klukkan 12 á hádegi til heiðurs drottningunni.  Skotar skjóta af sama tilefni úr Edinborgarkastala einu skoti klukkan eitt.  

  

   

Magnaðar ljósmyndir

  Fátt er skemmtilegra að skoða en magnaðar ljósmyndir.  Hér eru nokkur sláandi dæmi:

 

 

 

 

 

 

 

 

  Ef vel er að gáð má sjá 5 daga unga - eins og húfu - á höfði 140 ára skjaldböku.

 

 

 

 

 

 

 

 

 

Flogið yfir Ísland.

 

 

 

 

 

 

 

 

 

  New York í þoku.

 

 

 

 

 

 

 

 

 Þarna endar Kínamúrinn.

 

 

 

 

 

 

 

 

 Hótelherbergi í útlöndum.

 

 

 

 

 

 

 

  Röntgen-mynd af 450 kílóa dömu.

 

 

 

 

 

 

 

 

  Sandstormur augnabliki áður en hann leggur undir sig Phoenix.

 

Hvergi sér fyrir enda á flóttamannastraumnum

 

 

 

 

 

 

 

 

  Ört vaxandi straumur flóttafólks flæðir yfir alla Evrópu.  Jafnvel fleiri heimsálfur ef vel er að gáð.  Þessi þróun hefur þegar skapað ótal vandamál af öllu tagi.  Sífellt bætast fleiri vandamál í hópinn.  Bara á þessu ári - á fyrstu níu mánuðum þess - hafa hátt á fjórða þúsund Íslendingar flutt til útlanda.  Flúið skuldabagga,  vaxtaokur,  húsnæðisvandræði,  spillingu,  brostnar vonir og hringlandahátt.  Meðal annars með reisupassa.

  Uppistaðan af íslenska flóttamannastraumnum er ungt fólk.  Kraftmikið, atorkusamt og vel menntað.  Það er gríðarlegt tjón fyrir þjóðfélagið að missa flóttafólkið út úr íslenska atvinnumarkaðnum.  Þetta hefur þegar skapað illvígan skort á iðnaðarmönnum.  Þetta er vinnandi fólk sem á í heilbrigðu þjóðfélagsástandi að standa undir ellilífeyrisgreiðslum, rekstri hjúkrunarheimila og allskonar.

  Eina ráðið til að stoppa upp í götin er að lokka með einhverjum ráðum til Íslands fólk frá öðrum löndum.  

 

Fjöldi Íslendinga flytur úr landi

Snöfurleg vinnubrögð lögreglu til fyrirmyndar

  Stórhættulegur útlendur glæpamaður reyndi í vetrarbyrjun að kaupa flugmiða hérlendis handa aldraðri móður sinni.  Við fyrstu atrennu reyndi hann að greiða fyrir miðann með stolnu greiðslukorti.  Það gekk ekki.  Þá var þrautalending að borga með reiðufé (Johnny Cash).  

  Lögreglan hafði snör handtök og færði glæpamanninn í járn.  Það lá ljóst fyrir að hann var allt að því raðflugmiðakaupandi með illa fengið fé í höndum.  Til að hindra frekari kaup á flugmiðum var hann umsvifalaust færður í gæsluvarðhald.  Héraðsdómur og hæstiréttur höfðu fullan skilning á alvarleika málsins.

  Við leit í hýbýlum glæpamannsins kom í ljós að hann hafði stolið skyrtubolum.  Greinilegt var að hann hafði undirbúið glæpinn. Það sást á því að hann hafði keypt herðatré.  Sömuleiðis blasti við einbeittur brotavilji því að skyrtubolum var stolið frá fleiri en einni fataverslun.  Þetta er raðskyrtubolaþjófur.

 Í gæsluvarðhaldi hefur glæpamaðurinn ekki möguleika á að brjóta á fleirum.  Öllu máli skiptir að engum stafi hætta af honum. Þegar og ef hann losnar úr gæsluvarðhaldi tekur við farbann.  Það má aldrei gerast að skyrtubolaþjófur geti montað sig af bjórsötri á leið til útlanda í flugstöð í Sandgerði - á meðan glæpaferill hans er til meðferðar hjá lögreglu og dómstólum.  

----------------------------------------------------

 

  

Handtekinn er hann keypti flugmiða handa móður sinni

Jón Þorleifs og arfur

  Hér fyrir neðan má finna hlekk á fyrri bloggfærslur mínar um Jón Þorleifsson,  rithöfund og verkamann.  Þar er tíundað ósætti Jóns við ættingja sína.  Það var einhliða af hálfu hans.  Á síðustu æviárum sniðgekk hann ættingja sína með öllu.

  Svo gerðist það að bróðir hans féll frá.  Jón taldi það ekki koma sér við.  Það olli vandræðum varðandi dánarbúið.  Bróðirinn var einhleypur og barnlaus.  Jón var einn af hans nánustu ættingjum og erfingjum.  Jón vildi ekkert af dánarbúinu vita.  Það var sama hvort að ættingjar eða skiptastjóri dánarbúsins hringdu í Jón.  Hann skellti tólinu á þá um leið og þeir kynntu sig.

  Þetta tafði um margar vikur að hægt væri að ganga frá dánarbúinu.  Að lokum bankaði upp hjá Jóni ungur maður giftur frænku Jóns.  Hann var með lausnir á vandamálinu sem Jón sættist á.  Tilbúna pappíra um að Jón afsalaði sér sínum hluta af arfinum.  Gott ef ekki var framsali til einhvers tiltekins góðgerðarfélags.  

  Þegar Jón sagði mér frá þessu - alvarlegur á svip - orðaði hann það þannig:  "Ég gat ekki annað en tekið vel í erindi þessa unga manns.  Hann virtist vera nokkurn veginn í lagi.  Enda er hann ekkert skyldur mér."

------------------------------------------------------------------------------

  Tekið skal fram að ég þekki til margra ættingja Jóns.  Þeir eru mikið úrvals fólk í alla staði.

  Fleiri sögur af Jóni HÉR

  

 

Varasamar vídeóleigur

  Allir eru utan við sig af og til.  Kannski er einhver stigsmundur á milli einstaklinga á því sviði.  Kannski kippir fólk sér mismikið upp við það að vera utan við sig.  Sumir taka varla eftir því þó að þeir séu meira og minna utan við sig alla daga.  Aðrir taka það mjög nærri sér.  Þeim hættir til að velta sér upp úr því með áhyggjusvip.

  Rannsóknir hafa leit í ljós að unglingar eru alveg jafn oft utan við sig og eldra fólk.  Þá erum við ekki að taka með í dæmið alvarleg elliglöp á borð við alzæmer.

  Fyrir mörgum árum tilkynnti vinur minn - eldsnemma að morgni - lögreglu að bíl hans hafi verið stolið um nóttina.  Hann hringdi jafnframt í mig og sagði tíðindin.  Alla næstu hálftíma fram að hádegi hringdi hann í mig með kenningar um bílstuldinn.  Hann var sannfærður um að bíllinn yrði seldur í varahluti.  Næst var hann sannfærður um að bíllinn hafi verið fluttur til Vestmannaeyja.  Og svo framvegis.  

  Síðasta símtalið þennan dag kom um hádegisbil.  Lögreglan fann bílinn.  Hann stóð fyrir utan myndbandaleigu í göngufæri frá heimili mannsins.  Gátan var ekki flóknari en það að hann hafði tekið sér þar myndbandsspólu á leigu kvöldið áður.    

 

Gleymdi barninu á vídeóleigu

Ljósmyndir af börnum sem urðu síðar heimsfræg

  Sumir halda því fram að það sé hægt að sjá af ljósmyndum af börnum hver verði "stjarna" (fræg afreksmanneskja) á fullorðinsárum.  Kannski er það óskhyggja einhverra.  Kannski er það eitthvað sem miðlar draga fram og benda á í tæka tíð (fremur en löngu síðar)

  Hér eru nokkur dæmi:

Björk

 

 

 

 

 

 

 

 

  John Lennon 

  David Bowie

 James Hetfield (Metalica)

 Zack De La Rocha (Rage Against the Machine)

 Boy George

 

 

 

 

 

 

 

 

 Jim Morrison (Doors)

 

Kurt Cobain (Nirvana)

 Nína Simone

 Marilyn Manson

Janis Joplin

 Patti Smith

Hvaða þjóðir hafa það best?

  Hvaða þjóðir búa við besta heilsu?  Eða njóta mest fjárhagslegs öryggis?  Eða eru hamingjusamastar?  Eða þurfa síst að óttast glæpi?  Breska tímaritið Business Insider hefur svarið.  Það ber fyrir sig rannsókn og niðurstöðu The Legatum Institute.  

  Niðurstaðan kemur ekki á óvart.  Sú þjóð sem toppar listann er Norðmenn.  Ekki í fyrsta skipti.  Niðurstaðan er samhljóða hliðstæðum rannsóknum margra annarra stofnana og fjölmiðla síðustu ár. Svo eru þeir sprækir í rokkinu.  

  Toppsæti Norðmanna er svo sjálfgefið að það er ekki fréttnæmt.  Eiginlega ekki heldur annað sætið.  Það fellur í skaut Svisslendinga.  Þjóðarinnar sem beitir þjóðaratkvæðagreiðslum oftar en allir aðrir. Með þessum árangri.  Það er ekki tilviljun að svissneskir karlar lifa lengst allra í heiminum.

Íslenskur miðill fær 130 milljónir

  Margur góður maðurinn og mörg góð konan hafa í áranna rás reddað sér fyrir horn fjárhagslega með því að bjóða upp á miðilsfund.  50 eða 100 eða 150 manns borga glaðir í bragði 3000 kall eða 4000 þúsund kall eða 5000 kall fyrir að fá hlýja kveðju frá draugum fortíðar.

  Þetta er góður bisness.  Ennþá betra er að fólk sem syrgir nýlátna ástvini gleðjist yfir kveðju frá þeim.  Þó ekki sé nema með þeim orðum að viðkomandi fylgist með,  sé með syrgjanda í vöku og draumi og hafi það gott.  Verra væri ef einhver kvartaði undan því að hafa það djöfull skítt í draugaheimi.  Það er ekki í boði.  Það væri vondur bisness.

  Bestu fréttirnar eru þær að til er mun arðbærari leið fyrir sjáendur drauga en að tína seðla upp úr peningaveski fátækra syrgjenda nýlátinna ástvina.  Það eina sem þarf að gera er að halda miðilsfund fyrir framan mann að nafni James Randi.  Hann borgar miðlinum 130 milljón krónur fyrir frambærilegan miðilsfund.  Það er gott tímakaup.

  Að þessum fróðleik uppgefnum er næsta víst að miðillinn og leikkonan Anna Birta komist aftur i fréttir.  Að þessu sinni undir fyrirsögninni "Íslenskur miðill fær 130 milljónir!"  Þá býður hún Frosta Logasyni og frú út að borða á Draugabarnum á Stokkseyri.