Stórmerkileg frétt sem á erindi til allra

  Eftirfarandi frétt fékk ég senda áðan.  Hún birtist í nýjasta tölublaði héraðsfréttablaðsins Austurgluggans.  Þó fréttin fjalli fyrst og fremst um kaup rússnesks olíufyrirtækis á jörðum í Reyðarfirði þá á hún brýnt erindi til allra landsmanna því þetta virðist aðeins vera upphaf á þróun sem mun hafa mikil áhrif á íslenskt samfélag í heild.

-------

Vilja kaupa Reyðarfjörð

Skrifað af Einar Ben Þorsteinsson   

Olíufyrirtæki rússneska auðkýfingsins Roman Abramovic hefur fest kaup á þremur jörðum í Reyðarfirði. Fulltrúi hans gekk frá kaupunum á fasteignasölu í Reykjavík á mánudag.

Sogne Dnjepr er upplýsingafulltrúi olíufyrirtækis Abramovic. Hann bauð Austurglugganum í heimsókn á Hótel Hilton í Reykjavík stuttu eftir að gengið var frá kaupunum á mánudag. Um er að ræða jarðirnar Arnarhreiður, Davíðshólma, og Geirsnef. Sogne segir Abramovic hafi sérstakan áhuga á Íslandi. „Eftir að við komum hér til að veiða lax erum við stjórnendur fyrirtækisins ástfangnir af Íslandi. Við viljum leggja okkar af mörkum til að byggja upp framleiðslu á Íslandi á nýjan leik. Það er aðalástæðan fyrir því að Abramovic fyrirskipaði kaup jarða hér á Íslandi.” Útskýrir Dnjepr.

Ástæðuna fyrir því að olíufyrirtækið hefji kaup á jörðum í Reyðarfirði segir Dnjepr vera einfalda. „Það er mjög lágt verð á jörðum á Austurlandi. Við vildum láta seljendurna njóta vafans og greiddum helmingi hærra en uppsett verð. Markmið okkar er að byggja upp arðbært framleiðslufyrirtæki í Reyðarfirði.” Upplýsingafulltrúinn vill ekkert frekar gefa upp um kaupverðið. „Við borguðum ekki margar milljónir (dollara) fyrir hverja jörð. Ef fleiri vilja selja, þá geta menn haft samband við Domus Fasteignasölu.”

Aðspurður segir Dnjepr að rétt sé að olíuhreinsistöð sé ein af hugmyndum fyrirtækisins. „Við eigum enn eftir að hitta bæjarstjórann, ég trúi því að það verði ekki slegið á hendur okkar sem eru fullar fjár. Ykkur vantar jú peninga núna. Olíuhreinsistöð væri sniðug fyrir Íslendinga, það er alls ekki eins sóðaleg framleiðsla og þú heldur. Abramovic hefur rætt við iðnaðarráðherrann (Össur Skarphéðinsson). Ég held að hann sé hrifinn af okkar hugmyndum. Við þekkjum það hins vegar ágætlega að reka áróður, og höfum ágætis þolinmæði. Við lendum ekki oft í þeirri stöðu að það sé sagt nei við okkur.”

Austurglugginn spurði þá fulltrúa Abramovic hvort hann teldi góðar líkur á olíuhreinsistöð á Íslandi. „Já við höfum afar góð sambönd á Íslandi. Ég held að ef við byggjum ekki höfn og verksmiðju í Reyðarfirði að þá munum við gera það í Eyjafirði eða Skagafirði. Þar erum við líka að ganga frá jarðakaupum. Við kaupum eins margar jarðir og við þurfum, vonandi getum við byggt nokkrar verksmiðjur. Það myndi fullnægja okkar þörfum. Sendinefnd frá okkur mun heimsækja bæjarstjórnir í næstu viku.”

Dnjepr segir mikilvægt að Íslendingar geri sér grein fyrir því hvaðan peningar koma. „Þið getið ekki bara keypt ykkur Range Rover og Porsche ef þið viljið ekki framleiða afurðir. Seljið okkur rafmagn og land. Þá fáið þið pening. Viðskipti eru ekki flókin. Ég sé fyrir mér að Rússar og Íslendingar eigi góða samleið.”

Dnjepr segir orðróm um olíuhreinsistöð í Vopnafirði ekki eiga við rök að styðjast. „Þar hefur Abramovich áhuga að búa og hefur keypt sér jörð í nálægð við Selá. Hann hefur ekki áhuga á að búa í nágrenni við iðnaðarverksmiðjur. Það hefði líka ekki góð áhrif á laxveiðina.”

Í Þýskalandi tíðkast að blaðamenn sem færa sig um set kveðji lesendur með fréttum sem ekki eiga við rök að styðjast og eru uppspuni frá rótum. Ég hef valið að kveðja lesendur að þýskum hætti með þessari „frétt”.

Bestu kveðjur

Einar Ben Þorsteinsson, fráfarandi ritstjóri Austurgluggans.

Þeir kunna að redda sér með stæl þarna fyrir neðan

 

 Í Ástralíu eru lengri vegalengdir á milli bæja en venja er í öðrum löndum.  1000 til 2000 kílómetrar þykja temmilegar vegalengdir.  Vegna þessa er ekki rekstrargrundvöllur fyrir fasta pöbba í dreifbýlinu.  Við því hörmulega vandamáli kunna menn ráð.  Þeir hafa þessa flottu pöbba á hjólum, rúnta um heimsálfuna og færa sveitavargnum ískaldan bjór og rokna stuð.  Meira að segja dansandi stelpur til að gleðja augu gömlu karlanna.  Aðrar konur eru frekar fámennar í þessum bjórpartýum.  Enginn veit hvers vegna.

 

Frábærlega fyndnar hljómsveitamyndir frá áttunda áratugnum

  Á einhver ljósmynd af íslensku hljómsveitinni The Change (eða The Girls from Iceland eins og hún var kölluð í bresku poppblöðunum) eða Þú og ég?  Heidi Strand vísaði mér á þessar bráðfyndnu ljósmyndir af hljómsveitum frá miðjum áttunda áratugnum.  Svokallað glysrokk (glam rock) hafði rutt sér til rúms á vinsældalistum sem kvenlegt afbrigði af þungarokki.  Hommar fjölmenntu út úr skápnum í rokkgeiranum með David Bowie,  Marc Bolan og Freddie Mercury í fararbroddi.  Aðrir hommar héldu sig inni í skápnum - svo sem Cliff Richard og Richard Clyderman-  en kunnu vel að meta búningahönnun var komin í hendur homma.  Útvíðar hippabuxur voru ennþá vinsælar en hafðar mjög þröngar fyrir ofan hné.  Skærir litir og glansandi,  iðulega dálítið opið niður hálsmálið.  Það er ofmælt að þessi hljómsveitaklæðnaður veki nostalgígju (fortíðarþrá).  Frekar nostalklígju (fortíðarandúð).

  Svo kom blessað pönkið ´76/´77 eins og frelsandi engill. 

Ég spyr og Rannveig svarar

 

  Rannveig Höskuldsdóttir,  flokkssystir mín í Frjálslynda flokknum og á sæti í kjördæmafélagi Reykjavíkur suður (en ég í norður),  bryddaði í gær upp á nýjum fleti á blogginu:  Hún lagði fyrir mig spurningu í bloggfærslu hjá sér og ég svaraði í sömu bloggfærslu.  Þetta kom af stað fjörlegri umræðu (www.rannveigh.blog.is) sem rataði inni í "Heitar umræður" á blogginu.  Núna lagði ég fyrir Rannveigu spurningar sem hún svarar hér.  Mínar spurningar eru:

  Hvaða tilgangi þjónar rándýrt loftrýmiseftirlit í nokkra daga á margra mánaða fresti? Hver er óvinurinn? Hver er hættan? Eftir að bresk yfirvöld hafa skilgreint okkur sem óvin og sett á bekk með hryðjuverkasamtökum hversu nálægt landráði jaðrar við að leggja landvarnir okkar í hendur breskum hersveitum?

  Svar Rannveigar:

  Ég held að enginn sjái tilgang í nokkurra daga loftrýmiseftirliti á margra mánaðar fresti nema til að uppfylla einhverjar Nato skyldur.  Við þessar aðstæður er það bæði siðlaust og til að vekja enn meiri reiði almennings.
  Auðvita eru alltaf til snaróðir menn úti í heimi sem gera óskunda í sögulegu samhengi.  Ég nefni t.d. son Margretar Thatcher sem reyndi valdarán í Cinea- Bissa sem er smáríki í Afríku. Eftir að Bretar settu okkur á bekk með hryðjuverkasamtökum sé ég enga skynsemi í því að þeir séu að verja okkur - nema fyrir okkur sjálfum.  Þetta snýst upp í einhverskonar andhverfu.  Erum við ekki hryðjuverkapakkið,  samkvæmt skilgreiningu Breta?  Þjóðin er reið og finnst þetta lítilsvirðing sem utanríkisráðherra býður upp á núna. Við verðum að muna að þarf ekki nema heimskan yfirmann í breska hernum til að breyta loftvarnareftirliti í innrás.

Samanburður á veitingastöðum

 

 - Réttur:  Beikon og egg

 - Staður 1:  Fitjagrill í Njarðvík

 -  Einkunn: ***

  - Verð:  980 krónur

  - Staður 2:  Vitaborgarinn,  Ármúla 7,  Reykjavík

  - Einkunn: **

  - Verð:  850 krónur

  - Staður 3:  Flugterían,  Reykjavíkurflugvelli

  - Einkunn: *

  - Verð:  1150 krónur

  Eðli málsins samkvæmt fær málsverðurinn egg og beikon ekki hærri einkunn en 3 stjörnur af 5 mögulegum.  Þetta er ekki merkilegur matur.  Með þeirri afmörkun fær hann svo gott sem fullt hús,  3 stjörnur,  eins og hann er afgreiddur í Fitjagrilli í Njarðvík:  2 spæld egg,  vænn skammtur af beikonsneiðum,  franskar kartöflur,  2 hálfskornar vel ristaðar fransbrauðssneiðar,  smjör og hrásalat í sósu. 

  Beikonið er steikt þannig að það krullast upp og er stökkt.  Fyrir bragðið sýnist það á disknum vera meira en það er.  Ég geri mér ekki grein fyrir því hvort beikonsneiðarnar eru 10 eða 12.  Þær vefjast saman í benduflóka.  Franskar kartöflur eru ekki merkilegur matur en passa þokkalega vel með eggi og beikoni.  Það er alveg nóg að hafa þessar 2 hálfskornu brauðsneiðar með.  Það léttir á sterkju beikonsins að fá hrásalatið með.

  Í Vitaborgaranum eru beikonsneiðarnar 12 steiktar þannig að þær eru mjúkar (ekki uppkrullaðar).  Spældu eggin eru 2,  ristaðar hálfskornar og þokkalega ristaðar brauðsneiðar 4 með smjöri og 2 sneiðar af skornum tómati. 

  Í Flugteríunni eru hálfskornu brauðsneiðarnar sömuleiðis 4 og illa ristaðar.  Ekkert smjör.  Beikonsneiðarnar eru 7 og temmilega steiktar mjúkar.  Tvö spæld egg.  Þessi skammtur jaðrar við að vera okur.  Í flugteríunni á Akureyri er ekki boðið upp á egg og beikon en mér virðist sem þar sé verðlag gegnum gangandi um 30% lægra en í flugteríunni í Reykjavík.  Og margt á Akureyri áhugaverðara.  Svo sem pönnukökur,  rosalega góðar og matmiklar kjötlokur og rúgbrauð með reyktum laxi.     

Innlit - útlit. Frábær hönnun

  Myndirnar segja flest sem segja þarf.  Þarna er beitt þeirri tækni að viðeigandi ljósmynd er prentuð út á límdúk.  Þetta kemur svakalega vel út og er áhrifaríkt eins og það er notað í þessum tilfellum.  Það fylgir sögunni að ókunnugir sem opna dyr inn á baðherbergið hrökkvi jafnan við og taki skref aftur á bak áður en þeir hætta sér að stíga ofur varfærnislega ínn á gólfið. 

Umhugsunarverð smásaga

  Eftirfarandi sögu fékk ég senda frá útlöndum.  Henni er ætlað að vera innlegg í umræðuna um íslenska hryðjuverkaríkið og íslenska þjóðargjaldþrotið.  Mig rennir í grun um að þetta sé lygasaga.  En hún á jafn mikið erindi í umræðuna fyrir því.  Aðdragandinn að þjóðargjaldþrotinu byggði hvort sem er á lygum,  svikum og allra handa sjónhverfingum og brellum.

  Páfinn átti í viðræðum við Guð og sagði:  "Guð minn góður,  mig langar að vita hver munur er á himnaríki og helvíti."  Guð brást vel við og leiddi páfann að tvennum dyrum.  Hann opnaði aðra þeirra og sýndi páfa inn.  Þar blasti við stór salur.  Í miðju hans var stórt hringlaga borð.  Á miðju borðsins var stór pottur með pottrétti sem ilmaði svo afskaplega vel að páfi fór að slefa.  Svo mikið langaði hann að smakka góðmetið.

  Fólkið sem sat umhverfis borðið var grindhorað og veiklulegt.  Það þjáðist greinilega af hungri.  Hendur fólksins voru bundnar við stólana en þó þannig að fólkið gat haldið á skeiðum með löngu handfangi og veitt mat upp úr pottinum með þeim.  Vandamálið var að handföngin á skeiðunum voru lengri en hendur þeirra.  Þess vegna gat fólkið ekki komið matnum upp í sig.   

  Páfa var brugðið vegna bjargleysis fólksins,  eymd þess og þjáningu.  Guð lokaði dyrunum og sagði:  "Þannig er komið fyrir því vesalings fólki sem fer til helvítis."  Því næst leiddi hann páfa að hinum dyrunum og opnaði þær.  Þar var alveg nákvæmlega eins salur með samskonar hringlaga borði,  ilmandi pottrétti og fólki umhverfis borðið í sömu aðstöðu með bundnar hendur og skeiðar með löngu handfangi.  Munurinn var hinsvegar sá að þetta fólk var vel haldið í góðum holdum,  kátt og hresst,  reitti af sér brandara og skemmti sér hið besta. 

  Páfinn spurði hverju sætti þessi munur á fólki sem fer til helvítis og fólki sem fer til himnaríkis.  Guð svaraði:  "Fólkið sem fer til himnaríkis hefur einn eiginleika umfram fólk sem fer til helvítis.  Fólkið sem fer til himnaríkis matar hvert annað en hinir,  þeir sem geta bara hugsað um sjálfan sig,  fara til helvítis."

Ísland stendur frammi fyrir gjaldþroti

Framburður á nafni Eivarar

  Ég heyrði dagskrárgerðarmenn á rás 2 ræða um framburð á nafni færeysku álfadrottningarinnar Eivarar,  bestu söngkonu heims.  Þeir sögðu ótækt að vera með það sem þeir töldu vera enskan framburð þegar talað er um Ævöru.  Niðurstaðan var sú að við ættum að tala um Eivöru samkvæmt íslenskum framburði.

  Ég veit ekki hvernig enskumælandi bera fram nafn Eivarar.  Sennilega er það Ævör.  Hitt veit ég að Færeyingar tala um Ævör.  Eða svo gott sem.  Kannski örlítið út í eins og Aivör.

  Til gamans má geta að nafnið Eivör er komið úr ásatrú og þýðir Heill Vör!  Vör er gyðjuheiti.

 

Veitingahús - umsögn

 - Staður:  Krua Siam,  Strandgötu 13,  Akureyri

 - Réttur:  Steiktur fiskur

 - Verð:  1400 kr.

 - Einkunn:  ****(af 5)

  Ég hafði ekki hugsað mér að skrifa umsögn um þessa máltíð á Krua Siam.  Ástæðan er fyrst og fremst sú að það er ekki ætlun að fylla þessa bloggsíðu af veitingahúsaumsögnum.  Þær eru meira svona eitthvað sem slæðist með öðru einstaka sinnum.  Hinsvegar hef ég fengið hvatningu úr fleiri en einni átt að skrifa um heimsókn mína á Krua Siam fyrir viku síðan.  Undir þeim kringumstæðum er ástæðulaust að skorast undan - þó ég verði að treysta á lélegt langtímaminni.

  Krua Siam er tailenskur veitingastaður.  Þegar sest er inn á svoleiðis stað þýðir ekkert að væla undan því að hvít hrísgrjón fylgi aðalrétti sem meðlæti.  Þannig er það bara þegar um tailenskan mat er að ræða.  Með hrísgrjónunum voru rifnar (niðurraspaðar) gulrætur og hvítkál.  Það gerði máltíðina dálítið veislulega.

  Fiskurinn var djúpsteiktur í örþunnu og stökku hveitideigi.  Hann var framreiddur í þunnri karrýsósu ásamt eggjahræru blandaðri steiktri papriku, lauk, blaðlauk og fleiru.  Þetta var hin ljúffengasta máltíð.  Frekar bragðmilt (á tailenskan mælikvarða) og fiskurinn (ýsa) var skemmtilega snöggsteiktur.  Aðeins rétt dýft í steikingarpottinn til að hitna í gegn.  Þannig var hann þéttur og ferskur.

  Krua Siam er millifínt veitingahús.  Ég sá á útiskilti að þar er boðið upp á hlaðborð í hádegi á virkum dögum.

  Bjórglasið (hálfur lítri) kostaði 700 kall.  Það er í efri mörkum. 

  Ljósmyndin er ekki frá Krua Siam.

Ný spjallsíða - og burt með spillingarliðið!

  Vegna hruns íslensku krónunnar og fjármálakreppunnar hafa margir fundið þörf fyrir að tjá sig um atburði síðustu vikna og spá í framvindu komandi daga.  Bloggaranum Guðna Karli Harðarsyni þykir bloggsíður bera þess merki að vera einkasíður fyrir einstaklinga sem eru fyrst og fremst að ræða málin við vini sína og vandamenn.  Guðni er hrifinn af blogginu en langar til að opna umræðuna út á opnari spjallvettvang þar sem allir koma að umræðunni á jafnréttisgrundvelli. 

  Guðni hefur sett upp spjallborð (Forum) - http://okkarisland.myfreeforum.org - sem er ekki jafn persónubundið og bloggið.  Þar getur hver sem er skrifað beint inn og einnig tekið þátt í virku spjalli á rauntíma (chat).  Öllum er velkomið að koma með óskir um aðra umræðuflokka.  Netfang Guðna er [e-mail].  Bloggsíða Guðna er www.hreinn23.blog.is.

Enn vantar 5 milljarða Bandaríkjadala

Bókin um Önnu á Hesteyri - Allt annað: Burt með spillingarliðið!

  Bókin um Önnu á Hesteyri kemur út 15.  nóvember.  Hún heitir Ég hef nú sjaldan verið algild.  Það sem ég hef lesið úr bókinni er bráðskemmtilegt.  Enda er Anna svo frábær og merkileg persóna að ævisaga hennar getur ekki annað en bergmálað það.  Í baksíðutexta á bókarkápu segir:

Anna á Hesteyri er alveg einstaklega skemmtilegur og hrífandi persónuleiki.
Brosandi, tannlaus fegurðardís í sóleyjarskrúða? Ruslasafnari á hjara veraldar? Hetja? Verndari utangarðs- og glæpamanna?
Til hvaða ráða grípur Anna á Hesteyri þegar til hennar kemur óboðinn gestur um nótt?
Hvað fékk hún Landhelgisgæsluna til að gera?
Hvernig lék hún á dýralækninn?
Og hverju lofaði hún þegar í óefni stefndi í bílprófinu?
Bráðskemmtileg saga og spennandi - sögð með orðum einbúans á Hesteyri og þeirra sem til hennar þekkja. 

  Það er Rannveig Þórhallsdóttir, bókmenntafræðingur,  sem skráir bókina.  Búðarverð á bókinni er 4980 krónur.  Bókaútgáfan Hólar býður hinsvegar lesendum þessarar bloggsíðu bókina á 3780 krónur.  Sendingarkostnaður er innifalinn í því verði.

  Það eina sem þú þarft að gera er að senda eftirfarandi upplýsingar á netfangið [e-mail]:

NAFN - HEIMILISFANG OG PÓSTNR - KENNITALA - HEITI BÓKAR OG TILBOÐSVERÐ. 

  Greiðslukortaþjónusta er í boði og hægt að tvískipta greiðslu án aukakostnaðar.  Kortanúmer - alls 16 tölustafir - og gildistími korts þurfa þá að fylgja pöntun.
  Póstkrafa er annað greiðsluform og þá er greitt fyrir bókina á pósthúsi.

  Eftir klukkan 18.00 er hægt að hringja í Önnu Eiríksdóttur og ganga frá pöntun í síma 695 4983. 

  Þeir sem ekki kannast við Önnu á Hesteyri (og líka þeir sem kannast við hana) geta lesið hér nokkrar sögur af henni:

- Gestir

www.jensgud.blog.is/blog/jensgud/entry/640301

- Slóst við mömmu

www.jensgud.blog.is/blog/jensgud/entry/622422

- Farandssali

www.jensgud.blog.is/blog/jensgud/entry/606305

- Sendi lögguna

www.jensgud.blog.is/blog/jensgud/entry/463661

- Leikur í umferðinni

www.jensgud.blog.is/blog/jensgud/entry/423296

- Glannaakstur

www.jensgud.blog.is/blog/jensgud/entry/409355

- Samanbrotinn konfektkassi

www.jensgud.blog.is/blog/jensgud/entry/398785

- Málað yfir málverk

www.jensgud.blog.is/blog/jensgud/entry/398589

- Festist í hringtorgi 

www.jensgud.blog.is/blog/jensgud/entry/337158

Einn léttur

  Hún er mesta ljóskan í bænum.  Og jafnvel þó víðar væri leitað.  Eftir að hafa tekið þátt í vafasömum viðskiptum fékk hún greitt með ávísun.  Hún hélt þegar í næsta banka til að leysa ávísunina út.  Gjaldkerinn bað ljóskuna að fylla út bakhlið ávísunarinnar.  Það var ekkert mál.  Þegar hún rétti gjaldkeranum útfyllta ávísunina sagði hann:    

  - Ertu með skilríki til að staðfesta að þetta sért þú?

  Ljóskan dró þá upp lítinn spegil úr handtöskunni sinni,  horfði rannsakandi í hann og sagði síðan ákveðin:

  - Jú, þetta er ég.

Karlremba

  Einn kunningi minn var á dögunum úti að keyra með ungum syni sínum.  Strákurinn er sennilega 4ra eða fimm ára eða eitthvað álíka.  Í útvarpinu hljómuðu auglýsingar á Útvarpi Sögu.  Meðal annars auglýsing um ryksugu sem sögð var vera með gervigreind.  Jafnframt voru taldir upp eiginleikar ryksugunnar,  svo sem að hún viti alltaf hvar hún sé búin að ryksuga.  Þá hrökk upp úr stráknum: 

  "Mamma er líka með gervigreind.  Hún veit alltaf hvar hún er búin að ryksuga!"

Klósetttískan í dag - Já, og burt með spillingarliðið!

  Heidi Strand benti mér á þessa skemmtilegu klósettaðstöðu fyrir fatlaða í Ranavík í Sunnhornlandi í Noregi.  Mér varð á að hlæja eins og fífl.  Fötluðum í Ranavík er hinsvegar ekki hlátur í huga.  Þeim þykir aðstaðan vera niðurlægjandi fyrir sig.  Einkum eru þeir fötluðu verulega ósáttir við gluggann á klósettherberginu.  Þeir hafna ábendingu um að glugginn sé mikilvægt öryggistæki.  Ef eitthvað kemur fyrir fatlaða á klósettinu,  til að mynda að þeir falli á gólfið og liggi þar ósjálfbjarga,  sé gott að vegfarendur geti séð það og kallað á aðstoð.

 

  Þetta klósett er í svefnherbergi í Hveragerði.  Frúin á heimilinu segir að þau hjónakornin hafi ekkert að fela.  Aðrar heimildir herma að gestir séu tregir til að nota þessa aðstöðu.

 

  Sá sem hannaði þetta klósett bendir á hagræðinguna við það að vatnið í fiskabúrinu endurnýi sig í hvert sinn sem sturtað er niður.  Það er fín sía í botni vatnskassans sem hindrar að fiskarnir sturtist niður með vatninu.  Hönnuðinum og framleiðandanum til mikilla vonbrigða hefur þetta klósett ekki náð þeim vinsældum sem vonast var til. 

  Þessi klósettaðstaða fyrir gesti er á veitingastað í Norður-Karólínu í Bandaríkjunum.  Ég hef ekki komið til N-Karólínu en vinafólk mitt sem er búsett þar segir að alvanalegt sé þar um slóðir að tvö til þrjú klósett séu staðsett hlið við hlið á þennan hátt á veitingastöðum.

Veitingahús - umsögn

  - Staður:  Bautinn,  Akureyri

  - Réttur:  Svartfugl

  - Verð:  2620 krónur

  - Einkunn: **** (af 5)

  Bautinn er einn af bestu veitingastöðum landsins.  Þar hefur í áranna rás verið á boðstólum spennandi réttir á borð við kengúrukjöt,  hreindýr,  krókódíll og fleira sem ekki er á borðum Íslendinga dags daglega.  Ætíð matreitt á óaðfinnanlegan hátt.

  Með svartfuglinum mátti einnig greina nokkrar þunnt skornar sneiðar af gæsabringu.  Kjötið var meirara,  safaríkara og mýkra en ég hafði reiknað með.  Virkilega gott.  Meðlæti var bragðgóð villibráðarsósa - að ég held með soði úr svartfuglskjötinu - brúnaðar (sykraðar) kartöflur,  smjörsteiktur laukur,  sveppir og gulrætur,  svo og,  ja,  ég held títuberjasultu.    

  Allt matreitt eins og best var á kosið.  Ferska salatið var ekki spennandi:  Iceberg og smávegis af rauðrófum.  Á móti kom að með aðalrétti fylgir salatbar.  Hann er veglegur.  Í minningunni var hann ennþá meira spennandi fyrir 15 - 20 árum.  Þá var hann besti salatbar landsins.  Ég átta mig þó ekki á muninum.  Man bara að hann var alveg meiriháttar.

  Köldu sósurnar á salatbarnum eru gráðostasósa,  kotasælusósa og appelsínusósa.  Ég sakna þúsundeyjasósu og franskrar sósu (þessarar bragðgóðu appelsínugulu).  Sem betur fer passar (heldur þunn) appelsínusósan mjög vel við svartfugl.  Ef ég hefði fengið mér eitthvað annað en svartfugl hefði ég lent í vandræðum með að velja sósu við hæfi.

  Ferska salatið með svartfuglinum var iceberg og rauðkál.  Meðlætið úr salatbarnum var áhugaverðara. 

  Með aðalrétti fylgir val á rjómalagaðri sveppasúpu og/eða glærri grænmetissúpu.  Ég fékk mér grænmetissúpu.  Hún var bragðgóð með skörpu karrýbragði.  Með henni var hægt að velja úr góðu úrvali af brauði.  Ég er ekkert að maula brauð með svona veislumat.  Þannig að það skipti ekki máli.

  Með svartfulgi á að þamba rauðvín.  Og helst mikið.  Flaska af spænsku rauðvíni kostaði 3210 kr.

  Ljósmyndin efst er ekki frá Bautanum.     

Hagfræði fyrir byrjendur

 

  Í þorpi einu birtist maður og kvaðst vilja kaupa apa af þorpsbúum á 1000 krónur stykkið. Þar sem mikið var um apa í nágrenni þorpsins fóru þorpsbúar að veiða apana og selja manninum þá. Maðurinn keypti þúsundir apa af þorpsbúum á 1000 krónur.  Þegar framboðið fór að minnka bauðst maðurinn til að borga 2000 krónur fyrir apann. Aftur jókst framboðið um tíma, en síðan minnkaði það enn frekar og hætti loks alveg þar sem erfiðara var fyrir þorpsbúa að finna fleiri apa til að selja.
  Maðurinn tilkynnti þá að hann mundi borga 5000 krónur fyrir hvern apa sem hann fengi, en hann þyrfti að skreppa frá í smá tíma og aðstoðarmaður hans mundi sjá um kaupin á meðan. Eftir að maðurinn var farinn hóaði aðstoðarmaðurinn þorpsbúum saman og bauðst til að selja þeim apana, sem voru geymdir í búrum, á 3500 krónur stykkið. Fólkið gæti svo - þegar maðurinn kæmi aftur - selt honum apana á 5000 krónur. Þorpsbúar söfnuðu saman öllu sínu sparifé og keyptu apana af aðstoðarmanninum. Síðan hefur ekkert spurst til mannsins eða aðstoðarmannsins.

  Ofangreinda sögu fékk ég senda áðan.  Eftir að hafa lesið hana skildi ég allt í einu betur íslenska bankakerfið og hlutabréfamarkaðinn.  

Þurfa ekki að greiða fyrir hluti í Kaupþingi

Akureyrsk matarmenning

  Þegar ég var krakki og unglingur í Skagafirði á sjöunda áratugnum var sport að fara til Akureyrar.  Pylsa með öllu á Akureyri var ekki aðeins pylsa með hráum og steiktum lauk,  sinnepi,  tómatsósu og remúlaði heldur einnig kokteilsósu og rauðkáli.  Ís í Brynju á Akureyri var öðru vísi en annar ís.  Mér þótti hann ekki góður en hann vandist svo vel að í dag er ekki farið til Akureyrar án þess að fá sér Brynjuís.  Það er líka gaman að fá sér á Akureyri pylsu með kokteilsósu og rauðkáli.  Í því tilfelli er ekki talað um pylsu með öllu heldur pantar fólk sér Eyfirðing.  Á Akureyri er pylsan frá Kjarnafæði en ekki Sláturfélagi Suðurlands (SS) eins og í Reykjavík.  Pylsan frá Kjarnafæði er betri. 

  Á Akureyri er allt gumsið sett undir pylsuna.  Það er heppilegra.  Í Reykjavík er sinnepið sett ofan á pylsuna.  Í mörgum tilfellum remúlaðið og tómatsósan einnig.  Þá vill það festast í yfirvaraskegginu.  Og jafnvel hanga þar eins og klístur frameftir degi.  Það er ekki flott.

  Hamborgari á Akureyri er með frönskum kartöflum lögðum ofan á kjötið.  Kartöflurnar sjúga í sig safa úr hamborgaranum og þetta smakkast vel.  Í gær fékk ég mér nautakjötsloku á skyndibitastað á Akureyri.  Ég man ekki hvað hann heitir.  Hann er í sama húsi og Shell í Glerárþorpi.  Frönskum kartöflum var raðað ofan á kjötið.  Dáldið skrítið.  En gerði kjötlokuna að "meiri" máltíð.

  Þegar Akureyringur pantar sér í fyrsta skipti hamborgara utan Akureyrar undrast hann að frönsku kartöflurnar séu hafðar sér.  Honum þykir það vera hámark lélegrar þjónustu að afgreiðslumanneskjan skuli ekki nenna að raða kartöflunum ofan á hamborgarann. 

  Það er gaman að fara út á land og kynnast öðruvísi matarmenningu.  Fara í verslunarmiðstöð Akureyrar,  Glerártorg,  og fá staðgóða hrefnusteik eða lambalæri í Kaffi Torgi.  Til samanburðar er í Kringlunni í Reykjavík bara boðið upp á ómerkilegan ruslskyndibita (junk food) á borð við pizzur og hamborgara.

Söluhæstu tónlistarmenn heims

 

  Svona listi getur aldrei verið 100% nákvæmur.  Plötur vinsælustu flytjenda eru framleiddar ólöglega í stórum upplögum.  Ekki aðeins í 3ja heiminum heldur líka víða um Evrópu.  Sala á sjóræningjaplötum kemur hvergi fram í opinberum tölum.

  Óvíst er að sala á sjóræningjaplötum breyti innbyrðis hlutfalli söluhæstu flytjenda verulega.  Það er frekar að hún breyti upplagstölum. 

  Á aðdáendanetsíðum flytjenda og bókum um þá skráðum af aðdáanda eru iðulega gefnar upp mun hærri sölutölur en hlutlausar heimildir herma.  Aðdáendum hættir til að ýkja tölur um velgengni flytjandans og í sumum tilfellum verja þeir sína tölu með því að áætluð sala á sjóræningjaplötum sé með í tölunni.

  Það má - til gamans - velta fyrir sér ójafnri stöðu hljómsveita með stuttan líftíma og sólósöngvara með langan starfsferil.  Bítlarnir spiluðu inn á plötur í 6 ár.  Cliff Richard hefur verið að í hálfa öld og er hvergi nærri hættur. 

  Einnig má velta fyrir sér að jarðarbúum hefur fjölgað frá 2 milljörðum á sjötta áratugnum í hálfan sjöunda milljarð.  Á sjötta og sjöunda áratugnum var plötuspilari sjaldgæf lúxuseign.  Í dag er aðstaða til að spila plötur á allflestum vestrænum heimilum og víðar.  Vinsældir gömlu poppstjarnanna voru þess vegna hlutfallslega meiri en sölutölurnar gefa til kynna í samanburði við yngri poppstjörnur.

Söluhæstir - allir sem hafa selt 200 milljónir platna eða fleiri:

1.    Bítlarnir - rúmlega 1000 millj

2.    Elvis Presley - um 1000 millj

3.    Michael Jackson - 750 millj

4.    Frank Sinatra - 600 millj

5.    Bing Crosby - rúmlega 500 millj

6.    Abba - 370 millj

7.    Bob Marley - yfir 300 millj

7.    Drifters - yfir 300 millj

7.    Led Zeppelin - yfir 300 millj

8.    Nana Mouskouri - 300 millj

8.    Queen -300 millj

9.    Julio Iglesias - yfir 250 millj

10.  AC/DC - 250 millj

10.  Alla Pugacheva (rússneskur) - 250 millj

10.  Cliff Richard - 250 millj

10.  Elton John - 250 millj

11.  Bee Gees - 220 millj

12.  A.R. Rahman (indverskur) - yfir 200 millj

12.  Cher - yfir 200 millj

12.  Madonna - yfir 200 millj

12.  Pink Floyd - yfir 200 millj

12.  Rolling Stones - yfir 200 millj

12.  Wei Wei (sænsk - ættuð frá Kína) - yfir 200 millj

13.  Celena Dion 200 mill

13.  Herbert von Karajan (austurískur nasisti) - 200 millj

13.  Tino Rossi (franskur) - 200 millj

  Af íslenskum tónlistarmönnum hefur Björk selt,  ja,  15 milljónir platna?  Sigur Rós um 5 milljónir.  Hvað ætli hljómsveitin ömurlega,  Stjórnin, hafi selt?  0,015 milljónir?  Vonandi eru flestir búnir að henda þeim plötum í ruslið.  Þær eiga hvergi annarsstaðar heima. 

     

Merkustu konur rokksins

  Þennan lista yfir merkustu konur rokksins (greatest women in rock and roll) fann ég óvænt uppi í hillu hjá mér.  Nánar tiltekið á bakvið Biblíuna.  Tilviljun?  Ég veit það ekki.  Ég veit heldur ekki hvernig valið var á listann.  Enda skiptir það ekki máli út af fyrir sig.  Ég er nokkuð sáttur við listann.  En þú?  Það er sjónvarpsstöðin VH1 sem stendur að baki listanum. 

36

Björk

30

Rickie Lee Jones

29

Karen Carpenter

28

Carly Simon

27

Joan Baez

26

Bessie Smith

25

Marianne Faithfull

24

Dusty Springfield

23

The Mamas & The Papas

22

Emmylou Harris

21

Linda Ronstadt

20		Grace Slick
19		Etta James
18		Gladys Knight
17		Chaka Khan
16		The Supremes
15		Patti Smith
14		Stevie Nicks
13		Ella Fitzgerald
12		Debbie Harry
11		Patsy Cline
10		Carole King
9		Annie Lennox
8		Madonna
7		Chrissie Hynde
6		Billie Holiday
5		Joni Mitchell
4		Bonnie Raitt
3		Janis Joplin
2		Tina Turner
1		Aretha Franklin

Veitingahús - umsögn

 - Staður:  Sjávarbarinn,  Grandagarði 9,  Reykjavík

 - Réttur:  Kvöldverðarhlaðborð

 - Verð:  1300 kr.

 - Einkunn: **** (af 5)

  Undanfarna mánuði hefur hádegisverðarhlaðborð á Sjávarbarnum kostað 1400 krónur og kvöldverðarhlaðborðið 2600 krónur.  Vegna kreppunnar hafa aðstandendur Sjávarbarsins tekið sig til og gefa nú 50% afslátt á kvöldverðarhlaðborðinu.  Önnur veitingahús mættu taka sér þetta uppátæki til fyrirmyndar.  Reyndar var tailenski veitingastaðurinn Siam í Hafnarfirði að lækka verð á sínum réttum um 300 kall,  úr 1790 í 1490 kr.

  Eins og nafn staðarins bendir til er Sjávarbarinn fyrst og fremst sjávarréttastaður.  Engu að síður er hægt að panta sér lambahrygg eða grænmetisrétt þar.

  Réttum á hlaðborði Sjávarbarsins hefur fjölgað frá því ég borðaði þar síðast,  fyrir nokkrum mánuðum.  Það sem sést á ljósmyndinni hér fyrir ofan er varla nema helmingur af því sem nú er á boðstólum á hlaðborðinu.

  Hægt er að fá sér eitt og annað í forrétt.  Meðal annars grafinn silung (held ég fremur en lax) og ýmis salöt,  sem einnig er upplagt að snæða með aðalrétti.  Í aðalrétt stendur val á milli djúpsteiktra fiska í raspi (ýsa) eða orlý (hlýri),  gratíneraðra fiskrétta,  steiktra fiskibolla með smjörsteiktum lauk og ýmislegs annars.  Hægt er að velja á milli nokkurra afbrigða af kartöflum,  m.a. soðnum, djúpsteiktum bátum og ofnsteiktum niðursneiddum.  Einnig er hægt að velja á milli nokkurra kaldra sósa.

  Plokkfiskurinn er sérstaklega góður.  Það eina sem ég sakna á hlaðborðinu er pönnusteiktur fiskur. 

  Á sumum hlaðborðum er hver og einn réttur merktur.  Slíkt mætti taka upp á Sjávarbarnum.  Það getur verið gott að vita fyrir víst hvað er hvað. 

  Þegar ég fór á Sjávarbarinn í sumar var mér boðin súpa með hlaðborðinu.  Ég held að súpa fylgi ennþá hlaðborðinu.  Hinsvegar var mér ekki boðið upp á hana núna.  Sem gerði ekkert til.  Nóg var af öðru að maula.    

  Staðurinn er frekar lítill,  en opinn og dálítið kuldalegur.  Sprittkerti loga á borðum og fremstu borð eru dúkuð.  Á veggjum eru litrík málverk eftir Tolla og ljósmyndir af fiskum. 

  Hálfur lítri af bjór kostar 700 kall.  Það er í hærri kantinum. 

Umsagnir um önnur veitingahús:

- Langbest

http://jensgud.blog.is/blog/jensgud/entry/648245

- IKEA 

http://jensgud.blog.is/blog/jensgud/entry/680274

- Icelandic Fish & Chips 

http://jensgud.blog.is/blog/jensgud/entry/643187

- American Style

http://jensgud.blog.is/blog/jensgud/entry/630463

- Pítan

http://jensgud.blog.is/blog/jensgud/entry/590495

- Hrói höttur

 http://jensgud.blog.is/blog/jensgud/entry/641856