Smásaga - byggð á raunverulegum atburði

  Gösli hefur alltaf haft það gott.  Hann hefur stofnað ýmis fyrirtæki sem fóru vel af stað.  Hann var með góðar hugmyndir og góðar vörur.  En óþolinmæði í að verða ríkur hefur valdið því að hann hefur áráttu til að grípa til ólöglegra flýtileiða að markmiðinu.  Honum sést ekki fyrir og dæmin hafa endað ýmist með málaferlum og/eða kollsteypu (gjaldþroti).  Um tíma varð hann að flýja land á meðan mál fyrndust og viðskiptavinum sem töldu sig svikna rynni reiði.

  Hann á góða konu.  Hún hefur haldið heimilinu gangandi með því að vinna tvöfalda vinnu.  Jafnframt standa að henni ríkir ættingjar sem eru örlátir við að hlaupa undir bagga fjárhagslega þegar vindar blása þannig.

.

  Eitt sinn helltist yfir Gösla áhugi fyrir að smíða flugvélamódel í stærðinni 1/10.  Hann lét konuna ekki vita af þessu.  Leigði sér verkstæði úti í bæ og hóf smíðar.  Hann taldi konunni trú um að hann væri að vinna í næsta viðskiptamódeli sem myndi gera þau rík. 

  Næstu mánuði sat Gösli við smíðar.  Hann er laghentur og allt gekk vel.  Hann málaði á flugvélamódelið viðeigandi merkingar og þetta var allt hið glæsilegasta.

. 

  Loks var flugvélamódelið fullsmíðað.  Gösli blés til veislu uppi á Sandskeiði.  Bauð vinum sínum upp á grill,  kartöflusalat og bjór smygluðum ofan af Keflavíkurvelli.  Þetta var áður en bjór varð leyfilegur á Íslandi. 

  Eftir vel heppnaða veislu var flugvélamódelið sett í jómfrúarflug með fjarstýringu.  Flugvélamódelið fór á loft með stæl við mikil fagnaðarlæti og klapp.  Áður höfðu viðstaddir hlaðið hrósi á Gösla og dáðst að flugvélamódelinu.

  Þegar flugvélamódelinu var snúið við ruglaðist Gösli í ríminu.  Hann réði ekki við að stýra því með öfugum formerkjum.  Hugsanlega var bjórnum eitthvað um að kenna.  Allt fór í rugl.  Módelið krassaði og mölbrotnaði.

  Þá varð Gösla að orði:  "Það er eins gott að konan vissi aldrei af þessu.  Annars þyrfti ég að sofa í stofusófanum næsta mánuðinn."

----------------------------------------

  Fleiri sögur og örleikrit (flest skáldskapur):

- Miðaldra maður

http://jensgud.blog.is/blog/jensgud/entry/944608

- Leyndarmál stráks

http://jensgud.blog.is/blog/jensgud/entry/928198

- Ættleiðing

http://jensgud.blog.is/blog/jensgud/entry/916687/

- Strákur með sög

http://jensgud.blog.is/blog/jensgud/entry/903540

- Hundur

http://jensgud.blog.is/blog/jensgud/entry/863130

- Boltabulla

http://jensgud.blog.is/blog/jensgud/entry/718347

- Skokkari

http://jensgud.blog.is/blog/jensgud/entry/606929

- Strákur skiptir um gír

http://jensgud.blog.is/blog/jensgud/entry/538649

- Morðsaga

http://jensgud.blog.is/blog/jensgud/entry/320299

- 27 ára

http://jensgud.blog.is/blog/jensgud/entry/299380

- Um borð

 http://jensgud.blog.is/blog/jensgud/entry/278812

- Matarboð í sveitinni

http://jensgud.blog.is/blog/jensgud/entry/266411

- Í plötubúð

http://jensgud.blog.is/blog/jensgud/entry/260037

Klúður

  Kunningi minn hélt tvö heimili.  Eitt í Reykjavík og annað í þorpi í töluverðri fjarlægð frá Reykjavík.  Hann vann og vinnur í Reykjavík en kona hans og börn bjuggu í þorpinu.  Þar eyddi kunninginn helgum í faðmi fjölskyldunnar.  Svo brá við eina aðfaranótt fimmtudags að hann þurfti að sækja eitthvað á heimili sitt í þorpinu.  Hann var að vinna til miðnættis í bænum.  Allir voru sofandi í þorpinu og hann læddist inn til sín og gætti þess að vekja enga.  Er hann opnaði dyr svefnherbergisins sá hann konu sína sofa þar værum svefni ásamt manni sem hann kannaðist við.

  Kunninginn læddist aftur út og brunaði til Reykjavíkur.  Daginn eftir hringdi hann í konuna og spurði:  "Hvernig getur þú gert mér þetta; að draga upp í hjónarúm okkar annan mann?"  Konan svaraði:  "Þér kemur það ekki við."  Svo skellti hún á og svaraði ekki fleiri símtölum frá kunningjanum.

  Kunninginn var niðurbrotinn og miður sín.  Hann sá í hendi sér að hjónabandið var búið.  Hann ákvað að skella sér til Keflavíkur og sletta ærlega úr klaufunum á laugardagskvöldinu.  Pantaði sér hótelherbergi og var mættur í það síðdegis á laugardeginum.  Hann var þreyttur eftir kvöldvakt í vinnu á föstudeginum og lagði sig á hótelherberginu.  Hann vaknaði sprækur um klukkan 9,  skellti í sig nokkrum koníaksskotum,  fór í sturtu,  rakaði sig og klæddi í sparifötin.  Fór síðan niður í borðsal og pantaði veglegan kvöldmat.  Þjónninn svaraði að einungis morgunmatur stæði til boða.  Kunningjanum þótti það einkennilegt og gerði athugasemd.  Eftir smá spjall um morgunverð sagði þjóninn:  "Kíktu hér út um glugga.  Hér er ekkert um að vera.  Allt steindautt á sunnudagsmorgni í Keflavík."

  Kunninginn hafði sofið af sér laugardagskvöldið og það var kominn sunnudagsmorgunn.  Kunninginn var orðinn það hreifur af koníakinu að ekki var um annað að ræða en drekkja sorgum sínum áfram á hótelinu og bölva fram að næstu nótt.  Helgin ónýt.  Eins og hjónabandið.

Krúttlegt - eða...?

 

  Ég fór í matvöruverslun til að kaupa mér Malt.  Skammt frá mér var kona með innkaupakerru.  Í barnasæti kerrunnar sat á að giska fjögurra ára drengur.  Ég var ekkert að fylgjast með þeim en heyrði drenginn segja:  "Kaupum svona."  Konan svaraði:  "Nei,  ekki núna."  Strákur mótmælti hástöfum með blöndu af frekju- og hálfgrátandi röddu:  "Jú,  mig langar svo í svona."  Konan útskýrði vandamálið:  "Ég á ekki pening fyrir þessu.  Ég á ekki einu sinni pening fyrir öllu sem ég þarf að kaupa."

  Við þessi orð var dreng brugðið.  Hann saup hveljur og spurði með uppglennt augu hálf skelfdur:  "Verðum við þá að stela?"

Sérkennilegar skilnaðartertur

  Í Bandaríkjunum halda konur upp á hjónaskilnað með heilmikilli veislu fyrir vinkvennahópinn.  Skilnaðartertan er ómissandi í veislunni.  Útfærslurnar geta orðið skrautlegar.  Ekki síst ef skilnaðurinn hefur verið í illu.  Það hefur ekkert verið átt við myndirnar af þessum tertum í tölvu (fótósjopp).  Húmor nýfráskilinna kvenna er bara svona þó ég skilji ekki alveg hver punkturinn á að vera með sumum tertunum.

  "Loksins,  loksins er ég laus við þetta fífl!!"

  "Farðu út með ruslið!!"

 

Passið ykkur á hvítlauknum

  Hvítlaukur er hollur og skerpir á góðu bragði margra lystugra veislurétta.  Hvítlauksátið verður þó að vera í hófi.  Annars getur farið eins og fyrir þessari konu: 

Áhrifamestu hljómsveitirnar

  Yngvi Högnason (www.yngvii.blog.is) benti mér á skemmtilegan lista yfir 50 áhrifamestu pönkrokkhljómsveitir sögunnar.  Listinn er augljóslega tekinn saman af Bandaríkjamönnum.  Uppistaðan af hljómsveitunum á listanum eru bandarískar og sumar lítt þekktar utan Bandaríkjanna.   Fátt veit ég um aðstandendur listans og netsíðuna The Pulp Lists. 

 Svona er listinn (innan sviga er merkt við þær hljómsveitir sem eru ekki bandarískar):

1   The Sonics

  Þetta er bítlahljómsveit frá sjöunda áratugnum.  Fjarri því pönkhljómsveit nema Bítlarnir,  Kinks,  Rolling Stones,  Who og Hljómar (Thor´s Hammer) hafi verið pönk.  Rokk The Sonics var blúsað og hrátt,  féll undir stíl bílskúrsrokks (garage).  Pönkið varð til mörgum árum eftir að The Sonics hætti.  Pönkið var og er - ekki síður en rokkmúsíkstíll - tiltekið lífsviðhorf og afstaða til músíkbransans eins og hann var um miðjan áttunda áratuginn.  

  The Sonics náði ekki alvöru vinsældum og er lítt þekkt utan Bandaríkjanna.  Hljómsveitin var endurreist fyrir 2 árum eða svo.  Hún hefur lagað gamla bítlarokkið sitt að útjaðri pönksins.  Jafnframt hefur verið sett í gang vel skipulögð herferð sem gengur út á að telja fólki trú um að The Sonics hafi verið fyrsta pönkhljómsveit heims.  Og nú er hún á The Pulp Lists skilgreind áhrifamesta pönkhljómsveit sögunnar.  Ég get ekki kvittað upp á að The Sonics hafi haft nokkur áhrif á pönkið.  Síst af öllu á hún heima á lista yfir 50 áhrifamestu pönkhljómsveitirnar.  Kannski getur hún verið í sæti 500. Að öðru leyti er listinn ekki alveg út í hött.  Eða hvað finnst þér?     

2   Ramones

  Ramones var eina hljómsveitin í bandarísku pönksenunni á miðjum áttunda áratugnum sem var eins og klæðskerasaumuð að hætti breska pönksins.  Varð fyrir bragðið mun vinsælli í Evrópu en í Bandaríkjunum.

3   The Clash (ensk)

  The Clash var fyrsta og eiginlega eina pönksveitin til að verða súpergrúppa á heimsmælikvarða. Í dag er The Clash í hópi stærstu rokkbanda heims á alþjóðavettvangi.  Ég hef 5 sinnum farið til Bandaríkjanna og það er skrítið að heyra lög The Clash spiluð grimmt í hinum ýmsu útvarpsstöðvuð sem spila ekki aðeins pönk heldur líka útvarpsstöðvar sem einskorða sig við léttpopp,  fönk,  reggí,  djass...   

4   Dead Kennedys

  Sprellararnir í Dead Kenndys voru næstir á eftir Ramones til að verða fræg bandarísk pönksveit á alþjóðavettvangi.  Vinsældir Dead Kennedys voru/eru meiri utan Bandaríkjanna en innan.  Þegar við Sævar Sverrisson,  söngvari Spilafífla,  rákum pönkplötubúðina Stuð í upphafi níunda áratugarins fór Sævar í innkaupaferð til New York.  Í plötubúð þar spurði Sævar um plötur með Dead Kennedys.  Afgreiðslumaðurinn kannaðist ekki við hljómsveitina og hélt að Sævar væri að hæðast að Kennedy-fjölskyldunni.  Steitti hnefa og spurði hvað Sævar ætti við með "Dauðum Kennedyum".  Sævar þurfti að útskýra málið með tilvísun í hljómsveitina.

  1987 keypti ég plötu með Dead Kennedys í plötubúð í Florida.  Síðhærður afgreiðslumaðurinn sagði við mig með þunga:  "Mér ber skylda til að vara þig við að þessi plata inniheldur klám og óþverra orðbragð."  Ég svaraði:  "Það er gaman.  Ég þekki þessa plötu.  Hún er ansi hressileg."  Ég keypti fleiri plötur í þessari plötubúð.  Afgreiðslumaðurinn setti plötuna með DK í brúnan poka áður en hann setti hinar plöturnar í poka og sagði:  "Það er betra að börn sjái ekki þessa plötu." 

5   Sex Pistols (ensk)

  Flestir aðrir en Bandaríkjamenn myndu setja Sex Pistols í 1.  sæti yfir áhrifamestu pönksveitir.  Sex Pistols náðu aldrei almennilega inn á Bandaríkjamarkað.  Bandarískir harðlínupönkarar þekkja þó hljómsveitina og gera sér grein fyrir að Sex Pistols var stórt dæmi í pönkinu.  En í þeirra huga var The Clash aðal númerið í bresku pönkbyltingunni.

6   Minor Threat

7   The Misfits

8   Black Flag

9   Bad Religion

10 Crass (ensk)

11 Adolescent 

12 Bad Brains

13 Descentend

14 The Exploited (skosk)

15 Agnostic Front

16 7 Seconds

17 Suicidal Tendencies

18 The Stoogies

19 NOFX

20 Pennywise

21 The Damned  (ensk)

22 Operation Ivy

23 Subhumans (ensk)

24 D.R.I.

25 Fear

26 Angry Samoans

27 Social Distorion

28 Agent Orange

29 Reagan Youth

30 T.S.O.L.

31 Cirkle Jerk

32 Dag Nasty

33 D.O.A.  (kanadísk)

34 The Germs

35 D.I.

36 Stiff Little Fingers (írsk)

37 Rancid

38 Lagwagon

39 Sick of It All

40 Propagandhi (kanadísk)

41 Husker Du

42 The Dead Milkmen

43 Down by Law

44 The Big D and the Kids Table

45 The Vandals

46 Screeching Weasel

47 Face to Face 

48 S.O.D. (Storm Troopers of Death) 

49 Total Chaos

50 No Use for a Name  

Sami flytjandi á 14 af 17 söluhæstu plötum heims í síðustu viku

  Það er sjaldgæft að sami flytjandi eigi í sömu viku 2 af 20 söluhæstu plötum heims.  Það hefur þó gerst örfáu sinnum.  Ég minnist þess ekki að sami flytjandi hafi átt 3 af 20 söluhæstu plötum heims samtímis.  Þó má vera að það hafi gerst í kjölfar dauða Mikjáls Jacksonar.  Hitt er alveg víst að aldrei áður hefur sami flytjandi átt 14 af 17 söluhæstu plötum heims samtímis.   Hljómsveitin sem afrekaði þetta í vikunni 10. - 16.  september 2009 spilaði síðast saman fyrir fjórum áratugum.  Á stuttum ferli sló hún ótal sölumet.  Mörg standa enn.  Til að mynda að í júní 1964 átti hún 6 vinsælustu lögin í Bandaríkjunum.  Auk þess fleiri lög neðar á bandaríska vinsældalistanum.  Þetta ár,  1964,  átti hljómsveitin 60% af heildarsölu platna í Bandaríkjunum.

  Bítlaplötur hafa selst í 1,2 milljarði eintaka.  Það er fyrir utan sólóplötur liðsmanna Bítla.  Þær hafa flestar selst í góðu upplagi.  Næst söluhæsti flytjandinn,  Presley (nei,  ég er ekki að meina söngvarann í The Troggs heldur hinn),  hefur selt tæpan milljarð platna.  Plötuferill hans spannaði röska tvo áratugi en plötuferill Bítlanna 7 ár.  Þriðji söluhæsti flytjandinn,  Abba,  hefur selt um 500 milljónir platna.  Ég vil sem fæst vita um þá drepleiðinlegu hljómsveit. 

  Ástæðan fyrir mikilli sölu á plötum Bítlanna í dag er talin vera sú að þær voru nýverið gefnar út í hreinna "sándi" en áður.  Um svipað leyti var settur á markað einhver Bítlatölvuleikur.  Við það er eins og Bítlaæði hafi skollið á heimsbyggðina.     

  Þetta voru söluhæstu plötur liðinnar viku (innan sviga er fjöldi seldra eintaka):

1.   Jay-Z:  Blueprint 3  (489.000)

2.   Bítlarnir:  Sgt. Pepper´s Lonely Hearts Club Band  (258.000)

3.   Bítlarnir:  Abbey Road  (243.000)

4.   Bítlarnir:  Hvíta albúmið  (230.000)

5.   Bítlarnir:  Rubber Soul  (228.000)

6.   Bítlarnir:  Revolver  (216.000)

7.   Bítlarnir:  Help!  (196.000)

8.   Bítlarnir:  Magical Mystery Tour  (184.001)

9.   Bítlarnir:  A Hard Day´s Night  (184.000)

10. Bítlarnir:  Please,  Please Me  (178.000)

11. Bítlarnir:  With The Beatles  (172.000)

12. Bítlarnir:  Beatles For Sale  (170.000)

13. Bítlarnir:  Let It Be  (154.000)

14. Bítlarnir:  Past Masters  (153.000)

15. Whitney Houston:  I Look To You  (140.000)

16. Mai Kuraki:  All My Best  (137.000)

17. Bítlarnir:  Yellow Submarine  (121.000)

  Til gamans má geta að fyrra lagið er frá 1963 en seinna frá 1969.  Fyrra lagið var lokalag á hljómleikum Bítlanna því það slátraði alltaf raddböndum Johns Lennons.

  Seinna lagið var hugsanlega níðsöngur Pauls um Yoko Ono,  kærustu Johns.  Paul hefur þó alltaf þrætt fyrir það.  Fullyrðir að það hafi aldrei hvarflað að sér að ráðast að henni alveg burt séð frá því að hann hafi ekki verið sáttur við hvernig hún kom inn í feril Bítlanna.  Það er þó ekki alveg hægt - með vilja - að útiloka kenninguna því Paul er diplómat:  Gefur oftar í skyn fremur en segja hlutina beint út. 

  Athygli vekur að rythmagítarleikarinn John er þarna sólógítarleikari.  Sólógítarleikari Bítlanna,  George Harrison,  var í fýlu út í Paul og sagðist ekki nenna að taka við fyrrskipunum hans um sólógítar í laginu.  Paul böggaðist aldrei í John,  öfugt við út í Ringo og George.  Ringó er flottur í laginu.

Hver er besta plata Megasar?

  Fyrir nokkrum dögum lauk skoðanakönnun hér á þessari bloggsíðu um bestu íslensku smáskífurnar.  Niðurstöðuna má sjá á: http://jensgud.blog.is/blog/jensgud/entry/935563.  Ég á eftir að rýna betur í niðurstöðuna.  Núna er ný skoðanakönnun komin í gang.  Í henni er spurt um bestu plötur Megasar.  Ég varpa spurningunni til ykkar:  Vantar á listann einhverja plötu Megasar sem er betri en þær sem ég tilnefni?

Anna á Hesteyri - örfá minningarorð

  Hér fyrir neðan eru nokkrar skemmtilegar sögur af Önnu Mörtu Guðmundsdóttur frænku minni frá Hesteyri í Mjóafirði.  Hún lést aðfaranótt gærdags áttræð að aldri.  Faðir Önnu og faðir mömmu minnar voru bræður.  Anna var einkabarn aldraðra foreldra sinna.  Hún var að ofvernduð af foreldrum sínum og batt sína bagga ekki sömu böndum og aðrir.

  Anna var með góða eðlisgreind en vegna einangrunar kom hún sér upp sérkennilegum skoðunum.  Hún var náttúrubarn fram í fingurgóma og tók ung einarða afstöðu með trúarviðhorfum aðventista. 

  Æskuminningar mínar af Önnu einkennast af bréfum sem voru ítarlegar lýsingar á húsdýrum hennar og foreldra hennar.  Við,  sex systkini,  fengum reglulega frá Önnu löng bréf,  hvert um sig.  Þar tíundaði hún það sem helst hafði á daga húsdýra hennar drifið.  Hún endurtók ekkert frá einu bréfi til annars.  Hún skrifaði um dýrin sín eins og um nána ættingja/vini væri að ræða. 

  Eftir að ég flutti til Reykjavíkur á unglingsárum kynntist ég Önnu í persónu.  Hún heimsótti mig og mína fjölskyldu og samskipti urðu meiri.  Þegar hún heimsótti mig á auglýsingastofuna sem ég vann á lagðist vinna niður og vinnufélagarnir grétu úr hlátri undir frásögnum Önnu af sér og sínum.  Þó var það ekki ætlun Önnu að koma fólki til að hlægja.  Það var bara ekki annað hægt. 

  Eftir að símataxti á Íslandi varð eitt markaðssvæði var Anna dugleg að hringja í mig.  Þau símtöl skildu mig oftar en ekki í hláturkrampa yfir vangaveltum Önnu um lífið og tilveruna.  Hún hafði sterkar skoðanir á öllu og öllum.  Þær skoðanir voru oft frumlegar og hún velti upp flötum sem ég hafði aldrei hugsað út í.

  Eitt sinn barst mér bréf frá Önnu sem innihélt einnig fjölda ljósmynda af mömmu og fleiri ættingjum. Utan á umslaginu stóð:  "Heimilisfólkið á Grettisgötu".  Póstburðarmanneskjan hafði greinilega fært þetta umslag hús frá húsi við Grettisgötu dögum saman.  Á umslaginu var gamall dagstimpill og það hafði verið rifið upp. 

  Anna velti sér aldrei upp úr smáatriðum varðandi póstáritun.  Fyrir síðustu jól hringdi í mig kona.  Henni hafði borist jólakort frá Önnu Mörtu.  Konan þekkti Önnu ekki persónulega og vissi að kortið var ekki til sín.  Á umslaginu stóð aðeins:  "Kristín Jónsdóttir,  Reykjavík".  Sem betur fer vissi ég hver átti að vera viðtakandi kortsins.  Sú býr í Kópavogi,  sem,  jú, er stutt frá Reykjavík.

  Mér þykir líklegt að Anna verði jörðuð í fjölskyldugrafreitnum á Hesteyri.  Þar hvíla foreldrar hennar og afi minn og amma.  Anna var áður búin að gefa út yfirlýsingu þess efnis að vilja verða síðasta manneskja greftruð þar.  Hinsvegar tók hún fram að ef hún félli frá í öðrum landshluta mætti ekki eyða peningum í að flytja kistu hennar til Mjóafjarðar.  Þeim kostnaði ætti frekar að verja til þeirra sem minna mega sín í þjóðfélaginu. 

  Á seinni árum tók Anna að sér róna frá Reykjavík.  Þar á meðal ýmsa landfræga.  Þegar Anna ámálgaði fyrst við mig að hún vildi fá að taka að sér róna frá Reykjavík sagði hún að rónar væru svo skemmtilegir.  Bogi og Örvar í Spaugstofunni væru hennar uppáhald.  "Rónarnir í Spaugstofunni eru lang skemmtilegastir,"  sagði Anna.

  Hér eru nokkrar sögur af Önnu á Hesteyri:

 

- í heyskap

http://jensgud.blog.is/blog/jensgud/entry/723637

- fór í bakarí

http://www.jensgud.blog.is/blog/jensgud/entry/715823/

- gestir

www.jensgud.blog.is/blog/jensgud/entry/640301

- slóst við mömmu

www.jensgud.blog.is/blog/jensgud/entry/622422

- Farandssali

www.jensgud.blog.is/blog/jensgud/entry/606305

- Sendi lögguna

www.jensgud.blog.is/blog/jensgud/entry/463661

- Leikið við aðra bílstjóra

www.jensgud.blog.is/blog/jensgud/entry/423296

- Hleypti Villa ekki frammúr

www.jensgud.blog.is/blog/jensgud/entry/409355

- Konfektkassi

www.jensgud.blog.is/blog/jensgud/entry/398785

- Ósátt við umbúðir Nupo létt

www.jensgud.blog.is/blog/jensgud/entry/398589

- Hringtorg 

www.jensgud.blog.is/blog/jensgud/entry/337158

.

  Í fyrra kom út ævisaga Önnu í bók:

  Þessi bók hefur einnig verið gefin út á geisladisk.

 

Bestu og verstu bloggarar landsins

  Í helgarblaði DV er opnugrein um bestu og verstu bloggara landsins.  Úttektin leggur út af niðurstöðu 15 álitsgjafa.  Ég er ekki alveg viss en held að hver álitsgjafi nefni 3 bestu og 3 verstu bloggarana.  Mér til ómældrar gleði er ég á lista yfir bæði bestu og verstu bloggara landsins.  Rökin fyrir að ég sé einn af verstu bloggurum eru þau að ég sé: "Besserwisser sem telur sig vita allt best".

  Það er gaman.  Besserwisser er sá sem er yfirmáta fjölfróður.  Það er ég hinsvegar ekki.  Ég er fáfróður en geri mikið úr því litla sem ég veit.  Nákvæmari lýsing hefði átt að vera:  "Gefur sig út fyrir að vera besserwisser..."  En samt.  Það er skemmtilegt að vera (ranglega) skilgreindur besserwisser.

  Lára Hanna hefur yfirburði sem besti bloggarinn.  Hún er vel að þeim titli komin.  Ég er henni ekki alltaf sammála.  Það skiptir ekki máli.   Blogg hennar er eins og fjölmiðill út af fyrir sig.  Hún leggur rosalega mikla vinnu í bloggið sitt.  Ég skil ekki hvernig hún nennir að hlaða inn á blogg sitt heimildum sem sumar spanna mörg ár aftur í tímann.  Ég kvitta glaður undir að Lára Hanna sé besti bloggari landsins.

  Verra þykir mér að Stefán Friðrik Stefánsson sé útnefndur versti bloggarinn.  Sagður hafa eyðilagt fréttabloggið og vera konung endurvinnslunnar.  Ég kann vel við blogg Stefáns.  Kíki oft inn á hans bloggsíðu.  Hann bætir fróðleiksmolum við fréttir Moggans og liggur ekki á sínum skoðunum.  Hann er íhald af gamla skólanum (Sjálfstæðisflokksmaður) en gagnrýninn á sitt fólk.  Opinskár og heiðarlegur og samkvæmur sjálfum sér. 

  Daglegur fjöldi innlita á bloggsíðu Stefáns væri ekki sá sem raun ber vitni nema vegna þess að fólk hefur áhuga á því sem þar er í boði.

  Samkvæmt niðurstöðu DV veitir Jón Valur Jensson Stefáni harða samkeppni sem versti bloggarinn.  Jón Valur er sakaður um trúarhræsni,  leiðindi og ýta undir hatur,  misklíð og heiftúðskap.

  Egill Helgason er næst besti bloggarinn.  

  Gaman væri að hlera álit ykkar á bestu og verstu bloggurum.  En vinsamlegast sniðgangið mitt nafn í umræðunni.

Heiðra minningu Helga Hóseasonar með sönglagi

  Simmi og Jói kallast tvíeyki sem þekktast er fyrir að vera kynnar í sjónvarpsþáttunum Ædol á Stöð 2.  Þeir halda úti bloggsíðu og - að ég held - útvarpsþætti.  Ég er ekki klár á hvaða útvarpsstöð.  Hef þó grun um að það sé á Bylgjunni.  Nú hafa þessir drengir hljóðritað sönglag til að heiðra minningu Helga Hóseasonar.  Lagið má heyra á:  http://blogg.visir.is/simmiogjoi/2009/09/12/vi%c3%b0-hei%c3%b0rum-minningu-helga-hoseassonar-me%c3%b0-lagi-mp3/#comments.  Þegar smellt er á rauðlitað nafn Helga hefst spilun á laginu.

  Þetta er ljómandi gott hjá drengjunum og fallegt uppátæki.  Áreiðanlega eiga þeir eftir að setja lagið einshversstaðar á netið þar sem hægt verður að hala því niður. 

  Til gamans má rifja upp að rokksveitin Atomstöðin gaf fyrir nokkru út plötu sem var tileinkuð Helga Hóseasyni.  Helgi tók því vel en þótti músíkin viðbjóður (sennilega notaði hann annað orð).  Enda lítið fyrir rokkið. 

Frábært innlegg í umræðuna

  Margir hafa tjáð sig um íslenska efnahagsviðundrið.  Sitt sýnist hverjum.  Og ekki síst hvert framhald á að vera á næstu skrefum til lausnar út úr vandanum.  Eitt besta innlegg í umræðu dagsins er að finna á heimasíðu fjölmiðlafræðinga sem halda úti heimasíðu er kallast landpóstur og vísa ég þá sérstaklega á: http://landpostur.is/news/frystum_eignir_audmanna_/

  Ljósmyndina af hugmyndafræðingi efnahagshrunsins,  Hannesi á horninu,  tók Helgi J.  Hauksson. 

Það er eitthvað skrítið við þessar myndir

  Það er eitthvað við þessar ljósmyndir sem einhvernveginn passar ekki alveg.  Hvað er með þennan krana? 

  Eða rauða bílinn með kerruna?  Er kerran ekki einkennilega staðsett á akbraut?

  Hér er greinilega Jesú með börnum.  En er rofinn ekki staðsettur á sérkennilegum stað?

  Jú,  dömurnar taka sig vel út.  En hvað er þetta með bílinn?  Á hann að snúa svona?

  Á tækinu stendur að það spóli DVD myndir á byrjunarreit.  Mínar DVD myndir gera það sjálfkrafa án aðstoðar svona tækis.  Engu að síður fylgir sögu að tækið mokseljist.  Þegar horft hefur verið á DVD mynd til enda þarf aðeins að skella því í þetta tæki og ef menn vilja horfa á myndina aftur er diskurinn settur aftur í DVD spilarann og myndin hefst aftur á byrjun.

  Til hvers er der á derhúfu?

  Ég er fæddur og uppalinn í sveit í útjaðri Hóla í Hjaltadal.  Ég kannast ekki við þennan höfuðbúnað.

  Hvað var Einar Jónsson að pæla með þessu höggmyndarlistaverki?  Karlinn virðist liggja nakinn á spena á kúnni.  Ég kannast ekki við svona úr sveitinni.

  Á skiltinu er varað við lágflugi.

Stóri dagurinn runninn upp: 11. september

  Dagsetningin 11.  september er greypt í vitund okkar sem munum eftir því þegar fasistar steyptu í blóðugri byltingu lýðræðislega kjörinni stjórn í Chile 1973.  Við tók ógnarstjórn Pinochets sem einkenndist af aftökum á pólitískum andstæðingum í þúsundatali,  hryllilegum pyntingar á pólitískum andstæðingum í tugþúsundatali og frjálshyggja.

  11.  september er líka merkur dagur fyrir það að í kvöld verður nýtt íslenskt barnaleikrit,  Horn á höfði,  frumsýnt í Grindavík.  Höfundar eru Bergur Þór Ingólfsson og Guðmundur Brynjólfsson leikhúsfræðingur.  Um tónlistina sér Villi naglbítur.       

Hvað er þetta með Bítlana?

  Breska hljómsveitin Bítlarnir er áberandi um þessar mundir.  Svo mjög að kalla má Bítlaæði.  Ég var að glugga í útlend músíkblöð í dag.  Þau skarta forsíðumyndum af Bítlunum og innsíður eru undirlagðar umfjöllun um Bítlana.  Í kvöld voru hérlendis haldnir hljómleikar þar sem íslenskir popparar fluttu Bítlalög og lög af sólóplötum forsprakka Bítlanna,  Johns Lennons.  Þegar ég tala um John sem forsprakka Bítlanna er ég að vísa til þess að hljómsveitin var afsprengi hljómsveitarinnar Quarrymen sem hann fór fyrir.  Hægt og bítandi bættust þeir við sem síðar urðu þekktasta útgáfan af Bítlunum:  Bassaleikarinn Paul McCartney, gítarleikarinn George Harrison og trommarinn Ringo Starr. 

  Framan af var John fyrirliði hljómsveitarinnar.  Áður en yfir lauk og eftir því sem eiturlyfjaneysla Johns jókst færðist hljómsveitarstjórn að verulegu leyti yfir á hendur Pauls.  George sagði eftir að Bítlarnir hættu að þeir Ringo hafi alltaf litið á John sem leiðtoga hljómsveitarinnar þótt þeir hafi sætt sig að mestu - og með ólund - við stjórnsemi Pauls.  Báðir hættu á sitthvorum tíma um hríð í Bítlunum vegna stjórnsemi Pauls.  Þeir tilkynntu John um brotthvarf sitt en ekki Paul.  En látum það liggja milli hluta.  John og Paul voru turnarnir tveir í Bítlunum.  Í mínum huga voru þeir tvíeykið Lennon-McCartney og ég geri ekki upp á milli þeirra.  Þannig lagað.

  Ég keypti áðan nýjasta hefti breska poppblaðsins Mojo.  Því fylgir diskur sem inniheldur öll lögin af síðustu plötu Bítlanna,  Abbey Road,  krákuð (cover) af Cornershop,  Robyn Hitchcock,  Gomez og fleiri.  Blaðið hefur áður gefið út fylgidiska með krákum af öðrum Bítlaplötum.  Það er ekki erfitt fyrir Mojo að smala saman lögum á þessa diska.  Hvert einasta Bítlalag hefur verið krákað af þekktum poppurum.  Sum lögin af allt að 2000 flytjendum sem tilheyra ólíkum músíkdeildum:  Djassi,  kammersveitum,  pönki,  kórum,  progi,  kántrýi,  þungarokki,  tölvupoppi og svo framvegis.

  Oft heyri ég Bítlunum hallmælt og þeir taldir ofmetin hljómsveit.  Oftast vegna þess að þeir sem halda þessu fram telja Bítlana hafa verið léttvægt poppfroðuband.  Vissulega er yfirdrifið nóg af léttpoppi á plötum Bítlanna.  Bunki af lögum sem mér þykja leiðinleg.  Á móti vegur að á plötum Bítlanna er einnig að finna spræk rokklög,  sýru,  furðulega framúrstefnu,  þungan blús,  djass,  heimspopp (world music) og allskonar öðruvísi lög.  Ég hef mörgum sinnum sett saman (brennt) diska með Bítlalögum sem komið hafa formælendum Bítlanna í opna skjöldu.  Í öllum tilfellum með þeim árangri að viðkomandi hefur orðið aðdáandi Bítlanna.

  Það merkilega við vinsældir Bítlanna er að hljómsveitin starfaði stutt.  Fyrsta platan, Please Please Me,  kom út 1963.  Síðasta alvöru hljóðversplatan,  Abbey Road,  kom út 1969.  Hljómsveitin starfaði síðast saman það ár en opinberlega hætti hún 1970.  Síðan eru liðnir 4 áratugir og margar hljómsveitir náð háum hæðum.  En það eru Bítlarnir sem eru fyrirferðarmestir í dag. 

  Fá lög er að finna með Bítlunum á youtube.  Ég fann þó tvo létta Bítlablúsa.  Gaman væri að heyra viðhorf ykkar til Bítlanna.  Mér þykir gaman að þrefa um Bítlana.

     

Sprenghlægilegar merkingar

  Manneskjan sem vinnur í þessari matvörubúð virðist ekki vita hvað viðkomandi ávöxtur heitir.  Eða hvort manneskjan reiknar með að viðskiptavinirnir viti ekki hvað banani er.  Að minnsta kosti er sérkennilegt að merkja bananana sem "Bogna gula ávöxtinn á 40 cent".

  Af lögun þessa umferðarmerkis er næsta víst að um stöðvunarskyldu er að ræða.  Gárungi hefur brugðið á leik vegna snjólagsins sem hylur merkið og skrifað "Halda áfram".

  Það er ekki að undra að seljandi þessara sítróna veki athygli á að þær henti fullkomlega í að búa til appelsínusafa.  Hann veit sem er að flestir halda að appelsínur séu heppilegri þegar verið er að búa til appelsínusafa.

  Bílnúmer með blöndu af bókstöfum og tölustöfum geta oft myndað skemmtilega útgáfu.  Hér mynda bókstafirnir nafnið Guð og tölustafirnir 666.  Samkvæmt kenningum þeirra sem trúa á guð er 666 tákn djöfulsins.  

  Verðmiðinn hefur lent ofan á fremsta staf á nafni framleiðandans á þessum kattamat.  Vegna þess virðist varan heita "Endaþarms draumórar".

  Sorgmæddur rúmenskur aðdáandi Michaels Jackssonar hefur brugðið á það ráð að deila harmi sínum með viðskiptavinum.  Til að heiðra minningu Michaels Jacksonar hefur aðdáandinn slegið upp sérstöku tilboði á mið-austurlenskum kjötrétti:  Ef keyptir eru 3 skammtar fylgir sá 4ði með sem kaupauki til minningar um Michael Jackson. 

  Á spjaldinu stendur "Ósýnilegt límband".  Vissulega er ekkert límband að sjá.  Ummerki benda þó til að einhver hafi hnuplað límbandinu af spjaldinu.

  Ein þekktasta plata rokksögunnar er "Wish You Were Here" (Ég vildi óska að þú værir hér)  með Pink Floyd.  Á skyrtubolnum hefur orðinu "bjór" verið skipt inn í staðinn fyrir "hér".

  Nafn bókarinnar er "Lækningamáttur krabbameins".  Höfundurinn er kona sem útlistar í heilli sjálfshjálparbók hvernig krabbameinssjúklingar geta notað meintan lækningamátt krabbameinsins.  Það voru raddir í höfði konunnar sem laumuðu þessum fróðleik að henni.  Hún heldur því fram að sérstök ástæða liggi að baki því að fá krabbamein og því fylgi blessun.  Bókin fæst í búðum sem selja nýaldarvörur.

  Reyndar er ég ekki viss um að myndin sýni umrædda bók.  Undirtitillinn þarna er "Músík til slökunar fyrir líkama og sál" og stærðin á pakkningunni passar við geisladisksumbúðir.  Kannski er kerlingin að fylgja bókinni eftir með geisladisk?

Taktu laugardagskvöldið frá

  Það verður heldur betur líf og fjör og skemmtilegt næstkomandi laugardagskvöld.  Það er betra og öruggara að taka laugardagskvöldið frá í tæka tíð.  Þetta gefur fólki úti á landsbyggðinni gott tækifæri til að bregða sér í borgarferð og þeim sem eru staddir erlendis ástæðu til að skjótast upp á Klakann og velta sér upp úr ónýtri krónu.

  Eins og sést á myndinni hér fyrir ofan eru það risarnir tveir í íslensku þungarokki,  Sólstafir og XIII,  sem munu troða upp í Sódómu Reykjavík á laugardaginn,  klukkan 22.00.  Um Sólstafi vísa ég til http://jensgud.blog.is/blog/jensgud/entry/919886/.  Þetta verða síðustu hljómleikar Sólstafa á Íslandi í bili.  Hljómsveitin er þétt bókuð erlendis næstu vikur og gott ef hljómsveitin er ekki búsett í Bretlandi.

  XIII verður með "classic line up" af meistaraverkinu  Salt  sem kom út 1993.

Hugljúf og örstutt saga af miðaldra manni

  Líf Palla var eins og tilvera uppvaknings.  Hann þurfti ekki að hugsa.  Þess vegna sleppti hann því.  Á hverjum degi endurtók hann án hugsunar sömu hluti og hann hafði áður gert í áratugi.  Hann vaknaði á morgnana,  fékk sér kókópöffs á meðan hann renndi í gegnum Fréttablaðið.  Um leið og hann lagði frá sér blaðið var hann búinn að gleyma hvað stóð í því.  Svo var mætt í vinnuna.  Þar stóð Palli við færibandið og endurtók sömu handtökin allan daginn.  Á kvöldin sofnaði Palli yfir heimskulegum þáttum á Skjá 1 sem eru alveg eins og allir hinir þættirnir.

  Um helgar lá Palli yfir myndum sem hann leigði í Skjábíói.  Margar þeirra hafði hann áður séð.  Það skipti ekki máli.  Hann mundi lítið eftir þeim. 

  Tilvera Palla breyttist í haust.  Einn úfinn mánudagsmorgun í miðri viku vaknaði Palli við að hann var orðinn skólataska í ritfangaverslun.  Honum þótti það kjánalegt og skammaðist sín dálítið.  Skömmu síðar kom menntaskólastelpa og keypti töskuna.  Við vinkonur sínar sagði stelpan:  "Djöfull er þetta ljót og asnaleg taska.  Mig hefur alltaf langað að eiga virkilega ljóta tösku."  Palla sárnaði þessi orð.  Á móti kom upp í honum stolt yfir að seljast svona fljótt.  Hann fann til fyrirlitningar í garð skólataskanna sem voru óseldar í búðinni.  Hann sendi þeim tóninn í huganum:  "Þvílíkir lúserar.  Þið seljist sennilega ekki fyrr en á útsölu og þá fyrir einhverja smáaura."

  Síðan Palli var seldur hefur hann komið á marga staði sem hann hafði ekki áður komið á.  Hann hefur hitt miklu fleira fólk en áður.  Og það allra besta er að nú er stöðugt verið að troða í hann námsbókum.  Það hafði ekki tekist áður.   

Fleiri örleikrit og smásögur:

- Leyndarmál stráks

http://jensgud.blog.is/blog/jensgud/entry/928198

- Ættleiðing

http://jensgud.blog.is/blog/jensgud/entry/916687/

- Strákur með sög

http://jensgud.blog.is/blog/jensgud/entry/903540

- Hundur

http://jensgud.blog.is/blog/jensgud/entry/863130

- Boltabulla

http://jensgud.blog.is/blog/jensgud/entry/718347

- Skokkari

http://jensgud.blog.is/blog/jensgud/entry/606929

- Strákur skiptir um gír

http://jensgud.blog.is/blog/jensgud/entry/538649

- Morðsaga

http://jensgud.blog.is/blog/jensgud/entry/320299

- 27 ára

http://jensgud.blog.is/blog/jensgud/entry/299380

- Um borð

 http://jensgud.blog.is/blog/jensgud/entry/278812

- Matarboð í sveitinni

http://jensgud.blog.is/blog/jensgud/entry/266411

- Í plötubúð

http://jensgud.blog.is/blog/jensgud/entry/260037

Bráðskemmtilegar ljósmyndir af rónum

  Margir hafa undrast hvers vegna flestir rónar líta úr eins og nýkomnir úr góðu átaki í líkamsrækt þegar þeir voru í raun bara á nokkurra daga fylleríi.  Nú hefur rannsókn leitt í ljós að þegar langdrukknir menn komast í tiltekið ölvunarástand þá leitar líkami þeirra ósjálfrátt í helstu jógastellingar,  eins og sjá má á meðfylgjandi ljósmyndum.  Manneskjan á myndunum til vinstri er að mestu edrú.  Hún stundar jóga. 

Þessi stelling kallast "Savasana" sem þýðir fullkomin afslöppun.  Fólk fer oftast í hana í lok jógatíma eða í lok erfiðs drykkjudags.

 

"Balasana" heitir þessi stelling.  Í henni er upplifun á frið og ró sterkust.  Galdurinn er að fótleggir og tær þurfa að snerta gólf eða jörðu.  Höfuð slútir niður en annar hluti búksins er ofar.

 

"Setu Bandha Sarvangasana" er nafnið á þessari erfiðu æfingu.  Fótleggir snúa beint niður en læri og magi liggja ofar.  Hendur,  herðar og höfuð þurfa að liggja á gólfi eða jörðu.  Stellingin hvílir þreytt læri um leið og hún róar hugann. 

Hér eru kviður og hryggjasúla styrkt með stellingunni "Marjayasana".  Fótleggir liggja samhliða eftir gólfi eð jörðu,  læri eru lóðrétt og bakið er bogamyndað. 

Þessi flókna stelling kallast "Halasana".  Hún vinnur gegn bakverkjum og svefnleysi.  Hún er svo öflug að sumir sofna í henni.  Mikilvægt er að höfuð liggi á gólfi eða jörðu og bakið sé þráðbeint upp í loft.

Ekki má gleyma að styrkja axlasvæðið og brjósthol.  Það er gert með æfingunni "Dolpin".  Maðurinn framar á myndinni til hægri telur sig vera með svo ágætt brjósthol og axlir að hann sleppir þessari æfingu.

Þá er komið að "Salambhasana" til að styrkja mjóhrygg og fætur.  Nauðsynlegt er að hælar séu hæsti punktur og hendur liggi eftir hliðum.  Ef undirlag er gott er æskilegt að höfuð liggi einnig hátt.  Maðurinn á myndinni til hægri fann ekki gott undirlag en gerir sitt besta í þeim aðstæðum.

Höfuð og bak þurfa að liggja þétt á gólfi eða jörðu og fætur mynda efsta punkt.  Æfingin,  "Ananda Balasana",  er góð fyrir mjaðmirnar.

Í lokaæfingunni er tekið á honum stóra sínum í "Malasana".  Trixið er að fætur standa á gólfi eða jörðu og rass látinn ná næstum því jafn langt niður en má þó ekki snerta undirlagið.  Æfingin styrkir bakvöðva og ökkla.

Kvikmyndarumsögn

 - Titill:  Reykjavík whale watching massacre

 - Leikarar:  Helgi Björnsson,  Guðrún Gísladóttir,  fjöldi útlendinga og fleiri

 - Handrit:  Sjón

 - Leikstjóri:  Júlíus Kemp

 - Tónlist:  Hilmar Örn Hilmarsson

 - Einkunn: ** (af 5)

  Ég er rosalega jákvæður þegar ég horfi á nýja íslenska kvikmynd.  Þá sest ég glaður niður,  leiði að mestu hjá mér það sem miður fer en fagna þeim mun meira því sem betur heppnast.  Þegar leið á Reykjavík whale watching massacre fjaraði jákvæðnin út.  Við tóku geispar og andvörp.

  Það hljómar ekki vel að segja þetta.  Og myndin er ekki alvond.  Handritið er klárlega miklu betra en myndin.  Söguþráðurinn er fínn og samtöl vel skrifuð.  Barnalegar ranghugmyndir sumra hvalavina og rasismi eru teygð sundur og saman í háði.  Tónlistin er frábær.  Leikarar standa sig með prýði.  Stjörnurnar eru Guðrún Gísladóttir og Helgi Björnsson.

  Með úrvals leikara,  handrit eftir Sjón og tónlist eftir Hilmar Örn Hilmarsson hefði útkoman átt að verða snilld.  En leikstjóranum,  Júlíusi Kemp,  tekst að klúðra þessu góða hráefni sem hann er með í höndunum.  Júlíus hefur áður afrekað það að leikstýra lélegustu kvikmynd Íslandssögunnar,  Blossa.  Það má nota um Reykjavík whale watching massacre orðatiltækið að góður biti fari í hundskjaft (æ,  þetta hljómar voða ruddalega). 

  Nafnið Reykjavík whale whatching massacre segir um hvað myndin fjallar:  Hvalskoðunarhóp sem lendir í höndum á morðóðri fjölskyldu. 

  Myndin er kynnt sem spennuhrollvekja.  Hún stendur ekki undir þeirri lýsingu.  Margar senur bjóða reyndar upp á spennu og hroll.  En leikstjórinn nær ekki að koma spennunni og hryllingnum til skila.  Áhorfandinn finnur ekki til samúðar með fórnarlömbum ofbeldisins og er sama um örlög þeirra.  Þar fyrir utan eru persónurnar myrtar svo snöggt og fumlaust að morðin verða eins og hálfgerð aukaatriði.  Persónurnar eru kannski á spjalli.  Svo flýgur haus af.  Blóð spýtist í nokkrar sekúndur.  Síðan er klippt yfir í næstu senu.  Þetta er allt eitthvað svo hrátt og nakið.  Það er ekkert skilið eftir fyrir ímyndunaraflið.  Það er engum lúmskum vísbendingum plantað í undirmeðvitund áhorfandans til að framkalla óþægindatilfinningu og vekja upp ugg varðandi það sem mun gerast.

  Þó mikið sé um blóð í myndinni og fjöldi manns meiddur eða drepinn þá er hún grínmynd fremur en annað.  Samt er hún eiginlega ekki nógu fyndin til að vera flokkuð sem grínmynd.    

  Í bíóhléinu var ég alvarlega að íhuga að sleppa því að horfa á seinni hlutann.  Mér leiddist undir myndinni.  Ég harkaði þó af mér og horfði á myndina til enda.  Ég hefði alveg mátt sleppa því.  Í seinni hlutanum leystist myndin einhvernveginn upp.  Eftir hraðann um miðbik myndarinnar hægði klaufalega á og fátt bar til tíðinda.  Enda flestar persónurnar dauðar.

  Mér þykir mjög miður að geta ekki mælt með Reykjavík whale watching massacre sem góðri kvöldskemmtun.