Tvífari Yoko Ono splundrar Bítla-eftirhermuhljómsveit

 

 

 

 

 

 

 

 

 

 

  Flestir jarðarbúar eiga tvífara.  Sumir eiga marga tvífara.  Þetta á ekki aðeins við um fólk.  Þetta er einnig þekkt í dýraríkinu,  jurtaríkinu,  steinaríkinu og Austurríki.  Víkur þá sögu að tvífara japönsku fjöllistakonunnar Yoko Ono.  Tvífarinn heitir Mirika og vinnur fyrir sér með því að herma eftir Yoko.  Hún kemur fram á skemmtunum,  spilar þekkt lög með Yoko og þykist syngja þau (mæmar).  

 Svo gerðist það að hljómsveit sem er skipuð tvíförum Bítlanna rakst á tvífara Yoko.  Hljómsveitin vinnur við það að spila og syngja Bítlalög.  Það gerðist eitthvað einkennilegt.  Tvífari Johns Lennons og tvífari Yoko urðu ástfangin um leið og þau hittust.  Svo skemmtilega vildi til að þau urðu ástfangin hvort af öðru.  

 Tvífari Yoko stakk upp á því að tvífari Lennons myndi stinga af frá eftirhermuhljómsveitinni.  Þess í stað færu þau að koma fram saman sem tvífarar Johns og Yoko.  Þetta þótti tvífara Lennons gott ráð.  Hann var hvort sem er orðinn hálf þreyttur á að spila og syngja þekktust Bítlalögin.  Það var kominn tími til að gera eitthvað nýtt og spennandi.  Hvað gat það verið annað en að syngja lög frá sólóferli Lennons?

  Tvífari Pauls McCartneys tók tíðindunum illa.  Hann deyr þó ekki ráðlaus heldur ætlar að stofna Wings-eftirhermuhljómsveit.

   

Hefur fundið tvo tvífara

Eivör verðlaunuð í Noregi

 

 

 

 

 

 

 

 

  Ein virtustu lista- og menningarverðlaun Noregs bera nafn sóknarprestsins Alfreðs Anderson-Rissts og frú Sólveigar.  Þessi merku verðlaun hafa verið veitt annað hvert ár frá 1959.  Sérstaða þeirra felst í því að þau eru veitt fyrir framúrskarandi vel heppnað samstarf Norðmanna, Íslendinga eða Færeyinga.  Oftast - og í lágmark annað hvert skipti - falla verðlaunin Norðmanni í skaut.  Úthlutun verðlaunanna vekja ætíð gríðarmikla athygli í Noregi.  Svo og umræðu. Þetta er forsíðuefni dagblaða og aðalfrétt ljósvakamiðla.

  2009 hlutu bókmenntafræðingarnir og rithöfundarnir Dagný Kristjánsdóttir og Kristján Jóhann Jónsson verðlaunin.  Fjórum áður komu þau í hlut söngvaskáldanna Aðalsteins Ásbergs Sigurðssonar og Önnu Pálínu.  

  Nú í vikulok var færeyska álfadrottningin Eivör heiðruð við hátíðlega og fjölmenna athöfn með verðlaununum.  Ekki aðeins er um heiðurinn að ræða heldur fylgja verðlaununum 10 þúsund dollarar (1,3 milljónir ísl. krónur).  Það má kaupa margar pylsur með öllu fyrir þann pening. 

  Síðustu sex ár hefur Eivör verið í norsku hljómsveitinni Vamp.  Sú hljómsveit nýtur ofurvinsælda.  Plötur hennar eru þaulsætnar í 1. sæti norska vinsældalistans.  Hver stakur titill selst í hálfu öðru hundraði þúsunda eintaka.  Frá því að Eivör gekk til liðs við Vamp hefur hljómsveitin sent frá sér tvær plötur.  Vinsældir Vamp tóku gott stökk upp á við þegar Eivör slóst í hópinn. Á myndbandinu hér fyrir neðan má heyra viðbrögð norskra áhorfenda eftir hvern kafla lagsins sem Eivör syngur.  Í huga þeirra er Eivör stjarna hljómsveitarinnar.  Og auðvitað er hún það.

  Eivör hefur átt lög og plötur í 1. sæti á Íslandi,  Færeyjum,  Danmörku og Noregi.  Aftur og aftur.  Flest eintök hefur hún selt í Noregi.

  Um þetta og fleira má lesa í bókinni "Gata, Austurey, Færeyjar,  Eivör og færeysk tónlist".  Það held ég nú.  

.

Hvar eru flestar nauðganir?

  Oft og víða er því haldið fram að nauðganir séu hlutfallslega flestar í Svíþjóð af öllum löndum heims.  Þetta er ekki rétt.  En samt næstum því.  Samanburður á tilfellum nauðgana á milli landa er afar ónákvæmur.  Hægt er að bera saman tölur yfir kærðar nauðganir.  Einnig yfir dæmda nauðgara.  Líka skeikular skoðanakannanir.  Þar fyrir utan er skilgreining á nauðgun afar ólík á milli landa og menningarsvæða. 

  Af öllum alvarlegum glæpum eru nauðganir léttvægar fundnar í mörgum löndum.  Í sumum samfélögum getur verið hættulegt að kæra nauðgun.  Í sumum samfélögum er fylgifiskur nauðgunar að þolanda er útskúfað af fjölskyldu sinni og almenningi.  Í öðrum löndum þykir nauðgun ekki vera neitt til að gera veður út af.  Allt að því viðurkennt sport af hálfu nauðgara.

  Netsíðan Wonderlist birtir þennan lista yfir mestu nauðganalönd heims (æ, þetta er illa orðað):

1.  Bandaríkin

2.  S-Afríka

3.  Svíþjóð

4.  Indland

5.  Bretland

  Bandaríkin eru sér á parti (ásamt Ísrael) hvað varðar nauðganir á karlmönnum.  Þær eru ótrúlega algengar.  Einkum í fangelsum,  hernum,  rugby-boltafélögum og bræðralagsfélögum unglingaskóla.  Þær nauðganir eru sjaldnast taldar með.  Ekki kærðar né skráðar.      

  Wikipedía er í mörgum tilfellum þokkalega áreiðanleg heimild.  Að vísu eru tölur þar ekki nýjar.  Þetta eru nokkurra ára gamlar tölur.  Þar eru afrísk lönd í verstu sætunum.  Innan sviga er fjöldi nauðgana á hverja 100.000 íbúa.

1. S-Afríka (132,4)

2. Botswana (92,9)

3. Losotho (82,7)

4. Swasiland (77,5)

5. Bermuda (67,3) 

6. Svíþjóð (63,5)

  Netsíðan Top 10 For birtir þennan lista:

1. Indland

2. Spánn

3. Ísrael

4. Bandaríkin

5. Svíþjóð

  Hvaða listi sem er marktækastur verður ekki framhjá því litið að Svíþjóð er ofarlega á þeim öllum.  Það er skelfilegt.  

  P.s.  Ég er ósammála Páli Vilhjálmssyni um rofnar/órofnar samfarir (sjá HÉR).  Ef að kona eða kall vilja hætta við í miðjum leik þá á viðkomandi fullan rétt á því.  Taki karlinn eða konan ekki mark á því og heldur áfram þá er er það nauðgun.   

Nauðgaði „eiginkonunni“ reglulega

Færeyingar verjast hryðjuverkasamtökum

 

  Bandarísku hryðjuverkasamtökin Sea Shepherd hafa boðað komu sína til Færeyja 14. júní.  500 liðsmenn samtakanna héldu til í Færeyjum í allt síðasta sumar.  Urðu þar aðhlátursefni.  Erindi þeirra var að hindra hvalveiðar Færeyinga.  En höfðu ekki erindi sem erfiði.  Hvalurinn,  marsvín (grind),  sýndi sig ekki það árið. Engu að síður lugu hryðjuverkasamtökin því á heimasíðu sinni að þau hafi bjargað lífi á annað þúsund hvala í Færeyjum.

  Á ýmsu gekk. Kanadíska/bandaríska leikkonan Pamela Anderson mætti á svæðið og bullaði.  Hélt því m.a. fram að fjölskyldan væri hornsteinn samfélags hvala.  Það er della.  Hvalir eru nautheimskir.  Hálf vangefin dýr.  En éta frá okkur óhemju mikið af fiski.  

  Nú hafa Færeyingar fest í lög háar fésektir við því að fæla hval úr færeyskum firði.  Lágmarks sekt er hálf milljón ísl. króna.  Það mun reyna á þetta.  Hryðjuverkasamtökin hafa stefnt til Færeyja öllum sínum stærstu og öflugustu skipum.  Þau gefa baráttu í Ástralíu og Asíu frí í sumar.  Einbeita sér þess í stað gegn Færeyingum (og kannski Noregi í leiðinni).  Þau búast við beinum átökum við færeyska hvalveiðimenn.  Verða með myndatökulið um borð í hverjum bát.  Tilgangurinn er meðal annars sá að útbúa áróðursefni.  Út á það komast þau í feita bankareikninga heimsfrægra rokkstjarna og kvikmyndaleikara.        

  Það verður fjör.  

   

Bensíntittur rændi völdum

  Ég átti erindi norður í land.  Áður en brunað var aftur til borgar óttans tók ég krók á minni leið og lagði bíl upp við bensíndælu.  Þar leist mér vel á dælu merkta "Power".  Kom upp í huga mér lag Johns Lennons "Power to the People".  Ljómandi gott lag.

  Ég greip bensíndæluna föstum tökum og beindi stút ofan í bensíntank bílsins.  Í sömu andrá sveif að eldri maður,  merktur bensínstöðinni.  Hann var nánast láréttur í loftinu er hann skutlaði sér eins og til sunds á milli mín og bíls.  Reif dæluna úr bensíntanknum og hrópaði:  "Nei,  ekki Power!".  

  Svo leit hann æstur, óðamála,  áhyggjufullur og rannsakandi á mig og spurði:  "Varstu byrjaður að dæla?"

  Nei,  ég kannaðist ekki við það.  Róaðist maðurinn mjög mikið við þau tíðindi.  Honum var létt. Hann náði andlegu jafnvægi og byrjaði að dæla "venjulegu" bensíni á bílinn.  Um leið upplýsti hann mig:  "Power bensínið er 50 kr. dýrara en venjulega bensínið.  Það er að vísu aðeins kraftmeira.  En ekki 50 króna virði.  Það er bara bull."

  Ég hef ekkert vit á bensíni.  Látum fagmenn um þetta.  Ætli sé einhver sala í "Power"?  Varla á þessari bensínstöð.  

Plötuumsögn

 

 

 

 

 

 

 

 - Titill:  Keldufar

 - Flytjandi:  Liv Næs

 - Ljóð:  Flóvin Flekk (Johannes Andreas Næs)

 - Einkunn: *****

  Færeyska vísnasöngkonan Liv Næs á að baki nokkrar plötur.  Hún er lagahöfundur,  gítarleikari og söngkona.  Á "Keldufari" syngur hún eigin lög við kvæði afa síns,  Johannesar Andreas Næs. Skáldanafn hans var Flóvin Flekk.  Platan er þjóðleg og nútímaleg í bland.

  Platan hefst á hringdanssöngnum "Heystarblóman".  Eins og venja er með hringdanslög er undirleikur að uppistöð til bara fótatramp.  Magnað lag sem spannar aðeins rösklega eina mínútu.  Frábært "intro" á frábærri plötu.

  Næsta lag,  "Grind",  kemur eins og eðlilegt framhald.  Byrjar án undirleiks.  Svo læðast hljóðfærin hægt og bítandi inn.  Þau verða hávær áður en yfir lýkur.  Flott lag.

  Þriðja lagð,  "Rósan",  læðist lágstemmt inn.  Síðan kemur saxófónblástur eistneska Villu Veski með djassaðan blæ til sögunnar.  Afskaplega fallegt lag. Eins og öll hin lögin.

  Hægri hönd Livar við gerð plötunnar er eiginmaður hennar,  Tróndur Enni.  Hann var við nám í íslenskum tónlistarskóla í aldarbyrjun.  Hann tók þátt í upphafi "færeysku bylgjunnar" á Íslandi 2002.  Þá með færeysku hljómsveitinni Arts.  Á sama tímapunkti varð bróðir Tróndar,  Brandur Enni,  súperstjarna á Íslandi.  Unglingastjarna sem söng fyrir tugþúsundir Íslendinga á 17. júní í Reykjavík og Hafnarfirði.  Fyllti Broadway og söng inn á dúettplötu með Jóhönnu Guðrúnu.  Tryllti íslenskar unglingsstúlkur upp úr skónum.  

  Tróndur syngur fjórða lag plötunnar,  "Meg droymdi",  ásamt Liv.  Þetta er kassagítarlag með glæsilegu og hátíðlegu fiðluspili færeyska undrabarnsins Angeliku Nielsen.  Hún var með Tróndi í Arts.  Hún hefur að auki spilað ótal oft á Íslandi með færeyskum hljómsveitum á borð við Yggdrasil,  Kvönn og Spælimenninir.

  Fimmta lagið,  "Mitt morgunbríksl",  er með vægum kántrýkeim.  Eða kannski frekar smá blágresi.  Trompetblástur setur sterkan svip á lagið er á líður. 

  Sjötta lagið styðst við grípandi lallandi takt "strömmandi" kassagítars.  Já,  og grípandi laglínu.  Fögur og krúttleg söngrödd Livar nýtur sín bærilega.  Hún syngur alltaf afslöppuð og án rembings.  Það klæðir söngva hennar mjög vel. Lágvært harmonikku- og melódikuspil laðar fram netta kabarettstemmningu.  

 Það er skerpt á kabarettstemmningunni í sjöunda laginu,  "Bergljót".  Meira harmonikkuspil.  Við erum komin í humátt að þjóðverjunum Lottu Lenyu og Kurt Weill.

  Áttunda lagið,  "Á livsins dreymaleið",  er ljúft og tregafullt kassagítarlag.  

  Í níunda laginu,  "Dúgva mín",  örlar á djassi.  Þar munar mestu um saxófónleik Vilu Veski.

  Tíunda lagið er flutningur afans,  Johannesar Andreasar Næs,  á kvæðinu "Urið".  Undir er lágvært píanóspil.  Áhrifaríkt og ljúft.

  Lokalagið er "Tað vakurt er".  Afskaplega heillandi djössuð píanóballaða.  Frábær lokapunktur á frábærri plötu.     

  Hægt er að hlusta á upphafsmínútur hvers lags fyrir sig með því að heimsækja þessa síðu:  HÉR

  Á sömu síðu er hægt að panta þessa frábæru plötu. 

 

 

Brött verðhækkun á mat

  Matur er dýr.  Ekki aðeins á Íslandi heldur einnig í útlöndum.  Þetta er útbreitt vandamál.  Þetta veldur vandræðum með skólamáltíðir.  Á vesturlöndum koma iðulega upp vandamál í skólamötuneytum vegna þess að foreldrar nemanda hafa ekki staðið í skilum.  Vandamálið er leyst einhvern veginn eða óleyst.

  Ég elda ekki.  Snæði þess í stað á veitingastöðum sem bjóða upp á svokallaðan gamaldags heimilismat.  Það er hið besta mál  Nema að frá áramótum hefur verð hækkað jafn og þétt.  Síðast á mánudaginn hækkaði verð á máltíð í Bykó í Breidd úr 1500 kalli í 1650 kall.  Þetta er ekki peningur sem skiptir miklu máli.  En samt næstum 11% hækkun  Kótelettur í Múlakaffi eru komnar í 2480 kall.  Það er ekkert langt síðan enginn réttur á Múlakaffi var yfir 2000 kalli.  Kótelettur inni á BSÍ kosta í dag 2890 kr.  Um daginn hækkaði verð á súpuskál á kaffiteríu Perlunnar úr 1100 kalli í 1200 kall.  Þannig mætti áfram telja.

  Á Fésbók upplýsti kokkur mig um að orsökin væri brött verðhækkun á hráefnum.  Og svo hækkun matarskatts úr 7% í 12%. Það er reisn yfir því.  

   

Rekin fyrir að gefa börnum mat

Það er ekki öllum gefið að "krimmast" svo vel sé

  Hér eru dæmi um það.  Laganna verðir komu böndum á viðkomandi - einmitt vegna þessara upplýsinga.

 

 

 

 

 

 

 

 

 

 

 

 

 

 

  Steve vonar að allt sé í lagi.  Hann hafi panikað og stungið af vitandi að guð ætlaðist ekki til þess.  En hann getur ekki hugsað sér að lenda í fangelsi.  Þetta hafi hvort sem er bara verið útigangsmaður.

  Vinirnir hvetja Steve til að gefa sig fram.  Hann segist ekki vita hvernig hann eigi að sleppa frá þessu.  Ekki gangi að hringja í lögguna.  Það þýði fangelsi. Kannski væri ráð að grafa manninn.

  Vinirnir hvetja áfram til þess að hann gefi sig fram.  Hann segir það vera of seint.  Hann verði að fara á vettvang og fela verksummerki svo að enginn komist að því hvað gerðist.

  "Heimurinn veit ekki hvað ég gerði.  Aðeins þið og þið munið aldrei kjafta frá.  Lögreglan myndi aðeins handtaka mig.  Ég verð að taka þessu eins og karlmaður."

 

 

 

 

 

 

Loren auglýsir á Fésbók eftir persónuskilríkjum sem hana bráðvantar fyrir næsta kvöld.

Steve svarar og segist hafa undir höndum fjölda persónuskilríkja sem hann hafi tekið af unglingum undir aldri er reyni að smygla sér inn inn á skemmtistaði.  Hann kæri þá umsvifalaust fyrir fölsun.  

Jennifer hlær og minnir Loren á að pabbi hennar sé lögregluþjónn.

 

 

 

 

  "Þetta atvik þegar þú faldir hassið í brjósthaldaranum er helvítis löggusvínin stoppuðu ykkur mágkonu þína.  Haha við höfum lent í svo mörgu."

  Stöðufærslan fær 13 "læk".

  Skjáskotinu fylgir textinn:  "Þetta atvik þegar þessi sömu löggusvín böstuðu ykkur síðar sama dag vegna Fésbókarfærslunnar."

 

 

 

 

 

 

 

 

 

 

 

  "Góður fundur.  Maður þarf bara að kunna að leita á réttum stað."

  "Þú ert þó ekki að pósta á Fésbók að þú sért að ræna ókunnugt hús."

----------------------

Meira HÉR

Sendi ekki fjárkúgunarbréfið

Einföld aðferð til að verjast leigubílasvindli í útlöndum

  Víða um heim er varasamt að taka leigubíl.  Einkum er það varasamt fyrir útlendinga.  Ennþá varasamara er það þegar útlendingurinn er staddur við flugvöll.  Svo ekki sé talað um það þegar hann starir ruglaður í allar áttir;  er auðsjánlega ringlaður og með magabólgur.  

  Allir leigubílstjórar með sjálfsbjargarviðleitni gera viðkomandi umsvifalaust að fórnarlambi.  Þeir svindla á honum.  Þeir aka krókaleiðir og stilla mælinn á hæsta taxta.  Reyna að lenda á rauðu ljósi og í umferðarteppu.  

  Þegar seint og síðar meir áfangastað er náð þá er túrinn farinn að slaga í 30 þúsundkall.  

  Til er auðveld aðferð til að verjast óheiðarlegum leigubílstjórum og komast hratt,  örugglega og stystu leið á áfangastað.  Hún felst í því að taka á flugvellinum bíl með GSP tæki á leigu.  Svokallaðan bílaleigubíl.  Þá getur þú að auki ráðið því á hvaða útvarpsstöð er stillt í bílnum.  Það skiptir máli. 

Varar við leigubílum við Oslóar-flugvöll

Snýst þetta allt um fégræðgi?

 

  Í umræðunni um kjaraviðræður,  verkföll,  launakröfur,  skattabreytingar,  styttingu vinnuvikunnar,  hækkað matarverð,  magabólgur og djöflatertur hafa lægstu laun borið á góma.  Sumum hefur orðið tíðrætt um að ástæða sé til að hækka lægstu laun.  Jafnvel um einhverja þúsundkalla á næstu þremur árum.  

  Aðrir hafa brugðist hinir verstu við.  Þeirra viðhorf er það að hærri laun greidd ómenntuðum skófluskríl muni gera útaf við menntun í landinu.  Þá verði keppikefli allra að tilheyra hópi ómenntaða skrílsins. Það verði eftirsóknarverðasta takmark lífsins.

  Kannski er kenningin rétt.  Kannski sýnir enginn námi áhuga nema til þess að fá hærra kaup en ómenntaði skríllinn.  

  Þetta þarf að rannsaka.  Einkum vegna þess að margir eru svo vitlausir að þeir rjúka í annað nám en það sem skilar þeim síðar meir hæstu tekjum.  Einhverjir eru meira að segja svo vitlausir að þeir leggja á sig nám sem nýtist þeim lítið sem ekkert á vinnumarkaði.  Hvað þá að það skili þeim feitum launatékka.

  Getur verið að Kári Stefánsson hafi hangið í skólum áratugum saman einungis vegna þeirrar vissu að á endanum myndi hann fá góð laun?  Kannski hafði hann aldrei áhuga á taugalífræði og erfðarannsóknum.  Hvað veit ég.

  Þegar ég ungur settist á skólabekk í Myndlista- og handíðaskóla Íslands þá hafði ég ekki hugmynd um að vera rekinn áfram af löngun í hærri laun en þau sem ég fékk ómenntaður í Álverinu í Straumsvík.  Svo gekk það ekki einu sinni eftir.  Í heimsku minni hélt ég að skólagangan í MHÍ réðist af löngun til að læra skrautskrift,  olíumálun,  vatnslitun,  ljósmyndun,  myndskreytingu,  auglýsingateikningu og eitthvað svoleiðis bull. Nú veit ég betur.

 Fólki er ekki sjálfrátt.  Að minnsta kosti sumu fólki.  Það veit ekki af hverju það stundar nám í einhverju.  Það heldur að námið snúist um að fræðast um eitthvað sem viðkomandi hefur gríðarlegan huga á.  En svo í raun snýst þetta um fégræðgi:  Að komast á annan launataxta en ómenntaði skríllinn.

       

„Háskólahugtakið útþynnt“

Færeysk hljómsveit nefnd til Norrænu tónlistarverðlaunanna

  Færeyska hljómsveitin Hamferð er íslenskum rokkunnendum að góðu kunn.  Hún hefur spilað vítt og breytt um landið í slagtogi með víkingarokksveitinni Skálmöld.  Þessar tvær hljómsveitir hafa einnig haldið hópinn á hljómleikum erlendis. Hamferð hefur sömuleiðis verið í slagtogi með Sólstöfum og færeysku Tý. 

  Í dag var tilkynnt að Hamferð sé nefnd til Norrænu tónlistarverðlaunanna ásamt Kammersveit Reykjavíkur, fiðluleikaranum Elfu Rún Kristinsdóttur og átta minni spámönnum  (ja,  reyndar eru sænska óperusöngkonan Anne Sofie von Otter og finnska strengjasveitin Apocalyptica skæðir keppinautar.  Ég á plötur með þeim.  Það segir sína sögu). Úrslitin verða tilkynnt við hátíðlega athöfn 27. nóvember á þessu ári.   Vinningshafinn fær 7 glóðvolgar milljónir í sinn vasa.  Til viðbótar fylgir vinningnum gríðarmikil kynning,  frægð og frami um öll Norðurlöndin og víðar. 

  Hamferð spilar dómsdags-metal.  Hljómsveitin er þaulvön að sjá og sigra.  Hún hefur hlotið allskonar verðlaun í Færeysku tónlistarverðlaununum FMA.  Þá sigraði hún í Wacken Battle.  Og nú er röðin komin að Norrænu tónlistarverðlaununm.

  Hér lofar Hamferð guð sinn herra,  hans dýrðlega nafn og æru.

Kvikmyndarumsögn

 

 

 

 

 

 

 

 

 

 

 

 

 

 

 

 

 

 

 

 

 

 

 

 - Titill:  Hrútar

 - Handrit og leikstjórn:  Grímur Hákonarson

 - Helstu leikarar:  Sigurður Sigurjónsson,  Theodór Júlíusson,  Guzzi (Gunnar Jónsson),  Charlotte Böving,  Jörundur Ragnarsson...

 - Einkunn: ****

  Áður en kvikmyndin Hrútar var tekin til sýningar í íslenskum kvikmyndahúsum vann hún til verðlauna í Cannes í Frakklandi.  Það er helsta kvikmyndaráðstefna/hátíð heims.  Fyrst var myndin valin úr hópi fjögur þúsund kvikmynda og síðan verðlaunuð.  Fyrsta og eina íslenska kvikmynd til að ná þessum árangri.  Og það verðskuldað.  

 Vandamálið sem fylgir er að áhorfandi í íslensku kvikmyndahúsi býst við miklu. Þegar á reynir fer myndin rólega af stað.  Við kynnumst bræðrum,  einyrkjum,  á tvíbýli í sveit.  Þeir hafa ekki talast við í fjóra áratugi.  Þetta er alvanalegt í sveitum á Íslandi.  Ekki endilega alveg eins.  Í Skagafirði þekkti ég mæðgin sem bjuggu ein í sama húsi.  Sonurinn talaði ekki við mömmu sína í áratugi.               

  Í Hrútum fáum við ekki upplýst hvað olli þagnarbindindi bræðranna. Enda aukaatriði.  

  Frá fyrstu mínútum myndarinnar er glæsileg myndataka áberandi.  Reyndar er allt glæsilegt en rembingslaust við myndina:  Tónlist notuð á áhrifaríkan hátt (samin af Atla Örvarssyni);  íslenskt veður á stórleik.  Blessunarlega er - aldrei þessu vant - engin áhersla lögð á fallegt íslenskt landslag.  Landslagið í myndinni er sviplítið og "venjulegt".  

  Er líður á myndina taka við skondin atvik,  óvænt framvinda og af og til spennandi senur.  Allt hjúpað hlýju og samúð með persónum.  Mest hvílir á leik Sigga Sigurjóns.  Hann er frábær í sínu hlutverki.  Trúverðugur,  brjóstumkennanlegur og ekta bóndi.  Hann kann öll réttu handbrögðin.  Það leynir sér ekki að hann hefur verið í sveit og hefur bóndann í sér.  

  Fjárhópur og hundur leika vel og sannfærandi.  Einkum hundurinn. 

  Kynningarklippan (treilerinn) skemmir smá fyrir því sem gæti verið óvænt uppákoma er annar bróðurinn skýtur á rúður hins.  Samt er nóg eftir sem gerir myndina áhrifaríka.  

  Orðið sem lýsir myndinni best er "magnað".  Þetta er mögnuð mynd.  Ég mæli með henni sem magnaðri upplifun í bíósal.   

 

Fermingardrengur dæmdur í fangelsi fyrir stuðning við ISIS

  Fjórtán ára austurískur gutti hefur verið dæmdur til tveggja ára fangelsisvistar.  Tilefnið er að hann ráðgerði að ganga til liðs við geggjuðu hryðjuverkasamtökin ISIS (Ríki islam).  Ekki nóg með það.  Hann stefndi á að ferðast til Sýrlands og taka þátt í hernaði ISIS gegn sýrlenskum stjórnvöldum.  Ekki nóg með það.  Upp um kauða komst vegna þess hversu áhugasamur hann var um að afla sér upplýsinga um sprengjugerð. Það þykir ekki við hæfi krakka á fermingaraldri.  

  Hann langaði til að sprengja upp járnbrautastöð í Sankt Pölten,  höfuðborg Neðra-Austurríkis.  Stráksi er fæddur í Tyrklandi en flutti sex ára gamall til Austurríkis.  Hann viðurkenndi fúslega að hafa þótt það spennandi tilhugsun að hanna sprengju. Það væri alveg gaman að leika sér í byssó með félögunum;  en meira alvöru að sprengja alvöru sprengju.  

  Þetta er ungt og leikur sér.

  16 mánuðir af dómnum eru óskilorðsbundnir.  8 eru á skilorði.  

 

Stúlkurnar í þjálfun í Raqqa

Hryðjuverkasamtök undirbúa hlaup á Færeyjar

  Bandarísku hryðjuverkasamtökin Sea Shepherd hafa boðað komu til Færeyja 14. júní næstkomandi.  Opinberi tilgangurinn er að hindra hvalveiðar Færeyinga.  Óopinberi tilgangurinn - í bland við opinbera tilganginn - er að safna peningum frá fræga ríka fólkinu,  svo sem heimsfrægum kvikmyndastjörnum,  poppstjörnum og fyrirsætum.  Fólki sem hefur enga þekkingu á raunveruleika veiðimannaþjóðfélaga - en miklar ranghugmyndir.

  Hryðjuverkasamtökin ætla að standa vaktina í Færeyjum fram í október.

  Í fyrra mættu samtökin til Færeyja strax í júníbyrjun. Fátt bar til tíðinda allt sumarið.  Engu að síður lugu SS því blákalt á heimasíðu sinni og víðar að samtökin hafi bjargað lífi á annað þúsund hvala í Færeyjum.   

  Dvöl SS-liða í Færeyjum í fyrra varð besta ferðamálakynning sem Færeyjar hafa fengið.  500 SS-liðar skrifuðu daglega statusa á Fésbók um daglegt líf sitt í Færeyjum,  blogguðu dagbókarfærslur,  tístu á Twitter o.s.frv.  Þeir birtu ljósmyndir af fegurð eyjanna,  sögðu frá elskulegri framkomu Færeyinga við gesti,  sögðu frá færeyskum mat,  list og fleiru.  

 Heimspressan mætti hvað eftir annað á blaðamannafundi SS í Færeyjum.  Leikkonan Pamela Anderson mætti líka og hélt blaðamannafund.  Einnig frægur leikari úr sjónvarpsþáttaröðinni Beverly Hills.  Og einhverjir fleiri.  Pamela kolféll fyrir færeyskum neðansjávarljósmyndum.  Kátínu vakti meðal heimamanna er Pamela hélt fram þeirri dellu að fjölskyldan sé hornsteinn hvalasamfélagsins.  Þegar hvalur sé drepinn þá séu hans nánustu harmi slegnir.  Það megi jafnvel sjá tár á hvarmi fjarskyldra ættingja.

  Heimsbyggðin vissi ekki af Færeyjum fyrr en í fyrra.  Í áramótauppgjöri margra stærstu fjölmiðla heimspressunnar voru Færeyjar útnefndar sem staður til að heimsækja 2015.  Það er ferðamannasprengja í Færeyjum.  Eina vandamálið er að framboð á farseðlum með flugi eða Norrænu er ekki nægilegt.  Sömuleiðis er skortur á gistirými.  Færeyingar eru ekki búnir undir þennan nýtilkomna áhuga heimsbyggðarinnar á eyjunum fögru.

  Danska drottningin kemur í opinbera heimsókn til Færeyja á sama tíma og SS.  Líklega er það markaðsbragð hjá SS að mæta á sama tíma,  vitandi að fjölmiðlar fylgja drottningunni hvert fótspor.   

  Einn af þeim sem hrifist hefur af mögnuðu landslagi Færeyja er kvikmyndaleikstjórinn Steven Spielberg (þekktur fyrir m.a. "Jaws",  "Jurassic Park",  "Indiana Jones" og "Schindler´s List").  Hann ætlar að skjóta kvikmynd í Færeyjum í sumar.  Myndin heitir "A big friendly giant".  Það sér því hvergi fyrir enda á heimsfrægð Færeyja.

 

Svona er PIN-númerum stolið og hve auðvelt er að verjast því. Ekki gefa vonda kallinum peningana þína!

  Mikill áróður er rekinn fyrir því að fólk leggi PIN-ið á minnið.  Allflestir nota greiðslukort í stað reiðufés.  Það er til að hagnaður bankanna sé viðunandi.  Þeir fá prósentur af hverri kortafærslu.  

  Gallinn við kortin og PIN-ið er hversu auðvelt er að stela númerinu og misnota.  Vondi kallinn gerir það.  Hann kaupir sér hitamyndavél í næstu Apple-búð;  festir hana á bakhlið iPhones síns.  Svo tekur hann mynd af takkaborði PIN-tækisins án þess að nokkur taki eftir.  Hitamyndavélin sýnir á hvaða tölustafi var ýtt af næsta kúnna á undan og í hvaða röð.

  Með sömu aðferð er hægt að komast yfir leyninúmer við inngöngudyr,  öryggishólfa og allskonar.

  Góðu fréttirnar eru að auðvelt er að verjast þessu.  Það er gert með því að villa um fyrir vonda kallinum.  Til að mynda með því að styðja á fleiri takka en þá sem hýsa leyninúmerið. Hamast á þeim hverjum á fætur öðrum.  Þá fær hitamyndavélin rangar upplýsingar.  

Hamborgari og danskar

  Ég skrapp á veitingastað í dag.  Á næsta borði sat ungur maður.  Eftir nokkurn tíma kom afgreiðsludama með á diski handa honum hamborgara og nokkrar afskrældar - og sennilega soðnar - kartöflur.  Maðurinn brást hinn versti við.  Hann gargaði pirraður:  "Hvað er eiginlega í gangi?"

  Afgreiðsludaman: "Hvað áttu við?  Er ekki allt í lagi?"

  Maðurinn:  "Allt í lagi?  Ertu vönkuð?"

  Daman:  "Hvað er að?"

  Maðurinn:  "Hvaða rugl er með þessar kartöflur?"

  Daman:  "Þú pantaðir hamborgara og danskar.  Þetta eru danskar kartöflur."

  Maðurinn:  "Ég pantaði hamborgara og franskar.  Franskar en ekki einhverjar djöfulsins danskar kartöflur!"

  Daman:  "Ekkert mál.  Mér heyrðist þú biðja um danskar.  Ég skal sækja franskar."

  Hún skottaðist eftir vænum skammti af frönskum kartöflum.  Og hló mikið er hún lagði þær á borðið hjá manninum.  Hún sagði:  "Þetta er ekki falin myndavél en ég var samt að stríða þér."

  Maðurinn tók gleði sína á ný og fór líka að hlæja.  Ég fékk á tilfinninguna að þau þekktust og þarna hafi verið um kunningjahrekk að ræða.  

Hverjir eiga Bónus?

  Ég er ekki með það á hreinu hver eða hverjir eiga Bónus í dag. Eða Haga sem á Bónus.  Er það ekki að uppistöðu til lífeyrissjóðir lægst launaða fólks landsins?  Hverjir fara með stjórn Haga?  Er það ekki fólk með 5 - 6 milljón króna mánaðarlaun?  Plús fríðindi af öllu tagi.

  Lægst launaða fólkið borgar hæstu launin.  Það er metnaður.  Eða hvað veit ég?  Á mér ekki að vera sama?  Ekki vinn ég þarna.    

Loka þyrfti öllum verslunum Bónuss

Hrottalegar tannlækningar

  Svo bar til fyrir nokkrum áratugum að í kaupstað úti á landi tók til starfa aðfluttur tannlæknir.  Þetta var fyrir daga tímaritsins Séð og heyrt.  Síðar átti hann eftir að birtast þar á blaðsíðum.  Og reyndar víðar.

  Tannlæknirinn fór ekki að öllu leyti troðnar slóðir.  Bróðir minn lét hann gera við tönn í sér.  Á meðan gert var við tönnina rétti tannsi honum af og til sprittbrúsa og sagði honum að súpa á og skola.  Þess á milli tók tannsi sjálfur stóra gúlsopa af sprittinu.  Það gekk hratt á sprittflöskuna.  Það leyndi sér ekki að tannsi var kominn með magabólgur.  Var óstöðugur á fótum og vinnubrögð fálmkennd.  En allt gekk samt þokkalega að mestu.

  Öðru sinni mætti til tannsa lágvaxin og nett kona.  Hún var að sækja til hans gervigóm.  Tannsi hóf að troða gómnum upp í hana.  Hann reyndist vera of stór.  Við það færðist hann allur í aukana og tók kellu haustaki.  Leikar fóru þannig að hann snéri konuna niður í gólfið.  Þar rifnaði út úr munnvikum hennar.  Bar þá að aðstoðarmann eða lærling tannsa.  Hann var að leita að gómi sem verið var að hreinsa fyrir tiltekinn karlmann.  

  Tannsi var að troða upp í konuna þeim tanngómi. Þegar eiginmaður konunnar skammaði hann sagði tannsi honum að þakka fyrir að þetta hafi verið gómurinn eftir hreinsun en ekki fyrir.   

  Grunnskólabörn voru send í skoðun og tannviðgerðir hjá tannsa.  Hann varð uppiskroppa með deyfilyf.  Hann gerði sér lítið fyrir og rotaði börn sem þurftu á deyfingu að halda.  Kunni trixið.  Fagmennska.  En þetta lagðist illa í foreldra.  Spratt upp óvild í garð tannsa sem leiddi til þess að hann var flæmdur burt úr plássinu.  Svo varð hann frægur flugdólgur.  

Tannlausir og blóðugir krakkar hjá tannlækninum

Besti veitingastaður af öllum á Norðurlöndunum

 

  Árlega er við hátíðlega athöfn valinn,  kosinn, útnefndur og krýndur besti veitingastaður á Norðurlöndum.  Leitin að vinningsstaðnum fer fram í nokkrum áföngum.  Í ár enduðu í lokavali Marchal í Kaupmannahöfn í Danmörku,  Ylajali í Ósló í Noregi,  Ask í Helsinki í Finnlandi,  Esperanto í Stokkhólmi í Svíþjóð og Koks í Þórshöfn í Færeyjum.

  Athygli vekur að allir veitingastaðirnir sem náðu eftir harðsnúna keppni í lokaúrslit eru staðsettir í höfuðborgum landanna.  

  Ég hef ekki snætt á neinum af nefndum veitingastöðum öðrum en Koks í Þórshöfn.  Samt kemur það mér ekki á óvart að Koks hafi nú formlega verið sæmdur nafnbótinni "Besti veitingastaður Norðurlandanna".  Þvílíkur sælkerastaður.  Annar eins er ekki fundinn.

 

  Reyndar veita nokkrir aðrir veitingastaðir í Færeyjum Koks harða samkeppni.  

  Kokkarnir á Koks nota einungis færeyskt hráefni.  Þeir byggja matreiðslu sína að verulegu leyti á færeyskum matarhefðum.  Meðal annars þess vegna er matseðillinn árstíðabundinn.  

  Þegar Færeyjar eru sóttar heim þá er góð upplifun að snæða á Koks.  Vegna ónýtu íslensku krónunnar er það pínulítið dýrt.  En samt hverrar krónu virði.

Maturinn skemmist í tollinum

Einfættur hrekkur

  Keith Moon,  tommuleikari bresku rokkhljómsveitarinnar The Who,  var lífsglaður og uppátækjasamur grallari.  Að vísu ekki lífsglaðari en svo að hann fór í keppni við bítlana John Lennon og Ringo Starr,  svo og söngvarann Harry Nilson, um það hver yrði fyrstur til að drekka sig í hel.  Baráttan var hörð og illvíg.  Menn drukku allskonar og ældu yfir margar sætaraðir og viðstadda þegar best lét.  Hvergi dugði til þó að fram kæmu menn sem vottuðu um edrúmennsku þeirra og æluleysi.  Þeir hefðu ekki einu sinni étið túlípana hvað þá meira.  Hinsvegar væru þeir með magabólgur.

  Keith vann keppnina.  Harry Nilson náði 2. sæti.  John Lennon var myrtur.  Ringó er einn eftir.  

  Þrátt fyrir góðar tekjur var Keith alltaf stórskuldugur.  Uppátæki hans voru mörg hver dýr.  Til að mynda að henda sjónvörpum út um hótelglugga og keyra glæsibílum út í sundlaug.

  Eitt sinn fékk Keith vin í lið með sér til að kíkja í vinnugallafataverslun.  Þeir sýndu tilteknum gallabuxum áhuga.  Til að reyna á styrkleika vörunnar tóku þeir í sitthvora skálmina og rykktu samtaka í af öllum kröftum.  Við það rifnuðu buxurnar í sundur í miðju.  Kapparnir héldu á sitthvorum helmingnum.

  Afgreiðslufólk búðarinnar fékk nett áfall og horfði í forundran á.  Áður en hendi var veifað hoppaði inn í búðina einfættur betlari (sem Keith hafði borgað fyrir að taka þátt í sprellinu).  Hann hrópaði:  "Einmitt það sem ég var að leita að.  Ég ætla að fá tvo svona vinstri buxnahelminga!"  

Einfættri konu vísað af rauða dreglinum