Gamli einbúinn - páskasaga

  Gamli einbúinn á afskekkta afdalabýlinu er einn.  Alltaf einn.  Það eru næstum fjórir áratugir síðan hann bauð eiginkonu sinni og börnum síðast í heimsókn.  Hann hefur ekkert heyrt frá þeim síðan.  Reyndar heyrði hann ekki í þeim þá.  Hann var uppi á fjöllum að eltast við ísbirni allan tímann sem þau voru í heimsókn.  Hann fann engan ísbjörn og engin merki þess að ísbjörn hafi verið uppi á fjöllum.

  Allir aðrir en gamli einbúinn eru fluttir burtu úr sveitinni fyrir löngu.  Það liggur ekki almennilegur vegur til afdalabýlisins.  Bara hlykkjóttur hestatroðningur.  Þess vegna kemur aldrei neinn lengur í heimsókn.  Einbúinn fer aldrei lengur af bæ.  Hann á ekkert erindi annað.  Á afdalabýlinu hefur hann allt til alls.  Hann er með kindur,  kýr,  hænur, hesta,  hund, kött og innrammaða ljósmynd af Davíð Oddssyni klippta út úr Morgunblaðinu.  Meira þarf hann ekki.

  Póstur hefur ekki verið borinn út í sveitinni eftir að sveitungarnir fluttu burtu.  Einbúinn saknar þess ekki.  Hann fékk aldrei annan póst en rukkanir.  Það er gott að vera laus við þær.

.

  Einbúinn lætur fara vel um sig í myrkrinu.  Hann liggur undir heyhrúgu og malar eins og köttur.  Úti gnauðar norðangarri.  Stórhríðin fyllir upp í hverja glufu.  Það er brunagaddur.  Lífið er yndislegt.  Gæti ekki verið betra.

  En hvað er þetta?  Það heyrist dauft vélarhljóð í fjarska.  Gamli einbúinn trúir ekki sínum eigin eyrum.  Hann slær þéttingsfast á eyrun til að eyða þessari ofheyrn.  Mótorhljóðið þagnar ekki.  Þvert á móti.  Það færist ört nær og verður háværra.  Þetta er undarlegt.  Brátt bregður fyrir birtu á hélaðar rúðurnar.  Einbúinn sprettur upp eins og stálfjöður og rýnir út um gluggann.  Í þann mund leggur stór snjóbíll á beltum fyrir utan.  Stórir ljóskastarar lýsa upp hlaðið.  Út úr bílnum snarast hópur einkennsiklæddra kappdúðaðra manna.  Einn er með járnkarl sem hann lemur kröftuglega ofan í frosna jörðina nokkrum sinnum.  Annar er með vel yddaðan tréstaur sem hann stingur ofan í holuna eftir járnkarlinn.  Sá þriðji lemur með sleggju ofan á staurinn uns staurinn er pikkfastur í jörðinni.  Fjórði maðurinn spennir með járnhring póstkassa á staurinn.  Fimmti maðurinn stingur stóru umslagi ofan í póstkassann.  Síðan stökkva mennirnir aftur upp í snjóbílinn.  Um leið og bílnum er ekið á brott í stórri sveigju á hlaðinu fer hann yfir hænsnakofann.  Kofinn brotnar í smátt undir bílnum.  

  Gamli einbúinn getur ekki varist hlátri.  Hann kallar á hundinn:  "Kisi,  nú eru hænurnar hissa.  Þær vita ekki hvaðan á sig stendur veðrið þegar þær fjúka yfir holt og hæðir.  Best gæti ég trúað að þær snúist eins og vindhanar og séu ringlaðar.  Kisi minn,  svona ævintýri lenda hænurnar ekki í á hverjum degi."

  Gamli einbúinn fær hóstakast.  Það eru mörg ár síðan hann hefur hlegið.  Hann er ryðgaður í því hvernig á að hlæja.  Hann er vanari að hósta.  Hann hóstar eins og unglamb.

.

  Gamla einbúanum verður hugsað til póstkassans.  Hvað ætli sé í umslaginu?  Gamli einbúinn er harðákveðinn í að sækja umslagið einhvern daginn.  Jafnvel opna það.  Gamla einbúanum líður vel eftir að hafa tekið þessa ákvörðun.  Hann er sáttur við sjálfan sig.  Reyndar þykist hann vita hvað sé í umslaginu.  Það getur ekki verið annað en ástarbréf.  Það er enginn friður fyrir stelpunum,  hugsar gamli einbúinn og hristir hausinn hneykslaður.  Ekki hausinn á sér heldur hausinn á hundinum.

.

  Tíminn líður hratt á gervihnattaöld.  Vikur og mánuðir líða.  Ekkert ber til tíðinda.  Gamli einbúinn gjóar stundum augum til póstkassans.  Einkum þegar hann saknar þess sárast að geta ekki fengið sér hrátt egg í matinn síðan hænurnar fuku út í buskann.  

  Um haustið lætur Gamli einbúinn til skarar skríða.  Hann tekur umslagið úr póstkassanum.  Nafn hans og heimilsfang er prentað á framhlið umslagsins.  Á bakhliðinni stendur:  "Sendandi:  Jón Jónsson,  Hökuskarði 526,  Hólum í Hjaltadal,  Skagafirði."  Póststimpillinn er skýr og greinilegur.  Þar stendur dagsetningin 29. febrúar 2152.  Dagsetningin vekur undrun gamla einbúans.  Forvitni hellist yfir hann.  Hann strengir þess heit að skoða innihald umslagsins sem fyrst.  Ekki síðar en um áramótin.  Gamli einbúinn stingur umslaginu undir dautt lamb sem hann notar fyrir kodda og sefur á því næstu mánuði.       

  Áramótin líða.  Gamli einbúinn er búinn að gleyma umslaginu.  Um vorið ákveður hann að snúa dauða lambinu við því það er morkið og komið hausfar í það.  Þá rekst hann á umslagið.  Nú dugir ekkert hangs.  Gamli einbúinn kallar á hundinn sinn:  "Kisi,  komdu hérna og opnaðu umslagið."   Hundurinn svarar engu.  Hann þykist ekki heyra í gamla einbúanum.  Það er grundvallarregla hjá hundinum að hunsa hvern þann sem kallar hann Kisa.  Þetta er ekkert persónulegt gagnvart gamla einbúanum.  Reglan á við um alla.

  Fleira gerist ekki þennan dag.  Morguninn eftir sækir gamli einbúinn skóflu.  Fyrir aftan húsið grefur hann upp forláta sveðju.  Þar gróf hann sveðjuna fyrir nokkrum árum til að enginn myndi meiða sig á flugbeittri egg sveðjunnar.  Gamli einbúinn leggur umslagið á viðarbút.  Svo heggur hann með sveðjunni bláendann af því.  Því næst grefur hann sveðjuna niður aftur.  Stutt frá grefur hann niður uppáhaldsbein hundsins.  Það er hrekkur.  

  Eftir þetta leggur gamli einbúinn sig.  Hann er dauðþreyttur.  Hálftíma síðar vaknar hann upp við að hundurinn pissar framan í hann.  Kannski mýkir þetta húðina og varðveitir æskuljóma minn,  hugsar gamli einbúinn jákvæður og hress.  Hann er í svo góðu stuði að hann kíkir ofan í umslagið.  Þar blasir bréf við.  Gamli einbúinn fiskar það upp úr umslaginu eins og vanur veiðimaður.  Það stendur ekkert á bréfinu.  Það er skjannahvítt.  Enginn texti.  Engin mynd   Ekkert.  

  Þetta er kjánalegt,  hugsar gamli einbúinn.  Öll þessi fyrirhöfn út af óskrifaðri og óprentaðri pappírsörk.  Gamli einbúinn hendir pappírsörkinni frá sér.  Það hvarflar að honum að spretta á fætur og sparka í hundinn.  Til að gera eitthvað.  Í þann mund sér hann pappírsörkina snúast við áður en hún lendir á gólfinu.  Þá blasir prentaður texti við.  Gamli einbúinn áttar sig strax á því að hann hafði horft vitlausu megin á pappírsörkina áður en hann henti henni frá sér.  Hann teygir sig í bréfið og les það sem í því stendur:

.

  Hólum 29. febrúar 2152

  Kæri langalangalangalang-afi.

  Við vorum að fá nýjan tímaflakkara í skólann.  Mér datt í hug að það gæti verið gaman að skrifast á við þig.  Láttu mig vita hvort þú hefur fengið þetta bréf.  Það gerir þú með því að grafa snyrtilega X í einn fermetra á hlaðinu hjá þér.  Í X-ið raðar þú steinum.  Þetta X get ég séð í gegnum gervihnattarhnit.  Ef þú mokar yfir X-ið þannig að ekkert sjáist verður ekki hróflað við X-inu næstu aldir.  Þá skal ég póstsenda þér upplýsingar um ættingja þína.  Hvað á daga þeirra hefur drifið eftir að þú er allur. Ég sé í ættarskránni að þú varst bóndi.  Ég hlakka til að senda þér fleiri póstbréf.

  Jón Jónsson

.

  Gamli einbúinn horfir undrandi á bréfið.  Hann les það aftur.  Svo klippir hann bréfið í þrjá jafn stóra strimla.  Hann teygir sig í gamalt kökubox og dregur þaðan upp væna tuggu af hassi.  Hassinu skiptir hann á milli strimlanna.  Hann vefur strimlana vönum handtökum upp í vindlinga.  Hann kveikir í einum og sýgur þykkan reykinn ofan í lungun.  Gamli einbúinn kumrar af hamingju.  Mikið er ég alltaf heppinn,  hugsar hann.  Einmitt þegar mig vantaði bréf kom það í pósti.  Um leið og gamli einbúinn berst við að halda reyknum ofan í lungunum færist fyrirlitningarsvipur yfir andlitið.  Hann hugsar:  Jón Jónsson.  Þvílíkt rugl.  Það hefur aldrei verið neinn Jón í minni ætt.

                        

---------------------------------

 Fleiri smásögur og leikrit:

 - Saga af systrum

http://www.jensgud.blog.is/blog/jensgud/entry/1017021/

.

 - Jólasaga

http://www.jensgud.blog.is/blog/jensgud/entry/1008279/

.

- Á rjúpnaveiðum:

http://www.jensgud.blog.is/blog/jensgud/entry/988782/

.

- Ólétta nunnan:

http://www.jensgud.blog.is/blog/jensgud/entry/978349/

.

- Gullfiskur:

http://jensgud.blog.is/blog/jensgud/entry/965433

.

- Flugvélamódel:

http://jensgud.blog.is/blog/jensgud/entry/955702

.

- Miðaldra maður:

http://jensgud.blog.is/blog/jensgud/entry/944608

.

- Leyndarmál stráks:

http://jensgud.blog.is/blog/jensgud/entry/928198

.

- Ættleiðing:

http://jensgud.blog.is/blog/jensgud/entry/916687/

.

- Strákur með sög:

http://jensgud.blog.is/blog/jensgud/entry/903540

.

- Hundur:

http://jensgud.blog.is/blog/jensgud/entry/863130

.

- Boltabulla:

http://jensgud.blog.is/blog/jensgud/entry/718347

.

- Skokkari:

http://jensgud.blog.is/blog/jensgud/entry/606929

.

- Strákur skiptir um gír:

http://jensgud.blog.is/blog/jensgud/entry/538649

.

- Morðsaga:

http://jensgud.blog.is/blog/jensgud/entry/320299

.

- 27 ára:

http://jensgud.blog.is/blog/jensgud/entry/299380

.

- Um borð:

 http://jensgud.blog.is/blog/jensgud/entry/278812

.

- Matarboð í sveitinni:

http://jensgud.blog.is/blog/jensgud/entry/266411

.

- Í plötubúð:

http://jensgud.blog.is/blog/jensgud/entry/260037

Aldeilis frábær pönkhátíð

 

  Pönkhátíðin á Amsterdam í gær heppnaðist frábærlega vel í alla staði.  Lagaval var ekki alveg það sama og á pönkhátíðinni í fyrra og hitteðfyrra.   Nokkur lög voru hvíld í ár og mörgum lögum bætt við í staðinn.  Sú nýbreyttni var tekin upp að íslensk lög fengu að fljóta með.  Þau komu úr smiðju Fræbbblanna og Snillinganna.  Báðar hljómsveitirnar spiluðu ásamt fjölda hljóðfæraleikara og söngvara úr Taugadeildinni,  Vonbrigðum,  Svart-hvítum draumi,  Tappa tíkarrassi,  Silfurtónum og fleiri hljómsveitum sem ég man ekki eftir í augnablikinu.  

  Lögin með Fræbbblunum og Snillingunum styrktu dagskrána.  Gáfu henni meira vægi.  Þó fyrri pönkhátíðir hafi verið frábærar þá var gaman að heyra íslensk pönklög í bland við þau útlendu.

  Ólíkt fyrri pönkhátíðunum hófst þessi ekki á helstu dæmigerðu pönklögunum.  Fyrsta lagið var frá Television (sjá eftsta myndbandið.  Ég biðst velvirðingar á hvað lagið endar bratt.  Það er þó ekki mér að kenna).  Næstu lög voru frá The Stranglers,  Blondie (ath.  hljóðið dettur ekki inn fyrr en 20 sek. eru liðnar af myndbandinu) og The Jam.   

  Það kom vel út að byrja hljómleikana með þessum ekki-dæmigerðu pönklögum.  The Jam voru reyndar eins pönkaðir og mörg eðal pönksveitin þó músíkstíll Djammaranna félli undir hatt mod-rokks.  Stemmning pönkára áttunda áratugarins var þannig að pönkið var ekki rígbundið við dæmigerða pönkið.  Nýbylgjan var samheiti yfir þá músík sem stóð næst pjúra pönkinu og þetta var meira og minna sami hópurinn.  

  Fimmta lagið á hljómleikunum var þjóðsöngur pönksins,  White Riot með The Clash (afsakið vond hljómgæði í myndbandinu.  Stemmningin er bara svo góð að þetta er skemmtilegra en myndbönd með betra hljóði).  Því var fylgt eftir með  Bodies  frá Sex Pistols.  Skrítið ef ég man lagaröðina svona vel.  Gott ef sjöunda lagið var ekki frá Stiff Little Fingers.  Heildarlista yfir upprunaflytjendur laganna má sjá á:   www.jensgud.blog.is/blog/jensgud/entry/1035319/

  Það er ástæðulaust að tíunda frammistöðu hvers flytjanda á pönkhátíðinni.  Þeir stóðu sig allir eins og best var á kosið.  Ég hef einstaklega gaman af að heyra hinn dagfarsprúða sagnfræðing Árna Daníel (Q4U,  Snillingarnir) öskra af öllum lífs og sálar kröftum.   Valli er sömuleiðis bráðskemmtilegur og kröftugur söngvari.  Þá var mikill fengur af innleggi bassaleikarans Jakobs Smára Magnússonar (Tappi tíkarrass,  Das Kapital) og trommusnillingsins Birgis Baldurssonar (Svar-hvítur draumur).  Þeir voru nýir í hópi flytjanda,  eins og fleiri.  

  Hafi allir sem fram komu á pönkhátíðinni hinar bestu þakkir fyrir frábæra skemmtun.  Ég er strax farinn að hlakka til pönkhátíðarinnar 2011.

 

Kvikmyndarumsögn

 - Ttitill:  Kóngavegur

 - Höfundur og leikstjóri:  Valdís Óskarsdóttir

 - Leikarar:  Gísli Örn Garðarsson,  Daniel Brühl,  Ingvar E. Sigurðsson,  Kristbjörg Kjeld,  Nanna Kristín Magnúsdóttir,  Ólafur Darri Ólafsson,  Ólafur Egilssn...

 - Einkunn:  ** (af 5)

  Fyrst er þess að geta að ferilsskrá Valdísar Óskarsdóttur er glæsileg.  Valdís er "klippari" á heimsmælikvarða.  Kvikmynd hennar  Sveitabrúðkaup  er fín.  Þannig mætti áfram telja.  Kvikmyndin  Kóngavegur gengur hinsvegar ekki alveg upp.  Hún er ósannfærandi.  Stemmningu úr hjólahýsahverfi í suðurríkjum Bandaríkja Norður-Ameríku er skellt hrárri niður í útjarðar Kópavogs.  Íbúarnir eru ýmist eða allt í senn nautheimskir,  snarklikkaðir,  tilfinningabrenglaðir,  fullir,  dópaðir og illa vankaðir.  Fjölskyldutengsl eru losaraleg í meira lagi og brengluð.

  Gallinn er sá að heilt samfélag hjólhýsapakks af því tagi sem í Bandaríkjunum kallast "white trash" er ósannfærandi í íslensku umhverfi.  Þetta gengur jafn illa upp og ef eskimóasamfélagi með snjóhúsum og sleðahundum væri plantað á sólarströndu á Spáni.  

  Það má samt alveg brosa að sumum senum.  Jafnvel skella upp úr.  Þetta er,  jú,  gamanmynd.  Og sitthvað ber til tíðinda.  Sumt óvænt.  Það er engin lognmolla.  Músíkin er líka ljómandi:  Lay Low,  Utangarðsmenn,  Ham,  Þeysarar,  Björk...

Rokkhátíð ársins

  Það verður brjálað stuð á Kaffi Amsterdam í kvöld.  Um þrjátíu manna hópur úr frumherjadeild íslensku pönksenunnar mun rifja upp helstu pönksöngva frá seinni hluta áttunda áratugarins og þar sem næst.  Bæði erlenda og íslenska.  Meðal þeirra sem spila og syngja eru liðsmenn Fræbblanna,  Q4U,  Tappa tíkarrass,  Svart-hvíts draums,  Taugadeildarinnar,  Das Kapital,  Vonbrigða o.fl. 

  58 lög verða afgreidd úr smiðju eftirtalinna:

Sex Pistols
Ramones
Clash
Jam
Stranglers
Stiff Little Fingers
Blondie
Elvis Costello
Undertones
Buzzcocks
Damned
Television
Sham 69
PiL
Ruts
Specials
Saints
UK Subs
Magazine
Fræbbblarnir
Snillingarnir

  Fjörið hefst klukkan 23.00 (27. mars) og stendur til 2.35 (28. mars).  Þetta er í þriðja skipti á jafn mörgum árum sem gullaldarár pönksins eru rifjuð upp á þennan hátt.  Það hefur verið geðveikt gaman á þessum pönkhátíðum.  Allt stefnir í að þessi verði toppurinn.

  Lögin á myndböndunum sem hér fylgja verða flutt á pönkhátíðinni.  Grunar mig.

Sprengja á bókamarkaði

  Í dag kom út bókin  Ekki lita út fyrir  eftir Evu Hauksdóttur og Ingólf Júlíusson.  Eva er þekkt sem Eva norn.  Sumir telja að þá nafngift megi rekja til nornabúðar sem hún rak fram í miðja búsáhaldabyltingu.  Eva var einmitt áberandi í búsáhaldabyltingunni.  Ingólfur Júlíusson er þekktastur sem gítarleikari pönksveitarinnar Q4U.  Hann er líka kunnur sem ljósmyndari hinna ýmsu dagblaða og tímarita og höfundur margra heimsfrægra músíkmyndbanda.

  Bókin  Ekki lita út fyrir  mun koma margri settlegri manneskjunni til að hrökkva við.  Jafnvel illilega.  Meira segi ég ekki.  Nema að Eva ætlar ekki að fjölmenna með mér í feministafélag Sjálfstæðisflokksins. 

Hér fyrir neðan er eitt af músíkmyndböndunum hans Ingólf Júlíussonar:

Skemmtileg úttekt á landsþingi Frjálsynda flokksins

  Sú ágæta,  frábæra og góða kona,  fyrrum rokkstjarna,  Ásthildur Cesil Þórðardóttir,  birti á bloggsíðu sinni ljósmyndir og texta um landsþing Frjálslynda flokksins.  Það var haldið á Hótel Cabin um síðustu helgi.  Ásthildur er hugsjónamanneskja fram í fingurgóma og blogg hennar eru gullmolar á gullmola ofan.  Ljósmyndir frá Ísafirði í hæsta gæðaflokki og hugleiðingar sem vekja til umhugsunar.  Hér er ljósmyndir hennar og frásögn af landsþingi Frjálslynda flokksins um helgina:   

http://asthildurcesil.blog.is/blog/asthildurcesil/entry/1033802/

Broslegar blaðaauglýsingar

  Það er gaman að skoða gamlar auglýsingar.  Þær eru samt ekkert svo gamlar þessar.  En tíðarandinn hefur breyst.  Heldur betur.  Þess vegna eru þessar auglýsingar grátbroslegar.  Hér fyrir ofan er verið að auglýsa nýjan skrúftappa á tómatsósuflösku.  Svo auðvelt er að rjúfa innsigli tappans að í auglýsingatextanum segir að jafnvel kona geti opnað flöskuna.

   Svona fer fyrir eiginkonum sem standa sig ekki í því að bjóða upp á ferskasta kaffið á markaðnum.

   "Kokkurinn gerir allt nema baka.  Konur sjá um það." 

   Þetta er smá orðaleikur.  Matvinnsluvélin heitir "Kokkur" (Chef).

  "Það er notalegt að hafa konu í húsinu."

  "Því harðar sem konan leggur að sér þeim mun krúttlegri er hún."

  Hér er verið að auglýsa örvandi vítamínpillur.

Ónákvæm fréttamennska

  Mér barst ábending um vafasama frétt um mig á netsíðu sem heitir sannleikur.com.  Þar er ég sagður vera forsprakki hryðjuverkahóps Moggabloggara.  Ég hef grun um að þarna sé farið rangt með.  Einhver hafi misskilið eitthvað eða sögusagnir farið úr böndunum.  Þetta er hið dularfyllsta.  Sjá:  http://sannleikurinn.com/heim/node/614 

Magnús Geir dreymdi fyrir eldgosinu

  6. mars dreymdi Magnús Geir Guðmundsson eftirfarandi draum og skráði á Fésbókina.  Ég var eldsnöggur að ráða drauminn: 

Magnús Geir Guðmundsson Dreymdi merkilegan draum í nótt. Eina af Fésvinkonum mínum, stutthærða fannst mér. m.a. sátum við saman í bíl, hún í ökumannssætinu og ég fyrir aftan og strauk ég háls hennar létt! Man annað ekki eins vel. Hvað ætli þetta merki?  6. mars kl. 15:25

Jens Gud

Þetta er augljós fyrirboði um eldgos.  6. mars kl.  23:26

.

.

.

Vaxandi hraunrennsli

Vel heppnað landsþing Frjálslynda flokksins

  Um hundrað manns sóttu vel heppnað landsþing Frjálslynda flokksins um helgina.  Guðjón Arnar Kristjánsson gaf ekki kost á sér til endurkjörs.  Í hans stað var Sigurjón Þórðarson,  fyrrverandi alþingismaður,  kjörinn formaður.  Sigurjón er Hegranesgoði,  formaður Ungmennasambands Skagafjarðar,  sundmeistari Skagafjarðar,  landsmótskóngur í sjósundi,  framkvæmdastjóri Heilbrigðiseftirlits Norðurlands,  líffræðingur,  nemi í stjórnsýslufræðum og þannig mætti lengi áfram telja.

  Þetta eru tíðindi.  Þetta er í fyrsta skipti í heiminum sem formaður stjórnmálaflokks í heiminum er goði og sundmeistari Skagafjarðar.

  Spenna ríkti um kosningu varaformanns.  Sitjandi varaformaður,  Kolbrún Stefánsdóttir,  gaf kost á sér til endurkjörs.  Ásta Hafberg gaf einnig kost á sér.  Leikar fóru þannig að Ásta var kosin nýr varaformaður Frjálslyndra. 

  Grétar Mar Jónsson,  fyrrverandi alþingismaður,  var kjörinn ritari. 

  Guðjón Arnar Kristjánsson var kjörinn formaður fjármálaráðs.  Aðrir í fjármálaráð voru kjörnir Benedikt Heiðdal,  Björgvin Vídalín,  Grétar Pétur Geirsson og Pétur Guðmundsson (kallaður Sela-Pétur).

  Þessi voru kosin í miðstjórn

  Georg Eiður Arnarson

  Grétar Pétur Geirsson

  Guðmundur Hagalínsson

  Hafsteinn Þór Hafsteinsson

  Helga Þórðardóttir

  Jóhann Berg

  Jóhanna Ólafsdóttir

  Pétur Guðmundsson

  Ragnheiður Ólafsdóttir

  Rannveig Bjarnadóttir

  Valdís Steinarsdóttir

  Þorsteinn Bjarnason

  Varamenn í miðstjórn eru:  Rannveig Höskuldsdóttir,  Magnús Reynir Guðmundsson og Björgvin Vídalín.

  Afskaplega léttur og skemmtilegur andi ríkti á landsþinginu.  Gaman var að sjá þarna mætt fólk sem hafði hrökklast úr flokknum vegna ofríkis Kristins H.  Gunnarssonar og aðra sem yfirgáfu flokkinn með Jóni Magnússyni.  Tíðindi bárust af fleirum úr þessum hópum sem eru á leið í flokkinn á ný.  Það er bjartsýni og mikill baráttuhugur í fólki.  Og ástæða til.  Meðal annars sýndi könnun á vísir.is í vikunni að 30% landsmanna telja Frjálslynda flokkinn eiga bráðnauðsynlegt erindi í íslensk stjórnmál í dag.  Öll helstu baráttumál flokksins njóta að auki stuðnings meirihluta landsmanna.   

    

Maður giftist hænu

 

  Í nóvember giftist Japani nokkur við hátíðlega athöfn internetkonu úr Nintendo tölvuleiknum "Ást Plús".  Á dögunum giftist maður í Kóreu sæng með mynd af konu.  Mig minnir að Indverji hafi um svipað leyti einnig gifst kodda með mynd af konu.  Rétt í þessu var tæplega þrítugur kóreanskur maður að giftast hænu.  Við athöfnina var hænan klædd brúðarslöri.  Maðurinn tekur hænuna með sér hvert sem hann fer:  Á veitingahús,  í kvikmyndahús,  í tívolí og og svo framvegis.  Hænan situr í eigin sæti og á matsölustöðum fær hún að snæða af sínum diski og drekka úr sínu vatnsglasi. 

  Maðurinn heldur því fram að hænan sé jafn ástfangin af honum og hann af henni.   Hænan hefur ekki þrætt fyrir það.

  Hænurnar á ljósmyndinni hér fyrir ofan eru ógiftar.

Gríðarmikill áhugi á landsþingi

  Landsþing Frjálslynda flokksins verður haldið um helgina á Hótel Cabin í Reykjavík.  Það er spenna í loftinu.  Formaður síðustu 7 ára og þingmaður síðan 1999,  Guðjón Arnar Kristjánsson,  gefur ekki kost á til áframhaldandi formennsku en sækist eftir áframhaldandi setu í miðstjórn.  Sigurjón Þórðarson,  fyrrverandi alþingismaður.  hefur látið undan gífurlegum þrýstingi um að gefa kost á sér til formanns.  Svo virðist sem einhugur ríki um framboð Sigurjóns.

  Ásta Hafberg gefur kost á sér til varaformanns.  Grétar Mar,  fyrrverandi alþingismaður,  gefur einnig kost á sér til varaformanns.  Það er spurning hvað sitjandi varaformaður,  Kolbrún Stefánsdóttir,  gerir.

  Formaður fjármálaráðs,  Helgi Helgason,  gefur ekki kost á sér til endurkjörs. 

  Það er mikil stemmning fyrir landsþinginu.  Samkvæmt skoðanakönnun á www.visir.is telja um 30% Frjálslynda flokkinn eiga brýnt erindi í íslenskri pólitík í dag.  Helstu stefnumál flokksins njóta stuðnings meirihluta landsmanna.  Sjá: www.xf.is.   

  Á annað hundrað manns (101) sóttu landsþing Frjálslynda flokksins á Stykkishólmi fyrir ári.  Mér segir svo hugur að ennþá fleiri sæki landsþingið á Hótel Cabin.

Áríðandi að leiðrétta

  Í fréttum sjónvarpsins af nýjustu tíðindum frá bandarísku  Frægðarhöll rokksins  (Hall of Fame) var fullyrt að breska hljómsveitin The Hollies hefði verið nefnd í höfuðið á rokksöngvaranum Buddy Holly.  Þetta er ekki í fyrsta skipti sem ég heyri þessu haldið fram.  Á Wikipedíu er Graham Nash borinn fyrir þessari sögu.

  Hið rétta er að nafnið Hollies var upphaflega sótt í greinar af jólatrjám.  Þessar greinar eru hengdar upp hér og þar yfir jól á heimilum í Manchester á Englandi og víðar.  Það mætti þýða orðið  hollies  sem hátíðarskraut.  Kannski.  Eða eitthvað í þá áttina.

  Hitt má fylgja sögunni að liðsmenn The Hollies kunnu vel við rokk Buddys Hollys.  Eins og flestir aðrir sem tilheyrðu kynslóð bítlarokkara sjöunda áratugarins.  Vel má vera að Graham Nash hafi einhversstaðar sagt í hálfkæringi og galsa að nafn hljómsveitarinnar væri tilvísun í Buddy Holly.  En Graham Nash er þekktur lygari.   

  The Hollies voru aldrei sérlega graðir rokkarar.  En reyndu sitt besta samt stundum.  Jamaíski reggípopparinn Jimmy Cliff hefur heldur aldrei verið mikill rokkari.  Hann var vígður inn í  Frægðarhöllina  á sama tíma og The Hollies:

  Bandaríska hljómsveitin The Stooges var einnig vígð í  Frægðarhöllina.  Sú hljómsveit rokkar:

 

Sparnaðarráð

  Núna á þessum þrengingartímum er áríðandi að hafa ráð undir rifi hverju.  Eða svoleiðis.  Beita öllum ráðum sem hugsast getur til að ná fram ýtrasta sparnaði.  Sýna samstöðu og skiptast á sparnaðarráðum.  Hér er eitt sem getur sparað heimili þínu gífurlega háar upphæðir með tíð og tíma:

  Þegar þú átt leið í matvöruverslun er best að velja háannatíma.  Þú væflast eins og illa gerð tuska svo lítið ber á í nálægð við útgöngudyrnar.  Ekki líður á löngu þangað til kúnni gengur hjá og hendir í leiðinni kassakvittuninni.  Þá er lag.  Þú tekur kassakvittunina upp,  snarast inn í búð og verslar allt það sama og sá sem henti kvittuninni.  Góssinu stingurðu í góðan margnota innkaupapoka og þvælist með þetta út á leið.  Þá pípar þjófavarnarkerfið og starfsmaður kemur hlaupandi.  Þú sýnir honum kvittunina og biður hann um að fara yfir innihald pokans.  Allt stemmir eins og stafur á bók og þú ert beðin/n afsökunar á ónæðinu.

  Þetta sparnaðarráð er ekki frá mér komið og ég fordæmi það.  Hér eru fleiri sparnaðarráð:

http://jensgud.blog.is/blog/jensgud/entry/665336

http://jensgud.blog.is/blog/jensgud/entry/640833

http://jensgud.blog.is/blog/jensgud/entry/530712

http://jensgud.blog.is/blog/jensgud/entry/537968

http://jensgud.blog.is/blog/jensgud/entry/501251

http://jensgud.blog.is/blog/jensgud/entry/686753

 

Dregið úr vægi verðtryggingar

Grallaragangur á Fésbók

  Í gær barst mér njósn af furðulegri síðu á Fésbók.  Síðan ber yfirskriftina  "Nei,  nú hringi ég í Jens".  Í  "haus"  hennar er ljósmynd af mér.  Sú sama og hér á þessari bloggsíðu.  Í skilaboðakerfi síðunnar fylgir myndin jafnframt skilaboðum frá þeim sem halda um stjórnvöl síðunnar:  http://www.facebook.com/#!/pages/Nei-nu-hringi-eg-i-Jens/287639844796?ref=nf .

  Síðan er mér algjörlega óviðkomandi.  Engu síður hef ég gaman af.  Ekki síst vegna þess að nokkrum klukkutímum eftir stofnun síðunnar voru skráðir aðdáendur hennar orðnir yfir 2300.  Sjálfur er ég ekki með nema rúmlega 1300 skráða Fésbókarvini sem hafa safnast á meira en hálfu ári.  Þannig að þetta er allt hið undarlegasta dæmi.

  Kann einhver hér á það hvernig hægt er að finna út hver stofnar svona síðu?

 

Sigurjón Þórðarson gefur kost á sér til formennsku í Frjálslynda flokknum

 

  Frá því að Guðjón Arnar Kristjánsson,  núverandi formaður Frjálslynda flokksins,  upplýsti að hann ætli ekki að gefa kost á sér til endurkjörs hefur verið gríðarlegur þrýstingur á Sigurjón Þórðarson,  fyrrum alþingismann,  að bjóða sig fram til formennsku.  Hann hefur nú hlýtt kallinu.  Hér má sjá viðtal í Feyki í tilefni þessa:  http://www.feykir.is/archives/21001

  Sigurjón er vinsæll og virtur utan sem innan Frjálslynda flokksins.  Flokkinn vantaði aðeins herslumun á að halda sjó í síðustu alþingiskosningum,  eftir að tveir þingmenn höfðu yfirgefið hann,  Kristinn H.  Gunnarsson,  sem gekk í Framsóknarflokkinn,  og Jón Magnússon,  sem fór í Sjálfstæðisflokkinn.

  Frjálslyndi flokkurinn á fulltrúa í sveitastjórnum og er til alls líklegur í sveitastjórnarkosningunum í vor. 

Sigurjón í formannskjör

Hvenær byrja menn að neyta fíkniefna?

  Ég veit ekki af hverju síðustu færslur mínar fjalla um eiturlyf.  Kannski er undirmeðvitundin að búa mig undir að verða dópisti.  Eða þá að þetta er tilviljun.  Í Morgunblaðinu er frétt af breska píkupopparanum leiðinlega,  Robbie Williams.  Þar er sagt að hann hafi byrjað að neyta fíkniefna 1993.  Jafnframt er upplýst að áður en hann fór að neyta fíkniefna hafi hann verið í e-pillunni, spítti og sýru. 

  Einhverra hluta vegna rifjar þetta upp dómsorð í líkamsárásarmáli.  Þar sagði frá tveimur mönnum sem hittust á götu í Vestmannaeyjum.  Eftir rifrildi og hótanir fóru þeir að kýla og sparka í hvorn annan.  Síðan stóð í dómnum:  "Þessu næst fóru þeir að slást". 

Sólbaðslögga í uppsiglingu

  Það kitlar margan embættismanninn að setja lög til að siða skrílinn.  Stjórnsamur embættismaður grípur hvert tækifæri sem gefst til að stýra hegðun óþroskaðri einstaklinga.  Oft er ákafinn slíkur að til vandræða horfir.  Dæmi um það er þegar mikil "móðursýki" greip um sig er tveir franskir vísindamenn skrifuðu grein í fagtímarit um tilraun sem þeir gerðu á rottum.  Létu þær svamla vikum saman í tilteknum efnum sem finnast í sólvarnarkremum.  Með tíð og tíma greindu þeir krabbameinsmyndun í rottunum.

  Heilbrigðisyfirvöld,  einkum á Norðurlöndunum,  brugðust skjótt við og fóru í gífurlega herferð gegn sólkremum.  Svo rammt kvað að þessu að í Danmörku voru sólvarnarkrem tekin úr sölu.  Frönsku vísindamönnunum var brugðið.  Þetta var kolvitlaus túlkun á rannsókn þeirra.  Þeir sendu frá sér yfirlýsingu þar sem fólk var hvatt til að nota sólvarnarkrem.  Skammturinn af sólvarnarefnunum sem rotturnar svömluðu í var margmilljónfaldur á við það sem manneskja notar þegar hún ber á sig sólvarnarkrem.  Rann þá móður af embættismönnum og sólkrem voru aftur tekin í sölu. 

  Þetta var fyrir röskum áratug.  Aldarfjórðungi áður greip um sig svipuð taugaveiklun varðandi gosdrykkinn Fresca.  Hann var sagður baneitraður.  Þegar betur var að gáð þurfti að drekka daglega 37 flöskur af honum áður en ástæða var til að hafa áhyggjur.

  Nú eru embættismenn í kasti vegna sólbaða.  Hugmyndir eru uppi um að ungt fólk verði að framvísa skírteini sem sannar að það sé 18 ára eða eldra til að fá að liggja í sólbaði.  Það þarf að stofna sérstaka sveit sólbaðslögreglu til að fylgja eftir fyrirhuguðum lögum um að einungis fullorðnir einstaklingar megi njóta góðs af sólböðum.  Myndin hér fyrir ofan sýnir forvörn af þessu tagi.  Þarna var ekki víst að einstaklingur hefði náð 18 ára aldri er hann reyndi að fá sólarljós á kroppinn.

  Staðreyndin er sú að sólarljósið er forsenda lífs á jörðinni.  Áhrif sólarljóssins er okkur á Norðurhjara augljós.  Þegar sól hækkar á lofti að vori breytir náttúran um svip.  Tré laufgast,  blóm spretta út,  skordýr lifna við og mannlífið tekur á sig líflegan blæ.

  Sólarljósið er bráðhollt.  Sólbökuð húð framleiðir D-vítamín sem kemur af stað upptöku á kalki og styrkir bein,  tennur,  hár og húð.  Ljósið vinnur gegn ýmsum húðsjúkdómum,  svo sem exemi,  sóríasis,  bólum o.s.frv.  Ljósið framkallar gleðiboðefni í heilanum og vinnur þannig gegn þunglyndi.  Ljósið er einnig kynörvandi og dregur verulega úr líkum á krabbameini af flestu tagi.  Sólböð eru holl.  Virkilega holl.

  Hitt er annað mál að hægt er að ofbjóða sér með sólarljósi.  Alveg eins og með ofþambi á lýsi og inntöku á ýmsum vítamínum.  Það er önnur saga.

  

   

         

D-vítamín mikilvægara en talið var

Eiturlyfjasalar grunaðir um ólöglega starfshætti

  Starfsmenn SÁÁ fylgjast glöggt með þróun verðlags á vinsælustu eiturlyfjum.  Verðið er samviskusamlega uppfært á heimasíðu félagsins.  Verðsveiflurnar eru hinar fróðlegustu og vekja spurningar.  Þannig kemur fram að verð á amfetamíni var 6200 kr.  í desember en hefur lækkað niður í 5470 kr.  Grasið hefur lækkað úr 4800 kr.  í 3710.  Kókaínið úr 18.300 í 12.420.  Þannig mætti áfram telja. 

  Athygli vekur að þróun hefur orðið sú að verð á eiturlyfjum er orðið nákvæmara.  Það er ekki lengur "rúnnað" við 100 kallinn heldur 10 kalla.  Bankastarfsmenn hafa orðið varir við þetta.  Eiturlyfjasalarnir koma í hópum í bankana til að skipta 1000 köllum í 10 kalla.  Á skemmtistöðum má jafnframt þekkja eiturlyfjasala úr vegna þess að vasar þeirra eru bólgnir af 10 köllum.

  Nákvæm verðlagning bendir sterklega til þess að eiturlyfjasalar stundi verðsamráð.  Það er stranglega bannað.  Samkeppnisstofnun verður að taka snöfurlega á því.  Þangað til Samkeppnisstofnun hefur fellt dóm yfir eiturlyfjasölum og sektað þá fyrir ólöglegt verðsamráð er brýnt fyrir eiturlyfjakaupendur að fá nótu fyrir öllum kaupum.  Svo getur farið að þeir eigi skaðabótarétt gagnvart eiturlyfjasölunum.  Verðlækkun á eiturlyfjum væri hugsanlega mun meiri ef ekki væri um verðsamráð að ræða.  Einkum er líklegt að verð á kókaíni væri ennþá lægra vegna þess að flestir útrásarvillingarnir og fylgihnettir þeirra eru fluttir til útlanda.  Eftirspurn er því lítil miðað við það sem áður var.

     

Handtekinn á leið heim úr fangelsinu

Rokkveisla á laugardaginn

Hljómsveitakeppnin  Wacken Metal Battle  verður haldin á Sódóma Reykjavík
næsta laugardag (13. mars).  Sjö íslenskar hljómsveitir berjast um heiðurinn af því að
komast út til að spila á  Wacken Open Air  í Þýskalandi og taka þátt í lokakeppni 
Wacken Metal Battle  þar. Til mikils er að vinna, því sigurhljómsveitin
fær plötusamning, heilan haug af hljóðfærum og græjum og verður bókuð
til að koma fram ári síðar á hátíðinni sem eitt af númerum hennar.

Sigurhljómsveitin í undankeppninni er valin af dómnefnd, en hvorki meira
né minna en 6 erlendir aðilar, blaðamenn, umboðsmenn og tónleikahaldarar,
koma til landsins til að skipa 10 manna dómefnd, þar á meðal
yfirmaður keppninnar frá Þýskalandi.

Sveitirnar sem munu bítast um hnossið í ár eru svo sannarlega með því
besta sem landið hefur upp á að bjóða í þungarokkinu:

GONE POSTAL
CARPE NOCTEM
GRUESOME GLORY
WISTARIA
UNIVERSAL TRAGEDY
SEVERED CROTCH
ATRUM

Atrum byrjar og Gone Postal spila síðast.

Miðasalan er hafin á:

www.midi.is/tonleikar/1/5878/

  Einnig koma fram tvær gestasveitir, BENEATH og MOMENTUM. Beneath fór
með sigur af hólmi í íslensku keppninni í fyrra og Momentum eru að koma
fram í fyrsta sinn á þessu ári.

Húsið opnar 20:00 og fer fyrsta sveit á svið 20:45
Miðaverð er 1.300 kr.

Það er því sannkölluð þungarokksveisla hér á ferðinni og tvímælalaust
einn af stærstu viðburðunum í þessum geira í ár, enda verður Sódóma
færður í sérstakan búning, leigt inn auka lýsingarbúnaður og allt gert
til að viðburðurinn verði sem flottastur.