Kvikmyndarumsögn

- Titill:  Capitalism.  A Love Story

- Leikstjóri/höfundur:  Michael Moore

- Einkunn: ***

  Bandaríski leikstjórinn og heimildarkvikmyndakóngurinn Michael Moore veldur örlitlum vonbrigðum með myndinni  Capitalism: A Love Story.  Aðalsmerki hans hefur verið leiftrandi húmor.  Hér er hann alvörugefnari.  Að vísu stundum fyndinn.  En húmorinn er meira undirliggjandi en beinskeyttur og afgreiddur á færibandi gríns.  Hámarki nær kímnin þegar hann innsiglar banka með límbandi - eins og lögreglan notar - merktu "glæpavettvangur".

  Myndin er aldrei leiðinleg.  Hún er fróðleg og vekur upp margar áleitnar spurningar.  Án þess að þeim sé öllum svarað.  Hún fer frekar hægt af stað. Er á líður opinberast betri skilningur á upphafsatriðunum.

  Ég er ekki vel að mér í hruni bandaríska bankakerfisins.  Þekki ekki þau dæmi sem eru til umfjöllunar.  En margt virðist eiga samhljóm með siðrofinu,  fégræðginni og ýmsu öðru sem við þekkjum í ferli bankahrunsins á Íslandi.

  Athyglisverð er afstaða manns sem vann við að múta embættismönnum.  Hann segist bara hafa verið að vinna sína vinnu. Ef ekki hann þá hefði bara einhver annar afgreitt þau mál.

  Þetta er áróðursmynd gegn óheftum kapítalisma (frjálshyggju).  Gamli kapítalismi sjöunda og áttunda áratugarins fær að njóta sanngirnis. 

  Einn bútur myndarinnar sýnir klippur af hverjum republikanum á fætur öðrum kalla Barrack Hussein Obama sósíalista.  Kannski með réttu?  Og meirihluti Bandaríkjamanna kaus þennan sósíalista sem forseta Bandaríkja Norður-Ameríku.  Michael Moore lætur að því liggja að kapítalistar hafi keypt Hussein.

  Eftir stendur:  Þetta er frekar skemmtileg kvikmynd.  Hún vekur upp margar spurningar.  Hún er ekki skemmtilegasta kvikmynd Michaels Moores.  En það er hægt að mæla með henni sem ágætri skemmtun og þó öllu fremur áhugaverðri og fróðlegri.   

Rasismi í flugstöðinni í Sandgerði

 

  Kunningi minn er sár og svekktur.  Hann bað mig um að vekja athygli á eftirfarandi.  Þessi maður er frá Víetnam og hefur verið búsettur hérlendis í á annan áratug ásamt bróðir sínum.  Kona hans er einnig frá Víetnam.  Í hvert einasta skipti sem eitthvert þeirra skreppur út fyrir landsteinana taka tollverðir viðkomandi til rækilegrar skoðunar við heimkomuna.  Þau hafa aldrei lent í slíku á flugvöllum erlendis. 

  Þau fullyrða að aðrir Íslendingar frá Víetnam hafi sömu sögu að segja.  Það virðist vera vinnuregla hjá tollvörðum í Flugstöð Leifs Eiríkssonar að taka fólk frá Víetnam til sérstakrar skoðunar.

  Kunningi minn og hans fólk eru fyrirmyndar borgarar.  Hafa aldrei komist í kast við lög,  vinna mikið og hafa aðlagast íslensku samfélagi afskaplega vel.  Þetta fólk er alveg fylgjandi því að tollverðir sinni af alúð sínu eftirlitshlutverki.  En þeim þykir einkennilegt og pirrandi að vera stöðugt eina manneskjan sem er pikkuð út úr 100 - 200 manna farþegahópi og færð í skoðunarherbergi.  Þar er allt rifið upp úr ferðatöskum þeirra og pokum og grandskoðað.  Reynt er að finna eitthvað að sem flestu.  Þau krafin um greiðslukvittun fyrir gamalli ódýrri myndavél,  vöngum er velt yfir sælgæti (hvort það fáist á Íslandi),  hvort of mikið af fatnaði sé meðferðis og annað í þeim dúr.  Að auki eru þau yfirheyrð um hvar þau búi,  hvert erindið hafi verið til útlanda,  við hvað þau vinni og svo framvegis. 

  Svona nákvæm skoðun tekur langan tíma og veldur því að viðkomandi missir af flugrútunni.  Stundum næst far með annarri rútu löngu síðar.  Stundum eru ekki fleiri flugrútur það kvöldið.  Þá verður að taka leigubíl til Reykjavíkur með tilheyrandi aukakostnaði.  Eða reyna að hóa einhvern út til að sækja sig upp á flugstöð. 

  Fólkið frá Víetnam upplifir framkomu tollvarðanna sem neikvæða í sinn garð.  Það sé eins og einbeittur vilji sé til að sýna þeim leiðinlega framkomu.  Kunningi minn sem áður er nefndur skrapp til útlanda á dögunum.  Þegar skoðun á farangri hans var að ljúka sagðist hann ætla að biðja Jens Guð um að blogga um þetta.  Þá breyttist framkoman snarlega í hans garð.  Tollvörðurinn sagðist vera almennilegur og spurði hvort megi bjóða honum kaffi. 

  Sjálfur hef ég farið mörgum tugum sinnum í gegnum flugstöðina í Sandgerði.  Aðeins einu sinni hefur tollvörður skoðað dótið mitt - þrátt fyrir að ég hafi oftar óskað eindregið eftir því.  Í þetta eina skipti hafði hasshundur stokkið upp á bak á ferðafélögum mínum í pönksveitinni Gyllinæð (sjá tónspilara).  Við vorum því allir teknir til skoðunar.  Það var bara gaman og mér sýnd kurteisi í alla staði.  Tollvörðurinn bað mig meira að segja afsökunar á ónæðinu og benti á að hann yrði að framkvæma þessa skoðun vegna þess hvernig hundurinn hafi látið við ferðafélaga mína.  Ég fullvissaði hann um að mér væri ekkert á móti skapi að hann væri samviskusamur í vinnunni.

  Forvitnilegt væri að heyra hvort þið kannist við að fólk með annan litarhátt en hvítan hafi svipaða reynslu af tollvörðum í flugstöðinni og fólkið frá Víetnam.  Hér er ekki verið að tala um þessa almennu tollskoðun,  það er að segja þegar farangri er rennt í gegnum röntgentæki og kíkt ofan í poka eða töskur.  Hér er verið að tala um þegar farþegi er tekinn út úr hópnum og færður í sérstakt skoðunarherbergi og við tekur yfirheyrsla og allsherjar skoðun sem tekur 1 - 2 klukkutíma.

Mæjónes-söfnuðurinn

  Í DV í dag er staðfest flökkusaga um að fjölskyldufyrirtækið Gunnars mayonnaise hafi breyst í einskonar sértrúarsöfnuð.  Þar á bæ hefur verið settur forstjóri,  Kleopatra Kristbjörg,  andlegur leiðtogi fjölskyldunnar.  Að sögn starfsmanns kemur Kleopatra ekki nálægt rekstrinum og hefur enda enga þekkingu á til þess.  Sumir starfsmenn fyrirtækisins hafa aldrei séð hana. 

  Helen Gunnarsdóttir,  einn eiganda fyrirtækisins,  fullyrðir að Kleopatra sé heiðarlegasta kona sem til er.  Engin af rösklega 3,3 milljörðum kvenna heims kemst með tær þar sem Kleopatra hefur hæla.  Hún er hlý með afbrigðum.  Góð umfram allar manneskjur.  Gáfuðust allra kvenna á Íslandi.  "Ofsalega vel gefin og mælsk".  Jafnframt er hún þeim einstæða hæfileika gædd að fá "fólk til að sjá ljósið".  Hallelúja!

  Helena segir Kleopötru vera hæfileikaríkan rithöfund.  "Bókin hennar,  Hermikrákuheimur,  er besta bók sem til er,"  að sögn Helenar.  Hallelúja! Biblían,  Góði dátinn Sveijk og Sjálfstætt fólk eru prump til samanburðar við Hermikrákuheim. 

  Helena vill ekki meina að klíka sé í kringum Kleopötru heldur styrktaraðilar (hver er munurinn?). 

  Ég veit ekki hver Kleopatra er umfram það að í gegnum tíðina hafa birst í dagblöðum heilsíðuauglýsingar þar sem hún er hlaðin lofi.  Þar er fullyrt að  ALLIR  vilji snerta hana og konur jafnt sem karlar bugti sig og beygi fyrir henni.  Hún veki  ALLSSTAÐAR  aðdáun og fólk falli að fótum hennar.  Jafnframt að hún sé  mjög  andleg og gædd dulrænum hæfileikum.  "Að vera nálægt henni er engu líkt."  Hallelúja! 

  Í umræddum auglýsingum eru sýnishorn af ritsnilld hennar og andlegri leiðsögn.  Einnig í auglýsingum um bækur hennar.  Þau sýnishorn styðja ekki fullyrðingar um hæfileika hennar.  Þeir hljóta að opinberast á öðrum vettvangi.

  Ég fann ekki mynd af andlegum leiðtoga mæjónes-safnaðarins.  Ég læt samnefnara hans/hennar duga.

Bestu gítar"riff" rokksögunnar - III

  Í tveimur fyrri færslum birti ég lista ásamt tóndæmum yfir 20 bestu gítar"riff" rokksögunnar.  Listinn er fenginn úr breska rokkblaðinu Kerrang!  Tóndæmin fann ég sjálfur,  einn míns liðs,  á youtube.  Hér held ég áfram með listann og vind mér í næstu sætu.  Fyrri færslurnar eru á:  http://www.jensgud.blog.is/blog/jensgud/entry/971996/ og http://www.jensgud.blog.is/blog/jensgud/entry/972559/.

 

21.  Machine Head:  Davidian

22.  Queen:  Bohemian Rhapsody (athugið að gítar"riffið" byrjar ekki fyrr en röskar 4 mínútur eru liðnar af laginu).  Til að móðga fjölda manns læt ég flakka að fyrir minn smekk er þetta hundleiðinlegt lag og leiðinleg hljómsveit.  Illilega ofmetin.  Ekki síst fyrir raddsetningu.  Það vantar alveg dýptina,  dekkri raddir,  í þetta gól þeirra sem hljómar eins og geldingakór.

23.  The Clash:  White Riot

24.  Motörhead:  Ace of Spades

25.  The Stooges:  I Wanna be your Dog 

26.  Slipknot:  Surfacing

27.  Iron Maiden:  Hallowed be thy Name

28.  Led Zeppelin:  Communication Breakdown

29.  Black Flag:  Nervous Breakdown

30.  Megadeth:  Symphony of Destruction

Bráðskemmtilegar ljósmyndir af "ósýnilegum" hlutum

 

  Myndin hér fyrir ofan sýnir breska myndlistarkonu og hennar þekktasta verk.  Það verk gekk út á að gera bíl á bílastæði ósýnilegan.  Ef vel er að gáð má sjá móta fyrir bílnum.  Á myndinni hér fyrir neðan má sjá Kára Stefánsson beita svipaðri aðferð.  Held ég.  Hann er að borða af mikilli áfergju ósýnilegan hamborgara.  Svokallaðan BigMac.

Ókeypis! Ókeypis! Sunnudagur til sælu

  Fólk er alltaf tilbúið að fara þangað sem því býðst eitthvað ókeypis.  Þetta benti sjálfur Davíð Oddsson á þegar fréttir bárust af aukinni ásókn fátækra í matarstyrk hjá Fjölskylduhjálp Íslands og Mæðrastyrksnefnd og súpueldhús Samhjálpar.  Sjálfur lætur Davíð sig ekki vanta þegar honum býðst eitthvað ókeypis.  Þannig lagði hann á sig ferð úr Skerjafirði austur til Suðurlandsbrautar er honum bauðst ókeypis hamborgari í McDonalds.

  Næsta víst er að á morgun verði aftur lagt upp í ferðalag úr Skerjafirði.  Fólk sem heitir Davíð og getur sannað það með skilríkjum fær ókeypis Metró-hamborgara á morgun.  Ef Davíð leggur snemma af stað getur hann náð þremur sveittum:  Einum á Suðurlandsbraut,  öðrum í Kringlunni og þeim þriðja við Smáratorg.   

  Hér fyrir ofan getur að líta smáborgara.  Fyrir neðan er kennslumyndband af því hvernig bera á sig að við að snæða hamborgara.  Þeir sem aldrei hafa reynt geta ekki gert sér í hugarlund hversu erfitt er að slafra í sig einum sveittum.  Algjörlega bannað er að nota hnífapör.  Enda var hamborgari upphaflega aðferð iðnaðarmanna í Hamborg í Þýskalandi til að nærast á kjötbollu án þess að taka sér hlé frá vinnu.

  Það er sjálfur Davíð sem fer með aðalhlutverk í kennslumyndbandinu.  Hann er þýskur og gegnir eftirnafninu Hasselhoff (með sterkri áherslu á HOFF í framburði.  Heppilegast er að tuldra Hassel svo lágt að varla heyrist og hrópa síðan HOFF!).  Þessi gutti er þekktur fyrir hlutverk í sápuóperunni Sundvörðum með Pa-mellu Andersen.

Davíð fær ókeypis borgara

Spennandi bók

  Ég rakst á auglýsingu um splunkunýja bók.  Hún heitir  Íslenskar gamansögur 3.  Virðist sem sagt vera 3ja bókin í þessum bókarflokki.  Á forsíðunni stendur þessi áhugaverði texti: 

  "Gurrí Haralds hringir í Rannsóknarlögregluna. Púlli og Haraldur Á. Sigurðsson, leikari, eru góðglaðir á Þingvöllum. Dávaldur fer á kostum á Norðfirði. Gvendur dúllari gefur vini sínum heilræði í brúðkaupsgjöf. Siggi á Fosshóli ekur í þoku. Össur Skarphéðinsson ætlar í kápu. Svavar Gests rekur á eftir gítarleikara. Sprengju-Tóti rífur úr sér annað augað og  Jens Guð  situr í hjá leigubílstjóra – með athyglisbrest.

Hvað sagði Ólafur Ragnar aldrei? Vegna hvers er Lilja Mósesdóttir áþjáð? Við hvað var Arnór Hannibalsson hræddur? Og hvaða sjósóknarar dóu ekki ráðalausir í baráttu við franska skútusjómenn?"

  Í auglýsingatextanum um bókina er henni lýst þannig:

  "Í Íslenskum gamansögum 3 er samsafn af sprenghlægilegum gamansögum.

Þar kemur við sögu ekki ómerkara fólk en Gurrí Haralds, Púlli og Haraldur Á. Sigurðsson, leikari, Gunnar Finnsson, Ólafur Sigurðsson, skólameistari, Gvendur dúllari, Lúðvík Jósepsson, Sprengju-Tóti, Kristófer Reykdal, Garðar Sigurðsson, Siggi á Fosshóli, Lási kokkur, Arnór Hannibalsson, Lilja Mósesdóttir og  Jens Guð. Eru þá sárafáir nefndir af þeim sem stíga hér fram á sviðið.

Íslenskar gamansögur 3 ættu að vera til á hverju heimili.

Leiðbeinandi verð: 2.280-."

  Þetta hljómar virkilega spennandi.  Er þetta ekki jólagjöfin í ár?  Eitthvað sem laðar fram góða skapið?

Bestu gítar"riff" rokksögunnar - framhald

  Í gær birti ég niðurstöðu breska rokkblaðsins Kerrang! yfir 10 bestu gítar"riff" rokksögunnar.  Þann lista má sjá - ásamt sýnishornum af "riffunum" - hér:  http://www.jensgud.blog.is/blog/jensgud/entry/971996/.  Þá er röðin komin að "riffunum" sem lentu í næstu sætum þar á eftir:

11.  The Kinks:   You Really Got Me

12.  Sex Pistols:  God Save the Queen

13.  Black Sabbath:  Paranoid

14.  Van Halen:  Ain´t Talkin´ 'Bout Love

15.  Bítlarnir:  Helter Skelter  

16.  Slayer:  Raining Blood

17.  Jimi Hendrix:  Purple Haze

18.  Aerosmith:  Walk This Way

19.  Green Day:  Basket Case

20.  Pearl Jam:  Alive

Bestu gítar"riff" rokksögunnar

  Í huga okkar sem erum upptekin af rokki er gítar"riff" fyrst og fremst síendurteknir gítarhljómar sem mynda ráðandi stef í viðkomandi rokklagi.  "Riff" er líka leiðandi gítarlykkja (eða spiluð á annað hljóðfæri).  Í nýjasta hefti breska rokkblaðsins Kerrang! er birtur númeraður listi yfir áhrifamestu gítar"riff" rokksögunnar. 

  Það kemur ekki fram hvernig listinn er unninn.  Ætla má að hann byggi á áliti margra þekktra rokkgítarleikara.  Það ræð ég af að uppstillingin á listanum er skreytt með rökum þessara gítarleikara á því hvers vegna þeir telja þetta eða hitt "riffið" vera flottast.  Þetta eru gítarleikarar hljómsveita á borð við Muse,  Hatebreed,  Green Day,  Linkin Park, The Wildhearts,  Limp Bizkit,  Steel Panther...

Listinn er að uppistöðu til svipaður öðrum hliðstæðum listum sem aðrir fjölmiðlar hafa sett saman.  Niðurstaðan er þessi:

1.   Guns ´N´ Roses:  Sweet Child O´ Mine

  Liðsmenn bandarísku rokksveitarinnar Guns ´N´ Roses gáfu ekki mikið fyrir þetta lag til að byrja með.  Þangað til gítarleikarinn Slash lagði til þessa grípandi lykkju.  Hún átti stóran þátt í því að GNR varð "mega" rokksveit. 

2.   Black Sabbath:  Black Sabbath

  Þetta er upphafslag fyrstu plötu bresku rokksveitarinnar Black Sabbath (1970).  Gagnrýnendur slátruðu plötunni.  Þeim þótti Black Sabbath vera ömurleg bílskúrshljómsveit til samanburðar við Led Zeppelin og Deep Purple.  Tíminn vann með BS og þessi drungalegi hljómur lagði sitt af mörkum við að móta þungarokkið til framtíðar. 

3.   Led Zeppelin:  Whole Lotta Love

  Breska blússveitin Led Zeppelin kom rosalega sterk inn á markaðinn með tveimur plötum 1969.  Fyrir minn smekk er LZ besta og ein allra áhrifamesta hljómsveit rokksögunnar.  Þetta er upphafslag annarrar plötu LZ.  Til gamans má geta að söngvari LZ,  Robert Plant,  er félagi í íslenska Ásatrúarfélaginu.  Að vísu ekki formlega skráður sem slíkur hjá íslensku Hagstofunni sem slíkur (vegna þess að hann er ekki íslenskur ríkisborgari).  En að eigin ósk skráður félagi og hefur sótt blót hjá Ásatrúarfélaginu og hampar því að vera þar félagi.  Upphafslag 3ju plötu LZ,  "Immigrant Song",  er óður um heimsókn LZ til Íslands 1970. 

4.   Nirvana:  Smells Like Teen Spirit

  Hér negldi bandaríska grugg-sveitin Nirvana 1991 inn eitt þekktasta gítar"riff" rokksögunnar og skóp grugg-bylgjuna,  kennda við Seattle (Pearl Jam,  Soundgarden...). 

5.   AC/DC:  Back In Black

  Áströlsku "riff" kóngarnir í AC/DC eru eitt stærsta nafn í þeim músíkstíl sem kallast suðurríkjarokk.  Er þá vísað til ópoppaðs bandarísks blús-rokks.  Blúsaðs rokks eins og það kemur hrátt og ómengað beint af kúnni.

6.  Pantera:  Walk

  Hér er bandaríska suðurríkjarokkið hressilega þungt og eiginlega komið út á jaðar suðurríkjarokksins.

7.  Rage Against the Machine:  Killing In The Name

  Eitt magnaðasta lag rokksögunnar.  Orkurík blanda þungarokks,  fönks og pönks.  Kom út 1992 og sló rækilega í gegn á Íslandi áður en hljómsveitin varð áskrifandi að 1. sæti á bandarískum og evrópskum vinsældalistum.  Rage Against the Machine héldu eftirminnilega hljómleika í Hafnarfirði í kjölfar vinsældanna á Íslandi.  Mér er minnisstætt þegar dagskrárgerðarmaður á kántrý-útvarpsstöðinni Aðalstöðinni bað hlustendur um að hætta að biðja um þetta lag sem óskalag.  Símkerfi stöðvarinnar var undir miklu álagi vegna innhringinga frá hlustendum sem vildu heyra þetta lag.  Dagskrárgerðarmaðurinn benti á að lagið passaði ekki inn í músíklínu stöðvarinnar.  Aðrar útvarpsstöðvar urðu fyrir sama áreiti vegna þessa lags.  Það var vinsælasta lagið á Íslandi 1993.

  Til gamans:  Ég kynntist lítillega gítarleikara RATM,  Tom Morello, um þetta leyti í kjölfar þess að ég tók viðtal við hann fyrir barna- og unglingablaðið Æskuna.  Þá var hljómsveitin ekki orðin eins heimsfræg og hún síðar varð.  Hann hlóð á mig óútgefnu efni með RATM og allskonar dóti merktu hljómsveitinni.  Sonum mínum þótti sport í að ganga í T-bolum og öðrum fatnaði merktum RATM sem Tom sendi mér.  Svo fjöruðu þau samskipti út.  Aðallega vegna þess að ég rækti þau ekki.  Hafði ekki rænu á að sýna viðbrögð við þessum sendingum.

     

8.  Ramones:  Blitzkrieg Bop

  Hér er pönkdeildin mætt til leiks.

9.  Metallica:  Enter Sandman

  Margt - og jafnvel flest - er flottara með dansk-bandarísku rokksveitinni Metallica en þessi ballaða.  En þetta var fyrsta lagið með Metallica sem náði ofurhylli á MTV og fleiri sjónvarps- og útvarpsstöðvum. 

10. Korn:  Blind

  Hér er eiginlega bassalínan flottari en flotti gítarleikurinn.  Ég held áfram með listann í Kerrang! á morgun.  Gaman væri að heyra frá ykkur "komment" um þennan lista.

Skemmtilegar hugmyndir um hvernig hægt er að redda málum í kreppunni

  Þegar baðherbergisvaskur bilaði 2007 var nýtt hús keypt með baðherbergisvaski í góðu lagi.  En nú er 2009.  Þá verður að grípa til þess sem hendi er næst  Eldhúskollur og tvær spýtur gera sama gagn.  Þannig lagað.  Gestir og heimilisfólk þurfa bara að vita að ekki má fjarlægja stólinn. 

 

  Þegar blöndunartækin gefa sig kemur sér vel að eiga tengur. 

  Fyrir nokkrum dögum sögðu íslenskir fjölmiðlar frá pari sem hafði stolið tveimur innkaupakerrum og reyndi að selja þær á barnalandi.is.  Þetta vakti undrun.  Hér má sjá til hvers stolnar innkaupakerrur eru notaðar.  Þær gera sama gagn og kolagrill.  Og geta líka gert sama gagn og framhluti reiðhjóls.

 

  Það þarf ekki að klípa af matarpeningunum til að kaupa múrsteina.  Gömlu Legó-kubbarnir sem liggja ónotaðir niðri í geymslu gera sama gagn.

  Legó-kubbarnir duga ekki í stærri steypuviðgerðir.  Þar verður að grípa til stórtækari kubba.

  Það er ástæðulaust að eyða peningum í póstkassa þegar stór sultukrukka gerir sama gagn - og sultan hvort sem er búin.

Bjargið heilsu ykkar og lífi með einfaldri aðferð

  Fram til þessa hefur sígarettureykingum verið kennt um ýmsa lungnasjúkdóma.  Nú hefur komið í ljós að sturtuhausar eru ábyrgir fyrir þessum sjúkdómum.  Sturtuhausinn er fullur af bakteríum og viðbjóði sem fólk andar ofan í lungu á meðan það er undir sturtunni.

  Sígarettureykingar eru hinsvegar frekar hollar.  Held ég.  Þær framkalla smá kitl eða áreiti á lungun.  Þau fá létta leikfimiæfingu og verða sterkari á eftir.  Það er verra með viðbjóðinn úr sturtuhausnum.  Bakteríurnar koma sér fyrir í lungunum og valda skaða.

  Með einfaldri aðferð má koma 100% í veg fyrir að bakteríurnar berist ofan í lungu á meðan fólk sturtar sig.  Það eina sem þarf að gera er að kaupa höfuðbúnað fyrir kafara og nettan súrefniskút.  Þannig eru öndunarfærin fullkomlega einangruð frá ógeðinu úr sturtuhausnum.  Illgjörnu bakteríunum til háðungar og niðurlægingar. 

  Til að skerpa á stemmningunni er gaman að setja á sig sundfit í leiðinni.

  Eftir að komið er úr sturtu er upplagt að skrúfa framan af krananum í eldhúsvaskinum.  Sá hluti er með sigti.  Sigtið skal setja í pott,  fylla hann með vatni og sjóða á hæsta styrk í 40 mínútur.  Eftir það er vatninu gusað út á hlað en sigtið skolað í 5 mínútur upp úr 96% spíra (það er gaman að fá sér nokkra sopa af spíranum í leiðinni).  Svo er þetta fest aftur framan á kranann.  Því næst er hárið og höfuðið sjampóþvegið rækilega upp úr kranavatni.  Mælt er með Aloe Vera sjampói sem fæst í Heilsubúðinni á Reykjavíkurvegi 62 í Hafnarfirði.  Til öryggis er heppilegt að taka tvær - þrjár umferðir á þetta. 

  Að lokum er andlitið þvegið vandlega með þvottapoka.  Ef ekki er vel að gætt vilja eyrun gleymast.  Þá kemur sér vel að vera með stóran miða festan í ramma fyrir ofan vaskinn þar sem minnt er á að þvo eyrun líka.  Til að draga athygli að miðanum er upplagt að skreyta hann með skærum blikkljósum og háværri sírenu.

  Í fljótu bragði getur þetta virst dálítið mál.  En þegar þetta er framkvæmt daglega verður það á örfáum árum ósjálfráð athöfn sem jafnvel er framkvæmd áður en maður vaknar.  Skiptir þá engu hvort það er fyrir eða eftir hádegi eða kvöldmat.

Hvar lásu menn fyrst um að McDonald´s væri að kveðja á Íslandi?

  Aðal fréttin í dag er að McDonald´s sé að hætta á Íslandi.  Það er sama hvar borið er niður:  Í dagblöð,  netmiðla,  útvarpsstöðvar eða fréttatíma sjónvarpsstöðva.  Allstaðar er þetta uppsláttarfréttin.  Meira að segja í erlendum fjölmiðlum þykja þetta mikil tíðindi.  Ísland er fyrsta landið í heiminum til að loka öllum McDonald´s stöðum.

  Þrátt fyrir fréttaflutninginn í dag er þetta ekki ný frétt.  Ónei.  Hún er hundgömul,  eins og sjá má hér:  http://www.jensgud.blog.is/blog/jensgud/entry/967936/.  Á þeim tíma vakti fréttin gríðarmikla athygli án þess að fréttastofur tækju við sér.  Fyrir bragðið er aulalegt að sjá þær bjóða nú upp á vikugamla frétt. 

McDonald's hættir - Metro tekur við

Þetta sem vantar í fréttina

  Á dv.is er frétt af lögfræðingi sem varð gjaldþrota og var út af öðru máli dæmdur í 12 mánaða fangelsi.  Hann skipti um nafn og hélt áfram að praktísera,  reka mál fyrir dómi og rekur lögmannsstofu.  Skrifstofustjóri dómsmálaráðuneytisins segir nafnbreytinguna hafa ruglað kerfið (eins og líkast til var ætlunin).

  Það sem vantar í frétt dv.is er að lögmaðurinn var dæmdur fyrir vörslu gífurlega mikils magns barnakláms.  Í heimatölvu hans og á vinnustað fundust yfir 40 þúsund barnaklámsmyndbönd og ljósmyndir.  Þar af voru myndir af fullorðnum mönnum að nauðga börnum og unglingum gróflega og neyða með ofbeldi til annarra kynferðisathafna.  Fíkn lögmannsins í ofbeldisfullt barnaklám taldist vera á háu stigi.

  Á sama tíma þjálfaði hann unglingsstúlkur og -stráka í körfubolta.    

  Um nafnbreytinguna má lesa á http://www.dv.is/frettir/2009/10/25/daemdur-logmadur-skipti-um-nafn/

www.aflidak.is

www.stigamot.is

Ég er meðalmenni

  Mér - og vonandi flestum - hefur alltaf þótt ég vera dálítið skrýtinn.  Það er gaman.  Það eru forréttindi að vera kynlegur kvistur í mannlífsflórunni.  Nú bregður hinsvegar svo við að ég er orðinn meðalmenni.  Þannig háttar að Fréttablaðið leitaði til fjörtíu manns undir því yfirskini að fá úr því skorið hver væri besti bassaleikari,  trommari,  gítaristi,  hljómborðsleikari,  söngvari og söngkona íslensku poppsögunnar.

  Útnefna átti 3 einstaklinga á hverju sviði og raða í sæti.  1. sætið gaf 3 stig og 3ja sætið 1 stig.  Niðurstaðan er birt í Fréttablaðinu í dag.  Þar kemur í ljós að allir hljóðfæraleikararnir sem ég setti í 1. sæti tróna í 1. sætinu.  Ég er því meðalmenni.  Hef sama viðhorf til hljóðfæraleiks og þverskurður fjögurra tuga músíkdellufólks.

  Nánar má lesa um úrslitin hér:  http://vefblod.visir.is/index.php?s=3476&p=81857

Bráðnauðsynlegt að hafa í huga

  Nú er rétti tíminn til að undirbúa jólafríið í útlöndum og skipuleggja sumarfríið.  Flestir setja stefnuna á Pakistan.  Þar er alltaf fjör og margt skemmtilegt að sjá.  Ef heppnin er með getur maður rekist á hressa Talibana.  Það væri ekki ónýtt að hitta Osama bin Ladin á djamminu og fá eiginhandaráritun hjá honum.  Mér skilst að hann sé skemmtilegur og vinalegur gaur.

  Sólin er heit í Pakistan og fólk getur sólbrunnið ef gleymist að taka Banana Boat sólvörn með.  Þá kemur sér vel að hjólbörur eru ódýrar í Pakistan og gera sama gagn.

  Pakistan er eitt bandarísk-væddasta land í þessum heimshluta.  Hægt er að kaupa nýsteikta hamborgara hvenær sem er alla 25 klukkutíma sólarhringsins.

 

  Ekkert er fínna í Pakistan en Merzedes Benz.  Þar er mikið lagt upp úr að ekki fari á milli mála að bíllinn sé Benz. 

  Mislæg gatnamót í höfuðborg Pakistan,  Islamabad,  eru í lægri kantinum.  Þegar ekið er undir brú með bíla á tveggja hæða vörubílspalli aðlagast bílarnir strax aðstæðum. 

  Pakistanar leggja mikið upp úr því að útlendum ferðamönnum sé auðveldað sem mest má að komast leiðar sinnar.  Í lyftum er tekið fram að hnappur merktur "Upp" tákni að lyftan fari upp og takki merktur "Niður" tákni að lyftan fari niður.

  Pakistanar vita að útlendir snobbaðir ferðamenn sækja í merkjavöru.  Þess vegna hafa Pakistanar á söluborðum úrval af vel þekktri alþjóðlegri merkjavöru.  Þessir vinsælu innikór eru merktir Nokia.  Ég veit ekkert um Nokia en hélt að það væri farsímavörumerki.

  Pakistanar eru vanir að lesa frá vinstri til hægri.  Þumalputtareglan er sú að röð stafanna skipti ekki máli svo framarlega sem fyrsti og síðasti stafurinn í orðinu er réttur.  Pakistanar vita að ferðamenn sæki í fatnað merktum Adidas.

  Ef ég man rétt er Adidas þýskt anti-rasisma vörumerki.  Tveir þýskir bræður framleiddu íþróttaskó.  Annar var nasisti en hinn anti-rasisti.  Sá síðarnefndi,  sem framleiddi Adidas skó,  skóaði bandaríska blökkumanninn sem sigraði í hlaupi á Ólympíu-leikum Hitlers á sínum tíma.  Ég man ekki hvaða fræga vörumerki nasistinn gerði út á.  Ég er viss um að ofbeldismaðurinn Ólafur Klemensson gengur í skóm frá honum.

 

  Í Pakistan er hægt að finna skóla sem eru barnvænir.  Þeir eru merktir sérstaklega.

  Að gefnu tilefni tek ég fram að þessari færslu er ekki ætlað að vera rasísk.  Pakistanar eru fjölmenn þjóð og að uppistöðu til gott fólk.  Vona ég.  Það er í góðu lagi að draga fram broslegar hliðar á sitthverju sem virkar þannig á fordæmafulla Vesturlandabúa.

Skjár 1 - kexrugluð sjónvarpsstöð

  Skjár 1 glímir við vandamál.  Auglýsingatekjur hafa dregist saman á sama tíma og kostnaður við framleiðslu á íslensku sjónvarpsefni hefur vaxið sem og innkaup á útlendum (bandarískum) sjónvarpsþáttum.  Nú boðar Skjár 1 að dagskrá sjónvarpsstöðvarinnar verði send út rugluð til annarra en áskrifenda.  Áskriftarverði er engu að síður stillt í hóf:  2200 kall á mánuði.  Svipað verð og á kippu af góðum færeyskum bjór.

  Ég hef ekki tekið ákvörðun um hvort séu betri kaup í bjórkippunni eða áskrift að Skjá 1.  Í fljótu bragði skoðað er spjallþáttur Sölva eini þátturinn á Skjá 1 sem höfðar til mín.  Svo og - en á allt öðrum forsendum -  Lífsaugað  með Þórhalli miðli.  Sá þáttur er svo ruglaður að það er varla hægt að rugla hann meira. 

  Draugar sem heita Guðmundur,  Kristín og Guðrún koma á færibandi.  Síðast þegar ég vissi eru Guðmundur,  Kristín og Guðrún í öllum íslenskum fjölskyldum,  skólaárgöngum,  kunningjahópum og á vinnustöðum.  Sjálfur er ég umkringdur ættingjum með þessum nöfnum.  Er Guðmundsson og á mínum uppvaxtarárum í útjaðri Hóla í Hjaltadal voru Guðmundur í Hlíð,  Guðmundur á Hofi og Guðmundur í Víðinesi.  Bara til að nefna dæmi.  Úr mörgu er að velja þegar draugurinn Guðmundur mætir á miðilsfund.

  Draugar með sjálfgæfari nöfn mæta ekki á miðilsfundi.  Engin Þórlína,  Arabella eða Hörn.   Kjánarnir sem mæta í  Lífsaugað  eru allir af vilja gerðir að ráða fram úr ruglinu.  Þannig verður Kristín allt í einu Kristjana.  Takk kærlega fyrir það.

  Toppnum var náð þegar Þórhallur náði sambandi við framliðinn kóngabrjóstsykur.  Jóhann Waage var snöggur að kveikja á perunni og kannaðist við afa sinn með bláan Ópal.  Takk kærlega fyrir það.  Þórhallur var ennþá sneggri að kveikja á perunni og sá undir eins framliðna tuggu af bláum Ópal.

  Í spjalli við Jóhann Waage á eftir var hann dolfallinn af hrifningu yfir að Þórhallur hafi séð þessa framliðnu tuggu af bláum Ópal.  Sem Jóhann hafði þó frumkvæði af að nefna til sögunnar.  Er hægt að rugla svona sjónvarpsþátt meira?  Jú,  kannski.  Það er auðvelt að rugla ruglað fólk út í eitt.  Jafnvel svo að það verði næstum óruglað í ruglinu.   

  Það er ekki staðfest að ljósmyndin efst sé af Þórhalli miðli.  En ef hún er af Þórhalli þá er líklegra að hann sé þessi til hægri. 

Hulunni svipt af leyndarmálinu

  Næst síðasti forseti Bandaríkja Norður-Ameríku heitir Georg W.  Brúskur.  Margar sögur eru til af símtölum hans við bandaríska embættismenn og útlenda stjórnmálamenn.  Flestar eiga þær sammerkt að þær einkenndust af misskilningi á misskilning ofan.  Fyrir það fyrsta var rödd Brúsks eins og í fjarlægð.  Í annan stað áttu viðmælendur erfitt að greina hvort eða hvenær Brúskur var að svara spurningum þeirra eða hvort hann var að tala um eitthvað allt annað.

  Íslenskir stjórnmálamenn lentu ítrekað í vandræðalegum símtölum við Brúsk.  Þeir sömdu við hann um að hafa tiltekinn fjölda herþotna á Miðnesheiði um ókomna framtíð.  Íslenskir fjölmiðlar voru ekki fyrr búnir að slá frétt þessa efnis upp en Brúskur kallaði herþoturnar frá Íslandi.

  Því næst sömdu íslenskir stjórnmálamenn við Brúsk um að bandarískur her yrði í Keflavík næstu áratugi.  Fréttatilkynningar um að Brúskur hafi tekið erindinu vel höfðu ekki fyrr birst í fjölmiðlum en Brúskur fjarlægði bandaríska herinn frá Íslandi.

  Nú hafa ljósmyndir lekið í umferð sem útskýra hvers vegna símtöl við Brúsk voru út í hött.  Hér er eitt dæmi:

  Brúskur er einnig þekktur fyrir að sjá aldrei annað en myrkur þegar hann horfir í kíki.  Þetta vandamál hefur fylgt honum frá unglingsárum:

  Nú er spurning hvort Barack Hussein Obama og Hillary brúka þessi flóknu verkfæri öðruvísi? 

Clinton bjartsýn á lausn í Afganistan

Hvað er þetta með Skagfirðinga?

  Skagfirðingar eru ekki margir.  Bara örlítið brot af íslensku þjóðinni.  Samt eru fréttir fjölmiðlanna uppfullar af sigrum Skagfirðinga.  3 nýleg dæmi:  Eyþór Árnason sendi á dögunum frá sér bókina  Hundgá úr annarri sveit.  Bókin var umsvifalaust verðlaunuð með Bókmenntaverðlaunum Tómasar Guðmundssonar.

  Fyrir nokkrum dögum kusu júrivisjón aðdáendur í útlöndum lag eftir Óskar Pál Sveinsson besta júrivisjón-lag aldarinnar.  Áður var þetta sama lag búið að sigra önnur lög í undankeppni júrivisjón hérlendis. 

  Ungir strákar í hljómsveitinni Bróðir Svartúlfs skruppu suður til Reykjavíkur og tóku þátt í Músíktilraunum.  Aðrar hljómsveitir áttu ekki séns.  Bróðir Svartúlfs rúllaði Músíktilraunum upp.

  Á dögunum spreytti hópur vönustu sjósundskappa landsins sig í sundkeppni yfir Eyjafjörð.  Sigurjón Þórðarson skrapp frá Króknum og tók þátt án þess að hafa áður synt í sjó.  Leikar fóru þannig að Sigurjón var löngu kominn yfir fjörðinn og búinn að þurrka sér og klæða sig áður en þeir næstu náðu landi.

  Þannig mætti áfram telja í hið óendanlega.

Frábærar ljósmyndir af dýrum

  Blessuð dýrin þurfa að næra sig.  Fátt er betur til þess fallið en sporðrenna öðrum dýrum.  Rétt eins og maðurinn gerir.

Stundum þarf að skokka dálítið á eftir matnum.  Það er hressandi.

Takið eftir hvað fiskurinn er hissa.  Hann hefur aldrei séð landslagið úr þessari hæð áður og þykir þetta verulega furðulegt.

 

Hugljúf og notaleg saga fyrir svefninn

  Tanaka-san Ono er gullfiskur.  Hann fæddist og ólst upp við gott atlæti í tjörn í Japan.  Vegna eftirnafnsins má leiða getum að því að hann sé fjarskyldur ættingi myndlistarkonunnar Yoko Ono.  Einn úfinn Izuzu veðurdag kom vondi kallinn og veiddi Tanaka-san í háf og setti í plastpoka.  Til allrar lukku var vatn í plastpokanum.  Annars hefði Tanaka-san verið í vondum málum.

  Því næst var flogið með Tanaka-san til Íslands.  Ekki í einkaþotu.  Nei,  venjulegri farþegaflugvél.  Hún var full af japönskum ferðamönnum sem vildu skoða Gullfoss,  Geysi,  Þingvelli og Bláa lónið.  Allir höfðu myndavélar um hálsinn.  Nema Tanaka-san.

  Kominn til Íslands var Tanaka-san settur í gæludýrabúð.  Þaðan var hann seldur tveimur ungum bræðrum.  Þetta var mansal.  Það var verslað með Tanaka-san eins og hverja aðra vöru.  Sjálfur fékk hann ekki krónu fyrir sinn snúð.

  Bræðurnir settu Tanaka-san í lítið fiskabúr ásamt 6 öðrum gullfiskum.  Búrið er ómerkilegt og fyrir neðan virðingu Tanaka-san.  Það er allskonar plastdrasl í búrinu:  Plasttré og sitthvað fleira sem erfitt er fyrir ókunnuga að átta sig á hvað er.

  Bræðurnir gefa fiskunum einhæft þurrfóður.  Tanaka-san myndi þiggja lifandi flugur til að jórtra á.  Þó ekki væri nema einstaka sinnum.  En svo góð er tilveran ekki.  Þess í stað sitja bræðurnir tímunum saman fyrir framan fiskabúrið og glápa á fiskana.  Það þykir Tanaka-san argasti dónaskapur.  Hann lætur þó á engu bera.  Reynir bara að hreyfa sig sem minnst undir þeim kringumstæðum.

  Einn daginn áttaði Tanaka-san sig á að honum leiddist tilbreytingarleysið.  Hann fékk hugmynd.  Hann stakk upp á því við hina fiskana að þeir myndu keppa í fótbolta á hverri nóttu.  Bæði til að stunda reglulega hreyfingu og einnig til að hafa eitthvað fyrir stafni. 

  Þessu var vel tekið.  Tveir fiskar mynda mark.  Sá þriðji er markvörður.  Tveir og tveir fiskar keppa síðan sín á milli.  Yfirleitt er leikurinn nokkuð jafn.  Samt skiptir það litlu máli.  Þetta er fyrst og fremst leikur.  Það finnst öllum.  Nema einum fiski sem heitir Þórhallur Pétur Hróbjarts- og Sigurlínarson.  Hann er svo tapsár og óþroskaður að hann æsir sig upp úr öllu valdi við minnsta mótlæti.  Frekjan er slík að hann heimtaði eitt sinn að sjálfsmark sem hann skoraði væri talið sér til tekna.

   Tanaka-san er ákveðinn í að koma hinum fiskunum skemmtilega á óvart um áramótin.  Þá ætlar hann að stinga upp á að aðra hverja nótt keppi þeir í handbolta í stað fótbolta.   

------------------------------------------------

  

Fleiri örleikrit og smásögur:

.

- Flugvélamódel

http://jensgud.blog.is/blog/jensgud/entry/955702

- Miðaldra maður

http://jensgud.blog.is/blog/jensgud/entry/944608

- Leyndarmál stráks

http://jensgud.blog.is/blog/jensgud/entry/928198

- Ættleiðing

http://jensgud.blog.is/blog/jensgud/entry/916687/

- Strákur með sög

http://jensgud.blog.is/blog/jensgud/entry/903540

- Hundur

http://jensgud.blog.is/blog/jensgud/entry/863130

- Boltabulla

http://jensgud.blog.is/blog/jensgud/entry/718347

- Skokkari

http://jensgud.blog.is/blog/jensgud/entry/606929

- Strákur skiptir um gír

http://jensgud.blog.is/blog/jensgud/entry/538649

- Morðsaga

http://jensgud.blog.is/blog/jensgud/entry/320299

- 27 ára

http://jensgud.blog.is/blog/jensgud/entry/299380

- Um borð

 http://jensgud.blog.is/blog/jensgud/entry/278812

- Matarboð í sveitinni

http://jensgud.blog.is/blog/jensgud/entry/266411

- Í plötubúð

http://jensgud.blog.is/blog/jensgud/entry/260037