Til hamingju með afmælið, Sæunn!

  Kjarnakonan knáa,  Sæja pæja,  á afmæli í dag.  Sæunn er húsfreyja á Uppsölum í Svarfaðardal og formaður Aflsins,  systursamtaka Stígamóta á Akureyri.  Næsta víst er að mikið er um vegleg veisluhöld í dag og næstu daga á Uppsölum og nágrannabæjum í tilefni dagsins.  Hvað Sæunn er nákvæmlega gömul veit enginn.  Það breytist ár frá ári og er allt í rugli.  En eitthvað er hún að skríða upp fimmtugsaldurinn.  Á myndinni hér fyrir ofan er Sæunn lengst til vinstri með vinkonum sínum hjá Aflinu,  www.aflidak.is.

  Til hamingju með afmælið,  Sæunn systir!

Aulaklúbburinn

   Ég er ekki höfundur þessa nafns.  Ég er ekki heldur að skrifa um alþingismenn heldur þann hóp poppstjarna sem hefur fallið frá 27 ára.  Hér er listi yfir tvo tugi slíkra.  Flestar eiga sameiginlegt að hafa neytt vímuefna og áfengis í óhófi um langa tíð.  Athygli var beint rækilega að 27 ára aldursári fráfallandi poppstjarna þegar nokkrar af skærustu poppstjörnum heims gáfu upp öndina á tímabilinu 3. júlí 1969 til 3.  júlí 1971.  Allar voru þær 27 ára.  Einkum þótti þetta hrópandi þegar Jimi Hendrix og Janis Joplin létust með 16 daga millibili og Jim Morrison 9 mánuðum síðar. Eftir það var farið að tala um að poppstjörnur væru komnar yfir dauðaþröskuldinn þegar þær náðu 28. aldursári.  

  Í kjölfar fráfalls Jims Morrisons fóru í gang miklar vangaveltur um að Robert Johnson,  Brian Jones,  Jimi Hendrix,  Janis Joplin og Jim báru öll upphafsstafinn J í nafni sínu.  Alan Wilson var ekki talinn með af því að þau hin voru miklu frægari súperstjörnur.  Allkskonar talnarugludallar,  stjörnuglópar og álíka kjaftæðispakk velti sér upp úr þessu með sameiginlega upphafsstafinn.  En svo hélt þeim áfram að fjölga poppstjörnunum sem dóu 27 ára en ekkert bólaði á fleiri nöfnum með upphafsstafnum J.  Síðan hefur dregið úr kenningum er leggja út af honum.

  Til að öllu sé til haga haldið skal þess getið að sumir á listanum hér fyrir neðan voru búnir að drekka eða dópa sig út úr hljómsveitinunum er þeir létust..

  Erlend rokkblöð hafa meðvitað unnið gegn því að upphefja þennan hóp poppstjarna,  sem slíkan,  og kallað hann aulaklúbbinn (the stupid club).  Bubbi og Rúnar sungu um aulaklúbbinn í samnefndu lagi á plötu með GCD.  En listinn er merkilegur:  

- Robert Johnson,  einn áhrifamesti gítarleikari blússögunnar,  dó 16.  ágúst 1938.  Þessi bandaríski meistari hafði áður selt djöflinum sálu sína.  En það var unnusta hans sem byrlaði honum eitur.  Það var ólund í henni vegna framhjáhald hans. 

 - Brian Jones,  gítarleikari ensku blúsrokksveitarinnar The Rolling Stones,  fannst látinn á sundlaugarbotni 3.  júlí 1969.  Hann hafði verið meira og minna út úr heimi vegna vímuefnaneyslu undanfarin ár.  Sögur um að Brian hafi verið myrtur hafa verið á kreiki.

.

 - Alan Wilson,  söngvari bandarísku blússveitarinnar Canned Heat,  dó 3.  september 1970.  Dauðaorsök var skráð ofneysla eiturlyfja.

.

.

 - Jimi Hendrix,  bandarískur blúsgítarleikari og söngvari,  kafnaði í eigin ælu 18.  september 1970.  Í maga hans fundust leyfar af 9 sterkum svefntöflum og mikið áfengi. 

.

.

 - Janis Joplin,  bandarísk blússöngkona,  dó úr ofneyslu heróíns og áfengis 4. október 1970.  Það síðasta sem hún gerði á lífi var að pósta til Johns Lennons afmæliskveðju á segulbandsspólu..

.

 - Jim Morrison,  söngvari bandarísku blúsrokksveitarinnar The Doors,  lést 3.  júlí 1971 í baðkari íbúðar sinnar í París.  Dauðaorsök:  Ofneysla eiturlyfja.

.

 - Ron McKernan,  hljómborðsleikari bandarísku hippahljómsveitarinnar The Grateful Dead,  dó úr innvortis blæðingum eftir langvarandi ofdrykkju 8.  mars 1973.

.

 - David Alexander,  bassaleikari bandarísku rokksveitarinnar (Iggy Pop &) The Stooges,  dó úr lungnabólgu 10. febrúar 1975 í kjölfar langvarandi ofdrykkju.  Það var búið að sparka honum úr hljómsveitinni vegna drykkjuvandamála hans áður.

.

 - Pete Ham,  gítarleikari ensku bítlahljómsveitarinnar Badfinger,  hengdi sig 24. apríl 1975.

.

- Gary Thain,  úr ensku þungarokkssveitinni Uriah Heep,  dó úr of stórum heróínskammti 15. desember 1975.

.

 - Chris Bell,  forsprakki power poppsveitarinnar Big Star,  lést í bílslysi 27. desember 1978,  eftir margra ára heróínneyslu og þunglyndi.

.

 - D Boon,  söngvari og gítarleikari bandaríska pönktríósins Minutemen,  lést í bílslysi 22. desember 1985.

.

 - Pete de Freitas,  trommari ensku nýbylgjusveitarinnar Echo & the Bunnymen, lést í mótorhjólaslysi 14. júní 1989.

.

 - Mia Zapata,  söngkonu bandarísku pönksveitarinnar The Gits.  var nauðgað og hún myrt 7. júlí 1993.  Talið er að henni hafi verið fórnað í einhversskonar trúarathöfn.  Þegar líkið fannst var því stillt upp á sama hátt og Jesú á krossinum er jafnan sýndur.

.

 - Kurt Cobain,  söngvari og gítarleikari bandarísku gruggsveitarinnar Nirvana,  skaut sig í höfuðið 8. apríl 1994.

.

 - Kristen Pfaff,  úr bandarísku riot grrrl hljómsveitinni Hole,  dó úr of stórum heróínskammti 16. júní 1994.  Forsprakki Hole var eiginkona Kurts Cobains,  Courtney Love.

.

 - Richey Edwards,  gítarleikari og textahfundur bresku nýrokksveitarinnar Manic Street Preachers hvarf 27 ára og hefur aldrei fundist.  Hann hafði átt við þunglyndi að stríða.  Bíll hans fannst við The Severn Bridge.  Talið er að hann hafi stokkið fram af brúnni.  Hann hefur opinberlega verið skráður látinn.

.

 - Jeremy Michael Ward,  hljóðeffekta- og söngstjóri bandarísku prog-hljómsveitarinnar Mars Wolta,  dó úr ofneyslu heróíns 25. maí 2003.

.

 - Bryan Ottóson,  gítarleikari bandarísku þungarokkssveitarinnar American Head Charge,  fannst látinn í hljómsveitarrútunni 19. apríl 2005.  Hann hafði látíð ofan í sig óheppilega blöndu af pensilíni,  verkjalyfjum og áfengi.

.

  Munið þið eftir fleirum?

.

  Til að fegra aulaklúbbinn ekki um of læt ég ekki fylgja með myndband af neinum úr klúbbnum heldur flutning bandaríska söngvarans Becks á lagi eftir Robert Johnson. 

 

Falleg smásaga af ættleiðingu

  Jón Jónsson er kominn á fimmtugsaldur.  Hann hefur aldrei verið við kvenmann kenndur.  Hann hefur ekki mátt vera að því.  Hann hefur verið upptekinn við að verða ríkur.  Til þess hefur hann prófað margar leiðir:  Sett upp sólbaðsstofu og bónstöð,  opnað gervinaglastofu og tekið þátt í öllum píramídasölukerfum sem hann hefur frétt af:  New skin,  Herbalife,  Living Forever Products,  Topperware,  Rainbow ryksugur,  gullmyntusölu,  Noni drykk,  keðjubréf af ýmsu tagi og svo framvegis. 

. 

  Frá unglingsárum hefur Jón alltaf verið þumlungi frá því að verða milljarðamæringur.  Árlega hefur hann sagt mörgum sinnum við kunningjana:  "Á sama degi að ári verð ég sestur á helgan stein.  Hættur að vinna við annað en fylgjast með milljörðum streyma inn á bankabækur mínar."  Í kjölfar hefur fylgt glæsileg útlistun á því hvernig dæmin vinda upp á sig með þessum árangri.

.

  2007 fór Jón út í bílapartasölu.  Einn daginn fékk bílapartasalan upphringingu frá Færeyjum.  Þar var Íslendingur að leita að peru í stefnuljós á gamlan bíl.  Jón átti það og sendi Íslendingnum.  Eftir þetta kallaði Jón sig útrásarvíking.  Veldi hans var farið að teygja anga sína til útlanda.

.

  Í vetur var ættleiðingalögum á Íslandi breytt.  Nú mega einstaklingar ættleiða börn.  Þá helltist yfir Jón löngun til að verða foreldri.  Hann sótti í snarhasti um að fá að ættleiða dreng.  Aldur skipti engu máli.  Kostnaðurinn var um hálf milljón króna.  Jón var ekki í vandræðum með að reiða hana fram.  Hann hringdi í pabba sinn og náði að slá hann um upphæðina.

.

  Nokkru síðar fékk Jón Jónsson tvö bréf frá ættleiðingastofu.  Hann var boðaður á fund til að ganga frá málum.

  Jón mætti tímalega.  Honum var vísað inn til ábúðamikils embættismanns.  Sá tilkynnti að nú væri allt klappað og klárt og aðeins þyrfti að undirrita pappíra og Jón yrði þaðan í frá einstætt foreldri.  Barnið væri ekki mætt en til að nota tímann væri ekki eftir neinu að bíða.  Bara vinda sér í undirskriftir.

.

  Embættismaðurinn hamaðist í tölvunni sinni og sagði með þunga:  "Þetta er drengur sem heitir Jón Jónsson,  eins og þú.  Það er skemmtileg tilviljun og einfaldar öll mál.  Hann er fæddur...ja,  bíðum nú við.  Hann virðist vera jafnaldri þinn.  Ég ætla aðeins að fletta upp á kennitölu þinni.  Já,  hér er hún.  Þetta er skrítið.  Þetta er sama kennitala.  Þú ert að ættleiða sjálfan þig."

  Jóni var brugðið:  "Ha?  Er ég að ættleiða sjálfan mig?  Hvernig má það vera?"

  Embættismaðurinn var líka hissa en sagði jafn ábúðafullur og áður:  "Þú hefur greinilega fyllt út umsóknina svona.  Þú hefur ættleitt sjálfan þig."

.

  Jón rifjaði upp í huga sér að hann hafði ekki skilið upp né niður í umsókninni.  Það hafði alltaf gefist vel að skrifa bara eitthvað á svona plögg. 

  Embættismaðurinn varð ennþá ábúðafyllri en áður og sagði:  "Þú skráðir þig sem ættleiðanda sjálfs þíns.  það erindi hefur verið samþykkt.  Pappírar þínir eru í lagi og uppfylla öll skilyrði."

  Jón maldaði í móinn:  "Ég hef fyllt eitthvað vitlaust út.  Það var ekki ætlun að ættleiða sjálfan mig."  Svo bætti hann við ráðagóður:  "Ég geri bara nýja umsókn."

  Embættismaðurinn sýndi lit og var fullur samúðar:  "Já,  þú getur aftur sótt um eftir 7 ár.  Þá höfum við fylgst með hvernig tekst til með þessa ættleiðingu.  En drollum ekki yfir þessu.  Við þurfum að skrifa hér undir örfáa pappíra til að ganga að fullu frá ættleiðingunni. "

.

   Þeir hófust þegar handa.  Þegar öllum formheitum var lokið gekk Jón Jónsson ringlaður út í góða veðrið.  Hann gekk í þungum þönkum heim á leið.  Hann gleymdi að hann hafði komið á bílnum sínum.

  Jón fékk skyndilega kvíðakast.  Hann var búinn að stefna helstu ættingjum og vinum til hátíðarkvöldverðar til að fagna ættleiðingunni.  Gestir eiga að mæta klukkan 20.00 á Hótel Nordica.  Í engu er sparað í mat og drykk.  Hljómsveit mun spila dinnermúsík á meðan borðhald stendur yfir og dansmúsík eftir það.

  Hvernig á Jón Jónsson að útskýra að hann hafi ættleitt sjálfan sig?  Þetta verður vandræðalegt.  Allt í einu fær Jón góða hugmynd.  Hann klappar sér blíðlega á aðra kinnina og segir:  "Sonur sæll.  Ég læt þig um að útskýra þetta fyrir fólkinu.  Ef þú klúðrar einhverju er það þér sjálfum til minnkunar en ekki mér."

.

  Við þessa góðu lausn verður Jón Jónsson svo glaður að hann rífur af sér harmónikutösku sem hann hefur burðast með á bakinu undanfarnar vikur.  Töskuna setur hann á jörðina og tekur upp úr henni forláta harmóniku.  Hann festir 5 metra langa keðju í töskuna og hinn enda keðjunnar krækir hann í beltið sitt.  Því næst lítur hann eldsnöggt í kringum sig.  Hann kemur auga á tvo fjúkandi innkaupapoka.  Annar er merktur Bónusi og hinn Nóatúni.  Jón hnýtir pokana með jöfnu millibili á keðjuna.  Honum þykir litríkir pokarnir laða fram hátíðastemmningu. 

.

  Jón festir í snatri á sig harmónikuna og gengur hröðum skrefum með töskuna í eftirdragi.  Hann spilar fjörugan slagara frá Utangarðsmönnum á harmónikuna.  Glaðleg músíkin kætir Jón.  Án þess að taka eftir því fer hann ósjálfrátt að syngja með.  Hann tekur heldur ekki eftir því að þegar hann þrammar framhjá elliheimilinu Grund þá renna vistmenn á hljóðið.  Þeir sleppa út á gangstétt og troðast í halarófu á eftir harmónikutöskunni.  Flestir með stafi eða í göngugrind.  Jón er horfinn inn í heim tónlistarinnar.  Hann tekur ekki eftir umhverfinu.  Fyrr en varir er hann farinn að syngja eins hátt og lungu og raddbönd leyfa.  Íbúar í næstu húsum reka höfuð út um glugga eða flykkjast út á svalir beggja vegna götunnar.  Allir taka hraustlega undir með Jóni um leið og þeir henda smákökum,  pennum og kjötbeinun í gamla fólkið af Grund.  Hverfið bergmálar í fjörlegum fjöldasöng:
  Þið munuð öll,  þið munuð öll, 

  þið munuð öll deyja!

  Þið munið stikna,  þið munið brenna!.

  Þið munuð stikna,  þið munuð brenna!

  Feður og mæður,  börn ykkar munu stikna...

.

.

.

--------------------------------------------------------------------

Fleiri örleikrit og smásögur:

- Matarboð í sveitinni

http://jensgud.blog.is/blog/jensgud/entry/266411

- Morðsaga

http://jensgud.blog.is/blog/jensgud/entry/320299

- Um borð

 http://jensgud.blog.is/blog/jensgud/entry/278812

- Í plötubúð

http://jensgud.blog.is/blog/jensgud/entry/260037

- Hundur

http://jensgud.blog.is/blog/jensgud/entry/863130

- 27 ára

http://jensgud.blog.is/blog/jensgud/entry/299380

- Strákur skiptir um gír

http://jensgud.blog.is/blog/jensgud/entry/538649

- Skokkari

http://jensgud.blog.is/blog/jensgud/entry/606929

- Boltabulla

http://jensgud.blog.is/blog/jensgud/entry/718347

- strákur með sög

http://jensgud.blog.is/blog/jensgud/entry/903540

 

Skúbb! Fyrrverandi þingmaður sigurvegari á Landsmóti UMFÍ

 

  Gífurlegur fjöldi er nú á Akureyri vegna Landsmóts UMFÍ.  Ég fylgist ekki með íþróttaviðburðum (ef hnefaleikar eru undanskildir ásamt strandblaki kvenna).  En meistarinn Magnús Geir Guðmundsson (www.meistarinn.blog.is) var svo elskulegur að senda mér skýrslu um hápunkta mótsins.  Fyrst  hann slær því ekki upp á sínu bloggi bregð ég við skjótt og skúbba hér:

  Keppt var í sjósundi yfir Eyjafjörð.  Af hátt í fjörtíu keppendum sigraði með glæsibrag Sigurjón Þórðarson formaður Ungmennafélags Skagafjarðar,  Hegranesgoði og fyrrverandi alþingismaður Frjálslynda flokksins.  Ég sló á þráðinn til Sigurjóns.  Hann var að vonum ánægður með árangurinn.  Sigurinn kom honum á óvart.  Þetta er í fyrsta skipti sem hann prófar sjósund. 

  Sigurjón var 29 mínútur að synda yfir fjörðinn en flestir aðrir um þrjú korter.  Vegalengdin var vel á annan kílómetra.  Sennilega tæpur hálfur annar.

Skúbb! Færeysk stórhátíð á Stokkseyri

  Dagana 31.  júlí,  1.  ágúst og 2.  ágúst næstkomandi verður haldin færeysk stórhátíð í Draugasetrinu á Stokkseyri.  Þar verður boðið upp á feitan pakka af fjölbreyttri færeyskri tónlist og færeyskum dönsum.  Fjörið hefst með dansleik klukkan 22.00 föstudaginn 31.  júlí.  Jens Marni  og félagar leika fyrir dansi.  Dansleikurinn verður brotinn upp með færeyskum dansi,  harmónikuspili og innslagi frá  Simme  og hljómsveit.  

  Þetta er í annað sinn á hálfri öld sem Simme skemmtir á Íslandi.  Í fyrra skiptið kom hann hingað 1959.  Þá naut hann gífurlegra vinsælda hérlendis með lögum sem margir muna vel eftir,  svo sem  Kenna tit Rasmus  og  Sunnukvöld í plantasjuni.

  Laugardaginn 1.  ágúst hefst dagskrá með fótboltakeppni Færeyjar-Ísland klukkan 15.00.  Klukkan 19.00 flytja fiðlusnillingurinn gullfallega  Agelika Nielsen,  píanóleikarinn Kristian Blak og hljómsveit dagskrána  Heygar og dreygar.  Klukkan 20.00 tekur Simme við.  21.00 flytja Hilmar Joesen,  Angelika og Kristian Blak dagskrána  Álvastakkur.  Hálftíma síðar hefst færeyskur dans þar sem kyrjaður verður söngurinn um  Ólaf Riddararós.  Klukkan 23.00 blása Eyðun & Terji til dansleiks.  Ég sá þá spila í Færeyjum fyrir nokkrum vikum.  Þá spilaði James Olsen með þeim á trommur og söng.  Meðal laga á dagskrá þeirra var   Talað við gluggann  eftir Bubba Morthens.     

  Dansleikur Eyðuns & Terjis verður brotinn upp með innslagi frá Simme,  harmónikuspili og færeyskum dönsum.  

  Dagskrá sunnudagsins 2.  ágúst hefst með helgistund í umsjón  Matine  klukkan 11.30.  Um tónlist sjá Angelika & Kristian Blak ásamt hljómsveit.  Klukkan 15.00 er söngdagskrá í höndum - eða raddböndum öllu heldur - Jens Marni,  Kims Hansen,  Terjis & Eyðuns og Simme.  Klukkan 16.00 er það færeyski dansinn  Dvörgamöy.  Við tekur klukkan 22.00 dansleikur með Kim Hansen og hljómsveit.  Eins og fyrri kvöld verður hann brotinn upp með innslögum frá Simme,  harmónikuspili og færeyskum dansi.

  Þetta er spennandi og vönduð dagskrá.  Ég hvet alla sem geta valdið vettlingi að láta þessa glæsilegu stórhátíð ekki framhjá sér fara.

  Ljósmyndin efst til vinstri er af Kristian Blak (www.kristianblak.com).  Honum til hægri handar er fiðlusnillingurinn Angelika Nielsen (http://www.facebook.com/people/Angelika-Nielsen/590996554).  Þriðja myndin er af Jens Marni (http://www.myspace.com/jensmarni). 

  Kíkið líka á:  http://www.simme-musikkhus.fo/main.html

  Mynd númer 4 er af Eyðunni & Terji.  Mynd númer 6 er af plötuumslagi hljómsveitar Angeliku,   Kvönn.  Mynd númer 7 er af plötuumslagi Kristian Blak og Eivarar,  Yggdrasil.

Mikilvægt að leiðrétta

  Dr.  Gunni er bráðskemmtilegur penni,  flottur tónlistarmaður og vel vakandi öflugur neytendafrömuður.  En enginn er alltaf fullkominn.  Bakþankar Fréttablaðsins í dag eru skrifaðir af Dr.  Gunna.  Þar veltir hann ýmsu fyrir sér og spyr margs.  Þar á meðal hvers vegna engin fiskbúð sé á Akureyri. 

  Þetta er villandi spurning.  Á Akureyri er að finna eina bestu fiskbúð landsins.  Hún heitir Heimur hafsins og er staðsett á Tryggvagötu 22,  við hliðina á Axels bakaríi.  Síminn er 578 6400.   Orðstír Heims hafsins nær langt út fyrir Eyjafjörð.  Matgæðingar úr Skagafirði og Þingeyjasýslu sækja stíft í þessa frábæru fiskbúð.

  Nú standa sumarfrí og hringferðir Íslendinga sem hæst.  Það er hið versta mál ef ferðamenn úr öðrum landshlutum keyra í gegnum Akureyri standandi í þeirri trú að þar sé engin fiskbúð.

  Heimur hafsins er í eigu Hallgríms Guðmundssonar,  fyrrum aðstoðarmanns Sigurjóns Þórðarsonar fyrrverandi alþingismanns,  og Huldar S.  Ringsted snyrtifræðings.  Þau heiðurshjón eru bæði harðlínu andstæðingar kvótakerfisins.

Kvikmyndaumsögn

 - Titill:  Brüno

 - Handrit/leikstjórn/aðalhlutverk:  Sacha Baron Cohen

 - Einkunn: ***1/2 (af 5)

  Enski leikarinn Sacha Baron Cohen varð fyrst þekktur í hlutverki rapparans Ali G í samnefndum sjónvarpsþáttum.  Bráðfyndnum sjónvarpsþáttum.  Í þeim tróð Cohen einnig upp sem sjónvarpsstjarna frá Kazakstan,  Borat, og samkynhneigð tískulögga,  Brüno,  frá Austurríki.

  Cohen gerði kvikmynd um Ali G.  Ekki alveg nógu góða.  Hann gerði aðra kvikmynd um Borat.  Sú var og er virkilega fyndin.  Og nú er það kvikmynd um Brüno.  Hún gefur Borat-myndinni ekkert eftir.

  Eins og í fyrri myndum er gert út á svipaða framsetningu og í myndum og sjónvarpsþáttum sem skilgreina má afbrigði af "Falinni myndavél".  Brüno er tilbúinn "karakter".  Hann á samskiptum við fólk sem veit ekki að þar er grínari á ferð að rugla í þeim.

  Ég hef séð mörg skemmtileg myndbönd með Brüno á youtube.com.  Þau eru fæst í kvikmyndinni.  Sum eru "out takes",  það er að segja urðu útundan við endanlega vinnslu á myndinni.  Sum eru kannski úr Ali G sjónvarpsþáttunum.

  Það myndi skemma fyrir þeim er eiga eftir að sjá myndina að segja frá fyndnu senunum sem þar koma fyrir.  Brandararnir byggja á því að koma á óvart.  Vegna kynningarmyndbandsins sem fylgir þessari bloggfærslu er þó óhætt að nefna þegar Brüno kemur fram í bandarískum sjónvarpsþætti með áhorfendum af afrískum uppruna.  Þar er komið inn á að Brüno hefur ættleitt blökkubarn.  Hann virðist leggja sig fram um að vera með "pólitíska rétthugsun" en gengur fram af áhorfendum með því að hafa aðra hugmynd um "pólitíska rétthugsun" en þeir. 

  Brüno er ekkert heilagt.  Hann reynir að stilla til friðar í Mið-Austurlöndum en þekkir ekki mun á "hummus" (kjúklingabaunamauk) og Hamash-samtökum Palestínumanna.  Sjálfur er Cohen gyðingur en hlífir gyðingum ekki í gríninu.

  Fræga fólkið er dregið sundur og saman í háði.  Líka tískubransinn,  bandaríski herinn og svo framvegis.  

  Kvikmyndin  Hangover  hefur verið auglýst sem fyndnasta mynd sumarsins.  Ég mæli með henni sem góðri skemmtun.  Kvikmyndin um Brüno er ennþá fyndnari.  Kíkið á báðar myndirnar.     

   

Sérkennileg þýðing hjá sjónvarpinu

  Um helgina var bandarísk kvikmynd sýnd í sjónvarpinu.  Myndin hét  Blue Collar Comedy Tour  eða eitthvað álíka.  Í henni sást og heyrðist til hóps grínara,  svokallaðra uppistandara.  Eins og slíkum er gjarnt í Bandaríkjum Norður-Ameríku voru margir brandarar á kostnað rauðhálsa (rednecks).  Það eru Hafnarfjarðarbrandarar Kanans. 

  Í íslenska skjátextanum voru rauðhálsarnir aldrei kallaðir annað en ruddar.  Ég er hugsi yfir þeirri þýðingu.  Hún er kannski ekki alveg út í hött að öllu leyti.  Kannski þarf maður bara að venjast henni.  Ég hef aldrei áður séð eða heyrt orðið "redneck" þýtt á þennan hátt.  Ef við þýðum íslenska orðið ruddi yfir á ensku er "redneck" ekki nærtækasta orðið.  Meðal annars vegna þess að uppvöðslusamir hópar unglingsdrengja sem sækja í slagsmál við aðra unglingadrengjahópa eru iðulega kallaðir "rude boys". 

  Rauðhálsar eru tiltekinn þjóðfélagshópur í suðurríkjum Bandaríkjanna.  Í stuttu máli vísar nafngiftin til þess að um er að ræða fátæka landbúnaðarverkamenn og bændur.  Í smekkbuxum og berir að ofan bogra þeir við störf sín.  Hatturinn eða derhúfan á höfðinu skýlir andlitinu en aftanverður háls og herðar roðna ubdan sólinni. 

  Dæmigerður rauðháls,  það er að segja týpan sem brandararnir fjalla um,  er lítt menntaður,  jafnvel ólæs og jafnan fáfróður um það sem gerist utan túnfótsins.  Rauðhálsinn er vel sjálfbjarga reddari.  Hann grípur til þeirra verkfæra og þess hráefnis sem hendi er næst.  Útisundlaug hans er kannski pallur á pallbíl eða drullupollur;  frisbí-diskurinn er hjólkoppur eða klósettseta;  kertastjakinn er bjórdós og svo framvegis.

  Rauðhálsinn bruggar sitt viský (moonshine) sjálfur af mikilli list en aðkeyptur bjór er aðal drykkurinn.  Tannréttingar eru pjatt sem ná ekki til rauðhálsa og skemmd tönn er bara rifin með naglbít úr gómnum.  Jesú,  byssur og bílar á stórum dekkjum eru í hávegum ásamt Suðurríkjafánanum (The South will rise Again) og andúð á hörundsdökku fólki.     

  Ég er ekki hrifinn af rasisma rauðhálsanna.  En hef lúmskt gaman að þeim að öðru leyti.  Þetta eru töffarar á sinn hátt og margir skemmtilegar týpur.  Utan Bandaríkja Norður-Ameríku er rauðhálsum oft ruglað saman við hillbillý-liðið.  Þessir tveir þjóðfélagshópar eiga margt sameiginlegt.  En eru ekki alveg sama fyrirbærið.  Báðir hóparnir eiga þó uppruna í skoskum og írskum innflytjendum til Bandaríkjanna.    

     

Fróðlegt og hjálplegt húðflúr

  1972 ákvað ég að fá mér húðflúr.  Það var ekki eftir neinu að bíða.  Ég brá við skjótt og skellti mér í Tattú & skart í dag og fékk mér húðflúr.  Ég hef oft heyrt talað um að það sér rosalega sársaukafullt þegar húðflúrið er skrapað ofan í húðina.  Mér er lítið um sársauka gefið og hugleiddi að laumast til að bera á mig staðdeyfandi krem áður en mætti yrði á svæðið.  En gleymdi því.  Var eitthvað annars hugar.  Sem betur fer.  Svanur húðflúrari tjáði mér að staðdeyfiefni eyðileggi æskilegt viðnám húðarinnar þegar verið er að húðflúra.  Þar fyrir utan var aðgerðin alls ekki sársaukafull.  Þvert á móti var hún notaleg.  Þetta var eins og nett og gott krafs eða klór.

  Ég er staðráðinn í að fá mér fleiri húðflúr.  Það er svo assgoti gott.  Að þessu sinni lét ég húðflúra yfir allan hægri framhandlegginn landakort af Færeyjum.  Það smellpassaði hæð og lengd og mun auðvelda ferðalög mín um Færeyjar í framtíðinni.  Þá þarf ég ekki annað en bretta upp ermi til að sjá hvar ég er staddur og hvert skal næst halda. 

  Svo heppilega vildi til að Svanur húðflúrari bjó í Færeyjum á áttunda áratugnum og var því á heimaslóðum þegar hann skellti á mig landakortinu.

  Næsta húðflúr verður á vinstri handlegg.  Það verður mynd af rennilás.  Hjálpið mér að finna einfalda grafíska mynd af rennilás.

Verðsamanburður á grillum

  Á sólríkum degi sem þessum er næstum nauðsynlegt að laumast aðeins út fyrir bæinn.  Í farteskinu er gaman að hafa kassa af ísköldum bjór og einnota grill.  Á grillið getur verið gott að setja papriku og banana.  Eða Herragarðs grísalærissneiðar.  Eða lax.  Verð á einnota grillum er mismunandi á milli verslana og frekar lítið um verðsamráð.  Þetta hef ég verið að borga fyrir einnota grill síðustu daga:

Bónus 259 kr.

Rúmfatalagerinn 269 kr.

Byko 299 kr.

Hagkaup 329 kr.

Europrice 399 kr.

Krónan 399 kr.

Nóatún 499 kr. (en 599 kr. í Nóatúni við Nóatún)

Neinn 875 kr.

Spennandi framhaldssaga

  Fátt lesefni er skemmtilegra en smáauglýsingarnar í Fréttablaðinu.  Þar er jafnvel hægt að rekast á framhaldssögur sem taka fram skáldsögum Arnaldar Indriðasonar hvað spennandi framvindu varðar.  Ein slík hefur verið í gangi undanfarna mánuði undir liðnum "Húsnæði í boði".  Sagan hófst á því að nýuppgerð stúdíóíbúð með þvottavél,  þurrkara og interneti var auglýst til leigu á 59 þúsund kall.  Síðan hefur verðið trappast niður hægt og bítandi.  Lengi var það 54 þúsund.  Síðustu daga hefur íbúðin verið auglýst á 49 þúsund.  Fólk út um allt land og nokkrir Íslendingar búsettir erlendis fylgjast spenntir með framhaldinu.  Ég spái því að endirinn komi á óvart.

Hlegið að hundum

  Sumu fólki þykir við hæfi að búa sér til aðhlátursefni á kostnað hunda.  Það er ljótt.  Hundar eru mjög spéhræddir.  Þeir skammast sín rosalega mikið ef þeir halda að þeir líti kjánalega út og verið sé að hlæja að þeim.  Þegar fólk er búið að "dubba" hundana sína upp í fígúrur tekur það ljósmyndir af þeim og setur á netið.  Síðan berast myndirnar til mín.  Þá sýni ég ykkur þær svo þið sjáið hvað fólk er leiðinlegt við hundana sína.

Ég festist í lyftu

  Í gær rétt slapp ég við að festast í lyftu.  Ég var ekki jafn heppinn kvöldið áður.  En í gær tókst ungri systurdóttur minni með snarræði að forða mér frá því að lenda í sömu vandræðum.  Hún fylgdi mér snöfurlega niður á jarðhæð í lyftunni og passaði af samviskusemi upp á að allt gengi fyrir sig á besta veg.  Forsagan er sú að kvöldið áður heimsótti ég systir mína og hennar fjölskyldu í orlofsíbúð bænda í fjölbýlishúsi í Reykjavík.  Þau eru utan af landi.  Þegar ég yfirgaf partýið hjá þeim í fyrrakvöld festist ég í lyftunni.  Ég fór í lyftuna og beið eftir að lyftan skilaði mér á jarðhæð.  Ég beið og beið í lyftunni.  Stóð þar aleinn og lyftan skilaði mér ekki á jarðhæð.  Ég tók upp á því að raula íslensk dægurlög til að stytta mér stundir.  Þegar mínútur liðu og ekkert gerðist fór ég að ókyrrast.  Eftir 10 mínútur lokaður inni í lyftunni sljákkaði í söng mínum og ég fór að velta fyrir mér vandamálinu.  Enda kominn með leið á íslensku dægurlögunum sem ég raulaði.  Þá áttaði ég mig loks á að ég hafði aldrei ýtt á hnappinn í lyftunni sem átti að bera mig niður á jarðhæð.  Ég brá við skjótt og ýtti á þann hnapp.  Það var eins og við manninn mælt:  Ég var á augabragði kominn á jarðhæðina.

  Daginn eftir tók systurdóttir mín að sér að halda utan um dæmið.  Hún fylgdi mér í lyftuna,  ýtti á hnappinn fyrir jarðhæð og fylgdi mér alveg út að útidyrum blokkarinnar.  Þetta gekk hratt og vel fyrir sig.  Ég festist ekki í lyftunni. 

Furðulegt sumarfrí

  Nú þegar Íslendingar streyma í sumarfrí og umferð ýmist þyngist til eða frá höfuðborgarsvæðinu rifjast upp bráðfyndin saga sem vinafólk mitt frá Víetnam sagði mér á dögunum.  Atburðurinn átti sér stað fyrir einhverjum áratugum þegar sumarfrí var sjaldgæfur lúxus í víetnamska þorpinu sem kunningjarnir eru frá.

  Gamall maður (á víetnamskan mælikvarða.  Um sextugt) tók sitt fyrsta alvöru sumarfrí.  2ja vikna frí.  Hann undirbjó fríið vel og vandlega mánuðum saman.  Þetta var stórmál.  Því fylgdi gífurlegur ævintýraljómi.  Þetta var fyrir daga tölvupósts,  faxtækja og almenns símasambands.  Samskipti við fólk utan þorpsins fóru fram í gegnum gamaldags hægfara bréfapósts (snail mail).  Eldra fólk var flest háð yngra fólki með að lesa fyrir sig bréf og skrifa.  Kallinn bókaði gistingu á hóteli í fjarlægju þorpi og dundaði sér dag eftir dag við að skipuleggja fríið þar með aðstoð yngra fólks sem kunni að lesa og skrifa.  Kallinn hafði komist yfir bækling eða rit um þorpið.  Það auðveldaði skipulagið.  Allir í þorpinu fylgdust spenntir með framvindunni við skipulag frísins.  Síðustu vikur fyrir fríið ræddu þorpsbúar varla um annað en frí kallsins.  Enda bar yfirleitt aldrei neitt til tíðinda í þorpinu.  En þetta var alvöru ævintýri.

  Þegar frí kallsins gekk í garð fylgdu ættingjar,  vinir og vinnufélagar honum á rútustöðina.  Það var svo mikill ævintýraljómi yfir fríinu að allir samglöddust kalli og vildu kveðja hann á rútuplaninu.  Í Víetnam skiptir aldur miklu máli.  Fólk nýtur vaxandi virðingar til samræmis við hækkandi aldur.  Með því að fylgja kallinum að rútunni vildu þorpsbúar sýna öldrun mannsins tilhlýðanlega virðingu. 

  Rútan kom reglulega viðp í þorpinu tvisvar í mánuði.  Hún var ætíð troðin af fólki frá öðrum þorpum en fátítt var að fólk úr þessu þorpi tæki sér far með henni.  Fylgdarfólk kallsins fyllti rútuplanið.  Ungur vinnufélagi kallsins naut þess heiðurs að fá að bera ferðatöskur hans.  Sá ungi átti í vandræðum með að troða ferðatöskunum aftast í rútuna.  Þetta var ekki rúta eins og við þekkjum þar sem töskurými er undir rútunni heldur höfðu farþegar pinkla sína - og jafnvel húsdýr - meðferðis inni í rútunni. Ungi vinnufélaginn tróðst með töskur kallsins innan um farangur ferðafélaga í stappfullri rútunni.  Þá ók rútan skyndilega af stað.  Með vinnufélagann innanborðs en kallinn úti á rútuplani umkringdan ættingjunum og öðrum þorpsbúum.  Hópurinn á rútuplaninu horfði á eftir rútunni bruna burt.

  Vinnufélaginn kom engum skilaboðum til bílstjórans.  Rútan var svo stöppuð af fólki og allir kallandi hver ofan í annan til að yfirgnæfa hávaðann frá rútunni sjálfri.  Vinnufélaginn endaði á þeim stað sem kallinn hafði bókað frí sitt.  Vinnufélaginn var með alla pappíra í lagi,  kvittun fyrir gistingu,  uppskrift að því hvernig fríinu yrði best varið og það allt.  Næsta rúta til baka fór ekki fyrr en eftir hálfan mánuð.  Vinnufélaginn gat í raun fátt gert í stöðunni annað en fara í fríið sem kallinn hafði ætlað í.  Hann var vel settur,  með nóg af hreinum fötum af kallinum,  peningana hans og svo framvegis.
  
  Kallinn og ungi vinnufélaginn voru þeir einu sem kunnu almennilega á rafstöðina er þeir unnu við.  Kallinn gat því ekki gert annað en mæta í vinnuna á hverjum degi á meðan vinnufélaginn hafði það gott í fríinu.  Eftir að ungi vinnufélaginn kom úr fríinu var stirt á milli þeirra.  Kallinn tók algjörlega fyrir að heyra ferðasögu þess unga og tók aldrei annað frí.

 

Mikil umferð til Reykjavíkur

Örleikrit - Bannað börnum og viðkvæmum!

  Persónur og leikendur:

  Strákur á fermingaraldri,  snyrtilega klæddur í jakkaföt og með hálsbindi

  Mamma,  spariklædd í pels og með áberandi gullhringa á flestum fingrum

  Ljótur hundur

  Sviðið er myrkvað af reyk.  Taktföst sögunarhljóð heyrast og fara hækkandi.  Þau hljóma eins og grófri handsög sé beitt á undinn planka í sögunarverksmiðju í Brasilíu.  Smám saman þynnist reykurinn.  Þá sést strákurinn sitja við eldhúsborð.  Hann hefur brett upp fyrir vinstri olnboga jakka og skyrtu og er í rólegheitum að saga af sér framhandlegginn.  Blóð gusast úr sárinu og spýtist út um allt.   

  Mamman kemur inn úr dyrunum.  Hún er með stóran úttroðinn innkaupapoka úr matvöruverslun.

Mamman (glaðleg):  Hæ,  ég keypti jógúrt í matinn handa okkur.

Strákurinn (kátur):  Frábært.  Ég var að byrja að fá leið á að borða alltaf rúgbrauð með spægipylsu í matinn.

Mamman (ennþá glaðleg):  Af hverju ertu að saga af þér höndina?

Strákurinn:  Mig klæjaði í handlegginn.

Mamman:  Það er út af bómullarskyrtunni.  Bómullin er erfðabreytt.  Þess vegna veldur hún ofnæmi og kláða.  Þú hefðir getað farið úr skyrtunni.  Þá hefði þig hætt að klæja.  Það getur líka verið að þú verðir ófrjór af að vera í skyrtunni.  Fuglar í nágrenni erfðabreyttra akra verða ófrjóir.

Strákurinn:  Þetta skiptir svo sem engu máli.  Ég er of ungur til að fara að hrúga niður börnum.  Svo er ég viss um að Óli einhenti í blokkinni hér fyrir neðan fer að hrökkva upp af.  Hann er orðinn svo gamall og hrörlegur.  Þá get ég fengið gervihöndina hans fyrir slikk.

Mamman (flissandi):  Þú ert nú meiri kjáninn,  elskan mín.  Óla einhenta vantar hægri höndina.  Þú ert að saga af þér vinstri höndina.

Strákurinn (nær að saga af sér höndina.  Hún fellur með þungum slink í gólfið.  Pirraður):  Þú hefðir mátt segja mér þetta fyrr.

Mamman:  Já,  ég ætlaði að segja þér þetta í morgun.  Ég reyndi að hringja í þig en það var slökkt á símanum þínum.  En það gerði ekkert til.  Ég hringdi í vinkonu mína í staðinn og sagði henni þetta.  Hún ætlar að láta þetta berast.  Það er áreiðanlega komið út um allt núna.

Mamman (hellir úr innkaupapokanum.  Í honum voru tvær jógúrtdollur vafðar innan í sitthvora stóru kúluna úr loftblöðruplasti):  Mikið er ég fegin að jógúrtdósirnar eru heilar.  Ég hef alltaf áhyggjur af því að þær springi á heimleiðinni síðan ég datt á mjólkurkælinn í Nóatúni og sprengdi allar jógúrtdollurnar þar.  Jeminn eini.  Það var neyðarlegt.  Á leiðinni út úr Nóatúni mætti ég,  öll útbíuð í jógúrt,  konu sem horfði svo skringilega á mig að hún hélt greinilega að ég hefði lent í kynsvalli með starfsmönnum Nóatúns.  Láttu mig þekkja augnráðið.  Komdu nú að borða,  vinurinn.  Settu höndina fyrst í matarskálina hjá Ljóti.  Hann borðar hvort sem er ekki jógúrt.  (Bíðlega) Óskaplega verður hann glaður,  blessaður kallinn.  Það er langt síðan hann hefur fengið svona mikið kjöt og góð bein til að naga.

  Tjaldið fellur.  Mamman heyrist kalla vinalega á Ljót.  Hundurinn geltir.  Hávær höggsmellur heyrist og hundurinn ýlfrar hátt.  Mamman heyrist segja:  Já,  var það ekki?  Þú ofleikur, helvítis kvikindið þitt.  Ég ætti að sparka í þig aftur og miklu fastar.  Ennþá hærri höggsmellur heyrist og hundurinn ýlfrar miklu hærra.  Mamman hlær tryllingslega.  3 skothvellir heyrast og allt verður hljótt. 

------------------------------------------------

Fleiri örleikrit og smásögur:

- Matarboð í sveitinni

http://jensgud.blog.is/blog/jensgud/entry/266411

- Morðsaga

http://jensgud.blog.is/blog/jensgud/entry/320299

- Um borð

 http://jensgud.blog.is/blog/jensgud/entry/278812

- Í plötubúð

http://jensgud.blog.is/blog/jensgud/entry/260037

- Hundur

http://jensgud.blog.is/blog/jensgud/entry/863130

- 27 ára

http://jensgud.blog.is/blog/jensgud/entry/299380

- Strákur skiptir um gír

http://jensgud.blog.is/blog/jensgud/entry/538649

- Skokkari

http://jensgud.blog.is/blog/jensgud/entry/606929

- Boltabulla

http://jensgud.blog.is/blog/jensgud/entry/718347

Spennandi myndband

  Mér var sent þetta skemmtilega myndband.  Með fylgdu upplýsingar um að það sýni kofa í eigu forgöngumanns verðsamráðs olíufélaganna og konu hans,  sem þekktust er fyrir að hafa látið innrétta einkagullklósett undir sig í húsakynnum dómsmálaráðuneytisins.  Næsti nágranni turtildúfanna er maður sem gegnir nafninu Tiger Woods og þykir ekki síður liðtækur í golfi en 12 ára strákurinn á Selfossi.

Aflið fær styrk

  Fréttinni hér fyrir neðan er hnuplað af heimasíðu Vikudags á Akureyri.  Heimasíða Aflsins,  systursamtaka Stígamóta á Norðurlandi,  er www.aflidak.is.  Mín kæra systir,  Sæunn,  er formaður samtakanna.  Slóðin á fréttina í Vikudegi er http://vikudagur.is/?m=news&f=viewItem&id=3817

Aflið nýtir peningastyrk til útgáfu kynningarbæklings

mánudagur 22.jún.09 13:11

 

  

 

  Styrkurinn afhentur, Sæunn Guðmundsdóttir og Jóhanna G. Þorsteinsdóttir f.h. Aflsins og Hafdís Inga Haraldsdóttir f.h. Ladies circle nr. 1 á Akureyri.

  Á Kvennadaginn 19. júní hittust talskonur Aflsins á Akureyri, samtökum gegn heimilis-og kynferðisofbeldi og formaður Ladies Circle klúbbs númer 1 og var tilgangurinn að afhenda Aflinu peningastyrk. Aflið mun nýta styrkinn til útgáfu kynningarbæklings sem er í bígerð og verður á 10 tungumálum. 

  Með þessu móti getur Aflið lagt sitt af mörkum við að ná til sem flestra sem þurfa á aðstoð að halda.  Mjög mikil aukning hefur verið frá 2007 til 2008 eftir aðstoðs Aflsins eða 94% og enn meiri aukning er á árinu sem líður. Aflið sinnir forvörnum í grunn- og framhaldsskólum á Akureyri í fyrirlestraformi og er raunin sú að eftir hvern fyrirlestur bætist við einn þolandinn sem leitar eftir aðstoð hjá Aflinu. LC-1 klúbburinn er hluti af Ladies circle hreyfingunni, alþjóðlegum samtökum kvenna sem vilja stuðla að því að konur kynnist hver annarri, víkki út sjóndeildarhring sinn og efli alþjóðlegan skilning og vináttu.

 

Sjálfsfróun og Sjálfstæðisflokkurinn

  Á dögunum var sýnd í sjónvarpinu (RÚV) stuttmynd þar sem minn góði vinur,  Bjarni heitinn Móhíkani (Bjarni Þórir Þórisson),  las á áhrifamikinn hátt kvæði eftir Halldór Laxness og fór með aðalhlutverk.  Bjarna kynntist ég þegar hann var 14 - 15 ára og árið 2000 fór hann með mér í eftirminnalega hljómleikaferð til Grænlands í kjölfar þess að lag mitt  Þorraþrællinn  fór í 6.  sæti grænlenska vinsældalistans.  Lagið er í tónspilarunum hér til vinstri.

  Bjarni sló í gegn í kvikmyndinni  Rokk í Reykjavík  sem söngvari og bassaleikari pönksveitarinnar Sjálfsfróun.  Með okkur Bjarna til Grænlands fór dauðapönksveitin Gyllinæð (einnig í tónspilaranum) og þar var enginn bassaleikari. 

  Í kjölfar þess að horfa á stuttmyndina með Bjarna í sjónvarpinu fór ég inn á youtube til að vita hvort þar væri eitthvað með Bjarna.  Þegar ég sló inn nafni frægustu hljómsveitar hans,  Sjálfsfróunar,  birtist mér listi yfir 40 myndbönd.  Þar af 38 um Sjálfstæðisflokkinn.

Mikilvægt að leiðrétta

  Í helgarblaði Fréttablaðsins er sagt frá nýafstaðinni leit að bestu íslensku plötunum.  Þar segir:

  "Dr. Gunni birtir á vinsælli síðu sinni á Netinu athyglisverðan samanburð: Nýjan lista yfir bestu plötur Íslandssögunnar sem kjörnar voru á Tónlist.is og svo sambærilegan lista sinn yfir bestu plötur aldarinnar eins og hann var í bók Dr. Gunna "Eru ekki allir í stuði?" árið 2001. Þetta eru merkilega líkir listar nema að mestallt pönkið sem hinn afkastamikli tónlistargagnrýnandi úr Kópavoginum og einn áhrifamesti umfjallandi um íslenska rokktónlist hefur haldið svo mjög á lofti í gegnum tíðina; Fræbbblar, Ham, Rokk í Reykjavík og Geislavirkir Utangarðsmenn eru nú horfnir af lista. Hvað sem það svo segir manni nema þá kannski að sögufræg pönkgigg í Kópavogsbíó í denn eru á leið inn í gleymskunnar dá?"

  Þarna er vísað til hinnar skemmtilegu bloggsíðu www.this.is/drgunni.  Verra er að þarna gætir ónákvæmni.  Fræbbblar,  Ham,  Rokk í Reykjavík og  Geislavirkir  Utangarðsmanna eru fráleitt horfnir af lista.  Að vísu eru þessar hljómsveitir og platan  Rokk í Reykjavík  ekki í neinu af 20 efstu sætum.  Þannig að texti Jakobs Bjarnar Grétarssonar er ekki beinlínis rangur - ef miðað er við 20 efstu sætin.  Hinsvegar er platan  Geislavirkir  með Utangarðsmönnum í 21.  sæti,  Rokk í Reykjavík  í 32. sæti og  Lengi lifi  með Ham í 39.  sæti.  Sjá:  http://www.jensgud.blog.is/blog/jensgud/entry/898725/.

  Til að gera sér grein fyrir stöðunni þarf að hafa í huga að frá því rokkbók Dr. Gunna kom út hafa rutt sér leið í efri sæti nýrri plötur með Sigur Rós,  Emilíönu Torríni og Mugison.  Það er þess vegna rökrétt - en kannski ekki sanngjarnt - að pönkið sígi örlítið á listanum.   

  Á myndbandinu hér fyrir ofan flytja Fræbbblarnir frábæru eitt af lögum sínum í  Rokki í Reykjavík.  Athugið að það er heppilegra að smella bara einu sinni á myndbandið.  Ef tvísmellt er á það kemur upp "error".   Svo er bara að stilla hátalara á hæsta styrk.  Hér er annað myndband með Fræbbblunum úr  Rokki í Reykjavík:

  Og hér eru Fræbbblarnir 27 árum síðar að kráka lag frá bandarísku pönksveitinni The Ramones,  KKK took my Baby Away:

Saga bresku pönkbyltingarinnar XI

 

  Síðsumars 1977 var sala á pönkplötum orðin það mikil að í umferð voru settar ólöglegar (bútlegg) plötur með Sex Pistols og The Clash í breskum plötubúðum.  Þær mokseldust þrátt fyrir að löglegir plötuútgefendur þessara hljómsveita reyndu allt sem í valdi þeirra stóð til að stöðva eða hindra ólöglegu plöturnar.  Það var ekki við neitt ráðið.  Spurn eftir pönkplötum var slík.  Jafnframt streymdu inn á markað plötur frá nýjum pönksveitum. 

  Um haustið 1977 sló pönksveitin The Adverts í gegn með laginu  Gary Gilmore´s Eyes.  Þar var vísað til raunverulegs atburðar er augu úr morðingja voru grædd í áður sjónlausa manneskju.  Trommuleikari The Adverts tók saman við íslenska konu,  flutti til Íslands og hefur verið búsettur hér síðan. Að því er ég best veit.  Ég man ekki nafn hans og nenni ekki að "gúgla" það. Áður hafði The Adverts sent frá sér eina smáskífu sem fór hljótt.  Gaye Adverts varð fyrst margra ágæta kvenbassaleikara pönksins.

  The Adverts sendi frá sér tvær hressilegar breiðskífur og síðar voru gefnar út 3 hljómleikaplötur með The Adverts.

.

  Írsk pönksveit,  Bommtown Rats,  kom til sögu með laginu  Looking After Number One.  Nafnið Boomtown Rats var sótt í gengi í skáldsögu föður bandarískrar þjóðlagamúsíkur,  Woodys Guthries,  Bound for Glory.  Tenging breska pönksins við Woody Guthrie var víðtækari því forsprakki The Clash,  Joe Strummer,  var forfallinn Woody Guthrie aðdáandi.  Kallaði sig meira að segja á tímabili Woody. 

  Til gamans má geta að Bubbi Morthens,  Mikki Pollock og Megas voru/eru einnig undir miklum áhrifum frá Woody Guthrie.  Vinsælt lag Bubba,  Synetta,  er sótt í smiðju Woodys og einnig  Það er gott að elska.  

  Síðar sló Boomtown Rats rækilega í gegn á heimsvísu með leiðinda ballöðunni  I Don´t Like Mondays.  Söngvarinn;  Bob Geldof, varð alþjóðleg stjarna þegar hann samdi lagið  Do They Know it´s Christmas? og gaf það út undir nafni samstarfsverkefnisins  Band Aid og skipulagði Live Aid  hljómleika í kjölfarið.  Hann tók saman við sjónvarpsstjörnu sem varð ennþá frægari er hún tók saman við ástralska rokkstjörnu,  söngvara INXS.  Sá varð mikið frægur er hann drap sig við sjálfsfróun með einhverskonar kæfiaðferð sem fór úr böndum. 

.

.

  Breska pönksveitin Generation X  sendi í ágúst 1977 frá sér smáskífuna  Your Generation.  Generation X var afsprengi hljómsveitanna Chelsea og Throbbing Gristle.  Í síðarnefndu hljómsveitinni voru pönkarar sem síðar urðu frægir sem Psychic TV og þar var innanborðs íslenski hljómborðsleikarinn Hilmar Örn Hilmarsson, alsherjargoði Ásatrúarfélagsins.  Í Gen X var líka bassaleikarinn Tony James sem var með Mick Jones,  gítarleikara The Clash, í London SS og síðar í Sigue Sigue Sputnik.  Þeir eru í dag saman í hljómsveit sem ég man ekki hvað heitir.  Söngvari Gen X,  Billy Idol,  varð síðar alþjóðleg rokkstjarna og frægur dópisti.  Lagið  Your Generation  var útúrsnúningur og ádeila á lag The Who,  My Generation. 

.

Fyrsta breska pönklagið:  http://jensgud.blog.is/blog/jensgud/entry/743999

Næst - II:  http://jensgud.blog.is/blog/jensgud/entry/744949

III: http://www.jensgud.blog.is/blog/jensgud/entry/746033/

IV: http://jensgud.blog.is/blog/jensgud/entry/747161

V:  http://www.jensgud.blog.is/blog/jensgud/entry/750862/

VI:  http://jensgud.blog.is/blog/jensgud/entry/753972/

VII:  http://jensgud.blog.is/blog/jensgud/entry/791397

VIII:  http://jensgud.blog.is/blog/jensgud/entry/820922

IX:  http://www.jensgud.blog.is/blog/jensgud/entry/844717/

X:  http://jensgud.blog.is/blog/jensgud/entry/848956