Ótrúlegt en satt

 

  Flestir glæpir komast upp.  Ein kenningin er sú að flestir fremji afbrot vegna siðblindu og það sé vegna þessarar sömu blindu sem upp um þá kemst.  Önnur kenning er sú að flestir glæpamenn séu einfaldlega heimskir.  Hver sem ástæðan er þá er ómögulegt annað en undrast og brosa yfir sumum.

  - Fyrir mörgum árum var reiðhjóli stolið á Sauðárkróki.  Nokkrum dögum síðar var bein sjónvarpsútsending frá Sauðárkróki vegna sveitastjórnakosninga.  Helgi Helgason fréttamaður stóð fyrir utan félagsheimilið Bifröst og sagði tíðindi.  Ungling bar þar að á reiðhjóli og löngun til að sjást í sjónvarpi helltist yfir hann.  Hann hjólaði þess vegna fram og til baka fyrir aftan Helga. 

  Eigandi stolna hjólsins þekkti þarna hjólið sitt.  Hann hringdi í lögregluna.  Lögreglustöðin er í næsta húsi við Bifröst.  Þjófurinn var handtekinn í beinni útsendingu. 

  -Í kvikmyndinni um Lalla Johns segir félagi hans af Litla-Hrauni frá innbroti þeirra félaga í bifreiðaverkstæði á Eyrarbakka.  Félaginn endar frásögnina fyrir framan myndavélina með orðunum:  "Þetta er eitt af þeim innbrotum sem aldrei mun komast upp hverjir frömdu."

  - Bandaríski söngvarinn Bobby Brown var gripinn við ölvunarakstur.  Hann var skikkaður til að yfirgefa ekki Georgíu-ríki fyrr en dómur félli í málinu.  Brot á þessum fyrirmælum kosta 8 daga fangelsun.  Nokkrum dögum síðar fylgdist dómarinn í málinu með beinni útsendingu frá afhendingu bandarísku músíkverðlaunanna Grammy í Los Angeles.  Þar steig Bobby Brown á svið.  Dómarinn hringdi í "kollega" sína í LA og söngvarinn var svo gott sem handtekinn á sviðinu og þurfti að dúsa í fangelsi næstu 8 daga.  Síðar sagðist Bobby Brown ekki hafa áttað sig á að beina sjónvarpsútsendingin í LA næði til Georgíu.

  -Ungur bandarískur kannabisræktandi montaði sig af árangrinum á myspace-síðu sinni.  Hann setti daglega þangað inn nýjar myndir til að leyfa lesendum að fylgjast með.  Á myspace-síðu drengsins voru allar upplýsingar um hann sem lögreglan þurfti til að banka upp heima hjá honum.  Fyrir dómi sagðist strákurinn hafa haldið að löggan hefði eitthvað þarfara að gera en hanga á netinu. 

 - Byssumaður braust inn til prests í Bandaríkjunum og heimtaði peninga.  Presturinn var ekki með reiðufé á sér.  Hann notaði einungis ávísanahefti.  Byssumaðurinn krafðist þess þá að presturinn léti sig fá 5.000 dollara ávísun.  Presturinn benti byssumanninum á að ávísunin yrði að vera stíluð á nafn viðkomandi því bankar skipta ekki 5.000 dollara ávísun nema hún sé stíluð á nafn.  Byssumaðurinn rétti prestinum nafnskírteinið sitt svo hann myndi örugglega stafsetja það rétt.  Byssumaðurinn var handtekinn heima hjá sér áður en hann framvísaði ávísuninni.

  - Í Illinois tók byssumaður náunga á mótorhjóli í gíslingu og neyddi til að keyra með sig á milli hraðbanka.  Byssumaðurinn var fljótt handtekinn því hann tók einungis út peninga af sínum eigin reikningi.

  - Í Modesto í Kaliforníu er Steven Richard King frægur.  Hann ruddist inn í Bank of America og tilkynnti vopnað rán.  Hann notaði þumalinn og vísifingur til að líkja eftir byssu í vasanum.  Í taugaveiklun varð honum á að taka "byssuna" upp úr vasanum og ógna viðstöddum.

  - Í S-Karólínu gekk maður inn á lögreglustöð,  skellti kílói af kókaíni á afgreiðsluborðið og óskaði eftir því að fá að leggja fram kæru á hendur sölumanninum.  Kókaínið væri illilega útþynnt.

  Gaman væri ef þið munið eftir fleiri sögur af heimskum glæpamönnum.

Auga slegið úr manni

 

  Á mínum unglingsárum var vinsæll skemmtistaður við Suðurlandsbraut sem hét Sigtún.  Þangað brá kunningjahópurinn sér stundum þegar vel lá á honum.  Á áttunda áratugnum var til siðs að ungir menn tuskuðust fyrir utan húsið eftir dansleiki.  Það var undir þannig kringumstæðum sem einn í kunningjahópnum,  tröllslegur náungi sem við getum kallað Gretti,  lenti í nokkuð snörpum átökum við ókunnugan mann með uppvöðslu.  Eftir nokkra gagnkvæma pústra náði gaurinn dúndurhöggi á gagnauga Grettis.  Við höggið spýttist augað úr augntóftinni á Gretti og þeyttist eitthvað út í loftið.

  Gaurinn fékk áfall.  Hann starði fyrst gapandi af undrun í hálfa sekúndu í tóma augntóftina á Gretti,  snérist síðan snöggt á hæl og hljóp öskrandi eins hratt og fætur toguðu út í buskann.  Til hans spurðist ekki meir.  Nokkrar stelpur sem fylgdust með öskruðu manninum til samlætis  

  Grettir sjálfur tók atvikinu með jafnaðargeði.  Fór bara að leita að auganu,  fann það og stakk aftur í augntóftina.  Hann var nefnilega með gerviauga síðan hann slasaðist sem barn.  Honum mislíkaði hinsvegar verulega forsíðufyrirsögn á dagblaðinu Vísi á mánudeginum.  Hún var sú sama og fyrirsögnin á þessari færslu.

Ótrúlega flottar götuteikningar

  Ljósmyndirnar hér fyrir neðan sýna krítarteikningar sama mannsins á göngugötur og torg.  Þeim er raðað eftir aldri.  Þannig sést hvernig listamaðurinn nær betri og betri tökum á viðfangsefninu.  Litaskil verða skarpari, dýpt myndefnisins (perspektívið) eykst,  smáatriðum fjölgar og teikningin verður flóknari.   

  Það tekur marga daga,  jafnvel vikur,  að hrista eina svona mynd fram úr erminni.  Það sorglega er að myndirnar varðveitast ekki til frambúðar.  Þær eyðast örfáum vikum vegna ágangs fólks og veðurs.   Þá getur komið sér vel fyrir listamanninn og vegfarendur að varðveita listaverkið á ljósmynd.

Fleiri leyndarmál á íslenskum plötum

 

  Fréttablaðið "skúbbaði" í gær.  Þar var upplýst að Ásgeir Jónsson,  best þekktur sem söngvari Bara-flokksins,  hafi sungið 12 raddir í handboltalaginu  Gerum okkar besta  eftir Valgeir Guðjónsson.  Ástæðan var sú að upptaka á söng landsliðsins hafði misheppnast og liðsmenn þess komnir til útlanda.  Ásgeir gerði sér þá lítið fyrir og hermdi eftir söng landsliðsmanna.

  Þetta er fjarri því í eina skiptið sem Ásgeir reddar málum á þennan hátt.  Í fyrravor upplýsti ég að Ásgeir söng hluta lagsins  Seinasta augnablikið  á plötu Bubba,  Konu.  Eftir að Bubbi söng lögin á plötunni fór hann í meðferð.  Fyrir mistök þurrkaðist hluti af söng hans í  Seinasta augnablikið  út rétt áður en platan var send til Englands í "masteringu".   Ásgeir söng þá þennan kafla inn.  Hann gerir það svo vel að afar erfitt er að greina annað en Bubbi syngi allt lagið.

  Ásgeir er rosalega góð eftirherma í söng.  Hann fer létt með að syngja alveg eins og David Bowie,  Freddy Mercury,  Bubbi og fleiri. 

  Takið eftir hvað letrið er flott á plötuumslagi  Konu.  Ástæða þess að það er svona flott er að ég skrifaði það.

Takið þátt! Ný skoðanakönnun: Hver er leiðinlegasta íslenska hljómsveitin?

 Fyrir nokkrum dögum var lífleg umræða á blogginu hans Kobba Magg,  www.jakobsmagg.blog.is,  um leiðinlegustu íslensku hljómsveitirnar.  Fjörið var svo mikið að það barst inn á mína bloggsíðu.  Í kjölfarið ákvað ég að setja dæmið upp í formlega skoðanakönnun.  Ég óskaði eftir tillögum um leiðinlegustu hljómsveitir þessarar aldar til að stilla upp í þá könnun.  Í 120 "kommentum" voru á fimmta tug hljómsveita nefndar. 

  Nú hef ég stillt upp nöfnum þeirra hljómsveita sem 3 eða fleiri tilnefndu.  Sönghópar eins og Lúxor og Nylon eru ekki með né heldur sólósöngvarar.  Bara hljómsveitir og þær afmarka ég við popp- og rokkdeildina.

  Ég legg áherslu á að hér er aðeins um léttan samkvæmisleik.  Hann er ekki illa meintur heldur afgreiddur í galsa.  Þarna eru mínar uppáhaldshljómsveitir,  eins og Mínus og Sigur Rós.  Ég á vini í öðrum hljómsveitum á listanum og veit að þeir hlæja að þessu og taka leikinn ekki hátíðlega.   Enda er þetta eins og þegar valdir eru vinsælustu og óvinsælustu stjórnmálamennirnir.  Þeir sömu skora iðulega ofarlega á báðum listum. 

  Gott væri að heyra rök fyrir atkvæði ykkar.  En vinsamlegast hafið þau á kurteislegum nótum.  Leikurinn gengur út á það - að þessu sinni.

 

Neytendastofa leggur blessun yfir gróf vörusvik

  

  Fyrir nokkru hóf heildverslunin Eggert Kristjánsson hf.  sölu á hvítu ginsengi úr rótarendum,  svokölluðum úrgangsendum.  Vörunni lét heildverslunin pakka inn í samskonar pakkningar og með samskonar útlitshönnun og Rautt eðal ginseng,  sem fyrir var á markaðnum.  Ekki nóg með það.  Hvíta ginsengið var kallað Rautt eðal ginseng á umbúðunum.

  Nafnið Rautt eðal ginseng er lögverndað vörumerki.  Uppátækið var kært og Eggerti Kristjánssyni hf.  gert að kalla vöruna öðru nafni og breyta útliti umbúðanna.  Nafninu var þá breytt í Rautt kóreskt ginseng og umbúðunum lítillega breytt.  Varan var þó áfram seld ólöglega í verslanir utan höfuðborgarinnar og í póstverslun femin.is.

  Neytendasamtökin létu efnagreina ginsengið til að sannreyna að um hvítt ginseng væri að ræða.  Reyndar þurfti þess ekki því liturinn er auðséður.  Rautt ginseng er með ljósum rauðbrúnum blæ.  Hvítt ginseng er það ekki.  Neytendasamtökin fengu staðfest í efnagreiningu erlendis að þetta sem kallað er Rautt kóreskt ginseng er aðeins hvítt ginseng.

  Það er mikill gæðamunur og stór verðmunur á rauðu ginsengi og hvítu.  Þarna er því um gróf vörusvik að ræða.  Neytendasamtökin kærðu vörusvikin til Neytendastofu.  Það vekur undrun að Neytendastofa skuli nú hafa tekið þá ákvörðun að aðhafast ekki í málinu og leggja þannig blessun sína yfir því að svikin vara sé á markaði.

  Neytendastofa vísar til þess að ekki sé til evrópskur staðall yfir það hvenær ginseng telst vera hvítt eða rautt.  Þannig staðall er hinsvegar í Kóreu og framfylgt af nákvæmni. 

  Myndin sýnir umbúðir ósvikna rauða ginsengsins.

Ekki ástæða til aðgerða vegna ginsengs

Bráðfyndið

 

  Hér fyrir neðan eru brosleg orðatiltæki sem hrokkið hafa upp úr viðmælendum í ljósvakamiðlum.  Flest að öllum líkindum óvart sem mismæli en hugsanlega eru einhver þeirra úthugsaður útúrsnúningur.  Leggið endilega í púkkið ef þið munið eftir orðatiltækjum í þessum stíl. 

- Róm var ekki reist á hverjum degi! (sagt af þekktum Selfyssingi)

- Byrjið á því að beinhreinsa vínberin (í uppskrift á desert) 

- Svo handflettir maður rjúpurnar (í annarri uppskrift)

- Ég var alveg steinvöknuð (í frásögn þar sem viðkomandi sagðist áður hafa steinsofnað).

- Lærin lengjast sem lifa (átti sennilega að vera "Maður lærir svo lengi sem lifir").

- Allt fór afsíðis sem gat farið afsíðis. 

- Þessi peysa er mjög lauslát.

- Þau eiga þvílíka myllu,  lifa eins og greifingjar og leika á alls eggi.

- Hann sló þarna tvær flugur í sama höfuð.

- Ég hefði sko gefið mikið fyrir að fá að vera þarna dauð fluga á vegg.

- Ég sá svo sæta stelpu að ég fór alveg framhjá mér.

- Ég var svo þreyttur að ég henti mér beint undir rúm.

- Hann sat bara eftir með súrt eplið.

- Og nú,  góðir farþegar,  er einmitt fengitími melóna.

- Ég hreinlega vissi ekki í hvorn fótinn ég ætti að setjast.

- Hún átti nú eftir að naga sig í handakrikann fyrir að hafna þessu.

- Hann barasta kom eins og skrattinn úr heiðskíru lofti.

- Þar stóð hundurinn í kúnni.

- Æ, maður fer bara í bæinn til að sjá sig og sýna aðra.

- Íslendingar eru orðnir svo loðnir á milli lappanna.

- Þetta er ekki upp í kött á Nesi.

- Betur sjá augu en eyru.

- Það er ég sem ríð rækjum hér!

- Ég er búinn að liggja andvana í alla nótt.

- Þeir urðu að setja í minni pokann fyrir heimamönnum. 

Tékkið á Ruddanum

 

  Það er fullt af músík þarna úti sem ástæða er til að vekja athygli á og ástæða til að tékka á. Tölvupoppari sem heitir Bertel Ólafsson - en gegnir listamannsnafninu Ruddinn - hefur verið að dunda sér við að gera músík.  Hann er kominn á samning hjá bresku útgáfufyrirtæki sem heitir Lakeland Records, www. lakelandrecords.com.  Þegar kíkt er á heimasíðuna hljómar lag með kappanum.  Tékkið endilega á öðru sem hann hefur verið að gera http://www.soundclick.com/store/digital/01_Shop_Album.cfm?bandID=722405&albumID=25203

  Þetta er notalegt tölvupopp.  Létt og aðgengilegt.  Kannski er Ruddinn poppstjarna morgundagsins?

 www.myspace.com/ruddinn

www.tonlist.is/Music/Artist/10246/ruddinn

Afi glímir við draug

 Á næsta bæ við æskuheimili mitt í Hjaltadal bjó maður á aldur við afa,  ásamt sinni fjölskyldu.  Þetta var vandaður maður sem enginn sagði neikvætt orð um.  Ekki heldur afi á meðan maðurinn var á lífi.

  Nokkru eftir fráfall mannsins fór hann að birtast afa í draumi og var með "leiðinda skæting",  eins og afi orðaði það.  Til að byrja með liðu mánuðir og vikur á milli þess sem maðurinn birtist afa í draumi.  En alltaf með leiðindi.  Afi var ósáttur við þetta því hann taldi manninn ekki eiga neitt inni hjá sér.  Verra þótti afa að þetta ágerðist. 

  Í áranna rás fór maðurinn að færa sig upp á skaptið.  Hann tók upp á því að vekja afa á nóttunni - án þess að gera boð á undan sér í draumi.  Framan af varð afi einungis var við manninn án þess að hann væri sýnilegur.

  Síðasta veturinn sem afi lifði fór maðurinn að birtast honum á nóttunni sem draugur.  Það var hvorki mannsmynd né önnur regluleg lögun á draugnum.  Lögunin var síbreytileg.  Henni svipaði helst til þunns reykjamökks sem stækkaði eða minnkaði eldsnöggt.   Þetta sá afi þó niðamyrkur væri í herberginu.  Hann var heldur ekki í vafa um hver var þar á ferð.     

  Við fótagaflinn á rúminum hans afa var skorsteinn.  Neðst á skorsteininum var loka.  Afa tókst ætíð að hrekja drauginn inn um lokuna og út um skorsteininn.

  Einhverra hluta vegna hafði afi hljótt um þessar ofsóknir.  Það er að segja eftir að draugagangurinn hófst.  Ég vissi ekki af draugagangnum fyrr en afi bað mig um að útvega sér spýtu sem hann gæti notað sem barefli á drauginn.  Þá sagði hann mér alla söguna.

  Afi svaf einn heimilisfólks á hálf niðurgrafinni jarðhæð.  Við sem sváfum á efri hæðinni urðum ekkert vör við viðureign afa og draugsins.  Nema pabbi.  Hann fór fyrstur á fætur til að koma mjólkurbrúsum á mjólkurbíl.  Þá kom fyrir - að minnsta kosti í þrígang - að hann heyrði afa lemja ótt og títt með spýtunni og hreyta reiðilega út úr sér:  "Já,  vertu feginn að flýja í skorsteininn,  Páll Þorgrímsson!  Ég tek miklu betur á þér ef þú vogar þér að birtast mér aftur,  helvískur!"

  Þegar afi lést um vorið kom í ljós að hann var búinn að tvíefla bareflið með því að reka stærðar nagla í gegnum annan enda þess.

---------

Fleiri sögur af afa:

 - Afi hermir eftir

http://jensgud.blog.is/blog/jensgud/entry/164351

- Afi mætir í afmæli aldarinnar

http://jensgud.blog.is/blog/jensgud/entry/165716

- Afi bjargar nærbuxunum sínum

http://jensgud.blog.is/blog/jensgud/entry/184229

- Afi sefur í 2 sólarhringa

 http://jensgud.blog.is/blog/jensgud/entry/399826

 - Afi og jólin

http://jensgud.blog.is/blog/jensgud/entry/389916/

- Afi passar sitt fólk

http://jensgud.blog.is/blog/jensgud/entry/455418

- Afi á sjúkrahúsi

http://jensgud.blog.is/blog/jensgud/entry/418268

Skoðanakönnun lokið - úrslit

  Að undanförnu hefur verið í gangi á bloggsíðu minni skoðanakönnun þar sem spurt er: 

"Bubbi gagnrýnir Björk fyrir að vilja vernda náttúru landsins í stað þess að vekja athygli á vaxandi fátækt. Ertu sammála Bubba?" 

  Svarmöguleikar voru "já" eða "nei".  Á sjötta hundrað atkvæði hafa skilað sér í hús og ég sé ekki ástæðu til að halda könnunni lengur úti.  Niðurstaðan breytist ekkert þótt atkvæðum fjölgi en hún er þessi í % talið: 

Já 46.9%

Nei 53.1%

Fögnum glæsilegum árangri með því að fjölmenna í gleðigönguna og á hátíðarhöldin

 

  Á morgun bjóða ríkisstjórn Íslands og Reykjavíkurborg til fagnaðarfundar íslensku þjóðarinnar.  Ókeypis verður í strætó eftir klukkan 15:02.  Einnig verður ókeypis í bílastæðishús á milli klukkan 17:00 og 19:00.  Ákveðin hefur verið ný akstursleið frá Skólavörðuholti en þaðan mun hópur skógræktaráhugamanna leggja af stað í opnum vagni kl. 18:00 í fylgd lúðrasveitar,  fánabera og lögreglu. Ekið verður niður Bankastræti að Arnarhóli.  Þar verður haldinn fagnaðarfundur og Töfratréð heiðrað af íslensku þjóðinni og karlakórnum Fjallabræðrum frá Flateyri.

  Töfratréð stendur að öllu jafna vaktina á lóðinni við leikskólann Steinahlíð í Vogahverfi í Reykjavík.  Það sigraði með glæsibrag í keppninni um tré ágústmánaðar eftir harðvítuga samkeppni frá öllum helstu trjám landsins.  Töfratréð er afbrigði körfuvíðis sem kallast þingvíðir.

  Töfratréð er 6,15 metrar á hæð,  ummál í brjósthæð er 0,65 m og umfangið 7,50 m.

  Íslenska þjóðin er að sjálfsögðu að springa úr stolti yfir glæsilegri frammistöðu Töfratrésins. 

  Um kvöldið veitir forseti Íslands,  Ólafur Ragnar Grímsson,  Töfratrénu fálkaorðuna.  Bölsýnismenn óttast að Töfratréð muni ekki veita orðunni viðtöku þar sem það er þekkt fyrir áhugaleysi á prjáli. 

.

  Athugið að börnin á myndinni tilheyra ekki Töfratrénu.  Þau eru bara að klifra í því. 

Platfiskur til sölu

 

  Í Tvídægri (24 stundum) í dag er að finna auglýsingu með yfirskriftinni "Ekta fiskur".  Í undirtexta er upptalning á ýmsum spennandi sjávarafurðum,  svo sem rækjum,  gellum,  kinnfiski, ýsu og þorski.  Einnig er í boði bæði útvatnaður saltfiskur og sérútvatnaður saltfiskur.  Hver er munurinn á útvötnuðum og sérútvötnuðum saltfiski?

  En það er yfirskrift auglýsingarinnar sem skilur eftir stærsta spurningamerkið.  Fyrst tekið er fram að í boði sé ekta fiskur þá hljóta einhverjir að vera með gervifisk á boðstólum.  Það væri gustuk að vita hverjir það eru.  Reyndar hef ég mínar grunsemdir.  Ég fór á sjávarréttahlaðborð um daginn.  Þar litu sumir fiskarnir út alveg eins og sviðakjammar og brögðuðust eins og sviðakjammar,  hvort sem um var að ræða eyru eða tungu.  Það sem gerði þetta ennþá dularfyllra var að ég fékk mér rófustöppu með þeim fiski.

Færeyingar fylgjast áhugasamir með söngkonunni sem borgarstjórinn bauð á Menningarnótt

Íslendingar spentir uppá Sølvu Ford 23. aug 2008, 15:50

 
Mynd: Ólafur F. Magnusson og Sølva Ford

Í Reykjavík eru mentanardagar - Cultural Night - byrjaðir. og nú seinnapartin framførir Sølva Ford í Reykjavík, eftir at hon varð boðin til býin av sjálvum borgarstjóranum
Fyrr í ár beyð Ólafur F. Magnusson, nú fyrrverandi borgarstjóri í Reykjavík, Sølvu Ford at syngja í Reykjavík til mentanar dagarnar. Hann var tá á vitjan í Føroyum.
Í dag syngur Sølva í Reykjavík og íslendingar eru spentir, tí teir hava hoyrt nógv um henda sangfuglin, men kenna ikki so nógv til tað, ið Sølva hevur at bjóða.
Hon syngur í dag á gallarí Kjarvalsstaðir, sigur heimmildarmaður okkara, Jens Guð, og leggur afturat, at nýggi borgarstjórin í Reykjavík eitur Hanna Birna.

Handbolti er hallærislegasti boltaleikur í heimi

 

  Fáir jarðarbúa sýna handbolta áhuga.  Ennþá færri stunda hann,  eða innan við 0,0003% jarðarbúa.  Hjá flestum þjóðum gengur afskaplega illa að manna handboltalið.  Fullorðið fólk með fullu viti lætur ekki draga sig út í svona aulalegan boltaleik.

  Það er mesta furða að handbolti fái að vera með á Olympiuleikunum.  Hann dregur verulega úr reisn þeirra.  Hann hangir þar inni einungis vegna upprunans sem frumstæður leikur inúíta á Grænlandi.  Út af snjóþyngslum gátu Grænlendingar ekki spilað fótbolta.  Þess vegna fundu þeir upp handbolta.  Út af fyrir sig er handbolti ekki kjánalegur í sínu náttúrulega umhverfi í snjósköflum á Grænlandi.

.

  Handbolti er sá boltaleikur á Olympíuleikunum sem minnstur áhugi er fyrir.  Sjónvarpsstöðvar sem sýna frá handboltaleikjum eru vandfundnar - ef RÚV og Stöð 2 Sport eru frátaldar.  Fréttir og greinar um handbolta eru jafn vandfundnar á íþróttasíðum dagblaða - annarra en íslenskra.  Reyndar eru vinsælir boltaleikir ekki margir.  Um milljarður stundar blak.  Tæpur hálfur milljarður körfubolta.  Einhverjar hundruð milljónir stunda fótbolta,  borðtennis og badminton.  Til samanburðar eru 18 milljónir í handboltanum - og flestir dálítið skrítnir.  Til að átta sig á hvað þetta er fámennur hópur á heimsvísu þá eru íbúar Kína 1400 milljónir og íbúar Indlands 1000 milljónir.  Þar fyrir utan er fleira kallað handbolti en sá handbolti sem við þekkjum best.  Ég hef til að mynda orðið var við að Bandaríkjamenn tala um handbolta þegar þeir setja upp stóran hanska og leika sér með lítinn bolta.  Ég held að þeir hendi boltanum í vegg.

.

   Heimsmeistaramót í handbolta var haldið á Íslandi fyrir nokkrum árum.  Á sama tíma kepptu Íslendingar í júrivisjón á Írlandi.  Íslenska hópnum til undrunar fann hann enga meðal þátttakenda í júrivisjón sem vissu hvað handbolti var,  hvað þá að einhver vissi af heimsmeistaramótinu á Íslandi.

  Það að íslenskum handboltamönnum gangi þokkalega í boltaleik í Peking skiptir litlu sem engu máli.   Heimsbyggðin tekur ekkert eftir því.  Hún veit ekkert hver vinnur hvern í handbolta.  Ekki fremur en við vitum hver vinnur hvern í hanaati eða pokahlaupi,  íþróttagreinum sem þó njóta meiri athygli en handbolti.  ´

.

  Ég reyndi að "gúgla" ljósmynd af handbolta - án árangurs.  Það fundust engar slíkar myndir á "gúglinu".  Þess í stað fékk ég spurningu um það hvort ég væri að leita að mynd frá grettukeppni,  keppnisgrein sem er þekkt í útlöndum,  öfugt við handbolta.

Þegar Anna á Hesteyri slóst við mömmu

 

   Móðir mín var 18 ára þegar faðir hennar lést.  Hann var jarðaður í fjölskyldugrafreitnum á Hesteyri í Mjóafirði.  Heimasætan á Hesteyri,  Anna Marta Guðmundsdóttir,  var komin á þrítugsaldur.  Þær mamma eru bræðradætur.  Mamma var flutt suður til Reykjavíkur.  Þarna á fimmta áratugnum var ferðalag frá Reykjavík til Mjóafjarðar heilmikið mál.

  Mamma keypti sér fínan og - eiginlega um efni fram - rándýran kjól fyrir jarðarförina.  Hann var víður og svartur.  Sniðið byggði á gulllituðu belti sem reyrði kjólinn saman í mittið.  Yfir brjóstinu vinstra megin var gulllituð rós í stíl við beltið.   Mamma var rígmontin af sér í þessum fína kjóli þegar hún mætti í jarðarförina.  Fyrsta manneskjan sem mamma hitti var Anna.  Þær höfðu varla heilsast þegar Anna réðist á mömmu og tók hana glímutökum.  Mömmu var verulega brugðið en varðist fimlega framan af.  Hún æfði stíft fimleika og var í góðri þjálfun.  Leikar fóru þó þannig að Anna þeytti mömmu í loft upp,  sleit utan af henni beltið og skellti henni flatri í drullusvað.

  Mamma var í miklu uppnámi.  Kjóllinn hékk eins og skítugur hveitipoki utan á henni þegar beltsins naut ekki lengur við.  Hólkvíður og druslulegur.  Mamma fór að gráta og spurði Önnu hvers vegna í ósköpunum hún hefði ráðist á sig.  Anna svaraði með vorkunnartóni:

  - Ég veit að þessi sorgardagur er þér erfiður.  Ég var búin að velta mikið fyrir mér hvernig ég gæti auðveldað þér að takast á við fráfall pabba þíns.  Þá datt mér í hug að ég gæti fengið þig til að dreifa huganum ef ég kæmi þér á óvart með glímubrögðum.  

-------------------------

Fleiri sögur af Önnu á Hesteyri:

- Hringt á lögguna

www.jensgud.blog.is/blog/jensgud/entry/463661

- Keyrt á miðjum vegi

www.jensgud.blog.is/blog/jensgud/entry/423296

- Glannaakstur

www.jensgud.blog.is/blog/jensgud/entry/409355

- Konfekt

www.jensgud.blog.is/blog/jensgud/entry/398785

- Klámi mótmælt

www.jensgud.blog.is/blog/jensgud/entry/398589

- Bílpróf

www.jensgud.blog.is/blog/jensgud/entry/337158

- Reddar hlutunum

www.jensgud.blog.is/blog/jensgud/entry/532905

- Farandssali

www.jensgud.blog.is/blog/jensgud/entry/606305

- Bók

www.jensgud.blog.is/blog/jensgud/entry/592177 

Eigingirni eða...?

  Íri nokkur að nafni Murphy fór til læknis eftir langvarandi veikindi. Læknirinn skoðaði hann vel og vandlega.  Þegar skoðun var lokið dæsti læknirinn og sagði:  "Ég hef slæmar fréttir að segja þér.  Þú ert með krabbamein sem verður ekki læknað. Þú átt ekki nema tvær vikur eftir ólifaðar,  mánuð í mesta lagi."

 

  Murphy var að vonum brugðið.   En þar sem að hann var jarðbundinn maður var hann fljótur að jafna sig.

  Hann fór fram þar sem að sonur hans beið eftir honum.  Murphy sagði við hann:   "Sonur sæll, við Írar höldum upp á hlutina hvort sem gengur vel eða illa.  Í þetta skipti ganga þeir mjög illa.  Ég er með krabbamein og á skammt eftir ólifað. Förum nú á pöbbinn og fáum okkur nokkra bjóra."

  Eftir fjóra bjóra voru feðgarnir orðnir kátir.  Þeir hlógu og drukku meiri bjór og skemmtu sér mjög vel.  Nokkrir vinir Murphys gamla komu að borðinu hjá þeim og spurðu hvað þeir væru að halda upp á.  Murphy sagði að þeir Írar héldu bæði upp á það góða og slæma og í þetta skiptið væri það slæmt þar sem hann ætti stutt eftir.  Vinirnir urðu furðulostnir og spurðu hvað hrjáði hann.  Murphy sagðist vera nýkominn frá lækninum sem hefði greint hann með alnæmi og hann ætti bara tvær vikur eftir.  Félagarnir fengu sér nokkra bjóra með Murphy til að samhryggjast honum og tíndust svo burtu þegar leið á kvöldið.

  Þegar vinirnir voru allir farnir hallaði sonurinn sér að Murphy og sagði:  "Pabbi, ég hélt að þú værir með krabbamein en þú sagðir vinum þínum að þú værir að deyja úr alnæmi."  Murphy svaraði:  "Ég er með krabba, sonur sæll.  Ég vil bara ekki að neinn af þessum andskotum skríði upp í til mömmu þinnar þegar ég er farinn." 

 

Hvað er að því að borgarstjóri djammi?

  Hvað er með þessar sögur af því að borgarstjórinn,  Ólafur F.,  hafi heimsótt skemmtistaði í miðbæ Reykjavíkur með vinum sínum?  Hvað á að vera neikvætt við það?  Af hverju eru samferðamenn borgarstjórans í fyrrverandi meirihluta borgarinnar að gera þetta tortryggilegt með því að segjast eiga erfitt með að verja það?  

  Ólafur er enginn drykkjumaður.  Hinsvegar hefði einungis verið í besta lagi að hann hefði dottið rækilega í það,  eins og tugþúsundir landsmanna gera um helgar.  Ekki man ég eftir því að flokksfélagar Davíðs Oddssonar eða aðrir hafi talið sig vera í vandræðum með að ræða um Bermúdaskál kappans.  Þvert á móti dró hún bara fram skemmtilega hlið á skemmtilegum manni.  

  Stjórnmálamenn,  hvort sem þeir eru borgarstjórar eða forsætisráðherrar,  eru bestir þegar þeir eru ekki hafnir upp yfir almenning heldur eins og annað fólk.  Það er meira en í góðu lagi að Hanna Birna drekki sig blindfulla á Menningarnótt,  æli yfir sig og nærstadda,  verði með drykkjulæti og kynnist af eigin raun hvernig lögreglan tekur á slíku.  Það er kostur að borgarstjóri þekki hlutina frá öllum hliðum.    

Sakar Hönnu Birnu um ósannindi

Frábær forréttur - einfaldur og hollur

  Eftir hressandi umræðu um það hvað Madonna er hrikalega ljót - og músík hennar næstum því jafn leiðinleg og plötur Stjórnarinnar (róleg,  róleg,  ég sagði næstum því.  Ekki jafn) - er upplagt að laga einfaldan og bráðhollan forrétt.  Forrétturinn er fyrir 4 (eða þrjá mjög svanga og gráðuga).  Það eina sem þarf í réttinn er:

5 kíló af rækju

2,3 lítrar af tómatsósa

1,5 lítrar hvítvín

Hálft kíló af smátt söxuðum súrum gúrkum 

Flaska af sítrónusafa

5 matskeiðar af kaldri piparsósu

Salt eftir smekk

.

  Fyrst þarf að kaupa 72 litlar skyrdollur.  Skyrið er fjarlægt úr þeim og sett í þokkalega hreina skúringafötu og dósirnar þvegnar.  Teljið rækjurnar samviskusamlega og skiptið þeim jafnt í skyrdollurnar.   Ef verulegur stærðarmunur er á rækjunum skulu 2 smáar jafngilda einni stórri.

Bleytið rækjurnar lítillega með sítrónusafanum.  Ekki til að framkalla skarpt sítrónubragð heldur til að koma í veg fyrir matareitrun því viðbúið er að rækjurnar séu skemmdar.

Hrærið öllu hinu saman og hellið yfir rækjurnar. 

  Það kemur vel út að fara með þetta á næstu umferðareyju,  rífa þar eins og eina lúku af grasi,  fínklippa það og strá í örlitlum mæli yfir skálarnar.  Örlitlum.  Það má alls ekki vera það mikið að bragð finnist af grasinu.  Grasið er bara til skrauts.

  Með þessu er nartað í ristað brauð og kælt hvítvín þambað af áfergju.

 

  Heppilegt er að byrja snemma dags að snæða þennan forrétt.  Hann er ótrúlega drjúgur og dugir fram að kvöldmat.

  Sem aðalrétt er mælt með hrossabjúgum og kartöflumús.  Hrossabjúgun skulu vera alvöru,  það er að segja einungis úr hökkuðu hrossakjöti en ekki drýgð með kartöflumjöli,  undarennudufti,  sagi,  hveiti eða öðru. 

Í eftirrétt er upplagt að nota skyrið.  Það er stemmning í því að moka skyrinu upp í sig með berum höndum og enda á skyrslag.  Þá er best að reyna að hitta með skyrinu í andlit hvers annars og muna að klína því líka í hárið.  Það virkar eins og góð hárnæring.  Mýkir hárið og gerir það glansandi.  Held ég.   

. 

  Myndin sýnir mann sem var búinn að telja þrjú þúsund og eitthvað rækjur þegar hann fipaðist í talningunni og þurfti að byrja að telja upp á nýtt.  Það kenndi honum að vera ekki með hugann við eitthvað annað.

Á plötu með skærustu poppstjörnum heims - til stuðnings mannréttindum í Tibet

  Í lok síðustu viku kom út safnplatan "Songs for Tibet".  Undirtitillinn er "The Art of Peace - Wisdom.  Action.  Freedom".  Platan er gefin út í tilefni Olympíuleikanna í Kína.  Henni er ætlað að fylgja eftir kröfu um mannréttindi,  tjáningarfrelsi og trúfrelsi í Tíbet.  Allur ágóði af sölu plötunnar rennur óskiptur til félagsskapar sem heitir Art of Peace Foundation.  Mér skilst að hann sé nátengdur Dalai Lama,  útlægum trúarleiðtoga frá Tíbet.

  Flytjendur laga á plötunni eru margar skærustu poppstjörnur heims.  Þær gefa allar eftir höfundarlaun sín af lögunum.  Meðal flytjenda á plötunni eru Sting,  Jackson Brown,  Alanis Morissette,  Moby,  Suzanna Vega,  Rush,  Joan Armatrading,  Garbage,  Dave Matthews,  Damian Rice,  John Mayer,  Ben Harper,  Underworld og færeyska söngvaskáldið Teitur. 

  Í huga okkar Íslendinga er álfadrottningin Eivör hin eina sanna færeyska poppstjarna.  Vissulega er hún súperstjarna á Íslandi,  í Færeyjum og vel þekkt í Danmörku,  Noregi,  Svíþjóð og víðar.  Og alltaf flott og frábær.  Á heimsmarkaði er hinsvegar Teitur töluvert stærra nafn.  Það er eins og sú staðreynd hafi ekki skilað sér til Íslands.

  Teitur er þokkalega vel kynntur í Ameríku.  Einkum í Bandaríkjunum,  Kanada og Grænlandi.  Lög hans eru í bandarískum kvikmyndum og sjónvarpsþáttum.  Myndbönd hans eru sýnd í bandaríska MTV og líka í MTV í Evrópu.  Það segir sitthvað um stöðu Teits á heimsmarkaði að hann skuli vera í slagtogi með öllum þessu heimsfrægu poppstjörnum á plötunni.  Það er sömuleiðis mikill heiður fyrir Teit að lögin á plötunni voru valin af Sting.

  Plötur Teits eru 4ra og 5 stjörnu plötur.  Ég mæli sérstaklega með "Káta horninu",  plötu sem fæst í versluninni Pier í turninum við Smáratorg.  Afskaplega notaleg plata.  Teitur er gott söngvaskáld og góður flytjandi.  Hann er áhugasamur um mannréttindi og með rétta afstöðu til tónlistar.  Það segir honum enginn fyrir verkum.  Hann gerir hlutina á sínum forsendum. 

  Þó "Káta hornið" sé einskonar vísnapoppsplata vísar umslagið til "London Calling" með The Clash og plötu sem ég man ekki hvað heitir með Elvis Presley.

Forðið börnum frá saxófóni

  Því fyrr sem börn læra á hljóðfæri þeim mun betra.  Það svæði í heilanum sem vinnur úr músík þroskast stöðugt upp að 14 ára aldri.  Þetta sama svæði auðveldar börnum líka ýmislegt annað.  Til að mynda að fá góða tilfinningu fyrir erlendum tungumálum.  Hljóðfæri eru samt mis heppileg.  Varasamasta hljóðfærið er saxófónn.  Stöðugur blástur í saxófón getur hindrað eðlilegt súrefnisflæði til heilans og valdið varanlegum skaða.  Þess eru dæmi að saxófónleikarar hafi skaðast mjög illa.  Tapað tilfinningu og næmni fyrir góðri og vondri músík.  Jafnvel skaðast svo illa að þeir telji að grugg í poppmúsík,  til að mynda plötur Stjórnarinnar,  séu eitthvað annað en botnfall.