Styrktarhljómleikar Aflsins í kvöld

 

  Nú er heldur betur ástæða fyrir hvern þann sem tök hefur á að bregða sér í Sjallann á Akureyri í kvöld.  Þar verður boðið upp á glæsilega skemmtidagskrá sem samanstendur af leik og söng Hvanndalsbræðra,  Eyþórs Inga,  Hunds í óskilum,  Einars Ágústs,  Sniglabandsins og Sigga kapteins.  Kynnir er Skúli Gauta.

  Hljómleikar þessir eru haldnir til styrktar Aflinu,  systursamtökum Stígamóta á Norðurlandi.  Þeir hefjast stundvíslega klukkan 21 mínútu gengin í tíu.

www.aflid.muna.is

Kennari brýtur stóla og borð

  Mest lesna fréttin á www.dv.is í gær fjallaði um vanstilltan kennara sem braut stóla og borð.  Það fylgdi ekki fréttinni hvaða fag maðurinn kennir.  Deginum ljósara er að það er ekki íslenska,  háttvísi né prúðmennska.  Meðal þess sem kemur fram í fréttinni er eftirfarandi:   

 BRJÁLAÐUR ÚT Í JENS GUÐ

 Helgi Helgason, kennari og umsjónarmaður heimasíðu Frjálslynda flokksins, sendi út tölvupóst til trúnaðaramanna Frjálsynda flokksins þar sem hann lýsti ofsafenginni reiði sinni í garð DV-bloggarans Jens Guð sem upplýsti að Helgi hefði í nokkrum tilvikum dúkkað uppi á athugasemdakerfi bloggara undir fölskum nöfnum.

,,Ég er hér heima að brjóta stóla og borð. Hafið þið séð bloggið hjá jens guð?
ÉG hef ALDREI læðst með veggjum með mínar skoðanir frekar en Jón Magússon eða Kristinn H. Gunnarsson. Jón! Ég ætla þér ekki að vera hinn versti maður, hvað þá að ég ætli að þú hafir vélað JensGuð í þessa færslu. En ég er ofsalega reiður út í þig Jón! Ég ætla að standa með Kristni hverngi sem fer,við Kristinn erum ekki sammála um hin ýmsu mál! En munurinn á honum og yður herra Jón lögfræðingur er sá að Kristinn er HEIÐARLEGUR. Þú ert óheiðarlegur.
sign. Helgi Helgason."

Liðsmenn Týs árita í dag

  Færeyska rokksveitin Týr,  sem á mest seldu plötu Napalm Records um þessar mundir,  kemur til landsins í dag til að spila á fjórum tónleikum um helgina.  Verða þeir á Paddy’s í Keflavík á morgun,  fimmtudag;  Græna Hattinum Akureyri á föstudaginn, Nasa laugardaginn og Hellinum á sunnudaginn á tónleikum fyrir alla aldurshópa.

  Liðsmenn Týs ætla að kíkja við í Smekkleysu plötubúð,  Laugavegi 35,  kl 17:00 og spjalla við gesti og gangandi og árita diska og einnig plaköt sem hljómsveitin ætlar að gefa.  Takmarkað magn plakata er til.  Fyrstir koma fyrstir fá.

  Miðasala á tónleika Týr er í Smekkleysu plötubúð, Paddys og Hljómval Keflavík og í Pennanum Akureyri.

Missið ekki af merkum þætti

  Núna í morgunsárið,   miðvikudaginn 1.  október,  er ástæða til að stilla á Útvarp Sögu klukkan 10 mínútur yfir 8.  Tíðnin á FM er 99,4.  Einhver tímann á bilinu frá klukkan 10 mínútur yfir 8 til klukkan 9 verða spilaðar merkar gamlar óútgefnar upptökur sem allir héldu að væru glataðar fyrir löngu síðan.  Einnig verða spilaðar nýjar óútgefnar upptökur sem enginn hélt að væru glataðar. 

  Ef einhver missir af þættinum í beinni útsendingu þá er hann endurtekinn klukkan 10 mínútur yfir 2 eftir hádegi.  Um er að ræða Bloggþáttinn með Markúsi Þórhallssyni.  Þátturinn byrjar reyndar klukkutíma fyrr en hér er nefnt (en klukkutíma síðar ef við miðum við færeyskan tíma).  Hinsvegar hefur kvisast út að á umræddum tíma verði spjallað við fugla á borð við mig og Sigga Lee Lewis.

  Færeyingar og fleiri sem ná ekki útsendingu Útvarps Sögu í útvarpi geta hlustað á hana á netinu,  www.utvarpsaga.is.  

Með sína bestu plötu í farteskinu

   

  Poppstjarnan sívinsæla,  Herbert Guðmundsson,  hefur sem kunnugt er tekið kristna trú og er farin að boða fagnaðarerindið í viðtölum í fjölmiðlum og í Keflavíkurkirkju.  Hebbi er ekki beinlínis að predika í Keflavíkurkirkju heldur ætlar hann að flytja tvö lög og segja frá reynslu sinni af því hvernig hann snérist til kristni og frelsaðist frá vímuefnum og sígarettum. 

  Verið er að raða nýrri plötu með kappanum í hillurnar þessa dagana.  Þetta er hans fyrsta plata til fjölda ára.  "Spegill sálarinnar" heitir hún.  Ég hef heyrt hana og votta að þar er um bestu plötu meistarans að ræða til þessa.  Hún er uppfull af sterkum lögum með grípandi "sing-a-long" viðlögum og öflugum,  vönduðum röddunum og allt upp Gospelkór Reykjavíkur. 

Herbert predikar í Keflavíkurkirkju

Ljúf plata fyrir rómantíska

 

  Ég rakst á gamlan kunningja í gær,  gleðigjafann André Bachman (til að leiðrétta útbreiddan misskilning þá var hann ekki einn bræðranna í Bachman Turner Overdrive).   André stakk að mér árituðum disk með sér,  "Með kærri kveðju".  Hún inniheldur 12 dægurperlur sem gleðigjafinn flytur af ljúfmennsku í rómantískum kokteilmúsíkstíl.  Þetta eru lög eins og "Án þín" eftir Jónas og Jón Múla Árnasyni,  "Tondeleyó"  eftir Sigfús Halldórsson og Tómas Guðmundsson,  "Brostu (þótt margt þig angri)" eftir Chaplin með texta eftir Þorstein Eggertsson og "Ég er kominn heim" sem Bubbi og Björn Jörundur sendu nýverið frá sér.

  Ég ætla að skrifa ítarlegri umsögn um plötuna þegar ég hef hlustað oftar og betur á hana. 

  Gælunafnið Gleðigjafinn hefur fests við André Bachman.  Frá því ég kynntist honum fyrst fyrir aldarfjórðungi hefur hann stöðugt verið að gleðja:   Staðið fyrir jólaskemmtunum Barnaspítala Hringsins og Jólahátíð fatlaðra,  staðið fyrir hljómleikum og plötuútgáfu til styrktar Sjálfsbjörgu og Styrktarfélagi vangefinna.  Þannig mætti áfram telja.  

  Platan "Með kærri kveðju" fæst í öllum verslunum Olís.     

   

Ótrúleg vinnubrögð Helga Helgasonar, launaðs starfsmanns Kristins H. Gunnarssonar

 

  Hér aðeins fyrir neðan er færslan "Á launum við að níða niður flokksfélaga".   Í henni velti ég fyrir mér nokkrum atriðum er snúa að launuðu starfi Helga Helgasonar fyrir Kristinn H.  Gunnarsson,  greiddu af Frjálslynda flokknum.  Helgi gerði - á fullum launum - athugasemd við færsluna.  Þar hljóp ímyndunaraflið með hann - á fullum launum - í gönur. 

  Þá spratt fram Jónas nokkur Helga til varnar.  Mér þótti dularfullt að í okkar fámenna landi væri til annar maður með nákvæmlega samskonar delluhugsun og nákvæmlega jafn illa skrifandi.   Þetta var of mikil tilviljun.  Ég fletti upp á IP-tölum Helga og Jónasar.  Þær reyndust vera,  eða réttara sagt HÚN reyndist vera:  

Helgi Helgason:  IP-tala: 81.15.54.232

Jónas:  IP-tala: 81.15.54.232

  Rannveig Höskuldsdóttir upplýsir jafnframt í athugasemd hér fyrir neðan að Helgi hafi skilið eftir sig athugasemdir hjá henni,  www.rannveigh.blog.is,  undir nöfnunum  Stebbi Stefáns  IP-tala: 81.15.54.232 og  Baldvin  IP-tala: 81.15.54.232.

  Ljósmyndin er af þeim Jónasi,  Stebba,  Baldvini og Helga,  einhöfða arftökum Gísla,  Eiríks og Helga.

Áhugaverð blaðagrein

  Á baksíðu Lesbókar Morgunblaðsins í dag er að finna áhugaverða og forvitnilega grein undir fyrirsögninni "Hvað er svona merkilegt við þennan Megas?".   Þar veltir Arnar Eggert Thoroddsen fyrir sér hvort allar þær plötur sem jafnan tróna efst á listum yfir bestu plötur íslenskrar dægurlagasögu eigi þar heima ef betur er að gáð. 

  Þetta er virkilega skoðunarverð umræða.  Mér vitanlega hafa svona vangaveltur um bestu íslenskar plötur ekki áður verið skoðaðar.  Gaman væri að heyra ykkar viðhorf. 

  Til gamans set ég hér lista yfir bestu plöturnar sem birtist í Rokksögu Íslands,  Eru ekki allir í stuði?,  í samantekt Dr.  Gunna:

1.  Sigur Rós:  Ágætis byrjun

2.  Björk:  Debut

3.  Megas & Spilverk þjóðanna:  Á bleikum náttkjólum

4.  Stuðmenn:  Sumar á Sýrlandi

5.  Trúbrot:  Lifun

6.  Bubbi:  Ísbjarnarblús

7.  Utangarðsmenn:  Geislavirkir

8.  Stuðmenn & Grýlurnar:  Með allt á hreinu

9.  Bubbi:  Kona

10. Sykurmolarnir:  Life´s Too Good

Bubbi hefur gert betur en á Konu

Fórnarlamb nauðgunar gert tortryggilegt

  Það er sama hvað er til umræðu;  hvort rætt er um barnaníðinga,  morðingja,  eiturlyfjasmyglara,  nauðgara,  handrukkara eða aðra glæpamenn af þessu tagi;  alltaf koma einhverjir óþokkanum til varnar og teygja sig langt í að afsaka hann og hvítþvo af glæpnum.  Oft með þeirri aðferð að reyna með öllum ráðum að gera fórnarlambið tortryggilegt og stilla hlutum þannig upp að fórnarlambið geti sjálfu sér um kennt að hafa lent í þessari aðstöðu.

  Þannig hafa sumir dregið fram og hneykslast á því að barnið sem handrukkarinn nauðgaði á Hellisandi við annan mann hafi verið á dansleik og farið í partý.  Sú staðreynd kemur glæpnum hinsvegar ekkert við.  Fullorðnir menn mega ekki nauðga barni undir neinum kringumstæðum.  Aldrei.  Engar aðstæður breyta neinu þar um.

  Það er svo önnur saga að víða úti á landi er dansleikur og partý allt annað fyrirbæri en á höfuðborgarsvæðinu.  Á mínum uppvaxtarárum í Skagafirði voru dansleikir haldnir á Hólum í Hjaltadal.  Þar var ekkert aldurstakmark.  12 - 13 ára börn sóttu dansleikina til jafns við fullorðna fólkið.  Þarna var ekki vínveitingasala en fullorðna fólkið drakk af stút og lét pelann ganga.

  Ég þekki ekki til Hellissands.  Mér segir svo hugur að þar hafi dansleikjahald verið með líku sniði.  Vinsælasti unglingabókahöfundur landsins fyrr og ekki síður síðar,  Eðvarð Ingólfsson prestur á Akranesi,  er frá Hellissandi.   Gagnrýnendur af höfuðborgarsvæðinu fettu fingur út í lýsingu Eðvarðs á unglingapartýum í bókunum.  Í þeim drukku unglingarnir heitt súkkulaði og mauluðu rjómatertur með.  Eðvarð þekkti eðlilega bara partý eins og þau fóru fram á Hellissandi.     

www.aflid.muna.is

www.stigamot.is     

Furðulegt tilboð

 

  Ég keyrði á eftir strætisvagni áðan.  Rétt er að taka fram að ég er sjóndapur vegna nærsýni og fjarsýni.  Til viðbótar var strætisvagninn óhreinn.  Það rigndi og ég hef ekki ennþá fundið takkann á bílnum sem setur rúðuþurrkur af stað.  Enda er ég ekkert viss um að það myndi breyta miklu.

  Aftan á strætisvagninum var auglýsing frá Hótel Reykjavík.  Ég sá ekki betur en að þar stæði eitthvað á þessa leið:

  "Hádegistilboð á 2150 kr.:  Einnota útigrill eða hlaðborð"   

  Þrátt fyrir rigninguna langaði mig að eignast útigrillið.  En mér þykir það frekar dýrt.  Það er hægt að fá útigrill á 198 kall í Eurosport.

Skúbb! Færeysk tónlistarhátíð

 

  Fyrstu helgina í október verður haldin viðamikil færeysk tónlistarhátíð á Stokkseyri.  Fjöldi helstu færeyskra hljóðfæraleikara,  söngvara og hljómsveita munu troða upp.  Þar á meðal verða djasshljómsveitin Yggdrasil undir forystu píanistans Kristian Blak,  þjóðlagahljómsveitin Kvönn með fiðlusnillinginn Angeliku Nielsen í fararbroddi og rokksveitin Búdam.  

  Eivör og Kári Sverrisson hafa skipst á að syngja með Yggdrasil.  Ég veit ekki hvort þeirra sér um sönginn í þetta skiptið.  Búdam hefur verið líkt við blöndu af Tom Waits og Nick Cave. 

  Ég reyndi að finna á netinu eitthvað um þessa færeysku tónlistarhátíð á Stokkseyri.  Án árangurs.     

  Plötur með Yggdrasil,  Kvönn og Búdam fást í versluninni Pier í glerturninum við Smáratorg - og eflaust víðar.  Í Pier var líka að koma ný sending af tveimur plötum Viking Bands saman á einni geislaplötu.

  Í tónspilaranum á www.bless.blog.is eru nokkur lög með Búdam.

  Á www.myspace.com/angelikanielsen eru nokkur lög með Angeliku Nielsen.

  Á www.kristianblak.com er heilmikill fróðleikur um Yggdrasil. 

Efsta ljósmyndin er af Búdam.  Fyrir neðan eru myndir af Angeliku Nielsen (til vinstri) og Yggdrasil.

Veitingahús - umsögn

 

Veitingastaður:  Langbest,  Hafnargötu 62,  Keflavík

Réttur:   Lambasteik

Verð:  1750 kr.

Einkunn: ***1/2 (af 5)

  Ég hafði aldrei tekið eftir þessum stað fyrr en nú.  Þó hef ég oft átt erindi til Keflavíkur.  Merkingar eru sem sagt ekki mjög áberandi.  Staðurinn er víst um það bil 15 til 20 ára.  Þessu komst ég að þegar ég nefndi við innfædda Keflvíkinga að ég hafi prófað að borða á nýjum stað.  Jafnframt fékk ég að vita hvernig nafn staðarins kom til:   Aðstandendur hans voru að velja nafn úr fjölda tillagna.  Einn sagði að honum þætti tiltekið nafn langbest.  Öðrum þótti annað nafn langbest.  Þeim þriðja þótti þriðja nafnið langbest.  Þegar þeir tóku eftir því að allir notuðu orðið langbest er þeir lýstu sinni skoðun varð að samkomulagi að kalla staðinn Langbest.  Gott nafn.

  Langbest er í milliflokki.  Uppistaða á matseðli eru hamborgarar og flatbökur (pizzur).  En einnig steikur,  djúpsteiktur fiskur og gratíneraður fiskur.  Ég pantaði lambasteik.  Þegar ég rétti afgreiðslumanninum kortið mitt sá ég að hann stimplaði inn 1945 kr.   Ég gerði athugasemd:

  - Á matseðlinum stendur að lambið kosti 1750 kall.

  - Það er rétt.

  - En þú stimplar 1945 kall.

  - Já,  vegna þess að gosið kostar 195 kall.

  - Pantaði ég gos?

  - Viltu ekki gos með matnum?

  - Getur verið að ég myndi panta gos ef ég vildi gos en ég myndi ekki panta gos ef ég vildi ekki gos?

  - Ég get alveg mínusað gosið ef þú vilt ekki gos.  Viltu sleppa gosinu?

  - Hvað heldur þú?

  - Þú ræður.  Ef þú vilt ekki gos þá mínusa ég það bara.

  Og þannig fóru leikar.  Afgreiðslumaðurinn mínusaði gosið sem ég hafði ekki pantað.

  Með lambagrillsteikinni fylgdu 2 stórar bakaðar kartöflur.  Sennilega voru þær forsoðnar.  Þær voru það mjúkar og safaríkar.  Kartöflur sem eru einungis bakaðar eru yfirleitt þurrari og mjölkenndar.  Þessar voru engu að síður bragðgóðar.  Með þeim fylgdi sitthvort smjörstykkið.  Á borð vantaði pipar.  Þar var bara salt og kartöflukrydd fyrir franskar.  Kartöflukrydd passar ekki með bökuðum kartöflum.  Það gera aftur á móti pipar og salt.

  Vænn skammtur af berneisósu fylgdi í sósuskál.  Hún var mjög líklega upphituð.  Hún var það þunn og yfirborðið frauðkennt.  Engu að síður góð sósa.  Einnig fylgdi ferskt salat sem samanstóð af iceberg,  agúrkum og tómötum.  Ágætur skammtur.

  Lambasteikin var alveg mátulega léttsteikt,  meir og léttkrydduð.  Hún var steikt með mjög þunnt skornum sveppum.  Þannig eiga sveppir með lambasteik að vera.   

  Innréttingar eru frekar "sjoppulegar" eða skyndibitalegar.  Bólstraðir dökkbláir bekkir minna meira á vinnustaðamötuneyti en veitingastað innréttaðan samkvæmt góðri markaðsfræði.  Þetta skiptir mig þó engu máli.  Meira máli skiptir að hálfur lítri af bjór er á 650 kall sem er ágætt milliverð.

  Myndin er ekki frá Langbest.

Aðrar umsagnir um veitingahús:

- Icelandic Fish & Chips

http://jensgud.blog.is/blog/jensgud/entry/643187

 - American Style

http://jensgud.blog.is/blog/jensgud/entry/630463

 - Pítan

http://jensgud.blog.is/blog/jensgud/entry/590495

 - Hrói höttur

 http://jensgud.blog.is/blog/jensgud/entry/641856

Bráðskemmtilegar myndir

  Meðfylgjandi ljósmyndir fékk ég sendar.  Þær framkölluðu hjá mér ýmist bros eða hlátur.  Þess vegna vil ég leyfa fleirum að hafa gaman af.  Fyrir þá sem ekki þekkja til rafmagns þá eru mennirnir á efstu myndinni steindauðir með það sama ef rafmagn kemst í vatnið.

  Takið eftir því að það er brot í hárinu nálægt miðju.  Það er vegna þess að á nóttunni leggur maðurinn neðri hluta hársins undir höfuðið og notar fyrir úrvals kodda.

Siggi segir sögur

 

  Píanósnillingurinn knái og fingrafimi,  Siggi Lee Lewis,  er mikill og góður sögumaður.  Hvenær sem maður hittir drenginn renna upp úr kappanum ævintýralegar sögur af kunningjunum eða öðrum.  Nú hefur þessi ungi drengur brugðið á leik á bloggi sínu og er farinn að segja skemmtisögur þar.  Slóðin er www.siggileelewis.blog.is.   Reyndar vantar inn í bloggfærslur Sigga að hann er góður leikari og eftirherma.  Hann getur brugðið sér í hlutverk söguhetjunnar þannig að hún stendur manni ljóslifandi fyrir sjónum. 

Minnisstætt viðtal sem leiddi til skjótrar afsagnar

  Í dagblaðinu Tvídægri (24 stundum)  í dag er rifjað upp þegar reyðfirski snillingurinn Helgi Seljan var ungur og efnilegur blaðamaður á DV.  Helgi er reyndar ennþá ungur og efnilegur en hann fékk það verkefni að fiska fréttir af þá nýráðnum fréttastjóra RÚV,  Auðuni Georgi Ólafssyni.  Einhver kurr var meðal fréttamanna RÚV sem töldu ráðninguna vera pólitíska (ég man ekki hvort það var á forsendum Sjálfstæðisflokks eða Framsóknar.  Enda er það aukaatriði) og Auðun Georg ekki þann reynslubolta sem fullyrt var.  Á fyrsta degi lenti Auðun Georg í viðtali sem leiddi til þess að hann sagði af sér.  Viðtalið var og er kennslubókardæmi um það hvernig nýráðinn óhæfur fréttastjóri fremur "hara kiri" eða á íslensku:  Skaut sig í fótinn.

Fréttamaður: Hefur þú átt fundi með formanni útvarpsráðs nýlega?

Auðun: Eeeeeeee...Ekki nýlega, nei.

Fréttamaður: Ég hef öruggar heimildir fyrir því að þú hafir hitt hann að máli eftir hádegi í gær.

Auðun: Iiiiiiii...Ég man nú ekki til þess. Man ekki nákvæmlega hvenær það var.

Fréttamaður: Hvað hefði verið rætt á slíkum fundi.

Auðun: Það er bara trúnaðarmál.

Fréttamaður: Þannig að þú viðurkennir að slíkur fundur hafi verið haldinn, þrátt fyrir að þú neitir því.

Auðun: Ja...ég neitaði því ekkert að hann hafi farið fram en, hérna, gef ekkert upp annað um það.

Fréttamaður: Varstu ekki að neita því að fundurinn hafi verið haldinn?

Auðun: Fundurinn hefur verið haldinn en, hérna, hann var bara trúnaðarmál.

Fréttamaður: Hver boðaði fundinn? 

Auðun: Það var bara trúnaðarmál.

Fréttamaður: Baðst þú um fund eða formaður útvarpsráðs?

Auðun: Ummmmm..., ammmm..., nú man ég það ekki. Ég held að ég hafi óskað eftir þeim fundi bara til að meta aðstæður og fara yfir hver staðan væri hér innanhúss.

Fréttamaður: Hver var niðurstaðan á fundinum?

Auðun: Niðurstaðan á fundinum var bara að halda sínu striki og, hérna, ég veit ekki til að ég gert neitt rangt og bara mæti hér til starfa og haldi mínu striki.

Fréttamaður: Af hverju neitaðirðu því í upphafi að fundur hefði verið haldinn?

Auðun: Iiiiii...Bíddu, hvað áttu við?

Fréttamaður: Ég spurði hvort þið hafið átt fund í gær og þú sagðir nei.

Auðun: Ja, mmmmmm..., aaaaaaa...mig minnti ekki hvenær fundurinn fór nákvæmlega fram.

Fréttamaður: Hann var haldinn í gær.

Auðun: Jaaaaá... Þá var hann haldinn í gær.  

Sérkennilegar umferðarmerkingar

  Sumar umferðarmerkingar eru þannig að erfitt er að átta sig á því hvað er í gangi.  Aðrar eru broslegar vegna þess þær upplýsa eitthvað sem er svo augljóst að undrun vekur að slíkar upplýsingar séu settar á umferðarskilti.  Hér eru nokkur raunveruleg dæmi:

Veitingahús - umsögn

Veitingastaður:  Icelandic Fish & Chips,  Tryggvagötu 8,  Reykjavík

Réttur:   Djúpsteikt langa

Verð:  1590 kr.

Einkunn: ***1/2 (af 5)

  "Fiskur og franskar" er einskonar þjóðarréttur Breta;  djúpsteiktur skyndibiti afgreiddur á pappadiskum og snæddur með berum puttunum.   Veitingastaður sem kallast Icelandic Fish & Chips hljómar þess vegna ekki spennandi.  Til viðbótar er kjánalegt að íslenskur veitingastaður í Reykjavík skuli heita útlendu nafni.  Ekki síst vegna þess að staðurinn kennir sig við íslenskt hráefni.  Því ekki að nota íslenskt mál líka? 

  Þegar inn á staðinn er komið blasir við að IF&C er ekki "ódýr" eða subbulegur skyndibitastaður.  Þetta er staður í milliflokki.  Við getum staðsett hann til hliðar við Pítuna og American Style. 

  Gestir sækja sér sjálfir hnífapör.  Ef þá langar í vatn sækja þeir sér það einnig sjálfir.  Það er þó engin ástæða því hálfur lítri af bjór kostar 650 kall,  100 kalli minna en á Hróa hetti.  Ef maður nær að drekka 3 bjóra með matnum sparast þannig 300 kall.   

  Á borðum loga kerti.  Það gefur góða stemmningu. 

  Ég pantaði löngu með ofnbökuðum kartöflum og chillí-skyronnesi.  Ég rétti afgreiðsludömunni 5000 kall og hún gaf mér til baka eins og ég hafi látið hana fá 2000 kall.  Mér var alveg sama.  Engu að síður þótti mér þetta vera þjórfé í hærri kantinum.  Ég hugsaði með mér að sennilega væri um að ræða fátæka einstæða móðir með húsaleigu í vanskilum.  Svo bara hætti ég að hugsa um þetta og fór að leita uppi dagblöð til að lesa á meðan maturinn væri eldaður.

  Nokkru síðar spurði daman hvort verið gæti að ég hafi látið hana fá 5000 kall.  Ég kannaðist við það.  Hún lét mig þá fá einhverja seðla.

  Maturinn er borinn fram á ílöngum mjóum glerdiskum.  Það er stæll á því.  Ekkert pappadrasl. 

  Langan er mjúkur fiskur og laus í sér.  Það þarf varla að skera hann því hann dettur sjálfur í sundur þegar ýtt er við honum eða honum gert hverft við á annan hátt.  Það er milt og ferskt bragð af honum.  Deigið sem hann er steiktur í er úr spelti og bankabyggi.  Það er þunnt og stökkt með bragðgóðum heilsukeim.  Ég er lítið fyrir djúpsteiktan fisk en þetta er sá besti sem ég hef bragðað.  Ég mun fara oftar á ID&C og kanna djúpsteikta rauðsprettu eða hlýra - fyrst langan kemur svona vel út.

  Ofnsteiktu kartöflurnar eru baðaðar í ólífuolíu og kryddaðar með salti og steinselju.  Þær eru skornar í þunnar flögur og blessunarlega vel bakaðar;  dökkar,  stökkar og bragðið er skarpt. 

   Eins og nafnið gefur til kynna er skyr uppistöðuhráefni í skyronnesi.  Hin og þessi krydd eru hrærð saman við þannig að úr verður köld sósa,  eða ídýfa.  Það er hægt að velja um margar gerðir af skyronnesi,  svo sem hvítlauks,  sinneps og svo framvegis.  Ég óttaðist pínulítið að chillí-skyronnesið væri heldur sterkt með þessum mat.  Óttinn var ástæðulaus.  Chillí-skyronnesið er létt og gefur frísklegt bragð.

  Ég held að músíkin á staðnum hafi verið spiluð úr tölvu fremur en að stillt hafi verið á útvarp.  Að minnsta kosti var ekkert talað á milli laga og músíkin við hæfi:  Kunnir slagarar með Róbertu Flack,  Nancy og Frank Sinatra. 

  Ef mælikvarðinn á matinn er í heilum stjörnum talið erum við að tala um 4 af 5.  En 3 og hálf er nær lagi.  Myndin er ekki af mat á IF&C.

Aðrar umsagnir um veitingahús:

 - American Style

http://jensgud.blog.is/blog/jensgud/entry/630463

 - Pítan

http://jensgud.blog.is/blog/jensgud/entry/590495

 - Hrói höttur

 http://jensgud.blog.is/blog/jensgud/entry/641856

Viðamiklar upplýsingar um Tý og væntanlega hljómleikaferð hljómsveitarinnar til Íslands

 

  Hér fyrir neðan eru ítarlegar upplýsingar um hljómleikaferð færeysku víkingarokkaranna í Tý til Íslands fyrstu helgina í október.  Jafnframt fylgja góðar upplýsingar um hljómsveitina og hlekkir yfir á myndbönd hennar.  Þessar upplýsingar eru teknar saman af Þorsteini Kolbeinssyni.  Hann hefur veg og vanda að hljómleikum Týs:

  Týr sló í gegn hérlendis fyrir allnokkrum árum með laginu  Ormurinn langi. Mun sveitin spila hérna á þrennum tónleikum, einum á Akureyri og tveimur í Reykjavík, þar af stórtónleikum á NASA.

  Sveitin hefur aldeilis stækkað sinn aðdáendahóp síðan við heyrðum síðast frá þeim og strax eftir þessa Íslandsheimsókn munu drengirnir halda á brott á túr um Evrópu með ekki ómerkari böndum en Hollenthon (Austurríki), Alestorm (Skotlandi) og Svartsot (Danmörku) en Týr verður
aðalnúmerið þar.

  Það hefur verið ótrúlega gaman að fylgjast með uppgangi þessarar sveitar frá því hún kom hingað síðast. Með þriðju plötu sína í farteskinu,  Ragnarök, komst sveitin á samning við evrópskt útgáfufyrirtæki sem í kjölfarið endurútgaf eldri útgáfur sveitarinnar (How Far to Asgaard  og  Eric The Red) og þá fóru hjólin að snúast fyrir alvöru. Sveitin varð æ tíðari gestur á hinum ýmsu tónleikaferðalögum sem kristallaðist í því að sveitinni bauðst til að spila á hinni virtu Wacken Open Air þungarokkshátíð í Þýskalandi í fyrra. Slík var eftirvænting fyrir þá tónleika að tónleikasvæðið troðfylltist og urðu margir frá að hverfa. 
  

 Eftir þessu var tekið og bauð sænska víkingametalsveitin Amon Amarth sveitinni að slást í för á stórri tónleikaferð þeirra um Evrópu þá um haustið.

  Það sem hefur svo verið að gerast hjá sveitinni í ár hefur engan endi ætlað að taka þar sem hver risa túrinn á fætur öðrum hefur boðist drengjunum. Í byrjun vors hélt sveitin á risatúr undir nafninu
Paganfest (með ekki ómerkari sveitum en Ensiferum, Korpiklaani, Turisas, Moonsorrow og Eluveitie) sem spannaði bæði Evrópu og Bandaríkin.

  Í júní hélt sveitin á 2 vikna túr um Austur-Evrópu en það sem gerir þetta sumar einna hvað merkilegast er að sveitin hefur spilað á ótrúlega mörgum stórum metalfestivölum í Evrópu: Tuska í Finnlandi, Bang Your Head, Party San Open Air og Summer Breeze í Þýskalandi, Bloodstock í Bretlandi og einnig nokkrum minni eins og Rock Harz Open Air í Þýskalandi, Metal Heart í Noregi og Metal Show í Lettlandi.

  Sveitin hefur skapað sér sess fyrir að flytja ýmis þjóðleg kvæði og vísur frá Norðurlöndunum og setja þau í þungarokksbúning. Á nýjustu plötunni, sem heitir einfaldlega “Land”, taka þeir íslenska lagið  Ævi mín er eintómt hlaup eftir Brennivíni, gamla vísu sem birtist á útgáfu frá kvæðamannafélaginu Iðunni fyrir allnokkru síðan. Á plötunni heitir lagið einfaldlega  Brennivín  en í allt syngja þeir á fjórum tungumálum á plötunni (íslensku, ensku, færeysku og norsku).

  Eftir fjögurra ára fjarveru frá Íslandi er löngu kominn tími á að frændur okkar heimsæki okkur aftur en tónleikar þeirra verða sem hér segir:

 - Föstudaginn 3. október heldur sveitin í víking til Akureyrar og spilar á Græna Hattinum ásamt m.a. Hvanndalsbræðrum og Disturbing Boner.

 - Laugardaginn 4. októberverður slegið upp til heljarinnar veislu á Nasa,  þar sem sveitin mun nýta fulltingis m.a. Mammút og Severed Crotch.

 - Sunnudaginn 5. októberverða svo tónleikar fyrir alla aldurshópa í Hellinum TÞM. 

 - Að auki verða Týr gestir í Popplandi á Rás 2 föstudaginn 3. október,  þar sem búast má við einhverjum tónum frá þeim.

Nánar um tónleikana:

Föstudagur 3. október
Græni Hatturinn á Akureyri
Húsið opnar - byrjar: 21:00 - 22:00
Miðaverð: 1500
Forsala aðgöngumiða í Pennanum Akureyri.
Aldurstakmark: 18 ár

Hljómsveitir:
Týr
Disturbing Boner
Finngálkn
Provoke (áður Sepiroth)
Hvanndalsbræður

Laugardagur 4. október
Nasa við Austurvöll, Reykjavík
Húsið opnar - byrjar: 21:00 - 22:00
Miðaverð: 2300 (endilega mæta með pening í beinhörðum)
Aldurstakmark: 20 ár

Hljómsveitir:
Týr
Severed Crotch
Mammút
Dark Harvest
Perla

Sunnudagur 5. október
Hellirinn í Tónlistarþróunarmiðstöðinni TÞM Hólmaslóð, Reykjavík
Húsið opnar - byrjar: 18:00 - 18:30
Miðaverð: 1500 (endilega mæta með pening í beinhörðum - enginn posi á
staðnum)
Aldurstakmark: Ekkert

Hljómsveitir:
Týr
Gone Postal
Trassar
Hostile
Palmprint in Blood


Heimasíður hljómsveitarinnar:

http://www.tyr.net 
http://www.myspace.com/tyr1


Video:

Sinklars Visa af Land
http://www.youtube.com/watch?v=0I1geB7U5VI

og lagið sem byrjaði þetta allt saman: Ormurin Langi af How Far to Asgaard
http://uk.youtube.com/watch?v=vtjksfgCp0I

Live video:
Ramund hin unge af Eric the Red - Live at Wacken
http://uk.youtube.com/watch?v=oo7OE7Xd8Kw

Allar plötur Týs fást í húsgagnaversluninni Pier í glerturninum við Smáratorg - og eflaust í einhverjum plötubúðum.

Veitingahús - umsögn

 

Veitingastaður:  Hrói höttur,  Hringbraut 119,  Reykjavík

Réttur:  Hádegisverðarhlaðborð

Verð:  1290 kr.

Einkunn: *** (af 5)

  Mér skilst að heitu réttirnir í hádegisverðarhlaðborði Hróa hattar á Hringbraut séu hinir fjölbreyttustu frá degi til dags.  Þegar ég mætti á svæðið voru heitu réttirnir svínarifjasteik og kjötfarsbollur í brúnsósu með blönduðu grænmeti.  Hvorugur rétturinn er í uppáhaldi hjá mér.  En báðir voru í hinu besta lagi.  Með þessum réttum var hægt að fá sér franskar kartöflur.  Það þykir mér vera versta útgáfa af kartöflum.  Árangurslaust skimaði ég eftir soðnum kartöflum,  pönnusteiktum eða kartöflusalati.  Einungis þær frönsku voru í boði. 

  Þrjár tegundir af nýlöguðum flatbökum (pizzum) voru líka á hlaðborðinu.  Allar með sitthvoru álegginu.  Um leið og ein bakan kláraðist var nýrri bætt við með enn einu álegginu.  Ég fæ mér annað en flatböku ef mögulegt er.  Þannig var það einnig í þessu tilfelli.  Hinsvegar sá ég að yngra fólkið reif í sig flatbökurnar af áfergju.  Enda auglýsir Hrói höttur:  "Í pizzum erum við bestir!"

  Vegna flatbakanna og frönsku kartaflanna segir mér svo hugur að hlaðborðið höfði betur til ungs fólks en gamalmenna.

  Gott úrval af fersku grænmeti (papriku,  agúrkum,  tómötum...),  hrásalötum, köldum sósum og einni heitri var í boði.  Ég kastaði ekki tölu á allar þær skálar sem geymdu það góðgæti.  Líklega voru þær á bilinu 10 - 15.  Ég saknaði einskis í því úrvali og var hinn kátasti.

  Grænmetissúpa og brauð og kaffi fylgja hlaðborðinu.  Ég skipti mér ekkert af því. 

  Hálfur lítri af bjór kostar 750 kall.  Það er í dýrari kantinum.  Í útvarpinu hljómuðu leiðinleg lög á Bylgjunni. 

  Innréttingarnar á Hróa hetti eru skemmtilega hráar.  Þær eru úr dökkum kvistóttum við og mynda hálfgerða útilegustemmningu.  Dagblöð liggja frammi.  Það er góður kostur.

  Ljósmyndin er ekki af Hróa hetti.

  Fleiri veitingahúsaumsagnir: 

  http://jensgud.blog.is/blog/jensgud/entry/630463

  http://jensgud.blog.is/blog/jensgud/entry/590495

Hvað er skallapopp?

 

  Það er ekki öllum gefið að henda reiður á þeim nöfnum sem notuð eru til að skilgreina króka og kima músíkur.  Meðal annars hefur hent að fólk skilgreini skallapopp ranglega sem eitthvað er snýr að aldri eða útliti poppara.  Þess vegna er brýn ástæða til að árétta hvað skallapopp er.  Til að átta sig betur á því er ágætt að þekkja forsöguna:

  Á seinni hluta sjöunda áratugarins og fyrri hluta þess áttunda var mikil gerjun og gróska í rokkmúsík.  Ekki síður á Íslandi en í nágrannalöndunum.  Hljómsveitir eins og Trúbrot,  Náttúra,  Óðmenn og margar fleiri lögðu metnað sinn í að semja og spila framsækna og nýstárlega tónlist.  Sköpunargleðinni var gefinn laus taumur og hljómsveitirnar fundu sinn eigin hljóm.

  Er leið að miðjum áttunda áratugnum fjaraði framsækna bylgjan út á Íslandi.  Í staðinn urðu áberandi þau vinnubrögð að popparar fóru að kráka (covera) gamla bandaríska popp- og sveitaslagara og gefa út með aðkeyptum bulltextum á íslensku.  Við flutninginn var stuðst við upprunalegu útsetningu laganna. 

  Þarna var um steingelda iðnaðarframleiðslu að ræða,  án andagiftrar og gróanda.  Það er þetta fyrirbæri sem farið var að kalla skallapopp.  Holdgerfingar skallapoppsins urðu HLH og Brimkló,  samanber þjóðsönginn Rækjureggí sem Utangarðsmenn og fleiri sungu:

  Ég er löggiltur hálfviti,

hlusta á HLH og Brimkló.

  Ég er löggiltur öryrki,

læt hafa mig að fífli...